12 فبراير 2009

بلالا .. وأعداء النجاح




ياه على الحقد الدفين في قلب الناس.. يا ساتر يارب ما يصدقوا يلاقوا حد ناجح في مكانه.. يقوموا شيلنوه من مكانه.
اللهم لا أعتراض:(

بعد ما بلالا حقق نجاح ساحق.. بعد ما بقى فرد في كل عيلة.. زميل في كل مكتب.. طالب في كل كلية.. بعد ما بقينا كلنا بلالا.


مين فينا ما شافش بلالا..؟؟ مين فينا ماحسش ببلالا..؟؟ مين فينا ما مسكش صورة بلالا في ايده حتى على سبيل الفرجة ولو لمرة واحدة؟؟

بلالا اعداء نجاحه دمهم فار وعلقهم طار لما شافوا بلالا بنجاحه فشر كريمة مختار.. الراجل بقت صورته في كل بيوت مصر.. والكل بيتكلم عن بلالا بين مؤيد لبلالا ومعارض لبلالا.. بلالا بقى حديث الساعة في مصر.

فانات على الفيس بوك تلاقي.. جروبات على الفيس بوك موجود.. اليوتيوب بلالا مكتسح فيه.. بلالا بقى خلاص رجل الألفية الجديدة.. أوعو حد فيكم ما يعرفش مين بلالا والله أزعل.
ده كان يومين بس وصورته تنزل على الجنيه ويتحط تمثال له في رمسيس.. بس تقولوا ايه على اعداء النجاح


حمدي بلالا.. بعد ما رشحنا انه يبقى وزير الصحة لانه اهل للوزارة بجد.. راجل مجتهد فضل عريان على علب السجاير علشان مصر.. ولا اتهز من برد ولا حتى مطرة.. وهو رافع شعار.
.عريان عشان شعبك يا مصر.

وبعد ما الراجل الله يكرمه قال رأيه بمنتهى الديمقراطية.. ومش معنى انه شغال صورة على العلبة ان رأيه يتصادر بقى.. ده راجل محترم وله كلمته .. ده بلالا بقى حلم كل فتاة مدخنة في مصر.. طيب بزمتكم مين فيكم مايعرفش شكله.. قال ايه اول ما اقال رأيه المخالف لرأي اللي مشغله قاموا رفدوه عدل.
ربنا على الظالم والمفتري.

ويااااااعين امك يا بلالا.. هو كده دايما اللي يقول رأيه في البلد ديه يتقطع رزقه.. ليه بلالا تتشال صورته من على علب السجاير؟؟.. اجرم يعني لما حب يطمن الناس عليه؟؟.. اجرم لما حب يطمن كل فتاة معجبة بيه انه لسه عايش وتمام .


وشغاااااااااااااال يونيفيرسال؟؟


ده حتى حرام.. لما راجل كبير طول بعرض كده يترفد من شغله.. وتمسكوا مكانه عيل.. مافيش مانع اننا ندي فرصة للشباب بس برضو يا ناس حرام.. يتقطع عيش الراجل كده من غير سبب
بعد ما اتعرى عشانك يامصر.

وتجيبوا حتة عيل يمسك مكانه.. والله شكلها متكوسة والواد عنده واسطة.. وعلشان بلالا معندوش واسطة يعني؟؟
يقوم ده اللي يشتغل مكانه.. والنبي حرام


وزاتنا الجميلة بتاعة الصحة.. قالت هاتمشي الاول على مبدأ (ياروح ما بعدك روح).. وحطت صورة حمدي بلالا وهو تعبان يا ولداه وفي العنية المركزة وبيشم اكسوجين.. واهو تغير بدل الكولا برضو.

ولكن بلالا حقق نجاح كبير جدا مع المدخنين.. وبقى صديق كل مدخن.. حتى دلوقتي المدخنين عاملين مظاهرات لانهم مش قادرين يشوفوا علبة السجاير من غير صورة بلالا صديق كل مدخن.. ومحدش راضي ابدا ان نهاية بلالا تبقى على ايد عيل من دول احفاد بلالا.

اعداء النجاح عرفوا ان بلالا مرشح قوي لوزارة الصحة.. وانه حقق عدد مؤيدين فاق عدد المؤيدين من فئة (اختارناك).. جن جنونهم وابدتشن ابدتشن بلالا يبقى وزير.. وما طار بلالا وارتفع الا كما طار وقع.
وماكنش يومك يا بلالا يا اخويا. :((

قامت الوزارة بقى غيرت المبدأ ومشيوا على مبدأ (مافيش اغلى من الضنا).. وجابوا عيل صغير خد منصب بلالا.. وده مش تفضيل ولا تشريف.. ده تكليف من اجل شباب مصر.. لازم يعكننوا على ابوهم.. وبعد ما الكل صاحب بلالا.. وبعد ما كان بلالا في جيوب الشباب وشنط البنات.. بقى كل واحد ماشي وشايل عيل صغير في جيبه.

