30 أغسطس 2010

صدقة جارية.. !

رمضان عدى بسرعة أوي.. خلاص دخلنا العشرة الأواخر
اللهم بلغنا ليلة القدر.. ويتقبل منا كلنا دعاءنا



أنا عملت مدونة جديدة
سمتها صدقة جارية

الفكرة جات ليا من برنامج رحلة قلب
لما مقدم البرنامج قال الحديثين الشريفين
(بلغـّوا عني ولو آيه)

(إذا مات ابن آدم انقطع عمله إلا من ثلاث:
صدقةٍ جاريةٍ، أو علم ينتفع به أو ولدٍ صالح يدعو له)

حسيت إني لو مت دلوقتي.. هاينقطع عملي من الأرض
المدونة الجديدة.. إن شاء الله هيكون فيها
كل الأذكار.. والسنن النبوبية
لكل حاجة بنعملها في حياتنا

أنا نزلت أول بوست فيها النهاردة
وإن شاء الله.. هايتبع إلى ما شاء الله

أنا مش فقيهة ولا عالمة دين
لو أي حد لاقى أي خطأ فيها يقوللي على طول
أنا عارفة إن محتواها هايكون معروف للجميع
بس أهي تذكرة.. وربنا يتقبل منا




23 أغسطس 2010

كهربا بالذبادي.. والبرواز فاضي



الكهربا بجد بقت حاجة مستفزة جداً
بتقطع بطريقة تحرق الدم.. النور يقطع من هنا
وألاقي قطتي ماشية في الشقة مطلعة لسانها
طيب هي يا بختها بترطب على نفسها.. أمشي أنا مطلعة لساني؟؟
أمال إيه بس عدادت إلكترونية.. وتقدم وكروت شحن
وكهربني شكرا.. تقوم تبقى الضلمة دلوقتي وقتها؟؟
وكل شوية يقولك تخفيض أحمال.. يا سلام
لما إحنا ماعندناش.. بنصدر ليه؟؟
ولا هو أقرع وبيصدر؟؟
عاااااااااااا
أموت وأعرف مسؤول مين في البلد
اللي دخل صفقة استراد شمع؟؟
مهو دية الحاجة الوحيدة.. اللي مصر تضلم عشانها؟؟

ولأني وطنية.. وبحب جيل المستقبل أوه أوه
قررت أنزل بتقلي.. وأقترح شعار جديد



يعني عشان ربنا يوفقهم.. في الانتخابات الجاية
وتبقى باكتساح.. زي كل مرة


۩˙·٠• رمضان كريم •٠·˙۩


طيب يلا مش مهم مافيش كهربا.. لكن الخشخاش؟؟
يعني مش كفاية ما فيش حشيش.. عشان الخشخاش يتسرق؟؟
بيقولك.. أن الكاميرات المراقبة عددها 43.. شغال منها 7!!
وزعلانين وبيقولوا إهمال؟؟؟!
يعني المتحف بيعمل تخفيف أحمال ومش عاجب؟؟
قال بدل ما يشغل 43.. يسمع الكلام ويخفف أستخدام!
وبعدين.. اللوحة مخرجتش بره البلد أصلا



ديه أتلفت وأتشربت في مصر .. المحروسة
أصل محدش يقنعني.. أن حد عارف قيمتها يعمل فيها كده
أخد الصورة وقطعها بالموس وساب البرواز فاضي!
يعني حمااار.. يبقى هو سمع خشخاش
قالك بس.. فرجت وهايحل أزمة الحشيش عنده
ده لو كان أتفرج على الفيلم الوثائقي.. حرمية في تايلاند
كان عرف قمتها.. بس تلاقيه أتلخبط
وأستخدم الطريقة الجهنمية.. في سرقة لوحة أثرية
من الفيلم التعليمي هي فوضى ..!
بالذمة نقول للعالم إيه؟؟؟
لوحة سرقوها في 1978 وفشلوا.. بس الحمد لله
ربنا وفقهم في 2010 وسرقوها؟؟؟

