31 مايو 2011

1- سوق الساخر جبـــر!!

....

أول بوست،، في حملة التدوين اليومي!
ويارب بس استمر،، :\

سؤال سألتهولي خالتو أم البنات
بت يا فتافيت،، هو أنتي بطلتي تكتبي ســــاخر؟؟
وماكنش عندي رد وقتها،، غير أني أقوللها
وأكتب ساخر ليه؟؟!،،
هو فيه مسخرة أكتر من اللي إحنا فيها؟!



لما الإخوان يقولوا بالفم المليان،،
لا نعترف بالمسلم الليبرالي،، ولا المسلم اليساري!!
وبعدها بيومين ألاقي السلفين بتكفر الليبرالين!!
وهوب تطلع الكاتبة إقبال بركة،،
تطالب بمحاكمة السلف والإخوان،، وتجريم النقاب!
يعني إسلامي بيكفر ليبرالي
وعلماني بيخون إسلامي،،،
وليبرالي بيهاجم الحجاب،،
وده كلــــه في مصر!!
ياترى لما أحب أكتب ساخر،،،
هلاقي مسخرة أكتـــر من كده؟!!

لما أوباما يطلع يعمل فيها السبع رجالة
ويحاسب القذافي على قتل المدنيين
ويحاسب بشار على نفس التهمة
ومن يومين يقتل مدنيين في أفغانستان
وإيه أطفال عمرهم سنة وسنتين،، باسم محاربة الإرهاب
طيب مهو القرد الدافي والجزار،، بيقولوا كده
بزمتكم ممكن أسخر أنا أقول إيه؟؟
أجيب ساخر ليه إذا كان الواقع كده؟؟!

لما تذيع قناة الجزيزة فيديو لقوات الجيش السوري
وهم متصورين جنب جثث كتير لشباب زي الورد
وبيشتموهم بألفاظ يشيب لها الولدان،، وبيقولوا عليهم شبيحة
وإذ بالكاميرا تيجي على جثة منهم،، من الشبيحة البلطجية يعني
جنب ايديها كيس بلاستيك،، فيه بسكويت وشوكولاتة!!
يعني بلطجية طالعة تموت الناس،، ببسكويت وشوكولاتة
طيب أنا لما أحب أكتب ساخر،،
هلاقي ساخر أكتر من الواقع؟؟!

لما أردوجان يوقف يقول لمبارك،، الدنيا فانية
وتنحي يا أبا الحاج محدش واخد منها حاجة؟
ويقف يتفرج على بشار،، ويقول إنه في طريق الإصلاح
وده كله عشان أردوجان صاحب بشار الأنتيخ
مش الواقع أهو يضحك بشدة،،
أكتر من الساخر اللي ممكن أكتبه؟؟!

لما يبقى شباب الثورة.. وشعب مصر
طلعان عين أمهم عشان نحاكم مبارك ورجالته وأسرته
ولسه الدنيا بتمشي ماشية السلحفا المكسحة
وألاقي برضو ناس من شعب مصر،،
مش عاجبهم كده،، طالعة تطالب بالعفو
وإذ فجأة بقى،، تطلع علينا الكاتبة إقبال بركة
تطالب بمحاكمة د. عصام شرف!!!
ده بقى لما أسخر منه أقول إيه؟
هو لوحده ساخر أهو خلقة ربنا بدون إضافات!!

لما يتقال إن سوزان مبارك،، هتتنازل
عن ممتلكاتها لصالح الشعب،، عشان تاخد براءة
وتطلع الملاليم دي،، فلوس تبرعات
والقصر،، متزور ورقه وملك الشعب أصلا
ده واقع يدي فرصة لمدون يسخر؟؟
هو ممكن يديله فرصة لكلمة على نفس الوزن!!

لما وزارة الداخلية،، تبقى عمالة تقول
الشرطة مش عارفة تتعامل مع الشعب
لازم ندي الشرطة سلاح،، ونفعل الدفاع عن النفس
الشعب بقى مفتري وبيعذب الشرطة،،!
وياعيني الأقسام بتتحرق،، والمساجيين بتتهرب
والشرطة لا حول لها ولا قوة،، يا ضنايا يا أختي!!
وفي نفس الوقت،، وإذ فجأة برضو
ألاقي من أسبوع حادثة مأمور طوخ الشهيرة
واللي نزل أسد وسط موقف ،، وسحل الست وعيالها
والنهاردة،، واحد يموت بالتعذيب في قسم بولاق
على رأي اللمبي،، إيه بقى ها إيه ها؟؟
أكتب ساخر؟؟ ده أنا عايزة اقول كلمة قبيحة!!

لما (نصر الله) وإيران،، يتنفشوا فشر التركي
ويهاجموا البحريين في قمعها للثوار،، وأنا معاهم
بس هم بيهاجوا عشان النظام سني،، والشعب شيعي
ولما الحيوان بشار يبيد شعبه،، يخرسوا سكتم بكتم
وده عشان بشار علوي،، ومعظم الشعب سني
ولسه في ناس،، فاكرة نصر الله مجاهد
بيجاهد لصالح الدين والحق!!!
أسخر أقول إيه؟؟ الواقع أكثر كوميديا!

