سامحني يا بابا .. والله غصب عني

فتفوتة انهارده للاسف هاخرج فيها عن وعدي لبابا.. أني امشي جنب الحيط.. بس انا نسيت اقول لبابا ان اللي بيمشي جنب الحيط.. بس الصورصار.. والصورصار كبيره شبشب يتفعص بيه.. وانا مش صورصارة بقى على فكرة.. ولا في شبشب يقدر يفعصني.. وحتى لو اتفصعت فاللي يتفعص انهارده.. بطل وراجل.. وفتافيت بــ100 راجل.. فسامحني يا بابا بقى.. مش قادرة افضل عايش دور الصورصار.. بجد مش قادرة.

وانتم كمان يا جماعة سامحوا فتافيت على الفتفوتة الملخبطة ديه.. واللي عاملة زي طبق الكشري.. حاجات كتير على بعضها.. عدس اسود وعدس اصفر ومكرونة على دقة وصلصلة وتقلية.. وفي الاخر بتجيب حموضة.. بس الحموضة بتاعة فتوفتي حموضة في القلب والضمير.. مش حموضة في المعدة والمريء.

والله ما عرفة ابتدي منين؟؟.. من يوم 27 ديسمبر لما الخنازير دخلوا دكوا غزة.. واحنا بنتفرج؟؟.. ولا ابتدي من رد فعل العرب اللي غلب رد فعل النعامة المظلومة في ثقافتنا؟؟.. ولا مهزلة القمم ولا مهزلة الاعمار؟؟..

ولا اقولكم.. كبروا دماغكم من ده كله.. اصله كلام الكل عارفه.. (والعايط على الفايت نقصان عقل).. والحمد لله لسه عندي عقل.. او فتفوتة عقل بعد اللي شوفته في الفترة الاخيرة.. والحمد لله ان فضللي فتوفتة عقل.

بعد الحرب ما وقفت او زي ما قالوا وقفت.. ابتدينا احنا التجهيز في السفر لغزة.. بحكم شغلنا فاحنا لازم نكون هناك بعد الضرب مش اثناء الضرب.. ومش علشان الجبن واخد حده معانا.. بس لان ما ينفعش شغلنا يحصل اثناء الضرب.. والا يبقى مجهود واترمى في الارض.. واظن ده مش وقت مجهود يضيع.. لان الحمد لله العرب بينوا انهم عندهم تتضخم في المجهود.. لدرجة انهم ماقدروش يعملوا مجهود.. مش بقوللكم تضخم بعيد عن السامعين.

ولما قولنا يا سفر.. لاقينا والحق يتقال والشهادة لله.. ناس كتير جت وطلبت السفر والانضمام لمجموعتنا.. من كل محافظات مصر وكمان من الاقطار الشقيقة(حلوة الشقيقية ديه.. ماحنا شقايق برا القمم لكن جوه القمم.. عليه العوض).. وكنت فرحانة جدا بكده.. ومش مصدقة بجد الكم اللي انضم لنا.

وعملنا ورش العمل علشان السفر.. والناس جت وفضلنا يوم كامل من غير اكل ولا شرب علشان ما نضيعش وقت.. علشان نستغل كل ثانية في الاعداد والتدريب.. والناس تصور في الابطال اللي راحة غزة.. والناس تدعي للابطال اللي راحة غزة.. (واتصور جنبه والنبي يا باه).. واللي يملس على الابطال.. واللي يقول يا رتني كنت اعرف ابقى مكان الابطال.. المهم خلص التدريب.. وجمعنا المجموعات اللي هتسافر.. وقبل السفر بيوم اي والله بيوم واحد....

تبدأ الابطال تبان على حقيقتها.. كل واحد وعذره بقى .. اللي قال عيالي.. واللي قال مراتي.. واللي قالت اهلي.. واللي قال خايف.. وطلعوا شوية ابطال ورق.. واللي كان يشوفهم وقت التدريب ولا ولاد اخت صلاح الدين.. اسود يا ناس وعمالة تجلل بزئيرها.. وعماليين يترسموا بالشجاعة والبطولة.

(ومش عارفة ليه وقتها افتكرت فيلم اوعى وشك لما طلعت ذكرية طلع في البرنامج وسألته المذيعة عن العلامة اللي في ايده واللي كانت من حرامي زيه كل حقه وهم بيقسموا الغلة.. وقالها اصل دية عضة جندي اسرائيلي حقير حقير بألشتو في ساحة القتال.. وهو اللي بألش المذيعة ورسم دور البطل.. زي اللي بألشونا كدا في التدريب)

المهم ان طبعا مش الكل كده.. فيه ابطال على حق ربنا.. ناس شالت روحها على كف ايديها وقالت.. مسافرين مسافرين لو حتى بالفوسفور مضربوبين.. بس الناس اللي بألشتنا دول كانوا اول صدمة ليا بعد الصدمات اللي حصلت وقت المحرقة.

