02 ديسمبر 2010

ردي على.. خريف المدونين

(خريف المدونين).. بوست عند أ. تامر علي
وكنت دخلت عند تامر من فترة محترمة..
تكاد تكون في حد ذاتها خريف :)) وعجبني البوست جدا
ولاقيت ان الرد هايطول مني..
فوعدته بإني أرد ببوست عندي أفضل
وهو كمان وعدني إنه يوفي بوعده..
ولن أتنازل عن اللي وعدني بيه
واخدلي بالك يا تامر.. لن أتنازل نوهائي..
ويجعل بيوت المدونين عمار ^_*


أتفق تماما معك في موضوع البوست..
وفعلا مدونات كتير دخلت فصل الخريف بدري..
وللأسف لسه ماجاش عندها ديسمبر :(
بس هاقولك سبب للخريف الدائم ده..
يمكن أنت ما أخدتش بالك منه وهو الفيسبوك..
الفيس سبب قوي لهجر بعض المدونين مودناتهم
لأن مردوده أسرع..
الفايد باك بتاعه أكبر..
وإنتشاره أوسع.


هارد على أسئلتك التلاتة اللي أنت نزلتهم في البوست
واللي أعتقد.. إن لو كل مودن سألهم لنفسه
هايحدد هو عايز إيه تحديدا من مدونته




ما هي أسباب دخولك عالم التدوين؟
بعشق الكتابة..
من زمان وأول حاجة بفكر فيها في أي حالة
حزن- فرح- حب- فراق- مرض- تعاسة- سعادة.... الكتابة
أنا ماكنتش أعرف عن التدونين
(كمدونات شخصية) أي حاجة خالص
وكان ليا صديق بيقرا ليا توبيكات على منتديات ومواقع..
ونصحني بعمل مدونة أكتب فيها
وبعدها شير ليا لينك مدونة (عايزة أتجوز)..
والحلقة العاشرة مساء بتاعتها
قريت فيها.. ومنها دخلت مدونات كتير.. عجبني كتير منها
وموضوع إني رئيسة جمهورية نفسي...
شيء مغري جدا ليا.. جدا لأني كنت بعاني
من رفض وفرض.. نقاط معينة عليا في الكتابة
المدونة.. بكتب فيها اللي عايزه أقوله.. وده شيء ممتع :)
عمر ما كان هدفي.. من التدوين والمدونة
أن ينزل اسمي بكتاب أو أطلع في Tv أو يبقى ليا فانز
ومع ذلك الحمد لله ده كله حصل..
وماكنتش بحلم بكده مش هدف ليا!
كان نفسي في مكان أقول اللي نفسي أقوله..
وقت ما أنا محتاجة أقوله
بالشكل اللي يريحني إني أقوله..
من غير ما يكون ألف سد قصادي


ماهي أسباب استمرارك في عالم التدوين؟
لأني ما أنفصلتش عن الكتابة..
لسه الكتابة صديقتي الوحيدة.. اللي بتسمعني في أي وقت عمري ما أحتاجتها وكانت مشغولة بغيري.. أو عني وبصراحة مجتمعنا مغري أوي.. بالنسبة لمدونة زي فتافيت كل يوم عنده جديد.. ومع إني بكتب في كل حالة بمر بيها إلا إن الكتابة عندي في حد ذاتها حالة.. عشان كده مش في أي وقت بقدر أنشر (كل) اللي بكتبه للنـاس.. لكن دايما فيه اللي ممكن يتنشر غير إن الموضوع بقى فيه نوع من (الساتسفكشن) الشخصي جوايا لما أنزل بوست.. وحاسة إنه مجرد كلام وخلاص وألاقي ناس داخلة.. تناقش.. تثني.. تتفق.. تنقد.. تقول الله شيء بيرضي جوايا حاجات كتير.. مع إني خسرت متابعين كتير جدا بسبب إنقطاعي المتكرر.. لكن مع ذلك جوايا نفس الرضا :)
مستمرة عشان لسه فيه د/ستيته..
تدخل تقرا وتعلق على تخريفي
مستمرة عشان فيه سحساوي..
حتى لو بيعلق عليا بشكل جدي.. ببتسم
مستمرة عشان فيه تامر علي..
بستفاد من كل كلمة في تعليقه عليا
مستمرة عشان فيه أسماء..
بحس إني (لسه بتنفس) لما بلاقيهم عندي
مستمرة عشان فيه (أبو خضرة).. :)
بيقرا ومهتم بفتافيت رغم إن فتافيت
مش عارفة ترد 1على مليون من إهتمامه :(

مستمرة لأني لو جه يوم
ماقدرتش أكتب.. هابقى ((كنت))


ماهي اسباب رغبتك في التوقف عن التدوين؟
مش هانقول توقف.. نقول إنقطاع

أولا إنه لازم ينزل بوست!!
نظرية إلتزامي بأي شيء بتخليني مقصرة!

