الله يرحمك يا رجولة

في الأول نسألكم الفاتحة على روح الرجولة .. الله يرحمك يا رجولة .. هاعيش لمين من بعدك يا أختي
وأنا اللي كان عندي أمل ألاقي راجل أتجوزه.. شكلها مافيهاش جواز ولا يحزنون

وقبل ما حد يدخل فيا شمال.. أنا عارفة كاتبة إيه كويس.. فيه رجالة صحيح لكن محدش ينكر إنهم بقوا عملة نادرة جداً ويمكن بقوا في ندرة الزئبق الأحمر ومعايا دليل على ناس فاكرة نفسها رجالة... والعزاء للرجولة
كنت بدور على مادة معينة في حقوق الإنسان محتاجاها أوي.. وبعدين في خيارات البحث لاقيت حاجة كدا اسمها (المجلس المزوي المخفي للعيال).. الترجمة ..
المجلس القومي المصري للرجال.
دخلت أتصفح أشوف فيه إيه يعني؟؟.. وخير الرجالة جرالها إيه بعد الشر علشان يعملوا مجلس قومي ليهم؟؟ وياترى هيناقشوا فيه قضية العنف ضد الرجل؟؟.. والا التحرش بالرجل؟؟.. ولا إغتصاب الرجل؟؟.. ولا قضايا هتك العرض للرجل؟؟.. ولا الحقوق من النفقة والمؤخر والذي منه؟؟.. قولت أخد فكرة وأشتري بكره.
ودخلت والله يارتني ما دخلت.. حاجة تثير الغثيان.. تجيب كرشة نفس مع احمرار في العيون وقليلا من الرشح مع ميل للتقيؤ.. حاجة بجد تافهة ومقرفة اخر حاجة.. والرابط فوق ابقوا شوفوه .. وشوفوا المأسوف على رجولتهم قايلين إيه في إجرائتهم ضد المرأة.. حاجة كده (تيييييييييت كبيرة خالص).. لافيه دين ولا نخوة.
وقال ايه لو وحدة جرالها حاجة في الشارع ما تساعدهاش (والنبي ساعد نفسك الاول).. وسواقين التاكسي ما يقفوش للستات(على اساس ان الرجالة اصلا بتركب تاكسي هاتوقفوا حال السواقين).. ومش عارفة مقاطعة اللي يتجوز من مصرية(على أساس أن فيه غير المصرية ترضى بيكم).. وماتجوزش إلا واحدة معاها إعداديه(طبعا علشان تطلع العيال في تخلف أبوهم بظبط).. وفيه كتير هناك بس ماليش نفس اكتب.

بس الفتوفتة مش على كده.. دول عالم فاضية ومش لاقين حاجة يعملوها.. بس لما يكتبوا باب كامل اسمه (المرأة المصرية في سطور).. يبقى كده لعبوا في عداد عمرهم.. وإليكم ما جاء بالباب (اللي بين الاقواس كلامي انا):


المرأة المصرية في سطور

المرأة المصرية هي المرأة الوحيدة في العالم التي قامت بذبح زوجها ثم بعدما ذبحتة قطعت لحمة وأعضاءة ثم كسرت عظامة ثم قامت بتعبئة جثتة وقد تحولت الى قطع صغيرة في أكياس بلاستيكية وقامت بإلقائها في بالوعات المجاري أو المصارف

(لا بس كفايه.. قطعتوا قلبي والله.. يا عيني على القهر.. ده احنا ستات وحشة أوي جدا خالص)

أثبتت الدراسات المصرية التي تدور حول ظاهرة الثأر بصعيد مصر أن النساء هن المحرك والمسبب الرئيسي لهذة الظاهرة

(يعني راحت هبة الرجالة يا جبيصي.. على اساس ان الرجالة شخشيخة.. روح روح ..تعالى تعالى.. الراجل لو ماكنتش كلمته من راسه يبقى تييييييييت)

لا تتوانى المرأة المصرية عن إستخدام جسدها لتحقيق أغراضها فمثلاً إذا أرادت الزواج ووجدت أن الرجال يميلون مثلاً للزواج من المحجبات إرتدت الحجاب وإذا وجدت أن الرجال يرغبون في غير ذلك إرتدت الميكروجيب والبيكيني

(وده إن دل هايدل على ايه يا تييييييت كبير أنت.. هيدل على أن الرجالة (مجازا) اللي انت منهم عايزين حد يمسح ريالتهم.. لأنهم هطل.. على أساس اللي أنت بتتكلم فيه .. بس واضح أنك من النوع ده .. تيييييييييييييييت .. بس أنت كدا بتغلط في كل واحدة محترمة في مصر ومحجبة ودبوس طرحتها بمليون من عينتك يا تييييييييت اوي جدا خالص)

