15 يونيو 2011

15- توريت،، وثقافة الأباحة!!

:

ده البوست الــــ 15
في حملة التدوين اليومي،،!
توريت،، وثقافة الأباحة!!

النهاردة دخل فتافيت،، حوالي 800 ضيف
وطبعا لما شوفت العدد أنشكحيت جداً،،
وقولت أشوف إيه اللي جرا،،؟!
ولاقيت إن الـ800 فيهم حوالي 780 ضيف
دخل بوست الأهلي،، والسبب في الظاهرة دي إن
البوست نزل النهاردة في استاد الأهلي
لكن يا فرحة ما تمت،،
خــدها الــغير معـــرف وطـــار
!!


أتصدمت بسيل من الأباحة،، من الدرجة الأولى
وبلاعة كلام معرفش يتكتب ليا ليه أصلا؟
سب شغال،، قذف ميمنعش،،
واللذيذ إني طلعت يهودية في أخر الفيلم!!

من فترة طويلة وأنا عايزة أخد قرار بقفل
التعلقات عن الغير معرف،، وكان كل اللي بيمنعني
هو منتدى أبو خضرة،، بس ياريت يسامحني
لأن فعلا الأمر بقى غير محتمل نهائي!

في الأول كانت التعليقات هبلة تدل
إن اللي كاتبها مقهور مش أكتر!
يعد كده بقت تعليقات تدي إيحاء للقارئ
إن كاتب التعليق على علاقة قوية جدا بيا!
يعني تحس إنها مرات أبويا أو إنه جوز أمي مثلا!
وبعد كده الحمد لله،، مصر أتطورت واتغييرت
بقوا بيسبوا الدين،، يوصفوني بالعهر
وده طبعا،، لأني كل كتاباتي سافلة سافلة
وأنا أصلا بموت في السفالة!!!

في متلازمة اسمها توريت!
اللي هي حب وعشق الانسان للسب،،!
وكنت فاكرة إنها المتلازمة الوحيدة لكن قريت
النهاردة مقال لدكتور أحمد خالد توفيق
عرفت منه إن المتلازمات كتير في الشأن ده
من وأنا شغالة في مجال الإرشاد النفسي والإجتماعي
وأنا عارفة إن حجب الهوية الشخصية له سحر خاص
بيخلي الإنسان يتحرر من كل حاجة،، وينطلـــق
وتظهر بقى تجليات متلازمة توريت بفظاعة!
حتى لما كانت بتجيلي استشارات،، كنت بصعق منها
بسبب الحرية المطلقة في الفضفضة،، وكنت بضطر لفلترة
الاستشارة قبل ما أبدأ أركز فيها عشان أجاوبهــا!

لما بدأت أتابع كومنتات المواقع الإخبارية
لاقيت إن حجب الهوية ده،، مش بس بيخلي الشخص
يطلق العنان لمتلازمة الأباحة توريت،، نوووووو ده كمان
بيخليه يعيش دور البطل الثوري الوطني،، المناضل
وكنت بستعجب جدا من حد داخل باسم مستعار،،
وبيكتب تعليق،، بيتهم فيه بالخيانة أو التراخي كاتب
محترم كاتب باسمه الحقيقي مقال بيهاجم فيه النظام!
أو واحد برضو باسم مستعار،، بيشتم الرئيس
طيب لما أنت راجل أهو،، ما تكتب اسمك الحقيقي!!
مادمت غير معرف،، فــــأنت،،
بعالم افتراضي،، كن فيه كيفما تشاء!!

نرجع للنهاردة،، البوست متأكدة إنه محترم
لأني أصلا كنت مركزة إني ما كتبش فيه أي إهانة
اللهم غيــــر،،، رقعلي صداغي!!،،
لأن دي وجهة نظــــري!!
وإثباتاً لنظرية إن الزملكاوي بيشجع الزمالك
بشتيمة الأهلي،، فدخل عندي زملكاوية كتير
داخلين يشجعوا الزمالك،، بشتمتي أنـــا!!
ومش عارفة بصراحة دخل ماما إيه بنادي الزمالك!!
أو دخل ملابسي الداخلية إيه بالكاس أو الدوري!
أو دخل عرضي وأخلاقي إيه بالألتراس!
أو دخل عقديتي وديني إيه بالأهلي!!!
:@ :@ :@ :@

المشكلة مش بس في الغير معرف،، لاء
الأباحة نفسها،، بقت في مصر طحينة في الفول
راكب موصلات شغال،، واقف في ماركت عادتشي
ماشي في الشارع مش مشكلة،، قاعد في كافي ده بقى عزه
تسمع الكلام بالصوت العالي،، وكأنه كلام مش عيب
شتايم،، أباحة،، سب دين،، كله موجود!