۩˙·٠• رمضان كريم •٠·˙۩


بس مش مهم مافيش كهربا.. ومش مهم لوحة فان جوخ
اللي هي ثروة تاريخية.. وتمنها فوق الــ 50 مليون زورار
لكن اللي بيحصل بقى ده.. اللي مش ممكن أستحمله
أنا مقهورة جداً.. عشان كده عيب بجد
لما نبقى في رمضان.. وده يحصل عيني عينك
هو الناس مابقاش عندها ضمير.. خلاص
يعني نصوم أزاي بالذمة يعني؟؟
ده أنا طول عمري بيقول:
حكومتنا خدت مني كل حاجة.. وادتني الذبادي
يقوم حتى الذبادي ... مافيش عاااااا



معقولة حد يصوم.. من غير ذبادي :((
مافيش ذبادي عندنا في الزقازيق
بقى بالحجز والله :(
لا يا مصر .. كله إلا كده
كله إلا الذبادي يا مصر..!
أنا بقولك أهو أزمة.. الكهربا والماية والعيش
والللحمة و والحشيش في كفة
والذبادي في كفة.. ها

۩˙·٠• رمضان كريم •٠·˙۩


وفي النهاية.. ولأننا في شهر الخير
واللي متعودين فيه على إبتزاز المشاعر
بكل السبل الممكنة.. عشان الناس تتعاطف وتتبرع
وكأن التبرع في رمضان بس!!!
جت فانتالوب.. ونزلت بنفس الاسلوب


وأنقفذ مصلحي.. وأشتري فانتالوب
بليل ألاقي أخويا الصغير.. داخل شاري 3 إزازات
ويقولي حرام لمصلحي يلبسهم ويترفد
احنا في رمضان.. !!

۩˙·٠• رمضان كريم •٠·˙۩




19 أغسطس 2010

اعترافات لرجل؛ سأرحل عنه!





- من ربيع مؤجل تأتي نسماتك لصيفي الجاف؛ مخترقـًا مجال وحدتي، متجاهـلاً أكوام الفراغ الشاسعة من حولي... وبمرور لحظات تتحد مع ذرات الفراغ ليصبح كله أنـت!!.. وكم من قبلك حاولوا، ومن بعدك أيضـًا، ولكنهم فشلوا جميعـًا ووحدك من نجحت!
كانت بداية استثنائية غير معتادة بالنسبة ليّ، فقلعتي لم تُهزم من قبل هكذا هزيمة.. ويالها من هزيمة رُسمت من بعدها حدودي من جديد!.. وبرغم نضوجي أصبحت طفلة بين ذراعيك، ولكنني طفلة استثنائية كبدايتنا؛ فتعلمت منك الكثير.. ولهذا تألمت أكثر وأكثر!!، تخيلت للحظة بطفولة متناهية؛ إني أستطيع التصدي لجنونك الجامح.. فتخضبت حدواته بدماء قلبي!.

- عزيزي... هل يروق لك هذا اللقب؟؟!؛ دعني أناديك عزيزي.. بدلاً من ذاك اللقب الذي اخترته أنت!.... عزيزي:
أتفهم جيداً حجم وجودي بعالمك؛ فأنا مازلت بذكائي الذي عهدته فيّ!، وأعلم أيضـًا أنك تلك الفراشة التي تهوى العبث بذرات فراغي؛ وعندما تُنهك قواها تستقر مستسلمة على أطراف أناملي؛ لتنعم بدفء مداعبتي.. فلا تقلق فلن أحاول إمتلاكها؛ فأنا على يقين بأني إن أطبقت عليها راحة يدي بحنان؛ ستموت محتطمة بين طياتها!!.. وآآه يا عزيزي كم هو قصير عمر الفراشات مهما طال!.




- ما أجمل أن تفاجئنا الدنيا بأشياءٍ غير متوقعة!!، ولكن أتعلم إنه ليس بالضرورة أن يكون كل شيء خارج حيز التوقع سار؟!.. هكذا أنـت يا معجزتي المستحيلة، وفاكهتي المحرمة!!.. أندهشت كثيراً عندما نهض قلبي خافقاً لتدب الحياة بداخله، يالله كم كنت بأوج الحاجة لهكذا حدث!.. خفقان غير متوقع تفاجئني به الدنيا؛ لأتراقص على أنغامه.. رقصة أوز لتوه ذبح!.