وانا من موقعي هذا ومن منبر فتافيت.. اقولها واضحة صريحة.. لن ينجحوا في مخططهم ولن يفقد بلالا شعبيته.. لان بلالا ده رمز وعلم من اعلام مصر.
وبسقوط بلالا هاتبقى الاهانة والاستهانة
بل هي المهانة .. وايييييييييييييييه


ومن هنا اقول لكل من وقف في طريق بلالا ونجاحه وخلى الوزارة تضيع منه.. العيل ده مش هايجيب نتيجة نييييفر .. وحتى لو غيرتم المبدأ تاني من (مافيش اغلى من الضنا) لمبدأ (اعز من الولد ولد الولد).
وحاطيتم رضيع حفيد لكل مدخن.. برضو بلالا هو المكتسح


مش عايزين مش عايزين .. يا بلالا يا مش شاربين
يا بلالا نام وارتاااح .. واحنا نرجع اللي راااح

ويا بلالا يا بلاش .. واحد غيره ماينفعنااااش

هناك 43 تعليقًا:

  1. بسم الله الرحمن الرحيم
    فيه إيه يا فتفوته
    مالك يا بنتى
    صلى على النبى
    عامله مظاهره ليه
    اعترفى وقرى
    كنتى بتقسمى بلال ولا بينك وبين العيل الصغير عداوة
    ولا ايه الموضوع بالظبط فتفتى بسرعه قبل ما اضرف فى الفتفيت
    عاوزة رأيى
    ولا حاجه هتفرق
    جوزى بيجيب بلال والعيل الصغير وعادى ولا بيبص عليهم ولا بيفرقوا معاه
    ربنا يكرهه فيها يارب

    ردحذف
  2. بما انى لوحدى فى المدونه اخد تعليق تانى
    يا داكتورة يا حبيبتى
    ارمى مفيش فايده من أى محاولات علشان الناس تبطل سجاير إلا
    1- ان يمن الله عليهم ويكرههم فيها
    1 ان يبطلوها بأمر الطبيب يمرضوا ويبطلوا سجاير
    يا بنتى محدش بيبطل سجير بدون أمر طبيب إلا اذا كان هو عاوز يبطل بعد ان من الله عليه وكرهوا فيها
    غير كده انسى اى بلال ولا حفيد بلال ولا اى مظهره من مظاهرات فتفوته الاموره

    ردحذف
  3. أزال المؤلف هذا التعليق.

    ردحذف
  4. ههههههههههه

    اسلوبك جامد جدا يا فتافيت

    كلنا مع بلالا

    ردحذف
  5. السلام عليكم / أولاً جزاك الله خيراً على الصوره عن الحجاب جعلها الله فى ميزان حسناتك ، وبالنسبه لبلالا كما سميتيه فأنا عندما شاهدته قلت ما فيش فايده وفعلاً وجدته مرمى فى كل مكان وكأن الراجل مش تعبان ولا لازم نكرمه ، أما موضوع الطفل جديد عليا ولم أراه ولكنى متفائله خير أنا مجربتش لكن بيقولو الضنا غالى وفعلاً بابا ربنا يبارك فى عمره أنهى التدخين فى عهد أول طفل له وكان أخى الكبير عندما شاهده يمثل أنه يدخن ومن حينها تاب عليه الله ، وربنا يهدى كل عاصى ، وفقك الله لكل خير .

    ردحذف
  6. السؤال ، هوه ما فيش حاجة حلوة في الدنيا؟
    انا مستني أي موضوع فيه أمل .

    ردحذف
  7. اعداء النجاح كتير
    سعيد بمعرفى مدونة حضرتك
    دمتى بكل الود

    ردحذف
  8. بلالا ده عثل اصلا ويا عيني كان رافع قضية علي وزارة الصحة اول ما نزلت صورته م الشتيمة الي خادها
    بقي كل واحد يمسك العلبة يقول الله يحرقك يا اخي ولا ليه لحسن يحرقك ويحطوا صورتك محروق !
    راح رافع قضية عشان محدش قاله ان الصورة دي هتنزل علي علب السجاير
    علي فكرة اسم بلالا عاطفي جدا هو اصلا اسمه
    بيومي
    بوست حلو بالنسبة للبلاوي الي قبل كده :)

