29 ديسمبر 2010

فرحانة يامصر.. لما الهوان إتهان؟؟؟

.
جمعة الشوان..
أول ما أقول الأسم ده
طبعا تفتكروا على طول عادل إمام..
دموع في عيون وقحة



لكن ماقصدش عادل إمام.. أقصد
البطل المصري أحمد الهوان
اللي ثبت الموساد 11 سنة

أحمد الهوان..
أول واحد جاب لمصر أحدث جهاز لاسلكي
في العالم.. قبل حرب 73 يرسل من القاهرة لتل أبيب


أحمد الهوان اللي..
رفض فلوس الموساد وقت ما كان مش لاقي ياكل

أحمد الهوان اللي..
رفض يعيش عيشة الملوك.. وقت ماكنت مصر مدمرة

أحمد الهوان..
أول بطل عربي في المخابرات يتعمله مسلسل

أحمد الهوان اللي..
ريقه نشف عشان معاش ياكل منه.. بقاله عشرين سنة
:
أحمد الهوان.. اللي أتنساااااا..
والكل فاكر عادل إمام!!


أحمد الهوان..
مريض ومش لاقي فلوس يتعالج بيها

أحمد الهوان..
اللي شال كفنه عشان مصر.. مصر بتذله

أحمد الهوان..
خوفني أوي من مصر.. أوي
لما الأبطال بتنساهم.. هاتعمل معانا إيه؟؟

وأحنا لا روحنا تل أبيب..
ولا جبنا لاسلكي..
ولا كنا بنخدمها 11 سنة
في بيت الأفاعي

طبعا دلوقتي.. تلاقي أسرائيل.. هاتتبعله إيميل
تقوله ألف صحة وعافية.. العرق سوس اللي
شربته مع الريس ذكريا.. وخلي مصر تنفعك بقى
مش كان زمانك ملك.. تاكل تشرب تتعالج بفلوسك!

آآآه يا خوفي منك يا مصر
ياترى.. قلبك هايقسى على مين تاني؟
ياترى.. هاتعملي في ولادك إيه تاني؟؟
ياترى.. هاتذلي أبطالك ليه تاني؟؟
كده يا مصر تبيعي أبنك.. وتهينيه؟؟
:"(

كل الشكر....
(( لإعلامي محمود سعد ))
شال هم أحمد الهوان.. وتكفل بعلاجه
بعد ما البلد باعته.. وذلت أنفاسه عشان العلاج



رقم البطل.. أحمد الهوان
0123830816
لكل اللي عايز يقول له إنه فاكره
وحاسس إنه قدوة له
في الوطنية اللي ضاعت من بين
قلوبنا من زماااااان..

أطمنوا عليه
شدوا على إيده
حسسوه.. إن لو حتى مصر نسيته
ولاد مصر فاكرينه!


لك الله يا بطل..!
::

:(

::

27 ديسمبر 2010

تدوينة العزة.. أرقام وإحصائيات!

.



زي النهاردة من سنتين.. صحينا على أخبار مفزعة غزة بتتضرب..!! كان كل شوية يقولوا عدد الضحايا.. 50 بقوا 60 وصلوا 100.. لا 150 شهيد.. أعزل.. محاصر من سنين! ده كله كان في ساعات قليلة جدا.. كنت فكراها عملية قذرة.. زي اللي كانت بتحصل على فترات من الصهاينة لكن عدى يوم 27 وبعده 28 وخلص ديسمبر ودخل يناير.. وأول أسبوع من يناير كمان.. وأنا هاموت ده كله ضرب في شعب أعزل.. محاصر؟؟! وفضل الضرب شغال.. من يوم 27 ديسمبر.. ولحد 17 يناير ضحايا.. دمار.. خراب.. موت.. رجالة وستات أطفال .. وعجايز.. مافيش أي تمييز حتى الضرب كان في مباني الغوث الدولي... (الأونروا) وبعدها إعتذار.. أضربت غلط!!!!
مش هانسى أبدا الطفل اللي كان عمره 12 سنة..
في مستشفى الشفاء في غزة..
الإصابة جت في رجله.. وبتروها.. قال:

هم فاكرين إنهم لما يبتروا رجلي..
مش هاطلع زي مانفسي أطلع؟؟

لا لو حتى هازحف.. هاطلع زي مأنا وأهلي بنتمنى..
مش هاضيع أبدا زي ماهم عايزين!!!

ده كلامه بس بالمصري طبعا

كلامه هز كياني كله
الولد رغم صغر سنه.. لكن فاهم وواعي إنهم يبموتوا الأمل جوا الشعب بتعجيز الجيل الجديد.. بس هو فعلا قوي.

خلال الحرب.. كان معانا مفاتيح أرقام غزة..
وبنحط بعدها أرقام عشوائية.. ونتصل بيهم في غزة

كان فيهم اللي بيفرح أوي بالاتصال..
ويحس اننا معاه بجد
وكان فيهم اللي كان بيرفض إنه يتكلم..
لمجرد إننا من مصر
وكان فيهم اللي كان بيرد.. يشكرك ع الاتصال..
ويدعي على العرب كلهم
هنا في (( البوست ده ))..
قصص حقيقية من جوه غزة
بجد يستحق القراءة.. هاتشوفوا غزة الحقيقية فيه.

ديه إحصائية للحرب.. بشكل كامل مفصل:

* 22 هي عدد الأيام التي استغرقها العدوان الإسرائيلي على قطاع غزة، فيما سمي بعملية «الرصاص المصبوب»، حيث بدأت العملية في 27 ديسمبر (كانون الأول) 2008، واستمرت الحرب حتى 17 يناير (كانون الثاني) 2009، عندما قررت الحكومة الإسرائيلية وقف إطلاق النار من جانب واحد.

* 1417 فلسطينيا في غزة سقطوا شهداء جراء العدوان، وهم يعادلون 0.1% من عدد سكان القطاع (1.5 مليون نسمة)، موزعون كالتالي:
* 926 مدنيا، بينهم (313 طفلا و116 امرأة).
* 255 شرطيا.
* 236 من عناصر حماس ،بينهم
نزار ريان أحد قادة حماس
ووزير داخلية حكومتها سعيد صيام.

* 5450 عدد الجرحى من الفلسطينيين، بينهم 1606 أطفال و828 امرأة. وقد اتهمت منظمة «هيومن رايتس ووتش» إسرائيل باستخدام الفوسفور الأبيض بشكل ممنهج في قصف مناطق مأهولة بالسكان خلال الحرب، ويؤدي الفوسفور الأبيض لإصابات خطيرة حين يلامس الجلد أو لدى استنشاقه أو ابتلاعه، فالحروق بنسبة أقل من 10% من مساحة الجلد يمكن أن تكون قاتلة، لأنها قد تؤدي لأضرار تلحق بالكبد أو الكليتين أو القلب.

* 1.9 مليار دولار، هو تقريبا حجم الخسائر الاقتصادية المباشرة التي تكبدها قطاع غزة نتيجة العدوان (الخسائر في المباني والبنية التحتية)، وتشمل تدمير(4100) مسكن بشكل كامل، ونحو (35) مسجدا، و(120) مبنى حكوميا، و(3) مقرّات تابعة للأونروا. إلى جانب (17 ألف) مسكن آخر دمرت بشكل جزئي، وعدد من المدارس والجامعات والوحدات الصحية. وقد بلغ معدل البطالة في القطاع عشية العدوان (41.9%)، بما يعادل (120 ألف عاطل).

* 49 مليون دولار، هي حجم الحاجات التمويلية لإعادة إعمار المرافق والمباني التي يشرف عليها البرنامج الإنمائي للأمم المتحدة في غزة، وفقا لتقديرات جامعة الدول العربية، يخصص أكثر من نصفها لإزالة الركام والأحجار التي يصل وزنها إلى 600 ألف طن، بينما يستخدم الباقي في عمليات إعادة إحياء الأراضي الزراعية والإعمار.

* 14 فقط هم عدد القتلى من الجنود الإسرائيليين وفقا للمعلومات الإسرائيلية. فقد عمدت إسرائيل إخفاء الحجم الحقيقي للخسائر في جنودها وفرضت تكتّما إعلاميا تاما على خسائرها، ولم تعترف سوى بمقتل (14) جنديا وإصابة (168)، بعضهم كما زعمت بـ«نيران صديقة». وفي المقابل تؤكد المقاومة أن العدد الحقيقي للقتلى الإسرائيليين هو أضعاف مضاعفة لهذا الرقم.

* 120 مليون شيكل، هي حجم الأضرار التي لحقت بالمصانع في جنوب إسرائيل، ووفقا لحسابات اتحاد الصناعيين الإسرائيليين، منها 87 مليون شيكل أضرارا مباشرة أما المبلغ الباقي فأضرار غير مباشرة.


وبمقارنة بسيطة أوي.. ممكن نعملها:
49 مليون دولار.. ده اللي كان المفروض يتجمع لغزة
وياريتهم وصلوا لها بالكامل
الإمارات تعمل شجرة كريسمس.. بـ 11 مليون دولار
عشان تتحط في بهو فندق كبير!
وقطر تدفع 33 مليون يورو عشان تحط شارة
مؤسسة قطر على تي شيرت برشلونة!
ولحد النهاردة..
لسه غزة لم يكتمل إعمارها
ونص بيوتها أتبنت بالطوب اللبن (الطين)..!
لا تعليــــق
هيجي يوم..
هاناخد حقنا مش بس من إسرائيل
لا.. ومن كلاب إسرائيل اللي وسطينا

شكرا لك مدون ومدونة..
شارك في تدوينة العزة
وشكر خاص جدا للشهاب محمود..
لإنه أول بوست نزل


::




24 ديسمبر 2010

الدعوة عامة.. لتدوينة العزة

.
النهاردة مش بوست.. النهاردة دعوة
وياريت الكل يتفاعل معاها.. ده طبعا لو عجبتكم اصلا
يوم الأتنين إن شاء الله..
27/12/2010
هاتبقى الذكرى التانية
لمحرقة غزة.. أو عملية «الرصاص المصبوب»

أنا بقترح...
(وفي نفس ذات الوقت هانفذ)
إننا نوحد البوست يومها
ويكون عن أرض العزة.. غزة
.


كل واحد زي ما يحب يكتب..
عايز يحيي الذكرى

بصور المعركة.. بالخسائر أو المكاسب
أو يحكي تاريخ غزة.. رؤيته عن غزة
الحصار.. موقفه من القضية نفسها
زي ما تحب دون..
تدوينة العزة

أنا بتمنى إن الكل يتفاعل مع الفكرة
أقل حاجة ممكن نقدمها لشهداء غزة..
ونقولهم مش ناسينكم..
وأكيد هايجي يوم ناخد حقكم..

مش هاطول عليكم.. بقى
جمعة مباركة على الجميع
إن شاء الله

15 ديسمبر 2010

أشجار.. في حب ولاد العم سام


لما إسرائيل ربنا كرمها واتزودت بالاشعال الذاتي
صعبت علينا اوي.. وروحنا ساعدنا في إطفائها
حرام ولاد عمنا
مع إنهم شعب الله المختار (يعني هو أولى بيهم)
لكن قلب الأم بقى
وقولنا ديه سياسة.. ومالناش دعوة.. وده كلام كبار
.


وإحنا أصلا شوية عيال مانفهمش حاجة.. وطبعا شوية عيال
ده اسم النبي حارسه وصاينه.. يفك تلاتة اربعة مننا ماعلينا
لتجيله نزلة برد جامدة.. يروح فيها وأبقى أنا اللي حسدته
مع إن عين الحبيب لا تحسد ولا وتقر :@

لكن نروح بعد ما ربنا ولع فيهم
نزرع لهم شجر بدل اللي ولع
عاااااااااااا.. وخليها عااااااااااا عشان انا متربية
وقال إيه.. تحت شعار
((التضامن الإنساني))


الـــ إيه يا خويا؟؟؟ تضامن وإنساني؟؟!
حسبي الله ونعم الوكيل.. مش لاقيه
كلمة محترمة أقولها

طيب أنا عايزة وفد إسرائيلي.. رفيع المستوى ينزل
يتضامن معانا.. في تسليك بلاليع البلد
ويتضامن معانا.. في لم زبالة البلد
وشوية يجوا يتضامنوا.. في أزمة الماية والكهربا
طيب بلاش يتضامنوا معانا.. بس بلاش ياخدوا الغاز منا
أو يتضامنوا.. ويحلوا عن نفوخ أهلنا شوية
باللي كل شوية يبلونا بيه.. برا وجوا وبحرا
وإشمعنا هم لم يتضامنوا معانا.. أيام الدويقة مثلا
مش كارثة طبيعية.. ماجبوش ليه شوية حجارة من عندهم
وجم (رمموا) الدويقة.. وبغض النظر إن جيتهم كده كده
(هاترمم) البلد كلها.. وهي (مرممة)
لوحدها بقالها سنييين

ولا السيول.. ولا .. ولا .. ولا

اللي يشل بقى.. إن مش أي حد مشارك في زرع الشجر
لاع.. دول السفراء.. وسفراء إيه بقى تحديدا
مصر والأردن والسلطة الفلسطينية...!
بالإضافة لدول اروبية وأمريكا
ده حسب ما ذكرت القناة السابعة الإسرائيلية..
(عاروتس شيبع)
ورئيس الصندوق القومي الإسرائيلي قال لهم إيه بقى..
(القوات التي قامت دولكم بإرسالها إلينا أنقدت حياتنا ، المساعدات التي تم نقلها جوا منحتنا العون ، تلك القوات قامت بأداء مهامها بشكل متخصص ومحترف وأنقذوا حياة البشر ، لقد نجحنا في منع الحرائق وإنقاذ مواطني حيفا)..

