03 يونيو 2011

4- مسلمون حول العالم.. الجزء الأول!

.......

ده رابع بوست
في حملة التدوين اليومي،،!
وشكلي دبست نفسي :|

النهاردة بوست على أجزاء
بس مش هانزله ورا بعضه،، يعني
كل كام يوم هانزل جزء منه،،،
حكاية عن مسلمين من بلاد مختلفة،،
والله المستعان!


الأويجور،، ومأساة تركستان!


كام حد فينا يعرف مأساة مسلمي الصين؟!
هناك ملايين المسلمين،، اللي عايشين في كرب وذل
هاتكلم عن التركستانين ذو العرق الأويجوري
عايشن في تركستان الشرقية،، المسلمة
اللي تحت الإحتلال الصيني!



كانت بداية الفتح الإسلامي لتركستان في خلافة
عثمان بن عفان رضي الله عنه،،
على يد القائد الحكم بن عمرو الغفاري
لكن الفتح بشكل كامل ونهائي كان
على يد القائد قتيبة بن مسلم الباهلي
في عهد الخليفة الأموي عبد المالك بن مروان في الفترة ما بين
(83- 94 هـجريا / 702- 712 ميلاديا)!
لكنها وقعت تحت سيطرة المغول بقيادة جنكيز خان
عام (628هـجريا / 1231ميلاديا)!،، وكانت طول عمرها
دولة واحدة اسمها تركستان،، لكن بعد تصارع روسيا والصين
عليها بشراسة،، صراع دام 200 سنة،، تم تقسمها إلى:
تركستان الشرقية تحت قبضة الإحتلال الصيني
تركستان الغربية تحت قبضة الإحتلال السوفيتي
وقسم الروس الجزء الغربي إلى:
خمس جمهوريات قبلية في عام
1922 ميلاديا!
وبعد تفكك الإتحاد السوفيتي إستقلت تركستان الغربية،،
وظهرت الجمهوريات الإسلامية المستقلة،،
أوزبكستان- قازاقستان- قرغزستان- وتركمانستان- وتاجيكستان
وده كان من رحمة ربنا بسكان الجزء الغربي!

لكن تركستان الشرقية ظلت تحت إحتلال صيني شيوعي
منذ عام 1876 ميلاديا،، للآن،،، وأطلقوا عليها اسم
شينجيانغ،،، يعني المستعمرة الجديدة!!


استعملت الصين كل ما تملك من يوم إحتلالها للنهاردة
في طمس كل ما هو إسلامي في تركستان،، بقمع شديد
في الماضي كانوا بيفتشوا البيوت ويحرقوا أي كتيب إسلامي
والستات مجبرة على قص شعرها ولبس القصير وإلا تعتقل
وكانوا بيعملوا تجمعات تعيش فيها الناس،، وتشتغل بالسخرة
وكان الأكل جماعي والسكن جماعي،،
وكان مسموح للأزواج بلقاء واحد

كل أسبوعين واللقاء ما يتعادش الدقايق،، ولو حصل حمل
الزوجة مسموح لها أجازة وضع 3 أيام فقط!!!



أهل تركستان مسلمين قابضين على إيمانهم كالقابض عـ الجمر
أنتفضوا أكتر من 45 مرة على الحكم الشيوعي العنصري
وكانت حصيلة إنتفاضتهم وثوراتهم دي هي
مزيد من العنف والإبادة،، وأكتر من مليون شهيد!!
مساحة تركستان حوالي 1.6 مليون كم خمس مساحة الصين
وغنية جدا بالثروات الطبيعية،، وخاصة النفط
كل يوم بيستخرجوا 5 ملايين طن نفط!
ده غير الفحم واليورانيوم والدهب!!



عايشين مأساة حقيقية تحت قبضة أمة بوذية
بيتقتلوا في الشوارع،، بيعتقلوا بشكل قصري
بتغذبوا ببشاعة وهمجية غير آدمية،،
والأسوء إنهم ممنوعين من ممارسة شعائرهم الإسلامية!!

مرة قرية حبت تبني مسجد،،
تم محاصرة القرية بالمدفعية الثقيلة وقصفها
وأمطروا المنازل بالقنابل اليدوية لإجبار السكان على الخروج
عشان تقدر القناصة تموتهم،،!!!
وأبادوا أكتر من 80% من سكان القرية!!
تركستان دلوقتي فيها ملايين من المسلمين،، ومصحف واحد!
مساجد يصلوا فيها على إستحياء،، صلاة العيد بس!!
ممنوعين من الجهر،، بصيام رمضان!!!


من 4 سنين الحكومة الصينية أبتكرت شكل جديد من القمع
أخدت 100 ألف بنت مسلمة أويجورية من تركستان
أعمارهم ما بين (15 عام : 20 عام)،،
وقامت الحكومة بتوزعهم
على مدن تانية بالصين،،
أهلهم ما يعرفوش عنهم حاجة للنهاردة

هم راحوا فين،، أتوزعوا ليه،، بيحصل فيهم إيه؟؟!
محدش يعرف غير إنه نوع جديد لوقف العرق الأويجوري!!

