21 فبراير 2009

بالجوز بالفرد.. فاكرينك يا منتظر

يا خسارة البطولة.. وياخسارة القيم.. لما أبطال العرب (بعد الشر يعني لو عندنا أبطال) يبقوا مجرد خبر على السريع كده في الجرايد.

ومجرد كلمتين في شات بار الحظيرة وكلمة وربع على شات بار العبرية!!

لما يتحول رجل العام.. (أهم شخصية في 2008).. لمجرد أيقونة على قناة البغدادية كل يوم العدد اللي تحتها يزيد رقم
والله عيب علينا.

لما الــ(CNN).. تقول انه اهم شخصية في 2008 على الاطلاق .
وتفوق حتى على اوباما في الشعبية والكارزمة

واحنا حتى مش فاكرينه بدعاء.. مش هاقول دعم او تضامن
لا ده حتى الدعاء له بقى خلاص فينيتو.

شاب زي الورد ماكملش 30 سنة.. وعمل اللي كنا كلنا (سواء موافقين على اللي عمله أو رافضين) نفسنا ومنى عنيننا نعمله.
وضرب تيت العالم الاول بوش بالجزمة
يبقى خلاص كده في طي النسيان؟؟!!!


الراجل مرمي في السجن.. وخلاص على كده بقى راح منتظر الزيدي في الوبا مع هنادي.
بس هنادي لاقت أمنة تسأل عليها وتاخد بتارها من الباشمهدنز.


لكن الزيدي خلاص بخ كده ولا حد فاكره أصلاً.

كان محاكمته يوم 19 اللي فات ده.. وقال ايه كل اللي اتكتب عنه انه راح المحكمة وطلع من المحكمة والقضية اتأجلت.
يا حلاوة يا ولاد.. وكان الله بالسر عليم.

فين اللقاءات؟؟.. فين الصور؟؟.. فين الأخبار؟؟.
فين الراجل يا عرب فين اللي رفع راسكم بجزمته.
وياخبتي لما خلاص بقى كل اللي في ايدينا مجرد جزمة نعبر بها عن رفضنا.!!.

وحتى الجزمة مش لاقية اللي يفتكرها.

بس أهو عبر وقال وعمل اللي في نفسه.. الدور والباقي على الناس المأنتخة اللي بقى عندها بلادة ونطاعة وخلاص.. حتى الراجل بعد ما كان على كل لسان.
معدش حد فاكره ولا حتى فيه عنه خبر يفهم الناس ماله ولا جرى له ايه؟؟


بقى هو ده خلاص مصير الرجالة في الدنيا.. الناس تهلل وتصقف وقت العملة.
وبعدها خلاص في داهية بقى يشيل هو الطين؟؟


وقال ايه.. في تكريت (مدينة عراقية).. الناس حبت تخلد الراجل تقول له والنبي فاكرينك.
وعملت له نصب تذكاري من البرونز على شكل جزمة كبيرة..
ويا حسرة قلبي اللي دفع تمنها ملجأ ايتام.
واتكتب عليها ايه:


صياماً يا منتظر حتى يفطر السيف بالدم .. وصمتاً حتى يصدح الحق يا فمي


الحكومة معجبهاش ولايونكن تفضل الجزمة دية ابدا.. تقريبا خافوا ليفتكر الشعب عملت المنتظر ويبدأ ينفذها.
قالوا بعد ما صدقنا ان الراجل خلاص اتنسى وماعدش حد فاكره.
نقوم نعمله نصب يفكر الناس بيه.. شيل شيل يا عم.
وملعون ابو فلوس الايتام اللي ادفعت فيه .. لابو الايتام نفسهم بلا وجع دماغ.
عمااااااار يا عراق.

انا هتشل بجد.. والله هاموت من القهر.. ليه كده ليه؟؟
ليه حتى ماحدش فاكره ليه ماحدش بيسأل عليه خالص كده؟؟
ليه بقى مجرد ايقونة وخبر عابر كده وبس؟؟


ده كده الناس تخاف تعمل اي حاجة.. لايضيعوا وحتى مايلاقوش اللي يترحم عليهم.

