14 فبراير 2009

والله كان نفسي يبقى موجود




طبعا كل حاجة هاتقلب احمر انهارده.. الدباديب الورد الشنط الهدايا.. حتى الناس هاتلبس احمر.. وده طبعا مش علشان انهارده اليوم العالمي للحصبة.. لا لا لا لا .. بس علشان انهارده الفلانتين داي


قولت انزل تدوينة حمرا بقى.. على غرار التدوينة السودا.. واتضامن مع العشاق انهارده

ومايمنعش ان كان نفسي انه يبقى موجود حبيب ليا انهارده.. بس يلا اهي ازمة وتعدي بقى.. ومش كل سنة يبقى في فلانتين داي عندي.. السنة ديه اخدت اجازة .. والبركة فيكم.
Happy valantine's day

** ** ** ** ** **




أحبك يامن أنقذتني من بين براثن الهموم .. لتعيد مولدي من جديد وتزيح بكفيك الغيوم .. لأرى نور الشمس حقاً وأفهم معنى الحب والخلود.

مَلَكتَنِي بين ليلة وضحاها .... مَلْكْتَنِي الدنيا بسماءها.


أحببتك فارس مغوار .. جاء لقلبي يبكي و ينهار .. ويقول عن يقين .. حقاً الحب يذوب فيه الأختيار.

دمعه لؤلؤ منثور على الشواطئ والبحور .. فيه أجد غايتي .. فيه أجد مرادي .. فيه حقاً فارس بلا غرور.

عشقت الإبحار بين جفونك .. عرفت معنى الحب بجنونك .. مجنوناً بحبي و أنا قد جننت وأصبحت في العشق مفتونك.

ضاعت من عمري أعوام طويلة .. وأنا أبحث عنك هنا وهناك في حيرة .. ولم تعد في يدي أي حلية أو وسيلة.

لتأتي أنت رجل من زمن جميل .. كنت أظن الوصول له مستحيل .. تحملني وتبحر بسفينتك .. لأدخل معك لعالمك .. عالم الجنون والحنان .. عالم الحب والأمان .. عالم لا يعرف معنى للحرمان .. عالم فيه أنا إمرأة وأنت كل الرجال.

فلا أرى الكون إلا بعيناك .. أتنفس أنفاسك .. أنعم بإحساسك .. وأتعلم ألحان العشق بين أحضانك.

رغم كل ما بيننا من مسافات وحدود .. رغم هذا العالم الغريب العنيد الحقود .. أصبحنا معاً ملوك هذا الكون والوجود.

يا رجل تتجمع كل العصور بعقله .. وتركع كل النسور لعزه .. ويرخص كل غالي من أجله .. وتتلاشى كل العيوب في خصاله.

فأصبح القرب منك الحياة لقلبي ووجداني .. والبعد عنك وفاتي ونهاية أماني.

.. أعشقك حتى نهاية عمري ومماتي ..

هناك 51 تعليقًا:

  1. هيييييييييييييييييه اول رد

    ردحذف
  2. ماتزعليش يافاتفيت
    كلنا لوحدنا بس بنفرح روحنا
    اعملي نفسك فرحانه بالفلانتين
    هههههههههههههههههههه

