13- مسلمون حول العالم.. الجزء الثاني!

.........

ده البوست الــ13
في حملة التدوين اليومي،،!
مسلمون حول العالم،، الجزء الثاني!
كيف يعيش المسلمون بسيبريا؟!

سيبيريا هي الجزء الشرقي والشمال الشرقي من روسيا.. وتمثل 77% من مساحتها يعني أكبر من أوروبا كاملة،، تقريبا كانت غير معترف بيها كمنطقة سكنية مأهولة بالسكان عالميا،، لحد ما تم إنشاء سكة الحديد ربطت بين موسكو و سيبيريا في عام 1916م،، وتعتبر أكبر صحراء جليدية في العالم،، درجة الحرار فيها وخاصة بالجنوب بتوصل في أوقات لــ -72 درجة!!!،، عدد المسلمين هناك 4 مليون مسلم،، يعني خمس سكان سيبريا،،من التتار والمغول والأويجور والأوردية بالإضافة للسيبيريين من أهل المنطقة!

تعالوا نرجع لتاريخها الإسلامي،، أولا أول رسالة دينية سماوية تم اعتناقها في سيبريا كانت الإسلام،، وده في النصف التاني من أول قرن هجري،، يعني نقول من سنة 60: 90 هجريا ومش معروف في أي سنة تحديدا،، وده كان في سهولها الغربية عن طريق الفتح الإسلامي لآسيا الوسطى،، لكن تم إقامة أول دولة إسلامية هناك كان عام 978 هجريا وده كان في عهد الإمبراطور كوشيم خان،، وفضل حكمها 10 سنين،، لحد ما أحتلها الروس القياصرة سنة 988 هجريا، تقريبا عام 1580 ميلاديا!،، ورفضوا استقلالها ككيان سياسي،، ومن يومها لحد النهاردة سيبريا إقليم تابع لروسيا!

طبعا القياصرة حاربوا الإسلام في سيبريا ومنعوا ممارسة الشعائر الدينية،، وقراءة أي كتب دينية وخاصة إسلامية!،، لكن المسلمين هناك عملوا حيلة عشان يفضل الإسلام جوه قلوبهم وولادهم يورثوه عنهم،، عملوا أناشيد وأغاني دينية بالتعاليم والشعائر كلها،، وحفظوها عن ظهر قلب،، عشان يفضل الدين عايش رغم أنف القياصرة،، وكمان القياصرة ما يقبضوش أو يعدموا أي مسلم بتهمة مخالفة القوانين،، وفضلوا كده لحد سنة 1905 ميلاديا،، وقتها كان الروس القياصرة معتقدين إنهم رسخوا دينهم في البلاد،، ومسحوا كل ماله علاقة بالإسلام فأعلنوا مبدأ التسامح الديني،، وأطلقوا الحرية لكل أفراد سيبريا في إعتناق الدين اللي وكمان له حق ممارسة العقائد،، وكانت المفاجأة إنهم لاقوا السكان بمئات الآلاف بيعلنوا إسلامهم!

بعد كده دخلوا في فترة السوفيت،، ولما الإتحاد السوفيتي هجر ملايين البشر من مساكنهم،، ووداهم سيبريا كنوع من التعسيف أو النفي أو التعذيب،، مسلمين سيبريا أثبتوا أن الهدي النبوي في قلوبهم محفور،، لما أقاموا مبادئ المؤاخاة اللي عملها الأنصار مع المهاجرين وقت الهجرة النبوية،، وأحتضنوا ملايين المسلمين المهجرين في بيوتهم وقسموا معاهم أكلهم ومسكنهم،، وكأن أنصار يثرب يبعثوا من جديد!!!

في سيبريا قائمة باسماء الشهداء،، عارفين مين هم؟؟،، دول علماء الدين والدعاة اللي ماتوا قبل ما يوصلوا لسيبريا بسبب الصحراء الجليدية،، أو ما تحملوش برد سيبريا القارص،، وفي بعض الدعاة الأولين لهم قبور فعلاً هناك،، واسماء العلماء دي محفورة في كيان مسلمين سيبريا وبيكنوا لهم كل التقدير!