ليه مافيش حد يقف ورا الرجالة.. ويقوللهم احنا معاكم.
وما تخفوش مش هاتروحوا هدر؟؟


ايه القرف ده.. يعني لا بنعمل حاجة.. ولا حتى نقف جنب اللي عمل.. وعايزين يبقى لنا قيمة
ابقوا تييييييت على قبري لو حصل.

كنت كتبت مدونة بعد ما منتظر نش بوش بالجزمة في وش امه بيوم واحد
بس ماكنتش فتافيت لسه اتولدت.
قولت بما ان ماحدش فاكره.. اعيد نشر جزء من المدونة .

تنشرها فتافيت يمكن الناس تفتكر منتظر الزيدي..
صاحب نظرية ::

الراجل مش بس بكلمته الراجل بضربه لبوش بجزمته


وكانت بعنوان بالجوز بالفرد.. نفديك يا منتظر..
بس العنوان الاصلح دلوقتي
.
بالجوز بالفرد.. فاكرينك يا منتظر.

والآن وعلى طريقة أصالة (يسمحولي الكل).. فليسمح لي الجميع كشابة عربية
أن أكتب السطور الآتية النابعة من نبض الشارع :


(أعلنت كلا من جماعتي "نايك وأديدس" عدم مسؤوليتهما عن أحداث 14 ديسمبر.. بينما أعلنت جماعة "كعب الصحراء" مسؤوليتها عن الحادث حيث قام الجناح الحذائي بالجماعة بقذف قذيفتين من طراز "إف 44" ضد وجه "جورج دبليو شوز" وقد نجا "شوز" من العملية الحذائية.. بينما أصيب العلم الأمريكي إصابة بالغة من جراء القذف.

وقد أجرى "شوز" اتصالاته بعد القذف مباشرة ليطمئن ذويه وأخص الكوندا ليزا رايس باتصال أعرب فيه عن مدى تأثره بعدم وجودها معه حيث قال: "كوتشي فين وأنا بنضرب؟؟".. ولكنها أجابته بحزمها المعتاد قائلة: "لا حذاء للديمقراطية".

وقد تم إعلان يوم 14 ديسمبر يوم الحذاء العالمي.. وجدير بالذكر أنه تم القبض على كل بائعي الأحذية بالعالم الإسلامي بتهمة "الاتجار بالأحذية دون ترخيص".. وتم وضع قانون يجرم بيع الأحذية لمن دون 18 عام.

وعن رد فعل الشارع العربي الفني.. قامت الفنانة هيفاء وهبي بغناء أغنية "بوش الواوا" تضامنا مع الموقف الراهن.. بينما أعربت الفنانة نانسي عجرم على مدى إعجابها بما حدث بغناء أغنية "جزمة ونص".. وقامت الفنانة إليسا بتغير اسم أغنيتها الأخيرة "بتمون إلي بشوز" تضامنا مع الزيدي.

وقام ورثة الفنانة الراحلة زينات صدقي بطلب تغير القول المأثور للفنانة الراحلة (كتاكيتو بني) إلي "جزمتو بني".. أعرابا عن مدى سعادتهم "بجزمة الزيدي" البنية اللون.
وطالب "شوز الأب" بتكريم الفنانة المصرية ميرفت آمين وجعلها سفيرة للنوايا الحسنة في العالم العربي عن فيلم "حافية على جسر من ذهب".


وعن ردة فعل الجماعة الإسلامية المتطرفة.. أصدرت إحدى الجماعات المتطرفة بيانا بشجب فعلة "منتظر الزيدي" حيث أنه قام بقذف الفردة اليسرى قبل اليمنى.. مما يخالف الشريعة.. مستندين على أن الفردة اليمنى قد أصابت العلم الأمريكي في مقتل بينما راحت الفردة اليسرى هباء.)

