03 فبراير 2009

سامحني يا بابا .. والله غصب عني


فتفوتة انهارده للاسف هاخرج فيها عن وعدي لبابا.. أني امشي جنب الحيط.. بس انا نسيت اقول لبابا ان اللي بيمشي جنب الحيط.. بس الصورصار.. والصورصار كبيره شبشب يتفعص بيه.. وانا مش صورصارة بقى على فكرة.. ولا في شبشب يقدر يفعصني.. وحتى لو اتفصعت فاللي يتفعص انهارده.. بطل وراجل.. وفتافيت بــ100 راجل.. فسامحني يا بابا بقى.. مش قادرة افضل عايش دور الصورصار.. بجد مش قادرة.

وانتم كمان يا جماعة سامحوا فتافيت على الفتفوتة الملخبطة ديه.. واللي عاملة زي طبق الكشري.. حاجات كتير على بعضها.. عدس اسود وعدس اصفر ومكرونة على دقة وصلصلة وتقلية.. وفي الاخر بتجيب حموضة.. بس الحموضة بتاعة فتوفتي حموضة في القلب والضمير.. مش حموضة في المعدة والمريء.

والله ما عرفة ابتدي منين؟؟.. من يوم 27 ديسمبر لما الخنازير دخلوا دكوا غزة.. واحنا بنتفرج؟؟.. ولا ابتدي من رد فعل العرب اللي غلب رد فعل النعامة المظلومة في ثقافتنا؟؟.. ولا مهزلة القمم ولا مهزلة الاعمار؟؟..

ولا اقولكم.. كبروا دماغكم من ده كله.. اصله كلام الكل عارفه.. (والعايط على الفايت نقصان عقل).. والحمد لله لسه عندي عقل.. او فتفوتة عقل بعد اللي شوفته في الفترة الاخيرة.. والحمد لله ان فضللي فتوفتة عقل.

بعد الحرب ما وقفت او زي ما قالوا وقفت.. ابتدينا احنا التجهيز في السفر لغزة.. بحكم شغلنا فاحنا لازم نكون هناك بعد الضرب مش اثناء الضرب.. ومش علشان الجبن واخد حده معانا.. بس لان ما ينفعش شغلنا يحصل اثناء الضرب.. والا يبقى مجهود واترمى في الارض.. واظن ده مش وقت مجهود يضيع.. لان الحمد لله العرب بينوا انهم عندهم تتضخم في المجهود.. لدرجة انهم ماقدروش يعملوا مجهود.. مش بقوللكم تضخم بعيد عن السامعين.

ولما قولنا يا سفر.. لاقينا والحق يتقال والشهادة لله.. ناس كتير جت وطلبت السفر والانضمام لمجموعتنا.. من كل محافظات مصر وكمان من الاقطار الشقيقة(حلوة الشقيقية ديه.. ماحنا شقايق برا القمم لكن جوه القمم.. عليه العوض).. وكنت فرحانة جدا بكده.. ومش مصدقة بجد الكم اللي انضم لنا.

وعملنا ورش العمل علشان السفر.. والناس جت وفضلنا يوم كامل من غير اكل ولا شرب علشان ما نضيعش وقت.. علشان نستغل كل ثانية في الاعداد والتدريب.. والناس تصور في الابطال اللي راحة غزة.. والناس تدعي للابطال اللي راحة غزة.. (واتصور جنبه والنبي يا باه).. واللي يملس على الابطال.. واللي يقول يا رتني كنت اعرف ابقى مكان الابطال.. المهم خلص التدريب.. وجمعنا المجموعات اللي هتسافر.. وقبل السفر بيوم اي والله بيوم واحد....

تبدأ الابطال تبان على حقيقتها.. كل واحد وعذره بقى .. اللي قال عيالي.. واللي قال مراتي.. واللي قالت اهلي.. واللي قال خايف.. وطلعوا شوية ابطال ورق.. واللي كان يشوفهم وقت التدريب ولا ولاد اخت صلاح الدين.. اسود يا ناس وعمالة تجلل بزئيرها.. وعماليين يترسموا بالشجاعة والبطولة.

