29 يناير 2009

فتافيت مش مسئولة عن ضحايا قطار الطلقة



كانت عندي جولة حول العالم من ربع ساعة كدا.. أخدت الطيارة الخصوصي بتاعتي.. اللي أسرع من الضوء.. وشوية في أمريكا على حبه في فرنسا.. وبعدين قولت أعدي على روسيا اسلم على بوتين معرفش عنه حاجة من زمان.. وهناك لاقيت الصين زعلانة أوي إني ماعدتش عليها يجي من 4 ايام كدا.. وأنا في الصين قولت عيب أبقى هناك وما أعديش على اليابان.. أهي ثقافة برضو لما أعرف معلومة من هنا على معلومة من هناك.. علشان لما أجي أفتفت تبقى فتفتة ذات قيمة (معلش الفصحى بتنقح ساعات)..
طبعا كل واحد فيكم بيقول شكلك كدا فشارة وعمالة تسرحي بينا.. والله يا جماعة ما فشارة ولا بسرح بيكم (هو انتم عربية فول هاسرح بيها).. أن فعلا خدت الطيارة بتاعتي وكلكم عندكم طيارة زيها.. أي والله كل واحد بيقرا البوست ده عنده زيها.. أستنى يا عم بتبص فوق السطوح ليه؟؟ .. هو أنا قولت راكنها فوق السطوح.. الطيارة ديه هي جوجل العظيم.
المهم وأنا في الجولة اليابانية الجوجلية وقعت تحت إيدي حتة فتوفتة عجب والله.. وهي الأخ المحروس (قطار الطلقة)..


هتقولوا قديمة بقى وشكلك وحش وكلنا عارفين الأستاذ الماصون بتاع الطلقة.
ولو تستنوا عليا ويصبر القاتل على المقتول كان والله إتأندل مات لوحده ولا كان بقى مقتول ولا القاتل أتنش إعدام وضاع مستقبله وولاده بقوا شحاتين وزادت اولاد الشوارع بودلا الاخ قاتل ده.. يلهوي نسيت كنت عايزة أقول إيه.... أيوة قطارة... قطارة ايه يا منيلة قطار الطلقة ده بقى أتسمى قطار الطلقة ليه؟؟ .. قال إيه علشان يقدر يتحرك من العاصمة طوكيو ويوصل للعاصمة القديمة كيوتو بسرعة طلقة الرصاص.. ومش عايزة أي حد يبص له بعين صفرة ولا مدورة.. ليولع زي قطار الصعيد بتاعنا اللي بيوصل بسروعة السلحفاة اللي عندها شلل أطفال وداخلة سباق تسلق الجبال.
حد يقوللي ما يمكن المسافة صغيرة.. وبيشتغلوا نفسهم إنه سريع.. هاقوله والنبي تسكوت بقى قال المسافة صغيرة قال.. انت عارف المسافة بينهم كام.. بص للخريطة كدا


اهي الاستاذة كيوتو في مكان النقطة الفوشية الامورة ديه تقريبا يعني.. ولو جبت سيادتك خريطة لمصر بنفس مقايس الخريطة ديه.. هتلاقي المسافة بين طوكيو وكيوتو تزيد عن المسافة بين القاهرة والمنيا.. والنبي المنيا.. أيوة المينا عروس الصعيد..ومش عايزة اسمع لا شهقة ولا خبط على الصدر.. خلينا شعب راقي ومتحضر عيب كدا ومالو يعني لما يوصل من القاهرة للمنيا بسرعة الطلقة فيها حاجة دية؟؟.. وجتنا نيلة في حظنا الهباب.
المهم مش ده برضه اللي فتفوتي تتبلور (عارف تتبلور يعني ايه؟ اصلي بسمعها من زمان) حوله.. الفتفوتة بقى إن وأنا واخدة طيارتي الجوجلية وطايرة فوق اليابان وقع تحت إيدي مقال بتاع محمد السلماوي.. وبيحكي بقى عن حاجة فظيعة.
تحذير قبل قراءة باقي الفتفوتة:

اللي عنده ضغط يقوم يروح .. واللي عنده السكر ياخد حقنة انسولين فورا .. واللي وحيد أمه وأبوه يمشي لأني أخاف عليه من الشلل.. فتافيت لا تتحمل مسؤولية إي أصابة بسبب باقي الفتفوتة.. إنتهى التحذير


