06 يونيو 2011

6- 6 يونيو 2010!!

.........

ده البوست السادس
في حملة التدوين اليومي،،!
الذكرى الأولى لشهيد مصر
خـــالد سعيــــد،،،!

النهاردة يوم 6 يونيو يوافق الذكرى الأولى
لشهيد قانون الطوارئ ،، خالد سعيد
اللي اسمه بقى خالد في تاريخ مصر المعاصر
واللي خلى الشعب كله سعيد بالثورة المجيـــدة


خالد نحسبه شهيد إن شاء الله
تم قتله في 6-6 لكن إحنا ماعرفناش القضية
إلا يوم 10-6،، أنتشرت صور خالد
وحكاية خالد،، أو بالأحرى مأساة خالد سعيد
اللي كلنا حافظنها عن ظهر قلب

وفي اليوم ده،، تم تدشين صفحة الكرامة
كلنـــا خـــالد سعيــــد!!
ويومها احتفظت بأول حاجة نزلت عليها
معرفش كان جوايا إحساس بيقول
إن خالد مش هايبقى مجرد حدث عابر
أول أستاتيس للصفحة كانت:
خالد سعيد،، الدم نازف م الوريد،،
والظلم قابض بالحديد،، بس الصراحة فيه جديد،،
فيه جيل عنيد،، عزمه شديد،، مفيهوش عبيد،،
فيه الف إيد،، حالفة تجيب حق الشهيد،،!

وفي نفس اليوم أنا نزلت هنا بوست
عــروض،، لا تقبل المنافسة

عـــايز،، نيــــو لــــوك
يجنن العقول،، ويبكي العيون
يحرق القلوب،، ويذل النفوس
عندنا،، بس أنت تيجي
عايز كسر فــ الجمجمة،، وقطع فــ الفك
عايز دم في كل مكان،، عايز تموت متهان
عندنا،، بس أنت تيجي
عايز تحس أنك حيوان
مالكش حقــوق،، ولا لك لسان
عايز تحس أنك مالكش ضهر
ولا لك قيمة ولا حتى سعر
عندنا،، بس أنت تيجي
عايز تدوق الذل،، عايز تشيل الهم
عايز تموت مسحول،، ومحدش بيك يهتم
عندنا،، بس أنت تيجي

خالد مامتش مرة،، لا 4 مرات
مرة لما سحلوه وموتوه ورموه قصاد السيبر!
ومرة لما التقرير قال إنه مات باسفكسيا الخنق!
ومرة لما الإعلام والصحافة شوهوا سمعته تماما!
ومرة لما حقه لحد دلوقتي لسه ما رجعش!

يوم 13 يونيو كان عندي إكتئاب بسببه
ونزلت صورته على الفيس،، وتحتـــــها
يا جمــاعة ركزوا في ملامح خالد،،
شكله فعلا عليه 4 قضايا،، منهم تحرش
وبالباقي سلاح أبيض،، حـــرام يا كفرة كده
حسبي الله ونعم الوكيل،، ده يتقتل ليه؟؟
شاب زي الفل،، يتقتل ليه؟؟!!!
أنا أسفة يا خالد،، أهلي علموني أمشي جنب الحيط
عشان كده مش عـــارفة أعملك حاجـــة،،
ســـامحني،، أنا سلبيــــــة

يوم 23 يونيو بدأت أتغير بسبب خالد
قررت ما كونش سلبية،، زي باقي شباب مصر
ونزلت بوست على الفيس بقول فيه،،
يوم الجمعة،، 25-6-2010
من الساعة ستة ونص لــ سبعة ونص المغرب
هتكون الوقفة الصامتة التانية،، بس المرة ديه
هتكون في الجمهورية كلها،، مش بس في القاهرة والأسكندرية
كل محافظات مصر،، هاتوقف صامتة لابسة أسود،،
هي مش مظاهرة،، ولا اعتصام ،، ولا حتى وقفة إحتجاجية
هي وقفة صامتة،، حزينة،، تعبير منا عن حزننا وغضبنا
مافيش حد يشيل لوحة،، ولا يهتف،، ولا حتى نقعد في تجمعات
كل واحد واقف،، وشه لبحر لنيل لأي كورنيش
صامت،، ما بيتكلمش مع حد،،
بيقرا في المصحف،، أو في الأنجيل،، بيقول
أنا حزين،، أنا غضبان،، عشان كده ساكت!!
أنا نازلة،، مين قال جاي؟!

خالد علمنا يعني إيه غضب،، من قبل يوم الغضب
علمنا يعني إيه نعبر عن حزننا،، نقول إننا موجودين
علمنا الكرامة،، وإننا نطالب بحقوقنا من أي حد

فيه ناس بتسيب الدنيا بدري،، لكن اسمها بيتخلد
خالد كان له نصيب كبير من اسمه!