(ومش عارفة ليه وقتها افتكرت فيلم اوعى وشك لما طلعت ذكرية طلع في البرنامج وسألته المذيعة عن العلامة اللي في ايده واللي كانت من حرامي زيه كل حقه وهم بيقسموا الغلة.. وقالها اصل دية عضة جندي اسرائيلي حقير حقير بألشتو في ساحة القتال.. وهو اللي بألش المذيعة ورسم دور البطل.. زي اللي بألشونا كدا في التدريب)

المهم ان طبعا مش الكل كده.. فيه ابطال على حق ربنا.. ناس شالت روحها على كف ايديها وقالت.. مسافرين مسافرين لو حتى بالفوسفور مضربوبين.. بس الناس اللي بألشتنا دول كانوا اول صدمة ليا بعد الصدمات اللي حصلت وقت المحرقة.

سافرت اول مجموعة لنا لرفح المصرية.. وهناك بقى على معبر رفح كانت الصدمة التانية.. المجموعة بتاعتنا اقرارت تلاقي.. اعتراضات تلاقي.. رفض الدخول تلاقي.. تعطيل للسفر تلاقي.. وهم صامدين وقالوا داخلين داخلين لغزة ومش ماشيين.

وفجأة تلاقي سوبر مان طاير ونازل زي البراشوط على المعبر.. والمعبر اتفتح له مهو سوبر مان بقى.. مش عايزين تعرفوا مين سوبر مان ده.. مطرش الجرجير (مطرب الجيل) تامر بك حزني كعب الغزال (تامر حسني).. المعبر اتفتح والصحافة تصور والناس تزعرت.. ووسع للبطل يا جدع.. مطرش الجرجير رايح يطرش اهل غزة.. اصلهم ناقصين طرش صراحة يعني.. وناقصة تامر حزني وطرشه.


والمجموعة بتاعتنا لسه واقفه (وطلع بالشيفروليه واحنا قاعدين ورجع بالشيفروليه واحنا قاعدين).. وبعد طول انتظار دام 5 ساعات وزيادة.. جه تصريح الدخول.. رغم ان مطرش الجرجير اخد تصريحه في 5 دقايق.. وطبعا الناس مقامات يا بشر.. عيب مطرش الجرجير يقف مع الناس ديه.. اللي اقل واحد فيهم معاه دكتوراه.. والله يرحم الشهادات واللي بياخدوا الشهادات.. قولوا امين.

وكانت تالت صدمة بقى.. التصريح جه بان الفريق لازم يغادر قطاع العزة غزة.. قبل يوم 5 فبراير.. مع ان المهمة الاولى مقرر لها انها تخلص في يوم 7 فبراير.. يعني الفريق لازم يفضل ليوم 7 فبراير.. ويبدل مع فريق تاني يدخل يقعد اسبوع وهكذا اسبوعيا.. وفي الاخر يا ترجعوا يوم 5 يا مافيش سفر.. وتكتبوا اقرارات بكده.. كمان ان العودة يوم 5 فبراير ماكسيمم.

عايزين تعرفوا ليه قبل 5 فبراير..؟؟ وحصريا لقناة فتافيت الأخبارية .. ولا تقولي قناة الحظيرة (الجزيرة) ولا القناة العبيرية(العربية).. مع قناة فتافيت الاخبارية ..الاخبار كلها المستخبية.

حصريا لفتافيت.. وقبل كل الكتاكيت

قال ايه ياولاد.. احجزوا مقاعدكم من الان.. امام شاشات القنوات الاخبارية.. ولكل محبي الفرجة على جثث اطفالانا.. واشلاء نسوانا.. ودموع رجالنا.. غزة هاتضرب تاني يا رب ارحمنا.

والله بجد.. قالوا كدا.. لازم تخرجوا قبل يوم 5 فبراير لان فيه انباء شبه مؤكدة.. ان الضرب هايتجدد تاني على القطاع يوم 5 فبراير.. والمعابر هاتتقفل.. وعلشان تعرفوا ترجعوا تاني مصر.. لازم تدخلوا في حالة وقف اطلاق نار.. يبقى لازم قبل يوم 5 فبراير.. اصله لو ابتدى يوم 5 فبراير محدش يعرف هايقف تاني امته.. لان اللي بيحضر العفريت هو بس اللي بيعرف يصرفه.

والناس فعلا دخلت.. والحمد لله وصلت وقايمة بدورها هناك.. بس طبعا ضغطين المهام علشان يعرفوا يخلصوا قبل اليوم الموعود.. 5 فبراير.. والعزاء للعروبة..