من سنتين بقى،، وخاصة يوم 5 يوليو 2009 ميلاديا
حصلت مأساة معاصرة،، تم تميعها إعلاميــا
وهي إن 5000 أويجوري ثاروا على الحكم الصيين،،
فالصين جمعتهم وعملت لهم عملية تأديب جماعي!!
الصين بتقول إن اللي مات شخصين بس!!،، لكن
التركستانين قالوا إن راح منهم أكتر من 500 شخص!
ما بين شاب وكهل،، مرأة وطفل ورجل!!


الغريب إننا كعرب نلهث لفتح سوق مع الصين
وعمل علاقات وهباب،، وناسين أو متناسين أخوتنا هناك!
دي رسالة من مسلمي تركستان،،
لمسلمي العرب خاصة والعالم عامة:


نحن الأويغور،، اخوانكم في الإسلام ،، وهذه قضيتنا
هاهنا استمع لصوت أنين ملايين المسلمين
شعب باك حزين و أمة تعاني من الاضطهاد
نحن تركستان الحزين،،،!

الشعب التركي المسلم في تركستان الشرقية يرصد بحزن واسى ولوعة لكل الدول الاسلامية، التي تتسابق في انشاء علاقات تجارية وصناعية ودبلوماسية مع الصين الدولة التي تعذب اخوة لهم في الدين، وتستعمر اراضيهم متناسية حقوق الشعب التركستاني عليهم، ومتناسية ان كل تلك الاموال والثروات؛ التي يتاجر بها الصينيون انما هي اموال مسروقة مننا ومنهوبة من ارض شعب مسلم بائس، يستجدي مساعدة أخوته في الاسلام في الدول الاسلامية دونما مجيب او معين او متعاطف،
فلا حول ولا قوة الا بالله العلي العظيم
اللهم اشهد بأننا نطلب معونتهم، وهم يفضلون التعاون مع اعداء الاسلام على اعانة اخوة لهم في العقيدة، اللهم اننا طالبناهم بحق الاخوة في الاسلام فما راعوا حق الاخوة في الاسلام، بل سارعوا في اظهار الرضا من ممارسات من اغتصب اراضينا وانتهك حقوقنا، وهدم مساجدنا ومدارسنا ومنعنا من اقامة شعائر ديننا الحنيف، اللهم اننا نشكوهم اليك وانت المطلع
وانــت الرحيـــم الرحمــــن،
ولا حول ولا قوة الا بالله العلي العظيم!!!



يمكن ما نقدرش ننصرهم حاليا،، بس مؤكد جاي يوم!!
لكن يا ريت نفتكرهم بدعائنا،، ونطلب من ربنا
إنه يسامحنـا على تقصيرنا في حقـهم،،!!
عندي صور كتير بشعة،، بس رفقـــًا
بأصحاب القلوب الضعيفة
قولت بلاش أنشرها!

هناك 16 تعليقًا:

  1. للأسف الملف ده عليه تعتيم اعلامي عربي غير مبرر رغم ان الصين من أحوج الدول في العالم للمسلمين ورغم ان اي ضغط عليها هايجيب نتيجه لكن لمصلحة مين اللي بيحصل ده مش فاهم

    جزاك الله خيراً على تذكيرنا بالقضية المنسية دي ويارب ييجي يوم نعرف فيه ننصرهم نصر فعلي
    تحياتي

    ردحذف
  2. تامر علي

    جزانا وإياكم يا فندم :)

    انا مش لاقية اي مبرر للتعتيم عليه؟
    هناك ملايين كتير بجد.. وقمة الإهانة والقمع
    الصين بقت قوة سياسية واقتصادية عظمى..
    بفلوس وثروة ودم الأويجور!!!
    واحنا لا نرى لا نسمع لا نتكلم...!!
    ده شلل إيه ده يارب؟؟!!!

    أنا جربت أفتح الحوار مع كذا حد
    من اللي بينادوا بحقوق الانسان.. محدش يعرف عنهم حاجة... الناس دي بتحصلها عملية ابادة وتطهير عرقي ولا حد حاسس بيهم.. وكل ذنبهم الاسلام!! :(

    ربنا كبير.. وان شاء الله يجي يوم
    نقدر ناخد فيه حقهم.. وننصر دين الله في كل الأرض!

    ردحذف
  3. الله معهم هو ولى المستضعفين

    نحن يحكمنا حكام مغيبين يجلسون على كراسى ذات غرة لاصق المانى
    يارب ارزقنا بحكام يجلسون على كراسى تيفال و المانى كمان
    بأذن الله ربنا سينصرهم
    دولة الظلم ساعة و دولة الحق الى قيام الساعة

    تحياتى

    ردحذف
  4. السلام عليكم

    تحية كبيرة أختي رحاب على هذه اللمحة المهمة لإخواننا هناك..

    صراحة كنت أول مرة أعرف عنهم حاجة من حوالي 18 سنة لما عملت مع أصدقاء لي معرض في مدرسة عن الأقليات المسلمة في العالم..
    وكانت فرصة لمعرفة مادة ثرية ومهمة جدا...