المقال بقى بيقول إيه قال خير الله ما يجعلوه خير.. وياليل بحسبك نهار.. سنة 1999 كان محمد السلماوي في اليابان وكان واقف في محطة القطار.. بتاع الطلقة ده ومعاه واحد صحبه ياباني وعنيه ضيقة (مهي لازم تكون ضيقة امال ياباني إزاي).. وبعدين الأخ أبو عنين ضيقة قاله إننا هانركب في العربية الخضرة.. أصل عقبال أملاتكم في القطار ده مافيش درجة أولى وتانية وسيبنسة.. لا فيه عربية حضرة وحمرة وصفرة .. وقام قايله لازم نقف في مكان اللي بتقف فيه العربية الخضرة(ويا عيني علينا في مصر القطارمن دول يجري ونجري وراه علشان نلحق باب العربية اللي هانتشعبط فيها وبعد الجري والشعبطة والذي منه القطار يولع بينا).. المهم راحوا عند مكان العربية الخضرة والقطار جه ووقف في المكان (وسبحان الله قادر على كل شيء)..
وكان محمد السلماوي واقف بعيد عن باب العربية بحوالي 5سم.. فقال لصاحبه ابو عنين ضيقة و(بيهرج والنبي ماقصده حاجة).. إزاي القطار يقف بعيد عني كدا وبيضحك.. قوم إيه بقى صاحبه أبو عنين ضيقة وشه احمر واخضر واصفر بألوان القطار.. وفضل يعتذر لمحمد السلماوي.. قال إيه علشان القطار وقف وباب العربية كان بعيد عنه ب5سم.. وعلى مدار 3 ساعات كل مسئولين المحطة جم يعتذروا له (إي والله مسئولين واعتذروا يابان بقى عقبال املاتكم) ويأكدوا إن الغلطة ديه.. لا يمكن تحصل تاني ابدا وحقك عليا ماتزعلش.. إيوه أه.
محمد السلماوي بعد ما فاق من الصدمة واللي حصل وركب القطار اللي جه ووقف قصاده فعلا بالتنتوفة.. قال لصاحبه انا كنت بهرج.. ده شيء ممكن يحصل في كل الدنيا.. قام صحبه ابو عنين ضيقة قاله ايه بقى.. ولكنه لا يحدث في اليابان (أنن أان تششششششششش).
وبلا وكسة علينا منقوعة في ويبة.. لان الكلام ده من 10 سنين فاتوا.. واحنا لسه بنجري ورا القطار.. ونتشعلق في السيبنسة.. والقطورات تولع بينا.. وقطورات تطلع بره القضبان وتمشي مع الناس.. ولما ربنا كرمانا ولاقينا حل لحوادث القطار .. (كان التكتوك هو الحل)... وعجبي
وحسبي الله ونعم الوكيل فيك يا ابو عنين ضيقة ياللي ضيقت الدنيا في وشي وعرفت بسببك انه مافيش فايدة .. مافيش فايدة مافيش فااااااااااااااااااايدة.. (وكلامك درر يا سعد يا خويا والنبي)

فتافيت تطلب إحصائية بعدد ضحايا الفتوفته ديه (الوحشين اللي ما سمعوش الكلام وعملوا بالتحذير).. كام واحد جاله شلل وكام واحد جاله ضغط وكام واحد جاله سكر.. ولو فيه وفيات.. ياريت الورثة يقولولنا.. علشان ناخد تعويض من الواد ابو عنين ضيقة اللي كان مع محمد السلماوي.

24 يناير 2009

الست نعامة.. أسفة ليكِ يا أختي.

انهاردة هاتكلم عن فتفوتة عن جملة.. كلنا عارفنها كويس.. ويمكن مافيش حد فينا ما أستعملش الجملة ديه في كلامه.. وبجد فيها ظلم فظيع وجهل أفظع.. وتحس إن اللي بيقول الجملة ديه مش فاهم حاجة خالص.. وحتى خايف يشغل مخه.. لا يفهم لا سمح الله.


(زي النعامة .. بتدفن راسك في الرمل)








بزمتكم .. مين فيكم ماقلش الجملة دية في كلامه ولو مرة واحدة؟؟.. مين فيكم ما أتهمش حد إنه زي النعامة بيدفن راسه في الرمل؟؟.. مين فيكم ما أستعملش الجملة دية علشان يوصف حد بالغباء أو السلبية؟؟

