11 يونيو 2011

11- يعني إيه بتشجع الأهلي؟!

.........

ده البوست الــــ 11
في حملة التدوين اليومي،،!
يعني إيه بتشجع الأهلي؟!



* يعني إنت من المحظوظين في الأرض،،
بتشجع فريق كرة قدم صحــــي،،
ضد الضغط والسكر والشلل الرعاش!

* يعني توقعاتك للماتش تكون غير أي مشجع تاني
هما بيتوقعوا مين اللي هايكسب،، لكن أنت بتتوقع
الأهلي هايدخل كام جول،، لأن المكسب ده بديهي!

* يعني تشجع الأهلي وأنت حاسس بالوحدة العربية
لأن الأشقاء العرب بيشجعوه معاك ،،!


* يعني لو حظك مش تمام وماقدرتش توصل البيت
أو الاستاد في الميعاد،، مش محتاج تتصل بحد تسأله
عن النتيجة،، كفاية تعد كام مرة مصــــــر كلها
بصوت راجل واحد،، صرخت وقالت جول!

* يعني لو قاعد مع حد بيحكي لك
عن أمجاد فريقه وإنه مرة خد الدوري،،
تعرف إنه من العصر الحجري!

* يعني وقت ماتش الأهلي،،
تلاقي مصر كلها بقت استاد
كل الكافيهات والقهاوي،،،
والورش والمحلات،، مشغلة الماتش
حتى في الشارع تلاقي ناس مطلعة التليفزيونات!

* يعني تشجيعك للأهلي وطنية،، عشان أصلا
جمهورية مصر أهلاوية،، بنسبة 90%
والـ 10%،، فرق أخرى!

* يعني لما واحد من الزمالك يحب يفكرك بأمجاد
فريقه سنة 44،، كفاية إنك تبص له وتقول:
خدوا 6 رايح،، جابوا 4 جي!



* يعني لو حد زملكاوي في الشغل معكنن عليك
معاك مفتاح عكننته،، وهي واحدة
بيبو وبشير،، بيبو والجون
وتكسر سمه للأبد!

* يعني أغاني الألتراس تعلمها لولادك،،
لأنها لها فوايد كتير جدا جدا:

- بتعودهم على الجرأة،، والصدق
قول الحق،، خليك جريء
النادي الأهلي،، أحسن فريق!

- بتعودهم على الأصل،، ووقفة الرجالة
أووو أوو أوووو،، جمهورالأهلي دا حماه
أووو أوو أوووو،، على الحلوة والمرة معاه
عمرى ما أحب غير الأهلي
ولا فى غيره يفرحني!

- بترفع من روحهم المعنوية،، وبتأكد ذاتهم
قوم يا أهلاوي،، وأحكي على الأنجازات
ميت سنـــة،، مليانة بطـــولات!

- بتنمي جواهم الروح الوطنية،، والثورة
بيقولوا أشمعنا أحمر،، سؤال بيسالوه
أرجعوا للتاريخ،، لو كنتوا تعرفوه
الأحمرهو معدن،، المصري الاصيل
في الثورة الدم كان،، على الصدور يسيل!

* يعني بتشجع فريق،، الألتراس بتاعه متميز
الكل يعمل دخلات اشتغالات،، إلا الريد ديفل
يدخلوا بدخلات للمثقفين فقط،،
وكلها حقائق تاريخية!


* يعني تبقى قاعد كافي خيرك شرك في المدرج
وإذ فجأتن تلاقي لاعب (مستوي زيادة) وقالع جزمته
ورافعها،، ويقولك والنبي والنبي،، أنزل رقعلي صداغي بيها!

* يعني تاخد حسنات لو أتفرجت على ماتش للفرق التانية
عشان طول ما أنت قاعد تتفرج،، بتحمد ربنا وبتقول:
الحمد الله الذي عافنا مما ابتلاهم به،،
وفضلنا على كثير ممن خلق تفضيلا،،!

ولو ما تفرجتش برضو بتاخد حسنات،،
عشان أصلا المشجعين فــ الفرق التانية
بتشجع الأندية بتاعتهم بشتيمت الأهلاوية،،
وإحنا ناخد الحسنات والدوري برضو!