ثانيا الفيسبوك..!
بخرج فيه أول بأول في (إستاتيوس).. سطر مثلا
سطر ورا سطر.. البوست بينزل على 100 مرة
فبتكون النتيجة.. مافيش بوست!

ثالثا الغير معرف وبلاويه!!
بتيجي تعليقات على البوست
وإيميلات على إيميل المدونة.. كفيــلة
إني أبطل كتابة طول عمري.. :))


وفـالأخر.. كل خريف بيجي بعده شتا
وكل ورقة دبلت.. بترجع تاني تخضر
فأكيد مهما بعدت.. برجع تاني هنا
مادمت لسه عايشة.. مابقتش كنت


على الهامش:
واجب عزاء..
للشعب المصري.. الله يرحمك يا بلد

واجب تهنئة..
للشعب القطري.. رغم كل شيء مبروك

واجب دعاء..
للنادي الأهلي.. ربنا يشفيك يا غالي يارب



هناك 11 تعليقًا:

  1. بوست جميل وموضوع هادف جدا
    فعلا انا معاكي ان مردود الفيس بوك اسرع بس متعة التدوين افضل بكتير جد
    بالنسبة للشعب المصري فهو مات من زمان مش من يومين او تلاتة
    بالنسبة لقطر جميع دول الخليج سيبتلعها الخليج باذن الله وهذا هو دعائي ليلا نهارا لانهم لا يستحقوا سوي ذلك
    واذا اردنا ان نهلك قرية امرنا مترفيها ففسقوا فيها فدمرناها تدميرا
    تحياتي الخالصة

    ردحذف
  2. مستمرة عشان فيه سحساوي..
    حتى لو بيعلق عليا بشكل جدي.. ببتسم
    أولا : يا لهوي انا ( جدك ) أبو بابا و لا ماما على العموم انا ليا الشرف .
    ثانيا يا لهوتيني ( ببتسم) دي للمدح و لا للذم

    ردحذف
  3. جميله ردودك والحمدلله الإعتراف بالفيس بوك فضيلة برضه

    وفعلا يارب النادي الاهلي يخف الا انا مش قادرة ادخل الفيس بوك النهارده الا الزملكاوية شامين نفسهم وقاعدين مستنيين مني ولو ستيتس من كلمة وحيجطعوني جطيع ........هههههههههههه

    وكويس انك محدفتيش التاج داه على حد

    ردحذف
  4. التدويم مبقاش جايب همه

    ايييييييييييييييه

    فين ايام زماااااااااااااااااان؟!

    ردحذف
  5. موضوعك فعلا هادف
    وكل واحد بيقول اللى عايز يوصله
    بالطريقه اللى تريحه
    اهم حاجه انه مش يجرح فى الاخرين
    التدوين فى حد ذاته رساله .. فضفضه .. معلومه
    والفيس سحب البساط من تحت ارجل المدونين فهذه حقيقه

    اقعدى بالعافيه

    ومش تغيبى كتير عننا

    ردحذف
  6. فتفوتي الحلوة بقت حلوة بقت حلوة وبتطل كل فين وفين
    وماله
    نحمد ربنا
    احسن ما تعتزلنا احلى فتفوتة

    لازم يعني تجيبي سيرة الأهلي النهاردة
    قال مش مكفيهم الهم اللي احنا فيه جاي الأهلي ييودينا "مشتشهم" الأمراض النفسية كمان

    بجد
    يفتقد التدوين بوستاتك
    اللي هي واقعية حقيقية
    مخلوطة بخلطة ضحك سرية
    محتاجها نفسيتنا المشردة في البرية

    ردحذف
  7. أنا قربت اقتنع بالفيس بوك خلاص واسيب التدوين من كتر الناس اللي مصممين على ان اداءه افضل ... الفكره محل الدراسة حالياً :))