والحقيقة بقى.. إن الست نعامة حفظها الله.. عمرها ما دفنت راسها في الرمل أبداً.. وياعيني عليك يا أختي يا نعامة مظلومة والله طول عمرك.
النعامة يا سادة بتحط راسها بس على الرمل.. علشان تسمع صوت الرياح.. وتحاول تحدد إتجاها وبعد كدا تبدأ تحدد هاتعمل إيه؟؟ وإيه الإتجاه الأمثل علشان تتحرك بسهولة.
ولا عمرها دفنت راسها لا في رمل ولا حتى تراب.. أصل بالعقل كدا لو دفنت راسها في الرمل.. هاتتخنق وتفطس.. وتبقى كدا الست نعامة بتنتحر والمفروض بقى إنها تكون إنقرض من زمان أوي.
لكن سبحان الله.. إظاهر إن اللي إنقرض هو عقل الناس وفهمها.. عمالة تقول النعامة بتدفن راسها.. وأوعى تعمل زي النعامة الكوخة وتدفن راسك في الرمل.. والنعامة بريئة من كل الإتهامات دية.
النعامة مثال رئع كلنا المفروض نقلده.. قبل ما نعمل إي خطوة أو ناخد أي قرار لازم ندرسه كويس.. ونشوف فين إتجاه الخطر.. علشان ما نروحش ليه برجلينا.. مش نتهامها بالغباء.
الغباء والسلبية صفة بشرية.. إي كائن حي تاني برئ منها.. لأن ببساطة ربنا سبحانه وتعالى.. خلق الإنسان وكرمه بالعقل وفضله به عن باقي الكائنات الحية.. وبما إن العقل عند البشر بس.. يبقى الغباء عند البشر بس.
كمان السلبية ديه بتاعتنا إحنا بني الشر.. عمرك شوفت كائن حي ممكن يفضل واقف يتفرج على الخطر جاي نحيته ويقف ساكت (ويدفن راسه في الرمل).. طبعا لا.. كل الكائنات إيجابية بالفطرة اللي ربنا فطرهم عليها.. ده كفايا إن أول درس الإنسان أتعلمه.. كان من غراب.
إحنا يا سادة لو كنا بصينا للنعامة بنظرة إيجابية.. كنا أتعلمنا منها كتير.. كنا بقى حالنا أحسن من كدا.. كنا عرفنا الخطر جاي منين.. مش ندفن راسنا في الرمل.. ونقول معاهدات سلام.. نقول اتفاقيات لازم نلتزم بها.. يارتنا كنا نعام.
يا نعامة هانم .. أسفة يا ستي على ظلمك من بني جنسي.. أسفة على إتهامك بالزور.. ومين عالم مش يمكن تكوني بتقوللي للنعامات صحباتك...
(بلاش تبقوا زي العرب.. وتدفنوا راسكوا في الطين.)

23 يناير 2009

في بيتنا مدونة

أنا بفكر في موضوع إني أعمل مدونة من شهر ديسمبر 2008.. وكنت كل ما خلاص هاعملها.. يحصل حاجة تعطلني وتاخد تفكيري كله.. مرة منتظر الزيدي.. ومرة محرقة غزة..المهم إني بعد ما عرفت إن خلاص فيه قرار وقف إطلاق النار لاح في الأوفق (حلوة لاح ديه).. قررت إن أعمل المدونة بقى..
والغريب إني كنت كل ما أفكر في اسم لها.. ملاقيش اسم يجي في دماغي.. لكن أول ما خلاص نشأتها.. لاقتني بكتب الاسم من غير تفكير فيه.. سبحان الله زي المولود اللي أهله.. يفضلوا يدوروا على اسم ليه.. ومجرد من إنه يتولد.. تحس إن اسمه مرسوم على وشه.
المهم عملتها وخلاص بقى عندي مدونة، قولت هاكتب فيها يوم 20 يناير، علشان يكون أول سطر فيها مكتوب، على روح المفقود بلا رجعة بعون الله ، الغيرمأسوف عليه بوش، بس قولت لازم أقول لهم في البيت الأول إني عندي مدونة، يعني بقى التربية والأخلاق الحميدة نقحت عليا.. لازم أقول أقبل معمل.. معملش وأحطهم قدام الأمر الواقع.. أتربيت على كدا.. وفي الحالتين هي نتيجة واحدة.. إني هاعمل!!