لما بشار يقولك،، أنا بحارب
المندسين
الإرهابيين
المسلحين
السلفيين
ويظهر لنا الشهيد،، حمزة الخطيب
اللي عمره 13 ربيعا..!!
متعذب حتى الموت،، وممثلين بجثته!
مافيش مسخرة أكتر من كده!
ساخر ساخر يعني أهو!!

لو فضلت للصبح،، أكتب مش هابطل
بس دي كانت عينة من واقعنا الكوميدي
خـــــــــــلاص
سوق الساخر جبــر،،

وأتغنـــدروا النكـــدييــن!!


30 مايو 2011

حمــلة التدوين اليومي لشهر 6

....


حمــلة التدوين اليومي لشهر6
منطلقة من الفيسبوك...
هــا مين قال جاي؟؟



26 مايو 2011

27 مايـــو... وأنبــــوبة المعجـــون!!

.

هاننزل يوم 27 مايو،، مش هاننزل يوم 27 مايو؟؟
هاننزل،، مش هاننزل،،، هاننزل!!
أيـــوة لازم ننزل يوم الجمعة 27 مايو!
بس ليه بقى لازم ننزل؟؟

المشكلة إني لو قولت ننزل ليه،، هابقى بكرر كلام
وبعيد حكايات،، قولناها مليون مرة قبل كده،، لكن،،،!
الثـــورة بجـــد بتتسرق منــــا،،
مش موضوعنا مين بيسرقها دلوقتي
المهم إننا نلحقها،، وبســـرعة قبل ما تضيع للأبد
ونبقى الشعب اللي عمل ثورة،، وهنج ومكملهاش!

إحنا مش نازلين لا سمح الله،،
نلتف حول نتيجة الاستفتاء،، زي ما فيه قلة بتقول
ولا كمان ضد الجيش،، ولا عشان مخونينه
ولا هـنقول له،، أرحل يعني أمشي!
بس الفكرة إن الجيش،، أثبت بالدليل القاطع
إنه بيستجيب للشعب بالضغط فقــط،،،
وهو معذور فعلا في كده!



طيب هاضرب مثال،، عبيط بس معلش
الجيش -مع حفظ مكانته- زي أنبوبة المعجون
ومصر الأسنان،، أما إحنا بقى كشعب. الفرشــة
عشان نلحق الأسنان من التسوس اللي هايجيب أجلها
لازم نستعمل المعجون والفرشة،، بشكل منتظم مستمر
لكن،،،،،،،،



أنبوبة المعجون لازم نضغط عليها
وإلا،،، مافيــش معجون هايطلــع،،
والضغط هنا،، هـــو الثورة

ولو الثورة ما ضغطتش،، في الإتجاه الصحيح
هتتمد ألف أيد تضغط... وساعتها المعجون
هاينزل على فرشة تانية خالص،، !!!



وطبعا هي فرشة النظـــــــام المخلوع وفلوله

الوقت ده بالذات،،، لازم
الجيــش والشعــب يكونوا،،
إيــــد واحــــدة،، بجــد مش شعارات!!



لازم ننقذ مصر من التسوس،، قصدي من الخراب
لازم نلحق ثورتنا،، ونأكد على مطالبنا
اللي طالبنا بيها في الميدان!

محاكمة عادلة علانية،، تتسم بالشفافية
لكل الفاسدين،، والمتورطين بمقتل الشهداء
وعلى رأسهم.. مبارك وعائلته.. ورجاله المعروفين
حل المجالس المحلية،، إعادة حركة المحافظين
تطهير الإعلام المصــري،، وتطهيرالصحف
كمان الحد الأدنى للأجـــــــور،،
عشان حزب الكنبة ينقطنــا بسكوته
والشرطة تحن على أم الشعب،، وتنزل بقى!

انتبه من فضلك،،
الثـــورة ترجــع إلى الخلـــف!!




04 مايو 2011

أوبريت (( إخترنــاه ))... برؤية 25 يناير ^_^

/

أظن مافيش أنسب من النهاردة،، عشان الأوبريت ينزل

نصيحة مهمة قبل قراية البوست

لمزيد من المتعة،،. يُنصح
بسماع الأوبريت الأصلي لتنشيط الذاكرة

:
:
:

أسقطناه،، أسقطناه
يوم ما ظهر وإحنا كرهنا،، أسقطناه وخلعناه
من أول كلمــة كرفنــاه،، أسقطنــاه وخلعنــاه
من أول عهــده فقسنــاه،، أسقطنــاه وخلعنــاه
وعلى فلوسنا،، هنجري وراه
وده تأديب من ترهيب،، ولا فشخرة ولا ظلم شباب
دم شهيد،، وحقوق جيل،، ضايعة وأجيال ضايعة معاه ،،
أسقطناه أسقطناه

