بالجوز بالفرد.. فاكرينك يا منتظر

يا خسارة البطولة.. وياخسارة القيم.. لما أبطال العرب (بعد الشر يعني لو عندنا أبطال) يبقوا مجرد خبر على السريع كده في الجرايد.

ومجرد كلمتين في شات بار الحظيرة وكلمة وربع على شات بار العبرية!!

لما يتحول رجل العام.. (أهم شخصية في 2008).. لمجرد أيقونة على قناة البغدادية كل يوم العدد اللي تحتها يزيد رقم
والله عيب علينا.

لما الــ(CNN).. تقول انه اهم شخصية في 2008 على الاطلاق .
وتفوق حتى على اوباما في الشعبية والكارزمة

واحنا حتى مش فاكرينه بدعاء.. مش هاقول دعم او تضامن
لا ده حتى الدعاء له بقى خلاص فينيتو.

شاب زي الورد ماكملش 30 سنة.. وعمل اللي كنا كلنا (سواء موافقين على اللي عمله أو رافضين) نفسنا ومنى عنيننا نعمله.
وضرب تيت العالم الاول بوش بالجزمة
يبقى خلاص كده في طي النسيان؟؟!!!


الراجل مرمي في السجن.. وخلاص على كده بقى راح منتظر الزيدي في الوبا مع هنادي.
بس هنادي لاقت أمنة تسأل عليها وتاخد بتارها من الباشمهدنز.

لكن الزيدي خلاص بخ كده ولا حد فاكره أصلاً.

كان محاكمته يوم 19 اللي فات ده.. وقال ايه كل اللي اتكتب عنه انه راح المحكمة وطلع من المحكمة والقضية اتأجلت.
يا حلاوة يا ولاد.. وكان الله بالسر عليم.

فين اللقاءات؟؟.. فين الصور؟؟.. فين الأخبار؟؟.
فين الراجل يا عرب فين اللي رفع راسكم بجزمته.
وياخبتي لما خلاص بقى كل اللي في ايدينا مجرد جزمة نعبر بها عن رفضنا.!!.
وحتى الجزمة مش لاقية اللي يفتكرها.

بس أهو عبر وقال وعمل اللي في نفسه.. الدور والباقي على الناس المأنتخة اللي بقى عندها بلادة ونطاعة وخلاص.. حتى الراجل بعد ما كان على كل لسان.
معدش حد فاكره ولا حتى فيه عنه خبر يفهم الناس ماله ولا جرى له ايه؟؟

بقى هو ده خلاص مصير الرجالة في الدنيا.. الناس تهلل وتصقف وقت العملة.
وبعدها خلاص في داهية بقى يشيل هو الطين؟؟

وقال ايه.. في تكريت (مدينة عراقية).. الناس حبت تخلد الراجل تقول له والنبي فاكرينك.
وعملت له نصب تذكاري من البرونز على شكل جزمة كبيرة..
ويا حسرة قلبي اللي دفع تمنها ملجأ ايتام.
واتكتب عليها ايه:

صياماً يا منتظر حتى يفطر السيف بالدم .. وصمتاً حتى يصدح الحق يا فمي

الحكومة معجبهاش ولايونكن تفضل الجزمة دية ابدا.. تقريبا خافوا ليفتكر الشعب عملت المنتظر ويبدأ ينفذها.
قالوا بعد ما صدقنا ان الراجل خلاص اتنسى وماعدش حد فاكره.
نقوم نعمله نصب يفكر الناس بيه.. شيل شيل يا عم.
وملعون ابو فلوس الايتام اللي ادفعت فيه .. لابو الايتام نفسهم بلا وجع دماغ.
عمااااااار يا عراق.

انا هتشل بجد.. والله هاموت من القهر.. ليه كده ليه؟؟

ليه حتى ماحدش فاكره ليه ماحدش بيسأل عليه خالص كده؟؟
ليه بقى مجرد ايقونة وخبر عابر كده وبس؟؟

ده كده الناس تخاف تعمل اي حاجة.. لايضيعوا وحتى مايلاقوش اللي يترحم عليهم.