فاكرة مرة صيف 2008 كنت في أكاسيا،، أسكندرية
وطبعا المفترض إن المكان راقي جدا! هو والزائرين
وكان فيه واحد شكله محترم،، وشيك جدا جدا!
وكان مسبب ارتباك لطقم الضيافة،،!
والجميل إن كان تهريجه معاهم بسب الدين!
وهم يضحكوا،، لأن التبس اللي بيسيبه كبير!
ومن صوته العالي عرفت إنه رجل أعمال تقيل
وكان متنرفز عشان معرفش إيه كده هبط في المقاصة
المهم بدأ مع نرفزته يسب الدين لكل حاجة
الكراسي،، العصير،، المكان باللي فيــــه!!
قومت وروحت عند تربيزته،، وقولتله:
حضرتك أزعجتني جدا بألفاظك،، غير إن سب الدين
ده إرتداد يا فندم،، لازم تتوب وتستغفر ربنا!
قاللي: أنا أسف جدا بجد أعذريني وسامحيني،،
بس تيييييييت أم البورصة جنتتني!!!
وطبعا سب الدين للبورصة،، وقتها أتغظت جدا منه
وكنت عايزة ألبسه كاس العصير في وشه!



يعني مش زي ما أتربينا إن السافل ده
اللي ملاقش حد يربيه،، وفي الغالب بيكون بيئة
والمثال الحي له،، سواقين المكروباص!
مرة كنت مسافرة القاهرة،، وركبة مع واحد منهم
السواق شغل شريط،، من شرايط مشايخ الميكروباص
معلش على التعبير،، بس ده لا صوت ولا أسلوب شيخ يتسمع
ما علينا،، بدأ الشيخ يحكي قصة وفاة النبي
صلى الله على محمد،، وعلى آل وأصحاب محمد!
وكلنا بدأنا نتغاضى عن صوت الشيخ،، وتدمع عيونا
والسواق في عز إندماجه والدموع نازلة،، عدت عربية جنبه
معرفش إيه الي ضايقه،، وقام مطلع راسه من الشباك
قايل يا أبن تييييييييت الـ تييييييييت!!
ورجع دخل راسه وكمل عياط وشحتفه!!!

كنت بشتري موبايل من كام يوم،، وفي المحل
واحد بيفرج خطيبته على موبايل،، وبيمدح فيه وقال
ده موبايل فاجر ابن تييييييييييت جامد!
لدرجة إن ماما قالت له:
أخص عليك أحترم إن فيه ستات واقفة!
وهو طبعا أستغرب ماما جدا،، هو بيمدح في الموبايل
ما يقصدش يشتم أو يقل أدبه نوهائي!!!!

اللذيذ بقى إن مكتشف متلازمة توريت
كان بيقول إنها متلازمة نـــادرة!!
وواضح إنه ما نزلش مصر،،
أوما سمعش عنـــها!!!

في الأخر بس عايزة ألفت نظر،، الناس
اللي فرحانة بطول لسانها ليلي نهار على الخلق
للحديث الشريف ده،، وهو متفق عليه
(سباب المسلم فسوق وقتاله كفر)،،!
الفسوق يعني: الخروج عن طاعة الله!
:
ربنا يهدي الجميع بقى!