    ردحذف
  9. بوست جامد جدا ... بعد ما شفت صور بلالا حمدت ربنا ان المعسل لسه ماحطوش صور عليه

    ردحذف
  10. الفقيرة إلى الله أم البنات

    ده انا دخلت التاريخ .. ام البنات اول تعليق عندي.. يافرحة قلبي وانشكاحي (وش بيضحك من الودن للودن)

    لا بس انا كنت اتعودت على مظر بلالا في كل مكان.. وخلاص بقى صديق كل مدخن وعير مدخن.. في السوبر ماركت موجود في المكتب موجود في البيت مجوده.. ده كان ناقص بس الحمام يبقى بلالا فيه

    وعارفة ان مافيش اي حاجة هاتنفع والله.. بعد ما سمعت واحد بيعزم على واحد بسجاير وبيقوله حلوة.. بتجيب سرطان .. عااتشي جدااااااا .. واتاريها قولت مأثور في فيلم .. وعاجبتو لك يا زمن

    ربنا كبير يهدي الجميع
    نورلاتي البوست يا احلى ام بنات

    ردحذف
  11. حياتى نغم

    عليكم السلام .. الجميلة نغم
    على فكرة مش انا اللي سميته بلالا هو له جروب وفانة على الفيس بوك باسم حمدي بلالا والله اعلم

    وياريت العيل يجيب نتيجة.. بس برضو اعترض على ان بلالا يتشال مع على العلب

    يعني الراجل من شهر 8 وهو مرمي عريان وديه اخرته عيل ياخد شغلته :((

    ام عن صورة الحجاب فده فرض يا حبيبتي المفروض ما يحتجش تذكرة بس احنا في زمن عجب

    جزانا الله واياكم خيرا

    نورتي يا جميلة

    ردحذف
  12. سحساوي

    الله بقى يعني انت مش عجبك حاجة ليه؟؟
    اسمع مني لو اعترض تاني .. هاطخك عيارين وتتأيد ضد مون مجهول

    خاااااااااف على نفسك
    وبعدين داخل مدونة سودا مستني تشوف ايه فيها .. نور ومهند مثلا

    نورت يا سحس والله

    ردحذف
  13. mohamed ghalia

    اهلا وسهلا بك

    سعيدة جدا بتشريف حضرتك مدونتي

    وربنا يحفظنا من اعداء النجاح

    ياريت تكرر الزيارة

    دمت بخير وبامان الله

    ردحذف
  14. Tamer Diab

    بلاوي قبل كده.؟؟
    تصدق هاطخك مع سحساوي بنفس العيارين .. وابقى ضربت عصفورين بعيار واحد هع هع هع هع هع

    انا فعلا سمعت عن انه رفع قضية بس بعد كده حب الحكاية.. وبعدين معرفش موضوع بيومي انا فان له على الفانة بتعته في الفيس بوك .. وعضو في الجروب بتاعه كمان

    والفانة والجروب اسمه فيهم حمدي بلالا وحتى الجرحي بتاع رديو تيت عامل معاه لقاء وقال انه بلالا .. يمكن ده اسم حركي ليه .. الله اعلم

    بس لن انسالك هذا الموقف يا عز الدين

    بلاوي انا فتافيتي بلاوي

    الايام بيننا.. نيههههاااااااي

    نورت يا باشا

    ردحذف
  15. Che

    عمرو باشا .. نورت البوست
    اه مهي حظوظ بقى .. بس اتوقع انهم بعد كده هاينزلوا مع كل شيشة عيل قاعد على اللي ومعاه سرنجة اكسوجين بيشم فيها.. وبيقولك التدخين ضار جدا يا عمو بصحتك
    نيههههههههههههههاااااااااااي

    ردحذف
  16. للاسف انا مدخن واحب اقول لوزاره الصحه والله ماهى فارقه بلال من عيل على الاقل بلال اخد منكم الى هو عايزه
    وفى نهايه البرنامج احب اهدى اغنيه مشربتس سجايرها

    ردحذف
  17. صوت من مصر

    هههههههههههههههههههه حلوة ما شربتش سجايرها جامدة اخر حاجة

    يا سيدي ده كل مدخن بيساهم في رفع مستوى شخص غير مدخن .. لانك بتدفع 500% ضرايب على كل علبة سجاير

    يعني كل مدخن يستاهل وسام شرف لانه بيحرق صدره من اجل رفع مستوى كل مواطن غير مدخن وتوفير له الخدمات والمرافق

    نيهههههههههههههههاااااي

    ده المدخنين ابطال بس محدش واخد باله

    واهديك انا بقى الاغنية الوطنية خلي الحجر والع
    علشان وطنيتك ديه :))))