- أشعر بثمة توتر تتخللك؛ لا داع لأي توتر أو قلق يا عزيزي!؛ نعم قد تروطت فيك حد الثمالة، ولكني لن أورطك أبداً... دعني فقط أعترف لك بكل ما بداخلي للمرة الأولى والأخيرة بتاريخي معك.....
أتعرف نرسيس؟؟!.. هذا الشاب مثال الأنانية بالأساطير القديمة؛ الذي وقع بعشق صورته المنعكسة على سطح الماء!، الآن فقط أشفقت عليه؛ كيف لنا ألا نعشق إنعكاس داخلنا أمامنا؟؟!، فأنا عشقت إنعكاسي بك!؛ في لحظة استثنائية وجدت نفسي -فيك- أمامي تحدثني!!؛ كل أفكارك.. أفعالك.. مشاعرك.. مبادئك.. رومانسيتك.. جمودك.. قوتك وضعفك.. حتى أحلامك الثائرة..... هي أنـا!؛ لم أصارحك بهذا من قبل، رغم إقرارك بأني أشبهك، ولكنك لا تشبهني فأنت إنعكاس مرآتي!.
لأول مرة أجده يحدثني بصوت غير صوتي، بحركة غير حركتي، بملامح غير ملامحي!!؛ ولكن نهايتي لن تكون كنهاية نرسيس؛ فعندما أراد احتضان معشوقه مات غرقـًا!، لن أشتهي حضنك رغم حاجتي له!.. لن ألمسك رغم اشتياقي لألمس نفسي بك!.... لن أموت غرقـًا بحبي لـك!!.


- أعتقد الآن من حقي تغير لقبك من عزيزي لحبيبي!!..
هنا سأوقف عقارب الساعة؛ لن يمر الزمن على لحظتنا هذه ولن يسمع أحد بهذا الأعتراف...!.

حبيبي.. نعم أقصدها بكل معانيها، وأضغط على سن قلمي لتبدو واضحة كوضوحها بقلبي، لقد أخترقت داخلي حد التوحد، أحبك بكل جنون وحكمة.. أحبك بكل إستسلام وشغب.. أحبك بكل ما بداخلي من خير وشر، من عفة وخطيئة.. وبرغم كل ما أخفيه من عشق لك.. سأرحل عنك..!.

- حبيبي.. مادام القلب ينبض، والشمس تشرق، والقمر ينثر ضياءه بالسماء؛ لن أكون أنــا بطلة للقصص القصيرة العابرة، ولن أكون اسم بين أسماء كثيرة مترامية، ولن أكون مجرد حكاية بين حكاياتك المثيرة المتتالية..!.
حبيبي.. سأرحل عنك بكل حب ادخرته منذ أعوام طويلة، سأرحل عنك قبل أن ترحل أنت!!.. نعم سينزف قلبي ألمـًا، ولكن نزيف الألم أقل قسوة من إنتظار رحيلك.. فهو آت لا محال!!.. قد أكون أخطأت بالبداية، وقد يكون خطأي بالنهاية.. لا أدري!!.. ولكني مخطئة؛وسأجني كامل الثمار وحدي، ولن أحملك أي ذنب.. فالذنب ذنبي أنـا وحماقاتي..!



- الآن عادت العقارب لتعد من جديد الثواني والدقائق، ومع مرور الساعات سيُمحى هذا اللقب، وسيُمزق هذا الأعتراف، وستنسى فراشتك أناملي بأخرى، فأصعد أنا لقلعتي؛ أرتق مجال وحدتي، وأوؤد قلبي تحت أكوام الفراغ الشاسعة من حولي!!.


♪♫•*¨*•.¸¸والأخوة اللي بينا.. بلاش إسقاط¸¸.•*¨*•♫♪

12 أغسطس 2010

جامد أخر 29 حاجة..!! :))



طبعــًا دية من أعمال د/ أشرف حمدي

ومن وجهة نظري.. من أجرأ وأجمد
ما رسم على الأطلاق




مافيش عندي تعليق.. غير
بجد فكرة مجـــرمة

۩˙·٠• رمضان كريم •٠·˙۩



:))