بالجوز بالفرد.. فاكرينك يا منتظر


ولو حتى نسيوك .. فاكراااك
يا راجل في زمن .. نامت فيه الرجالة
وتغندروا الاشباه

:((

‏هناك 60 تعليقًا:

  1. نحجز أول تعليق الأول وبعدين نقرا

    ردحذف
  2. قريت

    هي كل حاجة كده بنتحمس ليها في الأول

    وبعدين تروح في خلفية الذاكرة زي اللي قبلها


    أحييكي عالموضوع ده

    ردحذف
  3. من الاخر كدا

    الشعب العربي شعب بتاع ثوارات ونداءات ومقالات في عز الازمة وبعدها كان الله بالسر عليم

    اقلب الصفحه يا عمي وعيش يومك ما هو كل يوم فيه مشاكله

    وهي جت علي منتظر بس هي العراق كلها بعد الحرب راحت فين مين اللي فاكرها والا افغانستان والا غيره من البلاد اللي ربنا وحده عالم باللي بيجرا فيها والكل ساكت

    واخر شئ اللي حصل في غزة كام واحد اتحرك وكام واحد اهتم

    ربنا يرحمنا برحمته

    واللي بتنادي به مش هيتحقق الا لورجعنا وعرفنا
    معني قول رسولنا الكريم عليه الصلاة والسلام

    (مثل المؤمنين في توادهم وتعاطفهم وتراحمهم مثل الجسد إذا اشتكى منه شيء تداعى له سائر الجسد بالسهر والحمى)

    غربتي

    ردحذف
  4. اولا انا كنت بحاول ارد علي البوست اللي فات وسبحان الله لقيتك جايه تردي عندي وقت اماكنت هتجنن وارد عند بس كانت صفحه الكومنتات فاضيه عاااااااااااااا

    اولا الحمد لله انك خرجتى من المازق وموتينىىىىىىىىىىى من الضحك بجد فكره جامده جامده
    ربك ستار ياتوتا والله انتي حثل حثل

    ********

    ثانيا هما دول العرب ياخدو الموضوع كانه هوجه وفي ثانيه ينامو و خخخخخخخخ نوسيان

    ربنا مع كل بطل ويسانده ياااارب

    ردحذف
  5. السلام عليكم
    الأخت الفاضلة :فتافيتوا
    إزيك يا فتافيتوا
    لقد تعودنا نحن العرب على الصريخ والعويل فى بادىء الأمروبعد ذلك .....
    تحياتى

    ردحذف
  6. نامت الرجال وتغندر الاشباه
    حقيقي مش لاقي كلمة بعد كلمتك دي

    ردحذف
  7. السلام عليكم

    وماذا نقول يا أمة الإسلام..؟!

    لكن فليشد العالم ان الام التي أنجبت منتظر ستنجب آلاف من منتظر ومن الرجال
    وامهات فلسطين والعراف وافغانستان قادرات على إنجاب الأبطال الرجال الذين يرفعون رأس الامة عالياً

    بارك الله فيكي وجزاكي ربي خير الجزاء

    لا تنسوا اخوانكم في غـزة من دعائكم

    ||..بحــر الدموع..||

    ردحذف
  8. مميزات امتنا العربية
    البدء بالصراخ والعويل
    واطلاق هتاف خاص بينا اسمه بالروح بالدم نفديك يا بسطاويسي
    وعمل اعلانات ولافتات احنا وراك بس حاسب على قفاك
    ثم نسيان قضية المواطن دريد لحام وتركه على الحدود بعد المزايدة التمام على قضيته

    هي دي الحالة .. وانا لله وانا اليه راجعون

    عيلة الزايدي وهي رايحة المحكمة تفرح .. صدورهم منفوشة عزة من قوة ابنهم .. وانا مش مختلفة معاه .. وطظ في الأثكس اللي تخلي بوش يودع الرئاسة في بلد أحتله وقتل اهله وشرد بهم وسرق بتروله
    بوووووووووووووووووووسة على نفوخك وربنا يستر من ابوكي لحسن يخفيكي في مخبأسري بعيد عننا وعن الفتفته