    ردحذف
  18. قوم يابلالا مصر دايما بتناديك
    قوم يابلالا وعلي صوتك بالغنى

    بلالا بلالا وغيره مينفعناش

    ها؟ ايه رأيك؟ تنفع المظاهره كده ولا ايه؟

    ردحذف
  19. السلام عليكم
    اول شئ بحب اقولك انه موضوعك رائع وطريقتك في بلال كانت روووعة...
    تاني شئ انتي والله عاملة زي ما بقول عن المدخنين وغبائهم "اول شئ حطوله على علبة السجاير التدخين يضر بالصحة مفهمش وراح اشترى ، راحوا حطوا رئة للقلب كمان مفهمش وراح اشترى علبه السجاير ، راحوا عاوزين ينصحوه ويعتبر من اللي قبله راحوا حطوله على علبة السجاير بلال ده اللي عريان علشان مصر "

    بس مين يفهم ومين يتعظ من اللي قبله ، بس والله يا بنتي لا بلال ولا العيال كلهم حيقوموا بالوظيفة على حق ، لانه احنا عاوزين حياتنا كده ..

    نسأل الله ان يحفظنا ويحفظ شباب وبنات المسلمين من كل سوء ومن كل بلال او غيرره من الاحفاد
    جزاكي الله كل خير على كل حرف وكل كلمة وبارك الله فيكي

    لا تنسوا اخوانكم في غزة من دعائكم

    ||..بحــر الدموع..||

    ردحذف
  20. ينهارك مفتفت عسل وسكر

    انا انهرت من كتر الضحك
    انا مسمياه بسطاويسي
    واحده صحبتي جابت لجروب المدخنات كفر يغطي بسطاويسي

    ردوا عليها بلا كفر بلا نيلة احنا خلاص وقعنا في غرام بسطاويسي .. ده بقى كيف زي السجاير والشيشة التفاحة والحشيش.. وبعدين ده وشه فوتو جونيك خالص ياختي جماله بمبة

    لما شالوا بسطاويسي مجموعة النسوة كانوا ها يعملوا مظاهرة في ميدان التحرير ويقولوا كفااااااااااااية .. بس خافوا من الكلمة .. فبيحضروا مظاهرة بعنوان "بلا عيال بلا يحزنون .. يابسطاويسي يا ها نقلبها جنون"

    بسطاويسي حبيب الشعب هع هع هع
    بوست تحفة زي صاحبته

    ردحذف
  21. Eng. Ahmed Abo El-Ella

    تمااااام يا هندسة .. الراجل لازم حقه يجي
    امااال.. يعني يتعرى عشاننا وديه تبقى نهايته


    مش عايزين مش عايزين .. من غير بلالا مش شاربين

    ردحذف
  22. بحـــر الدموع

    اهلا بك نورت البوست والله
    هم مش قادرين يفهموا ان الصور مش حل ابدا.. والله لو ادوا لكل واحد ميت على العلبة برضو هايشتروا

    عمر الصورة ما هتغير حاجة الانسان عايزها بكامل ارادته .. وبيعملها وهو عايز يعملها

    فلا بلالا وعيال بلالا ولا احفاد بالا ولا حتى ام بلالا هاتنفع

    محدش هايبطل تدخين الا لو عايز يبطل تدخين

    نورت البوست والمدونة ودايما مرورك بيسعدني جدا

    اللهم انصر اهلنا في غزة وثبت اقدامهم وجمع شملهم تحت راية الاسلام واصبرهم يارب العالمين

    ردحذف
  23. ستيته حسب الله الحمش

    سوتايته نورت يا عسل والله

    كفر مين والناس نيمين .. بقولك معمول علشان جروب وفانة على الفيس البوك تقوللي كفر يغطي صورته
    وعزة جلالة الله انه فضل اكتر من شهرين الصورة بتاعة الايملات لكل المدخنين اللي اعرفهم

    ده عنده كاريزمة جامده تو ماتش تو ماتش على راي سحس بومب

    فاكرة اول ما نزلت صورته كانت العلب اللي من غير الصورة اغلى جنية واتنين.. دلوقتي الناس عاملة مظاهرات علشانه وده لو دل يدل على انه كان بيعمل اللي عليه كله