بس اللي عمري ما كنت أتوقعه بجد
أن بعد ما مرت سنة على إستشهاد خالد
يبقى لسه القتلة ما تحسبوش!!
والأغرب بقى،، إن في ذكراه الأولى
ننعي ضحية جديدة للتعذيب في اقسام مصر
ضحية قسم الأزبكية!!،، إنا لله وإنا إليه راجعون!

هانزل النهاردة إن شاء الله
أحي ذكرى خالد الأولى،، زي السنة اللي فاتت
هانزل أطالب بحقه،، وحق كل شهدائنا
هانزل أطالب بداخلية محترمة،،!

ربنا يرحم خالد،، وكل موتانا
وتعالوا ندعي لمفجرين غضب الشعوب
شهيد تونس بوالعزيزي،، !
شهيد سوريا حمزة الخطيب،،!
شهيد فلسطين محمد الدرة،،!
ربنا يتقبلهم شهداء،،
آميـــــــــن

هناك 14 تعليقًا:

  1. رحمه الله وأسكنه فسيح جناته

    ردحذف
  2. بالرغم اني مش بعتبر بو العزيزي شهيد
    فلا يجوز شرعا اعتبار المنتحر شهيد
    فالمنتحر كافر
    حتى وان كان انتحاره سببا مباشرا في حريتنا فهو منتحر
    لكن واجب علينا ندعو اليهم رحمهم الله جميعا
    واسكنهم فسيح جناته وغفر لهم
    كتبت يوم بوست تخيلت فيه عرافة تخاطب حكام العرب وحين خاطبت مبارك
    قالت العرافة لمبارك علامة نهاية حكمك هو موت احد افراد شعبك اسمه خالد سعيد فلا تدعه يقتل
    مبارك : لا أعي ما تقولي كيف سيقتل
    العرافة : سيقتله قانون الطوارىء فالغيه
    مبارك : مقعدي يرتكز على خوف شعبي واذا كسر حاجز الخوف لاطاحوا بي
    كتبتها بعد التنحي
    هكذا هم الحكام العرب يظنون ان دماء شعوبهم رخصية الثمن وان عروشهم ترتكز وتدشن على تلك الدماء
    تحياتي

    ردحذف
  3. ربنا يرحمه ويرجعله حقه

    ردحذف
  4. ربنا يرحمه يارب ... وان شاء الله حقه مش هيضيع أبداااااااً وكل اللى شارك فى قتله وتعذيبه بالصوره البشعه دى .. هياخد جزاءه وهيكون يوم محاكمته عيد لينا ولخالد

    ردحذف
  5. السلام عليكم

    رائع.. والله التجميعة جميلة جدا.. وقيمة جدا..

    بجد مش هقدر أزود.. لأني دمعت واتخنقت.. خاصة مع صوت حسام حبيب....!!

    ردحذف
  6. تقبل الله الشهداء في الصالحين وجعلهم دائماً محررين لعبيد الظلم والظلمات آمين

    ردحذف
  7. لورنس العرب

    يااااااااه،،،،!
    من زمان ما شرفتنيش بالزيارة

    ربنا يرحمه هو كل موتانا
    نورتني بجد :)

    ردحذف
  8. مصطفى سيف

    بس البوعزيزي مش منتحر يا مصطفى
    هو عاقله صور له يعمل انه هايحرق نفسه
    عشان يلفت نظر المارة ويكسب ضجة اعلامية تحقق هدفه ان الحكومة ترجع له تاني عربية اللي بيرزق منها!!

    لكن كان نصيبه بدل ما يبقى تهديد يبقى مصير
    ويفضل فترة يتألم من الحروق لحد ما يقابل وجه كريم
    ربنا يغفرله ويرحمه ان شاء الله

    حلوة اوي قصة العرافة دي
    طول عمرك مبدع يا دكتـــــــــرة :)

    ردحذف
  9. Bent Men ElZaman Da !!

    اللهم امين
    هو وكل موتانا يارب.. في كل بقاع الارض

    ردحذف
  10. دعاء العطار

    يااااااريت يتحاكوا بقى
    احمد عثمان الضابط
    والمخبرين الاتنين....... يارب

    يومها خالد هايكون بجد سعيد

    ردحذف
  11. ماجد القاضي

    وعليكم السلام

    سلامتك أخي ماجد من الخنقة والدموع
    عندي أمل كبير في ربنا.. يجي يوم.. قريب
    يتحاكم فيه كل اللي قتلوا في شبابنا وعذبوهم
    ويكون عبرة وردع لكل واحد ممكن يعمل كده

    ردحذف
  12. تامر علي

    آمين يا رب العالمين
    ربنا يسمع منك يا فندم يا رب

    ردحذف
  13. الله يرحمه يارب .. مات ولكنه احي شعب بأكمله .

    ردحذف

خلل براحتك من غير انتظار .. فتافيت أصلاً بتحب الخيار