01 فبراير 2009

الله يرحمك يا رجولة

في الأول نسألكم الفاتحة على روح الرجولة .. الله يرحمك يا رجولة .. هاعيش لمين من بعدك يا أختي
وأنا اللي كان عندي أمل ألاقي راجل أتجوزه.. شكلها مافيهاش جواز ولا يحزنون

وقبل ما حد يدخل فيا شمال.. أنا عارفة كاتبة إيه كويس.. فيه رجالة صحيح لكن محدش ينكر إنهم بقوا عملة نادرة جداً ويمكن بقوا في ندرة الزئبق الأحمر ومعايا دليل على ناس فاكرة نفسها رجالة... والعزاء للرجولة
كنت بدور على مادة معينة في حقوق الإنسان محتاجاها أوي.. وبعدين في خيارات البحث لاقيت حاجة كدا اسمها (
المجلس المزوي المخفي للعيال).. الترجمة ..
المجلس القومي المصري للرجال.
دخلت أتصفح أشوف فيه إيه يعني؟؟.. وخير الرجالة جرالها إيه بعد الشر علشان يعملوا مجلس قومي ليهم؟؟ وياترى هيناقشوا فيه قضية العنف ضد الرجل؟؟.. والا التحرش بالرجل؟؟.. ولا إغتصاب الرجل؟؟.. ولا قضايا هتك العرض للرجل؟؟.. ولا الحقوق من النفقة والمؤخر والذي منه؟؟.. قولت أخد فكرة وأشتري بكره.
ودخلت والله يارتني ما دخلت.. حاجة تثير الغثيان.. تجيب كرشة نفس مع احمرار في العيون وقليلا من الرشح مع ميل للتقيؤ.. حاجة بجد تافهة ومقرفة اخر حاجة.. والرابط فوق ابقوا شوفوه .. وشوفوا المأسوف على رجولتهم قايلين إيه في إجرائتهم ضد المرأة.. حاجة كده (تيييييييييت كبيرة خالص).. لافيه دين ولا نخوة.
وقال ايه لو وحدة جرالها حاجة في الشارع ما تساعدهاش (والنبي ساعد نفسك الاول).. وسواقين التاكسي ما يقفوش للستات(على اساس ان الرجالة اصلا بتركب تاكسي هاتوقفوا حال السواقين).. ومش عارفة مقاطعة اللي يتجوز من مصرية(على أساس أن فيه غير المصرية ترضى بيكم).. وماتجوزش إلا واحدة معاها إعداديه(طبعا علشان تطلع العيال في تخلف أبوهم بظبط).. وفيه كتير هناك بس ماليش نفس اكتب.

بس الفتوفتة مش على كده.. دول عالم فاضية ومش لاقين حاجة يعملوها.. بس لما يكتبوا باب كامل اسمه (المرأة المصرية في سطور).. يبقى كده لعبوا في عداد عمرهم.. وإليكم ما جاء بالباب (اللي بين الاقواس كلامي انا):


المرأة المصرية في سطور

المرأة المصرية
هي المرأة الوحيدة في العالم التي قامت بذبح زوجها ثم بعدما ذبحتة قطعت لحمة وأعضاءة ثم كسرت عظامة ثم قامت بتعبئة جثتة وقد تحولت الى قطع صغيرة في أكياس بلاستيكية وقامت بإلقائها في بالوعات المجاري أو المصارف

(لا بس كفايه.. قطعتوا قلبي والله.. يا عيني على القهر.. ده احنا ستات وحشة أوي جدا خالص)

أثبتت الدراسات المصرية التي تدور حول ظاهرة الثأر بصعيد مصر أن النساء هن المحرك والمسبب الرئيسي لهذة الظاهرة

(يعني راحت هبة الرجالة يا جبيصي.. على اساس ان الرجالة شخشيخة.. روح روح ..تعالى تعالى.. الراجل لو ماكنتش كلمته من راسه يبقى تييييييييت)

