31 مايو 2011

1- سوق الساخر جبـــر!!

....

أول بوست،، في حملة التدوين اليومي!
ويارب بس استمر،، :\

سؤال سألتهولي خالتو أم البنات
بت يا فتافيت،، هو أنتي بطلتي تكتبي ســــاخر؟؟
وماكنش عندي رد وقتها،، غير أني أقوللها
وأكتب ساخر ليه؟؟!،،
هو فيه مسخرة أكتر من اللي إحنا فيها؟!



لما الإخوان يقولوا بالفم المليان،،
لا نعترف بالمسلم الليبرالي،، ولا المسلم اليساري!!
وبعدها بيومين ألاقي السلفين بتكفر الليبرالين!!
وهوب تطلع الكاتبة إقبال بركة،،
تطالب بمحاكمة السلف والإخوان،، وتجريم النقاب!
يعني إسلامي بيكفر ليبرالي
وعلماني بيخون إسلامي،،،
وليبرالي بيهاجم الحجاب،،
وده كلــــه في مصر!!
ياترى لما أحب أكتب ساخر،،،
هلاقي مسخرة أكتـــر من كده؟!!

لما أوباما يطلع يعمل فيها السبع رجالة
ويحاسب القذافي على قتل المدنيين
ويحاسب بشار على نفس التهمة
ومن يومين يقتل مدنيين في أفغانستان
وإيه أطفال عمرهم سنة وسنتين،، باسم محاربة الإرهاب
طيب مهو القرد الدافي والجزار،، بيقولوا كده
بزمتكم ممكن أسخر أنا أقول إيه؟؟
أجيب ساخر ليه إذا كان الواقع كده؟؟!

لما تذيع قناة الجزيزة فيديو لقوات الجيش السوري
وهم متصورين جنب جثث كتير لشباب زي الورد
وبيشتموهم بألفاظ يشيب لها الولدان،، وبيقولوا عليهم شبيحة
وإذ بالكاميرا تيجي على جثة منهم،، من الشبيحة البلطجية يعني
جنب ايديها كيس بلاستيك،، فيه بسكويت وشوكولاتة!!
يعني بلطجية طالعة تموت الناس،، ببسكويت وشوكولاتة
طيب أنا لما أحب أكتب ساخر،،
هلاقي ساخر أكتر من الواقع؟؟!

لما أردوجان يوقف يقول لمبارك،، الدنيا فانية
وتنحي يا أبا الحاج محدش واخد منها حاجة؟
ويقف يتفرج على بشار،، ويقول إنه في طريق الإصلاح
وده كله عشان أردوجان صاحب بشار الأنتيخ
مش الواقع أهو يضحك بشدة،،
أكتر من الساخر اللي ممكن أكتبه؟؟!

لما يبقى شباب الثورة.. وشعب مصر
طلعان عين أمهم عشان نحاكم مبارك ورجالته وأسرته
ولسه الدنيا بتمشي ماشية السلحفا المكسحة
وألاقي برضو ناس من شعب مصر،،
مش عاجبهم كده،، طالعة تطالب بالعفو
وإذ فجأة بقى،، تطلع علينا الكاتبة إقبال بركة
تطالب بمحاكمة د. عصام شرف!!!
ده بقى لما أسخر منه أقول إيه؟
هو لوحده ساخر أهو خلقة ربنا بدون إضافات!!

لما يتقال إن سوزان مبارك،، هتتنازل
عن ممتلكاتها لصالح الشعب،، عشان تاخد براءة
وتطلع الملاليم دي،، فلوس تبرعات
والقصر،، متزور ورقه وملك الشعب أصلا
ده واقع يدي فرصة لمدون يسخر؟؟
هو ممكن يديله فرصة لكلمة على نفس الوزن!!

لما وزارة الداخلية،، تبقى عمالة تقول
الشرطة مش عارفة تتعامل مع الشعب
لازم ندي الشرطة سلاح،، ونفعل الدفاع عن النفس
الشعب بقى مفتري وبيعذب الشرطة،،!
وياعيني الأقسام بتتحرق،، والمساجيين بتتهرب
والشرطة لا حول لها ولا قوة،، يا ضنايا يا أختي!!
وفي نفس الوقت،، وإذ فجأة برضو
ألاقي من أسبوع حادثة مأمور طوخ الشهيرة
واللي نزل أسد وسط موقف ،، وسحل الست وعيالها
والنهاردة،، واحد يموت بالتعذيب في قسم بولاق
على رأي اللمبي،، إيه بقى ها إيه ها؟؟
أكتب ساخر؟؟ ده أنا عايزة اقول كلمة قبيحة!!