:

هناك 23 تعليقًا:

  1. الكورة نجومها مش متعلمين
    وجمهورها وان كان متعلم فهو منساق وراهم بفعل استوديوهات التحليل اللى بيوجهها انصاتف متعلمين
    احنا محتاجين ثورة فى الرياضة المصرية بشكل عام عشان الجمهور بالذات وياااااااااااااااااما هاتينا واتقطع نفسنا وفى الاخر اتقال علينا متعصبين عشان بنقول عايزين نصلح ومينفعش الغلط

    ردحذف
  2. :)))))))))))
    ضحكتيني علي الصبح وانا مش نايمة اصلا كان عندي نبطشية مع حفيدي
    :)))
    بتاع الميكروباص ده مسخرة بصراحة

    انتي عارفة ان في موضة ان المجتمعات الراقية اللي بيتقال عليهم كريمة الكريمة
    الموضة انهم يشتموا شتايم من النوعية دي
    ومرة كنت قاعدة في مجلس نسائي لطيف ظريف
    وجت صديقة لصديقتنا ومن اول ماقعدت ماسبتش شتيمة نعرفها او مانعرفهاش الا لما كانت في سياق كلامها واللي قاعدين بيضحكوا لدرجة اني قمت واقفه مزعقة لهم وانا بلم حاجاتي وهروح
    وهمه مستغربين قلت لهم اقعد في مكان تحفه الشياطين ازاي
    ماهو مكان يسب فيه الدين وكل المخلوقات وكل الاعضاء هيكون مين اللي بتحفة يعني
    وزي ماقلتي ربنا يهدي

    ردحذف
  3. انا السبب انا السبب وانهار من الدموع اروح انتحر بقى "احنا اسفين ياصلاح قصدى يافتفوته"

    بس ده العادى بين المشجعين وياما اتشتمنا نحن معشر الصحفيين خاصة بالمواقع الرياضية يالا كل عن ربنا

    وارجوا الا يتسبب هذا الامر فى ايقاف ابداعاتك الكروية ونرجو مزيد من التعاون والله الموفق

    ردحذف
  4. معلش كله فى سبيل الاهلى هههههههه

    هاكلمك بجد الالفاظ اصبحت من سلوك المجتمع تدل مرة على الصياعة و مرة على انه مفتح و مقطع السمكة و ديلها و دى كانت سياسة البلد من اول رئيس الجمهورية و انتى فاكرة بطرس غالى لما سب ام ايمن نور فى مجلس الشعب و ظهر فى التلفزيون
    انتى عارفة انا محضر بوست فى سلسلة بلد مجانيين عن الموضوع ده

    تحياتى

    ردحذف
  5. السلام عليكم

    أحييك على البوست المميز بجد..
    ذكرتيني بالمقالة الرائعة للعبقري الذي طالما أبهرنا (أحمد خالد توفيق) عندما تكلم عن هذه المتلازمة..

    أمثلتك قوية وتطرق على ثقافة خطيرة (ومنيلة بنيلة) لدينا ولدى الشعوب الأخرى على السواء...

    فقط لي تحفظ على جملة واحدة...!

    تحياتي.. ومتابع بشغف يومياتك التدوينية...

    ردحذف
  6. أول مرة أعرف إن فيه متلازمة للأباحة :)

    تدوينة لذيذة قوي . .

    أحسن حاجة إني مليش فر الكورة أصلا بلا وجع دماغ

    تحياتي وإسمحيلي بالمتابعة

    ردحذف
  7. الشتيمه دلوقتى بقت حاجه ببلاش كده
    ع الفاضى والمليان بسبب ومن غير سبب
    الواحد مش عارف ينضف ودنه ابدا
    مش تزعلى لو حد ضايقك يا رحاب :))

    ردحذف
  8. بغض النظر عن المقاله الجامدة جدا دى

    الظواهر اللى تفشت فى مجتمعنا اللى ليل نهار يقولو عليه متدين الظواهر دى بتدل على انحطاط وسفاهه فئه كبيرة جدا جدا جدا ومش اللى هى الفئه الصامته بس اللى بيشيرو اليها
    لا فى كتير من الفئات المتكلمه فى الكورة والفن وحاجات تانيه كتير

