15- توريت،، وثقافة الأباحة!!

:

ده البوست الــــ 15
في حملة التدوين اليومي،،!
توريت،، وثقافة الأباحة!!

النهاردة دخل فتافيت،، حوالي 800 ضيف
وطبعا لما شوفت العدد أنشكحيت جداً،،
وقولت أشوف إيه اللي جرا،،؟!
ولاقيت إن الـ800 فيهم حوالي 780 ضيف
دخل بوست الأهلي،، والسبب في الظاهرة دي إن
البوست نزل النهاردة في استاد الأهلي
لكن يا فرحة ما تمت،،
خــدها الــغير معـــرف وطـــار!!

أتصدمت بسيل من الأباحة،، من الدرجة الأولى
وبلاعة كلام معرفش يتكتب ليا ليه أصلا؟
سب شغال،، قذف ميمنعش،،
واللذيذ إني طلعت يهودية في أخر الفيلم!!

من فترة طويلة وأنا عايزة أخد قرار بقفل
التعلقات عن الغير معرف،، وكان كل اللي بيمنعني
هو منتدى أبو خضرة،، بس ياريت يسامحني
لأن فعلا الأمر بقى غير محتمل نهائي!

في الأول كانت التعليقات هبلة تدل
إن اللي كاتبها مقهور مش أكتر!
يعد كده بقت تعليقات تدي إيحاء للقارئ
إن كاتب التعليق على علاقة قوية جدا بيا!
يعني تحس إنها مرات أبويا أو إنه جوز أمي مثلا!
وبعد كده الحمد لله،، مصر أتطورت واتغييرت
بقوا بيسبوا الدين،، يوصفوني بالعهر
وده طبعا،، لأني كل كتاباتي سافلة سافلة
وأنا أصلا بموت في السفالة!!!

في متلازمة اسمها توريت!
اللي هي حب وعشق الانسان للسب،،!
وكنت فاكرة إنها المتلازمة الوحيدة لكن قريت
النهاردة مقال لدكتور أحمد خالد توفيق
عرفت منه إن المتلازمات كتير في الشأن ده
من وأنا شغالة في مجال الإرشاد النفسي والإجتماعي
وأنا عارفة إن حجب الهوية الشخصية له سحر خاص
بيخلي الإنسان يتحرر من كل حاجة،، وينطلـــق
وتظهر بقى تجليات متلازمة توريت بفظاعة!
حتى لما كانت بتجيلي استشارات،، كنت بصعق منها
بسبب الحرية المطلقة في الفضفضة،، وكنت بضطر لفلترة
الاستشارة قبل ما أبدأ أركز فيها عشان أجاوبهــا!

لما بدأت أتابع كومنتات المواقع الإخبارية
لاقيت إن حجب الهوية ده،، مش بس بيخلي الشخص
يطلق العنان لمتلازمة الأباحة توريت،، نوووووو ده كمان
بيخليه يعيش دور البطل الثوري الوطني،، المناضل
وكنت بستعجب جدا من حد داخل باسم مستعار،،
وبيكتب تعليق،، بيتهم فيه بالخيانة أو التراخي كاتب
محترم كاتب باسمه الحقيقي مقال بيهاجم فيه النظام!
أو واحد برضو باسم مستعار،، بيشتم الرئيس
طيب لما أنت راجل أهو،، ما تكتب اسمك الحقيقي!!
مادمت غير معرف،، فــــأنت،،
بعالم افتراضي،، كن فيه كيفما تشاء!!

