03 يونيو 2011

3- قال يا مأمنة للرجال..!

......

ده تالت بوست
في حملة التدوين اليومي!
معــانا يا رب :)

النهاردة كان قصادي موضوع
بس نـــكد أوفر أوي،، مارضتش أنزله
قولت بلاها النكد التدويني،، وخليها ليوم تاني
عشان أنا لسه منكدة عليكم أول أمبارح،، حرام بقى
وبما إننا لسه مع بعض شهــر إن شــاء الله
أبقى أنكد عليكم قريب،، تمـــام!



وقال على رأي المثل
يــا مــأمنـــة للــرجــــال،،
يا مأمنة للحزب الوطني في البرلمان
يا أختى الراجل من دول،، أول ما يتجوز البنية
وخلاص يوصل لغرضه،، يديها الوش الخشب على طول
وقال أنا كنت ظالمة رجالة الشرق،، طلع الراجل راجل
وصدق من قال،، الغربان دايمـًا ســــودة

يا عيني البت كيت مالحقتش تتهنى في قصر عدلها
والمخفي ويليام طلقها وهم ماكملوش شهرين!!
أنا قولتلها من الأول،، ما تتجوزش ابن تشارلز ماصدقتش
وأقولها،، يا بت اسمعي مني وبلاش الجوازة دي!
ده جابوا الجردل وقلبوه،، يطلع ويليام لأبوه
هي ديانا كانت تتعيب،، دي كانت قايدة العشرة عشانه
وبرضو سابها وراح لولية قد مرضعة أحموس
بس نقول إيه،، كيت كانت بتحبه بقى
أهو كله نصيب،، أهي طلعت بدوقة برضو

أصلا هو من الأول ما كنش شاري
ده حتى ماهنش عليه يجيب لها شبكة زي باقي البنات
وراح مديها خاتم أمه،، وقال لفتــة وفـــاء
جتها خيبة،، ده بخل واستخسار بس مين يسمع!!



وقال حفل جواز أسطوري،، إلا حتى ما توزع فيه
ساندوتش جبنه رومي وإزازة سيفن آب!!
والراجل أبوه كان مكسوف ،، ده حتى عيط من كسفته
قصاد المعازيم اللي جاية من سكة سفر،، من بانج بورن
على لحم بطنهم،، ودول فلاحين وهايفضحوه على قلة الأكل!!

وكله كوم،، ولما ينزل شغله بعد 4 أيام،، ده كوم تاني
ليه يعني هو كان واخدها من الشارع،،!!
ينزل ويسبها قبل ما يسبعوا!!
دي تربية ولاد الأصول والنبلاء برضو؟!
أنا قولتلها ،، من أول ماعاد البوسة في الفرح،،
الواد شكله ما يطمنش كده!!!، وهو قال راح شغله قال؟!
وبعد ده كله يقولك،، كانت غلطة كبيرة بكل المقايس؟؟

أم كيت بقى سمعت الكلام ده من هنـــا
وحلفت لتبهدله في محكمة الأسرة اللي في لندن
وهاتاخد كل العفش،، وتسيبله القصر ع البلاط
أمال،، وهي معاها قايمة محترمة،، كاتبهالها محامي
هو صحيح العفش بالقسط،،، بس طلعة ناصحة
كتبت الفاتورة باسم كيــت،، والشيكات باسم ويليـام
ألا يكون فاكر إنها هاتخيب خيبة ديانا،، وتسيب عفشها
زي ما ديانا سابته للمخفية كاميلا تتهنى بيه مع تشارلز!!

يعني البت صبرت على خطوبة سنة ونص
ومن غير شبكة،، وضحك عليها بخاتم أمه ديانا
وفرح من غير بوفيه،، ولابس بدلة سواق وحمرا كمان
ومعرفش يبوسها قصاد وكالات الانباء،،
وكانت فضيحة عبر الأقمار الصناعية!!
ويسيبها قبل ما يسبعوا،، وينزل الشغل بعد 4 أيام من الدخلة
والبت صابرة وساكتة يا قلب أمها،، وفي الأخر يطلقها
وكمان بعد شهر ونص،، وقال يقولك إيه،،،
أتمنى إني ألاقي إنسانة تنسيني التجربة الفظيعة!!

صحيح رجالة ملهاش أمان،،
لو حتى كانوا من سكان باكنجهام!!



هناك 32 تعليقًا:

  1. ههههههههههههههههههههههه
    يالهوي ضحكتيني قوييييي
    انت بهدلتيهم خالص
    انا هموت و اعرف ايه السبب
    ممكن يكون مصروف البيت !!
    البوست ده يجنن

    ردحذف
  2. على فكره انا شاكك في الواد ده :) وانها هي اللي طلبت تخلع فراح مسبق وقال اطلقها قبل ما تفضحني وبعدين ربط مع الاعلام البريطاني انهم يداروا على فضايحه وخيبته القويه علشان شكل بريطانيا ادام العالم ميبقاش مهزوز زي صورة تليفزيون جولدي ...آه آدي أخرة أكل الفراخ البيضا والعيش الفينو ... رجالة اخر زمن :)

    ردحذف
  3. هو ايه اللي وقع كيت ميدلتون في العيلة الواقعة دي
    دي عيلة مش بتععشلها جوازات
    الاميرة آن وتشارلز والامير اندرو كلهم طلقوا واتطلقوا دول ناس مبيصونوش العشرة
    وبعدين الواضح كده ان اليزابيث قالتلها خدي الغيارات بتاعتي فومين على ايدك البنت قالتلها انا اقل من هيلاري كلينتون متجبولي غسالة فول اوتوماتيك بدل كفيتي على تشت الغسيل
    ومن هنا كانت المشكلة غيارات اليزابيث
    بعيد عن الكوميديا الجوازة دي كنت متوقع انها متكملش لأنه معروف ان كيت ميدلتون شخصيتها قوية وكفاية انها اتخانقت مع ويليام سنة كاملة متكلمهوش لحد ما ولاد الحلال وفقوا بينهم يبقى راسها ناشفة ومادام راسها ناشفة مش هتستحمل غطرسة العيلة المالكة وطبيعي ان الجوازة متكملش
    طبعا دمك خفيف اوي يا فتافيت وضحكتيني جدا وبيعجبني قلمك الساخر دايما
    تحياتي

    ردحذف
  4. البئر والظما

    ههههههههههههههه
    هو مصروف البيت اكيد
    في ظل الازمة المالية العالمية
    اكيد الولية اليزبيث قرطت عليها في الفلوس
    البت حابت تجيب تمن رومي والولية صممت على جبنة بيضا.. عشان التوفير... ناس قيحة حقيقي :))

    البلوج نورت :)

    ردحذف
  5. تامر علي

    هههههههههههههع هههههههههههههع
    انا بقول كده والنبي .. هو شكله مش مريح :)))
    يلا هي العيلة دي ما بيعيش لها ستات اصلا
    واكيد العيب مش في الستات طبعا
    :))... نورت يا فندم

    ردحذف
  6. مصطفى سيف

    هههههههههههههههههه.. قولتلي بقى
    اتاري الاجهزة في انجلترا على الراجل.. :)))
    وغيرات اليزبيث ههههههههه يع يع يع :)).. طيب مهي البيت كيت كده عندها حق بقى.. دي خية ايه دي

    بعيدا عن التهريج
    مافيش اي واحدة في الدنيا تستحمل العيشة في البلاط الملكي.. ولا تتحمل غطرسة العائلة المالكة
    خاصة لو كانت في رقة ديانا.. او قوة كيت!!
    هم عايزين عرايس بلاستيك.. غسيل وماكوة :))

    نورت يا دكترة :)