لا تتوانى المرأة المصرية عن إستخدام جسدها لتحقيق أغراضها فمثلاً إذا أرادت الزواج ووجدت أن الرجال يميلون مثلاً للزواج من المحجبات إرتدت الحجاب وإذا وجدت أن الرجال يرغبون في غير ذلك إرتدت الميكروجيب والبيكيني

(وده إن دل هايدل على ايه يا تييييييت كبير أنت.. هيدل على أن الرجالة (مجازا) اللي انت منهم عايزين حد يمسح ريالتهم.. لأنهم هطل.. على أساس اللي أنت بتتكلم فيه .. بس واضح أنك من النوع ده .. تيييييييييييييييت .. بس أنت كدا بتغلط في كل واحدة محترمة في مصر ومحجبة ودبوس طرحتها بمليون من عينتك يا تييييييييت اوي جدا خالص)

المرأة المصرية تستغل وجود بعض الرجال ناقصي الرجولة في إظهار مدى سوء أخلاقها وتجبرها فأحياناً تشاهد وأنت تسير في الشارع في مصر إمرأة وقد أخذت في ضرب أحد الرجال ( مجازاً ) بالحذاء

(هو الأخ منين بظبط.. ولا ديه ترسبواب من حياتك الشخصية.. وأي شارع ده.. وعامة الست اللي بتضرب راجل مش ست.. بس كمان الراجل اللي وصل ست إنها تضربه يبقى .. تييييييت.. يا تيييييييييت كبير خالص )


فهل رأيتم أسفل من ذلك ولا أسقط
** ** ** **
بزمتكم ديه ناس محترمة أصلا.. ده كفايا الجملة اللي في أخر الباب (فهل رأيتم أسفل من ذلك ولا أسقط).. بصراحة يا ننوس عين أمك أنت وهو ما شوفتش أسفل من كده ولا أسقط.. لما راجل (وبعتذر للرجالة اللي بجد) شحط طول بعرض زيك ويكتب اللي أنت كاتبه ده يا سيد أمك.. فعلا ده ما يطلعش غير من سافل ساقط أكيد.


المهم إني شطت من الكلام ده.. وتيجي ماما تشوف الرجالة اللي ليل ونهار.. راكبة على وداني بموضوع الجواز.. وضل راجل ولا ضل حيطة.. شوفتي يا ماما اهي الحيطة احسن.. على الأقل مش هاتقول الكلام ده.. فضلت أفصص في الموقع ابن (تيييييييت) ده علشان ألاقي حاجة توصلني .. لأي راجل (مجازا) أتكلم معاه.. وأخير وقعت في إيميل قال إيه للإقتراحات والتعليقات.
وفعلا بعت له الرسالة دية:

السلام على من أتبع الهدى
حول ما تفضلتم بعرضه في محتويات هذا الرابط
http://www.geocities.com/egyncm/egy_wm.htm
المرأة المصرية في سطور
وخاصة الفقرة الأولى وهي::

المرأة المصرية هي المرأة الوحيدة في العالم التي قامت بذبح زوجها ثم بعدما ذبحتة قطعت لحمة وأعضاءة ثم كسرت عظامة ثم قامت بتعبئة جثتة وقد تحولت الى قطع صغيرة في أكياس بلاستيكية وقامت بإلقائها في بالوعات المجاري أو المصارف
** ** ** **
ذبحته .. لحمه .. أعضاءه .. عظامه .. جثته
هكذا تكتب بشكل لغوي صحيح فلا يصح عند التحدث عن مذكر غائب
أن تُستبدل الهاء المربوطة بالتاء المربوطة .. إلا إذا كانت علامة التأنيث
هامة جداً بحياتكم ولا يمكن الإستغناء عنها.. حتى في التحدث عن مذكر غائب

غائب عن الحياة والوجود
وأرغب في إضافة فقرة جديدة في باب المرأة المصرية في سطور بحيث تكون::
5
المرأة المصرية هي من صححت لكم أخطائكم اللغوية
والعزاء للمثقفين
بنت مصرية وأفتخر رغم كيد الكائدين