نرجع للنهاردة،، البوست متأكدة إنه محترم
لأني أصلا كنت مركزة إني ما كتبش فيه أي إهانة
اللهم غيــــر،،، رقعلي صداغي!!،،
لأن دي وجهة نظــــري!!
وإثباتاً لنظرية إن الزملكاوي بيشجع الزمالك
بشتيمة الأهلي،، فدخل عندي زملكاوية كتير
داخلين يشجعوا الزمالك،، بشتمتي أنـــا!!
ومش عارفة بصراحة دخل ماما إيه بنادي الزمالك!!
أو دخل ملابسي الداخلية إيه بالكاس أو الدوري!
أو دخل عرضي وأخلاقي إيه بالألتراس!
أو دخل عقديتي وديني إيه بالأهلي!!!
:@ :@ :@ :@

المشكلة مش بس في الغير معرف،، لاء
الأباحة نفسها،، بقت في مصر طحينة في الفول
راكب موصلات شغال،، واقف في ماركت عادتشي
ماشي في الشارع مش مشكلة،، قاعد في كافي ده بقى عزه
تسمع الكلام بالصوت العالي،، وكأنه كلام مش عيب
شتايم،، أباحة،، سب دين،، كله موجود!

فاكرة مرة صيف 2008 كنت في أكاسيا،، أسكندرية
وطبعا المفترض إن المكان راقي جدا! هو والزائرين
وكان فيه واحد شكله محترم،، وشيك جدا جدا!
وكان مسبب ارتباك لطقم الضيافة،،!
والجميل إن كان تهريجه معاهم بسب الدين!
وهم يضحكوا،، لأن التبس اللي بيسيبه كبير!
ومن صوته العالي عرفت إنه رجل أعمال تقيل
وكان متنرفز عشان معرفش إيه كده هبط في المقاصة
المهم بدأ مع نرفزته يسب الدين لكل حاجة
الكراسي،، العصير،، المكان باللي فيــــه!!
قومت وروحت عند تربيزته،، وقولتله:
حضرتك أزعجتني جدا بألفاظك،، غير إن سب الدين
ده إرتداد يا فندم،، لازم تتوب وتستغفر ربنا!
قاللي: أنا أسف جدا بجد أعذريني وسامحيني،،
بس تيييييييت أم البورصة جنتتني!!!
وطبعا سب الدين للبورصة،، وقتها أتغظت جدا منه
وكنت عايزة ألبسه كاس العصير في وشه!

يعني مش زي ما أتربينا إن السافل ده
اللي ملاقش حد يربيه،، وفي الغالب بيكون بيئة
والمثال الحي له،، سواقين المكروباص!
مرة كنت مسافرة القاهرة،، وركبة مع واحد منهم
السواق شغل شريط،، من شرايط مشايخ الميكروباص
معلش على التعبير،، بس ده لا صوت ولا أسلوب شيخ يتسمع
ما علينا،، بدأ الشيخ يحكي قصة وفاة النبي
صلى الله على محمد،، وعلى آل وأصحاب محمد!
وكلنا بدأنا نتغاضى عن صوت الشيخ،، وتدمع عيونا
والسواق في عز إندماجه والدموع نازلة،، عدت عربية جنبه
معرفش إيه الي ضايقه،، وقام مطلع راسه من الشباك
قايل يا أبن تييييييييت الـ تييييييييت!!
ورجع دخل راسه وكمل عياط وشحتفه!!!

كنت بشتري موبايل من كام يوم،، وفي المحل
واحد بيفرج خطيبته على موبايل،، وبيمدح فيه وقال
ده موبايل فاجر ابن تييييييييييت جامد!
لدرجة إن ماما قالت له:
أخص عليك أحترم إن فيه ستات واقفة!
وهو طبعا أستغرب ماما جدا،، هو بيمدح في الموبايل
ما يقصدش يشتم أو يقل أدبه نوهائي!!!!

اللذيذ بقى إن مكتشف متلازمة توريت
كان بيقول إنها متلازمة نـــادرة!!
وواضح إنه ما نزلش مصر،،
أوما سمعش عنـــها!!!

في الأخر بس عايزة ألفت نظر،، الناس
اللي فرحانة بطول لسانها ليلي نهار على الخلق
للحديث الشريف ده،، وهو متفق عليه
(سباب المسلم فسوق وقتاله كفر)،،!
الفسوق يعني: الخروج عن طاعة الله!
:
ربنا يهدي الجميع بقى!

: