31 ديسمبر 2009

نهاية غير متوقعة لـــ2009


كل سنة وأنتم طيبين يا أجمل ناس عرفتها في حياتي
2009 أخيرا هاتنكشح من العالم.. كانت سنة عجب بجد
حصلي فيها حاجات كتير أوي وحشة.. الحمد لله ع كل شيء
لكن معرفتي بيكم.. كانت من أجمل الحاجات اللي حصلت



كنت متخيلة أن السنة ديه هاتفضل.. زرقة زي ما بدأت معايا
فاكرين الزرقان اللي كان هاجم عليا من يوم عيد ميلادي

بس حصل حاجتين في آخر أسبوع فيها.. فرحتي بيهم
تعوضني عن كل اللي حصلي طول شهورها وأيامها


أول حاجة.. الكتاب اللي هاتنزل ليا قصة فيه
وطبعا أنا بدأت كتابة بالنسبة للقصص في مارس بس
فالحمد لله طبعا.. أن بعد أقل من سنة اسمي يكون في معرض
الكتاب ده شيء بجد اسعدني جدا.
وميرسي لموقع
نص الداعم ليا

تاني حاجة.. من كام يوم جالي كومنت على بوست
قديم بتاع التدوينة السودة.. لو تفتكروا.. عن غزة
وربنا يكرمه اثنى على البوست.. وانا رديت عليه
والله ما قريت رده بعد كده
بس لما دخلت لسوووو
وهو زعلان عشان اللي بيتسرق منه
فشيكت على اللي تم نسخه من مدونتي
وعملت بيهم سيرش

وإذ فجأة كده.. الاقي حاجة اصلا عمري
ما تخيلت انها تحصل ليا.. والله بجد.

لاقيت منتدى عامل ليا قسم كامل يناقش فيه مدونتي
القسم كله بوستات من مدونتي وبس.. بصراحة

انا طيرت من الفرحة.. فرحاااااااااااانة
منتدى أبو خضرة


يااااااااااااه بقى.. اصلا من 4 ايام قابلت واحد
ضاف ايميل المدونة.. وكلمته.. وفرحت اوي
ان فيه اصلا حد متابع كده مدونتي.. وفرحت موت

إنه حب التدوين عشان مدونتي
ومدونة د.ستيته وغادة عبد العال

واصلا اسمي مع الاتنين دول.. في حد
ذاته يطيرني من الفرح مكنتش متخيلة ابدا
ان حد يقارني بيهم.. وباسلوبهم


وانا بقوله .. انا عند وعدي ليك
والله ان شاء الله


وبعدين الاقي النهاردة قسم كامل في منتدى ليا
يااااااالهوي.. مش مصدقة وربنا لحد دلوقتي
بجد انا بشكر أبو خضرة.. من كل قلبي
انت غيرت فكرتي عن السنة كلها


يعني انهارده كنت ناوية والنية لله.. اعكنن :)
على كل المدونات الصديقة.. باحداث 2009
بس انت .. خلتني اغير خاااالص


أدعو لعم أبو خضرة.. بطولة العمر
الله يخليه ويبارك فيه.. رحمكم من بوست الآلام


ابو خضرة.. صاحبنا سووو الجميل كان بيشتكي
من الناس اللي بتاخد وماتقولش جابو منين


انا بقوله اهو.. ابو خضرة مثال حي
ان فيه ناس محترمة لدرجة منتخيلهاش
ناس تعرف يعني ايه ناس بتكتب كلمة
وقد ايه الكلمة بتكون غالية عليهم

بشكرك يا ابو خضرة
من معاميق قلبي
:)

وهااااابي نيييو ييييييييير
يا مدونيييييييين

:))

19 ديسمبر 2009

جواز سال من نيني.. بااااااااطل

أول ما رجعت للتدوين.. كنت دخلت عملت كومنت

عند أحمد أبو العلا.. على بوست أم زغلول

هو سأل هل ممكن أم زغلول تاخد نوبل؟؟
أو حتى زغلول أبنها يبقى حد عدل في الدنيا؟؟

أنا قولت له.. ممكن تاخد نوبل في الفن أو الأدب

قياسا على اوباما.. لما خد نوبل للسلام



وطبعا كانت نوع من الدعابة.. لأن ام زغلول

ماتعرفش في حياتها غير جايزة
آريل آريل.. أوووه أوووه


بس بعد ما قريت اللي قريته.. واللي هاحكي لكم عليه ده

انا من موقعي هذا.. ومن منبر فتافيت

أعلنها للعالم.. بجد ام زغلول ممكن
تاخد نوبل يا رجالة


ههههههههههههه.. والله بجد ممكن

لأننا في زمن كل شيء فيه ممكن

طيب هاحكي وانتم احكموا .. ماشي


قريت على cnn اول امباح
قصة زواج شاب ياباني 27 سنة
الشاب اسمه سال.. والبنت اسمها نيني أنيغاساكي

سال اتعرف على نيني.. في سبتمبر اللي فات وعجبته
واللي عجبه فيها.. عنيها الواسعة
(وطبعا ده عقدة عشان ياباني.. وعيونه ضيقة)
ولبسها الجذاب.. هو حبها لدرجة
انه ما بيفارقهاش نوهائي نوهائي


بعد 3 شهور من الحب والغرام وهيااااااام
( والحب ولع في الدرة يا نيني :) )
قرر سال انه يتجوز نيني.. ويعمل فرحه
على شبكة الانترنت.. عشان العالم كله يحضر


لكن العقبة الوحيدة في الجوازة ديه.. مانتم عارفين
دايما الجواز بيكون فيه مشاكل
العائلات بقى والاتفاقات وكده


العقبة ايه بقى.. تخيلوا والنبي والنبي
العقبة ايه يا خوانا.. يا عاقلين
ان نيني شخصية كرتونية
ان ان .. تشششششششششش
ايوة زي ما قريتوا كده
نيني شخصية كرتونية





ديه صورة المحروسة نيني بجد


الموكوس سال.. جرب لعبة في شهر سبتمبر

وكانت اللعبة فيها شخصية نيني

اللي حبها بجنون وقرر الجواز منها

لا ده فعلا أتجوزوا.. وحضر حفل زواجهم

الآلف المدعوين.. على شبكة الانترنت


سال قال ايه بقى:
انا بحب نيني.. مش الجهاز اللي بلعب عليه
(لعبت عليك نفسك يا بعيد)
وعارف كويس ان جوازي منها
ماينفعش جسديا.. او قانونيا
( المعتوه عارف اهو.. انه جواز ما ينفعش)
لكن بحبها وقال كمان.. ان نيني افضل من الزوجة
البشرية على الأقل لما بتأخر عليها
ما بتزعلش مني وماتردش عليا
(ابن العبيطة هي بتحس اصلا)
ولو زعلت بتسامحني بسرعة
وكمان نيني معايا في كل مكان بيروحه
ومابتفارقنيش ثانية واحدة ابدا
لان سال بياخد جهازه
اللاب توب بتاعه.. في كل شوارع طوكيو
وفي اي مكان مهما ان كان


صدقتوا بقى؟؟.. ان ممكن أي حاجة تحصل؟؟
واللي خلا سال يتجوز نيني.. قادر يخلي

ام زغلول سيدة مجتمع من الطراز الأول

وبقدرة قادر .. تاخد جايزة نوبل


طيب سال ده.. هايعيش مع مراته ازاي؟؟
طيب لو خلفوا.. هايجيبوا ايه؟؟
انسان مكرتن.. ولا كرتون مأنس؟؟
ولا والنبي حارسه سال ده.. يبقى ابو كرتونة؟؟


طيب تفتكروا.. ان ده حل للشباب اللي
مش قادر يتجوز.. انه يتجوز أي انمي؟؟
يعني نقدر نقول.. وعلى اساس كلام سال
اتجوز شخصية كرتونية.. وعيش عيشة هنية؟؟


انا بفكر ان الستات تعمل مظاهرة
لا تبقى خيبة.. احنا لازم نحتج بجد
لا منلاقيش رجالة بعد كده نتجوزها
وكل واحد ياخد اللاب توب بتاعه في حضنه
واحنا نقعد كده زي قرد قطع كده؟؟


لا انا مش هاسكوت.. يلهووووي
جواز سال من نيني.. بااااطل
باااااااطل.. بااااااااطل







17 ديسمبر 2009

فتافيت.. من جديد


وحشتوني جدا.. كلكم كلكم.. والله كلكم

مش عارفة الدنيا أخدتني بعيد ليه عنكم.. وعن حاجات كتير بحبها

بس والله.. ماغبتم لحظة عن بالي.. وبتابع أغلب بوستاتكم

والفيسبوك.. ربطني بناس كتير من هنا وقوى علاقتي بيهم

بغض النظر عن الدومة اللي كنت ولسه فيها


قررت ارجع تاني للتدوين.. وملاقتش يوم أجمل من النهاردة
ارجع فيه.. واقولكم وحشتوني جدا

تصفيق حاد بقى
:))


طبعا النهارده..رأس السنة الهجرية
كل سنة وأنتم وأنا طيبين
وأمة محمد عامة.. بخير وسلام وبركة



ستيتة.. وحشتيني جدا.. وفرحت موت أنك أفتكرتيني في بوست العدية
وصدقني مكسبي هنا معاكم.. أغلى وأجمل من أي مكسب في أي مكان

تامر علي.. أكتر مدونة كنت متبعاها وقت الأنقطاع
وبوست عزازيل تحفة

واستفدت منه جدا.. وبجد أفتقد بشدة روحك الجميلة وخفة دمك

أحمد أو العلا.. يعني مش عارفة أقولك إيه.. كنت كل ما
ابقى متعكننة
كفاية أني ادخل أقرا أي بوست عندك

عشان انسى أي حاجة معكنناني

إبراهيم العدوي.. بجد أنت ونعم الأخ.. دايما سباق بالخير


أبو العريف و المعتصم .. كنت بدخل من وقت للتاني أشوف أخباركم
وبجد أفتقد بشدة تعليقاتك اللي كنت بموت فيها

د. عرفة.. أيوشة.. تامر دياب.. إحساس لسه حي
إحساس طفلة.. موني الشريف.. حسام غانم.. سوووو
والله ما جسر الفيسبوك في إنه عرفني بيكم أكتر

Bondoka.. ghorBty.. عاشقه الرومانسيه.. عاشقة وغلبانة
assafo anaroze.. لؤلؤة.. Soul.o0o.Whisper..
Sweet Violet.. أحلام جوليا.. شباك موارب.. ريمان
لورانس العرب.. فشكول.. قيس بن الملووووح

اسلام الشربيني.. che.. كفاية طيبة.. بسنت صلاح
د. ياسر.. مامة مازن.. حسوباتيه.. مسدس صغير
ادم المصري.. امبارح كان عمري عشرين
لوجين ابو الدهب.. اقصوصة.. يوم جديد
وروح قلبي من جوه الفقيرة أم البنات


وحشتوووووني أوي بجد .. أوووووي
يارب بس ماكنش نسيت حد.. منكم ولو نسيت
اعذروني.. حكم السن بقى والشيخوخة

:))

انا جيت بس أقول وحشني أوي
وإني رجعت تاني للتدوين خلااااااص
ويارب تكونوا لسه فكرني


17 سبتمبر 2009

إعلان مهم.. بعد غيبة

كل سنة وأنتم طيبين.. عيد سعيد على الأمة الإسلامية أجمع
طبعا أنا غايبة من زماااان.. وتقريبا الناس نسيت فتافيت أصلا

بس أنا بتابع كل المدونات الصديقة.. بشكل منتظم لكن ما بعملش كومنت
وما ردتش على كومنتس الناس هنا.. بس بعون الله يخلص
شهر أكتوبر وأرجع تاني
:)
ما أتجوزتش زي ما قولتوا.. بس الفترة دية مش عارفة أكتب أي حاجة

المهم.. نجي للمفيد بقى اللي كتبت علشانه البوست ده
أنا عارفة أن فيه موهبين كتير أوي في فن القصص هنا
وعلشان كده.. قولت دية فرصة إنهم ينشروا قصصهم بدون أي تكلفة


فيه كتاب للقصص القصيرة.. للكتاب الشباب والموهبين الجدد
شروطه سهلة.. والناس اللي هتنزله أهل ثقة وأنا هشارك معاهم كمان
::الشــــروط::

1- إرسال خطاب يوضح فيه تفويض من العضو بنشر نصه وتوقيعه الشخصي
ورقم هاتفه واسمه الصريح لا تقبل الأسماء المستعارة مطلقاً
تحت نصه الذي يرغب أن ينشر في كتاب نص
ونسخة من النص على بريد الموقع
info@nus-sa.com

2- يحق للكاتب أن يشارك بأكثر من نص

3- يحق للكاتب أن يشارك بأي نص نشره في منتديات نص
(في حالة كونه عضو بها)
بشرط أن يكون النص المرشح للنشر له وليس ناقلاً من شخص آخر
وكذلك يشترط إن يكون لم ينشر في أي منتدى
أو مجلة أخرى بأي شكل من الأشكال


4- لإدارة الموقع التعديل في النصوص وفقاً لما تراه فنياً ومضموناً
حيث ستعرضها على محكمين مختصين في ذلك قبل الطبع

5- على كل كاتب أن يرسل سيرة ذاتية مختصرة مكونة مما يلي
الاسم ـ تاريخ الميلاد ـ الجنسية ـ المؤهل العلمي الأخير ـ جهة العمل
إصداراته ومشاركاته الأدبية والثقافية باختصار (إن وجد)

6- صورة من بطاقة الهوية الوطنية وبطاقة العائلة أم لم توجد للإناث

7- إدارة موقع نص تهيب بالكتاب الراغبين في نشر إبداعهم مسارعة
التواصل مع إدارة الموقع على البريد

info@nus-sa.com

بعد استيفاء متطلبات النشر في البنود السابقة

فيه جروب لهم على الفيس بوك
اسمه.. جروب موقع نص للرواية
وأنا اللي كريته كمان

ناس كتير شاركت.. بس لسه عايزين ناس أكتر
وأخر ميعاد للمشاركة 30-9-2009
نفسي كل الناس تشارك فيه.. ويكون فتحت خير على الكل إن شاء الله

وياريت كل الناس تسامحني على التقصير.. بس بجد
مجبر أخاك لا بطل.. أعذروني
بحبكم كلكم :)


11 مايو 2009

فين جمعيات حقوق الانسااااان؟؟



غبت غيبة طويلة.. والله وحشتوني كلكم كلكم..
وميرسي اوي للي سأل عليا.. سواء هنا
أو على الميل أو في التليفون
ميرسي للي وحشته وما سألش عليا

وخدة بالك يا سوتايته ويا دودو :((

وحشتوني وحشتوني وحشتوني .. من هنا للسنة الجاية
وهارد على الكومنتس كلها .. انهارده وبكره إن شاء الله


الأول.. ده لينك مسابقة للقصة
وفاضل 4 ايام وتخلص
للي يحب يشارك فيها .. يضغط على

مسابقة القصص القصيرة

بعد ما نزلت البوست الأخير.. ومع زن ماما
اللي مالوش مثيل
وافقت إني اقعد مع العريس المنتظر
واتكلم معاه بعقل ومنطق
واحاول افهمه.. وماطلعش في القطط على رأي مامتشي
كانت فيه مقابله يوم 5 ابريل.. قبل يوم الغضب بيوم واحد

وسألته سؤال عادي جدا.. ايه رأيك في يوم الغضب؟؟
قاللي : ابو الغضب ده شخصية شريرة!!
مين ابو الغضب ده يا عم مازينجر .. قصدي يوم الغضب بتاع حركة 6 ابريل
قاللي: يا شيخة سيبك من الغضب وأهله.. كبري دماغك.
وبعدين الغضب بتاعك ده هايفشل.


وبعد ما كلامه اثبت كفاءة .. قولت يا سلام
يمكن ماما عندها حق
والواد اهو طلع بيفهم .. وفعلا قعدت
معاه قاعدة بعد البوست بيوم
القاعدة كانت الساعة 6 المغرب..
ومشي وانا على كلمة واحدة
ماخدوش يا بابا ماخدوش يا ماما


وماما وبابا لا حياة لمن تنادي
انت كبرتي ولازم تتنيلي وتجوزي
وطبعا الكلام اللوز بتاع الاهل بقى
نفسي افرح بيك قبل ما اموت
نفسي اشيل عيالك واطمن عليك قبل ما اموت
هو انت مستخسرة الفرحة فينا


وهم في رحلة الاقناع ديه.. اتصلت خالتي
وقالت ابن خال ماما
شاب في ريعان شبابه .. 30 سنة
مااااااااااااااااات

يالهوي .. لا حول الله
يا ماما يا بابا .. الواد ده بومة .. وفقر



ماما وبابا ما اقتنعوش .. وقالوا كده حرام
الواد مناسب.. وعنده وشغال....
وعدت ايام العزاء .. وفي اليوم التالت اجبرت اني استقبله
في البيت .. علشان يعزي ماما وبابا
قعد نص ساعة .. وفي الدقيقة 40 من وصوله

خالتي اتصلت؟؟؟؟!!!وقالت...
اخت مرات خالي .. ست في ريعان
شبابها40 سنة وزي الفل
ماااااااااااااااااااااااتت


قومت قايمة .. جري على اوطتي استخبيت
لا بركاته توصلني واموت وانا قاعدة
:S

ده ايه العريس الدمار الشامل ده؟؟!
دخل عمل ابادة جماعية للعيلة خلال 72 ساعة
اتنين راحوا كده .. في تلت ايام
يالهوووي.. امال لو طول شوية


يعني ده اتجوزه .. ويوم الصباحية الناس
تقرا عليا الفاتحة؟؟

وطبعا بعد ما ماما وبابا كانوا بيقولوا حرام اقول فقر

قالوا .. ده الحرام إنه يزورنا تاني اصلا :))

الزيارتين .. بركاته طالت القرايب من الدرجة التالتة
يعني بعد الخطوبة الضحايا.. هاتبقى الدرجة التانية
وبعد كتب الكتاب طبعا هايبقوا الدرجة الاولى
وفي الصباحية اكيد انا الضحية.
:((


فين حقوق الانسان يا بشر؟؟؟؟؟
فين امريكا تيجي .. مش ده برضو
يصنف عريس محرم دوليا؟؟!


يعني اتنين تلاتة منه.. يزورا اسرائيل
ونخلص منها خلال اسبوع.

الواد ده اكيد.. جرثومي او نووي
يمكن يطلع فسفوري كمان.

انا بعتذر لحركة 6 ابريل
العيب مش فيكم صدقوني.. العيب فيه
هو عرف يوم الغضب مني
واول ضحية لبركاته.. كانت يوم الغضب

يلا الحمد لله اني.. خلصت منه
قبل ما يخلص على العيلة.
D:

12 أبريل 2009

مبسوطة اني عااااااااااانس



انا زهقت وقرفت بجد من ام الاسطونة اللي
بسمعها مليون مرة في اليوم

من ماما وخالاتي من تيته من صحباتي
المتجوزين واللي مش متجوزين حاجة تزهق

جالي عريس من فترة .. عادي يعني مانا طول
عمري بيجي ليا عرسان مش عجبه يعني

بس المرة دية الكلام بقى اوفر اوي بجد ..
خلاص مش قادرة
ماما ليل ونهار .. قايمة نايمة .. تقوللي

حرام عليكي شبابك بيضيع
ياااالهوي ياني يامه .. بيضيع ازاي بقى

كل يوم بترفضي عرسان ومش حاسة بالمصيبة ..
مصيبة ايه يا مامتشي؟؟!!


ان عمرك بقى 25 سنة وزيادة
انن ااااااااان تش ..

طيب وده الدوا بتاعه عضل ولا وريد؟؟
تابلت ولا
شرب؟؟!.. خيبة لا يكون العمر الوحش
الشر بره وبعيد عليا

والله العظيم حرااااااااااام ..
ايه يعني 25 سنة ؟؟!!



ركبت طقم سنان ؟؟!!
والله العظيم ما خلعت درس

لبست نضرة قعر كوباية؟؟!!
اقسم بالله نظري 6/6

ماشية بعكاز؟؟!!
زي القردة والله العظيم

كرمشت وشبت؟؟!!
ابسلوتلي نوهاااااااائي

طيب ماله بقى عمر ال25 ده؟؟
ده انا لسه في عزي يا نااااااااس

يا بنتي حرام عليكي..
شوفتي السنة اللي فاتت جالك كام واحد؟؟

ما بعدش يا ماما .. العدد في الليمون كبري دماغك

لا بس انا بقى بعد يا فالحة
واحد في فبراير.. وواحد في ابريل
واحد في يوليو .. وواحد في سبتمبر
واتنين في عين العدو في نوفمبر

(دول بتوع 2008 بس)
عااااااااااا

طيب يا ماما ديه حاجة مبشرة جدا اهو.. مالك بقى؟؟!
انتي هاتهزري يا خبتي الناقعة..
انتي مش حاسة ولا بتستهبلي؟؟!


والله ماحسة بحاجة؟؟!.. ايه فيه ايه؟!
من نوفمبر 2008 لاخر مارس 2009 مافيش غير العريس ده اللي جه!

طيب وده خطر يا ماما يعني؟؟ انا كده دخلت مرحلة الخطر؟!!
يعني كده خلاص لازم نضحي بالام علشان الجنين يعيش


مش مكسوفة من نفسك وانتى طول الباب كده؟؟
الله ديه عقدة بقى علشان اطول منك!

جتك خيبة وانا قدك كنتي انتى واخواتك معايا
الزمان يا ماما بيختلف.. هو زماننا زي زمانكم
ثم ان ده قسمة ونصيب


اتوكسي يا خبية عمري.. ماكل صحابك اتجوزوا وخلفوا اهم!
مهم علشان بيتجوزوا وخلاص.. ولو كنت عايزة كده
كان زمان عندي اورطت عيال
لكن انا على جثتي


ااااااااااااااااااااه
(ديه ماما عضتني على فكرة)

هو حرام اني استنى الشخصية اللي تفهمني؟؟!!
حرام اني اقول يا واحد اعيش معاه
مبسوطة مرتاحة يا بلاش جواز؟!



يعني ايه اتجوز واحد
مش فاكرة اسمه احمد ولا محمد؟؟!!
يعني اتجوز واحد
مش فاهمني؟؟!
يعني ايه اتجوز واحد
مافيش بينا اي عامل مشترك؟؟!
يعني اتجوز واحد
علشان الناس ما تقولش عانس؟!

طيب انا بقى عااااااانس
وهافضل عايشة لوحدي كده
زي قرد قطع زي ما ماما بتقول


ومش هاتجوز ابدااااااااااااااا

الا الانسان اللي اوافق عليه
بعقلي وقلبي سوا


انسان يفهمني وافهمه
نفهم بعض يا ناااااااس

انسان يحترمني ويقدر دماغي
قبل يفكر في جسمي

حد يقول لامي تحل
عن نفووووووووخي

بدل ما اولع في المدونة بتااااعتي
وكل المدونات الصديقة

عااااااااااااااااااااااااااااا
:"(

05 أبريل 2009

صورة وتعليق.. عقدة بعيد عنكم!!



أجلس طريح الأرض, والمقعد مني قريب
فلقد تعلمت الدرس, الـمـقـعَـد حكر على شخص وحيد
لا يجوز الجلس أو النبس, إلا لغالي هــوَّ سيدي الرئيس

28 مارس 2009

خبرين.. اعتذار.. تاج


اولا.. خبرين حلوين أوي
أنتصار تامر مبروك على شركة تراست الحمد لله
افتاح مجلة رؤية.. هي صحيح لسه صغننه بس بكره ان شاء الله هاتكبر
انا مشاركة فيها بخبرين عن الفنانين
(
ابقوا شوفهم بقى)

ثانيا.. عارفة اني مقصرة في حقكم كلكم واحد واحد
بس والله غصب عني, بقالي فترة طويلة مشغولة ويارب تخلص بقى
بس أنا صلحت النت تاني في البيت.. وهادخل لكم من البيت في الليل واخره
محدش يزعل مني علشان زياراتي قلت
ولا حد يزعل عشلان بتأخر في الرد على التعليقات
انا بحبكم كلكم.. وان كان عليا عايزة الزق في مدونتكم ليل نهار


ثالثا.. عم أحمد أبو العلا دبسني في تااااااج
وانا اول مرة ادبس في تاج.. طبعا ميرسي يا احمد

ويارب اكون ضيفة خفيفة على اللي مرر التاج لاحمد
واظن انها الجميلة كفاية طيبة




اسمك؟
رحاب.. يلا انشالله ماحد حوش

المشهور بيه وسط اصحابك؟
اصحابي او زمايلي اللي في الشغل..
RoRaZ
اصحابي اللي بره الشغل..
Reeka


سنك؟
فتافيت ربع قرن.. هايبقى قد ايه ..
ربع قرن والعوض على الله s:

مجال دارستك؟
الإعلام.. إذاعة وتليفزيون
الست المذيعة يعني


اسم مدونتك؟
فتافيت ربع قرن,, ليه بقى علشان الاسم عجبني
اكمان انا حاسة ان الدنيا فتافيت كتير اوي اتجمعت مع بعض عملت الدنيا
زي كده وصف المدونة بتاعتي ماهو بيقول
هي الحياة ايه غير شوية فتافيت فوق بعض؟!
بس كده ده كل الموضوع


صورتك الرمزية فى المدونة بتعبر عن ايه؟
انا بعشق العيون.. وبحب اوي صور البنات الملثمة
بحس فيها بغموض وسحر وجمال

هل فكرت فى اغلاق المدونة ؟ والسبب؟
لا لسه ما وصلتش لكده.. انا بقالي بس شهرين في التدوين
الله اعلم بكره فيه ايه.. بس انا بحبها وماقدرش استغنى عنها بجد


ايه رد فعلك لو حد قل ادبه فى تعليق ؟
هههههههههههه.. لو الكلام فيه وقح واباحي هاحذفه
لكن لو الكلام مجرد قلة ذوق وقلة ادب في الاسلوب
هارد عليه.. وممكن كمان اضحك الناس عليه
بس من غير ما اقل ادبي


اسوأ مدونه؟
المدونات كلها اللي
ضد الحجاب والنقاب
ومدونات
التنصير والمرتدين
كمان مدونة واحدة مش هاكتب اسمها.. ربنا يهديها بقى

هيحصل ايه للايميل بعد ماتموت؟
ها يتيتم يا قلب امه.. :"(

اديت الباسوورد لحد قبل كدة؟
اها مرة عملتها.. بس غيرت بعد كده الباس ورد
بس الايميل عندي.. مش حاجة مهمة اوي يعني
مافيهوش اسرار اصلا


السفر بالنسبالك ايه؟
انطلاق وحرية.. بموت فيه

الموود بتاعك ايه ؟
انا ماليش مود ثابت.. مودية ومتقلبة
بس التفاؤل والضحك هو اللي غالب عليا


بتعمل ايه فى وقت فراغك ؟
بقرا بكتب.. بلعب مع قطتي


الأكلة المفضلة ؟

القلقاس الأخضر.. الحمام المحمر..
ومحشي ورق العنب.. الكرشة والمومبار..
الاكل الاسياوي.. البيتزا

الصفات التى اخذتها من والدك؟
العصبية.. والنقد الاذع وفيه مقولة كده
بتقول من حق الكبير يدلع
انا اتعلمت من بابا كده برضو :)


الصفات التى اخذتها من والدتك؟
العصبية.. الحاسة السادسة.. وخفة الدم
(ده لو دمي خفيف زي ما بيقولوا)
والرضا باللي ربنا قسمه ليا


اكتر ست حاجات بتكرههم ؟
الكدب
الخيانة
التشاؤم
الحزن
الحزن
الحزن


اكتر ست حاجات بتحبهم ؟
أسرتي
التفاؤل
الأطفال
السفر
الأكل اللذيذ
قطتي



شخصيتك نوعها ايه ؟
توشيبا العربي عاااااااااا
انا عندي تأكيد الذات عالي اوي
مرحة ومتفائلة وفضولية
واقعية وخيالية مع بعض
عقلانية ورومانسية برضو مع بعض
يعنى مجنوووووووووووونة
بضمير مرتاح... :)


لماذا دخلت عالم التدوين من الاساس؟
علشان انا بحب الكتابة جدا.. بالعامية
وده ممنوع في شغلي.. كمان كنت عايزة مكان اقول فيه اللي عايزاه
مش اللي عايزه صاحب الشغل.. او اللي عايزه الناس
انا اقول اللي شيفاه وبس.. ابقى رئيسة جمهورية نفسي
لا حد يقوللي فلان يزعل.. ولا علانة تتضايق


احلى جملة قيلت فى وصف مدونتك؟
أي تعليق بجد بفرح بيه جدا وبيقى غالي جدا
بس طبعا اول تعليق له مذاقه الخاص
كان من مصطفى.. صاحب مدونة تكوين


اهمية التعليقات بالنسبالك؟
ايه فايدة اغنية حلوة.. لو ملاقتش اللي يسمعها
التعلقات هي الفيد باك بتاعي .. اللي بحس بيها اني عملت حاجة
كلمة الله لما بتتقال ليا.. بفرح بيها اوي
وكمان لما بيكون فيه نقد بناء.. بيسعدني جدا

احلى بوست كتبته؟ ضع اللينك ثم اذكر لماذا؟
فتفوتة استثنائية عن غزة الأبية
كان بيقول الحقايق في وقت ناس كتير مش فاهمة حاجة
كمان علشان تامر دياب كان اول مرة في حياته يبقى
اول تعليق وكان فرحان بكده عااااااااااا


