ردي على.. خريف المدونين

(خريف المدونين).. بوست عند أ. تامر علي
وكنت دخلت عند تامر من فترة محترمة..
تكاد تكون في حد ذاتها خريف :)) وعجبني البوست جدا
ولاقيت ان الرد هايطول مني..
فوعدته بإني أرد ببوست عندي أفضل
وهو كمان وعدني إنه يوفي بوعده..
ولن أتنازل عن اللي وعدني بيه
واخدلي بالك يا تامر.. لن أتنازل نوهائي..
ويجعل بيوت المدونين عمار ^_*

أتفق تماما معك في موضوع البوست..
وفعلا مدونات كتير دخلت فصل الخريف بدري..
وللأسف لسه ماجاش عندها ديسمبر :(
بس هاقولك سبب للخريف الدائم ده..
يمكن أنت ما أخدتش بالك منه وهو الفيسبوك..
الفيس سبب قوي لهجر بعض المدونين مودناتهم
لأن مردوده أسرع..
الفايد باك بتاعه أكبر..
وإنتشاره أوسع.

هارد على أسئلتك التلاتة اللي أنت نزلتهم في البوست
واللي أعتقد.. إن لو كل مودن سألهم لنفسه
هايحدد هو عايز إيه تحديدا من مدونته

ما هي أسباب دخولك عالم التدوين؟
بعشق الكتابة..
من زمان وأول حاجة بفكر فيها في أي حالة
حزن- فرح- حب- فراق- مرض- تعاسة- سعادة.... الكتابة
أنا ماكنتش أعرف عن التدونين
(كمدونات شخصية) أي حاجة خالص
وكان ليا صديق بيقرا ليا توبيكات على منتديات ومواقع..
ونصحني بعمل مدونة أكتب فيها
وبعدها شير ليا لينك مدونة (عايزة أتجوز)..
والحلقة العاشرة مساء بتاعتها
قريت فيها.. ومنها دخلت مدونات كتير.. عجبني كتير منها
وموضوع إني رئيسة جمهورية نفسي...
شيء مغري جدا ليا.. جدا لأني كنت بعاني
من رفض وفرض.. نقاط معينة عليا في الكتابة
المدونة.. بكتب فيها اللي عايزه أقوله.. وده شيء ممتع :)
عمر ما كان هدفي.. من التدوين والمدونة
أن ينزل اسمي بكتاب أو أطلع في Tv أو يبقى ليا فانز
ومع ذلك الحمد لله ده كله حصل..
وماكنتش بحلم بكده مش هدف ليا!
كان نفسي في مكان أقول اللي نفسي أقوله..
وقت ما أنا محتاجة أقوله
بالشكل اللي يريحني إني أقوله..
من غير ما يكون ألف سد قصادي

ماهي أسباب استمرارك في عالم التدوين؟
لأني ما أنفصلتش عن الكتابة..
لسه الكتابة صديقتي الوحيدة.. اللي بتسمعني في أي وقت عمري ما أحتاجتها وكانت مشغولة بغيري.. أو عني وبصراحة مجتمعنا مغري أوي.. بالنسبة لمدونة زي فتافيت كل يوم عنده جديد.. ومع إني بكتب في كل حالة بمر بيها إلا إن الكتابة عندي في حد ذاتها حالة.. عشان كده مش في أي وقت بقدر أنشر (كل) اللي بكتبه للنـاس.. لكن دايما فيه اللي ممكن يتنشر غير إن الموضوع بقى فيه نوع من (الساتسفكشن) الشخصي جوايا لما أنزل بوست.. وحاسة إنه مجرد كلام وخلاص وألاقي ناس داخلة.. تناقش.. تثني.. تتفق.. تنقد.. تقول الله شيء بيرضي جوايا حاجات كتير.. مع إني خسرت متابعين كتير جدا بسبب إنقطاعي المتكرر.. لكن مع ذلك جوايا نفس الرضا :)
مستمرة عشان لسه فيه د/ستيته..
تدخل تقرا وتعلق على تخريفي
مستمرة عشان فيه سحساوي..
حتى لو بيعلق عليا بشكل جدي.. ببتسم
مستمرة عشان فيه تامر علي..
بستفاد من كل كلمة في تعليقه عليا
مستمرة عشان فيه أسماء..
بحس إني (لسه بتنفس) لما بلاقيهم عندي
مستمرة عشان فيه (أبو خضرة).. :)
بيقرا ومهتم بفتافيت رغم إن فتافيت
مش عارفة ترد 1على مليون من إهتمامه :(
مستمرة لأني لو جه يوم
ماقدرتش أكتب.. هابقى ((كنت))

ماهي اسباب رغبتك في التوقف عن التدوين؟
مش هانقول توقف.. نقول إنقطاع

أولا إنه لازم ينزل بوست!!
نظرية إلتزامي بأي شيء بتخليني مقصرة!

ثانيا الفيسبوك..!
بخرج فيه أول بأول في (إستاتيوس).. سطر مثلا
سطر ورا سطر.. البوست بينزل على 100 مرة
فبتكون النتيجة.. مافيش بوست!

ثالثا الغير معرف وبلاويه!!
بتيجي تعليقات على البوست
وإيميلات على إيميل المدونة.. كفيــلة
إني أبطل كتابة طول عمري.. :))

وفـالأخر.. كل خريف بيجي بعده شتا
وكل ورقة دبلت.. بترجع تاني تخضر
فأكيد مهما بعدت.. برجع تاني هنا
مادمت لسه عايشة.. مابقتش كنت

على الهامش:
واجب عزاء..
للشعب المصري.. الله يرحمك يا بلد
واجب تهنئة..
للشعب القطري.. رغم كل شيء مبروك
واجب دعاء..
للنادي الأهلي.. ربنا يشفيك يا غالي يارب