25 يونيو 2011

25- جريمة قتل بسبب عمر أفندي،، إنها البداية!!

:
:
ده البوست 25
في حملة التدوين اليومي،،!
جريمة قتل بسبب عمر أفندي،،!!
إنها مجـــرد بــداية،،!!


السيد
خرج من السجن،، بعد سنين طويلة بسبب سرقة بالإكراه،، تاب وقرر يبدأ من جديد،، لف على كل المصانع،، المطاعم،، المحلات،، الأفران،، مافيش حد عايز يشغل عنده سوابق!!،، بس هو صمم على الحلال،، جاب عربية خشب صغيرة،، وحط عليها شوية لعب أطفال ووقف قصاد عمر أفندي،، وقال ياكل لقمة حلال بعرق جبينه!

مرفت
كانت رقاصة في الأفراح العشوائية، كانت بتكسب دهب بس اللي جاي رايح،، فلوس حرام بقى ومتعفرتة،، سمعت مرة شيخ على قناة الرحمة بيقول إن الرقاصة جسمها هايبقى جسم كلب يوم القيامة خافت،، تابت وحلفت ما ترقص تاني،، وجابت عربية خشب صغير،، حطت عليها شوية طرح ومعاصم ودبابيس حجاب،، ووقفت قصاد عمر أفندي،، وقالت تعيش وتموت مستورة بالحلال!

علاء
معاه دبلوم تجارة،، أبوه عجز ورقد من كتر ما داق المر لحد ما علمه،، عشان يشيل عنه الحمل بقى،، لف على كل الأبواب مافيش فايدة،، كلها مقفلة ومافيش شغل له،، بس هو في رقبته كوم لحم،، أمه وأبوه المريض،، وأخواته اللي بيتعلموا،، ضاقت الدنيا في وشه،، جاب عربية خشب صغيرة وحط عليها شوية ملابس داخلية،، ووقف قصاد عمر أفندي،، وقال أهم قرشين حلال يغنوا عن السؤال!

صابر
أبوه كان تاجر قماش كبير،، بس جار عليه الزمن وخسر فلوسه كلها في حريق،، ومات بحسرته وساب لصابر،، أمه وأخواته البنات،، مدارس وجهاز،، وديون تهد جبال،، مايعرفش غير التجارة،، جاب عربية خشب صغيرة،، حط عليها كام توب قماش،،
ووقف قصاد عمر أفندي،، وقال أهو يبدأ الطريق من البداية!

سعاد
جوزها عامل في مصنع،، الماكينة قطعت أيده،، وبقى عاجز وحمل بعد ما كان كسيب،، عندها 3 بنات عرايس،، خافت عليهم من الحوجة والعوزة يمشوا في طريق بطال،، أخدت التعويض،، وجابت عربية خشب صغيرة،، وحاطت عليها شوية لبس أطفال،،
ووقفت قصاد عمر أفندي،، أهي تصرف على البيت،، وتستر بناتها من ولاد الحرام!

رزق وحسان
طلبة في كلية الحقوق،، ولاد خال ومالهومش إلا بعض،، ياما داقوا الذل عشان أيتام،، ومر الصدقة يقطم الوسط،،، عانوا كتير لحد ما حوشوا شوية فلوس وهم في ثانوي،، جابوا عربية خشب صغيرة،، وحطوا عليها شوية ورد وفازات،،
ووقفوا قصاد عمر أفندي،، وأهي حفظت كرامتهم من مر اليتم،، وصرفت على تعليمهم وشالت عنهم الذل!

دي كلها حكايات خيالية
،، لكنها واقعية جدا
صحيح أنا معرفش حد من اللي بحكي عنهم دول
بس عارفة كام أسرة في الزقازيق،، بيتها مفتوح
من عربية خشب صغيرة عليها شوية حاجات،، قصاد عمر أفندي
يوم الخميس،، حصلت حملة نضافة وشالوا كل البياعين اللي هناك
أنا مش معترضة على نضافة البلد،،
بس الناس دي هاتعمل إيه؟؟!

أكتر من 200 بائع جائل،، أتقفل باب رزقهم
كام بوق جاع بقى،، كام بيت هايتخرب!!
طيب الناس دي،، كان عندها دخل بيجي من العربيات
ولو كان حتى 10 جنيه،، النهاردة مافيش،، الدخل صفر!!
طيب دول يسرقوا ولا يقتلوا،،
ولا متوقعين إيه؟؟

بصراحة رد الفعل كان أسرع من الخيال!!
ساعة صلاة الجمعة،، محل دهب اتسرق،، ودبحــوا صاحبه
في عز الضهر،، يعني لا جيش يهم ولا شرطة تلم!
والجريمة كانت بشكل باين جدا،، إنها انتقام من الأمن في الشرقية
يعني أنتم خربتوا بيوتنا،، وقفلتوا باب الرزق الحلال
خلاص نقضيها حرام،، ونشوف مين نفسه أطول!

أنا مش مع إني أسرق وأقتل عشان أكل،، لكن
كمان مش مع إني أشرد في يوم واحد،، أكتر من 200 أسرة
طيب ما الزقازيق مليانة أراضي فاضية،، ما الحكومة
تجيب البياعين وصاحب الأرض،، وأنت يا صاحب الأرض
هاتاخد من البياعين 10 جنيه إيجار لليوم الواحد،، وكده
البياع يلاقي لقمة عيش،، وصاحب الأرض يستفاد
بدل ماهي فاضية،، أهي بتجيب فلوس،،
وبرضو ملكه عادي!!!