ويا حسرة قلبي..
على دم كل أسير مصري ضاع
ولسه بيضيع.. وبننقذ قصاده حياة إسرائيلي

ويا حسرة قلبي..
على دم كل فلسطيني ضاع
وسلطته.. بتنقذ اللي قتلوه وبتتضامن معاهم

ويا حسرة قلبي..
على الهوية الاردنية اللي ضاعت
واللي لسه بيتضامنوا مع اللي ضيعوها

أظن كده.. اللي يقولي ويكيليكس الغرض منها
تشويه صورة الحكام العرب.. وبس
هاقوله.. يور ماذر قرعة
هم مش محتاجين.. هم اصلا مولدين
بعيوب خلقية مش مستنين ويكيليكس
ترفع عن تشوهاتم الستار
طبعا الخبر مالوش علاقة بويكيليكس.. لكن
ديه جملة إعتراضية.. على الهامش

يلااااا بقى يا ولاد
كل واحد زي الشاطر.. يا خد شجرة
وعلى إسرائيل دغوري
أزرعوا اسرائيل.. محتاجحكم
إيه مافيش دم.. مافيش إحساس
مافيش إي تضامن.. مع ولاد العم
نعمل حملة ونسميها
أشجار.. في حب ولاد العم سام



14 ديسمبر 2010

مجــرد حُــلم..!

.




إني أحلــم...
رغم إنك لازلت طيف.. يداعب
العمر من بعيد..
وكم من أحلام نزفها القلب.. ولم يجني
منها إلا الأنين!..


إني أحلــم...
والحلم داخلي يركض.. وبطفولة يعبث بكل
ما كان هناك سجين..
وقد تشرق حريته، أو يقتلها بلحظة
إنفجـار الجليـد!..


إني أحلــم...
بجسارة الثوار أمام الطاغية، وقد وحدهم
فارس ذو همة؛ قوي عنيد..
وكم يخشى أن يُلقى حلم النصر.. على
أعتاب الأمل شهيـد!..


إني أحلــم...
ببراءة طفل يغفو بفرحة العيد.. ولم يغفُ
بعينيه لون ثـوبه الجديد..

يرسم معالم موعده المنتظر..
ببكر أحلام الوليـد!..


إني أحلــم...
بقصة خـُطت بدايتها.. وقد غرق مؤلفها
ببحر النهايات المهيب..
ينتظر النهاية زورقا قد يرسُ سعيداً..
أو يبحر في رحيل أنيق!..


10-12-2010
::

:)

::

02 ديسمبر 2010

ردي على.. خريف المدونين

(خريف المدونين).. بوست عند أ. تامر علي
وكنت دخلت عند تامر من فترة محترمة..
تكاد تكون في حد ذاتها خريف :)) وعجبني البوست جدا
ولاقيت ان الرد هايطول مني..
فوعدته بإني أرد ببوست عندي أفضل
وهو كمان وعدني إنه يوفي بوعده..
ولن أتنازل عن اللي وعدني بيه
واخدلي بالك يا تامر.. لن أتنازل نوهائي..
ويجعل بيوت المدونين عمار ^_*


أتفق تماما معك في موضوع البوست..
وفعلا مدونات كتير دخلت فصل الخريف بدري..
وللأسف لسه ماجاش عندها ديسمبر :(
بس هاقولك سبب للخريف الدائم ده..
يمكن أنت ما أخدتش بالك منه وهو الفيسبوك..
الفيس سبب قوي لهجر بعض المدونين مودناتهم
لأن مردوده أسرع..
الفايد باك بتاعه أكبر..
وإنتشاره أوسع.


هارد على أسئلتك التلاتة اللي أنت نزلتهم في البوست
واللي أعتقد.. إن لو كل مودن سألهم لنفسه
هايحدد هو عايز إيه تحديدا من مدونته




ما هي أسباب دخولك عالم التدوين؟
بعشق الكتابة..
من زمان وأول حاجة بفكر فيها في أي حالة
حزن- فرح- حب- فراق- مرض- تعاسة- سعادة.... الكتابة
أنا ماكنتش أعرف عن التدونين
(كمدونات شخصية) أي حاجة خالص
وكان ليا صديق بيقرا ليا توبيكات على منتديات ومواقع..
ونصحني بعمل مدونة أكتب فيها
وبعدها شير ليا لينك مدونة (عايزة أتجوز)..
والحلقة العاشرة مساء بتاعتها
قريت فيها.. ومنها دخلت مدونات كتير.. عجبني كتير منها
وموضوع إني رئيسة جمهورية نفسي...
شيء مغري جدا ليا.. جدا لأني كنت بعاني
من رفض وفرض.. نقاط معينة عليا في الكتابة
المدونة.. بكتب فيها اللي عايزه أقوله.. وده شيء ممتع :)
عمر ما كان هدفي.. من التدوين والمدونة
أن ينزل اسمي بكتاب أو أطلع في Tv أو يبقى ليا فانز
ومع ذلك الحمد لله ده كله حصل..
وماكنتش بحلم بكده مش هدف ليا!
كان نفسي في مكان أقول اللي نفسي أقوله..
وقت ما أنا محتاجة أقوله
بالشكل اللي يريحني إني أقوله..
من غير ما يكون ألف سد قصادي


ماهي أسباب استمرارك في عالم التدوين؟
لأني ما أنفصلتش عن الكتابة..
لسه الكتابة صديقتي الوحيدة.. اللي بتسمعني في أي وقت عمري ما أحتاجتها وكانت مشغولة بغيري.. أو عني وبصراحة مجتمعنا مغري أوي.. بالنسبة لمدونة زي فتافيت كل يوم عنده جديد.. ومع إني بكتب في كل حالة بمر بيها إلا إن الكتابة عندي في حد ذاتها حالة.. عشان كده مش في أي وقت بقدر أنشر (كل) اللي بكتبه للنـاس.. لكن دايما فيه اللي ممكن يتنشر غير إن الموضوع بقى فيه نوع من (الساتسفكشن) الشخصي جوايا لما أنزل بوست.. وحاسة إنه مجرد كلام وخلاص وألاقي ناس داخلة.. تناقش.. تثني.. تتفق.. تنقد.. تقول الله شيء بيرضي جوايا حاجات كتير.. مع إني خسرت متابعين كتير جدا بسبب إنقطاعي المتكرر.. لكن مع ذلك جوايا نفس الرضا :)
مستمرة عشان لسه فيه د/ستيته..
تدخل تقرا وتعلق على تخريفي
مستمرة عشان فيه سحساوي..
حتى لو بيعلق عليا بشكل جدي.. ببتسم
مستمرة عشان فيه تامر علي..
بستفاد من كل كلمة في تعليقه عليا
مستمرة عشان فيه أسماء..
بحس إني (لسه بتنفس) لما بلاقيهم عندي
مستمرة عشان فيه (أبو خضرة).. :)
بيقرا ومهتم بفتافيت رغم إن فتافيت
مش عارفة ترد 1على مليون من إهتمامه :(

مستمرة لأني لو جه يوم
ماقدرتش أكتب.. هابقى ((كنت))


ماهي اسباب رغبتك في التوقف عن التدوين؟
مش هانقول توقف.. نقول إنقطاع

أولا إنه لازم ينزل بوست!!
نظرية إلتزامي بأي شيء بتخليني مقصرة!

ثانيا الفيسبوك..!
بخرج فيه أول بأول في (إستاتيوس).. سطر مثلا
سطر ورا سطر.. البوست بينزل على 100 مرة
فبتكون النتيجة.. مافيش بوست!