(كانت معكم مراسلة قناة فتافيت الاخبارية.. فتفوتة الجهنمية.. من امام الوكسة العربية اللولبية)

وسامحني يا باه.. الحس كلمتي معاك.. احسن ما تجيلي جالطة ولا شلل من الحيطة اللي ماشية جنبها دية.. يلا يا جماعة كل فتوفتة وانتم مشاهدين للقنوات الاخبارية.. ومزبهلييييييييين

هناك 50 تعليقًا:

  1. السلام عليكم
    أنا شايفة انك تتكلمى براحتك جات عليكى انتى يعنى ما الدنيا كلها بتتكلم
    المهم مش عارفة أقولك ايه
    بصراحة أحزنتينى لهم الله
    تحياتى ليكى

    ردحذف
  2. لا تعليق ولا للخجل ولا للكتمان ولا للخوف ولا لصمت ولا لخزعبلات ولا للقرف ولا

    ردحذف
  3. بجد اشكرك على مجهودك الرائع فى المدونه يا فتفوته وقناه فتافيت اكيد فخورة بيكى

    ردحذف
  4. ههههههههههههههههههههههههههه

    ردحذف
  5. يانهاااار اسود اسود يعني مش اي كلام

    والمحروق بجاز وسخ ده كان رايح ينيل ايه في غزه......؟؟
    ياعين امه
    وربنا يستر ويكون الكلام عن يوم 5 ده مجرد تهديدات
    ربنا يهدك ياتموره

    ردحذف
  6. يغلبك ياستيته
    غطيني وصوتي يا مامي
    ها يضربوا تاني؟
    هو لسه فيه حاجة تتضرب
    الله يخرب بيت ابو العرب الجرب
    ليه بس كده يا فوتيته؟ هو مفيس رحمة؟ معندكيس اخوات بنات؟
    وبعدين عاوزة تتساوي بوكسة الجيل؟ الجزمة اللي لو اتلميت عليه لازم الأول اكتفه واجيب حلاق يحلق لأمه اجباري وبعدين أجبره يستحمى وينضف بتاع "أجمل حاجة فيكي بروح امه

    عاوزة تتساوي بالجزم في زمن عليت فيه الجزم؟
    مش مسمحاكي علشان انا دلوقتي ها اقوم اخد مهديء وانا كنت زي الشكيكة خمسة فضفضة ناوية مبصش ع الاخبار كام يوم

    يارب ابوكي يقفل ضورف المدونة ها بأى ها

    ردحذف
  7. فتفوته
    يعنى إيه غزة هتنضرب تانى
    عادى يعنى كا،،ا بنقول ..غزة هيدخل لها الغز ولا غزة هيدخل لها زيت التموين
    يعنى إيه يعنى قالوا كده
    يعنى سفله وسفالة مورديتش على حد
    عارفين وساكتين
    هو فى إيه
    هى غزة ساكن فيها قطط وكلاب؟
    غزة ساكن فيها اشرف ناس..اهل الرباط
    يعنى إيه..مش مصدقه مش قادره اصدق السفاله دى
    للدرجة دى

    انا هتجنن..زإمتى يارب بقى امتى يا حنان يا منان
    هينتهى العوان ده
    فتفيت
    بخصوص تامر حسنى
    ما انت عارفه ان البلد بقت بلد حزمنى يا ابا

    ردحذف
  8. تامر حزني؟
    تعطيل سفر؟
    أبطال ورق؟
    اعذار؟
    5 فبراير؟

    عرفتي ليه احنا وصلنا للحاله ديه؟

    ردحذف
  9. شرقويه بلدياتي
    تحياتي
    لمجهودك الرائع و اسلوبك المستمد من قناة الجزيرة بمراسليه و انباءهم الساخنه و سبقهم الصحفي و ناقص تستضيفي بن لادن
    الناس انواع الفاعل و من يتمني ان يكون فاعل و المفعول به
    اي الذي يقرر و يفعل و ينفذ و من يتمني و لكنه لا ينفذ و هناك الخامل الذي ينفذ ما يؤمر به