    انت شايفه يعني كان حد عبر اهلي وقالي كل سنه وانا طيبه

    مانا وحيده شريده اهو


    لا تبكي يا اختاه



    كلامك جميل يافتفوتي
    ا

    ردحذف
  3. والنبي انتي عثثثثثثثثثثثثل

    يلا نقضيها فرجة بقى .. وماله خلي الشعب يعيش ويحب

    كل سنة وانتى طيبة وهابي فلانتين دااااااااي

    شوفتي حد عبرك اهو

    اجيب بوكيه ورد واجيلك يا جومر

    انت سكر بجد

    ردحذف
  4. اييييييه يا بنتي انا كمان في نفس ذات الحالة

    ده بقى فلانطين مش فلانتاين داي

    هاجي تاني علشان اكمل باقي البوست الاحمر

    ردحذف
  5. أنا بقالي كااااام سنة معرفش أصلا الفلانتين ده بتاع مين ولا بيتاخد شرب ولا أقراص؟
    بس أعتبريه موجود واشتري هيدة كمان وحطيه في البيت والله أنا مثلا نزلت النهاردة لقيت الشوارع كلها حمرا والحياة عاملة زي قفص الطماطم - ايه الشاعرية الي انا فيها دي طماطم ! - قلت فل اوي انا هروح اشتري برفان جديد غير الي متعود عليه واجيب دبدوب لاختي :)
    وعادي يعني محستش اني بكره هبقي ناقص ايد ولا قفاه منا زي منا برضه
    وهسمع بكرة اغنيه الوحدة بتقتلني وعادي جدا ولا هتقتلني ولا حاجة وهروح الشغل مش اجازة رسمية يعني
    وهبعت اجيب فطار من عم رفعت مش اجازة هو كمان يعني
    والحياة عجوي اهي

    ردحذف
  6. هدية عشان مهتصدقي انا عارف *

    ردحذف
  7. انا وانتي وليدي واحساس اننا في حاره العوانس
    ههههههههههههههههههه

    ماتبصوش لاخواتكوا بقي وسيبوهم يزقططوا في الزلانتين
    ههههههههههههههههه


    تعالوا نعدد بعيد

    ردحذف
  8. السلااام عليكم


    أنا جيت أعلق علي بوست بلالا بس بعد ما كتبت التعليق النت قطع ومتبعتش

    ورغم أني لا احتفل بيوم الفلانطين علي راي لادي... إلا أن الكلمات الأدبية غالباً ما تأسرني فلا أستطيع الإفلات منها

    تحياتي لقلمك المبدع

    وإن شاء الله العام القادم ميكونش سادة.. هو سادة علي الكل عادي يعني :)

    ردحذف
  9. فلانتيني ولا تغديني .. طيب مونكن تعشيني؟
    اتوكسي ياولية فلانتينك حرام.. ليه بس ياابو اسماعيل؟ طب قولي كلمة حلوة .. بسبوسة
    طب قولي كلمة حلوة قوي .. بسبوسة قوي
    طب شوفت القمر؟ هو انا اعمى يابنت الفرطوس
    طب قولي كلمة نخلص بيها الليلة؟ انتي طالق

    هابي فلانتين قال .. يابنتي ده عيد الصيع والمخطوبين فقط لاااااااااغير

    وبما ان سيادتك عقلية مش باين عليها صايعة
    يعني ها تشوفيه بالكتيييييييير مرة وانتي مخطوبة فمتحسيش بمحاسيسك قوي كده لحسن ها تتعبي ع الفاضي

    شعر رائع ها ابقى اقوله لأبو اسماعيل يمكن اطلع منه بدبدوب للعيال ولا حاجة

    ردحذف
  10. السلام عليكم
    كيفك أخت فتافيت..؟ ان شاء الله بخير

    اليوم ليس يومنا، والعيد ليس عيدناً
    فلم نحتفل بــه..؟!!
    أيامنا كلها ملئية بالمحبة والموده لكل من نعرفهم ويسكنون اعماق القلب..

    ألوانكم حمراء ... ولون دماء اطفال غزة أيضاً حمراء

    مع ذلك .. أقولك لك كل عام وأنتي طيبة سعيدة بلحظات عمرك ، كل عام وانتي سعيدة كل وقت وحين ..

    جزاكي ربي خير الجزاء ..

