18 يونيو 2011

18- مع فتــافيت،، أكيـــد ألذ!!

:
:
ده البوست الــــ 18
في حملة التدوين اليومي،،!
مع فتــافيت،، أكيـــد ألذ!!
وصفة،،، من مطبخي الخـــاص!

المطبخ،،، مـزاج وهواية!
واللي عندها الهواية دي،، ومزاجها رايق
مع قليل من الحنكة،، والنفس الطيب
هاتبقى طباخة بيـــرفكت!

بعشق الطبيخ،، بس بمزاجي
يعني أطبخ،، من غير غصب وأقتدار!
ولو حتى طبق بيض أومليت،، بيكون غير
أي طبق أومليت ممكن تاكلوه في حياتكم!

اللي بياكل من أيدي مرة،، بيعــرف
إن فيه نكهات معينة ترايد مارك في طبخي
القرنفــل،، الحبهــان!،، بعشقــهم
في الأطباق الحـادقة فظـاع،،!
والأطباق الحـلوة ممتازين،،!
وحتى في المشروبات،، مممممممممم
كركديه بالقرنفل،، قهوة بالحبهان!
حليب بالحبهان،، شاي بالقرنفل!
طعم تــاني،، طعم غيــر!

عامة البهارات،، بتخلي الأكل يجنن
القرفة،، الجنزبيل،، الروز ماري،،
الكسبرة،، الكاري،، الكوبيبة الصيني،،
الكركم،، الزعتر،، المستكة،، الغار،،،، إلخ
بتــدي للأكــــل،، مذاق راقي!

عندي ملكة،، مبسوطة إن ربنا عطاها ليـا،،
ونادراً لما أصادف حد،، عنده زيها!!
أنا أي طبق بدوقه لأول مرة،، برجع البيت
أعمله،، من غير ما أسأل عن الوصفـة بتاعته!
لساني حساس جدا للمكونات،، وأيدي مكيال لا يخطأ!

الجمعة،، ده اليوم بتاعي أنا
بعمل فيه الأكل،، أو بالأحرى الغـــدا
ونظرا لأن كل اللي بكتبه اليومين دول
ممنوع من النشر،، لأنه تفريغ نفسي!
قررت أعزمكم،، على اللي طبخته أمبارح!
رز بالخضار،، وفراخ بالكريمة،،!



المقادير تكفي 6 أشخاص
الوقت،، ساعة!

الرز بالخضار:
1 ك رز بسمتي مغسول ومنقوع نص ساعة
بفضل النوع الدهبي،، الهندي!
1/2 ك بسلة متفصصة،، 1/4 ك جزر مقطع
8 فصوص حبهان،، 8 مسامير قرنفل
3 ورقات غار،، معلقة قرفة
ملح ،، زبدة!

الطريقة:
أثناء نقع الرز،،
بنجيب حلة ونسيح فيها مكعب الزبدة أو 3 معالق سمنة
ونحط 5 فصوص الحبهان،، وزيهم قرنفل
1/2 معلقة القرفة،، ورقتين غار
ونقلب لحد ما ريحة التوابل تطلع،، !

نحط البسلة والجزر،، ونقلب كويس أوي!
نغطيها وكل 3 دقايق،، نقلبها تاني!
تتشوح ربع ساعة،، وبعدين نملح البسلة!
ونطفي عليها،، هاتكون مستوية ومحتفظة بشكلها!

نحط ماية سخنة في حلة كبيرة،،عــ النار
ونحط فيها باقي التوابل،، ونسيبها تغلي كويس
وبعدين نصفي الرز،، ونسلقه فيها!
كبيره ربع ساعة،، ونملحه،، وبعدين نصفيه!

نخلط البسلة،، مع الرز كويس جدا
عشان الرز ياخد نكهة التوابل،، وزبدة البسلة!

الفراخ بالكريمة:
6 صدور فيليه (مخلية)،، مكعب زبدة،،
علبة كريمة طبخ،، 1/4 ك لبن حليب،،
2 كوب شوربة فراخ،، معلقة كبيرة نشــا
3 بصلات كبار (أبيض) مقطع حلقات ومتفرطة
1 ليمونة كبيرة،، 1/2 كوب ماء بارد
5 فصوص حبهان،، 8 مسامير قرنفل،،
3 ورقات غار،، ملح حسب الرغبة!