10 أغسطس 2010

رمضان جانا .. أهلاً رمضان



كل سنة وكلنا طيبين.. يارب
رمضان كريم.. على كل الدنيا


صحيح اليميش غالي نار.. غالي بجد يا غااالي :@
يعني ارخص كيلو بلح ما يتاكلش بـ 12.. بس مش مهم
بلاش تاكلوا بلح.. كلوا بندق وفسدق ولوز :))
صحيح الفراخ بقت غالية .. الكيلو هنا بقى ب17 جنيه
سمعت انه في القاهرة ب25 جنيه
يلا بلاها فراخ كلوا لحمة :))

والسكر والزيت والرز.. قربوا يبقوا رفهيات


بس برضو.. مش مهم
اهو رمضان كريم.. وربنا أكرم

صحيح النور بقى بيتقطع كل يوم.. يعني عطش وحر
بس برضو يلا أهو يرحمنا من مسلسلات
رمضان الحصرية.. وسبحان الله
المسلسل اعلاناته على القنوات كلها
وحصري على كل قناة :))

۩˙·٠• رمضان كريم •٠·˙۩



مش عايزة ألك وأنا جاية أهني بس
ده كفاية الحكومة ربنا يعمر بيتها.. قولوا آمين
هتعلق التوقيت الصيفي.. عشان رمضان
ويا صباح الظروطة :))
هو بس سؤال بريء .. ساذج


الناس اللي عاصرت رمضان زمان لم جه في نفس التوقيت
ياترى الحكومة برضو عملت كده؟؟ ولا ده اوبشن لنا؟؟
والله ما عرفة هو فعلا الاوبشن ده لنا احنا
ولا للي عمرهم الافتراضي انتهى من زمان
ومش قادرين يصوموا خلاص.. وماسكين فيه

ما علينا بقى.. أهو جه يا ولاد.. هيصوا يا ولاد
كل سنة وانتم طيبين.. وينعاد عليكم
بالخير والبركة والهنا
يارب تقبل صيامنا.. وقيامنا
واغفر لنا.. وأرحمنا
آمـــيـــن يارب

۩˙·٠• رمضان كريم •٠·˙۩






06 أغسطس 2010

الصيــــن هي الحــل!!!


أكيد كلنا متابعين يوميات المذيع اللامع قاتل بنت العلاف
مش هاتكلم في الموضوع لأن قتل بحثـًا زي ما بيقولوا
بس هاقول كلمة حق.. الراجل ده سيس


سيس عشان لو اللـّ حكاه صح
يبقى عيل وبريالة والست لعبته على واحدة ونص
وسيس لو كذب في اللـّ حكاه
عشان هايبقى بدل ما يكحلها عماها.. وديه مراته برضو
وسيــس في الحالتين

لأنه بيتكلم عن واحدة في ذمة الله.. وكانت على ذمته
ونازل تريقة على وزنها مرة
ونسي انه ياما نام في حضنها بوزنها ده
ولا كان مثلا متجوزها مع إيقاف التنفيذ؟؟!

وكمان نازل إهانة فيها وفي وسطها الاجتماعي وأهلها
وبرضو نسي انه أتجوزها وناسب أهلها دول
ولا كان شارب حاجة أصفرة في كباية أكبرة
لما حط إيده في أيد العلاف أبوها؟؟!

ولا يا قلب أمه.. علّمته الحشيش والبانجو
وهو طبعا مسكين زي ما سمع كلامها واتجوزها غصب واقتدار
برضو بقى مدمن غصب واقتدار .. والنبي قطع قلبي
يلا أهو ربنا قادر ياخد حقها
وقادر ينصفه لو مظلوم

وطبعا كلنا سمعنا.. عن اللـّ علق نفسه في كوبري قصر النيل
عشان مقدرش يتجوز اللـّ بيحبها
وبرضو سمعنا عن اللـّ صعق نفسه بالكهربا في منطقة حساسة
عشان برضو مش قادر يتجوز ويشبع الغريزة اللـّ عنده
وكمان كلنا قرينا اللـّ قطع عضوه لنفس السبب
اللـّ صعق بيه الأخ اللي فوق نفسه

نستنتج من ده كله إيه بقى؟؟؟
إن الست المصرية هي سبب كل الأذمات الحالية
ستات تجيب الهم.. ما تنفعش في حاجة
تنفع بس تتقتل.. أو تنكد ع الراجل
ولهاذوهي الأس
باب.. قررت الأمبراطورية الشكيكة الصينية
إنها تحل لشبابنا مشاكله كلها
وتصدرلنا نسوان صنع في الصين
فرز تاني زي الفل.. مين قال هات؟؟