    و انت و مجموعتك في خانة الفاعل

    تحياتي

    ردحذف
  10. والله الواحد خجل من نفسه لما قرأت البوست ده

    ربنا يبارك فيكم ويسدد خطواتكم

    وفي حالة جهاد الدفع لا يحتاج لا إذن والدين ولا يشترط له شرط كما نص علي ذلك اهل العلم

    بل كلٌ يدفعُ بحسب مقدرته


    تقبلي موفور التحية

    ردحذف
  11. الله يرحمك يا شهادات صحيح
    دكتوراه ايه يا شيخه جنب دبلون صنايع
    يلا ربنا يرحمنا

    ردحذف
  12. بنوتة

    مهو أنا كمان شايفة أني أتكلم براحتي.. بس البابا بتاعي نووو شايفوووووو كدوووووو
    يلا مش مهم
    ويارب يارب .. يكون موضوع 5 فبراير مجرد تهديد بس علشان الناس تطلعي بدري وخلاص

    نورتي البوست يا بنوتة
    يا جميلة

    ردحذف
  13. ادم المصرى

    يا باشا هدي نفسك.. كل اللي انت بتقول عليه لا ده .. سمات الموطن العربي
    اذن ابتسم فانت عربي

    نورت البوست
    تحياااتي

    ردحذف
  14. انى احبكم فى الله

    فناة فتافيت فخورة بتواجد يا جميل
    نورتي البوست

    ونحبك في الله

    ردحذف
  15. عاشقه وغلبانه

    حبيبتي حرام كلمة يا نهار اسود.. لان النهار في المقولة ديه مقصود به يوم القيامة.

    الحروق كان رايح يتصور مش متخيلة انتي كم الصور اللي على الفيس بوك علشان راح غزة
    ومن كتر نرفزتي اتكلمت بشكل ماعجبش الجروب اللي منزل الصور .. وحذفوا كومنتاتي
    قومت انا حذفه الجروب من الجروبات اللي مشاركة فيها
    ومحدش احسن من حد بقى

    واتمنى من كل قلبي يكون الكلام مجرد تهديد بجد
    يارب يكون تهديد وبس

    نورتي البوست يا دوكة عاشقة ؛)

    ردحذف
  16. ستيته حسب الله الحمش

    سوتايتة افندي نورتي يا زعيمة
    وللاسف يا اوختي مافيس حندي احوات بنات كلهم لكالة بسنابات.. علشان كدا قوية ومفترية.. هع هع هع .. ضحكات شريرة متفرق بصوت مخييييييييف

    وكمان بتدعي على مدونتي وهي لسه نونة بتحبوا على ارض التدوين
    طيب ربنا يسامحك.. بس ها

    ومش عارفة هو لسه في غزة حاجة تتضرب؟؟.. الله اعلم بقى

    وزي ما قولت المعلومة شبه مؤكدة مش كونفرم 100%
    ويارب تكون اوشاعة من الاوشاعات :(((

    يلا بس انا زحلانة منك بقى
    علسان مدوني بتعدي عليها .. انتي ماعندكس مدونات صحننين :(((((((

    ردحذف
  17. الفقيرة إلى الله أم البنات

    اولا نورتي البوست والمدونة كلها

    ثانيا والله ده اللي اتقال نصا على المعبر والله اعلم بقى.. ده حقيقي ولا كان مجرد تهديد للناس علشان مايطولوش جوه او انهم يخافوا وما يدخلوش اصلا؟؟.. ربنا الاعلم :-؟
    وقال يا خبر انهارده بفلوس .. بكره يبقى على الفضائيات :("

    ام عن المحروس تامر حزني..
    مطرش الجرجير كان طالع حفلة تصوير .. مع كل خطوة عشروميت صورة .. حاجة تفقع المرة السليمة :S

    وموضوع حزمني يابا ماكنتش متخيلاه كده بصراحة وللدرجة ديه.. طيب واللي ابوه ما بيعرفش يحزم.. يعمل ايه..؟؟ يقرص من غير تحزيم.. وحسبي الله ونعم الوكيل

    تاني نورتي المدونة
    وشرفني مرورك
    تحياااااتي

    ردحذف
  18. Eng. Ahmed Abo El-Ella

    يا هندسة هو على كده وبس....
    الباقية تأتي

    نورت البوست

    ردحذف
  19. أحــوال الهـوي

    شرقاوي.. ياااه الدم بيحن حتى اون لاين :))
    نورت البوست.. وربنا يكرمك على كلامك
    ويارب نكون فاعل.. ومايجورش علينا الزمان ونبقى من المفعول بهم.. قول امين