    ردحذف
  9. انا قلبي بيتقطع عليه كل مافتكره
    كان في بالي وبقول ده زمانه بيعمل ايه
    ربنا معاه
    اخر ماسمعت كان تأجيل الضيه لنص مارس تقريبا
    ربنا ينصره ويقويه ويعزه

    ردحذف
  10. فتافيت
    اظن ان كل حر و صاحب ضمير في العالم اجمع اكيد حيفتكر منتظر لانه عمل اللي كل الكادحين و المقهورين و المكتوين بسياسة الراسمالية المتوحشة بالعالم بيتمنوا يعملوه
    شكرا على هذا البوست لانه رجعنا لاحداث كنت اتمنى انها تتواصل عبر العالم العربي
    بس الجزم لازم تتوجه الى منهم متربعين على قلبنا دون رغبة منا
    منتظر لازم العاقبة تعود على اعداء الحرية و الديمقراطية وما ضاع حق وراءه طالب
    منتظر حتعيش و حايموت سجانك
    منتظر انت مش في سجن ولا حبس لانك عايش مرفوع الراس وقلت لا بدل ان تركع للاستبداد
    الحرية يا منتظر انت اللي بتنعم بها و احنا اللي في سجن كبير ما لوش اول و لا اخر لاننا عايشين في قهر و حتى كلمة الحق مش قادرين ننطق بها
    منتظر كل العز لك و لكل الاحرار بالعالم
    والخزي لحثالة الراسمال و اذنابهم ومن والاهم من حكامنا العرب
    مودتي فتفوتة
    اتمنى انك تتواصلي مع مواضيع مدونتي
    رايك يهمني كثيرا
    شكرا

    ردحذف
  11. هو مين منتظر الزايدى ده
    أصلى مش فاكره

    ربنا يرده لأهله سلما
    ويفك أسره .. ويهد سجانه
    ويرحمنا كلنا من الغفله إللى هتاكل نفوخنا
    تحياتى ليكى لهذا الموضوع المتميز

    ردحذف
  12. لا ينكر دور منتظر الزيادى

    فى عام 2008 الا جاحد

    فلابد ان نكون جازمين بالحقيقة

    ونثبت اقدامنا

    فى المنطقة

    ولا نسير خلف هؤالاء الحفاة

    ونضرب على ايديهم

    بأحذية من حديد

    ردحذف
  13. مستغربتش لما شفت البوست

    على فكره احنا كدا ودا مرض فينا ومش هنتغير ولو اتغيرنا يبقه هنجنن لئننا مش هنسدق نفسنا

    موضوعك جامد بس بيعقد الواحد

    ردحذف
  14. سلام عليكم يا فتافيت

    الله يرحم الرجالة .. و ينصر منتظر قادر يا كريم

    قرأت بعض البوستات ليكي و لذيذ اللهو الخفي ده

    إلى الأمام

    رجاء التواصل

    internationalceaser@yahoo.com

    ردحذف
  15. السلام عليكم / جزاك الله خيراً يا فتافيت ، بلادنا بها الكثير من الرجال ولكنهم خلف القضبان ويجب على كل مسلم الدعاء لكل شريف مسلم مأسور ومظلوم فى كل صلاة ، والله يا فتافيت حالنا الآن يحتم علينا ندعى من أول ما نصحا لحد ماننام ، ربنا يشيل الغمه وأولياء الأمه اللى ما يعرفوش ربنا . حسبنا الله ونعم الوكيل .