ثالثا الغير معرف وبلاويه!!
بتيجي تعليقات على البوست
وإيميلات على إيميل المدونة.. كفيــلة
إني أبطل كتابة طول عمري.. :))


وفـالأخر.. كل خريف بيجي بعده شتا
وكل ورقة دبلت.. بترجع تاني تخضر
فأكيد مهما بعدت.. برجع تاني هنا
مادمت لسه عايشة.. مابقتش كنت


على الهامش:
واجب عزاء..
للشعب المصري.. الله يرحمك يا بلد

واجب تهنئة..
للشعب القطري.. رغم كل شيء مبروك

واجب دعاء..
للنادي الأهلي.. ربنا يشفيك يا غالي يارب



17 أكتوبر 2010

القفــا بـوك... أم الفـايس بـوك!


نظرا لعيوب الفايس بوك الأمريكي.. وما له من أضرار

بالغة على صحة الأم والجنين.. قررت المملكة المباركة

إنشاء موقع
((القفـــــا بوك.. !))




وهذا حرصا منها على صحة الشعب العقلية والفكرية
وإيمانا منها بحق كل جحش في إبداء رأيه.. سواء بالتنهيق

أو بالرفص.. أو حتى بالنفر إن أمكنه ذلك..


::شروط الانضام كجحش بالقفا بوك::

1- السن لا يقل عن 30 سنة.
2-
طول القامة لا يقل عن 170 سم.

3-
الوزن لا يزيد عن 80 كجم.

4-
يفضل أصحاب البشرة السمراء.

5-
عرض القفا لا يقل عن 15سم.

6-
يفضل الغير مهتمين بالأمور الآتية:

-
السياسة (سواء انتخابات أوأحزاب أو حركات أو جماعات)

-
الدين (سواء إسلامي .. مسيحي)

-
السلع (سواء غلاء أو إختفاء)

-
التعليم (سواء مصاريف أو جودة)

-
الماء (سواء تلوث أو أزمة)

-
الكهرباء (سواء إنقطاع أو ندرة)

-
المواصلات (سواء حوادث أو حوادث).


::الأوراق المطلوبة لقبول المستخدم جحشا بالقفا بوك::

1- 6 صور شمسية حديثة.. على هذا النحو:
-
صورة للوجه والكتف بزوم مناسب.

-
صورة للجانب الأيمين من الوجه.

-
صورة للجانب الأيسار للوجه.

-
3 صورة للقفا بزوم مختلف لكل صورة.

2-
شهادة الميلاد الأصلية كمبيوتر.

3-
صورة من بطاقة الرقم القومي.

4-
صورة من جواز السفر.

5-
صحيفة جنائية للجحش.. لغرض عمل حساب على القفا بوك.

ولا يمكن إرسال عكب الفيش.. يجب أرسال الصحيفة كاملة.

6-
وصل كهرباء حديث وآخر قديم.

7-
أرقام هواتف.. منازل وهواتف نقالة للجحش..

وكل أفراد عائلته من الدرجة الأولى والثانية..

وأقرب 20 جار له.. في كل ناحية.

8-
إستمارة 2 جند .. أو تحديد الموقف من التجنيد للذكور.

9-
شهادة إتمام الخدمة العامة للإناث.

10-
شهادة موقعة من عدد 2 مواظفين حكومين

رواتبهم لا تقل عن 250 جنيه.. مختومة بختم الجحش

وعليها طابعين بوسطة.. يقرا بها بأن الأوراق المرسلة

سليمة وغير مزورة.. وإنها لجحش على قيد الحياة.


ترسل هذه الأوراق.. على مبنى أمن القفا بوك وسلامته
في ميعاد أقصاه 3 شهور قبل النقر على موافق لإتمام

عملية التسجيل.. حتى يتثنى للإدارة تحري صحة الأوراق.



::قوانين استخدام القفا بوك::

1- لا يحق للمستخدم التحدث في أي من الأزمات بشتى أنواعها
سواء سياسية أو طائفية أو داخلية أو خارجية

أو حتى أهلاوية زملكاوية.


2- لا يحق للمستخدم نشر أي خبر إلا بعد مرور 3 شهور عليه
وهذا حرصا على التأكد من صحة الخبر والمصداقية.


3- لا يحق للمستخدم نشر إي فيديو أو تسجيل صوتي إلا
بموافقة من النيابة العامة .. موافقة كتابية مختومة بختم الجحش.


4- لا يحق للمستخدم الكتابة أي نوت أو استاتس إلا بعد مرور
6 أشهر على إشتراكه بالقفا بوك.. وتصنيف كقفاوي نشيط.


5- لا يجوز عمل أكثر من 4 لايك.. و3 كومنت على كل منشور
وأكثر من هذا يعتبر تجمع.. ويعرض الكاتب والمعلق للمسائلة القانونية.


6- لعمل أي مجموعة أو صفحة تشجيعية.. يجب الحصول على
حكم من محكمة القضاء العالي.. بصلاحية فكرة المجموعة.


7- لا يجوز أشتراك أثنين من عائلة واحدة بجموعة واحدة
حتى لا يحدث تحالف في بينهم لمصالح شخصية.


8- لا يجوز تغير اسم أي مجموعة بعد الحصول على حكم المحكمة
لمثل أسماء تحتوي.. على سبيل المثال لا الحصر:

كلنا ... - ضد ... - متضاما ... - رافض ...

حكومة ... - رئيس ... - وزارة ... - فين ...

لماذا ... - ليه ... - أين ... - أمته.... إلخ


9- الحد الأقصى لعدد الأعضاء بأي مجموعة 50 جحش
وأكثر من هذا العدد سيصبح تنظيم يعرض المنشأ والمشترك

للمسألة القانونية.. والعرض على المحكمة العاليا.


10- لا يجوز عمل أكثر من حساب على القفا بوك
من جهاز كمبيوتر واحد.. أو أي بي واحد.. وإن حدث هذا

سيعتبر تحايل يعرض الجحش للمسألة القانونية.


لضمان سلامة كل جحش.. وللحفاظ عليه من أي
جهة استحمارية أجنبية.. سيكون حسابه مراقب من جهة

أمنية عليا.. بالاضافة لمراقبة جهازه الشخصي والاي بي

الشخصي.. وإيميلاته الشخصية.. وجميع أرقام الهواتف

التي بعث بها للجهة الأمنية.. ليشترك بالقفا بوك..


::ملحوظة هامة::
لا يقبل الأسماء المستعارة

فاسم المستخدم.. اسم الجحش رباعي

وكلمة المرور.. رقمه القومي المكون من 14 رقم



وقد تم العمل على توفير كل سبل الترفيه
((
بالقفــــا بـــوك..!))

حيث تم تصميم لعبة الرش بالماية على أجهزة الكمبيوتر

حتى تنمي مهارة الضرب بالماء والتصويب على الهدف

وهناك اللعبة التي حيرت العالم كله

وهي كيف تفك سن قلم روترينج .. وتركبه تاني

ولا يمكن لعبها إلا إذا أجتاز الجحش أختبار الذكاء.. أولا

بالضافة إلى العديد من الأبلكيشنز الرائعة

أسأل أم سحلول.. حظك اليوم مليان بالغيوم..

والعديد والعديد من المفاجأت....


القفــا بـوك... أم الفـايس بـوك!