    وللاسف كان المفروض اسافر الحد اللي بعد الجاي.. بس البابا بتاع الانا.. نوووو موافقووو

    ربنا كبير.. والناس اللي هناك تلحق تعمل حاجة .. في الوقت اللي كش منهم ده

    ويارب معلومة 5 فبراير تكون مجرد تهديد بس وما تحصلش

    وقريب هاستضيف بن لادن..
    SOON
    مع فتافيت اوعى تغير المدونة D:
    نورت البوست
    والمدونة

    ردحذف
  20. القلم السكندري

    شرف كبير ليا يا فندم تشرفيك مدونتي

    وليه الخجل بعد الشر.. كل واحد يجاهد بالشكل المتاح

    الجهاد دلوقتي فرض عين.. بس للاسف مافيش جهاد ميداني نقدر ندخله

    فالجهاد بالاقلام والجهاد بالمال والجهاد بالمجهودات والجهاد بالمقااااااطعة والجهاد بالدعاء

    وربنا يتقبل منا جميعا

    نورت البوست والمدونة كلها

    وافر احترامي وتقديري
    تحيااااااتي

    ردحذف
  21. عايش... ولكن !!!!

    فاكر زمان لما عادل امام كان بيقول بلد بتاعة شهادات
    وسبحانه مغير الاحوال
    ربنا يرحمنا برحمته .. رحمة وااااسعة

    نورت البوست
    وشرفتني

    ردحذف
  22. آه يا رجولتنا ( لا تعليق )
    حرام عليكي خنقتيني مش لاقي كلام أقوله
    مدونة مخلصة بجد

    ردحذف
  23. بسم الله الرحمن الرحيم
    السلام عليكم ورحمة لله وبركاته
    أختى فتافيت هانم
    اولا مشكورين طبعا على مجهوداتكم ويارب تكون حكاية خمسة فبراير دى كدبة ابريل بس بدرى شوية
    ثانيا مين تامر حزنى ده؟انا متهيألى سمعت الاسم ده قبل كده
    ااااااااااه استنى استنى مش ده الواد اللى كان ضارب الشهاده بتاعة الجيش ؟ يخرب بيت امه وهو لييه عين بعد عملته السوده دى ؟صحيح عالم تخاف ماتختشيش
    عارفه كان نفسى الواد يدخل الجيش وييجى الكتيبة اللى كنت فيها كنا ظبطنااااااااه صح الصح يلا بقى فلت من ايدينا ابن المحظوظه
    تقبلى مرورى وتحياتى
    ودمتى بكل ود وخير
    والسلام عليكم ورحمة الله وبركاته

    ردحذف
  24. سحساوي

    اهلا ونورت المدونة
    ويا سيدي مش لازم تتكلم
    فكل لبيب بالاشارة يفهم.. وعجبي

    ردحذف
  25. المعتصم

    اهلا يا باشا البوست نور.. واحتمال تحصل قفلة لاني سارقة من العمومي.. وماتقولش لحد.. نيهههااااي

    وهو بظبط اللي بتتكلم عنه.. وما شاء الله.. مطرش ومسجون ومتهرب من الخدمة العسكرية

    هي ديه السيريالية المصرية

    شرفني مرورك واسعدني تعليقك
    سلاااااام

    ردحذف
  26. اه صحيح

    ويارب امين يكون موضوع 5 فبراير .. كذبة ابريل بس جت بدري شهرين

    امين امين

    ردحذف
  27. فتافيت

    أولا : شرفنى مرورك الجميل
    و شئ يشرفنى فعلا إننا نكون أصدقاء

    ثانيا : أدينى أمارة
    يمكن أكون هيا :)

    ثالثا : أتفق معاكى إن ماعدتش ينفع إننا نمشى الحيط
    لما كلنا نمشى جنب الحيط
    كدا الرصيف هيبئا زحمة
    و الطريق فاضى
    مش كدا و لا ايه؟؟

    رابعا : للأسف كلنا بتوع مظاهر
    و الكوسة هيا اللى ماشية
    و حسبنا الله و نعم الوكيل