المرأة المصرية تستغل وجود بعض الرجال ناقصي الرجولة في إظهار مدى سوء أخلاقها وتجبرها فأحياناً تشاهد وأنت تسير في الشارع في مصر إمرأة وقد أخذت في ضرب أحد الرجال ( مجازاً ) بالحذاء

(هو الأخ منين بظبط.. ولا ديه ترسبواب من حياتك الشخصية.. وأي شارع ده.. وعامة الست اللي بتضرب راجل مش ست.. بس كمان الراجل اللي وصل ست إنها تضربه يبقى .. تييييييت.. يا تيييييييييت كبير خالص )

فهل رأيتم أسفل من ذلك ولا أسقط

** ** ** **

بزمتكم ديه ناس محترمة أصلا.. ده كفايا الجملة اللي في أخر الباب (فهل رأيتم أسفل من ذلك ولا أسقط).. بصراحة يا ننوس عين أمك أنت وهو ما شوفتش أسفل من كده ولا أسقط.. لما راجل (وبعتذر للرجالة اللي بجد) شحط طول بعرض زيك ويكتب اللي أنت كاتبه ده يا سيد أمك.. فعلا ده ما يطلعش غير من سافل ساقط أكيد.

المهم إني شطت من الكلام ده.. وتيجي ماما تشوف الرجالة اللي ليل ونهار.. راكبة على وداني بموضوع الجواز.. وضل راجل ولا ضل حيطة.. شوفتي يا ماما اهي الحيطة احسن.. على الأقل مش هاتقول الكلام ده.. فضلت أفصص في الموقع ابن (تيييييييت) ده علشان ألاقي حاجة توصلني .. لأي راجل (مجازا) أتكلم معاه.. وأخير وقعت في إيميل قال إيه للإقتراحات والتعليقات.
وفعلا بعت له الرسالة دية:

السلام على من أتبع الهدى
حول ما تفضلتم بعرضه في محتويات هذا الرابط
http://www.geocities.com/egyncm/egy_wm.htm
المرأة المصرية في سطور
وخاصة الفقرة الأولى وهي::
المرأة المصرية هي المرأة الوحيدة في العالم التي قامت بذبح زوجها ثم بعدما ذبحتة قطعت لحمة وأعضاءة ثم كسرت عظامة ثم قامت بتعبئة جثتة وقد تحولت الى قطع صغيرة في أكياس بلاستيكية وقامت بإلقائها في بالوعات المجاري أو المصارف
** ** ** **
ذبحته .. لحمه .. أعضاءه .. عظامه .. جثته
هكذا تكتب بشكل لغوي صحيح فلا يصح عند التحدث عن مذكر غائب
أن تُستبدل الهاء المربوطة بالتاء المربوطة .. إلا إذا كانت علامة التأنيث
هامة جداً بحياتكم ولا يمكن الإستغناء عنها.. حتى في التحدث عن مذكر غائب
غائب عن الحياة والوجود
وأرغب في إضافة فقرة جديدة في باب المرأة المصرية في سطور بحيث تكون::
5
المرأة المصرية هي من صححت لكم أخطائكم اللغوية
والعزاء للمثقفين
بنت مصرية وأفتخر رغم كيد الكائدين

** ** ** **
نفسي بس راجل فيهم.. ده لوفيهم رجالة .. يرد على رسالتي

وبعدين حقوق إيه اللي بيدوروا عليها.. ما القهاوي حكر عليهم.. البلاي ستيشن منفردين به.. النواصي وواقفتها بتاعتهم لوحدهم
عايزين إيه تاني.. بجد حاجة توجع القلب.. ويا خسارة الرجولة .. اللي خلاص بقت موضة قديمة
وقال متشمللين وعاملين موقع لهم .. جتكم خيبة طيب اشتروا دومين ده السنة ب150 جنية

رايحين تعملوا صفحة مأجورة على الياهو مجانية يا مفلسين

وده لو دل يدل على إنكم .. من بتوع القهاوي والبلاس ستيشن والنواصي فعلاً

وإلا كنتم على الأقل كتبتم لغويا صح على موقع مفترض إنه واجة ليكم
طبعا ومن غير ما أكتب .. بعتذر لكل راجل.. بس راجل بجد .. مش من بتوع ذكر في خانة النوع في البطاقة وخلاص

أنا بالفتفوتة دية ما أقصدتش بيها أي راجل محترم.. لا أبويا ولا أخويا ولا زميلي في الشغل ولا راجل عارف معنى الرجولة

وعارف معنى القوامة.. وعارف يعني إيه ست.. وإن ربنا خلقنا مكملين لبعض.. مش ساخرين ومتهكمين على بعض
وعلى رأي الفيس بوك
(لسه فيك رجالة يا مصر)