    بس انا مقتنع ان الغيس بوك موقع اجتماعي بين ناس بينهم شيء مشترك بيتواصلوا من خلاله مش زي المدونة ساحة شخصية جداً لابداء الرأي وتأخذ طابع صاحبها الخاص

    ام هند
    أنا بس مش فاكر نوعية الوعد بالظبط وهل كان يحتوي على طيور مهاجرة ولا لحوم مستوردة وانتي عارفه صعوبة الحصول على الحاجات دي الأيام دي وبعدين لسه طالعين من العيد يا شيخه حد ليه نفس للحمة دلوقتي :)))

    بالنسبة لقطر فأنا والله شايف ان ال5 ولا 6 مليار دول كان أولى بيهم مليار حاجه تانية وقضية تانية تخدم الواقع المر لأن مفيش أي فايدة فعلية هتعود على دولة بحجم قطر من تنظيم المونديال تعوض المبلغ ده .. اللهم إلا الفشخره الكدابه بس

    ربنا يعوض عليا بغيرهم كام مليار كده وخلاص هنعمل ايه؟

    ردحذف
  8. مساء الخير ..
    تعليقي فقط على الخيبة اللي احنا فيها ..
    [ اللعبة سنة 2022 ] ونتم فرحانين من الآن ؟؟؟
    [ يااااااااااا عياااااااال ]
    فرحانيين قبل الهنا بكام سنة ؟ 12 سنة !!
    ولا يمكن حابين تشاركو فرحة الشركات الأمريكيه والبريطانيه اللي يمكن تلطش 40 مليار دورررررر
    تكلفة بناء الملاعب غير الرشاوي اللي خدتها الفيفا!
    من الان ل سنة 2022 بتموت ناس وبتحيا ناس !!
    تعليق مواطن عربي عادي نزل السوق في الخامسة من هذا الصباح يدور على شغل ..
    وعاد في السابعة مساء من غير ما يلاقي شغل !!
    سألته زوجته : يا رجال الأولاد جعانين وعيانين وتعبانين ..
    فقال لها : يا حرمه خلي عندك طموح .. ونظرة مستقبلية
    المونديال أهم من حياة الأولاد ..
    الأولاد اذا ما عاشوا حتى ذلك التاريخ فسبكون خيرهم لنا !
    أنا وأنت فقط وهذه أنانية مفرطة ! لا تليق بنا وهي ليست من شيم الكرام !
    اما اذا نجحنا في اقامة المونديال ! فسيعم الخير على الجميع ..
    أنهارا من السمن واللبن والعسل ..
    امة عربية واحدة تلهث وراء كرة القدم .. حتى يتحقق الأنتصار ..
    المونديال .. طريقنا الى التحرير ..
    بالمونديال وحده .. نرفع رؤوسنا ونعيد أمجاد الأمة ..
    لقد أعطت " الفيفا " شعب غزة أملا جديدا للحياة الحرة ..
    سنرفع رؤوسنا عام 2022 .. نرجو عدم الأزعاج حتى ذلك الوقت !
    نصيحة للعرب .. اقرأو " المعوذات " خوفا من الحسـد !!
    ارفعوا رؤوسكم فقد مضى عهد الأستعمار ..
    لقد انتصرت المقاومة العربية في قطر .. مبروك
    عيوننا اليك يا قطر ترحل كل يوم وأننا نصلي شكرا على الفوز
    حتى نلقاكم في 2022 هذا أنا االمواطن العربي أتمنى لكم أحلاما جميلة

