26 يونيو 2011

26- أقر بندمي الشديد،، تغيير وجهة نظـــر!!

:
:

ده البوست الــــ 26
في حملة التدوين اليومي،،
نـــدم وتغييــر وجهـة نــــظر!!،،
كان له صورة،، ومسحتـها!!

البوست طويل،، ولو بتزهق
أقفله وريح نفسك
:))

من فترة كنت في زيارة لمدونة أخي الفاضل أ، ماجد القاضي،، وكان البوست عن حقيقة عبد الناصر،، ووقتها أنا أشدت بالبوست جداً،، فرد ساخراً أن أكيد لو كتب عن السادات مش هارفعله القبعة أبداً،، ورديت أن بوست حقيقة السادات عليا أنا،، ده أنا عايشة ربع قرن مخدوعة!!،، خلوني أبدأ الحكاية من الأول،،

من حوالي 6 شهور يمكن أكتر شوية،، أخ عزيز وفاضل،، رشحلي عريس (م) وزي ما بيقولوا الجواب بيبان من عنوانه،، فلأن اللي رشح لي الشخص ده على دين وخلق وثقافة (ولا أذكي على الله أحداً)،، كان العريس على نفس الشكل،، المهم في أخر قعدة لنا سوا،، في وسط الكلام جت سيرة السادات،، وقولت وبراءة الأطفال ها تبوظ من عيوني،، إني بحب السادات جداً!! (فيها عاجة دي)،، وإذ فجأتن ألاقي أخته الكبيرة طلعت مرة واحدة بنظرة إشمئزاز وبصوت،، عالي،، حاد،، غاضب،، رنان،، استفزني جداً وقالت (أتفضل يـا (م) أديها طلعت بتحب السادات أهو!!)،، أنا اتخضيت وراجعت كلامي في دماغي،، أنا لا قولت إني عليا قضية آداب،، ولا قولت إن ماما رقاصة،، ولا حتى قولت أن بابا بيضرب بانجو!!،، عشان يبقى ردها لسان حاله بيقول،، أتفضل شيل مجايبك يا أستاذ!!،، المهم إني وقتها (بعيد عنكم جميعـًا) نظرت لها شذراً،، وطبعا النظرة كانت قاتلة كالعادة،، وموضوع السادات أتقفل خلال دقيقة،، وما لفتتش وشها ليا تاني ولا كلمتني كلمة واحدة لحد ما مشيوا،، وفي نفس ذات الوقت الجوازة باظت!



بعدها بحوالي أسبوعين أخت عزيزة وفاضلة،، رشحت ليا عريس (ن)،، وكان برضو على قدر من الثقافة والعلم،، ومعرفش ليه وأنا قاعدة معاه مخي زقزق ولساني كلني قومت فاتحة سيرة السادات (بقت عقدة بقى ربنا يسامحها)،، وكانت القاعدة دي الأخيرة برضو (تقريبا سيرة السادات فقر عليا ما بتخليش عرسان تعيشلي)،، المهم إنه أشاد بيه جداً،، وقال نفس اللي كنت بقوله عليه،، الرئيس المؤمن،، قاهر إسرائيل،، رافع راس مصر بين الأقطار الشقيقة والغير شقيقة،،، إلخ!!،، قولت طيب قشطة مهو السادات طلع بيس أخر حاجة،، لكن على حين غرة قال بلسانه إنه،، عضو فعال في الحزب الوطني ويعشق مبارك كمان!!،، وده كان سبب قوي إني أقتله كما قـُتلت شجرة الدر،، مش بس أفركش أم دي جوازة!

في الوقت ده حسيت باختلال قوي جداً جوايا،، أزاي واحد إسلامي (م)،، ويكون من كارهي ومحتقري الرئيس المؤمن!!،، وفي نفس الوقت واحد تاني عضو في الحزن الوثني (ن)،، ويكون بيحبه وشايفه بطل؟؟!!،، وقتها شخصية بثق فيها قالت،، (بلاش تدوري على حقيقته خلي حاجة في تاريخ مصر مشرفة في نظرك وتفخري بيها!!)،، كلامها وجعني وخوفني إنه فعلا يطلع وحش،، مهو زي ما أنصار عبد الناصر شايفينه زعيم الأمة وأنا شايفاه فقاعة هواء،، وزي ما أنصار مبارك شايفينه الحكيم بطل الحرب والسلام وأنا شايفاه الخاين واكل شعبه وناسه،، ممكن السادات يطلع كده برضو،، ويبقى رؤساء مصر كلهم بوسة كبيرة وحضن كبير!!،، وأحط على راسي طرحة سودة وأصوت!!