    ربنا يحفظنا
    المهم ان احنا مانتأثرش بالموجه التافهه دى

    معجب كبير جدا بالمقاله وباسلوبك وتشبيهاتك

    بجد جااامد

    تحياتي

    ردحذف
  9. بداية .. بسم الله الرحمن الرحيم
    الشكر الجزيل للكاتبة المحترمة فتافيت على تطرقها لهذا الموضوع المثير والخطير معا !
    كونه يعتبر مخالفا للفطرة السليمة ولمنظومة الأخلاق التي تعلمناها من ديننا القويم !
    أنا شخصيا تعرفت الى مفردات هذا المرض " متلازمة توريت " من متابعتي للتعليقات الأخبارية !
    وأثارت قلقي وخوفي لأن تواتر انتشارها يوحي أنها قد أخذت حيزا واسعا من طباعنا !
    ليس فقط على صفحات النت وأنما في مدارسنا وشوارعنا وجلساتنا ..
    صارت مقبولة بالسكوت عنها !! ومبررة في كثير من الأحيان كونها تعبر عن سخط عميق حيال واقع ما !
    كالظلم مثلا أو عدم تمكن الفرد من الوصول الى حقه أو الشعور بعدم القيمة " التهميش " وقلة الحيلة !
    ولكني وجدته يتجاوز حدود الغضب الى قمة الفرح وساعات اللهو والمرح !
    وكأنه علة ما ليس لها شفاء .. وهي عامة في سلوك الكثير من الشباب والشياب أيضا !
    كما أن هذا السلوك يتوافر في بعض الأفلام والمسلسلات المصرية .. ( كالردح ) مثلا وقد بدا واضحا في فيلم ( خالتي فرنسا ) ل عبلة كامل مع التحفظ على عدم انزلاق الحوار الى درجة تماثل ما يجري في الشارع او على صفحات النت
    ولكنه يدل على أن هناك أصلا للحكاية !!
    ثقافة ( الأباحة ) من السب والشتم والأيحاءات الجنسية ولدت من رحم الأفلام والفضائيات في الوقت الحاضر وكانت انطلاقتها من أفلام يوسف وهبي قديما حتى ثقافة ( الكلوت ) أيام محمد صبحي الآولى ( كلنا لابسين كلوتات ) والناس ح تموت وقتها من الضحك ويفضل يعيد في الجزء ده من المسرحية بشكل ملحوظ ويمكنك مشاهدتها !! وقد تبنت الفضائيات اللبنانية بشكل ( فاضح ) برامج تتحدث عن الجنس علانية بدأتها محطة ال بي سي في برنامج اسمه ( سيرة وانفتحت ) ثم قامت فضائية مصرية بتقليده ثم اقفل البرنامج بعد فترة وهذه الأيام صارت النكات الجنسية أكثر صراحة على احدى الفضائيات اللبنانية تأخذ طابع الجلسات وتبادل النكات ( كل شيء باسمه ) علنا والمشاركين من شباب وشابات يضحكون مبسوطين وأقول لك مدى تأثير هذه البرامج وخطورتها " كنا في سهرة عامة في احدى صالات الأفراح فقال احد الموجودين وعمره يتجاوز الثمانين من خلال حديثنا عن تدهور أخلاق المجتمع مستدلا ب نكتة جنسية وكان يجلس بجواري فسألته عن مصدرها فقال : من الفضائيات !! صدقيني كل الموجودين عارفين الفضائية والبرنامج بالذات !!
    هذا حالنا ولا حول ولا قوة الا بالله ! الأمر الآخر الذي لفت انتباهي في مقالتك عن الربط بين ( الغير معرف ) ومنتدى ابو خضرة ! مع الشكر ..

    ردحذف
  10. حلم بيعافر

    لاعب الكورة مش لازم يكون معاه دكتورة
    لاني بتفرج على لعبه.. لكن المشكلة في المشجع
    اللي اصل تشجيعه بلسانه!!!!

    حاجة بقت زي الزفت عليهم
    مش فاهمة.. امتة هاننضف بجد!!!!
    نورت يا رفيق

    ردحذف
  11. شمس النهار

    هههههههههههه
    ده الموضوع كبير اوي بقى
    دي مصيبة وحلت على مجتعنا بجد
    مش عارفة.. ده حتى فهوم الاباحة نفسه
    اختلف كتير عن زمان !!!

    ربنا يستر!