سيبريا أكبر أقلية دينية في روسيا،، بيحبوا دينهم جدا،، ومهتمين بقضايا الأمة،، فلسطين - أفغانستان- العراق،،، إلخ،، لكنهم زعلانين جدا إننا ما بنبادلهمش نفس الإهتمام،، هم حاسين إنهم منسين أصلا،، وليهم حق،، كام حد فينا يعرف إنه له أخوات مسلمين عايشن في أكبر صحراء جليدية؟؟!

أحيانا كتير بيصادف العيد،، وقت التجمد،، فبيكون مستحيل الصلاة بره المسجد زي ما بنعمل كلنا،، لأن درجة الحرارة بتعدي الـ (-50)،، تعرفوا بيصلوا أزاي وقتها؟؟، مشايخهم عملوا فتوى للوضع ده تحديدا،، وأباحوا لهم السجود واقفين،، على ظهور بعض،، يعني كل واحد يسجد على ظهر اللي القدام!!،، لأن لو حد فكر يصلي بره المسجد هايموت متجمد!

هناك كل الطوائف الإسلامية عايشة في أمان مع بعضها،، لا فيه سني بيكفر شيعي،، ولا فيه سلفي بيكفر صوفي،، ولا فيه شيعي بيشتم في سني ويبيح دمه،، ولا فيه صوفي يتهم سلفي بالإرهاب والدموية!!،، يمكن عشان هم أقلية بياخدوا بحس بعض زي ما بنقول بالبلدي!!،، مش عارفة،، بس ياريت نتعلم منهم وبنطل نزيف الدم اللي بين المسلمين وبعض!

طيب عارفين يتجوزوا ازي؟؟،، هناك في سيبريا القوانين لا تعترف إلا بوثائق رسمية مدنية روسية وبس!!،، وطبعا الجواز الشرعي لا وجود له هناك بالمرة،، المسلمين بقى بيروحوا الأول يتجوزوا بالطريقة الإسلامية بالمسجد،، وبعدين بعد كده يروحوا يشوفوا موضوع الوثائق ده،، ولما أتسألوا ليه بتعملوا كده؟!،، قالوا عشان إحنا مسلمين ما ينفعش نتجوز غير كده،، ولازم نتجوز على الشريعة عشان ربنا يرضى علينا،، ويبارك في جوازنا ويرزقنا الزرية الصالحة،،، وبعدين نوثقه بقى زي ما روسيا عايزة!!،، كام واحد وواحدة مسلمين من اللي عايشين في بلاد إسلامية أتجوزوا عرفي/ مسيار/ متعة،،، إلخ فكروا كده؟؟!،، بس بيتمنوا إن روسيا توافق على الاعتراف بالزواج الإسلامي الشرعي قريب!

المسلمين هناك بيأكدوا إن كلمة سيبريا مشتقة من الصبر،، رغم إن الكلمة مش عربية أصلا،، لكنهم بيصبروا نفسهم!!،، هم صبروا كتير،، أيام القياصرة وظلمهم الطاغي،، وأيام الإتحاد السوفيتي ودموية شيوعيته،، وعندهم أمل إن بكره يكون أحسن،، لكن نفسهم أخواتهم يحسوا بيهم،، يتعاطفوا معاهم،، يعترفوا بوجودهم أصلا،، ويهتموا بقضيتهم زي ما هم بيهتموا بكل قضايا الأمة!،،

مشكلتهم مش مادية بس قد ما هي مشكلة نقص وندرة الموارد العلمية الشرعية المترجمة للالأوردية والتترية والروسية وكمان الموارد البشرية وده بيعوق انتشار الدعوة،، عايزين دعاة يروحوا هناك،، ناطقين باللغات دي ويعلموهم عربي كمان!،، هم بيوصلهم نسخ المصحف الشريف مترجمة من السعودية لكن برضو مش كفاية خالص،، بيعلموا نفسهم بنفسهم اللغة العربية بنشرها بين أبناءهم عن طرق الاهتمام بنشر الحلقات القرآنية في المساجد وبناء مدارس القرآن،،،!!!

أعتقد أن أبسط حقوقهم علينا،،
الدعـــاء لهــم،، إن ربنا يثبتهم

التعرف عليهم،، والاعتراف بوجود أخوة هناك
الاهتمام بقضيتهم،، ومحاولة مساعدتــهم إن أمكن!