20 يونيو 2011

20- الحشيـش،، خدعـوك فقــالوا،،!

:
:


ده البوست الــــ 20
في حملة التدوين اليومي،،!
الحشيـش،، خدعـوك فقــالوا،،!

عادي جداً دلوقتي،، وشيء لا يدعوني للاستغراب
إن أعرف إن فلان،، بيحشش،، أو حتى فلانة!
ولما بعترض وأقول إنه غلط،، مضر،، حرام
بتكون فيه ردود معلبة جاهزة منها،،،
الحشيش ده كيف الملوك،،
ده الرئيس الراحل السادات كان بيدخنه!
الحشيش مش مضر،،
وضرره من ضرر سيجارته اللي بيتشرب فيها!!
الحشيش ده كيف اجتماعي،،
بيساعد الناس على التكيف والتأقلم!!
ودي ردود على سبيل المثال،، لا الحصر!
الحشيش مش حرام،،،
ده مجرد نبات،، وزيه مثلا زي الروز ماري!

طيب أخي الحشاش أختي الحشاشة،،
أسمحولي أنغص عليكم عيشتكم،، وأقولكم إنكم ساذجين
الحشيش ده مصيبة سودة،، وحلت علينا
معلش،، ياريت بس تفوقوا وشوية،، وتركزوا!!!


فيه نبات اسمه القنب،،
بيتم استخراج منه 3 أنوع مخدرات
يعني اللي يلاقيه هو قصاد مغارة علي بابا والاربعين مدمن
بيستخرج منه،، البانجو والماريجوانا والحشيش
البانجو،، هو نوع من أنواع النبات!
الماريجوانا،، هو الرؤوس والأوراق الجافة!
الحشيش،، هو خلاصة الراتنج (الصمغ) المفرز منه!

نيجي للحشيش،، يا سعاد!
الحشيش بيذوب في دهنيـــات الجسم،، ولا
يذوب في الماء نهائيا،، يعني بيفضل لمدة طويلة ممكن أسبوع
في أنسجة الجسم،، اللي فيها نسبة عالية من الدهنيــات
زي،، الكبد ،، الرئتين،، المخ،، والأجهزة التناسليـة!
يعني نفس واحد بس،، ممكن يفضل نصه في الجسم
لمدة أسبوع،، في الأجهزة الحيوية!!!

الحشيش بيخدع ليه؟؟!
لأنه مش زي باقي المخدرات له أعراض إنسحاب
يعني ممكن لو توقف المدمن الشرب،، ما يهرش
ويتنطط زي ما بنشوف في الأفلام!

لكن،، خلينا نعرف تأثير الحشيش إيه؟
فيه أسطورة ساذجة،، بتقول إن الحشيش مفيد
جدا للراجل في العلاقة الجنسية،، والحقيقة ،،،،
تعاطي الحشيش بسبب تناقص في هرمون الذكورة عند الراجل
اللي هو هرمون التيستوستيرون،، وبيعمل على نقص إنتاج
الحيوانات المنوية الطبيعية الصالحة،، ويزيد من إنتاج
الحيوانات المنوية الغير طبيعية وصالحة!

من بلاوي الحشيش كمان،،،
إنه بيعمل على إضعاف جهاز مناعة المتعاطي!
يعني بيفقد الجسم المناعة على المدى الطويل،، يعني
اللي بيتعاطى حشيش،، هو بأيده بيأثر على جسمه
نفس تأثير الايدز،، لأن الأيدز مشكلته إنه بينقص مناعة الجسم
والحشيش بيفقد الجسم المناعة،، أفـلا لا تعقلون!!!

الحشيش كمان بيأثر على القلب،،
بيزود من سرعة الضربات؟،، وضعف انقباض العضلة
وده بيأدي لحدوث الذبحات الصدرية!!
ده غير عطب القلب،، وفشل القلب الاحتقاني!