    رغم أن الحصول على المعلومات كان صعب جدا وخاصة الصور
    (النهاردة ما شاء الله أصبح كل شيء متوافر بضغطة زر).

    بعد ذلك عشت مع تفاصيل حياتهم من خلال رواية "ليالي تركستان" الرائعة للكاتب (نجيب الكيلاني ) رحمه الله.. [له أكثر من رواية مواضيعها الأقليات المسلمة].

    أما تقريرك فكان فيه تحديث مهم لمعلوماتي القديمة.

    ملحوظة: من الأساليب الماكرة للصين في التعامل مع أهل تركستان الشرقية أنهم يفرضوا عليها نفس توقيت بكين العاصمة مع الفارق الكبير في خطوط الطول.

    تحياتي على هذا التغريد خارج السرب. استمري.

    .................
    ملحوظة1: الأغنية حلوة قوي.
    ملحوظة2: أتمنى أن تراجعي نفسك في بانر (كلام الناس) بتاع طظ كبيرة قوي. طبعا اقتراح ليس إلا.

    ردحذف
  5. ياااه يا رحاب
    أنا أول مرة أعرف حاجة عنهم
    لهم الله ولنا أيضا

    بوست موجع ولكن لابد منه
    أشكرك عليه

    ردحذف
  6. لا إله إلا الله
    الأمة الإسلامية أمة مغيبة أوي كدة ليه ؟؟
    أمال أغنى الدول الإسلامية قاعدين بيدعموا في امريكا ليه ؟؟
    ايه دة !!
    ربنا يعينهم و ينصرهم .. المستضعفين في الأرض .

    ردحذف
  7. بوست مهم جدا
    المسلمين بيعانوا من قمع على مستوى العالم من الجميع
    والغريب ان العالم بتاع دعاة الحريات ساكتين وعاملين نفسهم مش واخدين بالهم
    قمة الاستهبال
    واحنا مفيش بايدينا عير الدعاء للمسلمين في شتى بقاع الارض
    كان نفسي نبقى كدول اسلامية رابطة واحدة صوتها عالي مسموع
    تحياتي

    ردحذف
  8. ابراهيم رزق

    ونعم بالله.. :|
    حلوة أوي موضوع كراسي تيفال دي
    عشان نعرف نزحلقهم بسهولة من غير ثورات
    احنا نقل الكرسي.. يتزحلقوا دوغري :))

    ربنا ينصر الإسلام والمسلمين أينما كانوا

    ردحذف
  9. Rehab

    مش كفاية انك تعرفي
    عرفي غيرك كمان عشان الكل يعرف قضيتهم

    ردحذف
  10. ماجد القاضي

    أنا أعرف قضيتهم من 5 سنين بس
    وكنت متخيلة ان الناس تعرفها لحد ما اتصدمت بجد :|
    يلا .. مافيش في ايدينا غير نشر قضيتهم
    والدعاء لهم.. ان ربنا يعجل بنصرهم
    .......

    بالنسبة للأغنية أتفضل ما تغلاش

    البانر.. زي ما سألتك
    الإعتراض على المبدأ في حد ذاته
    ولا إعتراض على الصورة؟

    نورتني اخي الكريم :)

    ردحذف
  11. موناليزا

    الشكر لله يا موني
    المهم انك كمان تعرفي اللي حواليكِ
    ماتخليش القضية تقف عندك... لازم كل الدنيا تعرف
    وادعي لهم يا موني.. ربنا يفك كربهم

    ردحذف
  12. قهوة بالفانيليا - شيماء علي

    الدول الغنية المسلمة مش فاضية
    بتطبع مع إسرائيل .. وتفتح سوق مشترك مع الصين
    ربنا يرحمنا برحمته بقى :|

    ردحذف
  13. مصطفى سيف

    لازم يبقى فيه كيان اسلامي قوي
    وده مش هايتحقق غير بالوحدة بين كل بلاد المسلمين
    وتفعيل المرجعية الاسلامية القويمة السليمة
    المعتدلة كمان... كده ممكن يبقى لنا وجود بجد
    ووقتها نقدر نقول كلمتنا والعالم يسمع
    غير كده... يبقى ننقرض اكرم لنا

    ردحذف
  14. شكرا بجد علي الموضوع ده و ياريت فعلا تكون سلسلة
    لان كتير مننا مش عارف حاجة عن العالم الخارجي انا معلوماتي عنهم كانت ضئيلة جدا و اول مرة اسمع عنهم كان في موضوع 2009 فعلا و اتنسوا طبعا
    ربنا يثبتهم و يرفع شأن العالم الاسلامي الخاضع للمال و السلطة

    في انتظار بقية السلسة
    تحياتي يا فندم :)

    ردحذف
  15. Mona Abo - Elso3od

    الشكر لله يا جميل
    ان شاء الله هانزل كام بوست كمان شوية
    وهو ده اضعف الايمان اللي اقدر اقدم انه

    نورتيني يا منى
    وسعيدة جدا بمتابعتك :)

    ردحذف

خلل براحتك من غير انتظار .. فتافيت أصلاً بتحب الخيار