سافرت اول مجموعة لنا لرفح المصرية.. وهناك بقى على معبر رفح كانت الصدمة التانية.. المجموعة بتاعتنا اقرارت تلاقي.. اعتراضات تلاقي.. رفض الدخول تلاقي.. تعطيل للسفر تلاقي.. وهم صامدين وقالوا داخلين داخلين لغزة ومش ماشيين.

وفجأة تلاقي سوبر مان طاير ونازل زي البراشوط على المعبر.. والمعبر اتفتح له مهو سوبر مان بقى.. مش عايزين تعرفوا مين سوبر مان ده.. مطرش الجرجير (مطرب الجيل) تامر بك حزني كعب الغزال (تامر حسني).. المعبر اتفتح والصحافة تصور والناس تزعرت.. ووسع للبطل يا جدع.. مطرش الجرجير رايح يطرش اهل غزة.. اصلهم ناقصين طرش صراحة يعني.. وناقصة تامر حزني وطرشه.

والمجموعة بتاعتنا لسه واقفه (وطلع بالشيفروليه واحنا قاعدين ورجع بالشيفروليه واحنا قاعدين).. وبعد طول انتظار دام 5 ساعات وزيادة.. جه تصريح الدخول.. رغم ان مطرش الجرجير اخد تصريحه في 5 دقايق.. وطبعا الناس مقامات يا بشر.. عيب مطرش الجرجير يقف مع الناس ديه.. اللي اقل واحد فيهم معاه دكتوراه.. والله يرحم الشهادات واللي بياخدوا الشهادات.. قولوا امين.

وكانت تالت صدمة بقى.. التصريح جه بان الفريق لازم يغادر قطاع العزة غزة.. قبل يوم 5 فبراير.. مع ان المهمة الاولى مقرر لها انها تخلص في يوم 7 فبراير.. يعني الفريق لازم يفضل ليوم 7 فبراير.. ويبدل مع فريق تاني يدخل يقعد اسبوع وهكذا اسبوعيا.. وفي الاخر يا ترجعوا يوم 5 يا مافيش سفر.. وتكتبوا اقرارات بكده.. كمان ان العودة يوم 5 فبراير ماكسيمم.

عايزين تعرفوا ليه قبل 5 فبراير..؟؟ وحصريا لقناة فتافيت الأخبارية .. ولا تقولي قناة الحظيرة (الجزيرة) ولا القناة العبيرية(العربية).. مع قناة فتافيت الاخبارية ..الاخبار كلها المستخبية.

حصريا لفتافيت.. وقبل كل الكتاكيت

قال ايه ياولاد.. احجزوا مقاعدكم من الان.. امام شاشات القنوات الاخبارية.. ولكل محبي الفرجة على جثث اطفالانا.. واشلاء نسوانا.. ودموع رجالنا.. غزة هاتضرب تاني يا رب ارحمنا.

والله بجد.. قالوا كدا.. لازم تخرجوا قبل يوم 5 فبراير لان فيه انباء شبه مؤكدة.. ان الضرب هايتجدد تاني على القطاع يوم 5 فبراير.. والمعابر هاتتقفل.. وعلشان تعرفوا ترجعوا تاني مصر.. لازم تدخلوا في حالة وقف اطلاق نار.. يبقى لازم قبل يوم 5 فبراير.. اصله لو ابتدى يوم 5 فبراير محدش يعرف هايقف تاني امته.. لان اللي بيحضر العفريت هو بس اللي بيعرف يصرفه.

والناس فعلا دخلت.. والحمد لله وصلت وقايمة بدورها هناك.. بس طبعا ضغطين المهام علشان يعرفوا يخلصوا قبل اليوم الموعود.. 5 فبراير.. والعزاء للعروبة..

(كانت معكم مراسلة قناة فتافيت الاخبارية.. فتفوتة الجهنمية.. من امام الوكسة العربية اللولبية)

وسامحني يا باه.. الحس كلمتي معاك.. احسن ما تجيلي جالطة ولا شلل من الحيطة اللي ماشية جنبها دية.. يلا يا جماعة كل فتوفتة وانتم مشاهدين للقنوات الاخبارية.. ومزبهلييييييييين