يوم 20 يناير.. حاولت أفجر القنبلة في البيت (إني عملت مدونة).. بعد تفكير طويل ومرير وشرير.. قررت إن مافيش مفر مهو لو ماقولتش انهاردة هايضيع يوم 20 يناير مني.. فنقطع عرق بقى ونسيح دمه.. وأقول عملت مدونة.. وزي ما تيجي بقى. كنت متخيلة إنه مجرد عرق هاسيح دمه.. لكن طلع إني هاعوم في دمه وإحتمال اخد غطس كمان.. أول ما قولت عملت مدونة.. بابا ساب مودرن سبورت وباص ليا.. وماما طلعت من المطبخ.. واخواتي جم.. وبقت هيصة فكرتني بيوم ما أخدت الليسانس.. وجيت قولت نجحت.
*بابا قال مدونة أنت أتجننتي؟؟ أنت عارفة نتيجة اللي عملتيه ده إيه؟؟.. (حسيت إني قولت ضربت ورقة عرفي مثلاً ..)
*مالها يا بابا المدونة؟؟.. هي مخالفة للشريعة.. ولا هتضيع الدعم من عندنا؟؟ نورني إلهي ينورها في وشك دنيا وآخرة.
*المدونة يا هانم.. يعني وجع دماغ إحنا مش قده.. مش كفايه الفيس بوك وساكت!!
*يا بابا ماله بس الفيس بوك.. ده حتى الحاج بوك مربي إبنه الفيس أحسن تربيه.
*ماهو ده اللي أنت فالحة فيه.. مافيش مدونة.. مش ناقصين احنا بلاوي.
*الله بلاوي وأتجننت.. هو فيه إيه ديه مدونة.. وعلى النت.. يعني تسالي يا لب.
*أيوة مهي بتدأ كدا .. وتخلص في آمن.....
*لا إله إلا الله.. ليه بس كدا.. ديه حتى اسمها فتافيت ربع قرن.. يعني حاجة مسمسمة خالص .
طالع وقتها أخويا اللي مايجيش طول ركبي.. وقام ناطط قصادي وقاللي:
*فتافيت بتاع الأكل..
(ساعتها باصيت له كدا وقامت دماغي منورة بلمبة كبيرة من اللي بتجيب حر ديه.. وعرفت ليه أنا سمتها فتافيت ربع قرن.. أتاري وقت ما كنت بعملها كنت جعانة.. قام اللاوعي بتاعي.. نقح على المحروس الوعي بتاعي.. وكانت الناتيجة فتافيت..)
* آآآآآآآآه..
بس مش آه يعني هي فاتفيت بتاع الأكل لا.. ديه آه دالة على وجع وآلم.. الواد داس على رجلي بالكوتشي بتاعه لأنه يا عين أمه عمال يعيد ويزيد في السؤال.. وأنا واخدة اللاوعي بتاعي جاولة.. وسيبابه يرن لحد ما ريقه نشف.
* لا يا روحي ديه فتافيت تانية..
قام المحروس بقى أخوي اللي أكبر منه.. قال:
* آه فتافيت مستقبلك اللي هايضيع يا مفتفتة...(طيب ليه كدا بقى.. يعني لما صدقت بابا يسكوت تطلع أنت؟؟)
*ليه يا عبقرينو زمانك مستقبلي هايضيع؟؟ حد قالك إني هاسيب شغلي وأكل عيشي وأقعد ليل ونهار أفتفت عليها.
*لا يا قطة.. هو أنت عايشة في مية البطيخ ولا بتعيشها عليا.؟؟.. اكيد عارفة فلان اللي كل يوم مسحوب ومسحول علشان مدونته.. ولا البت اللي اتسحلت علشان مدونتها.. ولا.....
*ايه يا عمنا.. حد قالك إني هاقول شكل للبيع.. ده مجرد تدوين لايت هاعمله كدا.. نقطنا بسكتاك بس أنت وهي تعمر.
وأتاري النقوط جاي من ماما مش من سكوته.. وكان النقوط مميز جدا بصراحة.. لأنه كلام وتعبيرات وموسيقى تصوريه بالكابشة اللي في إيديها.. وكانت هي كمان بتنقط ملوخية (أصل عقبال أملاتكم هاناكل ملوخية بالبط) وأسمع أجدع سلام لماما اللي هاتنقط مدوتنا هي وكابشتها.. ماما قالت:
*حرام عليكي مش كفايا إنك موقفة حالك وماتجوزتيش لحد دلوقتي.. كمان عايزة تتحبسي
*ليه يا حبيبتي كدا.. هو انت كل كلامك يلف يلف ويجي يركن في باركينج الجواز.. وبعدين اتحبس ايه بس.. ألحقي بس الملوخية اللي على النار.
*تتحبسي انت اتجننتي؟؟.. انت عارفة ده نتيجته ايه؟؟
يادي الخيبة عليا.. بابا طلع على المسرح تاني.. ورجعنا تاني لنقطة البادية.. وكان أخويا التالت لسه جاي من الجامعة.. وشكله شال آته في امتحانه. قولت ألحق نفسي بقى قبل ما الموضوع يكبر.. ويطلع هو كمان كبت الامتحان عليا.. وكل سؤال سابه يسيب به علامة للذكرى في وشي.
*بص يا بابا .. أنا عملت المدونة خلاص.. وأوعدكم إنها هاتكون مدونة.. من غير جر شكل.. وهامشي جنب الحيط.. بس قولوا يارب يكون الحديد لسه مهاود علشان أبني الحيط.. اللي هامشي جنبه.
*شوفتي أول القصيدة حديد.. مافيش مدونة يعني مافيش مدونة.. ديه أخر كلمة هاقولها.
*باااااااباااااا.. أنا عملت المدونة.
*خلاص علشان بس عملتيها.. لكن تقوللي أعمل واحدة تاني.. ده لايمكن أبداً.
وأخيراً....... في بيتنا مدونة.. بس كان طار يوم 20 يناير.