لكن فجأة جت ثورة يناير،، وما بقتش محتاجة أشيل وهم ممكن يطلع صح أو يطلع غلط عشان أفخر بيه،، إذا كنت دلوقتي فخورة بنفسي مش بس فخورة ببلدي اللي غيرت الواقع!!،، وجه يوم التنحي اللي بيصادف يوم خلع شاه إيران،، وكان ده أول قفا أخده،، ماكنتش أعرف أي حاجة عن ثورة إيران لكن القدر خلاني أعرف عنها كل حاجة بالصدفة دي،، شاه إيران ده كان فاسد ومنيل بستين نيلة على دماغه،، طيب ليه السادات عمل معاه نفس الموقف المشين اللي عمله ملك السعودية مع المخلوعين؟!،، ليه الرئيس المؤمن يستضيف ويحمي الشاه الظالم الفاسد؟؟،، ليه أستفز شعب طالب بالحرية وقوله أنا بقى هاحمي اللي طلع عين أهلكم واستضيفه في مصر بعد خلعه؟!،، أعتقد إن المبادئ ما بتتجزئش أصلاً!!،، وكانت أول نقطة سودة ليه عندي!

بدأ بعد كده موضوع المرحوم الفريق الشاذلي،، يوضح ويظهر والحقيقة كاملة تنجلي، ولولا إن أقسمت قسم غليظ إني ما جبش سيرة الجيش المصري في المدونة خالص،، كنت قولت كتير في الموضوع ده لكن باختصار شديد جداً،، الشاذلي ما قصرش أبداً ولو السادات كان سمع كلامه،، لا كان هايبقى فيه ثغرة ولا حادثة 14 أكتوبر ولا حتى كامب ديفيد،، لكن نقول إيه بقى؟!،، وهنا وضحت أوي ديموقراطية السادات اللي بأنياب،، لما عمل للشاذلي إقصاء عشان خالفه الرأي،، كالعادة السياسة والعسكرية ما بيتفقوش كتير،، لكن الإقصاء والتضليل وتبديل الحقائق مالهمش ملة،، لا سياسية ولا عسكرية، دول سمات شخصية!

بعدها كرامتي نقحت عليا جداً،، (لاع مش هافضل عايمة على ماية البطيخ) لازم أشوف الحقيقة،، ووقع بقى تحت إيدي كتاب -خريف الغضب- لحسنين هيكل!،، وده بقى لا قفا ولا حتى شلوط،، ده كان علقة موت رجعتلي عقلي فعلاً!!،، خليني أقتبس مقطفات لاقتها مكتوبة في سايت،، عشان مش قادرة أنقل من البي دي إف،، الاقتباسات من صفحة 312 إلى صفحة 318،، هدايا السادات للحلفاء والأصدقاء!!،،:

- في فبراير ومارس 1971 قدم الرئيس السادات هديتين،، واحدة للرئيس تيتو وأخرى للرئيس بريجينيف،، كانت هدية تيتو عبارة عن تمثال واقف للإله أوزوريس ارتفاعه 48 سم،، عثر عليه بحفائر بنى سويف،، وكانت هدية الرئيس بريجنيف تمثالاً جالساً للإلهة إيزيس تقوم بإرضاع الطفل حورس،، ارتفاعه 22 سم،،!

- عقد من الخرز السكري من الإميثيت اللازوردي وفي منتصفه تميمة على هيئة حورس الطفل،، هدية لإمبراطورة إيران،، بناء على إشارة تليفونية،،!

- تمثال من البرونز للطائر أيبيس،، هدية لشاه إيران،، بناء على إشارة تليفونية،،
!

- إناء من المرمر،، هدية لأردشير زاهدي زوج ابنة إمبراطور إيران،، بناء على إشارة تليفونية،،!

- تمثال من البرونز للطائر أيبيس واقف على قاعدة خشبية،، هدية للدكتور هنرى كيسنجر،، بناء على مكالمة تليفونية،،!

- عقد من الخرز برميلي الشكل كل خرزتين متماسكتان والخرز بالتبادل،، خرزتان من الفلسبار،، وخرزتان من الذهب،، وخرزتان من العقيق،، وخرزتان من أحجار ثمينة زرقاء،، عدد الخرزات الذهبية 23 خرزة،، طول العقد 72 سم ،، قدم هدية لقرينة الرئيس ريتشارد نيكسون،، بناء على إشارة تليفونية،،!

