09 يونيو 2011

9- حوار الكشري القومي.. برعاية حزب الجبة!!

.............

ده البوست التاسع
في حملة التدوين اليومي،،!
حوار الكشــري القومي،، لحزب
الجبــــة الديمقراطــــي!!

إمبارح البوست ما عجبش ناس كتير
وده وارد،، مش لازم نكون متفقين دومــاً
والاختلاف رحمــة في حد ذاته!
مادمنا بنـــحترم بعض،،
فـــلا مــانع مــن الاختـــلاف!

لكن لما يبقى في غير محترمين يتهموني
بالتلون واللعب مع الكسبان،،!
من عينة masry 7or اللي بعتلي إيميل هباب
وده طبعا على أساس إني كنت بعب حسحس
ومرتشبة عاتشفيا بجيمي كاهر كلوب العذارى!
وكان الحزن الوثني،، بيجري في دمي!
وإذ فجأتن تقمصت دور،، باور رينجيز
وبقيت بسبح بحمد الجمـــاعة!!!

أنا مش من الإخوان،، لكن لا أنكر
مرجعيتي الإسلامية أبــداً،،
،،أنــــا إســـلاميــــة،،
ومع ذلك وشوف بقى حكمة ربنا احترم
المسلم الليبرالي والإشتراكي،، عاتشي جداً
لا بكفرهم ولا بخرجهم من الملة!

لكن لو هايبقى الحوار بالطريقة دي
بشكل غير آدمي وغير محتـــرم بالمرة
والله العظيم أعملكم فيها سوكــة!

وقد أعذر من أنذر،،،!!!

واستكمالا بقى،، لحرقة الدم
للمدعو مصري حر،، أصلي شرانية
وأهوى حرقة دم الغير،، والتلذذ بهذه المسألة
قررت النزول بالبوست ده،، ها بس!
وده بما إني إنسانة لا تعرف الديمقراتية
أيوة والنبي،، هو كاتبها كده!
هاناقشه بقى في حاجة زي دي،،؟!
وأنا إسلامية إرهابية ضد الديمقراتية!!


دي لوحة، بس المرة دي مش للإخوان
نووو،، لحزب الجبة الديمقراطي!
وماليش دعوة،، هم اللي كتبوه كده،،!
ومش هاناقشهم برضو،، هم أدرى بقى!
وكل واحد حر في حزبه،، يخليه بجبته ولا يقشره!
يعمل حوار وطني،، يعمل حوار كشري،،!
شيء لا يهمني بالمــــرة نوهائي!


ومش هاقول أبسط حاجة إنهم يراجعوا
اسم حزبهم،، اللي هو هويتهم الأولى قصادنا!
ولا هاقول إننا شعب ناطق باللغة العربية،، وإن
ده عار لما يبقى فيه غلطة إملائية في اللوحة!
نووو،، ده كله مش موضوعي خالص
شوفت يا مصري،، أني طيبة هع هع هع!

موضوعي بقى أني كمصرية ثورجية
نزلت الشارع واتبهدلت،، وعلى رأي أبو بلوفر
أنــا حــاربت واستشهــدت قبل كده!!
أني أرفـــض رفضــا قــاعطا،، رفضــا باتــا
أن أي حد أي أن كان،، يزايد على دم الشهداء
ويتاجر به عشان داعية حزبية،، ماشي؟!

وزي ما عملتوا سبع رجالة،، وكنت معاكم
ورفضتوا ورفضت معاكم،، المتاجرة بالدين والله
في موضوع الاستفتاء،، من الغير المحنكين سياسيا
من السلف والإسلامين،، ولأني غير متلونة
ولا بتحول،، ولا ماشية على مبـــــدأ
حبـــة فــوق،، وحبــة تحت!


برفوض المتاجرة بالشهداء،، وإن حضور حوار
من تنظيم حزب الجبة الديمقراطي،، بحضور النخبة
يبقى وفاء لدم الشهداء!!،،
يعني لو محضرتش يبقى بخونهم؟!
طيب السلف بقالهم ألف سنة ما ممارسوش سياسة!
وده عذرهم في بعض التصرافات اللي ممكن نعاقبهم
عليها بتهمة الغباء السياسي،، لكن
يا نخبة يا مثقفة ويا سياسية محنكة،،
ويا نشطاء حقوقين،، إيه بقى عذركم؟!
وياترى إيه التهمة المناسبة ليكم بقى؟؟

عيب أوي أوي،، سيبوا الشهداء في حالهم!
لأن مش لما أحضر لحزب الجبة هاكون وافيت لهم
ولا لو حضرت للجماعة هاكون خنتهم!!

