12 فبراير 2012

كنت أعلــم،،!





عندما استسلمت لحبك،،
كنت على يقين ،،  بأني أخطو على حد الخنجر،،
وأني قد ألقى شهيدة على أعتاب الهوى بأية لحظة،،
وقد يُسجن عشقي ويسلسل ،،!


كنت أعلــم،،
أن حبك سيشعل فتيل الفتنة بين قلبي وعقلي،،
وأن مدينتي ستُحرق،، كنت أعلــم،،
أني سأقمع،، وسأعذب،،
لأقلع عن عشقك،،!

كنت أعلــم،،
أن أيامي لن تقبل،، وأن أحزاني لن تقبل،،
وأن الأسود الذي أعتقل ألوان الطيف،،
عن أحلامي لن يـــرحل،،!

وبرغم كل ما اعلم،،
أعلنتها بكل ميادين الهوى،،
أني أحبـــك،،،،
أحبـــــك،، أحبــــك،،
فبعض الأحــزان المؤجلة تكبــــر،،
وأغلب الأفراح المؤجلة تقتل!

أعلنتها،، بصدر عاري،،
وكف أعزل،، ويقين بالنصر،،
فسئمت روحي،، دولة الحزن،،
وسياط الوحدة،، ودبيب الآلم والجرح،،
وألحدت أنا بطقوس الدمــع،،
فلقد أعلنت مع حبك،، أني حطمت بمدينتي
أخـــر أصنــام الصمـــت!

12-2-12

09 فبراير 2012

عيد ميلاد طفلة،،!


يمكن ما كتبتش قبل كده عن عيد ميلادي،،
بس قررت أكتب المرة دي،، هو مش احتفالا به يعني،،
لكن عشان افتكر إني كبرت بقى،، وإن بقى عندي 28 سنة،،
أيوة بجد،،، أنا محتاجة أفتكر!!



مهي مشكلة حياتي،، إني مش فاكرة ولا حاسة بعمري بقى قد إيه!
يعني لما بقف قصاد المراية،، ما بحسش بتغير اصلا،،
عن ما كنت بقف وأنا عندي 10 سنين،، تخيلوا بقى؟!!
آه يمكن طولت،، تخنت،، بس مش حاسة بتغير!


مهو مستحيل أحس بعمري،، وأنا لسه بنط من الكنبة للكرسي في الصالة،،
وبخض ماما وهي طالعة من المطبخ،، وكل مرة بتتخض!

أنا لسه بفرح لما أشتري حاجة جديدة،، وما بيجليش نوم ليلة العيد،،
ولازم لازم،، أستحمى يوم الواقفة!

لسه بحب ألاعب المطر بأيديا،، وأجري أنزل الشارع لما يشتد،،
وفي أسوء الأحوال أطلع فوق السطح،، وأرفع راسي لفوق
أحضن المطر بعينيا،،!!!

لسه بحب المصاصة،، وأفرح أوي لو ماما حمرت لي بطاطس
صوابع رفيعة،، وبحب أعمل بلونة كبيرة باللبان،،
وتفرقع في وشي وشعري!!

لسه بصرخ من الصورصار،، واستخبى من النموسة،،
ولسه بحط للنمل سكر،، عشان ما يقرصنيش!

لسه بشخبط على الحيطة،، وأرسم على الملاية،،
وبقطع المناديل حتت نونو على السجادة!

لسه بضحك لحد ما أعيط،، وأعيط لما أعوز حاجة وما تحصلش،،
وأعمل نفسي غضبانة على الأكل،، عشان ينفذوا اللي عايزاه!

لسه باكل اللب بقشره ساعات،، وأحب أبلع بذر البرقوق
وأعشق طعم مرقة الدجاج (المكعبات)،،!

لسه ما بعرفش أكل أو أشرب حاجة لسه سخنة،،
ولا أعرف أبلع لقمة كبيرة،، لسه بخلي ماما تسرحلي شعري،،
وتعملي ضيفرة  في أخرها فيونكة!!

لسه بخاف من الوزة والبطة،، وبحب أوي أشد ديل القطط،،
ولسه بجري ورا الفرشات لما بشوفها!

لسه فاكرة إن الناس طيبين،، ولسه بصدق كلامهم،،
لسه فاكرة إن الخير بيكسب فـ الأخر،، والكداب مناخيره بتطول!

لسه جوايا طفلة،، قربت أكرهها
عشان أنا كبرت،، وعايشة وسط الكبار،،
بيغلطوا غلط الكبار،، وبيجرحوا جرح الكبار،،!

لسه جوايا طفلة،، لازم أتخلص منها
عشان أنا فعلا كبيرة،، ولازم أحس إني كبيرة،،
بفكر أحطها،، على باب جامع وأخلص منها،،!

لسه جوايا طفلة،،،
محدش يتبناها،، وينوبه ثواب فيا!

:
موضوع مجدول
ينشر تلقائيا،، قد يكون خارج إطار الأحداث
وقد اكون غادرت الدنيا،،!