- إناء من المرمر،، هدية للمليونير اليوناني أرسطوطل أوناسيس،، بناء على إشارة تليفونية،،!

- تمثال جالس للإلهة إيزيس من البرونز عيونه مطعمة بالأحجار الكريمة،، هدية للرئيس ريتشارد نيكسون،، بناء على إشارة تليفونية،،!

- تمثال لأيبيس،، جسم التمثال من خشب والرأس والذيل والساقان من البرونز،، ارتفاع 34 سم،، قدم هدية للرئيس جيسكار ديستان،، بناء على إشارة تليفونية،،!

- إناء من المرمر من عصر الملك زوسر ارتفاعه 77 سم،، هدية لمؤسسة كيري فى واشنطن،، بناء على إشارة تليفونية،،!

- عقد خرز مستدير الشكل تتوسطه حليه على شكل رمانة،، مصنوع من الذهب وحبات العقد من أحجار العقيق والأميثيست والفيروز،، طوله 65 سم ،، لم تذكر السجلات اسم المهدى إليه وإنما اكتفى بإشارة تقول "لإهدائه بمناسبة زيارة الرئيس لأمريكا و بريطانيا"،،!


وطبعا العهدة على حسنين هيكل،، وهو أصلاً موثق كل كلمة بالمستندات الرسمية،، ساعة ما قريت الكتاب ده بقى،، ضغطي وطي جداً،، ودخلت في موجة إكتئاب أكتر من أسبوع!!،، إيه ده،، إيه الفساد ده؟!،، هي آثار مصر بتتوزع نقطة طهور وولادة في العالم كله؟!،، وقد كده أنا غبية وساذجة؟!،، تصدقوا بالله إني مودي أتغير تاني دلوقتي بعد ما أفتكرت!!،، حسبي الله ونعم الوكيل،، المهم قبل ما أكتئب تاني،، جملة السادات اللي بتعيد وتزيد فيها الجزيرة،، بتاعة (أولادي المغـرر بيهم!!)،، لما سمعتها بعد ما قريت الكتاب ده حسيت إني بسمع عيال أجندات خارجية بياكلوا كنتاكي!!،، لو غضيت الطرف عن باقي بلاوي الكتاب،، ومر الحقيقة اللي عرفتها على كبر،، فكفاية جداً اللي كتبته ده،، عشان أشيل صورة السادات من بانر المدونة،، وأتحاكم كمان بتهمة الغباء السياسي!

هناك 9 تعليقات:

  1. إنتي خليتيني أخد بالي من نقطة مهمة قوي

    بعد تلاتين سنة هنلاقي برضو ناس بتحب مبارك وبتدافع عنه زي ما فيه دلوقتي ناس بتدافع عن السادات وعبدالناصر , وساعتها فيه ناس برضو من الأجيال الجديدة هتتخدع فيه وتصدق إنه كان كويس وبطل الطلعة الجوية

    بصي . . أنا معرفش كتير عن عبدالناصر بس كفاية إنه رفض إقتراح محمد نجيب بتعيين حكومة كفاءات و عينها كلها ظباط جيش وسوّء سمعة نجيب , ده غير إنهم إستولوا عالبلد من ساعتها لغاية دلوقتي

    رغم كل ده كان ليه حسنات زي السد العالي وقناة السويس وبرج الجزيرة اللي كان تمنه رشوة رفض ياخدها لنفسه من المخابرات الأمريكية

    والسادات , ديكتاتور كبير وسبب نكسة مدد الرئاسة
    بس ليه مواقف كتير قوية في مواجهة إسرائيل

    يعني مفيش حد ملاك , وفي نفس الوقت مفيش حد شيطان

    ده كان قبل 1981

    مبارك بقي , أثبت فعلا إن فيه شيطان

    مش لاقيله أي إنجاز بصراحة ومش شايف غير فساد وفقر ومهانة وخيانة

    ربنا يرحمنا من العسكريين كلهم والناس تصدق بقي إن العسكرية أنتي ديموقراطية ( زي الأنتي فايرس كده) :)

    ردحذف
  2. مقرأتهوش الصراحه بس احتفظت بنسخه منه عشان اقرأه
    لاني عندي نفس الموضوع كده
    تايه ما بين حب السادات وكرهه
    حتي مفيش وسط

    ولكن اللي انا بقيت مؤمن مبيه
    ان مبارك جزء من السادات والسادات جزء من مبارك
    يعني لو السادات كان كمل في الحكم احتمال كنا نلاقي طلعت السادات هو اللي رئيس دلوقت :d

    ردحذف
  3. أنا برضه كنت من أنصار السادات بس مش لدرجة انى اتكلم عنه او أعلق صورته..