يعني لا تقتل مراتك.. وتصعق نفسك
الحل بسيط تدخل جمعية مع أم تيتي وتقبضها الأول
وتروح تطلب عروسة صينيه بكام.. بـ1500 جنيه
يا بلاااااااش والله.. حاجة لوز العنب


لا وإيه.. لما البت الصينية بتاعة عايسة كلابية
بتجي عندنا.. بتقول الأول إن الكلابية ديه ب150 كنيه
وأنا باخدها منها في الأخر ب30 كنيه.. يوووه قصدي جنيه
يبقى أنت وشاطرتك بقى.. تهز سعر العروسة
وتوصل لأحسن سعر .. وممكن تشتري 4 بسعر الجملة

وإيه بقى قصيرة سوفيفة.. لا تـُرى بالعين المجردة
بمتر وربع قماش من الوكالة تكسيها وتلبسها
وفي درج الكومودينو.. افرش بس أنت منديلين قماش
وهي هاتنام على واحد.. وتتغطى بالتاني
وممكن تجيب منها أتنين.. واحدة في السفرة وواحدة في الأنتريه
والله وهاتبقى أرخص من النجف.. أطلبها بتنور
وأكيد هاتنور.. هي الصين بتغلب يعني

وبعدين هاتوفر عليك تمن الميبدات الحشرية
واشي راجون وعلى بيرسول وريد
هي هاتكل كل الصراصير والخنافس والدبان
اللي في البيت.. وهاتشوي وتسلوق وتحمر
وأنت ها تاكل يا مـُهي

غير إنك بعد جوازها هاتمضن أن مافيش كلب
فيكِ يا مصر يقدر يجي جنبك ويعضك
لأن المدام أصلا بمجرد ما يجي جنبك هاتعضه هي
وتصطاده.. وتبقى الست الوالدة دعيالك
هاتكل فتة كوارع كلابي.. تستاهل بـُقك

ده كله كوم.. وإنها مش هاتقدر تنكد عليك كوم تاني
لإنها هاتقضيها هيها ونيها وبيها.. وبويا ومويا
وأنت طبعا ولا فاهم لها .. وهاتعيش يا برنس
ومش بعيد يبقى فيه اوفر.. لو خدت اتنين
تاخد عليهم مترجم.. فور فري

قال يعني إحنا عندنا أزمة حريم.. بلا خيبة
ده مصر أزمتها في الرجالة.. بينقرضوا
هو أحنا نافعين لوحدنا.. لما تبقى فيه منافسه دولية؟
وبعدين ليه بيصدروا لنا عرايس بس.. ؟؟
ولا ده عشان المصري معروف بقوته وجبرواته؟؟

يلا بلا خيبة عليهم
اللي خدته القرعة.. تبقى تاخده أم عيون ضيقة

وزي ما الناس كلت الغشاء الصيني.. بألف هنا
بكره تاكل العرايس الصيني.. وصحتين وعافية

ويبقى الجيل الجديد.. جيل المستقل
ملعوب فيه أساسه.. :@

ديه قصة قصيرة اسمها
زوجة تقلـــيد
قصة نهايتها مرعبة.. اقرواها
قرتها من 5 سنين.. وأهو
كل اللي حكاه بيحصل
ربنا يستر

::




04 أغسطس 2010

أسطورة حب





حبي لك أسطورة..
بلا اسم.. بلا عنوان..!
حبي لك أسطورة
تـُنحر على أعتابها الأزمان...

وتسبح لأجلها الحروف بفلك الوجدان..!
حبي لك أسطورة
أرهقت كل الأذهان...

هي لوحة فنية لم يرسمها فنان.. جمعت كل الألوان..!
وبلمحة استثنائية..
مزجت الفرح بالأشجان..!
حبي لك أسطورة
مـُلكها العشق.. وعرشها الأمان..

وتحت سلطانها وُحِدت كل الأوطان..!
لا مسافات..
لا حدود..
لا أسلاك..
فكل سكانها إنسان..!
حبي لك أسطورة
هي أشبه بالهــذيان..!!

فلولا وجودها..
ما كان لي بين الأكوان.. كيان..!