* يعني الأهلي في أسوء حالاته يلاعب
فريق تاني في أحسن حالاته،، ولما يتعادل معانا
مديره الفني يقول،، لقد عاد فريقي بقوة
لأن التعادل معانا شرف مش أي حد ينوله!

* يعني أنت مشجع طيب وابن حلال،، فحتى
القلة المندسة من الفرق الأخرى،، بتهتف ليك
الشعب يريد،، الدوري يا عميد،،
العميد أحمد حسن طبعــا!

* يعني يصعب عليك الحكم اللي بينزل يحكم
أي ماتش للأهلي،، عشان الكل بيتهمه بالإنحياز
بس ده لإن قوة استعابهم صعب عليها تسوعب إن
فيه فريق لا يقهر،، ودايما كسبان!

* يعني الناس الحاقدة من كتر جهلها،، تشبه الأهلي
بالحزب الوطني،، مع إن جمال وعز زملكاوية
والساحر أبو تريكا إخـــوان!!

* يعني تكون فودافون هي الراعي الرسمي للأهلي
ويكون الشعـــار بتاعهــــا،،
القوة بين إيديك!!

* يعني بتشجيعك للأهلي،، بتأكد أسس المجتمع المصري
الدين لله،، الوطن للجميع،، والدوري للأهلي!



هناك 31 تعليقًا:

  1. وانا صغير كنت من مجانين الاهلى لدرجة ان كان أي حد زملكاوي لايمكن يقول كده ادامي وكان بينكر لو حد تاني فتن عليه هههههههههههه

    لكن بجد التعصب وحش بيخلي الواحد ميشفش ان في في الفرق التانية حاجات حلوة عندك مثلاً بركات في الاسماعيلي وابوتريكه في الترسانه وجدو في الاتحاد :)

    ردحذف
  2. شوفي انا ضد اي شيء في الدنيا بيزود وقيعة وبيعمل فجوة بين اي طرفين بيمثلوا شرائح في الشعب سواء مسلم ومسيحي ليبرالي وسلفي يميني ويساري او حتى زملكاوي واهلاوي
    انا ضد التعصب اللي يخليني بادخل الاستاد وانا على كف عفريت ومغامرة غير مأمونة
    انا ضد اي التراس باي لون من الالوان ضد اي لافتة عنصرية او هتاف عنصري
    فقط مع احترام المنافس شجع ناديك باحترام وخلاص
    لكن متهينش الطرف التاني
    ليه الثقافة دي مش موجودة؟
    ليه بنلاقي لافتة مثلا زي اللي انتي جايباها (للانجليز فقط) معناها مثلا لو انت مش اهلاوي انت مش مصري؟ ونسحب جنسية الزملكاوية وننسى ان في منهم شهداء ضحوا بحياتهم من كام شهر علشاننا
    يا ستي والله انا صحيح زملكاوي بس انا مش متعصب ابدا ومش بتفرق معايا اللي بيفرق معايا اكتر الحاجات العنصرية باي شكل وباي كيفية من الجانبين لما الزملكاوية يقولوا على الاهلي النادي الماسوني ولما الاهلاوية يحطوا صليب جنب علم الزمالك ويقولوا لمزبلة التاريخ
    ده اللي بيفرق معايا ووقتها لازم نقف ونقول الى مزبلة التاريخ يا التراس باي لون واي شكل سواء ابيض او احمر او اصفر او اخضر يكفيكم عدم احترام والفاظ زبالة زرعتوها في اطفالنا
    تحياتي واشكرك

    ردحذف
  3. هههههههههههههههههههههههه
    وفيتي وكفيتي
    ابصم علي كلامك بالعشرة

    ردحذف
  4. هههههههههههههههههههههههه
    ضحكتنى كذا جمله فيه
    جميل يا رحاب
    تسلم ايدك

    ردحذف
  5. هههههههههههههههههههههههههههههههههه

    أه عارف ان انت اهلاوية

    بس مش كده (:

    على العموم مبروك الدورى (:

    ردحذف
  6. تسمحيلى اخده على موقع ستاد الاهلى

    ردحذف
  7. السلام عليكم

    إيه أسلوب غسيل المخ ده...؟!
    بعد ده كله... أنا لو مش أهلاوي هبقى أهلاوي...