    ردحذف
  4. بصى مينفعش تاخدى محمد حسنين هيكل بكتاباته كمقياس حكم على السادات
    لأن اصلا مفيش واحد على وش الأرض بيكره السادات اد هيكل
    ومتنسيش ان برده مفيش واحد على وش الارض اله عبد الناصر وجعله الالها اكثر من هيكل
    انا مش هدافع عن السادات بس تخيلى واحد بيعمل وفق منظومه لا ترى منه غير الالوهيه كلامه قران شطحاته خطط للبلد
    الجيش ولاده
    العمال ابنائه
    التلامذه احفاده
    غصب عنه لازم تيجى على اللحظه ويفتكر ان مصر بتاعته
    العيب مش فى الرئيس العيب فى المنظومه فى الناس اللى حواليه
    انا قريت خريف الغضب
    الحاجه الوحيده اللى معملهاش هيكل انه مخلاش السادات ابو لهب
    بلاش نحكم على الناس من منظور شخصى زى ما عمل هيكل
    بالنسبه للمستندات
    الورق ورقنا والدفاتر دفاترنا
    واللى عايزينه وحش هنطلعه كخه
    واللى عايزينه حلو هنطلعه ملاك
    كلهم تربيه واحده ومنهج واحد
    ومفيش حد فيهم احسن من حد
    كلهم اساتذه فى الوحاشه

    ردحذف
  5. انتى خلتينى اشك فى هدومى
    والاخ جيفارا خلانى اولع فى هدومى
    انا مش عارف هو مين مع مين
    ولا مين ضد مين
    اد ايه السياسه قذره

    ردحذف
  6. قلتها بدل المرة مليون في كذا مناسبة ان مصر لسه كي جي وان ديمقراطية لانها عمرها ما شافت ديمقراطية حقيقية خلال السبعتلاف سنة الماضية
    كان كل ديكتاتور بيسلمنا للديكتاتور اللي وراه الا في فترة صغيرة جدا عبر التاريخ اللي هي فترة الخلفاء الراشدين وبعض الخلفاء المسلمين
    قلتها في احدى قصصي قبل كده قصة اسمها اسطنبول
    قلت فيها ان مصر بلد الرجل الواحد عبر التاريخ كانت مصر ناصر اصبحت مصر السادات ثم مصر مبارك والآن فقط مصر اصبح ليس لها مضافا اليه
    طالما اضيفت مصر الى مضاف اليه فليس هناك بمصر ديمقراطية هذه وجهة نظري في كل من حكموا مصر اعتقد انني ممن يلقبون بما لا يعجبهم العجب
    لكن حقيقة لم احب اي فترة في التاريخ الحديث لمصر
    حتى بعد 25 يناير لم اتذوق الديمقراطية كما كنت احب ان اتذوقها الا ان املي ان اتذوقها الفترة القادمة لان الخلفية لديمقراطية افضل موجودة
    تحياتي واشكرك

    ردحذف
  7. انا مصدومه صراحه
    كنت بردو من انصار السادات بس مش لدرجه انى بحبه اوى
    لكن كنت شايفاه كويس
    حتى ده يطلع فيه العبر :S
    الواحد مابقاش واثق من حاجه

    ردحذف
  8. لو السادات ملاك بجناحين يكفى لان يتحول الى شيطان بسبب هديته المهببة لنا و هى مبارك بدستور فصله له و استفاد منه مبارك