    خامسا : احنا خلاص النهاردة 5 و هنشوف
    صحيح الكلام دا صح و لا ايه
    بس بغض النظر عن كونه صح أو غلط
    فالأمر مش مفاجأة يعنى
    و متوقع


    ربنا معاهم يارب

    و ربنا يخليكى لقناة فتافيت الاخبارية
    و لأصحاب فتافيت الجهنمية :)



    دمتى بود

    ردحذف
  28. فتفوتة انا كمان باباتي قايلي امشي جنب الحيط عاااا

    بصي يا قمر وكسة الجيل ومطرش الجرجير اتهرب من الجيش في مصر فعلشان كده اخد التصريح في 5 دقايق يا بنتي شهادات ايه ودكتورهات ايه بس

    الا قوليلي كنتو رايحين غزة ليه؟؟

    والنهارده 5 فبراير يا رب يبقى تهديد بس وميحصلش ضرب تاني على غزة

    ردحذف
  29. على فكرة يا فتة انتي

    انا رايح جاي لمصر ونفسي اشوفك واجلس معاكي جلسة على النيل مش نأكل ونشرب حاجة على النيل ..لالا

    ازووقك في النيل

    دا حتى السباحة حلوة في البرد

    " مجنون نص كم "

    ردحذف
  30. اسمعي اختي فتافيت ..

    كلماتك طرقت ابواب قلبي ..فلم يعد مجال للحديث لكنني سأقول هاتين الكلمتين
    أولاً..لقد أعلنت الحكومة المصرية خيانتها على مرأى ومسمع من العالم اجمع، وهذه الحقيقة لا تحتاج الى تزوير كي نقولها نحن اهل غزة بل والعالم اجمع في مقدمتهم اهل مصر الشقيقة.فإن ما يحدث على معبر رفح مشاركة لقتل الفلسطيني في غزة، وليشهد ربنا على هذا

    ثانياً : أود أن أقول لكي ولكل حر في شعوبنا العربية والاسلامية لا تقلقوا اهلكم واخوانكم في غزة يحبون الموت في سبيل الله وفي سبيل كرامة الأمة وعزتها واعادة مجدها التليد، فاهل غزة لا يخشون الطائرات ولا الدبابات ولا الزوارق الحربية ولا قنابل الفسفور الابيض المحرمة دولياً ، انها معركة بين الحق والباطل معركة يقودها اعوان الشيطان من اليهود وممن عاونهم من ابناء العرب الخونة على ابناء الاسلام المجاهدين المرابطين على حدود غزة، لكن نحن جند الله " وان جندنا لهم المنصورون"

    أملنا باللــــــه كبير ويفوق كل الحدود

    جزاك االله خير الجزاء وبارك الله فيكي على كل كلمة خرجت من قلبك ومن قلمك..

    لا تنسوا اخوانكم في غزة من دعائكم

    ||..بحــر الدموع..||

    ردحذف
  31. واحببت ان اضيف واقول
    بالفعل فالشائعات قد بدأت في غزة تأخد مكانها ببداية حرب جديدة لا هوادة فيها ضد غزة وهذا ما اعلنه المشؤوم باراك مع تلك الساقطة ليفني حول تدمير غزة
    لكن حسبنا قول ربنا
    "ويمكرون ويمكر الله والله خير الماكرين"

    لا تنسوا اخوانكم في غزة من دعائكم

    ||..بحــر الدموع..||

    ردحذف
  32. لو فضلنا نشوف اللى بيحصل دة هنيأس من حياتنا بس لازم يكون عندنا ثقة بربنا وعندنا امل فى بكرة ونكون انا وانتى وغيرنا امهات لصلاح الدين عشان لو فضلنا نتفرج مش هيكون فى صلاح الدين وهنفضل زى مااحنا بل هنبقى أسوأ . ربنا يحفظنا وييقظ شباب الأمة .آمين .

    ردحذف
  33. السلام عليكم ورحمة الله I'm from Türkiye,from Ankara I know Egypt,I saw Cairo,I was live three years at Cairo,السلام عليكم.