أسقطناه،، أسقطناه
من غير لجنة ولاء وآه،، أسقطناه وخلعناه
رأيـنـــا حر وأعلانــاه،، أسقطناه وخلعنـاه
بهجوم ثــورة ووقعنــاه،، أسقطناه وخلعناه
والدنــيا كلهـــا شيفـــاه
وده تأديب مش ترهيب،، ولا فشخرة ولا ظلم شباب
ســف بلدنا،، وهو حاكمنـا،، ومش ممكن راح ننسى سوزان
وإحنا وراه لما شاء الله،، أسقطناه وحبسناه

لا هيلهيني،، ولا يخليني،، أنسى المحكمة بينه وبيني
إلا بلدنا،، وحق ولادنا،، وبقولها وأملي فــ الله،،
عشان كده إحنا حبسناه
أسقطناه،، وخلعناه،، وإحنا وراه لما شاء الله،، أسقطناه وحبسناه

بعد ميدانا،، ورفع شعارنا،، بقى كل العالم مصاحبنا
حتى الإخوة هتفوا بنخوة،، راح وأخد الشر وراه،،
عشان كده إحنا خلعناه
أسقطناه،، وخلعناه،، وإحنا وراه لما شاء الله،، أسقطناه وحبسناه

ثورنا وثاروا،، وزاد فــ عناده،، ماسلمش ثاير في ميدانه
وما يحاسب،، حد يقاتل،، وما شوفناش حد إستثناه،،
عشان كده إحنا حبسناه
أسقطناه،، وخلعناه،، وإحنا وراه لما شاء الله،، أسقطناه وحبسناه

أول مرة،، يا مصر يا حرة،، تفتحي باب الحرب المرة
بعد ما دمر ،، غزة وقرر،، يبدأ عهد حصار ودمار،،
وعشان كده إحنا خلعناه
أسقطناه،، وخلعناه،، وإحنا وراه لما شاء الله،، أسقطناه وحبسناه

وفي لقاءاته،، جيمي بكلابه،، ينسى معاهم كل أخلاقه
يدي أوامره،، بتفجير شعبه،، وشوية ويصلي معــاه،،
وعشان كده إحنا حبسناه
أسقطناه،، وخلعناه،، وإحنا وراه لما شاء الله،، أسقطناه وحبسناه

كله بجاحة خطابه بصراحة،، وبيخدع شعبه ببلاغــة
ويخيرنا،، يا ثورة بفوضى،، يا استقرار وأمان وياه،،
وعشان كده إحنا خلعناه
أسقطناه،، وخلعناه،، وإحنا وراه لما شاء الله،، أسقطناه وحبسناه

كنا فـ ثورة،، وهوجة ودوشة،، وقعنا في مصيبة وكارثة
رسم الخطة،، وقال فــ مكالمة،، هاتوا جمل والبغل معاه،،
وعشان كده إحنا حبسناه
أسقطناه،، وخلعناه،، وإحنا وراه لما شاء ،، أسقطناه وحبسناه

بدأ الخطة،، وسكها سكة،، رمى في إيدينا شوية فكة
وقال نتحمل،، لما يكمل،، نهب بلدنا وولاده ويــــاه،،
عشان كده إحنا حبسناه
أسقطناه،، وخلعناه،، وإحنا وراه لما شاء ،، أسقطناه وحبسناه

ده بيعذبنا،، وبيسحلنا،، بجهاز ظالم مالهوش معنــا
ولا ينفعنا،، غير ثورتنا،، هي الهنا والغنا والجــاه،،
وعشان كده إحنا خلعناه
أسقطناه،، وخلعناه،، وإحنا وراه لما شاء ،، أسقطناه وحبسناه

دولة معادية،، وقال دي معاهدة،، ناسي إنها ورقة ودايبة
غازنا وصدر،، قفل المعبر،، منه كفرنا يا خلق الله،،
وعشان كده إحنا خلعناه
أسقطناه،، وخلعناه،، وإحنا وراه لما شاء ،، أسقطناه وحبسناه

أسقطناه،، أسقطناه
يوم ما ظهر وإحنا كرهنا،، أسقطناه وخلعناه
من أول كلمــة كرفنــاه،، أسقطنــاه وخلعنــاه
من أول عهــده فقسنــاه،، أسقطنــاه وخلعنــاه
وعلى فلوسنا،، هنجري وراه
وده تأديب من ترهيب،، ولا فشخرة ولا ظلم شباب
دم شهيد،، وحقوق جيل،، ضايعة وأجيال ضايعة معاه ،،
أسقطناه وحبسناه


على الهامش::
تعبيرية أوبامـا،، أم تعبيرية سرايـا


أعلنت القوات الفيسبوكية عن مقتل الرئيس باراك أوباما
في عملية خاصة قادتها قوات الفوتوشوب
على مبنى في نيويورك وأن صفحتها تحتجز جثته

معتبرين ذلك أعظم إنجاز للقوات!!