    ردحذف
  12. يوميات شاب منوفى

    ههههههههههههه ايوة انت السبب :))
    عايزة تعويض بقى ماليش دعوة هههههههههههه

    بص هاقولك.. انا اتشتمت قبل كده كتير
    بسسب مقالاتي.. واكتر بسبب ردي على الاستارات الاجتماعية والعاطفية.. :)))
    وفي مقال كتبته من كام سنة اتكفرت بسببه
    لكن بصراحة اللي شوفته بعد مقال الاهلي
    فوق الفظيييييييع :))))

    ما تقلقش .. لن اغير موقفي
    وانا صااااامدون... والأهلي عمهم وحابس دمهم :)))

    ردحذف
  13. ابراهيم رزق

    ههههههههههههههههههه
    بطرس غالي :))))
    ههههههههههههههه.. ده كان ابيييييييييح بجد
    فاكر لما سب الدين للشعب.. برضو في المجلس اللي المفروض يعني انه موقر :)))))

    بعدها كانت فيه مظاهرة.. وكان الهتاف
    يا وزيرنا يا مطلع تيييييت نا
    اه يا غالي والفقر واكلــنا ... :))))

    منتظرة السلسة دي
    بفارغ الصبر :)

    ردحذف
  14. ماجد القاضي

    اهلا اخي ماجد
    هو تحفظك في محاله طبعا
    لكن انا في الغالب لما بتكتب بقصد مجتمعي المصري... عشان ماحدش يقول اني بهين شعب او ما اشبه!

    تورتني .. تحياتي :)

    ردحذف
  15. FAW

    دي متلازمة مشهورة جدا :)))
    نص شعب مصر مريض بيها.. والباقي بيحبها
    الا من رحم ربي ...!

    وطبعا يا ريت تتابع
    ده شرف ليا.. وشيء يسعدني
    نورتني .. :)

    ردحذف
  16. Bent Men ElZaman Da !!

    دي مش بس ببلاش
    نووو.. دي بتنزل فور فري على الحاجة
    عاااااااااااا.. حاجة وحشة
    وازعل ليه... خليهم ياكلوا نفسهم
    ناس مش كويسة بجد :))

    نورتي يا سكرة <3

    ردحذف
  17. تاكاشى

    مش عارفة موضوع اننا ما نتأثرش دي
    مافيش حاجة بقت مضمونة هههههههههههههههههه

    ميرسي اوي على ذوقك
    نورتني :)

    ردحذف
  18. abu khadra

    أبو خضرة... سلام كل الناس
    حللت أهلا ونزلت سهلا.. نورتني .. ده أولا :)

    ثانيا
    مع حضرتك حق في موضوع الأفلام
    أفتكر أن سر أعجاب الكتير منا بفيلم سهر الليالي
    هو أن الألفاظ فيه كانت ابيحة نوعا ما
    وكان هو أول فيلم يتقال فيه كده!!

    اما بالنسبة للفضائيات اللبنانية
    فلا اخفيك سرا انا لا اتابعها نهائي.. واول مرة أعرف او اسمع عن البرامج دي!!!

    المهم
    انا مش عارفة حضرتك فهمت ايه بربطي الغير معرف بمنتدى ابو خضــرة.. وعشان كده حبيت اوضح
    اقصد اني ماكنتش برضى اقفل التعليق على الزوار من خارج بلوجسبوت.. عشان لو دخل ليا زائر عن طريق منتدى ابو خضرة.. لانهم بيكونوا غير معرفين... ولاني بسعد جدا بتعليقاتهم فضلت متمسكة باني ما قفلش التعليقات!!!
    لحد ما بقى الوضع مزري عندي.. مش بسبب زوار ابو خضرة... طبعا لا.. بسبب ناس ماعندهاش دم ولا ذوق.. بيفضلوا التخفي ورا الغير معرف.. عشان يقولوا كلام ما يقدروش يواجهوني بيه!!

    حبيت اوضح.. عشان حسيت ان حضرتك زعلت
    وربنا يعلم مكانة ابو خضرة.. ومتدى ابو خضرة عندي.... تحياتي ووافر واحترامي

    ردحذف
  19. أعوذ بالله من الشيطان الرجيم ،،،
    بسم الله الرحمن الرحيم ،،،،

    أما بعد أحبتي الغاليين جداً ،،،

    للأسف أقتبس هذا النص : (( سننشر الجنون الرياضي )) المرجع برتوكولات حكماء صهيون ،،،