هاوفي لهم،، لما أبقى أجيب حقهم!
لكن طول ما حقهم لسـه ضايع،،
يبقى نتــوكس كلنا جمعـاء،،!
ونتلم وبلاش نزايد عليهم!!
بلاش قرف بجد!

وفي النهاية،، جملة أخيرة للأستاذ مصري حر
إن كنت شايف ومتأكد،، إن إسلاميتي
جريمة وطنية المفروض أحاسب عليها
فبيني وبينــك الله يوم الحساب،،
وهو وكيلي،، وبه أكتفي!

هناك 15 تعليقًا:

  1. يا أخت ام مشمش سيبك منهم
    خليهم يحكو شو ما بدهم، طالما انت واثقة فى نفسك وفي افكارك، كل واحد حر بطريقة تفكيره وهما ينتقدو لان دا فكرة المدونة انت تكتبي هما ينتقدو بس بردو انا معاكي فى انو يكون النقد محترم
    وبالنسبة للشهدا فدا شيء شائع عندنا فى غزة مثلا يقومو يقولك وفاء للشهداء والاسرى حضوركم واجب لدعهم
    بيستغلو جزء من دعمنا العاطفي لهم دا غير قضيتهم طبعا فى انهم يستدرجونا للحضور ..

    ردحذف
  2. ممكن أضحك يا فتافيت

    معلش

    ههههههههههه

    أصل أنا مش عارف الكلام انبارح كان عادى جداً

    حتى لو فيه اختلاف ميوصلش للدرجة دى

    و مدام وصلت للكشرى

    انا عاوز واحد لوكس (:

    ردحذف
  3. حلوة حكاية الجبة دي :)
    بس في حاجة غريبة لو بصيتي في تاريخ الاجتماع اللي بيقولو عليه هتلاقيه 27/5 الساعة السادسة مساء
    مش ده المفروض في الوقت ده كانوا في التحرير علشان جمعة الغضب التانية يعني هيسيبوا المظاهرة علشان خاطر الاجتماع؟ وياخدوها جري من التحرير لمنية النصر بصراحة ناس غريبة وبيتعبوا الناس معاهم
    طبعا اي حد سواء ليبراليين او اخوان او اي حزب يستخدم دم الشهداء ويزايد على الباقيين ويعتبر ان دم الشهداء حكر عليه ده يعتبر انهم لا مؤاخذة ناس مش جبة على الاقل الجبة مغذية ومفيدة انما دول ناس مالهمش اي فايدة ناس والله مش عايز اغلط انما ميعتبروش ناس
    الشهداء مش ملك حد الشهداء مكنوش تبع حزب حد
    الشهداء اخويا واخوك واختي واختك وابويا وابوك وابني وابنك
    الشهداء دول دماء طاهرة سالت على ارضك يا مصر علشان تروي جناينك ويطلع وردك احمر يملا الجو حرية
    لكن تقولي جبة وفول وعدس وكشري دي قلة ادب
    وبعدين بالنسبة للراجل اللي بعتتلك وقالك انتي فلول الراجل مكدبش:)
    بهزر طبعا بس كبري دماغك يا فتافيت احنا عارفين مين فتافيت من قبل حتى الثورة وفي عز مجد النظام السابق كانت بتقول ايه
    تحياتي
    وصباحك بدقة وزودي البصل ومتنسيش الكمالة
    صباحك كشري :)

    ردحذف
  4. في ناس يارحاب ، بيحبوا يغلسوا ع الواحد وينكدوا عليه عيشته بتعليقاتهم اللي مالهاش لازمة ..
    بس نعمل ايه بقى ..

    عموما انا عن نفسي عجبني البوست ده والبوست اللي قبله ,, واللي قبل اللي قبله وهكذا ..

    استمري وطنشي ..

    ردحذف
  5. السلام عليكم

    عايزة الحق ولا ابن عمه؟ ابن خالته؟ ماشي..!

    إنتي تصيدتي لهم الأخطاء بزيادة.. يعني الخطأ الإملائي وارد جدا، لأن العقل هو اللي بيقرأ وبيكمل الناقص إملائيا.. بتحصل كتير.. وصدقيني ممكن لو ما نبهتيش على الخطأ في اللوحة كان ناس مش هتاخد بالها..!!
    وموضوع الشهداء عبارة عن حث على الحضور ليس أكثر وليس معناه نفسي الصفة عن الذي لا يحضر...!

    طبعا واضح - بل مؤكد - إنك كنتي بتكتبي بسادية الانتقام...!!