    لا تنسوا اخوانكم في غزة من دعائكم

    ||..بحــر الدموع..||

    ردحذف
  11. فلانتيييين ايه وبتاع ايه بس؟

    عيشي بدماغك
    عيشي لحياتك

    اتمتعي لغاية مييجي يوم تتمني فيه راحة بالك
    هههههه

    متخفيش ديه مجرد افكار كده

    بس ايه موضوع الكلام الجميل ده؟
    سفن وعالم ونسور
    ماشي
    لما نشوف

    ردحذف
  12. السلام عليكم

    كل سنة وانت تذوبين شوقا منه وله وفيه
    حبك سطر بين تلك السطور يتضح

    همسة تتكلم عن نفسها

    راحة بين راحتيه

    ظفرة بين أنفاسه
    شوق بحنين لأيامه

    سماء تحيط وقمر يناجيك
    والنجوم تتلصص عليك
    ،،،

    ألوان وكلمات
    ؟؟؟؟؟
    ربنا يوفقك ويعينك ويرزقك



    تحياتي

    ردحذف
  13. السلام عليكم فتافيت / أنا لم أحضر لأحتفل أعيادنا أفضل وأرقى بكثيييييير والحب فى الله ليس له وقت أو يوم ، ولكن لأهنئكى على تلك القصيدة الرائعة الجميله ، فى رعاية الله وأمنه .

    ردحذف
  14. انا جايه وجايبه الكرسى من عند تامر
    كنت هاكسره فى الكلوب هناك معرفتش امسك عليه حاجه بس هارجع له لو لقيته معلق على الزفت داى ده هاكسر له المدونه
    بت يا فتفوته
    اياك تحتفلى بالهبل ده ..انا عندنا تو عيد فقط اونلى..ومفيش غيرهم
    الفطر والأضحى
    اما الاعياد العجيبه دى ..اياك تنهى حد بيها وتاخدى عليها وزر
    ام البنات المتنرفزه من احمرار الحياة...وناس كتيير محتاجين احمر بس علشان يوقفوا نزف الجرح بتاع الصهاينه اصحاب الفلانطيم



    بت يا فتفوته...ايه الكلام الرهيب ده
    ربنا يرزقك باللى يستاهله
    ويمسكك من ودنك لو جبتى سيرة الفلانطيم ده
    يا بنتى دا قصته وحشه قوى
    ابقى احكى لك عنها يوما"

    ها اجيب الكرسى

    ردحذف
  15. ههههههههههه

    و الله نفس إحساسى ده فالنتطييييييييين السنة دى

    ردحذف
  16. أنا أضم صوتي للأصوات الرافضة للفال ال"طين" داي ده حيث أنه مش كويس خالص وليس من أعيادنا وبه أفعال غير محمودة العواقب :) ده أولاً ... ثانياً الكلمات جميلة وعميقة .... ثالثاً كل عام وانتم بخير علشان المولد قرب :)))))))))))

    ردحذف
  17. ربنا يكرمك باللى يقدر كل الحب ده ياقمر ويشيلك فى عنيه

    ردحذف
  18. هابي فلانتين داي

    وإن شاء الله السنة الجاية يبقى موجود يا ستي

    ردحذف
  19. فتافيت كلامك حلو اوى
    وعجبتنى الحتة اللى بتقول:
    عالم فيه أنا إمرأة وأنت كل الرجال
    حلوة بجد
    ربنا يكرمك بقى بكل الرجال وابقى ورينى شطارتك
    هتلاحقى على مين ولا مين
    وعموما خدى بنصيحتى وخليكى كدة احسن خفيف خفيف
    ولاحد يلزقلك ولا يقولك راحة فين وجاية منين وشغل وعقد رجالة ياختى
    سيبك منهم
    خدنا ايه من الرجالة غير حلاقة الدقن
    على راى خالتى نوسة
    تقبلى زيارتى وياريت تشرفينى دايما

    ردحذف
  20. ياعيني عليكي والله العظيم قطعتي قلبي هههههههههههه
    معلش بكره تحب ياقمر وحد يجبلك قلب احمر
    بلاخيبه يعني
    عل الحب منا اهو ياختي
    والله معبرني بمسج حتى
    ولما اشتكيت طلعت تافهه هههههههه

    ردحذف
  21. اقلك اعملي نفسك مش واخده بالك
    عااااتشي عااااااتشي خالص
    ياستي اهو يوم كده ويوم كده
    ربنا بس يرضي علينا وديما نفرح باي حاجه ولا ايه رايك المهم يبعد عننا الهم والغم والحزن
    تحياتي

