02 يونيو 2011

2- رباعيـــــات فتـــافيـــت!!


....

ده تاني بوست،، في حملة التدوين اليومي!
وهي أولى تجـــاربي في
كتابـة الربـاعيـات،،
عايزة رأيكم!




-1-
سنين تعـــدي،،، سنين تفــــوت
أحــلام بتكـبر،، وأحــلام تمــوت
صحيـح ضــاع مني ألــف حلـــم
بس كفاية إن قلمي لساله صوت!!

-2-
كل ما قلبي يدق ويقوللي خلاص هويت
أفرح بدقــه أوي وأرسم بنبضــه بيــت
عشت قصص كتيرة لكن بنهاية واحدة
دايمًا لوحدك يا قلبي وكأنك ما دقيت!!

-3-
أوقـات بحلم أطير أسكن فروع الشجر
ألاعب النجـوم ويكون جــاري القمــر
وأعلى لفوق،، لفوق،، بضربة جناحي
لكن فــ عز حلمي بفتكر إني بشـــر!!

-4-
كـلب جريح كان بينزف بـلا بيــت
صعب عليا وفاه ولجروحه داويـت
وأول مــا أشتــد بنابه ســال دمـي
أتاريه كان ديب وأنا فيه أتخميت!!

-5-
يـامـا سرحت أتخيل فــ بكره البعيـد
جاي بفرح وهنـا جاي يرقص سعيد
ولما أتأخر عليا،، سألت بريبة وقلق
هو حتى بكره بقى بيخلف المواعيد؟!

-6-
شعوب ثارت،، وثورتها نـور وحياة
وشعوب طفحة المر وراضية وحباه
وشعوب لعينــة فــ الأصل مرتزقــة
تهوى ذل الغير،، وتنادي بالمساواة!!

-7-
يا حزن براحة حبة على قلوب البنات
قلوبهم يـامـا نزفت من مـر اللي فـات
عــاشوا مخدوعين بـوهم اسمه الهــوا
ونسيوا إن الدنيا أصلها خـد وهـات!!

-8-
قــالوا اتجـوزي،،، قـولت أنـا مـوافقـة
هاتولي راجل،،، يعرف يصون العشرة
يكون راجل بجد،،، يفهم معنى المرجلة
مش بس كلمة،، وفــ خانة النوع لازقة!!


هناك 29 تعليقًا:

  1. جميلة جدا جدا جدااااااااااااااااااا
    تسلم ايديكى

    ردحذف
  2. ميرسي اوي يا دينا
    اعتقد اول مرة تشرفيني صح :)
    نورتي البلوج يا جميل
    يسلملي ذوقك

    ردحذف
  3. الله عليكي
    كنتي مخبية الحاجات دي فين؟
    دي عاملة كأنك بتسقينا الحكمة بملعقة من دهب
    كلهم روعة
    بس اكتر واحدة عجبتني رقم 5
    تسلم ايدك وفكرك وفلمك يا فتافيت

    ردحذف
  4. مصطفى سيف

    ميرسي يا مصطفى..
    يا رافع من معنوياتي
    كنت دسااااهم.. عن ولاد الدهاشنة :))
    ويسلم مرورك وتشجيعك وذوقك يا دكترة :)

    ردحذف
  5. مين دلول اللي قالوا اتجوزي ؟؟ دي ناس مغرضه وعاوزه تعمل ثورة مضادة (يجب اخفاء هذا الرد بعيداً عن الانظار حرصاً على سلامة البعض ) وبناء عليه هنصلح الكوبليه الاخير ونقول

    قالولي اتجوزي انا قلت بلا وكسه
    جواز وخيبه وقرف وانتكس نكسه
    واوجع دماغي بنكد والعيشه دي "الفاكسه "

    ايه رأيك رباعيات رباعيات يعني من الأصلي :))))

    ردحذف
  6. تامر علي

    دول ناس مغرضة.. من فلول النظام السابق :))
    شاكرين مهللين على النصيحة.. صحيح
    العلمو نورون يا ولاد ^_^

    وبالنوسبة للرباعيات
    فين بس عم جاهين يجي يتعلم
    كيف تكون الرباعيات!!.. إديها كمان رباعية :)))

    ردحذف
  7. روعه بجد يا رحاب بجد يسلم قلمك

    رباعياتك فعلا رائعه وبسيطه بس انا

    اكتر وحده عجبتنى اوى وحستها اللى

    كانت بتقول.....-5-
    يـامـا سرحت أتخيل فــ بكره البعيـد
    جاي بفرح وهنـا جاي يرقص سعيد
    ولما أتأخر عليا،، سألت بريبة وقلق
    هو حتى بكره بقى بيخلف المواعيد؟!