    ردحذف
  7. تدوينة خرافة
    والله ما ابتسمت الصبح الا لما قريتها
    الله يسعدك

    ردحذف
  8. رندة أبو رمضان

    نورتي المدونة
    وربنا يسعد كل ايامك
    صباح سعيد ويوم اسعد ان شاء الله

    ردحذف
  9. العيلة دي مبيعشلهاش حريم من ايام ديانا
    والولية القرشانة جدته دي اكيد ليها ايد في الموضوع امال ايه
    دي كانت منكدة علي ديانا الله يبشبش الطوبة اللي تحت تابوتها نكد لحد مطفشت البت حتي من غير شنطة هدومها
    قلبي معاها والله البنية لسة مربعنتش

    ردحذف
  10. دة الخبر بتاع موقع اونيون :)
    موقع اونيون بينشر أخبار ساخرة كتيرة اوي اوي
    و بيفبركها بخياااااال عشان تبقى كوميدية :)
    كتابتك جميلة .. :)
    مدونتك حلوة اوي .. فعلا الحملة التدوينية دي يا رحاب عرفت الواحد على مدونات حلوة اوي :)

    ردحذف
  11. والله تدوينة مسخرة ههههههههه
    حرام عليكي فضحتي الواد
    ما طلقهاش ولا حاجة وطلعت اوشاعة اوشاعة
    انتو ما صدقتو ؟؟
    قولي انو انتي اصلا عينك عليه وما صدقتي تشمي ريحة خبر انو خلع
    اعترفي اعترفي :P

    ردحذف
  12. ال BBC من شوية اذاعت فضيحة كبرى فى القايمة
    القايمة كان موجود بها بوتجاز اطلسخمس عيون بفرن و مروحة و شواية راحو لقوه مسطح مصانع و بعينين و من غير انبوبة
    بيقولوا ان سبب الخلاف البوتجاز اللعين ده الانبوبة فضيت و كيت كانت عايزة تعمل طبق الفول اللى بالبيض و مرديش ينزل يملى الانبوبة من مستودع انابيب لندن
    طبعا هى عائلة متغطرسة مينفعش معاهم غير عينة كاميلا
    تحياتى

    ردحذف
  13. فتافيت ابتديت اتابعك مع اول الحملة و سعيدة جدا اني عرفت مدونتك
    انا مبطلتش ضحك طول الوقت انتي زي السكر و الله
    و تاني هاقولك سعيدة بالتعرف علي مدونتك
    صباح الفل

    ردحذف
  14. ورغم انه خبر كذب
    بس ربنا يحظك يا فتافيت
    يارب يكرمك من حيث لا تدري ولا تحتسبي

    وقال يا مأمنة للرجال
    يا مأمنة إن وليام شغال :)

    ردحذف
  15. والله انا قولت مش هيعمروا مع بعض بس مكنتش متخيلة بالسرعة دى :))

    ردحذف
  16. يالهوووووووووى دانتى كأنك جارتهم اللى قاعده راميه ودنها عليهم هههههههههههههههه

    بس بقولك هو ميستهلهاش ده قبل الفرح بكام يوم رايح يعملى كليب مع سنوب دوج

    ياختى ده ولا فى مراعيه للشعور ولا للاحساس
    رجاله فاضيه هههههههههههههه
    واهو كسفنا ادام القلل المتحده

    ردحذف
  17. يعنى الخبر صحيح
    انا قريته فى مدونه تانيه بس قلت هزار ونق
    كدا الخبر صحيح
    وطلع ويليام عايش فى جلباب ابيه

    ردحذف
  18. ههههههههههههههههههههههههه
    جااااامده بجد
    ضحكتينى اوووى
    مش فاهمه انا ايه الجوازه المنيله دى
    تطلق فى الاسبوع الخامس!!
    انا شاكه فى الواد ويليام السهتان ده من الاول

    ردحذف
  19. أحمد عيسي

    ههههههههههههههههه
    هو حد يعاشر العقربة اليزبيث ويعمر
    دي ولية بشعة.. اسألني انا عنها :))))
    نورتي يا فندم :)
    تحياتي

