اللهو الخفي.. يخليك لامك يارب

طلعت امبارح من الشغل.. وروحت ارجع بيجامة جبتها.. وطلعت وحشة عليا في البيت لما قستها بمزاج.
كنت عاملة زي يهود الهولوكوست .. او الحمار الوحشي.. قصدي الحمارة الوحشية.علشان الته المربوطة بعزها موت.

روحت المحل وبدلت البيجامة.. وطلعت اخد تاكسي تاني علشان اروح.
والله مرتبي كله طالع مواصلات يالا
خلي السواقين يكلوا عيش.

شاروت لتاكسي..

وقالي اتفضلي قبل حتى ما اقول راحة فين
( يا حلولي ده ايه الحظ ده طول عمري بفضل اتحايل عليهم)
لان بيتنا في منطقة بعيدة عن وسط البلد.
بس السواق شكله ابن حلال قال حرام اقف في البرد ده كده والساعه 10 بليل.ناس ذوق ذوق صراحة.

في ثانية الا ثانية كنت راكبة التاكسي قبل ما يغير رأيه وارجع انشف من الصقيع ده.

في الطريق شاورت واحدة .. وسألها راحة فين ( طبعا الناس مقامات هي تتسأل وانا لا) المهم نزلت ركبتها هي جوه لاني هانزل قبلها .. وقال لها الاجرة 4 جنيه.
وده كتير جدا في الزقازيق.. قولت اه يبقى هايهف 4 جنيه مني.يلا مش مهم المهم اروح.

الست اتشالت واتحط واربع عفاريت لما يبقوا ينططوك نزلني هنا.. وقومت نازلة علشان الست تنزل.
ووقتها بصيت على رقم التاكسي.. لاني هوايتي حفظ ارقام التاكسيات.واهي رياضة بقى .. انزل واركب.. اركب وانزل

نزلت هي .. وركبت انا.. ودقيقة موبايل السواق ادى ميسد.. ودخل في شارع جانبي.. هو طريق مختصر لبيتنا.
وواحد شاور له من على اول الناصية.. وركب معانا وكان رايح قرية تبعد عن بيتنا تلت ساعة.
بس طريقها نفس طريقنا بس عكس الطريق..

فعملت فيها فلحوسة وقولت له انا قولت لك راحة فين.. لازم تنزلني مكاني مش هاعدي طرق انا.
هانزل في الشارع اللي قولت عليه.
شخصية شخصية يعني.

قاللي من عنيه يا ابله ده انتي تأمر أمر
( يا حلولي تاني التاكسي بيسمع الكلام وماقلش لا هاتنزلي الناحية التانية)

جينا بقى عند الطريق اللي بيفصل بين طريق القرية وطريق بيتنا .. بيتنا شمال وطريق القرية على طول .

بفتح الشنطة وبطلع 4 جنيه وعيني فيهم اصلا لانهم كتير اوي .. وبرفع عيني من الشطنة .

ايييييييييييه ده؟؟ ايييييييييييه ده؟؟

لاقيته مشي على طول ومادخلش شمال .. وده معناه انه طلع
الصحراااااااااااوي.

قلبي وقع في رجلي .. الساعة 10 بليل وموبايلي فاصل شحن .. وجوز تيران معايا في التاكسي.

انا.. انت يا عم انت رايح فين.؟؟ انت عبيط ولا ايه؟؟

السواق.. ليه بس كده يا ابله هاوصل الراجل بدل ما تعدي الطريق هانزلك مطرح مانتي عايزة.

انا.. عايزة ايه انا ايه اللي يطلعني الصحراوي دلوقتي انا؟؟

الراكب.. يعني الحق علينا يا ابله اننا عايزين نريحك؟؟.. احنا عايزين راحتك.!!

ويلهوووووووووي ويا مصبتي السودة .. تريحوني؟؟.. وعايزين راحتي؟؟..

ده جمع مش مفرد.. يعني مع بعض هما .
يعني انا مخطوفة!!!!!!!!