    ردحذف
  16. كان نفسي كان يبقي كلنا منتظرين
    بس للأسف كلنا منتظرين

    أنا عارف ان اخرتنا في الدول دي هنتشل

    ردحذف
  17. مش كلنا ناسينه يا فتفوتة

    والاعلام نسيه بالأمر

    ربنا يتولاه ويخفف عنه ويفك سجنه

    ردحذف
  18. فتافيت

    يعجز لسانى ان ينطق سوى كلمه

    حسبنا الله و نعم الوكيل

    --------------------
    كان معك من امام الكيبورد
    واحد مخه لاسع شويه
    شبــ اون لاين ــاب
    الاسكندريه
    --------------------

    ردحذف
  19. الناس لأن عندهم احباط وما بيدهم أي حيله فرحوا بهذا الرجل
    وما فعله بالفعل يعتبر انجاز لأنه أتى بالشيء الغير متوقع

    ردحذف
  20. السلام عليكم ورحمة الله وبركاته

    معاكي حق في المبدأ بس الفكرة يمكن ان اللي منتظر عملة صحيح فش غل ناس لحظتها لكن مصلحش حاجة
    بالعكس ضر نفسه

    ويمكن لان الناس كشعوب محتاجه انها تلاقي تغير حقيقي يعزها ملاقتهوش لما اتحدفت الجزمه

    هاتقولي وهي الناس عملت ايه
    هاقولك ان الناس مش هاتعمل لان القليل ديما هو اللي بيصلح وربنا قال كده بل اكثرهم لا يعلموم .. بل اكثرهم لا يعقلون
    الناس عايزة قائد يجمعها علي هدف واجد ده اللي مش ممكن ينسوه

    علي فكرة
    انا حاولت كتير اعلق عند لكن الاكسبلورر ديما كان بيقولي فيه خطأ وده مع كل المدونات الجديده بس
    ويارب لما اضغط دلوقتي على كتابة تعليق ينشره

    حاجه كمان انتي كنتي عامله مدونه قبل كده باسم تاني ؟

    تحياتي
    الى اللقاء

    ردحذف
  21. انا باثيت حضور بس
    والبوست ده له منى تعليق تانى حتى لو نزلتى غيره
    اصل النت عندى بعافيه شويه
    كان معكى من احدى مقاهى الانترنت
    عاشقه الرومانسيه

    ردحذف
  22. ازيك يا فتوتة يا عسل
    تفتكرى يا فتفوتة هو مين الرجالة اللى هيسالو عليه مش اذا كان لسه فى رجالة اصلا
    ربنا يرحم الرجولة
    متضامنة معاكى يا فتفوتة
    فاااااااااااااااااكراك يا رجل البطولة
    تحياتى يا فتفوتة

    ردحذف
  23. لا تعليق غير
    ابتسم انت تعيش فى الوطن العربى

    بس مش كل الناس نسيته على فكره
    كفايه عليم ان عمو جورج مش هينساه العمر كله

    ردحذف
  24. حسام غانم

    يا قهلا يا قهلا

    نورت البوست يا باشا

    معاك في كلامك.. بس لازم نتغير حرام الراجل يروح فطيس

    احيك انا بقى على انك اول تعليق ههههههههه

    نورت يا حسااااام المدونة كلها
    مش البوست بس

    ردحذف
  25. ghorBty

    ولا كلمة بعد كلامك بجد .. لا فض فوك حبيبتي

    بس مين يسمع ومين يحس

    نورتي

    ردحذف
  26. كيــــــــــــارا

    كيارا عندنا مش مصدقة .. شاي ياض لخالتك كيارا
    وعيارن تحية كمان طخخخخخخ طخخخخخخخخخ