    ردحذف
  22. ايه يا فتفوتة ازيك يا قمر
    كل سنة وانتى طيبة
    ويارب السنة اللى جاية لالالا بلاش خليها السنة دى تلاقى من تبحثين عنه وتقوليله القصيدة دى برده
    بس متنسيش تدعيلنا معاكى
    دمتى جميلة

    ردحذف
  23. كل سنه وانتى طيبه الحب موجود لغايه اخر العمر
    بس احنا ندور عليه بقلبنا وبروحنا
    كل عيد حب وانتى طيبه
    ويبقى قريب منك اللى تحبيبه دايما

    ردحذف
  24. السلام عليكم
    هو مش البتاع ده كان لسه فى شهر نوفمبر هو بييجى كل 3 شهور ولا ايه ؟؟؟؟؟
    وبعدين يعنى هو ليه الاحمر بالذات ؟؟؟؟؟؟؟؟؟؟
    مايخلوها مرة احمر ومره فوشيا ومره ازرق اهو يعنى علشان الناس ماتزهقش
    انا عموما مش هيفرق معايا خالص لاننا والحمد لله معندناش الحكاية دى (احمدك واشكر فضلك يارب)
    وعموما ماتزعليش خالص انا هبعتلك طلقتين لونهم احمر تبقى تطخيهم للحبايب
    ســــــــــــــــلام

    ردحذف
  25. يااجمل فتفوته
    يابنت زغنتوته
    حبيبك بكره هيجى يقولك حدوته
    حدوته عشقه ليكى
    هيدوب فى لون عنيكى

    هههههههههههههه
    والله لسه مرتجلاها دلوقتى علشانك

    على فكره
    وانا باقرا مدونتك
    كنت باكلم حبيبى
    وقريت له لكلام ده وكنت انا وهو طايرين فى السما
    لانى قلته بكل ما اوتيت من احساس
    بحبك
    بحبك
    يااجمل فتفوته

    ردحذف
  26. فتفوته
    رحتى فين..خلاص الفلانطيم خلص والنور نور والدنيا رجعت سودا أاقصد عادى لونها العادى
    صباحك فل

    ردحذف
  27. عالم فيه أنا إمرأة وأنت كل الرجال.
    كلامك جميل اوي يافتافيت وكله رقه

    ردحذف
  28. Lady E

    يا ستي عادي كله بيطلع في الغسيل
    امال اومو واريل بيعملوا ايه .. مهو علشان المواقف دية

    يلا هابي فلانطين بقى
    عااااااااااا

    نورتي يا سكرة

    ردحذف
  29. Tamer Diab

    هع هع هع .. يلا كلنا في الفلانطين سوا
    المهم اني انا واخويا بنفقس على بعض من قبلها بيوم
    السنين اللي فاتت كنا بنجيب انا وهو هدايا في اليوم ده وبيجي لنا هدايا .. السنة ديه نوووو حداد.. سبحان الله كنا مخبوطين السنة اللي فاتت.. والسنة ديه فسخين برضو سوى.. هي ديه الاخوة ياااا نااااااااااااس

    يلا كله بيعدي بقى
    المهم انا مش من شبرا علشان اعلق على هيدة ولا حيطة.. اكتب براحتك يا ابني ويخربيت مجانية التعليم اللي عملت فينا كده نيههههههههااااااااااااي

    نورت يا مش زعيم تامر باشا

    ردحذف
  30. عاشقه وغلبانه

    يا ستي ظلتنو براحتكم.. يعني هاتزورا لو بصينا عليكم

    يا ساتر على حظنا الهباب .. عااااااااااااااااا
    طبعا بهرج والله اوعى حد يفهمني غلط

    ربنا يهني كل حبيبين في الدنيا ويطلعوا ولاد ناس محترمة .. ويعرفوا يعني ايه حب

    ردحذف
  31. القلم السكندري

    لا ماليش دعوة عايزة تعليق بلالا .. يعني صورته تتشال وكمان تعليقك يضيع .. ده ايه الظلم ده