اعمل ايه ياربي دلوقتي ؟؟ اعمل ايه؟؟

لو فضلت في التاكسي.. اكيد بكره هابقى عنوان في الجرايد تورين يخطفوا فتافيت وغرغروا بيها.

ولو نزلت في الطريق ده لو عرفت افلت منهم..
هايبقى بكره برضو عنوان في الجرايد بس بدل تورينهاتبقى امه لا اله الا الله غرغرت بيا.

يا وقعة هباب يعني في الحالتين هايتغرغر بيا..يلهوي وقال انا بقول عليه سواق ابن حلالده ابن صرمة قديمة ده ابن تييييييييييت.

فضلت حوالي دقيقة مش عارفة اعمل ايه.. وكل شوية حاجة تنط قصادي

مرة المدونة..
ياااااااااه خلاص كده فتافيت ربع قرن راحت ومافيش فتافيت لولبية تاني؟؟

مرة الجواز..
يلهوي مش هاتجوز وادخل دنيا؟؟ .. ايه ده ماتفقناش على كده اني ادخل الدنيا على ايد تورين زي دول..
اااااااه هو ذنب تامر دياب وعمرو تشي .. لما نزلت لهم سيسي احبطهم .. اهو ربنا رزقني بتورين علشان اعرف
ان لسه فيك تيران يا مصر.

ومرة ماما..
وهي بتدعي ليا بالستر.. شكلها كده باب السما كان مقفول ولا ما كنتش بتدعي بنية صافية.

ماشي حسابك معايا بعدين يا ماما
بس انا وراي خطف دلوقيت

وفجأة نط قصادي جوز حمام في التلاجة

ماما سلقاه ومستني بس احمره واكله.. ااااااه يا جزم يا اخوتي يارب اللي يكلوا غيري يزور
ياترى هايكلوا ولا هايحترموا غبتيويقولوا بلاش كان عينها فيهم قبل الخطف؟؟

ركبي بتخبط في بعض .. ريقي مش عارفة ابلعه .. الموبايل مافهوش شحن ولا رصيد .
الطريق كل شوية يبقى ضلمة اكتر .. ومقطوع اكتر.. والله مرعوووووووبة جدا والخوف بيزيد.

وده كله حصل في خلال اقل من دقيقة.

فجأة وربنا كبير بقى .. لان فتافيت طيبة وبنت حلال .. جت في دماغي فكرة.

ويا صابت يا جوز تيران بقى.

طلعت الموبايل اللي فاصل شحن .. وفي لمح البصر سمعوا صوتي وانا بقول..

انا.. ايوة رقم التاكسي اللي ركباه (00 00)..(كده انا امان بقى رقم التاكسي مع اللهو الخفي اللي بكلمه.. اكيد هاينقذني)

السواق.. فيه ايه يا ابله بتدي مين رقم التاكسي؟؟..(ولا كأني سمعاه)

انا.. ايوة على الطريق الصحراوي بعد المرور.
(علشان اللهو الخفي يعرف مكاني ومايتوهش)

الراكب.. ايه يا ابله فيه ايه بس؟؟

كده تمام اللهوي الخفي عرف رقم التاكسي ومكاني.. اكيد زمانه جاي.
بطمن نفسي وبستعد لباقي الفكرة بقى

بصيت للسواق واللي معاه .. ولبست وش الاجرام .
ولا ابو موته في زمانه والله .
وانا اصلا ركبي بترقص من الخوف وقولت للراكب

انا.. انت مال امك اصلا بتتدخل في الكلام ليه هو بروح اهلك معاه..
وقولت لو خدت بوكس في وشي يبقى راجل محترم ومش ناوي خطف.
لكن لو طلع سيس بعد البوق ده.. يبقى انا رهينة بجد.

الراكب.. وليه بس الغلط ده الراجل ماحبش يخليكي تعدي الطريق.
(يا وقعة هباب ده خطف بجد)

انا.. برضو وانت مال امك بالموضوع انا قلت رقم التاكسي ماقولتش مقاس جزمة اهلك.