    تحياتى ليكى يا قمر ويارب يسمعنى عنك كل خير

    ردحذف
  8. mena

    منورة يا منمونة
    الرائع هو تواصلك ومرورك يا جميلة
    والأروع رقتك وذوقك :)

    رقم خمسة برضو
    انتي ومصطفى عجبتكم اكتر..
    وانا كمان حساها اوي :|

    وتسلميلي على الودعوة يا جميل
    آميـــن ولكِ بالمثل
    إن شاء الله

    ردحذف
  9. * الدعـــوة :)
    مش الودعوة خالص طبعا :)))

    ردحذف
  10. رائعة والله فيك من روح صلاح جاهين برضه ..

    اعجبتني كثير :
    كـلب جريح كان بينزف بـلا بيــت
    صعب عليا وفاه ولجروحه داويـت
    وأول مــا أشتــد بنابه ســال دمـي
    أتاريه كان ديب وأنا فيه أتخميت!!

    بالتوفيق في الحملة وان شاء الله من المتابعين

    ردحذف
  11. الله تحفة حلوين اوى
    هقتبس جزئين منهم احطهم على الفيسبوك لو مش يزعلك :)

    ردحذف
  12. تحفه بجد يا رحاب
    معانيهم كمان جميله اوى
    تسلم ايدك

    ردحذف
  13. ايه الجمال ده يا رورا بالتوفيق كلام جميبل وتكبره محتاجنها تتكرر

    ردحذف
  14. وجع البنفسج

    اهلا يا قمر.. نورتي البوست
    بتاعة كلب جريح.. كنت مترددة اني انزلها
    وحلو اوي انها عجبتك
    وشرف ليا انك من المتابعين.. ويارب
    اقدر احقق الهدف من الحملة
    التنشيط والمتعة والاستفادة
    نورتيني والله :)

    ردحذف
  15. ღ أحاسيس آيـــوشـه ღ

    ايوووش حليب هارتي
    البوست كله تحت امرك يا جومر
    ولو عايزة الفلك البلوج كله للاولاد :))

    نورتي يا سكراية

    ردحذف
  16. Bent Men ElZaman Da !!

    بنوتة .. وحشاني ^_*
    كويس انها عجبتك.. لانها لسه بدايات
    نورتيني يا جميلة.. تسلميلي :)

    ردحذف
  17. غير معرف

    تسلملي يا عادل يا رب
    وانت فاهم بقى.. دي التجربة الاولى
    ان شاء الله اللي جاي يكون افضل من كده
    نورت البلوج يا با شـــــا
    دي اول مرة تعمل فيها عندي كومنت صح؟
    ده انا كده دخلت التاريخ ^_^

    ردحذف
  18. جاااااااااااااااااااااامده جدا انتى ايه يا بنتى الله اكبر عليكى :)

    روجا

    ردحذف
  19. روجا

    يادي الهنا اللي انت فيه يا قلبي
    روجا عملت لي كومنت على المدونة :))

    كلك ذوق يا حبيبتي والله
    رافعة من معنوياتي هنا وعلى الفيسبوك
    يخليكي ليا يا رب :)

    ردحذف
  20. جميييييلة اوي يا رحاب
    عجبتنى جدا جدا

    أوقات بحلم اطير اسكن فروع الشجر
    الاعب النجوم ويكون جاري القمر
    واعلى لفوق,, لفوق,, بضربة جناحي
    لكن في عز حلمي بفتكر اني بشر

    حلوة اوووووي الرباعية دي

    ماشاء الله عليكي
    زمبسوطة انى هنا لاول مرة وان شاء الله هتابعك باستمرار ياقمر

    ردحذف
  21. reem

    انا مبسوطة اكتر منك.. انها اول زيارة
    ومع ذلك هاتيجي تاني.. سبحان الله :)))

    نورتيني يا ريم
    وكلك ذوقك يا جبيبتي
    والحمد لله ان خرابيشي عجبتك :)

    ردحذف
  22. إنتى تكتبى حاجة وحشة فتافيت

    صحيح سبع صنايع والبخت ضايع

    ردحذف
  23. جميله اوى والله
    خصوصا رقم 1 ورقم 6
    هنستنى منك رباعيات تانيه

    ردحذف
  24. د/عرفه

    على رأيك.. أنا أكتب خاجة وحشة انا؟؟
    :)).. ده من ذوقك يا دكترة والله

    وعلى رأيك سبع صنايع
    يلا.. رنا يكرمنا بمنحة بطالة :))

    ردحذف
  25. iـــــــــــsــــــــــlــــــــــــaـــــــــm

    تسلم يا اسلام
    قول يا رب.. ده حسب التساهيل
    نورتني :)

    ردحذف
  26. للأسف أنا مابفهمش في موضوع الوزن و الحاجات دي :)
    لكن عجبتني الرباعيات اوي :)

    ردحذف
  27. قهوة بالفانيليا - شيماء علي

    مش مهم تكوني بتفهمي فيها
    المهم انك تكوني حستيها.. ده المهم عندي :)

    ردحذف
  28. ممتازه يا رو

    ردحذف
  29. ممتازه يا رو

    ردحذف

خلل براحتك من غير انتظار .. فتافيت أصلاً بتحب الخيار