ليه مافيش حد يقف ورا الرجالة.. ويقوللهم احنا معاكم.
وما تخفوش مش هاتروحوا هدر؟؟

ايه القرف ده.. يعني لا بنعمل حاجة.. ولا حتى نقف جنب اللي عمل.. وعايزين يبقى لنا قيمة
ابقوا تييييييت على قبري لو حصل.

كنت كتبت مدونة بعد ما منتظر نش بوش بالجزمة في وش امه بيوم واحد
بس ماكنتش فتافيت لسه اتولدت.
قولت بما ان ماحدش فاكره.. اعيد نشر جزء من المدونة .

تنشرها فتافيت يمكن الناس تفتكر منتظر الزيدي..
صاحب نظرية ::

الراجل مش بس بكلمته الراجل بضربه لبوش بجزمته


وكانت بعنوان بالجوز بالفرد.. نفديك يا منتظر..
بس العنوان الاصلح دلوقتي.
بالجوز بالفرد.. فاكرينك يا منتظر.

والآن وعلى طريقة أصالة (يسمحولي الكل).. فليسمح لي الجميع كشابة عربية
أن أكتب السطور الآتية النابعة من نبض الشارع :

(أعلنت كلا من جماعتي "نايك وأديدس" عدم مسؤوليتهما عن أحداث 14 ديسمبر.. بينما أعلنت جماعة "كعب الصحراء" مسؤوليتها عن الحادث حيث قام الجناح الحذائي بالجماعة بقذف قذيفتين من طراز "إف 44" ضد وجه "جورج دبليو شوز" وقد نجا "شوز" من العملية الحذائية.. بينما أصيب العلم الأمريكي إصابة بالغة من جراء القذف.

وقد أجرى "شوز" اتصالاته بعد القذف مباشرة ليطمئن ذويه وأخص الكوندا ليزا رايس باتصال أعرب فيه عن مدى تأثره بعدم وجودها معه حيث قال: "كوتشي فين وأنا بنضرب؟؟".. ولكنها أجابته بحزمها المعتاد قائلة: "لا حذاء للديمقراطية".

وقد تم إعلان يوم 14 ديسمبر يوم الحذاء العالمي.. وجدير بالذكر أنه تم القبض على كل بائعي الأحذية بالعالم الإسلامي بتهمة "الاتجار بالأحذية دون ترخيص".. وتم وضع قانون يجرم بيع الأحذية لمن دون 18 عام.

وعن رد فعل الشارع العربي الفني.. قامت الفنانة هيفاء وهبي بغناء أغنية "بوش الواوا" تضامنا مع الموقف الراهن.. بينما أعربت الفنانة نانسي عجرم على مدى إعجابها بما حدث بغناء أغنية "جزمة ونص".. وقامت الفنانة إليسا بتغير اسم أغنيتها الأخيرة "بتمون إلي بشوز" تضامنا مع الزيدي.

وقام ورثة الفنانة الراحلة زينات صدقي بطلب تغير القول المأثور للفنانة الراحلة (كتاكيتو بني) إلي "جزمتو بني".. أعرابا عن مدى سعادتهم "بجزمة الزيدي" البنية اللون.
وطالب "شوز الأب" بتكريم الفنانة المصرية ميرفت آمين وجعلها سفيرة للنوايا الحسنة في العالم العربي عن فيلم "حافية على جسر من ذهب".

وعن ردة فعل الجماعة الإسلامية المتطرفة.. أصدرت إحدى الجماعات المتطرفة بيانا بشجب فعلة "منتظر الزيدي" حيث أنه قام بقذف الفردة اليسرى قبل اليمنى.. مما يخالف الشريعة.. مستندين على أن الفردة اليمنى قد أصابت العلم الأمريكي في مقتل بينما راحت الفردة اليسرى هباء.)

بالجوز بالفرد.. فاكرينك يا منتظر

ولو حتى نسيوك .. فاكراااك

يا راجل في زمن .. نامت فيه الرجالة

وتغندروا الاشباه

:((