الطريقة:
نقطع الصدور مكعبات،، متوسطة
ونحط حلة عــ النار،، ونسيح فيها الزبدة
ونضيف القرنفل والحبهان وورق الغار
ونقلب كويس،، لحد ما ريحة التوابل تظهر،،
نضيف مكعبات الصدور،، ونقلب كويس
10 دقايق،، هايتغير لون المكعبات ويبقى أبيض
وتقريبا استوت 3/4 تسوية،، نشيل المكعبات من الحلة
ونحطها في طبق على جنب،،!!

وفي نفس الحلة والزبدة،، نحط حلقات البصل
ونقلبها كويس،، لحد ما تتدبل وتكون طريت نوعا ما
وقتها،، نضيف مكعبات الفراخ تاني،، ونقلبهم كويس أوي
3 دقايق،، ونضيف الشوربة ونقلب برضو كويس
ولما تقرب تغلي،، ما تكونش غليت فعلا
نضيف اللبن،، ونقلب تاني كويس أوي،، وبرضـو
قرب ما تيجي تغلي،، نضيف الكريمة،، ونقلب كويس!

نكون في الوقت ده،، دوبنا معلقة النشا في 1/2 كوباية الماية
ونضيفها للمكونات اللي على النار،، مع أستمرار التقليب
ندوق الطعم،، عشان نملح حسب الرغبة!
ويستمر التقليب،، حوالي 5 دقايق،، يكون قوام السائل
تقل شوية،، ويكون في طريقه للغليان،، نعصر الليمونة
ونقلب دقيقتين،، ونطفي النـار!

ملحوظتين:

أولا،، ما ينفعش نملح قبل ما نحط الكريمة
عشان في الغالب الشوربة والكريمة واللبن،، بيخدعوا
وممكن نملح في الأول،، ونتفاجأ إن الملح زاد أوي!

ثانيا،، طول ما الوصفة على النار
تكون النار متوسطة،، والخلطة ما توصلش نهائي للغليان
لأنها لو غليت هاتفـــك من بعضها،،،
والزبدة تبقى على الوش!!!

بس خلصنا طبخ،،، نغــرف بقى الأكل
الرز في طبق والفراخ في طبق،،!
وممكن نقدم معاهم سلطة طماطم،،
أو عيش محمص،، أو سبيــرنج رولز
اللي هايجرب،، مش هاينــدم
وبألف هــنا :) ،،!


:

هناك 10 تعليقات:

  1. جميله اووى الوصفتين
    حبيت وصفه الفراخ اوى كمان
    واضح انك طباخه شاطره يا رحاب
    تسلم ايدك يا قمر :))

    ردحذف
  2. السلام عليكم

    احم..... على رأي (اشرف عبدالباقي) وهو يقول بتلمظ: تصدق جعت....!!!!

    طيب استأذن أنا وأجيب مراتي...!!!

    تحياتي..

    ردحذف
  3. أنا كمان الطبخ عندى مزاج وماحبش أنه يتفرض عليا :)

    ردحذف
  4. (:

    تسلم الأيادى

    بأذن الله هجربها

    انا من الناس بقى اللى بفتح نفس الناس على الأكل

    هما بيقوله كده (:

    (:

    ردحذف
  5. انا جوعت ع السيرة
    :))

    ردحذف
  6. Bent Men ElZaman Da !!

    لو جربتيها هاتعجبك جدا
    خاصة الفراخ.. تحفـــة
    وعلى فكرة ممكن تغيري الفراخ بجمبري وبتكون رائعة
    نورتي يا قمر :)

    ردحذف
  7. ماجد القاضي

    هههههههههههههه،، طيب خلي المدام تجربها
    وصدقني هاتدعليل لما تدوقها.. تحفــــة جدا جدا
    هي أصلها آسياوي.. كنت أكلتها في مطعم آسياوي
    ولما روحت تاني يوم عملتها.. حبوها جدا
    وكل أسبوع تقريبا بيطلبوها

    جرب بس وأنت تعرف
    نورتني أخي ماجد :)

    ردحذف
  8. موناليزا

    هههههههههههه.. دي عدوى بقى
    وانا اللي كنت فاكرة نفسي لوحدي كده
    طيب الحمد لله :))))

    ردحذف
  9. Ramy

    جرب وادعيلي .. :)
    مممممم.. طيب جميل إحنا نعمل مشروع سوى
    نفتح مطعم.. أنا أبقى الشيف
    وانت تنزل تاكل.. وتفتح نفس الناس ع الاكل :)))

    ردحذف
  10. Prof9090

    هههههه تصدق وانا كمان :)))

    ردحذف

خلل براحتك من غير انتظار .. فتافيت أصلاً بتحب الخيار