** ** ** **
نفسي بس راجل فيهم.. ده لوفيهم رجالة .. يرد على رسالتي
وبعدين حقوق إيه اللي بيدوروا عليها.. ما القهاوي حكر عليهم.. البلاي ستيشن منفردين به.. النواصي وواقفتها بتاعتهم لوحدهم
عايزين إيه تاني.. بجد حاجة توجع القلب.. ويا خسارة الرجولة .. اللي خلاص بقت موضة قديمة
وقال متشمللين وعاملين موقع لهم .. جتكم خيبة طيب اشتروا دومين ده السنة ب150 جنية
رايحين تعملوا صفحة مأجورة على الياهو مجانية يا مفلسين
وده لو دل يدل على إنكم .. من بتوع القهاوي والبلاس ستيشن والنواصي فعلاً
وإلا كنتم على الأقل كتبتم لغويا صح على موقع مفترض إنه واجة ليكم
طبعا ومن غير ما أكتب .. بعتذر لكل راجل.. بس راجل بجد .. مش من بتوع ذكر في خانة النوع في البطاقة وخلاص
أنا بالفتفوتة دية ما أقصدتش بيها أي راجل محترم.. لا أبويا ولا أخويا ولا زميلي في الشغل ولا راجل عارف معنى الرجولة
وعارف معنى القوامة.. وعارف يعني إيه ست.. وإن ربنا خلقنا مكملين لبعض.. مش ساخرين ومتهكمين على بعض
وعلى رأي الفيس بوك
(لسه فيك رجالة يا مصر)

هناك 42 تعليقًا:

  1. والله عندك حق
    بس عندي فكرة
    ممكن نقرالها الفتحة
    ونصلي عليها صلاه غائب
    ماهو ما يجوزش عليها دلوقت غير الرحمة
    ورجالة وطول عمر ولادك يا بلدنا رجالة

    بس دة كان زمااااااااااااااان

    ردحذف
  2. ههههههههههههههههه
    ولا الضالين امين
    وعلى رأيك أذكروا محاسن موتاكم
    والرجولة كانت بنت حلال والله

    ردحذف
  3. طبعا شوية تييييت جمعوا نفسهم وعملوا قعدة نم زي بتاعة النسوان
    والشغل علي معاهم راحوا عاملين موقع
    وبعدين الشغل علي اكتر
    راحوا حطين قواعد
    وخايف ييعلي اكتر من كده ويقررو انهم يتجوزوا بعض عشان ميلجئوش للمرأه

    بس طبعا كلامك يا فتفوتة مش ع الرجالة كلهم وإلا هعمل حزب رجالة بجد مش ال تييييتات دول

    ردحذف
  4. رائع البوست جدا ... ياستى جات على التخلف العقلى مهو يعنى الحياه كلها مقرفه جات على شوية المتخلفين دول ؟ تعالى شوفى الشناب هنا عامله ازاى يعنى شنب ورجوله كده وحاجه تسد عين الشمس بس خاوى خاوى على عروشه لا يفقه شىء وغباء مالوش حد
    سبحان من له الدوام انا بشكرك جدا على الزياره

    ردحذف
  5. ياست فتفوته انتي رغم اني قرات الموضوع عند اللي مش عاوزة تتجوز نو مور
    لكن انتي اسلوبك تحفه تحفه تحفه
    دول مجموعة تيت ملعوب في تيتهم واللي عاملينه لأن مفيش واحده محترمة رضيت تبص لتيت منهم بطرف عينها
    ياأما واحده تيت طلعت عين تيتهم فجابت ليهم عقدة وكلكيعة وبدل ما يرحوا للدكتور النفساوي اللي جلسته بميت جنيه جابوا لينك ببلاش وقاعدوا يعيطوا زي اي تيت
    بيفكروني بيارجال العالم اتوكسوا بتاع حسين فهمي واسعاد يونس
    بس صدقيني يا حورية لسه فيه رجالة رجالة مش اي اي ولا زي زي ولا كل قط يتقال له يا تييييييييييت
    تحياتي