    ردحذف
  20. قهوة بالفانيليا - شيماء علي

    هو مش بس على السايت ده
    هي اوشاعة وكبرت اوي.. والعالم كله عايز يصدقها :))
    حقد يا امي على البونية والنبي :))

    انتي مدونة اجمل.. كفاية اسمها
    عاجبني بشكل يجنن :)

    وفعلا الحملة دي عرفتني على ناس كتير
    سعيدة جدا بالتواصل يا شيماء :)

    ردحذف
  21. عـلا - من غـزة

    هههههههههههههههه
    ههههههههههههه.. والنبي يا اوختشي
    ده حفي ورايا وساق عليا ابوه تشارلز ومرات ابوه الولية كاميلا.. وانا على كلمة واحدة
    ماخدووش يا بابا ماخدووش يا بابا :)))

    نورتيني يا قمر
    وماتعرفيش بكون سعيدة ازاي لما حد من غزة
    يجي فتافيت.. اني احبكم في الله :)

    ردحذف
  22. ابراهيم رزق

    طيب اهو .. شوفت
    يعني البت بنت عز وابوها رجل اعمال
    متعودة على الفول بالبيض.. والبوتوجاز الاشعال الذاتي... ياخدوا بنات الناس يبهدلوهم كده

    انها حقـًأ عائلة فكسااااانة :))

    نورت يا فندم البلوج :)

    ردحذف
  23. Mona Abo - Elso3od

    يا صبح النور والجمال :)
    انا الاسعد والله.. وان شاء الله نكون على تواصل
    الحملة دي عرفت ناس كتير ببعض
    رغم اني حاسة اني ادبست فيها عشان موضوع بوست كل يوم ده.. لكن بجد ثمارها تستاهل التعب :)

    نورتي يا جميلة

    ردحذف
  24. ستيتة حسب الله الحمش

    اوشاعات .. عرفت كده فعلا :))
    سوتايتة.. موووووة

    والله اني احبك في الله
    ربنا يخليكي ويبارك فيكي.. ويفرح قلبك بولادك
    قولي اميييييين :)

    ردحذف
  25. ღ أحاسيس آيـــوشـه ღ

    هههههههههههههههههههه
    احنا في عصر السرعة
    الناس دي اتحسدت بقوة 100 الف عربي في الثانية :))
    بس بيقولك طلع اوشاعات :))))

    ردحذف
  26. iـــــــــــsــــــــــlــــــــــــaـــــــــm

    هههههههههههههههههههههه
    لا دي كيت صاحبتي الانتيخ
    هي صحيت بدري شوية واتجوزت ويليام.. ^_^
    ودي فوايد نام مبكرا تسيقظ مبكرا :))

    نورتني :)

    ردحذف
  27. بسنت

    والله محدش عارف
    مواقع اكدت الخبر ومواقع قالت انه اوشاعة :))
    بنفكر نتصل بكرومبو يشوق الموضوع ^_*
    وبعدين لازم يطلع لابوه اصلا
    جابوا الجردل وقلبوه.. سي السيد طالع لأبوه
    دي قاعدة مثبته علميا في جينات الوراثة :))

    ردحذف
  28. Bent Men ElZaman Da !!

    الظاهر ان ويليام ده.. كل الشعب شاكك فيه
    ههههههههههههههههههههههه
    بس بيقولولك اننا ظلمناه.. وانها اوشاعة
    محدش لسه عارف.. كله هايبان
    لما البت كيت تظلع في البرامج رابطة راسها
    واقفة على باب محكمة الاسرة بتقول.. اريد خلعا :))

    ردحذف
  29. اغزي الشيطان يا كيت يا بنتي ،،،، دة عين يا جماعه وحطت فيكو

    ردحذف
  30. موقع فتافيا دة حاجة اخر شلل ،، واكيد اللي عامله بنت عشان الدم التقيل دة كله

    ردحذف

خلل براحتك من غير انتظار .. فتافيت أصلاً بتحب الخيار