09 فبراير 2012

عيد ميلاد طفلة،،!


يمكن ما كتبتش قبل كده عن عيد ميلادي،،
بس قررت أكتب المرة دي،، هو مش احتفالا به يعني،،
لكن عشان افتكر إني كبرت بقى،، وإن بقى عندي 28 سنة،،
أيوة بجد،،، أنا محتاجة أفتكر!!



مهي مشكلة حياتي،، إني مش فاكرة ولا حاسة بعمري بقى قد إيه!
يعني لما بقف قصاد المراية،، ما بحسش بتغير اصلا،،
عن ما كنت بقف وأنا عندي 10 سنين،، تخيلوا بقى؟!!
آه يمكن طولت،، تخنت،، بس مش حاسة بتغير!


مهو مستحيل أحس بعمري،، وأنا لسه بنط من الكنبة للكرسي في الصالة،،
وبخض ماما وهي طالعة من المطبخ،، وكل مرة بتتخض!

أنا لسه بفرح لما أشتري حاجة جديدة،، وما بيجليش نوم ليلة العيد،،
ولازم لازم،، أستحمى يوم الواقفة!

لسه بحب ألاعب المطر بأيديا،، وأجري أنزل الشارع لما يشتد،،
وفي أسوء الأحوال أطلع فوق السطح،، وأرفع راسي لفوق
أحضن المطر بعينيا،،!!!

لسه بحب المصاصة،، وأفرح أوي لو ماما حمرت لي بطاطس
صوابع رفيعة،، وبحب أعمل بلونة كبيرة باللبان،،
وتفرقع في وشي وشعري!!

لسه بصرخ من الصورصار،، واستخبى من النموسة،،
ولسه بحط للنمل سكر،، عشان ما يقرصنيش!

لسه بشخبط على الحيطة،، وأرسم على الملاية،،
وبقطع المناديل حتت نونو على السجادة!

لسه بضحك لحد ما أعيط،، وأعيط لما أعوز حاجة وما تحصلش،،
وأعمل نفسي غضبانة على الأكل،، عشان ينفذوا اللي عايزاه!

لسه باكل اللب بقشره ساعات،، وأحب أبلع بذر البرقوق
وأعشق طعم مرقة الدجاج (المكعبات)،،!

لسه ما بعرفش أكل أو أشرب حاجة لسه سخنة،،
ولا أعرف أبلع لقمة كبيرة،، لسه بخلي ماما تسرحلي شعري،،
وتعملي ضيفرة  في أخرها فيونكة!!

لسه بخاف من الوزة والبطة،، وبحب أوي أشد ديل القطط،،
ولسه بجري ورا الفرشات لما بشوفها!

لسه فاكرة إن الناس طيبين،، ولسه بصدق كلامهم،،
لسه فاكرة إن الخير بيكسب فـ الأخر،، والكداب مناخيره بتطول!

لسه جوايا طفلة،، قربت أكرهها
عشان أنا كبرت،، وعايشة وسط الكبار،،
بيغلطوا غلط الكبار،، وبيجرحوا جرح الكبار،،!

لسه جوايا طفلة،، لازم أتخلص منها
عشان أنا فعلا كبيرة،، ولازم أحس إني كبيرة،،
بفكر أحطها،، على باب جامع وأخلص منها،،!

لسه جوايا طفلة،،،
محدش يتبناها،، وينوبه ثواب فيا!

:
موضوع مجدول
ينشر تلقائيا،، قد يكون خارج إطار الأحداث
وقد اكون غادرت الدنيا،،!



هناك 15 تعليقًا:

  1. لعلمك الخطاء انك متكونيش الطفلة دى الخطاء انك تدورى على حد يتبناها
    وتضيعى المتعة اللى بتحسى بيها وتموتى روح طفلتك اللى جواكى
    رغم كل حاجة بتكبر حوالينا احنا بنموت ساعة ما الطفلة دى تموت

    دمتى بكل خير

    ردحذف
  2. ياااااااااه...
    ده انا على كده كبرت قوووي (';')

    كل سنة وكل ثانية وانت اجمل فتفوتة سكر في الدنيا :)

    ردحذف
  3. الانسان مهما كبر سيظل بداخله طفل حتى وهو على فراش الموت وبيكون احتياجاتنا ونحن فى اواخر عمرنا احتياج طفل طفل بيضيع مننا لما تتغير ملامحنا فى فتره تزيد همومنا واحتياجاتنا لكن بيظل جوانا مستخبى بيظهر ساعات لما بنشتاق اليه او لما تزول احتياجتنا بنرجع اطفال وبيخرج من تانى الطفل اللى جوانا الانسان اتولد طفل وبييعيش جواه طفل وبيموت وهو طفل
    كل سنه وانتى طيبه وعقبال 100 سنه سعاده وراحه بال

    ردحذف
  4. لأ فعلاً لازم الطفلة دى تنضج شوية ..مناديل ايه اللى ترميها على الأرض !! وحيطة ايه اللى تشخبطيها عليها !! عيب كده بجد :)

    كل سنة وانتى طيبة يا رحوبة وعقبال110 سنة وانتى فى سعادة وصحة وهنا :)

    ردحذف
  5. لا إن شاء الله الموضوع هايتنشر وانتي موجوده
    اعطاك الله الصحه والعافيه وطول العمر والعمل الصالح
    وكل سنه وانتي طيبه
    وألعبي يا ستي براحتك وشخبطي على الحيطه والعبي في المطر وكلي اللب بقشره
    هو يعني احنا اخدنا من الجد ايه

    خليك على طبيعتك وبس وسيبك من اي حاجه

    ردحذف
  6. كل سنة وانتي أحلى طفلة :)

    ردحذف
  7. كل سنه وانتى اجمل طفله واكبر طفله واعقل طفله

    انا هدعى حاجه عكس اردتك ممكن تخليكى تدعى عليا

    بس بدعى ربنا يخليلك الطفله اللى جواكى وميحرمكيش منها لانك
    لو اتحرمتى منها هتعرفي احساس الام لما بتفقد ضناها وهتتعبي اوى يمكن هى دى اللى مصبراكى علي حاجات كتير جدآ
    :))

    ردحذف
  8. دى احلى نعمة من ربنا
    طول ما الطفلة دى معاكى هتقدرى ع الدنيا لو سابتك هتتعبى قوى من غيرها
    مازلت وانا فى الثلاثينيات متمسكة بيها جدا وبحاول اراضيها وافرحها علشان تفضل معايا وتهون عليا

    كل سنة وانتى طيبة وعقبال 128 يارب :)

    ردحذف
  9. كل سنة وانتى طيبة
    وربنا يسعدك دايما

    ردحذف
  10. كل سنة وانتي طيبة وأجمل حاجة أن الأنسان يعيش طفل وكلامك رائع خلني أحس بحاجات حلوه كتير

    تحياتي لكي ولكل كلمة كتبتيها

    ردحذف
  11. السلام عليكم ورحمة وبركاته

    الزميل / الزميله المدون
    يدعوك بيت المدونين

    للمشاركه فى مبادرة " المعونه المصريه "
    من خلال مدونتك الكريمه
    المبادره ابتدأها بعض المشايخ المحترمين للرد على تهديد امريكا بقطع المعونه عن مصر
    مع العلم ان هذه المعونه لا تغنى ولا تسمن من جوع فهى دائماً مشروطه ويتم انفاقها على الخبراء الامريكان الذين يتم اشتراط تواجدهم فى المشاريع التى توجه لها المعونه ، بالاضافه الى المحاصيل التى يتم الاشتراط على مصر فيها شراءها من امريكا وأشياء اخرى كثيره لا مجال لحصرها
    فبالتالى كانت هذه المعونه وبالاً على مصر . اقتصادياً وسياسياً وعزة وكرامه

    وقد آن الاوان لوقفها واثبات اننا رجالا لا نمد الايادى لغيرنا

    نريد ان :
    نحيا كراماً

    رابط المبادره على بيت المدونين :

    http://bloggers-house.blogspot.com/2012/02/blog-post_12.html

    رابط المبادره على الفيس هو :


    http://www.facebook.com/events/307332485983060/


    حساب البنك سيتم نشره قريبا
    ان شاء الله

    ردحذف
  12. ربنا يبارك في عمرك يا رحاب يا بلدياتي ، كل عام وانت الى الله اقرب ، وعلى طاعته ادوم ، كل عام وانت في نعمائه تتقلبين وقد اسبغ عليك نعمه ظاهرة وباطنة ، وصب عليك الخير صبا ، ورزقك سعادة الدارين ، كل عام وانت الطفلة البريئة ، محفوظة من كل سوء بحفظ رب العالمين

    ردحذف
  13. مع ان التعليق متأخر بس كل سنة وانتي طيبه

    ردحذف

خلل براحتك من غير انتظار .. فتافيت أصلاً بتحب الخيار