    سمعت أن أحد علمائنا الأجلاء سئل يوماً عن رأيه في رياضة ( كرة القدم ) فقال ما معناه : بأنها ليست رياضة تفيد الأمة ،،، والسبب أن عدداً من الذين يدعون الرياضة ( لا يتجاوز عددهم بضعاً وعشرين شخصاً ) يركضون في الملعب خلف كرة من الجلد المنفوخ ،،، وكم بسببهم تعطلت مصالح الأمة (( ملايين العاطلين على القهاوي ؛ لا علم لهم ولاهم سوى فاز فلان وانهزم فلان ،،، ملايين العيون مشبوحة أما شاشات التلفزة ،،، وملايين الدنانير والجنيهات الريالات - ولن أقول الدولارات لأنني متعصب " افهموها كما تريدون " - تهدر ومئات آلاف ساعات العمل والإنتاج تهدر ،،، فكم من عامل ذهب إلى عمله وهو لا يدرك أين طريقه من سهر الكوره ،،، وكم من طالب لم يعرف وجه الكتاب من قفاه بسبب ماتش الكورة انطلاقاً من الكأس المحلي إلى كأس العالم ،،، المشجعون غالباً عوام الناس وكثيراً يكونون من السوقه ( أقول غالباً) ،،، ونحن نراهم بحق ،،، ولكن من الذي يسكب البنزين على نار العوام ،،، كبار المثقفين وأبواق الإعلام ،،، ومن ينفق ويشجع ويدعم ،،، كبار المسؤولين ،، فلمصلحة من هذه الدوامات ؟؟!!! ،،،

    يتم تقسيم أحد الشعوب العربية إلى أزرق وأخضر ،،، شرقي وغربي بسبب لعبة كرة ،،، ونسمع هتافات لا تليق ،، بل تخرج من الملة وناطقها يعتبر شرعاً مرتد عن الدين !!! ،،، تم تمزيق وحدة الشعبين المصري والجزائري بلمح البصر بركلة كووووره ،،، فلمصلحة من هذه الوثنية التي حولت الكووووورة إلى معبود من دون الله ،،،

    بالفعل أخواني هذا هو الجنون الرياضي الذي تمنوه لنا وقد حصلوا عليه ،،، فإلى متى ؟؟؟؟؟!!!!!!

    الأخت الفاضلة والكريمة فتافيت ( رحاب الخضري ) : هي كاتبة نبغت في مجال تحطيم الأوثان والأصنام الاجتماعية ،،، وهي اتقنت الضحك من وسط الجراح فكانت ضحكاتها اللاذعة كثيراً كمبضع الجراح ،،، تحاول الكشف عن مصدر الورم والعلة ،،،

    أتمنى لها أن تكمل مشوارها في تحطيب الأصنام : سواء أصنام عبادة الحاكم من دون الله ،،، أو عبادة الحزب والجماعه من دون الله ،،، أو عبادة العادات والتقاليد الجاهلية المتفشية كدستور أقوى من الشريعة بيننا عامة وبين أهلنا المصريين خاصة تقاليد تعبد من دون الله ،،،

    أختي رحاب أرجووووك إلى الأمام دون الانزلاق إلى ترهات (وثن جنوووون الكوووورة) فمثلك ليست من تخدع بسهوله ،، وأنت مسؤووولة أمام الله فقد وهبك قدرة على التعبير لم يؤتها غيرك وهو لا محالة سائلك عنها ،،،

    واخيراً أقووول لك تأملي هذا الرد الذي جاءك عبر رسائل النت وتدبريه ،،، :
    (( يعني اللي يشجع الاهلي يفضل يجرح في الزمالك بلاش تعصب أعمي للاهلي علشان تعصبك يا أبلة رحاب بيتنقل للجماهير والبلد مش ناقصة.
    هيجان )) ،،،

    أجل أخت رحاب ( فتافيت) ،،، أمتنا بحاجة لما هو أكثر من الكورة ،،، فلقد تم ذبح شعبنا الفلسطيني آلاف المرات على أنغام مشجعي الكووورة