    وميرسي لكلامك وواضح انه ساد على كتير
    وممكن تنضم للجبلايتين بتاعتنا .. تامر يا دياااااب مرزق اهو الجبلاليتين اتملت

    نورتنا يا احلى قلم اسكندراني بجد
    شرفني مرورك

    ردحذف
  32. ستيته حسب الله الحمش

    يا سوتايتة ربنما يكرمك على الامل اللي بينط من وسط الكومنت بتاعك

    يا ستي سيبني احلم.. يعني لا حقيقة ولا حلم

    نورتي يا جمييييييييييل

    ردحذف
  33. بحـــر الدموع

    ياااااااا اهلا وسهلا

    والله ماقصدي اني ادعم الاحتفال بالفلانتين بس هي القفية اللي حكمت

    وميرسي على رايك في كلماتي

    شرفني مرورك

    والله بدعي لكم ليل ونهار

    تحيااااااااااااتي

    ردحذف
  34. Eng. Ahmed Abo El-Ella

    ههههههههههههههههههه ماشي يا هندسة

    ولما نشوف ايه بس مش لما ابقى انا اشوف تبقوا تشوفوا انتم

    نورت يا هندسة البوست

    ردحذف
  35. hasona

    اهلا بك بس اذوب فين ده
    ده خيال ليس الا والله

    نورت البوست
    تحيااااتي

    ردحذف
  36. حياتى نغم

    اهلا يا جميل وعليكم السلام
    والله ولا انا .. بس اهي جت كده وخلاص
    ومبسوطة ان الكلمات عجبتك

    نورتي البوست
    تحياااتي

    ردحذف
  37. الفقيرة إلى الله أم البنات

    اميييييييييين ومش هاقول لا والله.. بس المشكلة في ان مافيش لا هو فيه بس عندهم اشتباه في الرجولة والله بس

    ام موضوع الفلانطين.. عارفة يا ست الكل حكايته كلها.. وكمان عارفة حكاية صينية كمان

    بس هي جت كده.. وبعدين يعني انا لسه مصلحتش المدونة من كرسي ستيتة.. هاتجيبي انتى كمان كرسي

    يا ناااس حرام ديه عليها اقسااااااااط

    نورتي يا احلى ام بنت في الدنيا
    ربنا يبارك لك فيهم يارب

    سلاموووووووز

    ردحذف
  38. انا ودماغي

    اهلا ياا جميل
    انتى كمان.. ياااااااااه ده الموضوع كبير بقى
    يلا ولا يهمك يا ستي

    كلنا لها

    سلام يا قمر

    ردحذف
  39. تامر علي

    ام تامر بتاع الدكان.. لاقيت ليا طلبي ولا لسه نيهههههههااااااي

    والله ولا انا من انصار الاخ طين ده خالص بس هي جت كده عادي يعني

    وميرسي اوي على ثناء على الكلمات

    وكل سنة وانت طيب وبخير وسعادة ولله اقرب

    تحياااااااااااااااااتي

    ردحذف
  40. طوبة ذهب وطوبة فضة

    اهلا يا جميل وشرفتني زيارتك جدا
    وربنا يكرمك يارب وامين ويرزق كل بنات المسلمين برجالة بجد مش من بتوع ذكر في خانة النوع دول

    اهلا بيك واتمنى اشوف كتتتتتتتتتير

    ردحذف
  41. حسام غانم

    اهلا حسام باشا

    والله ماهي فارقة موجود ولا مفقود.. خلاص بقى تأقلمنا

    نورت البوست ومايحرمنيش من طلتك
    على بوستاتي يارب

    نوووووورت

    ردحذف
  42. همس الليل

    ههههههههههههههههههه هموس والنبي تتوكسي بقى.. على فكرة هو ممكن يطلق لو جبتيسيرة الفلانتين