    ردحذف
  6. الله يرحمك يارجولة
    بس اكيد فى رجالة وان كانوا قليلين
    دمتى بكل الود
    سعيد بمعرفتى بمدونة حضرتك

    ردحذف
  7. دعوه
    الأخ العزيز/او الأخت العزيزه
    تحيه طيبه
    ندعوك للمشاركه فى برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام وهو يذاع يوميا التاسعه وعشر دقائق صباحا عدا الجمعه وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
    ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا
    المدونه
    http://netonradio.blogspot.com
    الموقع
    http://dear.to/cairo

    ردحذف
  8. السلام عليكم
    أحييكى على أسلوبك الجميل والطرح الأجمل للموضوع
    بس بصراحة والله فعلا لسة في رجالة في مصر وكتيرة عارفة فين أكترهم في الصعيد والارياف ومشكلة المدن انها عندها استعداد تقلد أى ثقافة واى موضة بس الخير موجود
    أما عن موضوع المجلس أنا مش مصدقة ان ايللي اقترح الاقتراح الاهبل ده عاقل أو راجل بجد هو وكل ايللي معاه لانه اما انه معقد اما ان مراته او امه أهدرت رجولته فبينتقم
    أصل اصلا مسألة عمل مجلس قومى للرجال ده يبقى هما بيأكدوا بنفسهم انهم الاضعف وده طبعا مش صحيح ولو من وجهة نظرهم انه صحيح يبقى العيب فيهم
    تحياتى ليكى

    ردحذف
  9. Tamer Diab

    تامر باشا.. نورت البوست
    وعلى رأيكم هم شوية تييييت لموا بعض
    وتخيل لو فعلا حد لعب في دماغهم وقضوها اكتفاء ذاتي واتجوزوا بعض .. تيييييت
    واكيد مش قاصدة راجل محترم ولا راجل عارف ربنا
    بس مش كل راجل طلعله شنب ودقن بقى راجل
    فيه تيييييت كتير بشنب ودقن
    نورت يا باشا والله

    ردحذف
  10. msafa

    اهلا مصطفى.. مهو انا لسه قايلة حالا فيه تيييييت كتير وعندهم شنب من اللي بيلم فوم الكابتشينو.. وعندهم كمان دقن بتشوك
    اصل الرجولة مش دقن وشنب.. الرجولة حاجة تانية الرجولة احتواء وذكاء وشهامة واصالة وحاجات كتير
    ومتأكدة مافيش ولا تييييت من بتوع المجلس بتاع العيال ده يعرفوا حاجة عن معنى الرجولة بجد
    وبعدين مدونتك تستاهل الزيارة مع كل جديد
    لان احساسك عالي وقلمك مبدع
    تحياااااااتي

    ردحذف
  11. ستيته حسب الله الحمش

    سوتايتة نورتي.. فعلا انا شوفت المجلس المخفي ده في مدونة طلعت ليا في البحث على جوجل
    وميرسي يا جميل والله بعض ما عندكم
    ام عن النيييت اللي مش لاقين حد يلمهم دول.. انا ماردتش انزل كلام تاني حاطينه على السايت ابن التييت بتاعهم.. لانه كلام تييييييت ابن تييييييييييت واللي كاتبينه كلهم تيييييييت بجد
    يلا ان الله حليم ستار
    بس انتي حللتيهم صح جدا
    بس اذا بيلتم فستتروا.. ودول فاضحين نفسهم مش كفاية تيييت كمان فرحانين بنفسهم
    جتهم القرف بجد
    ربنا ما يحرمني من نورك يا قمر
    سلااااموز

    ردحذف
  12. mohamed ghalia

    اكيد طبعا لسه فيه.. بس مش كتير للاسف
    نورت المدونة.. وشرفني مرورك
    وان شاء الله نتواصل باستمرار