    ردحذف
  34. آخر تعليق ع البوست
    اظن محدش جابها دي قبل كده كله بيتسابق علي الاول انا بقي براهن تقريبا ع الاخير :)

    حلو البوست
    واوعي تغلطي في تامر حسني عشان في بنات بتريل كتييير عليه
    ولاد العامية
    واوعي تمشي ولا جنب الحيط ولا جوه الحيط
    خليها ع الله والي عايزة بيكون في الاخر
    وأعلم أن ما أصابك لم يكن ليخطأك
    وأن ما أخطئك لم يكن ليصيبك
    100/100 يا فندم
    وبعدين انا واخد علي موضوع اني اودي عيش وحلاوة متقلقيش وبجيب اكل تاني كمان والله مش عيش وحلاوة بس

    ردحذف
  35. السلام عليكم / ربنا يتقبل منكم ويجعل عملكم فى ميزان الحسنات ويارب تتهد المعابر كلها ، أنا جربت ذلها أثناء رحلة العمره رزقنا الله وإياكى زيارة بيته وكانت أسوأذكريات الرحله عندها ، مع اننا المفروض إخوه أو حتى يعنى رايحين نعمل عمره مش حنفجر نفسنا فيهم ، وكانت الأجانب تتفتحلهم هوا ، حسبنا الله ونعم الوكيل .

    ردحذف
  36. Soul.o0o.Whisper

    اهلا يا جميل نورتي البوست
    والامارة.. ياترى لك اخت بنوتة في صيدلة ويمكن تكون انتي .. ورقم الموبايل اتصالات :؟

    اللي حصل بقى انهم بعتوا رسايل على الموبايل انهم يخلوا اماكنهم ويكوموا على المعبر يوم الاربع قبل الساعة 5 العصر علشان المعبر بيتقفل الساعة 5
    ولحد دلوقتي احنا مش فاهمين فيه ايه!!!!!

    وياستي لا رصيف نافع ولا شارع نافع .. ولا حتى البلاعة نافعة .. لناااا الله

    شرفني وجودك يا جميل

    ردحذف
  37. Lady E

    المونة نورت
    اه صح.. دلوقتي البطولة بقت بالتهرب من الجيش.. يا موكوس ده الجيش اتهربت منه رايح غزة تنيل ايه.. لو تشوفي كمي الصور اللي اتصورها هاتعرفي كان رايح ليه.. يلا بلا وجع قلب

    احنا فرق الدعم النفسي ورفع كرب ما بعد الصدمة.. وما تشغليش بالك كله بيطلع في الغسيل

    الناس جت امبارح الفجر.. ومش فاهمين ليه جم بدري كدا.. المهم اننا هانبعت ناسية تانية يوم لحد

    نورتي البوست والمدونة كلها

    سلام يا قمر

    ردحذف
  38. " مجنون نص كم "

    اللهي تقع انت في النيل بس من ناحية افريقيا علشان تقع في بق تمساح جعان واخلص منك
    قول اميييييين

    ردحذف
  39. بحـــر الدموع

    شرف ليا اختي ان غزاوية تدخل مدونتي
    نورتي البوست والمدونة كلها

    وماعنديش تعليق على كلامك.. غير ربنا كبير وموجود

    ربنا كبير .. وفرقنا قابل ناس من المجهادين اقسموا بالله انهم كانوا يسمعوا الحجر يدعوا لهم ويسبح الله

    ربنا معاكم حامتكم وحاركم.. وبجد غزة ما تهزمتش والله ما اتهزمت

    الله معك

    سلام

    ردحذف
  40. نبض الحياة

    اهلا بك في المدونة
    ويا ست الكل انا عني استعداد اربي صلاح الدين.. بس لما يبقى فيه اب يعرف يخلف صلاح الدين
    كله دلوقتي هامه اكل عيشه وبس.. ده انا سمعت من راجل وقال راجل قال .. اجاهد ايه يا ابله مانا كل يوم بجهاد في طابور العيش

    ربنا كبير .. وقادر يحرك ابو الهول العربي ويدوب التلج اللي غطى النخوة والاحساس

    وقارد على كل شيء زي ما بيحي العظام وهي رميم.. يحي النخوة العربية بعد ما بقت طق حنك وبس

    شرفني وجودك

    سلام

    ردحذف
  41. NİSANUR
    السلام عليكم ورحمة الله وبركاته
    Welcome to my blog
    nice to meet you
    Thank you very much for your visit
    Çok teşekkür ederim
    سلام عليكم