الحشيش وبلاويه على النساء،،،
أولا تدخين الحشيش للأنثى،، بيعمل لها اضطراب
في الهرمونات الأنثوية،، وده بيؤدي لعدم إنتظام الدورة الشهرية!
كمان لو حصل تعاطي للحشيش،، أثناء فترة الحمل،،
بيؤدي زيادة احتمالات فقد الجنين،، لدرجة إن نسبة موت الأجنة
في الأنثى اللي بتشرب حشيش،، تعادل أربع مرات مقابل غير متعاطية!
غير إن لو فضل الجنين،، بتتحطم الكروموسومات عنده،، وده بيؤدي
إلى زيادة معدل التشوهات الخلقية بالجنين!!،، ده غير
إن الطفل للأم المتعاطية،، بيكون أقل حجماً وأكثر انفعالاً!

طيب،، بيقولوا الحشيش بيساعد ع التركيز!!
تمام،، تعالوا نعرف تأثير الحشيش إيه،، على المخ والذاكرة،،

- تأثير الحشيش أو الشعور بالنشوة بعد تعاطيه،، بيؤدي إلى
اضطراب في الحالة العقلية،، زي فترات من القلق والإرتباك أو الذهان!

- يضعف ويشوش على الذاكرة،، وبيعمل كمان تبطئ في الاستيعاب
غير إيه بيثير الأرتبارك والانفعال المؤقت!

- التعاطي المزمن،، بيسبب اضطرابات سلوكية وعقلية!

- بيعمل وعلى المدى القصير على تأثيرات مزعجة وغالبا ما تكون
مؤذية على العمل اللإرادي،، والفاعلية الجسدية والبصرية!

- بيضعف تعاطي الحشيش من القدرة،،،
على التناسق الحركي والإدراك الحسي
اللازم لتتبع الأجسام المتحركة،، أو أكتشاف الضوء السريع،،
وطبعا ده بيسبب كوارث على الطريق في القيادة!!
والمصيبة إن عدم الإدراك ده،، بيستمر 8 ساعات،، من بعد
النشوة الفعلية للحشيش،، !!!!!!!!

ده طبعا غير تأثير الحشيش المؤذي على الرئة
بسبب كمية القطران العالية اللي فيه،، وده بيسبب السرطان
غير إن لمس الحشيش نفسه باستمرار،، ممكن يؤدي لسرطان الجلد
ده غير وجود حويصلات فطر التربة،، مترسب في الرئة
لأنها لا تقتل بالحرق،، وبالتالي بتفضل في الرئة،، وبتسبب
أمراض رئوية شديدة،، وصعبة أو مالهاش علاج!

يا ترى بعد ده كله،، لسه كيف الملوك!!
أتقوا الله في صحتكم!،، ده الحشيش أو ما دخل مصر
كان داخل عشان البهايم،، أعزكم الله!!!

:


هناك 18 تعليقًا:

  1. ماشى ماشى

    بس غيرتى شكل المدونة ليه

    عارفة انا اتفاجأت مفاجأتين فى حياتى

    الأولى لما دخلت الكلية كل الناس كانت بتدخن كأنه بياخدو علبة السجاير على الكارنية

    التانية لما وصلت شرم الحشيش بيتباع عينى عينك كده
    و برضه الكل بيحشش قليلين اللى تلاقيهم مبيحششوش

    شيىء غريب الصراحة

    ردحذف
  2. بوست جامد جداً
    وخصوصاً آخر كلمتين:)

    ردحذف
  3. وكان داخل علشان البهايم ليه بقى؟
    هي البهايم بتعمل دماغ؟
    هههههههه
    معلومات قيمة وطبعا كلنا بنتفق معاكي في خطورة الحشيش على الصحة العامة والحياة الاجتماعية والاقتصادية
    تحياتي

    ردحذف
  4. السلام عليكم ورحمة الله وبركاته
    أحييك على هذا الطرح القيم وواضح مدى الجهد المبذول فيه جعله الله فى موازين حسناتك ونفع به....
    الحمد لله الذى شفانا وعافانا عما ابتلى به البعض من عباده