::

البوست الجاي.. هارد على أسئلة
أ/ تامر علي
.. في بوست خريف المدونين

كان المفروض أرد البوست ده

بس القفا بوك حكم

^_^



03 أكتوبر 2010

بيحبوك يا ريس.. و مش شغل سيما



في صيف 2006.. كنت في المعمورة
المهم في الوقت ده أتعرض عليا أشتغل في السيما
آيااااااااااه أيام الشباب بقى.. أي والله بجد
وكان مخرج عامل كليب على دريم.. وكان مصر (يعني مصمم)
إنه يعرفني على منتج بيدورعلى وجه جديد بمواصفات معينة
(طبعا قياسية ^_*).. عشان دور تاني في فيلم جامد
هو عارف إني أنفع جدي للدور...
ويحاول يقنعني وأنا لا يونكن أبداً
وصحابي يقنعوني وأنا على كلمة واحدة
ما خدوش يا بابا.. ما خدوش يا بابا
يا بنتي دور تاني في أول فيلم.. تاني فيلم تاخد بطولة مطلقة
وأنا ولا حياة لمن تنادي أصلا.. سيمــــا!!
يالهوي.. أشتغل في السيما.. يا نهار كسوف
وده لأني خلقة ربنا مابحبش الشهرة أحب أعيش براحتي
ده حتى من كام شهر...
لما عملت حلقة في ثقافية كافيه

كفيت على الخبر ماجور وسكوتم بوكتم
أصلا ما بحبش الكاميرا

أم هنـــــد بقى.. اليومين دول
حسيت بخيبة أمل راكبة جمل
وعضيت صوابعيني من الندم
يارتني كنت سمعت كلامهم
واشتغلت في السيمــا

بس تفيد بإيه يا ندم.. فات الميعاد


كان زماني دلوقتي .. في لقاء الريس مع الفنانين
وأكيــد كنت هاقوله كلام كتير أوي.. غير مطالب الفنانين
بتاعة العلاج.. والنقابة.. وعيد الفن.. قال ناقصين أعياد
كنت هاقول له.. وأنا قاعدة معاه في القصر الجمهوري
طبعا بقى.. مهو أنا شغالة في السيمـــا:

حال شعبك يا ريس..
بقى لا يسر إيران ولا حتى إسرائيل

تخيل بقى فخامتك..

ومع ذلك والله يا ريس الشعب

اللي هو الشعب
.. الشعب المصري بيحبك

عارف فخامتك مين الشعب..؟؟؟

مش الوزراء ولا الفنانين ولا حتى بتوع الحزب

الشعب اللي هو العمال الفقيرة.. معدومي الدخل

أصل محدودي أتلغت
من يجي كام سنة كده

لما كيلو العدس بقى بـ12 جنيه!

اللي زي العمال اللي عمالة تقع وتموت
في مجاري الصرف الصحي
في الغربية
آشي أتخنق وآشي فقدوه وآشي.....

آه والله العظيم بيحبوك وبيدعولك


عارف فخامتك..
مع إني من الفنانين اللي بياخدوا في الدور الواحد
مبلغ جنبه 6 أصفار
.. بس عشت زمان
أيام ما كنت من الشعب وسط ناس كان مرتبها في الشهر
متكون من رقمين.. فيهم صفر واحد.!


والله العظيم يا ريس..
أنا شوفت بعين راجل بيعيط
جنب فرن أفرنجي عشان مافيش في جيبه
نص جنيه
يجيب قرصة ياكلها.. تسد جوعه وتقويه
آه وعزة جلال الله

أنا عارفة فخامتك..
إني كفنانة سفيرة لمصر قصاد العالم كله
بس والله ياريس..
لو يعني الحكومة خدت بالها من الشباب
اللي زي الفل اللي في مصر..
هتلاقي مليون سفير لمصر بعلمه وتفوقه
لا بفستانه ولا بعنيه الزرقا.. ولا حتى بالسيلكون
زي زويل ويعقوب ومحفوظ...
الناس اللي مشرفة مصر.. بره وجوه
والله حتى فخامتك خليهم بس يجربوا.. !

طيب بلاش ياخدوا بالهم من الشباب..
طيب العجايز يا ريس..!!!
ده حتى الكبـــر عبـــر..

عارف فخامتك....
زمان لما كنت من الشعب
ومش فنانة وبشتغل في السيما

كان فيه قصاد مكتب وزارة الخارجية

في المدينة اللي كنت عايشة فيها
ست عجوزة ..
رجلها أرفع من رغيف الفينو أبو ربع جنيه
بتنام في الشارع.. قصاد المكتب
والله في عز أمشير..!
عنيها من كتر البكا قفلت وبقت خط.. أتعمت
وحوليها تجاعيد عمري ما شوفتها في حياتي..
طيب ياخدوا بالهم من اللي زيها..!

طيب مش مهم دول كمان فخامتك..
مهم كده كده أصلا خلاص
عمرهم الافتراضي انتهى!


فخامتك الشعب جاع..
عارف فخامتك..

الشعب دلوقتي السلطة عنده بقيت
من الرفاهيات.. يعني يادوب بيشتري
كيلو طماطم لطبيخ كام يوم

كل الأكل بتاع الشعب بقى صايص..
عشان مفهوش طماطم!!

أصل يا ريس..
الطماطم بقت بعشرة جنيه.. اه والله
مش هاقول بقى لفخامتك على ..
اللحمة والفراخ والسمك

أصل الشعب أصلا نسي شكلهم..!
مش بس طعمهم.!!!!


معلش ياريس....
عارفة إني زمايلي الفنانين محتاجين يتكلموا
عن مشاكلهم الضخمة الإنسانية..
اللي منغصة عليهم حياتهم يا عيني!

بس أصلي عارفة إن ديه زيارة
مش هاتتكرر في عمري تاني...

زمان فخامتك..
لما كنت من الشعب وقبل ما أفتح لأخويا
مستشفى استثماري.. يمص فيها دم اللي ماصين دم الشعب
كان بياخد وهو دكتور قد الدنيا في امتياز
230 جنيه في الشهر

طيب دول والله العظيم ياريس..
حتى ما كملوا مواصلاته في أسبوع
واحد في الكلية..!!

زمان برضو فخامتك..
دخلت على موقع من بتوع التوظيف أيام ماكنت
من الشعب برضو.. ومافيش شغل بقى وبطالة وكده
لحد ما ماما دعتلي واشتغلت في السيما
لاقيت مهندسين اتصالات.. بتتعاقد على شغل
مع واحد خليجي عشان يبعوا.. تخيل فخامتك إيه؟؟
جرابات وسمعات موبايلات في السعودية..!!

والله ياريس...
جالي أيامها أكتئاب أسبوع..!
وأنا قلبي بيتقطع عليهم وعلى أهلهم
اللي دفعوا دم قلوبــهم

عشان يبقى عندهم الباشمهندس والباشمهندسة!

أنا طولت على فخامتك..سامحني
بس والله أنا حتى ماقولتش حاجة

أصلا الشعب خلاص
من بعد ربنا عز وجل مابقاش قصاده
غيرك يا ريس..

ومش هافكر فخامتك تاني..
والله الناس الطيبة ديه بتحبك بجد
مش عشان اسمهم ما يسقطش في تغير وزاري
ولا عشان راحوا أنجلترا يتعالجوا على نفقة الدولة

ولا عشان هاتعملهم عيد فن..