لما (نصر الله) وإيران،، يتنفشوا فشر التركي
ويهاجموا البحريين في قمعها للثوار،، وأنا معاهم
بس هم بيهاجوا عشان النظام سني،، والشعب شيعي
ولما الحيوان بشار يبيد شعبه،، يخرسوا سكتم بكتم
وده عشان بشار علوي،، ومعظم الشعب سني
ولسه في ناس،، فاكرة نصر الله مجاهد
بيجاهد لصالح الدين والحق!!!
أسخر أقول إيه؟؟ الواقع أكثر كوميديا!

لما بشار يقولك،، أنا بحارب
المندسين
الإرهابيين
المسلحين
السلفيين
ويظهر لنا الشهيد،، حمزة الخطيب
اللي عمره 13 ربيعا..!!
متعذب حتى الموت،، وممثلين بجثته!
مافيش مسخرة أكتر من كده!
ساخر ساخر يعني أهو!!

لو فضلت للصبح،، أكتب مش هابطل
بس دي كانت عينة من واقعنا الكوميدي
خـــــــــــلاص
سوق الساخر جبــر،،

وأتغنـــدروا النكـــدييــن!!


هناك 26 تعليقًا:

  1. قالها المتنبي زمان ومحدش صدقه
    وكمْ ذا بمصر من المُضْحِكات .. ولكنه ضحك كالبكا
    تحياتي لكي

    ردحذف
  2. مصطفى
    مممممممم.. عنده حق
    بس الظاهر.. العدوى أنتشرت في باقي العالم
    أنت هاتشارك في الحملة ولا لاء؟؟

    ردحذف
  3. ايوة يا رحاب ان شاء الله هاشارك ونزلت اول بوست كمان

    ردحذف
  4. فعلا مافيش مسخره اكتر من كدا
    هقول ايه لا حول ولا قوه الا بالله العلى العظيم
    صوت الحق بقى جبان ولا ايه وصوت المجرمين بقى عالى اوى كدا ليه
    دى مسرحيه مش مجرد مسخره

    ردحذف
  5. مافيش أسخر من كدة دي الواقعية الساخرة
    بوست جامد جدا واول كومنت ليا عندك اعتقد دة برده اتنشيط الحملة :D

    ردحذف
  6. هذه فتافيت ، لا تلبث أنا تفاجئ الجميع بتدوينة حتى لا نجد لها نظير أروع غير تدوينتها التي تليها ، قال عايزين يقفلو قال ، بجد استمتعت
    ملحوظة ( عطر الموت ) كلام كبير و عايز فوقان ، و تقرأ كذا مرة

    ردحذف
  7. :(
    مش عارفة اعلق يارحاب لانى بجد عندى حالة سد نفس من الاخبار والاحداث اللى بتحصل بس ربنا يعدلها باذن الله والاحوال تتصلح
    فى انتظار تدويناك طوال الشهر ياقمر :)

    ردحذف
  8. ايه حملة التدوين اليومي دي انا هعمل ثورة مضادة على الموضوع ده ... ساخر بقا :)

    ردحذف
  9. معاكى حق
    مفيش مسخرة اكتر من اللى احنا فيها

    ردحذف
  10. انا عمرى ما جيت هنا

    غير لما بيترسم على

    وشي ابتسامه وسنانى

    كلها تبان سنه سنه لكن

    والله المرادى غير اى مره

    هم يضحك وهم يقطع القلب

    ويشل التفكير واحساس

    فظيع بالعجز ربنا يصبر

    الله كل الشهداء الابرار

    وربنا يتولنا برحمته

    ردحذف
  11. سخر يسرخ سرخا فهو مسخرة

    وتنح يتنح تنوحا فنحن و من حولنا جبلنا على التناحة , , , إلا من رحم ربي طبعا

    مش عارف أقول ايه على كل الكلام اللي كتبتيه
    غير اني اقول
    خير خير خير
    محدش عارف الخير فين