    وممكن نسميه إرهاب كروي...
    يعني اللي مش أهلاوي هيخاف يقول...!!

    طبعا أنا عارف إن البوست من النوع الخفيف اللي مش مستحمل آراء عميقة وفلسفة حول قيم التعصب وخلافه..
    لكن ليه لأ..

    أحب أقول في هذوها الشأن إن التعصب لكيان أو جهة ما في حد ذاته ليس خطأ فهو طبيعة وغريزة بشرية.. عارف إن ناس هتستغرب من كلامي.. لكن كما تعودت لدي دليل من السيرة..!!!

    الإسلام لم يأتي لكبت العواطف والطبائع البشرية، لكنه يذشبها ويوجهها بشكل إيجابي.. فمثلا نجد الرسول (ص) في الغزوات كان يعطي راية للمهاجرين وراية للأنصار ليستحث غريزة الانتماء والفخر في التنافس الشريف الذي ينفع الدين...

    إيه رأيك...؟ آدي تعصبك للأهلي بقى شرعي...!!!!

    نتنافس مع الزملكاوية عادي... بس المــــهـــــم ............. نفضل اخواااااات. (على رأي محمد صبحي)

    ---------------
    على فكرة في بوست هنزله عن علاقة الأهلي بالإخوان!!!! (أظني ده هتيجي جري علشان تقرأيه)...!

    تحياتي.

    ردحذف
  8. بيب اهلى بيب اهلى بيب اهلى

    ايه الحلاوة دى
    بجد لعيبة

    واحد صاحبى زملكاوى اثناء البطولة العربية زمان كانت فى مباراة للاهلى و مبارة للزمالك لما كانت على الِ ART فشل فى العثور على كافيه بيعرض ماتش الزمالك فاضطر ان يشاهد مباراة الاهلى
    سيبك انتى اهم حاجة انك مش متعصبة زى حالاتى

    تحياتى

    ردحذف
  9. ازيك يا فتافيت

    انا منشكح بالموضوع بصراحه وهشيره عالفيس بعد اذنك

    وكمان هغيظ بيه بعض الاصدقاء اللي بحب اناغشهم من اخواتي الزمالكاويه









    وحشتني المدونه جداااااااااااااااا

    ردحذف
  10. ازيك فتافيت عاملة اية

    اشكرك على سؤالك عليا

    ربنا يسعدك

    تحياتى

    ردحذف
  11. إيه لازمته التعصب ده بس
    ههههههههههههههه


    شجعى الاهلى براحتك

    مهو كل الناس بتشجع الاهلى عادى يعنى

    ردحذف
  12. تامر علي

    ههههههههههههه هههههههههههه ههههههههههههههههه هههههههههههههههههههههههههههه.. صح صح
    اول مرة اخد بالي من الفرق التانية واللهيبة بتاعتهم :))))

    انا من كتر حبي في الاهلي
    بوظت خطوبة.. عشان كان زملكاوي متعصب
    وانا زي ما سيادتك شايف ماليش في التعصب نهائي.. حتى بيعملي حموضة اصلا :))... وسيبنا بعض فعلا.. وكان سبب ضمن الاسباب ماتش الاهلي والزمالك 18/9/2007... لما الأهلي لب الزمالك واحد صفر.. وطبعا لاني مش متعصبة خالص... جبتله اكتئاب :))))

    ردحذف
  13. مصطفى سيف

    انا بحب الالتراس بتاعنا جدا
    وبصراحة التراس الفرق التانية هو اللي اخترع موضوع ستيمة الاندية التانية في تشجيع الفريق.. لما بقوا يشجعوا فراقهم بشتيمة الاهلي!!!

    موضوع الصليب اللي جنب الزمالك.. ده علم انجلترا يا فندم.. وكان المقصود بيه ان الزمالك كان من إنشاء الانجليز.. وكان اصلا معمول للترفيه عن الانجليز في مصر!!!.. وزبلة التاريخ مقصود بيها مؤسسي النادي.. اللي هم الاحتلال!!!!!!

    لكن احنا مثلا فريق ماسوني على اي اساس؟؟
    زي ما قالوا عنا زي الحزب الوطني.. اي كلام في اي اتجاه وخلاص!!!!