    ردحذف
  13. بنوتة

    اهلا يا جميل شرفني مرورك
    وكل كلمة قولتيها بتفق معاكي فيها.. وفعلا لو هم حصل لهم كدا او شايفين كدا
    يبقى العيب فيهم لانهم مش رجالة
    ياريت نتواصل باستمرار
    تحيااااتي

    ردحذف
  14. انت تسال والكمبيوتر يجيب

    يعني مافيش مانع من الاعلان
    بس كان ممكن يبقى اظرف لو تقرى اللي داخل تكتب فيه الاعلان
    وبعدين تعلق عليه وتحط اعلانك
    على الاقل تبقى احترمت صاحب المدونة اللي انت حطيت اعلانك فيه
    وعلى العموم .. نورت

    ردحذف
  15. فتافيت

    تشكرى على الكلام اللى قلتيه

    أنا قرأته فعلا قبل كده

    دى مهزله مش عارفه ايه اللى بيحصل ده باين الرجاله ماعادوش لاقيين شغله يعملوها
    لا و قال ايه كمان عايزين البنات يعملوا خدمة عسكريه

    انا لله و انا اليه راجعون

    تحياتى

    ردحذف
  16. بسم الله الرحمن الرحيم
    ايه كمية التييييييت اللى عديتيها للناس دى
    (شكلك معديه وربنا يسترها)
    بختلف معاكى
    اولا ماينفعش تقولى عليهم رجاله ولو حتى مجازا
    ثانيا دول مش شوية عالم فاضيه دول شوية مضروبين بالجزم ومخهم مهوى وممكن تقولى عليهم تيييييت بتعاتك دى
    انما تقارنيهم بالرجاله كده انا هزعل منك
    انا شوفت الموقع بتاعهم ده فى مدونة غاده عبدالعال كنت عايزة اتجوز (ياعينى كده صرفت نظر خالص بعد ماكانت ممكن تشاور عقلها)وبعتلهم ميل زى الفل ومحدش رد عليا برضو
    شكلهم كده كانو بيعملو تيييييت ولسه مخلصوش
    الله الله الله مش بقولك معديه
    لأ كفايه عليكى كده
    سلام

    ردحذف
  17. واقروا الفاتحه لابو العباااااس يا اسكندريه يا اجدع ناس
    هههههههههههههههههههه
    انتي لسه جايه تقري الفاتحه دلوقتي
    ده الميت اتحلل يابنتي
    الرجوله دي افتكر اخر مره سمعتها بجد كانت في 73 قبل ماتولد
    بيقولو الرجاله ماتت هناك
    اصل طول حياتي ال24 سنه اللي عشتهم بشوف راجل كل سنه
    والباقي تيييييييييييييييييييييييييييت كبير
    البلد دي لو فيها رجاله بجد ماكنش ده بقي حالنا
    وبعتذر زي فتافيت للرجاله القليلين جدا اللي بجد
    ولو اتكلمنا علي الجواز واننا مش لاقين اللي يستاهل هايقولوا بيتحججوا
    المهم فعلا بقي نادر جدا تلاقي الراجل اللي يستاهل الكلمه
    وتجنبا للاحراج انا بقترح علي الحكومه تشيل خانه النوع من الرقم القومي الله يعزه
    لان لا بقي الراجل راجل ولا الست ست للاسف
    كله بقي تقليد صين
    نحن في زمن المسخ ( علي رأي عادل امام)

    ردحذف
  18. zainab

    اهلا يا جميل.. ومزعلة نفسك ليه بس على موضوع الخدمة العسكرية
    مهو بالشكل اللي باين ده .. ان الرجالة بقوا قليلين فاكيد محتاجين بقى ان الستات تدخل تدافع عن الوطن
    امااااااااال.. نسيب الوطن ملطشة ولا ايه اكتر مهو ملطشة خلقة كده لوحده

    نوؤتي البوست يا جميلة وعلى فكرة مدونتك عسل خالص
    سلااااام

    ردحذف
  19. المعتصم

    اهلا يا باشا ونورت البوست
    مهو علشان ما ينفعش اقول عليهم رجالة قولت تييييييت .. بدل ماقول رجالة اصل والله كدا انا بظلم الرجالة لما اقول عليهم رجالة