    ردحذف
  12. ياحلاوتك ياستفندي يابن عم البرتقان
    الحملة ها تجيب فتافيت وتامر علي؟
    عودي ياليالي العز
    مش ها أعلق ع البوست علشان مبقاش فاضل شيء في جسمي ماتفقعش بعيد عنك

    ردحذف
  13. مصطفى سيف

    خلاص يا دكترة... هادخل اقرا بس في المساء والسهرة بقى
    عشان لسه صاحية.. ودامغي زي الدوا الاسكبايرد اللي عايز تبيعه للنـــــــــاس :))))

    ردحذف
  14. بسنت

    عندك حق انها مسرحية.. وسخيفة كمان
    لكن املنا في ربنا كبير.. هو الحق العدل
    ودولة الظلم ساعة مهما طاااااااالت

    ردحذف
  15. أميرة

    الاميرة ديانا بحالها عندي
    طيب اطخ عيارين بقى عشان الزيارة السامية
    بس لو الجيش جه.. هاقول انتي اللي ضربتي نار
    هههههههههههههههههههههههه
    تحيا حمل التدوين يا عم :))

    ردحذف
  16. سحساوي

    يا خراشي يا خراشي.. ده كله يا سحساوي
    والله انا لحد دلوقتي مش عارفة.. منين كنت هاقفل فتافيت
    ومنين شاركت في حملة التدوين اليومي دي
    يلا.. اهو هاشوف الدنيا هاتمشي ازاي
    وعطر الموت.. منتظرة رأيك فيها :)
    ده انت اول حد عارف انها هاتنزل يا راجل ولسه ما علقتش عليها .. :((((

    ردحذف
  17. ღ أحاسيس آيـــوشـه ღ

    تسلميلي يا ايات.. بموت فيكي .. موووة
    هاجي اقرا الف بوست وبوست بتوعك
    بس بليل عشان النت زي السلحفا ناووو
    دي حملة عظيمة اللي رجعت الحبايب كلهم ديه :)

    ردحذف
  18. تامر علي

    ههههههههههههههههههه
    ده انت فلول بقى.. انا كنت متأكد
    متـــــــأكد.. مع اني كنت شاكك :)))

    ومنتظرة النشاط بقى يا فندم
    ايام العز تعود من جديد
    حملة نضيفة صحيح :))

    ردحذف
  19. غير معرف

    فعلا.. حاجة بقت تشل
    ممكن طلب رفيع.. حضرتك تبقى تمضي باسمك
    عشان انا عندي غير معرف كتير.. وفيهم ناس غير مرغوب فيهم. عشان بس ما يحصلش لبس.. وارد على انك حد منهم

    وميرسي على المتابعة يا فندم

    ردحذف
  20. mena

    معلش يا منة لو خذذلتك المرة دي :(
    بس حقيقي الواقع كوميديا سوداء .. مش محتاجة ساخر
    هي مسخرة خلقة ربنا لوحدها :(

    ردحذف
  21. فتوح أبو المفاتيح

    حلو اوي التصريف بتاع الافعال ده
    حلو حقيقي :).. عجبني جدا

    وان شاء الله يكون خير
    والله خير الماكرين :|

    ردحذف
  22. ستيتة حسب الله الحمش

    سوتايتة حبيبي .. بوسة مشبك الاول :)
    شوفتي بقى الحملة.. رجعت تامر باشا.. وفتافيت
    كانت نفسي ترجع كمان تامر دياب... بس يلا خيـر

    وسلامتك من الفقعة يا قلبي
    ان شالله كل حكام العرب.. كلب كلب
    واحنا لا .. :)

    ردحذف
  23. انا اكتأبت اكتر ما انا مكتئبه وانا بقرا الموضوع بصراحة ما عنديش حاجة اقولها غير ان عندك حق

    ردحذف
  24. Hobty

    لا سلامتك من الاكتئاب :(
    معلش هو الواقع كده.. نعمل ايه بقى

    ردحذف
  25. صح .. مفيش مسخرة أكتر من كدة

    ردحذف
  26. قهوة بالفانيليا - شيماء علي

    هااااااا فعلا
    حاجة تبكي الساخر والله :(
    نورتي يا قمر

    ردحذف

خلل براحتك من غير انتظار .. فتافيت أصلاً بتحب الخيار