    ردحذف
  42. Tamer Diab

    تامر باشا.. فينك من زمان
    وماطلعتش الاخير بعدك فيه كومنت
    يعني على ضامنتك اتكل على الله .. والاكل عليك .. اشهودوا يا ناس

    ربنا كبير ولا يصيبنا الا ما كتب الله لنا

    وبالنوسبة للمطرش الجرجير .. اموت واعرف بيحبوا فيه ايه .. ماخابرش

    نورت يا باشا
    سلاموز

    ردحذف
  43. حياتى نغم

    زمان كانوا بيقولوا:
    انا واخويا على ابن عمي وانا وابن عمي على الغريب

    دلوقتي بقيت انا والاجانب على اي حد اعرفه

    وابتسم فانت عربي منكس الرأس

    حسبي الله ونعم الوكيل

    نورتي البوست يا نغم
    سلاااااام

    ردحذف
  44. بحـــر الدموع

    اسفة جدا اخي الفاضل .. ما اخدتش بالي من انك اخ
    اسفة بجد اكرر اسفي سامحني

    العتب على النظر

    نورت المدونة اخ عزيز

    ردحذف
  45. بصي لازم تفهمي ولازم تفهمي بابا
    انك من حقك تتكلمي براحتك طول مانتي مابتغلطيش في حد بشخصه او بتوجهي اهانه شخصيه لواحد من المشؤمين
    من الاخر هو ده الخط الاحمر للتدوين
    المهم
    بالنسبه للي بيحصل عالمعبر ده
    ليه اسم واحد
    مش هاينفع اقوله هنا عشان دي مدونه محترمه
    واحنا اتعودنا علي كده في مصر فكرتيني بفيلم عمارة يعقوبيان لما يوسف داوود كان بيقول ليسرا
    ( يا مدام كريستين دي بلدنا )
    تحياتي
    ويارب ربنا يكرمك وتشيلي اللون الاسود ده يحسن عيني وجعتني

    ردحذف
  46. ليه يا فتافيت تكسري قلب الراجل بتاع مهبول نص كم ده
    بالزمة لو كنتي عبيطة وهبلة زيه كده كنتي ترضي حد يتريق عليكي
    أنا بس نفسي أفهم الكومنتات الي بتيجي من غير معرف دي لاي حد مش بيكتبوا اسمهم ليه ؟
    خليك راجل كده وبدل ما تشرب بريل أكتب اسمك ع التعليق ويكون بلينك ندخل نشوف باقي هبلك في مدونتك
    او ميل للمعجبين حتي يا اخي

    ردحذف
  47. اول ابوست فكرني بقصة بني اسرائيل مع طالوت ... عددهم فضل يقل مع الاختبارات لحد ما بقوا 80 مقاتل ولكن هم اللي النصر تحقق على اديهم فى الاخر ...

    على فكرة الرجال عملة نادرة في كل الاوقات مش في وقتنا بس ... موضوع مميز شكرا لك

    ردحذف
  48. Zika

    اهلا زيكا نورت البوست
    وميرسي على توضيح الخطوط الحمرا للتدوين
    وسامحني على اللون الاسود .. لاني بجد بحبه جدا .. ومش هاقدر اغيره .. ماتزعلش .. اقنع نفسك انه مش اسود
    كل ما تدخل المدونة قول .. ده مش اسود .. ده مش اسود .. :))))))

    وكلامك زي الفل .. وفعلا وواضح ان ده الطبيعي

    نورت يا زعيم البوست

    سلااااااااااااام

    ردحذف
  49. Tamer Diab

    ههههههههههههههههه .. نص كوم ده عشرة يا تامر
    ده هو سبب قوي اني اكره المنتديات .. وكرهني حتى في المنتدى اللي المفروض اني المسؤول عنه

    وقال هربت منه للتدوين الاقيه ناطط ليا في المدونة

    ربنا يكرمه ببقره هبلة تنطحه واخلص منه بقى
    او ربنا يهديه ويحل عني

    ردحذف
  50. تامر علي

    والله عارفة انها عملة نادرة .. والظاهر ان ده الطبيعي
    بس الحمد لله انها عملة ناردة بس لسه ما انقرضتش

    شرفني مرورك

    ردحذف

خلل براحتك من غير انتظار .. فتافيت أصلاً بتحب الخيار