بس عشان حاجة وحدة
فخامتك الريس.. والله بيحبوك يا ريس

(¯`v´¯)
`·.¸.·´

¸.·´¸.·´¨) ¸.·*¨)

(¸.·´ (¸.·´ .·´¸¸.·´¯`·



أشوف بقى موقف التايم ترافل
أكيد هلاقي توك توك المنادي فيه بيقول
نفر واحد صيف 2006 المعمورة
نفر واحد هنا.. خلينا نطلع بقى
أروح ألحق أركبه بسرعة
وأشتغل في السيما

::





25 سبتمبر 2010

فاشش فشــاش..!!

.





عرفت.. إن تجارب غيرها ما تنفعهاش
أصلها لا زيّ غيرها.. ولا غيرها زيّها

يبقى ليه تبني قرارتها.. على تجارب ناس قبلها؟؟

فشـدت السيـفون على التجارب

وعملت فاشش فشــاش


(¸.·'´ (¸.·'´*¤* `'·.¸) `'·.¸)v´¯)

*.¸.*´

..... ·.¸.·´

...¸.·´

..

♥♥


فهمت.. إن اللي راح ضاع.. واللي ضاع مات

يبقى خلاص بقى.. تستنى بكره من غير

ما تحسب قد إيـه من عمرها فـات

فشـدت السيـفون على إمبارح

وعملت فاشش فشــاش


(¸.·'´ (¸.·'´*¤* `'·.¸) `'·.¸)v´¯)
*.¸.*´

..... ·.¸.·´

...¸.·´

..

♥♥


قررت.. تنسى كل الأحزان
أصلها كده كده موجودة.. ومش ممكن

هاتكمل بقية حياتها.. عايشة حزينة ومكبوتة

فشـدت السيـفون على الأحزان

وعملت فاشش فشــاش


(¸.·'´ (¸.·'´*¤* `'·.¸) `'·.¸)v´¯)
*.¸.*´

..... ·.¸.·´

...¸.·´

..

♥♥


قررت.. بعد ما عرفت وفهمت
إن كل حاجة بأيد المولى ماشيـة

وإن ماتت حاجة.. في مليون غيرها لسه جاية

والدنيا ما بتقفش.. وإن وقفت وما مشيتش

هتشـد السيـفون على الدنيــا

وهتعمل فاشش فشــاش


(¸.·'´ (¸.·'´*¤* `'·.¸) `'·.¸)v´¯)
*.¸.*´

..... ·.¸.·´

...¸.·´

..

♥♥


23 سبتمبر 2010

ومضات فلاشية.. في نوبة اكتئابية


الساعة 2 بليل
مش عارفة أنام ولا عارفة أصحى
نفسي أغمض عيني وألاقي اللي أنا فيه ده خلص
كل ما أصلي أسلم.. مهو مش هاضحك على نفسيأنا مش مركزة.. ولا فيه أي خشوع
يارب.. أنا تعبت بجد

ساعة آذان الفجر
البيت بيكون هادي.. كلهم بينزلوا يصلواوبفضل أنا وماما.. دخلت البلكونة
بحب أوى السما وقتها.. بحس بربنا أوي
ورددت ورا المؤذن.. وبعدين بدأت أدعي من جوه قلبي

"اللهم إني تركت ما أريد حتى أرضيك..
ورضيت بما أكره حبًا لك.. وأبغضت ما أحب ابتغاء رضاك.. وأحببت ما أبغض حتى لا أعصيك.. فأعني يا مولي على هوى نفسي.. وطوعها لطاعتك.. وحب ما تحب وكره ما تكره.. فأنت المقتدر الرحيم"
طلعت ماما.. أدعي جوه مش لازم الناس تتفرج
سكت ودخلت.. حاولت أصلي كتير بختمصليت قبل الشروق بدقايق

بعد الشروق
لأقيت فلاش باك.. كلام.. ناس
أحداث.. من سنين.. ومن أيام
جبت ورقة وقلم.. وكتبت

أنا.. باللون ده
باللون ده الناس..


- أنا بحبك بجد
- فعلاً، طيب بتحبني ليه؟؟
- عشان اخترتكِ فيكِ كل حاجة بتمناها!
- اخترتكِ..؟؟.. الحب مفهوش اختيار على فكرة!

- غبية واللهي، ديه فرصة عمرك!
- ومين قال لكِ إني عايزة كفن غالي؟؟!

- أنتِ إنسانة متخلفة، ده اسمه ذكاء إجتماعي!
- أنتوا اللي كدابين ده اسمه نفاق جماعي!

- يا بنتي فوقي.. مشكلتك إنك فاكرة
إن الجواز حب وبــس!

- لا.. المصيبة إن الحب عندي جواز وبــس!!

- أنتِ إنسانة قمة في التطرف بجد
يا حنينة أوي.. يا قاسية جداً!!

- مش يمكن ده لأنك قمة في الغباء؟!

- وطي سقف أحلامك شوية بقى!
- أحلامي من غير سقف!


- الكل هنا تحت جزمة المصلحة..!
- عندي أنا ومصلحتك ديه تبقى حافية
- هاتفشل .. فاشلة..!
- ملعون أبو النجاح اللي يطلع من تحت الجزم.

- حرام عليكِ بقى.. خايفة القطار يفوتك!
- مهو لو سمعت كلامك.. هايدوسني!!

- مش خايف إن مراتك تخونك.. زيك؟!
- لا هي بنت ناس.. ما تعملش كده!
- ده على أساس إنك بتخونها مع ولاد كلب؟؟

- نفذي الأول وبعدين نتناقش!!
- وإيه لازمته بقى النقاش؟
- عشان ما يبقاش فيه حاجة في نفسك!!!
- دماغك ديه؟؟ فعلا الصين ما سابتش حاجة!

- أنتِ ليه مش فاهمة.. أنا راجل جميل!!
- شششش بس ما تقولش راجل!

- ما أتعودتش عليكِ تملي الأمل!!
- الأمل هو اللي مل مني!

- شخصيتك القوية ديه تخلي أي راجل يحبك
بس بجد يخاف يتجوزك...!

- يمكن لأني ما قبلتش راجل بجد؟؟!

- أنتِ فاكرة نفسك مين؟؟؟
أنا اللي زيّ ما يترفضش أبداً..!

- فعلاً.. بس اللي زيّ ما تقبلكش!!

- ............. أ ء ء..... ما علينا..!
- كده خلصت خلاص!!