    ردحذف
  5. ياريت بس بعد الكلام ده اللى بيشربوه يفهموا بقى
    ربنا يعافينا

    ردحذف
  6. مساء الخير على الجدعانين
    هههههه
    مش اقصد الحشاشين لالا
    بس اتمنى فعلا كل شخص بيحشش يتعلم قوى ضرر الحشيش
    ربنا يتوب عليهم من البرسيم أأأأأأأأأقصد الحشيش

    ردحذف
  7. اكتر من رائعة
    ابدعتي يا فتافيت والله
    حاشيرها ع الفيس
    :)

    ردحذف
  8. حشيش حاجه تيجي كدا

    كنت بشوف صحابى بيشربوه على الريق الصبح قبل ما يغسلو وشهم
    مش عارف ايه الفرررره اللى ماشيه فى الشباب دى
    كميه اعتقادات خاطئه كأننا رجعنا لأيام الجهل اللى الناس فيها كانو بيفهمو عن دلوقتى

    كلام جميل جدا ومعلومات بجد مفيدة

    ردحذف
  9. كدا الواحد يبدأ يقتنع بكلام أصحابه ويشرب حشيش وهو مطمن دا طلع بسيط خالص ههههههههه بوست حلو جدا وواقعى اوى على فكره وبدايه لتصحيح أخطاء كتيير ومعتقدات فى حياتنا

    ردحذف
  10. Ramy

    هههههههههههههه
    ما غريب الا الشيطان
    ده حشيش يا رامي يعني عادي يعني :))

    دي حاجة تجن يا جدع!!!

    نورتني ^_*

    ردحذف
  11. موناليزا

    الاجمد من البوست
    انه عجبك يا جميل :)

    ردحذف
  12. مصطفى سيف

    هههههههههههههههه
    ايوة والله اللي دخله كان محمد علي
    عشان يزود من خصوبة الخيل :))

    يارب بس حد يحس انه خطر
    بدل ماهو خلاص هاينزل على الدعم
    قرش حشيش لكل اسرة مرية،، لزوم الدماغ :))

    ردحذف
  13. محمد الجرايحى

    عليكم السلام ورحمة الله وبركاته
    أهلا بحضرتك،، نورت البوست

    ومتشكرة جدا على ثناء حضرتك
    ويارب بس ينفع حد،، ويخيليه يقلع عنه

    نورتني ،، وشرفتني :)

    ردحذف
  14. Bent Men ElZaman Da !!

    آمين يارب العالمين
    نفسي بس يحسوا باللي بيعملوه في نفسهم
    ربنا يعافينا ويعافيهم يارب

    ردحذف
  15. mrmr

    مساء الخيييييييييييير :)))
    اهلا يا قمري نورتيني ،،
    بجد نفسي قبل ما يدفنوا شبابهم،، يعرفوا
    انه كارثة ومصيبه على صحتهم ودينهم
    ربنا يرحمهم بقى ويعفوا عنهم
    نورت يا جميـــل :)

    ردحذف
  16. Prof9090

    يا أهلا يا أهلا
    شير يا عثمان ع طول،،
    ده البلوج بلوجك :)
    نورتني ^_*

    ردحذف
  17. تاكاشى

    على الريـــــق،، !!!
    إيه الناس دي؟؟،، ما بيعملهمش اضطراب في النبض؟
    سبحان الله ناس بتهلك صحتها بإيديها!!

    ربنا يسترها علينا يا رب
    وحافظ على نفسك منهم،،
    لأنها عدوة على فكرة :))،، ربنا يحفظك

    ردحذف
  18. MaNoO

    فعلا هو بيبدأ بتجربة
    فيه مثل خليجي بيتقال عليه
    اولها دلع واخرتها ولع!

    ربنا يسترها علينا
    ويعافينا ويعافيهم يا رب

    البوست نور يا كانو :)

    ردحذف

خلل براحتك من غير انتظار .. فتافيت أصلاً بتحب الخيار