    وشوفت تيييييت معدية ازاي وبقيت انت كمان بتقولها
    اصله والله هم فعلا تييييييييت اوي جدا خالص

    وماتزعلش علشان بقارن بينهم وبين الرجالة.. لان اكيد شتان بين الراجل اللي بجد .. والراجل التييييييييت

    ميرسي على مرورك
    ومعلش العدوة صابتك بقى
    المرة الجاية خد مصل العدوة :p

    سلااام

    ردحذف
  20. عاشقه وغلبانه

    نورتي يا جميل .. واضم صوتي لصوتك بالغاء خانة النوع في البطاقة
    وان الله حليم ستار .. ومن ستر مسلم في الدنيا ستره الله في الاخرة

    بس والله فعلا قلة الجواز دلقوتي مش بس علشان الظروف المادية.. لا علشان الرجالة قربت تنقرض.. والستات استرجلت .. وبقت خيبة بجد

    حوووووش عنا يارب.. على رأي سعاد نصر

    ردحذف
  21. هههههههههههههه


    ههههههههههههههههههههه


    ههههههههههههههههههه


    والله بجد مش عارفه اقولك ايه

    بس والله بوست فى الصميم

    انا برضه من حرقه دمى كتبت البوت اللى انتى شوفتيه عندى ده

    بجد فعلا لازم نقرا الفاتحه على روح الرجوله

    ده فى ناس كتير اوى دخلوا هاجمونى وواحد قالى انتى عضوه فى جمعيه المراه المتوحشه وقالى المراه دى شيطان وجابلى اقول المثقفين فى المراه
    ياعينى بجد حسسنى ان المراه دى متوحشه فعلا

    ههههههههههههههه

    اصلا ستات زمان كانوا قويين جدا جدا وماتوا معادش فى منهم الوقتى خلاث بس الرجاله هما اللى قايمين بالدور

    ردحذف
  22. ريمان

    ايوة ايوة توحشت بعيد عنك .. والرجولة تم ترويضها

    نيههههههاااااااااااي

    اصلا لو الست توحشت مش عيب الست .. العيب في ان مافيش راجل عرف يروضها

    وفاتحة على روحها .. يلا خير

    نورت يا جميل البوست .. وياريت نفضل على اتصال

    ردحذف
  23. فتفوتة
    ههههههههه
    موضوعك عجبنى جدا خلاص يبنتى زمان الرجالة فات خلاص ولو فيه رجالة يبقا اخر الرجال المحترمين

    ردحذف
  24. البت المشمشية حلوة بس شقية

    ميرسي يا قمر على الكومنت.. وعلى اقولك فيه بس هم اخر الرجال المحترمين

    ههههههههههههه
    عليه العوض .. ومنه العوض

    نورتي البةست يا جميل

    ردحذف
  25. كل ده و فتافيت أمال لو كنت مش فتافيت كنت هاتعملي ايه
    ممكن تكلمينا شوية عن رجالة مش تييييت و بلاش شوال الطوب اللي انت شياله ده يا فتافيت
    ليه ديما بنفكر في السلبيين و نسيب الايجابيين
    هل تعتقدي ان مدونة زي دي بالشكل ده هتصنع الرجال
    قولي للرجالة ازي تكون أنا أرى ان المرأة من المرآة العاكسة ، و ملاحظة إن الرجالة اللي مش تييت و اللي شيفاهم كويسين ما احتلوش مساحة لائقة بهم في المدونة.
    على فكرة لو ضربتي هاقولك لأبوك الله يرحمة لما اقابلة ماشي

    ردحذف
  26. على فكرة أنا الواحد اللي بتقولك عليه ريمان بتاع ( جمعية المرأة المتوحشة )