    اللهو الخفي ده روحي روحي روحي.. اللهي ما اتحرم منه

    وبعدين انا مخطوفة وانتي بتضحكي .. لا اخص عليكي اخص
    :((((((

    ام عن منتظر.. فكلام والنبي حكم يا اوختشي بس نقول ايه.. هو ده قدرنا

    الرحمة من عندك يااااااااااارب

    نورتي يا عسولة

    ردحذف
  27. اللؤلؤة

    اهلا يا معلم فينك من زمان فتافيتو ما فيش جديدو عاتيشة واتنفس والحمد لله

    طيب وبعدين مش هانعدي يعني مرحلة العويل .. والنوم ده

    والنبي ده حتى حرام

    نورت يا عم لؤلؤ البوست

    ردحذف
  28. مصطفي ريان

    ياااااااه ريان بحاله هنا.. اهلا واهلا واهلا

    ومش عارفة والله اقولك ايه؟؟
    اصلها حقيقة بجد

    يلا ربنا كبير بجد

    اتمنى انها تكرر

    سلاااااام

    ردحذف
  29. بحـــر الدموع

    اهلا بابن ارض العزة غزة.. دايما كده مشرفني ورافع راسي بتعليقك عندي

    منور وطبعا عندك حق.. بس يارب تلاقي رجالة تشهد على كلامك

    ربنا معاكم وقادر يحفظكم وينصركم

    تحيااااااااااااتي

    ردحذف
  30. ستيته حسب الله الحمش

    سوتايتة حبيبني نورتي الدنيا
    وعلى رايك هم دول العرب .. ماجتش من فرغ يا اوختشي العرب جرب .. دول اجزيمة مزمنة مش جرب بس

    بوسة ليك انتى اكبببببببببببببببببببر

    نورتي يا جوومر

    ردحذف
  31. عاشقه وغلبانه

    امين يا روحي.. بس هو مش هاينتصر ولا هايخرج باننا نقول بس يارب انصره لازم يكون فيه رجالة وراه

    ولانه اخر الرجال المحترمين.. فعليه العوض عليه

    عليه العوض ومن العوض


    نورتي يا دكترة

    ردحذف
  32. assafo anroze

    اهلا اخي الفاضل والرفيق العزيز
    انت عندك حق .. بس أكلت يوم أكل الثور الأبيض خلااااااااااااص .. بجد مافيش فايدة
    عليه العوض بجد عليه العوض

    وانا فعلا بتواصل مع مدونتك .. عجبني جدا موضوع تشافيز .. رااااااااااااائع

    تحياتي واتمنى نفضل متواصلين
    سلااااااااام

    ردحذف
  33. إيمان

    لا ما تاخديش في بالك ده بتاع العصير اللي على اول الناصية عاااااااااااااا

    يارب يا اوختي يارب

    بس اقولك حاجة مش متافئل اصلا

    نورتي البوست .. يارب دايما
    هنا عندي يا جميل

    سلاااااااااام

    ردحذف
  34. مسدس صغير

    احزية من حديد .. هو عز ده ناطط كده في كل حاجة .. يخربيت كده

    يا سيدي ماوقفه انا على احذية من باتا بلاش حديد اللهي يسترك .. الحديد غالي يا اخويا

    نورت البوست والمدونة

    تحيااااااااتي

    ردحذف
  35. ادم المصرى

    والنبي انت اللي عقدتني بجد .. طيب بلاش كده في وشي .. اضحك عليا وقوللي فيه امل
    مش يا تناحة يا جنان

    نورت البوست يا عم ادام

    ماتحرمش يارب

    سلاااام

    ردحذف
  36. الإتربي اللولبي

    اهلا اهلا .. نورت بجد ومدونتك عجباني اووووووووووووي

    وميرسي انك جيت زورتني واكيد ان شاء الله هنتواصل

    نورت تاني وتالت .. تحياااااتي

    ردحذف
  37. حياتى نغم

    والله عندك حق .. ومافيش عندي رد غير اللهم اميييين


    نورتي يا نغم المدونين

    تحيااااتي

    ردحذف
  38. يا ست فتفوفته
    ادينى جيت افتفت شويه
    شوفى
    الاستاذ بقى مين ابراهيم عيسى
    ده انا كنت بحب اقرأ له
    قوم لقيت ساخر سخريه لا يمكن ان تكون من انسان بيفهم من منتظر
    هو اصله عايش فى بلده وعمال يشتم اللى يعجبه ميعرفش يعنى إيه شعورك وانت متهان فى بلدك وان واحد غريب مش من اهلك بيبهدلك
    على اساس ان اللى من بلدى من حقه او برضه بينا وبينه عيش وملح يبهدلنى براحته يعنى
    واتريق عليه وقال مهنة الصحافة والمفروض واللى يجب
    واصوات كتيير اتريقت عليه
    انا واحد من الناس لو مكانه ومخنوقه هاعمل أى شئ اظهر ضيقى
    بس للأسف الغبى مش بيفهم..وبيعرف يتفادى الرميات