افضل مدونة قرأتها؟
كتير جدا طبعا.. بس انا عندي زهيمر
هاقول كمان الاسماء بتاعة المدونين مش المدونة
بس محدش يزعل مني بجد.. والله هاعصر مخي على قد مقدر

تامر دياب
ستيته حسب الله الحمش
احمد ابو العلا
تامر علي
همس اليل
د. عرفة

عاشقة وغلبانة
عاشقة الرومانسية
مسدس صغير
كاتب مصري
ادم المصري
احساس لسه حي

حسام غانم
ايوشة
صفاء
المعتصم
نبض الحياة
حياتي نغم
اسافوووو
بحر الدموع
شباك موارب
بنوتة
غروبتي
بندقة
حاسوبايته
زوجة عنيدة
الفقيرة لله ام البنات
لورانس العرب
che
lady E
elsha3er
Soul.o0o.Whisper
mosfa
MǿиY El-Shreef
سحساوي
كفاية طيبة
كيارا
ريمان
ايمان
محمد غالية
البنت المشميشية
محمد ابراهيم
م/ علي دوريش
لوجين ابو الدهب
سوووووو
تامر نبيل
صمت المشاعر
القدر وأنا
امبارح كان عمري عشرين
فشكول
أبو العريف


يامرك يا فتافيت.. مش فاكرة الباقي :(
اللي ما قولتش اسمه حقه على راسي
والله عماله اعصر في دماغي
بس انا بحبكم كلكم والله


افضل بوست قرأته؟
العبر والدروس في أصول البحث عن العريس والعروس
للمبدع الجميل تامر علي.. بتاع الجلاش
الضحك اللي ضحكته في البوست ده.. عمري ما ضحكته في حياتي
بجد مووووت من الضحك وعزة جلال الله..
كمان بيناقش بجد قضية فظيعة
الطلبات العجيبة اللي بقيت عند الرجالة
(مجازا) في زوجات المستقبل...



الشغل بالنسبالك ايه؟
شغل.. واحيانا مضيعة للوقت
وكتير يعععععععععع :(


الانترنت بالنسبالك ايه ؟
حيااااااااتي.. انا باكل وبشرب
وبقعد على النت


تمرر التاج ده لمين ؟
احمد مرر لناس كنت هامرر لهم التاج
فانا هامرره لاول 5 اشخاص
هايعلقوا على البوست ده..
بس بشرط ما يكونش اتمرر لهم قبل كده
يعني ممكن يا حلو تبقى التعليق رقم 50 وتكون
ضمن اللي هايدبسوا قصدي هايجابوا التاج
وكل واحد يقول جاوبه ولا لا..

واحساس لسه حي .. ده اجباري هايجاوب
والله لو اتمرر له 100 مرة قبل
كده.. ليه بقى مزاجي

:))





21 مارس 2009

حبـــك يا مــــامـــــا.....

حاولت كتير أكتب حاجة.. ملاقتش كلام أقوله بجد
صعب جدا حد يوصف حبه لأمه بسهولة.. بس حاولت


مـــــــامــــــا....

مش عارف اوصف احساسي مهما فضلت اقول واعيد
اصل حبـــــك مش حب عادي ده كل يوم جوايـــا بيزيد
حبــــــك يا أمي زلزل كيــاني رغم انه قوي وشــديــــد
حبــــــك اسر قلبي وحيـــاتي مع ان قلبي صعب وعنيد


مـــــــامــــــا....

عارفة بحبـــك قد ايه يــا اغلى من عمري انــا؟؟
حبـــــــك في حياتي تـــلاقيه ســر فرحي والهنــــا
حـــب فتحت عيني عليه وعلمني معنى الرضـــــا
و يوم مـا جرحي يناديه يبقى جنبي حضــــن ودوا


مـــــــامــــــا....

يا أول كلمة نطقها لساني قبل ما يعرف معنى الكلام
يا نعمــــة ربي ادهالي تملى عمري حــب وســــــلام
يا شمعة على نورها انا ماشية تمحي بدروبي الظلام
يا ملاك مهما شاف مني عمره ما عاتب بكلمة مــلام

مـــــــامــــــا....

ربي يخليـــــكِ ليـــا ... يا وصية مســـك الختــــام