    ردحذف
  27. سحساوي

    اه بقى يوضع سره في فتافيت خلقه

    هاقولك حاجة يا مستر سحساوي.. عمرك شوفت خبر في الجرايد انه وحده اشترت سلسلة من عندي صايغ وفوجأت انها دهب فعلا.. ولا دايما تقرا عن اللي اتخمت وطلعت السلسة بتاعتها فلصوووووو

    الرجالة الحقيقة مش محتاج بوست اقول ديه رجالة بجد.. لانه راجل بكلامي من غير كلامي راجل.. وغصب عن عين اي تييييييت

    لكن لما يبقى فيه رجالة فلصووو وبلاش تييييت.. يبقى لازم اقول واقول واقول .. لان الطبيعي ان فيه رجالة بجد.. لكن مش الطبيعي ان فيه تييييييييت

    عايز تعرف الراجل الحقيقي يعني ايه.. يعني واحد عارف معنى القوامة.. مش سايب القوامة كلها ومسك في الدرجة اللي بين الراجل والست

    راجل يعني امان.. ضهر احتمي فيه.. واحضن استخبى جواه.. يعني شهامة وشجاعة.. يعني ادب واخلاق

    يعني ببساطة كده.. واحد امشي وراه وانا مغمضة وواثقة اني عمري ما هقع ابدا

    فيه من النوع ده دلوقتي؟؟

    ردحذف
  28. سحساوي

    متوحشة .. لان مافيش راجل عرف يروضها
    اصل الست لما تتوحش.. يبقى يا فرعون ايه فرعنك قال ما لاقتش حد يلمني .. انن اااااان تشششش p:

    هع هع هع هع .. ضحكات شريرة بصوت عالي.. وبرق وردع مع شبابيك بتخبط في بعضها

    :)))))))))

    ردحذف
  29. اه صحيح

    انت اديت بابا لقب مرحوم.. ربنا يسامحك :S
    بابا ربنا يخليه ليا .. راااجل وسيد الرجااااااااالة
    وماعندناش تيييييييت في بتنا على فكرة

    :)))

    ردحذف
  30. أنا اسف جدا ربنا يحمنا كلنا بس اللون الاسود دغشش عنيا لاغيت ما خلصت قراءة في المدونة كانت عنية باظت
    فعنوان المدونة دي مع المدونة التانية اللي كتباها دخلوا في بعض بكرر اسفي ربنا يخليه و يدي له طولة العمر و العافية ، هي الرجالة مش ناقصة حد ينقص منهم .بس انت روشتيني لما قولتي (راااجل وسيد الرجااااااااالة
    وماعندناش تيييييييت في بتنا على فكرة ) قلت لنفسي ايه العمى ده هوه أنا غلط في حد و انا مش واخد بالي رجعت الكلام لاقيت إني ما غلطش غير في الموضوع اللي اعتذرت عنه و اللي انت مشتركة فيه شوية باللون الأسود الخزعبلي ده .

    ثانيا : أنت فاكرة فيلم الرعب اللي انت عملتيه هيخوفني لا أنا جامد جدا قوي ( يا ماما ) احدفي القصفة في قطة وقفة على السلم هههههههه

    ردحذف
  31. هههههههههههههههههه
    الفكرة اني ما كنتش فاهمة اللي يرحم ايه بظبط عند بابا فرديت على كل الاحتمالات .. عادي بقى

    قطة على السلم .. الله .. بموت في القطط
    هاروح اخدها تلعب مع قطتي .. واهو اكسب ثواب في قطة يتيمة وفي الشارع واسترها

    يا اخواااتي على قلبي الكركيك ده P:

    وماله اللون الاسود .. اصلي بحب اكتب بالالوان الفاتحة .. ففتاح مع فتاح.. يبقى مافيش ولا كلمة هتبان

    قولت اديها سواد في الباك جراوند.. والفاتح اكتب بيه

    دماااغ انا اصلا

    :))))

    ردحذف
  32. شكرا على وعيك الي مفتقداه كثير من النساء و على فكرة دي مش معاكسة

    ردحذف
  33. بالفعل تعجبت كثيراً لموضوعك ، وسألت نفسي هل عراك وحرب الرجل والمرأة ما زالت قائمة..؟!!