    ردحذف
  9. احمد ربنا واشكره على ما انت فيه وفى اى مرحلة

    اما المنغصات وان وجدت فهى مهدئات زى الفرملة

    حتى لا تتغر ولا تتبطر …وفكر جيدا فى هذه المسألة

    واى صعوبات طالما قابلة للاحتمال ليشت معضلة

    تعيش بيها وتسعد رغم ما فيها وهذه حكمتى المفضلة

    وكم هى مملة الحياة المريحة والادوار الخاصة المفصلة

    ونهايتها المرض النفسى او للخلل العقلى حتما موصلة

    فالوصول للكمال بداية للزوال وهذه حكمتى المرسلة

    ردحذف
  10. مساء الخير ..
    " كلام على بلاطه " ازيك .. أرجو أن تكون بخير
    اذا كنت تخاطبني بخصوص فرحة الشعب العربي من المحيط الى قطر ! بالفرحة الغامرة حول ما جاء [ بانتصارها وفوزها وأنها رفعت راس الأمة العربية عشان ( يا ولداه طول عمر راسهم مطاطية وذليلة )
    عمرهم م انتصروا بشيء الا ف الكوره و حفلات الرقص
    وشراء الفنادق والشاليهات واستيراد الفنانات من ... بلاش .. من غير أسماء .. أصله لو سميت بلد ح يزعل اصحابها خليهم دافنين نفوسهم في الرمل .. والرقص يجري من تحتهم وهم مش داريين . فرحة ايه يا عم ؟ في حد يفرح قبل 12 سنة من الموعد ! هل يتوجد امة تحترم نفسها توظف كل طاقتها وامكانيتها وملياراتها عشان [ لعبة كوره ] بينما هي لا تزال لعبة في يد الأجنبي يلعب بها كيف يشاء في شتى ميادين السياسة والأقتصاد ! ( اي حكمة هذه التي تنتهجها الأمة وبلاد مقدسة غاليه واقعة تحت الأحتلال ! وحضرتك أكيد شفت ع الفضائيات .. أطفال صغار ونساء حرائر وشيوخ أكابر محاصرون من الجهات الأربع .. وحضرتك أكيد شفت .. كيف يحترق الأطفال " بالقنابل الحارقة وقذائف الفسفور الأبيض .. وما حد أطفأ النار التي يحترقون بها .. الحرائق كانت أقوى وأشد حرا من حريق الكرمل في حيفا !! بشرفك .. كلامي صحيح ولا لأ ؟؟؟؟ اي فرحة ونداءات الأستغاثة تصرخ في مسامعنا ليل نهار ؟ !! يا راجل .. جندي يهودي يقف على الحاجز يتحكم في مصير شعب بحاله !!!! اية فرحة هذه وبنات العرب يرقصن في الفنادق ويغنين للزبائن وعلى الفضائيات ليل نهار وحنا قاعدين نتفرج عليهم .. نتفرج على بناتنا سكارى وليال مش بس حمرا .. لا .. ملونه بكل الألوان حسب منشأ الراقصه والمغنية .. ووين الملايين والشعب العربي وين .. ونفتخر .. المغنية العالمية والراقصة اللولبية والمطربة العربية الكبيرة ودقي يا موزيكا للصبح ؟؟ وغنو معانا ؟؟ جانا الشرف جانا .. احنا انتصرنا في المونديال .. وقلنا ح نعدي وادينا عدينا .. وبنينا صرحا من العزة والكرامة .. وافرحي يلي انت مش معانا .. اذا أنا غلطان تفضل وشوف الفضائيات المملوكه وحتى الرسميه وبعدين حضرتك احكم .. عشان انت عندك حكمة بتقول : عديها .. اسعد فيها وعيش فيها وبلاش أمراض نفسية .. حياة الهدوء والأستقرار جالبة للهم والمشاكل .. لكن فيه ناس مش حتعديها .. تموت ولا تعديها .. خلينا نشوف رأي ( فتافيت ) لو كانت مش مشغوله .. هي امرأة صحيح .. لكن لما تتكلم في حد يسمع لها .. آخر ( المراءات المحترمات ) هي مش مره صارت رئيسة جمهورية ..انت متعرفش ؟؟ بس ايه .. رئيسة بحق وحقيق .. وعندها حكمة بتقول .. [ هاقول اللي جوايا ومش حاستنى اذن حد .. ويا ريت يا ريت كل العمد العربية جمع عمده .. يا ريت يقولو اللي جواهم وم يستنوش اذن من حد .. لكن فتافيت قالتها[ ! أه وربنا هي بتقول كده ! قولي يختي واشجينا .. قوليها على بلاطه ولا يهمك .. وبعد ما تقوليها م تروحيش ع اسكندرية .. عشان هناك ( بيخطفو في النساااااااووين ) والخبر دا مش اوشاعات .. من قبلك اتخطف خالد ولسه م رجعهوش

    ردحذف
  11. برضه مش بحب الفتيس بوك
    ولا عارف احبه يمكن لانه حاجة سريعة (تيك اواي) وانا مش باحب الحاجات السريعة قد ما باهتم بالفكرة نفسها وعمقها :)

    ردحذف

خلل براحتك من غير انتظار .. فتافيت أصلاً بتحب الخيار