مش لازم يكون كلامي مفهوم.. أو حتى له لازمة
بس بجد أنا في أصعب فترة عدت عليا في حياتيمــش قـــــادرة بــجد خــــلاص...
يارب ثبتني وصبرني

21 سبتمبر 2010

عشان خاطر.. عمونا تامر


أولا
عشان نبقى متفقين.. أنا مش متظبطة من أول رمضان

عشان كده ما ردتش على تعليقات كتير عندي..
لأني مش عايزة أرد بشكر وبس

فمحدش يزعل مني.. ده بالنوسبة لأولا


ثانيا بقى.. عمونا تامر علي.. مرر ليا تاج وأدبست فيه

هو تقريبا مخدوع فيا بجد.. وفاكرني موثئفة

ربنا يسامحه على ظنه ده :((


**___**___**___**

ما هي كتب الطفولة التي بقيت عالقة في ذاكرتك؟
هي الطفولة ديه لحد سن كام يعني؟؟.. يعني نقول لحد سن 16 مثلا؟


كنت بعشق فلاش
.. ياااااااااااه وأموت بقى في حل مسابقتها

كان عندي أعداد كتير... بس ضاعوا كلهم مرة واحدة


في أبتدائي على ما أعتقد يعني.. كنت بحب أوي قصة علاء الدين

ده لأن كان عندي قناعة إني هلاق
ي المصباح والمارد في يوم من الأيام

وفي أعدادي تقريبا برضو.. أثرت فيا جدا قصة أوقات عصيبة بتاعة تشرلز ديكنز

كنت وقتها فاكرة أن مافيش روايات ممكن تتقري إلا العربية بس

وبعدها أعجبت جدا بالأدب الغربي عامة.. وقريت لتشرلز برضو آمال عظيمة


في تانية ثانوي بقى.. كان مدرس ال
عربي بتاع الدرس بيعزني جدا
وكان بيشجعني إني ماذكرش كتاب العربي بتاع المدرسة.. تخيلوا

وأداني كتاب كان الغلاف بتاعه مرعب.. اسمه الكوميديا الآلهية لدانتي

قريته ومافهمتش منه ولا كلمة..وهاتكلم عنه تحت بعدين

واللي فضل عالق في ذهني بقى.. غلافه :)

المهم إني ما ذكرتش .. وجبت 29 / 3
0
ويارتني نفعت هههههههههههه


**___**___**___**


مَنْ أهم الكتاب الذين قرأتَ لهم ؟
على فكرة السؤال ده.. من بره المنهج

لكن هحاول افتكر.. بعيد عنكم امراض الشيخوخة بقى


على رأس القائمة.. الإمام الشافعي طبعا

ديوان الشعر بتاعه.. بصراحة مش عارفة أقول عنه إيه

بس الصمت في حرم الجمال.. جمال


إحسان عبد القدوس
.. من أهم الكتاب والعباقرة اللي قريت لهم

وهو اللي خلاني أحب أوي القصص والروايات.. حبيت أخر حاجة

أبطال (ستات) روايته.. ومش تحيز بس
إنه لمتمكن حقا
عبقري جدي.. تحس لما تقرا رواية له بحالة
من اشتراوس الجنزبيل تجتاحك


في الادب الغربي

الروسي دوستويفسكي.. قريت له كام قصة قصيرة

لكن رواية الأخوة كارماروف عجبتني جدا.. قرتها بعد ما عرفت

ان فيلم الاخوة الاعداء متاخد منها.. واصلا هو اللي عرفني

عن حد عبقري اسمها دوستويفسكي


الإيطالي دانتي في الكوميديا الآلهية.. أثرت فيا بس مش في وقت ما قرتها

بعدها نقول ب8 سنين.. وقع قصادي ملخص طويل مفهوم لها وقريته بتأني

أكتر حاجة معلقة في ذهني.. ده بعض النظر عن براعته في الثلاثيات والثنايئات المتتالية

طريقة دانتي.. في تصويره لكل ذنب وطريقة العذاب الخاصة به في الجحيم أو في التطهر في المطهر

وبعد شوية.. أكتشفت غبائي الجيني وده العادي يعني بعد ما قريت ملخص

رسالة الغفران للمعري وإنه كتبها قبلهوإن دانتي ماطلعش فاير على فكرة :))


ومن هاذوهي اللحظة جه عشقي الفظيعي للأبي العلاء المعري

قريت عنه وله.. بس عنه أكتر.. وأزبهليت

إيه الراجل ده.. ذكي متعفف صابر محير لدر
جة تحببني فيه أكتر
يعني أبن كثير يقول عليه ذنديق..

والغزالي يقول ولي من أولياء الله الصالحين

واتباعا للقاعدة الكيدوانية بقى

بقول نص البطيخة يا حاج


ده كفاية كلام المعري في بيت الشعر ده

لا أطلب الأرزاق والمولى يفيض علي رزقي

إن أعط بعض القوت أعلم أن ذلك فوق حقي


توفيق الحكيم
.. ميلاد فكرة

القصة ديه.. حلق في ودني لأخر عمري

ماقرتش لتوفيق كتير.. بس ديه خلته اسم اتوشم بتلافيف عقلي

ده لو أعتبرنا
أن عندي عقل وفيه تلافيف كمان

والله أعلم طبعا.. هو أنا شوفته؟


د/ يحيي الرخاوي

تعتة الرخاوي.. جامدة جدي وجدتي وعمتي وعمي

بستمخ منها جدا.. ويمكن بنفس درجة استمخاخي

من مج نسكافيه اتنين في واحد.. من غير سكر

اه والله لكم ان تتخيلوا بقى


أنيس منصور
.. مواقف

مع مواقف.. الفنفنة دلوقتي وقتها


**___**___**___**


من هم الكتاب الذين قررت ألا تقرأ لهم مجددا؟
بصوا هو أنا ما عنديش وقت أصلا للقرايه

لأني دايما لايك لايك مشغولة ^_^
يا ترى هاعمل إيه في وقت فراغي

لدرجة إن ما بقاش عندي وقت فراغ
أعمل فيه اللي فكرت أعمله

ده من ناحية.. ناحية تانية بقى مهمة

يعني بذمتكم حد رمى حاجة قذرة في صفيحة زبالة

ترجعوا تقولوله .. افتح الصفيحة وقولنا اللي رميته

يععععع يععع.. ده أنا يغمن عليا


**___**___**___**


في صحراء قاحلة ، أي الكتب تحمل معك؟
اموووت أنا..
أعشق الصحراء

بس قاحلة ديه توجست منها خيفة.. والله

لكن دائما وأبدا.. في شنطتي مصحف شريف

صغير بسوسته بني في دهبي.. بس المشكلة هنا

ياترى شنطتي هاتكون معايا بقى وقتها؟؟؟


**___**___**___**

ما هو الكاتب الذي لم تقرأ له أبدا ، وتتمنى قراءة كتبه؟
صالح الطيب..

سمعت عنه كتير وللأسف ما قرتش له حاجة

ونفسي أوي أقرا موسم الهجرة للشمال
تقريبا اسمها كده صح؟


فكتور هوجو..

وخاصة رواية البؤساء

لكن اسمها مش عاطفي خالص بالنسبة ليا.. وأنا أصلا

الأنتي بؤس بتاعي بايظ.. أول ما أصلحه هقراها


دنقل..