لكن أقفل بيوت ناس،، نصهم سوابق وتابوا!!
وأتخيل إن الحياة،، هاتبقى فلة شمعة منورة؟؟!
طيب تيجي الزاي،،!!،، ده في عز الإنفلات الأمني
مافيش محل دهب واحد أتهاجم في الزقازيق!
يعني دي جرمية،، للإنتقام،، بتقول
دي مجرد بداية،، للدم!

:

مافيش نت عندي
داخلة من بره البيت أنزل البوست!!

هناك 4 تعليقات:

  1. ممكن أقولك رأيي بصراحة

    بدايةً , أنا من الزقازيق

    وثانياً , أنا ضابط شرطة (بس مش في الزقازيق)

    الناس اللي إنتي بتتكلمي عليهم دول مكانوش فارشين وبيبيعوا كده من 10 سنين عشان نقول إنهم كانوا بيسترزقوا وإتقطع أرزاقهم
    الناس دي لما حست إن الحكومة مش قادرة عليهم , لأنهم عارفين إنهم غلط , بقوا بيشربوا مخدرات ويتحرشوا و يضايقوا الناس وأصحاب المحلات
    واللي كان القشة االلي قسمت ظهر البعير الخناقة بالمولوتوف اللي كانت سبب هجوم الشرطة عليهم
    بالنسبة بقي لموضوع سرقة محل الدهب . .
    لو كل فعل الشرطة خدته ضد مجرم إتقابل برد فعل من المجرم ضد الشرطة أو ضد مواطنين , والشرطة أو الناس إعتبرته حاجة قصاد حاجة يبقي دي مش دولة قانون , أنا مينفعش كمواطن أقول للشرطة شفت لما قضيت علي المخالفات صحابها إنتقموا مننا إزاي . . كده أنا بزيد الموضوع سوء
    طب إيه الحل . .
    حضرتك أصلا ومتزعليش مني بتتكلمي زي أغلب المواطنين اللي للأسف إتأثروا بسياسة النظام السابق اللي يا رب وزير الداخلية الجديد يعالجها , وهي إن أي مشكلة في أي وزارة , الداخلية هي اللي بتعالجها . . معني الكلام إن برضو مينفعش حضرتك تقولي توفرولهم أماكن يبيعوا فيها , الكلام ده يتقال للمحافظة أو لمجلس المدينة أو أيا كان , وكان المفروض يبقي في الأول قبل ما يعملوا إشغالات مش بعد ما تتشال , طبعا المحافظة كانت هتتجاهلهم , برضو ساعتها النقد يبقي للمحافظة مش للشرطة . .
    الشرطة دورها تعالج موضوع زي سرقة محل الدهب وتمنع غيره في المستقبل , وتتجاهل تماما إن ده بسبب إزالة المخالفات , عشان ده بعيد عن إختصاصها

    ومن الآخر , سرقة محل الدهب دي معمولة مخصوص عشان حضرتك وغيرك تقولوا للشرطة سيبوا الناس في حالها تسترزق , أو وفرولهم مكان (يا شرطة) , والمطلبين أكبر خطأ في حق الشرطة خاصة وحق المجتمع والشعب عامة

    وبعدين هل تتخيلي حضرتك إن البياعين دول لو حطيناهم في حتة أرض فاضية هيروحوها ؟؟ . . مستحيل . . مش هتبقي زي وسط البلد

    أنا آسف لو كنت طولت في الكلام بس حبيت أوصل وجهة نظري يا رب تكون محل تقدير

    تحياتي . .

    ردحذف
  2. انا سمعت ان الناس دي اتهجموا على محلات تانيه وبلطجوا على اهالي واصحاب محلات ولما الجيش اتدخل حاولوا يتهجموا عليه
    مش عارف ايه الروايةالاصليه لكن لازم يلاقو حل مش مجرد المنع

    ردحذف
  3. الفكرةحلوة أوى
    وفعلا ممكن جداً تكون حقيقية وبنفس التفاصيل كمان

    أراها رسالة أرجو أن يضعها المسئولون فى اعتباراتهم قبل تنفيذ أى إجراء

    ردحذف
  4. سبحان الله
    كان فى دماغى الموضوع ده النهارده
    انا مش من الزقازيق
    بس فى القاهره كمان كده وفى مناطق كتيره اوى مش منطقه محدده
    والكلام ده مش من وقت الثوره بس
    لا من زمان والناس دى بتعتمد بشكل كلى فى دخلها من الوقفه دى
    يعنى مش عشان شافوا ان مفيش حكومه فا قالوا لما يقفوا براحتهم بقى
    من زمان وهما بيقفوا بالطريقه دى وبردو البلديه بتيجى تمشيهم
    ولو تشوفى منظرهم وهما بيلموا الحاجه ويجروا عشان الشرطه ماتخدهاش فى البوكس ويدوخوا وراهم على ما يرجعوا حاجاتهم بقى بجد بيصعبوا على الواحد
    البياعين دول فكروا انهم ياكلوا رزق حلال بخلاف بقى هيقفوا فين والا هيجروا من البوليس امتا وازاى
    وادام مفيش فرص عمل قدامهم
    ليه الشرطه مش تسيبهم فى حالهم
    ماهو يا تسيبهم يا اما توفرلهم فرص عمل تناسبهم

    ردحذف

خلل براحتك من غير انتظار .. فتافيت أصلاً بتحب الخيار