    المهم يا فتفوته..عارفه مين اللى التاريخ ناسيه بجد
    مش منتظر الزيدى ابدا"
    راجل محترم ..عمر العرب الحديثه ما جابت مثله

    روحى اسألى بابا مين هو سوار الذهب وتعالى احكى لك انظف واعظم راجل عرفته العرب

    على فكرة سوار الذهب ذهب اصلى خام..مش ملوث

    فتفوته اشكرك على الاهتمام والسؤال عنى
    فانا اعمل بكفاءة داخل مفرمة البنات ومشاويرهم وطلباتهم

    امتى يارب يتجوزوا واخلص منهم ومن كل الفتافيت

    ردحذف
  39. Tamer Diab

    انا معاك في كده .. وهايبقى كرسي بعجل لكل موطن بدل كمبيوتر لكل مواطن

    وعاااااامر يا عرب

    ويجعل بيوت المكسحين عمار

    نورت يا تامر يا كبير

    ردحذف
  40. Lady E

    امييييييييين .. وكمان ربنا يرحمنا من اعلامنا العقيم
    ويارب كده يعمل انشالله حتى طفل انابيب افرح بيه قبل ما امووووت

    نورتي يا روحي

    ردحذف
  41. شبــ اون لاين ـــاب

    على رايك الله حسبي لو اشتكي وبه اكتفي

    نورت البوست

    تحياااتي

    ردحذف
  42. لورنس العرب

    اهلا بوزير مواصلات المدونين .. طيب هو فش غله وعمل اللي نفسنا نعمله .. ليه بقى نسيناه
    على اساس ان كل يوم الصبح ست سبع تجواز جزم بيترميوا حدادا عليه

    ااااااااااااه يارعرب

    نورت لورنس البوست

    تحياااتي

    ردحذف
  43. kemet

    ممكن يكون عندك حق .. بس برضو يستاهل اننا نفتكره حتى .. وربنا كبير بقى قادر يحي العظام وهي رميم .. ففيه امل يحي نخوة العرب وكرامتهم تاني

    ومعلش جوجل بس كان بيهزر معاكي عااااااا

    نورتي يا جميل وكنت لسه هسأل عن معنى اسمك
    لاقيتك كاتبه معناه عندك

    نورتي البوست وشرفتني زيارتك

    تحيااااااااااتي

    ردحذف
  44. عاشقه الرومانسيه

    مستنية يا جميل الكومنت بتاعك

    بس تعالي بسرعة بقى

    منورة حتى وانتى بتمضي بس

    ردحذف
  45. أميرة الجنة

    على رايك فين الرجالة هو علشان اخر الرجال المحترمين خلاص راح بلاااااااش

    نورتي يا جميلة

    ردحذف
  46. wesoooooooooo

    هههههههههههههههههههههه .. عم بوش جاله احباط من يومها

    نورتي يا قمر

    ردحذف
  47. الفقيرة إلى الله أم البنات

    ياهوووووووووووي .. حبيبي جه اهو كان فاضل اجر توك توك من عند لورنس واسرح بيه في المدونات واقول قمر تايه يا ولاد الحلال

    ابراهيم عيسى ساعات بتلسع معاه والله .. واصلا هو امبراطور السوداوية في العالم العربي

    المهم اني مع منتظر وجزمة منتظر وشرااااب منتظر

    ام عبد الرحمن سوار الذهب .. ده مافيش منه اتنين يا وختشي اصلا

    مين يسب الحكومة ويروح يشغل نفسه في الدعوة

    خلاص والله الرجالة ديه انقرضت .. ومش هسأل باباتي يا جميل لاني اعرف كوووووووويس اوي