قريت له كلام من هنا وهناك

نفسي أقع على حاجة كاملة له.. أقراها


د/ عبد الوهاب المسيري

تحديدا.. موسوعة اليهود واليهودية والصهيونية


**___**___**___**


ما هي قائمة كتبك المفضلة؟
ببساطة جدا.. انا لا أقرأ كتاب مرتين أبدا

الكتاب الوحيد اللي أقرأ فيه دوما

المصحف الشريف
وبس


**___**___**___**


ما هي الكتب التي تقرؤها الآن؟

كتاب الأصول الثلاثة

للشيخ محمد بن عبد الوهاب

على فكرة قصة الكتاب ده معايا.. كانت البوست بتاع النهاردة

بس دخلت لاقيت التمريرة من تامر.. وكان لازم اجيب جول

وده بعد عقدة ومأساة الأهلي :(((


كتاب الدليل الطبي لعلاج الإدمان

بغض النظر عن عدم فهمي للكام صفحة الطبية اللي فيه

لكن في المجمل مفيد جدا
لاي شخص متخصص او لا

وبرضو هانزل إن شاء الله ملخص له هنا

أول ما أخلصه.. بإذن الله


**___**___**___**


اللي بعت الدعوه؟

من عمونا تامر علي.. صاحب مدونة

الدنيا ريشة وقلم
.. على سن ورمح

تامر صحيح وبجد والله..هي على سن ورمح.. ولا على سن الرمح؟؟؟

اختر الاجابة الصحيح مع ذكر السبب *_^


**___**___**___**


أرسل الدعوة لمدون واحد علي الأقل من أجل مشاركتنا باطلاعهم في القراءة

قلم رصاص

تيمو (أسف على الأزعاج)

كلمات من نور

محمود (الباحث عن الحب)

mrmr
(امنياتي)

صفاء جلال (مقتطفات)



وطبعا الدعوة عامة للجميع.. :)
عشان نستفاد كلياتنا

من بعضياتنا

وديه هدية على ما قسم
من شباب الفايس بوك.. لخبيتنا القومية
الأهرام.. اللي مجرسانا في الفضائيات
وبيقوللها
إنا على الدرب سائرون
:)


07 سبتمبر 2010

حصاد رمضان.. لهذا العام



كل سنة وأنتم وإحنا وهم طيبين
عيد مبارك على الجميع إن شاء الله
ويارب ينعاد علينا.. بالخير والبركة


رمضان السنة دي كان غير كل رمضان عدى عليا
حسيت إنه جه فجأة ومشي فجأة.. وكان فيه مليون مفاجأة
ولأن بكره إن شاء الله إحتمال كبير
يبقى أخر رمضان
قولت أحلق بقى أنزل لكم
حصاد رمضان.. بتاع السنة دي


في رمضان السنة دي..
أول أسبوع فيه يطلع لنا ساركوزي بفتوى مضحكة
فتوى الكرواسون والقهوة
اللي لا يبطلوا صيام مسلمي فرنسا.. لأنها عادة
وربنا ما يقطلعوكم عادة بقى
وأخر أسبوع فيه يطلع الشيخ القرضاوي بفتوى صادمة
فتوى تبيح غناء النساء
بس بشرط تكون على غرار ست الحبايب مثلا
وهكذا بقت فايزة أحمد.. قدوة ومثل يقتضى به
ربنا يخرجنا منها على خير


في رمضان السنة دي..
كل يومين تختفي بنت مسيحية
المسيحيين يعملوا مظاهرة
وبعدين يقولوا أسلمت
المسلمين يعملوا مظاهرة
إيه الفراغ والفضا اللي بقينا فيه ده؟؟؟
يعني مش فاهمة بجد.. ولو حد فاهم يفهمني
يعني الإسلام مستني الأخوات عشان ياخد قيمته؟؟!
ولا المسيحية هاتضيع قيمتها لو سابوها؟؟!
ماتعقلوا بقى.. ده كلنا في الهم سوا



في رمضان السنة دي..
عرفت قد إيه احنا ناس أصيلة أووي أوي
لما نبيع .. نبيع برخيص لكن نشتري غالي.. أوي
بعنا الغاز لاولاد عمنا.. ورجعنا نشتري
بسبع أضعاف السعر
والنبي ناس أصيلة أصلنة
متأصلة بأصالة



في رمضان السنة دي..
نسينا إننا في شهر رمضان الكريم
شهر الطهر والنقاء
وهات يا صور للبرادعي ومراته وبنته
وهتكنا خصوصيتهم
مرة ومراته قصادها خمر.. ومرة بينته بمايوه
وقموا الدنيا.. ولسه مش لاقية كرسي تقعد عليه
عشان بنته ملحدة.. واتعموا تماما عن نسبة الالحاد
اللي عمالة تزيد في مصر.. وكأنهم مش حاسين
كام ألف ملحد في البلد
شايل اسم مسلم أو مسيحي



في رمضان السنة دي..
عرفت إننا شعب طيب وغلبان بس له قضية
ساب كل حاجة بتحصل في البلد.. من أزمة كهربا
وأزمة غاز وماية وعيش.. والجوع اللي بينهش فينا
وعملوا حاملة لإنقاذ ميصلحي.. !!



ده هو أصلا عايز الإعدام.. عشان اللي هببه
إحنا شعب مستهلك.. نتخرع ليه بقى؟؟
أوعى حد يشتري كاكالوب ديه
وإيكش تولع يا مصيلحي يا رب



في رمضان السنة دي..
الكل ثاير وناره قايدة.. عشان حلقة نبيلة الهبيلة
اللي اتذاعت في مسلسل كويتي
وتسيء للمرأة المصرية
وغضوا الطرف كلهم عن مسلسل
زهرة وخرفانها الخمسة
اللي مش بس بتسيء للمرأة المصرية
ديه حطت راسها في الطين
ومش بس كده.. بمنتهى السفالة والوقاحة
بيتشدقوا بلقب الحاجة زهرة
وقال زعلانين أوووووي
عشان نبيلة الهبيلة.. جتكم خيبة
شوفوا مسلسل زهرة بيبع كام إعلان..!
نضفوا اللي جوا الأول
اللي برا هاينضـــف بعده



في رمضان السنة دي..
يطلع لنا خبر غريب أوي يبقول
عايزين كنيسة في السعودية!
طيب عن نفسي أنا موافقة . بس بشرط واحد
عايزين مسجد في الفاتيكان
وسعت مني صح؟؟!...
ومحدش يقوللي أصل
الفاتيكان مافيش فيها مسلمين
عشان هارد.. وأقوله
إن السعودية أراضي إسلامية مقدسة.


في رمضان السنة دي..
تطلع لنا الحكومة وتقول.. إن
الأزمة بتاعة الكهربا والماء والغلاء
تضاعف من أجر الصائم.. وهنيالك يا شعب مصر
ونسيوا إن الله يضاعف الأجر لمن يشاء
والفتااااااااين كتير.. عاااااا
طيب يارب يفتكروا إنهم باللي بيعملوا فينا
ممكن يقطع عنهم الأجر أصلا
يارب...... أنت عارف بقى



في رمضان السنة دي..
زراير ساعاتنا باظت.. وعايزين بدل زراير بقى
الساعة البيلوجية بتاعة الشعب اشتكت خلاص
وبقت ماشية بصاجات وبتقول..
أصل أنا عندي ساعة
شهر تروح.. وشهر تيجي
هااااااا

بمناسبة رمضان بقى..
التعليقات عندي في صدقة جارية مختفية
محدش عنده حل.. وهنيالك يا فاعل الخير
وحسنة قليلة .. تمنع بلاوي كتيرة

*¨*•.¸¸كل سنة وأنتم طيبين¸¸.•*¨*