    ( أحمد ) منتدى ابو خضرة - سلام لكل الناس

    ردحذف
  20. صباح الخير .. ع الأهلي .. صباح الخير .. ع الزمالك
    حقيقي .. خساره .. اللي بشوفه وبسمعه من بعض شباب مصر بعد 25 يناير
    انتم مش بتقولو .. مصر اتغيرت .. انت لازم تتغير كمان ..
    ولا هي شعارات وبس وكلام في الهواء ولا كلام جرايد ؟؟؟؟؟؟
    يفترض في الشباب اللي دوشونا بيهم وبقدارتهم الخارقة في اسقاط الأنظمة والتغيير انهم يكونو على مستوى المسئولية
    الناس لسه بتموت في الميادين وهم عاملين ( كليبات ردح ) مع بعض وعلى عينك يا تاجر من غير ( حيا ولا خشي ) ايه ده !!
    يقطع الكورة وسنين الكورة اللي بتخلي المصري المحترم يشتم في أخوه ف كلام ( وسخ ) ملوش الا معنى واحد :
    ( ان اللي بيقوله واحد مش متربي بجد ولازمه اعادة تهيئة )
    مصر مش ناقصة استهبال وللي فيها مكفيها .. كفاية انها خدت فيكم مقلب ..
    كانت فاكراكم رجالة بجد .. طلعتوا زي الكورة اللي بتعبدوها .. مليانين هوا ..
    ويا ريته كان هوا نظيف .. هوا عايز فلتره عشان الواحد يقدر يطيقه !!
    ايه كان لازمته التعليقات الغير أخلاقية .. نازلين شتيمة وسب وردح وكـأنكم أعداء ..
    اللي عايز يتفرج بجد على الحوار الأخوي يدخل الموقع ( ستاد الأهلي ) وحيشوف قد ايه الناس دي بحاجة الى ( مصحات علاج نفسي ) من النوع التقيل زي الخيبة اللي هم فيها ..
    أصلا الكورة كلها على بعضيها ( ملهاة للشعوب ) زي القنوات اللي بتحط أفلام 24 ساعة .. تلاهي الناس وتشغلهم عن البلاوي اللي بتحصل حواليهم .. اللي بيشجعو الكورة واللي بيتفرجو ع الأفلام .. رقص وغناوي .. هم من نفس الصنف .. متعلمين أو جهله !
    أو من أي داهية .. هم فارغين .. قولا واحدا !!!!
    يا خوانا فوقو بقه .. اصحو يا نايمين .. لحد امتى حنفضل نزعق ونتخانق ونشتم ونتهجم ع الناس المحترمة بحجة تشجيع الرياضة !
    وبتقولو روح رياضية .. فين الروح الرياضية دي ؟
    خساره وألف خسارة عليكو يا شباب مصر .. دايرين ورا كورة هوا وشوية مغنيين .. زي واحد في التحرير يستنجد ب شعبولا ويقوله فينك يا شعبولا اشمعنى مغنيتش للثورة ؟؟؟
    بحبك يا مصر

    ( زياد ) منتدى ابو خضرة - سلام لكل الناس

    ردحذف
  21. بسم الله الرحمن الرحيم
    احبتي الكرام في هذا المنتدى - شكرا لكم على هذا الطرح
    في يوم من الايام ذهبت الى مدرسة حنين في جبل الاخضر بناء على دعوه من ادارة المدرسة لحضور اجتماع
    الاباء والمعلمين- وبعد تقديم القهوة وكرم الضيافة
    شرح مدير المدرسة الظروف والمعوقات وطرق التعامل مع الطلبة كما وطلب تعاون الاهل مع ادارة المدرسة
    للوصول في المرحلة التعليمية الى بر الامان
    وهنا قام احد اولياء الامور مهاجما هيئة التدريس وقال ان ابني لا ياخذ حقه من حصة الرياضة كما ان الاستاذ
    قد استولى على الكوره التي ارسلتها مع ولدي ليلعب بها في حصة الرياضة
    فهنا طلبت من المدير ان اجلس بجانبهم للرد على هذا الرجل فسمحوا لي واصبحت مقابل اولياء الامور
    فقلت له يا خي العزيز نريد ان نحسب كم من الوقت ياخذ الولد في الدراسة وكم ياخذ با للعب من حين يخرج
    من المنزل حتى يصل الى المدرسة ومن حين خروجة من الصف في طريق العودة حتى يصل الى المنزل
    فوجدنا ان ساعات اللهو واللعب اكثر من اوقات الدراسة
    فقلت له استحلفك بالله هل جميع لمبات الكهرباء في بيتكم كلها سليمة فقال -لا- فقلت له وهل زجاج
    الخزانه سليم فقال والله انه مكسور - فقلت له اذن انك تروج للسياسة الصهيونية والتي اقرها المؤتمر
    الصهيوني الاول اللذي انعقد في مدينة بال بسويسرا عام 1897 وكان احد مقرراته
    ايجاد وسيلة الهاء لشباب العالم ( الكورة) فاصبح من اجل الكوره تنشا الحروب مثل كوستريكا وهندوراس
    وقطع العلاقات الدبلوماسية من قريب بين مصر والجزائر غير المعارك الداميه بين مشجعي هذا الفريق
    وذاك او حتى بين الرجل وزجتة الا نتقي الله في انفسنا وفي اهلنا وفي بلدنا
    والسلام لكل الناس
    ابو ياسر / منتدى ابو خضرة - سلام لكل الناس