    نورتي يا سكر البوست وربنا يعينك يارب

    بحبك موت والنبي ما تغيبي تاني

    سلااااااموووووووووز

    ردحذف
  48. اصل حصل هوجه زى هوجة عرابى يوم الجزمه ..وبعدين الناس بطول الوقت بتنسى .. اصل الموضوع فيه تكتيكات واستراتيجيات وحاجات ومحتاجات.. الا اونه الا دونه الا ترى
    عارفه هما قاصدين كدا عشان الموضوع يتنسى وبعدين يفرجو عنه
    تحياتى

    ردحذف
  49. السلام عليكم


    بصى يا فتافيت

    انتى احرجتينا كلنا والله

    وبجد احنا اتكسفنا على دمنا كلنا


    بس والله انا كنت مستغربه جدا ان فجأه انقطعت اخباره ومعادش حد بيتكلم عنه ابدا

    ولو سالت حد يقولوا مش عارفين عنه اى شىء


    ربنا يفرج كربه يا رب ويفك اسره

    امين يا رب

    شكرا بجد على التذكره دى

    تحياتى ليكى

    ردحذف
  50. يا بنتي نحن شعوب النسيان
    اتعودنا نحمد ربنا على النسيان وننبسط قوي بنعمة النسيان
    علشان هم عودونا على كده ننسى او نتناسى المهم نبقى ضمايرنا مستريحه وفل الفل
    لا عارف اقولك ايه ولا ابرر خيبتنا بايه لكن ربنا يفك كربه وكرب المسلمين كلهم
    نورتيني جدا سلاااااااااااااااام

    ردحذف
  51. على منتظر أن ينتظر كثيراً حتى يتذكره أحد ... فليس من المعقول أن يتذكره أناس نسوا قضيتهم .... حذاء الزيدي مر كومضة شرف في مخ أحدى (اللي مش شريفين:)

    المهم ... إحتفالاً بهذه المناسبة أقترح تفصيل حذاء خاص يلبس في الرأس تقديراً لمن فعل بحذائه مالم يستطع البعض فعله برأسه .(بس مش احنا طبعاً )

    ردحذف
  52. تصدقي صح والله
    الراجل ده المفروض يتعمله تمثال وهو ماسك الجزمه
    وبيشاور بالجزمه كده علي بوش ده
    حلوه المزيكا اللي شغاله دي
    تحياتي

    ردحذف
  53. بصراحة ، أنا شايف أنه ضيع نفسة على الفاضي .

    الجزمة لا تعني شيئ لبوش ولا بلادة ولا يفهم معناه أصلا .

    و بالتالي ، لم تعتبر له إهانه و قد تجاوزها بكل بساطة .

    عموما برنا معاه في المحاكمة

    و تقبلي خالص تحياتي

    ردحذف
  54. fashkool

    يمكن الله اعلم .. نورت البوست وشرفتني بردك

    تحياااااااتي

    ردحذف
  55. ريمان

    طيب مش مهم المهم اننا نفتكره وندعي له .. وربنا يفرج همه ويفك ضيقته

    نورتي يا جميييييييل

    ردحذف
  56. الشنكوتي الكبير

    اللهم اميييييين .. ويارب تكرر الزيارة تاني

    نورتي بجد تحياتي

    ردحذف
  57. تامر علي

    هههههههههههههههههههه شر البلية ما يضحك يا تامر بجد كومنت من الاخر

    نورت ابوست وعايزة بوست جديد بقى عندك

    ماينفعش كده خااااالص

    ردحذف
  58. اسماء عوني

    والله عندك حق عايز تمثال بس ما يتهدش زي النصب كده

    .. والست طبعا الموسيقى بتاعتها رائعة دااااااايما

    نورتيني يا جميل

    ردحذف
  59. مهندس / محمد حشيش

    مهو اللي حصل حصل يا هندسة حقه بقى علينا حتى ندعي له
    مش كده يروح في الوباااااا حرام

    نورت يا هندسة البوست والمدونة

    ردحذف

خلل براحتك من غير انتظار .. فتافيت أصلاً بتحب الخيار