السواق.. وليه بس رقم التاكسي والطريق هو احنا هانخطفك يعني؟؟ ..
(يا وقعة طين تاني نون الجمع.. هو حمل تور واحد لما يبقوا تورين)

انا.. مش مريحني بقى نون الجمع ديه.. هو انتم مع بعض ولا ايه؟؟. وبعدين خطف مين يا سيس انت وهو؟ هو انت.....

السواق قاطعني.. مين بس جيب سيرة خطف الموضوع كله 10 دقايق تأخير.

انا.. خطف مين يا اوسطى.. ده خيالك العلمي.. انت ماتقدرش تخطفني لانهم (اللهوي الخفي طبعا) معاهم الرقم والطريق
وخلال ربع ساعة لو ماكنتش في البيت.. اعفن عسكري مرور فيكي يا شرقية هيجبكم من افاقكم.

الراكب.. الله الله يجيبنا ليه بس وانا مالي بالموضوع انا راكب بس.نزلني هنا ياعم كان يوم اسود يوم ما سمعت كلامك.
انا.. شوفت .. اهو سمعت كلامك.. والله ده خطف بجد بقى؟؟

السواق.. تيييييت امك واللي جابوا امك ناقصة تيييت امك دلوقتي..
والله يا ابله راكب ومش موصله كمان.. انزل هنا يا ابن التيييييييييييت (بس تيت قوية جدا)

الراجل نزل في مكان هوس هوس وضلمة كيك.. ومافيهوش صريخ ابن يومين.

انا.. مش ملاحظ ان الربع ساعة قربت تخلص وكده هايقلقوا (اصل اللهو الخفي بيعزني اووووي)
وانت الجاني على نفسك يا حلاوة.

السواق.. والله يا ابلة ماشي بسرعة اهو والله قبل الربع ساعة هاتكوني في البيت ولا يقلقوا ولا حاجة.
(ايه ده هو يعرف اللهو الخفي ولا ايه؟؟)

انا.. طيب اخلص بس.. واهو حتى اشم هوا نضيف من بتاع الغيطان.

السواق مشي بسرعة جدا.. وخلال 7 دقايق كنت قصاد الشارع بتعنا واللي ما ينفعش عربية تمشي فيه لانه مكسر.

اصل عقبال املاتكم ركبنا الغاز الطبيعي من سنة.. فالحكومة الله يعمر بيتها مش فاضية بقى تدخل غاز السنة اللي فاتت وترصف السنة دية.
( الله يخلي الحكومة ويخليها لامها)

انا.. ايه ده انا بيتي مش هنا؟؟ .. البيت اخر الشارع.؟

السواق.. بس الشارع يا ابلة ماينفعش ادخل فيه؟

انا.. انت حر الربع ساعة فاضل فيها 3 دقايق وعيش بقى انا مالي.
(اصل اللهو الخفي دقيق جدا في مواعيده صراحة يعني)

السواق.. حاضر يا ابله تحت امرك والله.. انا عايز اريحك .
وقتها ضحكت جدا لان اريحك ديه غير اريحك التانية خالص

وصلت تحت البيت .. وطبعا التاكسي هايعوز عفشة جديدة ..
طلعت جنيه وربع من الشنطة واديتهم للسواق.وده قليل جدا في الشرقية..

السواق مسكهم في ايده وبص فيهم وبصلي..

انا.. ايه شوية ولا ايه؟؟

السواق.. لا يا ابله ده حتى كتير..وبيمد ايديه بالربع جنيه.

انا.. لا لا يا شيخ مش هاخده والله ده حتى البنزين غلي اوي.

ودخلت العمارة بتاعتنا.. وانا بتشاهد وبحمد ربنا وبابوس ايدي شعر ودقن

معرفش لو ماكنتش الست دية نزلت وشوفت رقم التاكسي.
كان ايه اللي حصل؟؟

لو ما فكرتش في الموبايل .. واتكلمت بثقة واني مش خايفة.
كان ايه اللي حصل؟؟

لو اللهو الخفي روح قلبي.. ماكنش رد عليا.
:))
كان ايه اللي حصل؟؟

ربنا يخلي اللهو الخفي .. ويخليه لامه.

امييييييييين

:)