    حاولي تسيبك بقى من مواضيع الأخطاء الإملائية لأنك مش هتخلصي.. فيه كاتبة شابة كويتية هنا عاملة كتاب كامل بالصور عن الأخطاء دي في لوحات الإعلانات وعناوين الصحف...!
    إيه رأيك مثلا في تدوينة مميزة بعنوان (أصعب ابتسامة)؟!!! :)
    ...................

    طبعا مسكت بطني من الضحك على صورة (سوكة)...!!!
    أصلي لولا أني عارف شكلك كانت الصورة دي هي انطباعي الأول عنك!!!! :)

    تحياتي وفي انتظار مرور الثلث الأول من المسابقة..

    ردحذف
  6. المتاجرة بالثورة آسفة جدا مضطرة اسميها قلة ادب وسوء احترام

    لكن لسه ف بلدنا نماذج لوحدها عايزة ثورة وشغل بعد الضهر

    مها ميهوووو

    ردحذف
  7. انا ضد الخلط بين الأرز والمعكرونه والعدس ابو جبه ومعهم القليل من صلصة الطماطم الحارة وشيء من الشطه فهذه الخلطه الكبير لايمكن وصفها بكلمة واحد هي "الكشري " لذلك فأنا أؤيد حزب الجبه الديمقراطي وفي انتظار حزب البصل المقلي الديمقراطي وبعدهما حزب المعكرونة لأن الفصل بين المكونات هو سيد الموقف او هو سيد أبو حفيظه
    هو الموضوع كان عن ايه بالظبط ؟؟ هههههههههههههه
    سوكه دي باين عليها مجرمه

    ردحذف
  8. رندة أبو رمضان

    اهلا بيكِ :).. وبكل حبايب قلبي أهل غزة
    واضح انها طريقة متبعة بقى..
    بس صحيح.. مين ام مشمش.. اللي انا اختها :))؟؟؟

    ردحذف
  9. Ramy

    هههههههههههههههههه
    اضحك اضحك.. انا بضحك من اول امبارح اصلا
    وكشري لوكس وصايا كمان يا رامي
    يا خراشي هو انت جيت في جمل :))

    ردحذف
  10. مصطفى سيف

    صباحي كشري :))).. حلوة
    تعرف اني ما بحبش الباتع ده خالص
    تحس انه طبق بيستهيل لا محصل رز ولا محصل مكرونة :))

    تصدق بالله،، انا لسه واخدة بالي من كلامك
    عن ملحوظة التاريخ؟؟؟ يعني نزلوا الناس التحرير
    وهم راحوا يوفوا لدم الشهداء في منية النصر!!

    يلا بلا وجع قلب بقى
    ولو مصر على صباح الكشري
    يبقى صباحك كشري اسكندراني :))

    ردحذف
  11. وجع البنفسج

    والله عندك حق.. وعلى رأي المثل
    نفض تعش تنتعش :)))

    وربنا يجبر بخاطرك يا جميل
    زي مانتي رافعة من روحي المعدنية كده :))
    نورتيني يا بنفسج

    ردحذف
  12. أزال المؤلف هذا التعليق.

    ردحذف
  13. ماجد القاضي

    هههههههههههههههه
    سوكة مش عجباك..؟؟ دي قمر قمر قمر
    هو انا اجي حاجة في جمالها ولا رقتها :)))

    أنا عارفة والله يا أخي ماجد اني تصيد لهم اخطاء.. واصلا ماكنتش هانزل بالوبست ده خالص... بس هو نزل ردا على الاخ اللي بعت الايميل.. ومخصوص عشان هو استشهد بالحزب ده تحديدا في الكلام عن النظام والديمقراطية،،،،،
    فحبيت اضربه تحت الحزم.. افترى إسلامين بقى :))

    أصعب ابتسامة جاي جاي.. أكيــــد :)

    نورتني .. خالص تحياتي

    ردحذف
  14. أحسن تـستاهـل

    يعني الواحد ينزل التحرير الصبح
    ويرجع يعمل ثورة بعد الضهر للناس دي
    على كده في اوفر تايم.. ولا ايه :)))

    ربنا يستر بقى على اللي جاي
    نورتيني يا مها ميهو :)

    ردحذف
  15. تامر علي

    ههههههههههههه ههههههههههههههههه
    موضوع ايه بقى.. ده انت جبت الزبد با فندم :)))

    سوكة .. يا سلاااام عليها
    دي بنطبق عليها قول الشاعر المجهول
    لا كبير يلم.. ولا حكومة تهم :))

    بس ايه النشاط ده
    هو العداد عندك وقف عند 5؟؟
    ماكنش العشم :))

    ردحذف

خلل براحتك من غير انتظار .. فتافيت أصلاً بتحب الخيار