    ردحذف
  22. أعضاء منتدى أبو خضرة الأفاضل

    لكل واحد فينا،، منطقة خاصة بيه في حياته
    والأهلي،، منطقة خاصة في حياتي

    أنا بكلامي عن الأهلي ماهنتش أي حد تاني
    وكلامي كله على سبيل الدعابة!!
    ومع ذلك في دعابتي ماكدبتش أو أفتريت على حد
    أو قولت حاجة لما أقف قصاد ربنا أخجل منها

    أنا أعصابي أدمرت من كتر الشد
    ومحتاجة إني في وقت،، أهيس زي أي حد
    عشان لو فضلت كده كتير،، ممكن بجد أنفجر
    ومحدش هايخسر غيري!!!!!!!

    بحب بلدي،، وشايلة همها على كتافي من سنين
    بحب أهلها،، وبموت في ترابها
    وهاعيش عليه،، وبتمنى ما دفنش إلا فيه
    عمري ما كنت ولا هاكون،، من مثيري الفتن
    ده بوست لايت،، تهريج مش أكتر
    عشان أنا محتاجة أغير مودي
    ولو مرة كل سنة،، حتى!

    الأهلي فعلا في دمي،، أعمل إيه طيب؟
    أتربيت في بيت،، بنصلي فيه جماعة
    وبنحب في مصر جماعة،،
    وبنكره فيه الظلم والطغيان واليهود جماعة،،
    وبندعي لفلسطين وبندعمها فيه برضو جماعة،،
    وبنتفرج على ماتش الأهلي فيه جماعة!!!!!

    لو زعلت حد أنا أسفة له
    بس كمان،، فريق كرة بشجعه مش جرم!
    ولو هو جرم في نظركم،، اعتقد رصيدي عندكم
    يشفع ليا في كده،، :)

    خالص تحياتي لكم جميعا!

    ردحذف
  23. الآنسـة الفاضلة رحاب .. مساء الخير
    بداية لك كل الشكر على متابعتك ونرجو أن نعلمك أنه لا يجوز ولا ينبغي لنا أن نكون خصوما معك في أي وقت كان .. فكيف نقول أن محبتك للأهلي جرما .. هذا رأيك نحترمه ولسنا بصدد تقييم هوايات الناس على أي شكل كانت .. ونحن معك كيفما كنت وهذا ليس مبحثنا .. انما أراد الأعضاء أن يقولوا رأيهم حول التعليقات التي وصلت حول مقالتك على صفحة ستاد الأهلي .. وقد قمنا بتسجيل مجمل التعليقات حتى نبين للقارىء الفرق الشاسع بين أصحاب الخلق الكريم وبين من يدعي أنه على خلق .. ( مراجعة المقال على صفحتك في المنتدى )طبعا قمنا بحذف التعليقات ال ... والله ماني عارف شو بدي أسميها أكثر من أنها غير أخلاقية بتاتا .. تسطيعين ان رغبت مطالعتها على صفحتك في المنتدى .. هذا وأنا صراحة أعتذر لك اذا جاء في تعليقات الأعضاء ما أزعجك .. ونحن نعتقد أن رصيدنا عندك يشفع لينا ف كده ..
    ( ملاحظة : هل يمكنك اضافة رابط الويب في خيارات الرد اضافة الى جوجل وشكرا ) في آمان الله

    ردحذف

خلل براحتك من غير انتظار .. فتافيت أصلاً بتحب الخيار