    معلش مش هانتفق في الموضوع ده
    وده لاني فعلا اهلاوية ومتعصبة للاسف :)
    مع اني بتقبل الاخر والله
    يعني ما بفرقش لما نكسب الزمالك او نكسب الاسماعيلي
    او حتى نكسب المصري... عادي بفرح بيهم كلهم عادي يعني :)).. ما بفرقش بينهم !

    نورتني يا دكترة
    وما تزعلش مني.. كله الا الاهلي :)

    ردحذف
  14. sendbad

    هههههههههههههه
    كويس ان الاهلي رجعك يا سندباد!!
    ليه ما بقتش بتزورني يا أ. أمجد؟ :(
    الأهلي ده بركة أصلا والله
    نورت الدنيا كلها :)

    ردحذف
  15. Bent Men ElZaman Da !!

    تسلميلي يا بنوتة
    وربنا يسعدك دايما يا جميلة
    نورتي البوست :)

    ردحذف
  16. Ramy

    ههههههههههههههههه
    ده كده وكده وابو كده
    ده انا ماقولتش حاجة اصلا :)))
    اقرا الكومنت الاولاني بتاعي على أ. تامر علي
    وانت تعرف الاهلي ايه عندي :))))

    وان شاء الله ناخد الدوري
    بس بلاش نقاطع بس :)

    ردحذف
  17. يوميات شاب منوفى

    طبعا طبعا طبعا
    ده شرف يا فندم ليا :)

    ردحذف
  18. ماجد القاضي

    ايوة اهلاوي.. يعني اهلاوي
    امال ايه.. هو احنا بنهرج ولا ايه؟؟
    تعرف حضرتك.. ان فيه مجلس اعلى اهلاوي :)))
    اه والله بجد ع الفيسبوك يعني كله تحت السيطرة اصلا :)

    صلى الله عليه وسلم :)
    جميل أوي المثل اللي كتبته ده.. هو ده الكلام
    عااش النادي الاهلي الاسلامي :))

    نورتني يا فندم
    وحاول تفكر في موضوع الاهلي
    هاتتبسط معانا اوي :)

    ردحذف
  19. ابراهيم رزق

    ههههههههههههههههههههههههه
    مرة برضو اخويا كان عايز يتفرج على ماتش للزمالك والاهلي كان بيلعب.. وفضل يدور على كافي مشغل ماتش الزمالك او على الاقل مش مشغل ماتش الاهلي.. ومافيش فايدة.. وقام داخل فيلم درس خصوصي ونام في السينما عشان ما ياخدش جرعة يأس من الفرجة ع الاهلي
    هههههههههههههههههههههههههههههههههه

    الأقلية دول بيعانوا والله :)))
    والحمد لله.. الواحد مالوش في التعصب خالص
    ههههههههه... نورتني

    ردحذف
  20. أبو العريف

    يااااااااااه يا هندسة
    كل دي غيبة .. والله الأهلي سره بتاع
    يعني رجع سندباد وابو العريف..!!!!
    بركااااااااااتك يا اهلي بركاتك :)))

    شير يا فندم وغيظ براحتك.. واهو
    كله بثوابه بقى :)))

    ردحذف
  21. تيمور

    O.o مش ممكن تيموووور؟!
    حمدلله ع السلامة.. نورت بلوجسبوت كله والله

    يارب المانع كان خير
    عود حميد :)

    ردحذف
  22. د/عرفه

    هههههههههههههههههههههه
    قصدك كل مصر بتشجع الأهلي
    وده العــادي.. كده المعنى يظبط :))))

    ردحذف
  23. http://www.stadelahly.com/news/details.php?newsID=7730

    رابط موضوعك على ستاد الاهلى نرجوا مزيد من روائعك الكرويه

    ردحذف
  24. أزال أحد مشرفي المدونة هذا التعليق.

    ردحذف
  25. أزال أحد مشرفي المدونة هذا التعليق.

    ردحذف
  26. أزال أحد مشرفي المدونة هذا التعليق.

    ردحذف
  27. أزال أحد مشرفي المدونة هذا التعليق.

    ردحذف
  28. أزال أحد مشرفي المدونة هذا التعليق.

    ردحذف

خلل براحتك من غير انتظار .. فتافيت أصلاً بتحب الخيار