    يلهووووووووي انتى هاتقوليلي

    ربنا يخليكم لبعض.. ولو زعلتيه هفطسك

    نورررررتي يا روح قلب حماتك

    ردحذف
  43. موجة

    والنبي يا اختي عندك حق خالث مالث
    فكرتيني بالذي ماضى .. يااااااااااااااه الله يحرق تيت ديه ايام يا شيخة

    نورتي يا سكر والله
    وعجباني مدونتك وخفة دمك

    سلاااااااموز

    ردحذف
  44. سمكه واحده

    سمكة هانم نورتي يا جميل
    وعملت يا اختي وقولت ولا يعصبك ولا ينرفزك يا قلبيني

    وعااااااادي جدا كملت اليوم

    وخفيفي خفيفي على رايك احسن .. جربت التقيل يا اوختي .. يااااارخراشي على اللي كنت فيه

    ده انا في نعمة ربنا يدمها.. بس مش كتير برضو

    هههههههههههههههههههه

    نورتي يا جميلة
    وعلى فكرةبموت في السمك خافي على نفسك بقى

    سلااااااااااموز

    ردحذف
  45. أميرة الجنة

    يارب يا روح قلبي كلنا في ساعة وحدة مش يوم واحد

    نورتي يا قمر البوست

    ربنا يخليكي

    تحياااااتي

    ردحذف
  46. romansy

    نورت يا باشا البوست
    وميرسي لزيارتك.. والحب موجود ممكن .. يمكن احنا بندور في مكان غلط

    اهلا وسهلا بيك

    تحياااااتي

    ردحذف
  47. المعتصم

    يااااااعمدة منور والله

    اللي كان في نوفمبر ده بتاع مصر اصل احنا شعبب حبيب مش مكفيه عيد واحد عمل واحد لو خصوصي عااااااااااااا

    ام بالنوسبة للالوان فاحنا بعون الله في مصر عيد الحب بتعنا فوشياااااااااا ام العالمي احمريكا

    والطلقتين دول متشنكرة عليهم .. اهو حد عبرني برضو
    بس ياترى هاتبعتهم طخااااااا ولا ايه؟؟

    متوجزة خيفة انا كده

    نورت يا عمدة ومستنية موصيصة او شاكليطا بقى اشمعنا انا

    سلااااااااموز

    ردحذف
  48. الفقيرة إلى الله أم البنات

    صباااحك قشطة بسكر يا جميل

    انا بس كنت بحضر تقرير فتافيت الاخبارية علشان كده اتاخرت في الرد عليكم

    معلش يا جومر

    تسلمي على سؤالك يا روح قلبيني انا

    ردحذف
  49. فكرة من الزمن ده

    ميرسي يا قمر ونورتي البوست والمدونة والله
    مدونتك تحفة بجد

    اتمنى نفضل على تواصل

    سلام يا جميلة

    ردحذف
  50. عاشقه الرومانسي

    والنبي سماااااااح يا جومر والله العتب على النظر

    وبتحصل في احسن المدونات .. مش في حتة فتافيت صغنن

    حقك عليا يا قمر والله مااخدت بالي انك وقعتي مني

    المرة اللي فاتت حسام غانم وقع مني وانهارده انتي .. يارتى مين هاوقع بكره

    يا جماع والنبي محد يبزعل مني انا اصلا بدخل ارد بسرعة .. علشان بكون في الشغل

    علشان كده ساعات حاجات بتوقع مني

    عاشقة الرومانسية يا سكرررررررررر

    ماتزعليش مني

    ردحذف
  51. عاشقه الرومانسي

    يااااا سلام ده انا عايزة تمن الفوزيتا بتاعتي .. مش كان فيه سيد العاطفي
    انا هاعمل فتافيت العاطفية .. اكتب انا وانتم تحبوا .. فتافيت شمعة تحترق من اجل المحبيبن

    ربنا يجمعكم على خير ويتمها لكم بالسعادة يارب
    ومايحرمكم من بعض ابدا

    وماتزعليش تاني يا قمر والله وقتي مني منغير ماخد بالي

    ردحذف

خلل براحتك من غير انتظار .. فتافيت أصلاً بتحب الخيار