    تحياتى

    ردحذف
  9. سؤال من فضلكم .. اللي بيحبو واللي بيكرهو .. واللي كانوا يحبو وبعدين ناموا وقاموا الصبح لقو الندم متبعثر حوالين السرير وفي الطرقه وفي كل مكان .. واللي لسه بيحبو واللي ح يحبو في المستااااااقبل ! معلش !!!!
    - ما هي المقاييس التي تجعلكم تحبون أو تكرهون وما هي المرجعية حين تميل قلولكم الى عبد الناصر أو عمر دياب ولا تامر حسني أو شريهان أو مبارك أو اللي كان جوز بوسي أو الباشا الذي أدى التحية المشهورة للشهداء ؟؟؟ مالكم كيف تحكمون ؟ الواحد لما يمرض يروح للطبيب ولما يكون عايز يتعلم يروح للمدرسة ولما يتعطل الجهاز يروح للمهندس المختص !!!
    لما نحب رئيس او فنانه او كاتب او شاعر او مدون او رقاصه مشهورة ! أصلا مين اللي شهرها ؟ مش حب الناس .. يعني الناس بتحب الرقص .. عادي مش مشكله .. لكن لما يكون رئيس أكبر دولة عربية .. ورئيس مؤمن .. ولما يروح يزور دوله زي اسرائيل ياخد معه ( رقاصات ) حد يعرف كم رقاصة كان برفقة الرئيس المؤمن ؟؟؟؟ حتى الريس مبارك " صاحب الطلعه الأولى " كان يقدم الرقاصات لضيوفه في سهرات خاصة تعبيرا عن حب الشعب المصري للسلام عن طريق الفلكلور !
    طبعا الشعب المصري له من كل العرب في جميع أقطارهم كل محبة وتقدير .. وقد جالست كثيرا من المواطنين المصرين شخصيا وما لقيت منهم الا كل شهامة ومروءة وكل وطنية
    وما وجدت في سلوكهم ما يشير الى ما يؤطره اعلام الفنانين ويمثلونه على أنه طباع أهل مصر .. مصر عظيمة في كل أحوالها والذي أسفط هيبتها قنواتها الفضائية وأفلامها والمغنيين والبلطجية الذين ذاع صيتهم والقبور التي يتخذونها مزارات والأزهر نائم منذ مئات السنين .. المواطن المصري العادي .. العامل والموظف وصاحب الدكان والطبقة الكادحة ليس لهم شأن في كل ما يجري من سلبيات .. المهم بلاش نطول عليكم ومن غير زعل اورد لكم كلاما قاله الشيخ ابن تيمية يلخص فيه او يحدد المرجعية التي يجب اللجوء اليها :
    ( اذا رأيتم الرجل يطير في الهواء او يمشي على الماء فلا تغتروا به وأعرضوه على الكتاب والسنة ) هذه المقالة تحدد : انت مع مين وميلك القلبي مع مين .. مع الفنان والفنانه مع الزعيم الفلاني .. وستحشر يوم القيامة مع من تحب .. أحبب في الدنيا ما شئت !
    الأمر الأشد خطوره والأكثر هيبة من كلام ابن تيمية ما يقوله الله تعالى :
    ( يَا أَيّهَا الّذِينَ آمَنُواْ أَطِيعُواْ اللّهَ وَأَطِيعُواْ الرّسُولَ وَأُوْلِي الأمْرِ مِنْكُمْ فَإِن تَنَازَعْتُمْ فِي شَيْءٍ فَرُدّوهُ إِلَى اللّهِ وَالرّسُولِ إِن كُنْتُمْ تُؤْمِنُونَ بِاللّهِ وَالْيَوْمِ الاَخِرِ ذَلِكَ خَيْرٌ وَأَحْسَنُ تَأْوِيلاً ) أعتقدت أن الرؤيا اتضحت ..
    ولا يزيغ عن هذه الحدود الا هالك .. المرجع في كل الخلافات .. هو الله تعالى ورسوله الكريم .. يعني الكتاب والسنة .. يعني ان هذا الكلام ليس تهريجا .. وسنسأل عنه يوم القيامة .. كاتبه وقارئه ومن يود التعليق عليه .. وكلمة أخيرة الى الفاضلة رحاب مع كل الأحترام .. هيكل ليس مرجعنا ولا تقارير " ويكليكس " ولا تسريبات الآخبار ولا ما يقوله الفنانون على الفضائيات ولا ما قاله الفنانين في ميدان التحرير .. ولا ما تقوله خالاتنا ولا صديفاتنا .. مرجعنا هو شرعنا القويم .. النبيل .. القائم على الخلق وطهارة الضمير .. والا ( سنندم في المستقبل كثيرا ) والسلام عليكم أخوتي زوار وأصدقاء فتافيت
    ولكم مني ومن منتدى ابو خضرة كل تحية !

    ردحذف

خلل براحتك من غير انتظار .. فتافيت أصلاً بتحب الخيار