    ويا أختي فتافيت..اتركي بعض السفهاء الذين ما يزالون يقاتلون المرأة ويوجهون لها الاتهامات
    واعلمي ان من يصب جام غضبه على المرأة انه ضعيف شخصية ولا يستحق ان يكون من صنف الرجال..

    ولا أخفي عليكي ان موضوعك وكلماتك رائعة ومنتقاة انتقاءاً ممتازاً ..

    لا تنسوا اخوانكم في غزة من دعائكم

    ||..بحــر الدموع..||

    ردحذف
  34. سحساوي

    ميرسي سحساوي .. ده اقل حاجة عندي عااااااااااا

    ردحذف
  35. بحـــر الدموع

    اهلا اخي الفاضل

    والله انا ما شغلة بالي بيهم.. بس هم بيخرفوا فحبيت بس اقولهم اصحوا وشوفوا بتتكملموا عن مين

    وميرسي على ثناء على موضوعي

    نورت البوست والمدونة.. واسفة اني رديت على كومنت لك قبل كدا على انك بنت
    اكرر اسفي سامحني

    ردحذف
  36. ما اعتقدش ان الكلام ده بجد أكيد الموقع ده هزلي لأن مش ممكن حد عاقل يقول الكلام ده بجد

    ردحذف
  37. تامر علي

    والله انا برضو بقول مستحيل حد عاقل ومحترم يقول كدا
    بس اهو الرابط فوق يا فندم ادخل واتفرج
    وما خفي كان اعظم والله

    نورت البوست

    ردحذف
  38. الموضوع بجد جميل وطبعا حسن أختيار الكلمات وروعه الأسلوب وجمال الحوار كل هذا يؤخذ لكي
    ولكن كما تفضلتي وقولتي لسه فية رجاله بس مش عمله نادرة ولسه فية كتير بس انتي اللي دخلتي المكان اللي الرجاله فية نسيت معني الرجوله ....(تشتم وتجري)
    الرجاله دول فعلا تيييييييييت كبير أوي وجدا لأنهم نسيوا أنهم بيتكلموا عن انسان (المرآه) له مشاعر وأحاسيس وله قلب يرتجف مثل باقي القلوب


    مهندس على درويش

    ردحذف
  39. مهندس / على درويش

    هههههههههههه عجبتي اوي تشم وتجري ديه
    والله عارفة ان فيه رجالة بس مش كتير .. بس عندنا ذكور كتييييييييييييييييييييييييييييييير
    وكلامك بجد زي الفل .. فيه رجالة اهو :)))
    نورت البوست ونورت المدونة

    تحيااااااااتي

    ردحذف
  40. بصي يا فتافيت
    بالنسبه لموضوع ضل راجل وضل حيطه
    انا شايف ان حيطه تكسب من ناحيه الضل
    لان الراجل انتي محتاجه منه كل حاجه الا ضله
    الرجاله موجودين في مصر عامه بغض النظر عن الريف والمدينه بس قليلون
    وفيه فرق كبير بين اللي مكتوب في البطاقه ذكر وبين الرجل
    مش كل من اتكتبله ذكر بقي رجل
    الرجوله لخلاق وصفات ومواقف
    بس انتي لازم تعترفي ان الستات استهبلوا وجمعيات المرأه دي بتعك
    الرجل رجل00000والست ست
    والست السويه اصلا مش بتبقي عايزه غير انها تحس بكونها ست و فخوره بكده
    بس هي بس تلاقي الراجل اللي يقدر يحسسها انها ست وكله هيبقي زي الفل
    تحياتي

    ردحذف
  41. Don_Lochy

    والله كلام زي الفل وماقدرش افتح في بوقي بكلمة

    نورت البوست

    ردحذف
  42. إعتذارك مقبول يا فتافيت

    ردحذف

خلل براحتك من غير انتظار .. فتافيت أصلاً بتحب الخيار