    ده فادااااااااائي يا ناس

    يا بلالا نام وارتاااح .. واحنا هرجع اللي راااح

    ردحذف
  24. بسم الله الرحمن الرحيم
    السلام عليكم ورحمة الله وبركاته
    ايه ده ؟؟
    ايه ده ؟؟
    هو انتى مش متابعه اى دوش او قنوات اختياريه خالص؟
    ماسمعتيش عن البيان اللى قاله الدكتور / حقنة وزير الصحة
    قال ان الواد ده اصلا ابن بلالا وان بلالا اتنقل وزارة النقل والمواصلات بعد اما عمل حادثة توك توك وهيحطو الصور بتاعته فى اشارات المرور
    اما الواد فده حاجه كده لمستقبله علشان يدخل كلية الطب لو ماجابش مجموع
    ياريت تبقى تتاكدى من الاخبار بتاعتك قبل ماتثيرى البلبله فى البلد
    وبلاش النظريات بتاعة تامؤامرة واعداء النجاح دى خلاص موضه وقدمت
    هههههههههههههههههه
    تحياتى
    ودمتى بكل ود
    والسلام عليكم وحمة الله وبركاته

    ردحذف
  25. ولله ولا حد هايسأل فيه
    انسي
    اما بخصوص سحساوي لما بيقول كل حاجه سودا
    احب اقوله ان الالوان الاخرى اتلغت من الطبيعه

    ردحذف
  26. وأنا ماليش شكرا يا حسام نورت المدونة ؟

    ردحذف
  27. ايه دة؟!#@
    هو بلالا اتشال من على علب السجاير
    لااااااااااااااااااااااااااااا
    ما هذا الذى اسمع وارى
    بلالا يتشال من على علب السجاير ازاى يعنى.. هو هبل وللا ايه
    انا هاجى معاكم المظاهرة علشان نطالب بعودة الراجل المسكين المهدور حقة دة.

    ردحذف
  28. اية دة هو بلالا اتشال؟@#%
    لااااااااااااااااااااااا
    احنا عايزين بلالا.. دة المدخنين ادمنوا النظر لوجهه الحبوب ونسيوا السجاير

    ردحذف
  29. حسام غانم

    يلهووووووووووي .. وربنا كتب رد على الكومنت بتاعك بس معرفش راح فين

    اني اتجلبت يا سوكينا

    نورت البوست .. والمدونة .. واللي كاتبت البوست .. وصاحبة المدونة

    وهطخ لك عيارين تحية كمان
    طخخخخخخخخخ طخخخخخخخخخ

    نورت يا باشا

    ردحذف
  30. حسام غانم

    نووووووورت البوست اجين يا باشا

    ام عن كلنا بلالا فده اكيد .. احنا لايونكن نسى بلالا .. بلالا ده بطل مكافح اتعرى علشاننا كلنا

    مش عايزين مش عايزين .. يا بلالا يا مش شاربين

    نورت تاني وتالت اهو .. وماتزعلش والله معرف الرد الاولاني راح فين


    وبما انك منور اوي هادفعك فاتورة الكهربا
    ضريبة الشهرة

    تحياااااااااتي

    ردحذف
  31. المعتصم

    لا ده خبرك خبر سيس .. وغكسان
    انا كلامي من جماعة بلالا التخميسية.. والمتحدث الرسمي باسم الجماعة هو اللي قال الخبر ده .. في تسجيل اذاعته قناة الشيشية الاخبارية

    شوف انت بقى بتجيب اخبارك منين .. شكلك عميل

    جااااسووووس بينا .. خيااااااااااااااانة

    يا بلالا كمل سيجارتك .. واحنا هنرجعلك صورتك

    نورت يا عمدة
    تحياتي

    ردحذف
  32. لورنس العرب

    مين وزير النقل والمواصلات بحاله عندنا .. يا هنانا يا سعدنا

    نورت البوست .. ومش هانسى بلالا ده عشرة

    ام بالنسبة للاسود فربنا كبير بقى يرفع عنا عمى الالوان اللي صابنا وبقى كله يا سود .. يا سود

    شرفتني بالزيارة

    تحيااااتي

    ردحذف
  33. MaNoOoSh

    يا سلام يا سلام على النضال

    ربنا يخليكي لنصرة القضية
    واحنا مش هانسيب بلالا ابدا

    يا بلالا يا بلاش واحد غيره ما ينفعناش


    نورت يا جميل البوست

    ردحذف
  34. MaNoOoSh

    الموضوع بقى هشرة واولفة وتعود

    مش هانسلم مش هانبيع .. بلالا لازم يرجع

    يا بلالا كمل سيجارتك واحنا هانرجعلك صورتك

    ردحذف
  35. والله بلالا دة عايز حاجة ساقعة

    عشان تروق دمة

    وبعيدن يعنى خلاص قبل بلال كان المدخن مش عارف اضرار التدخين ما هو عارف اللى فيها


    تعرفى ان كل حاجة بتعمل دلوقتى عندنا

    بتكون بايخة ومش مظبوطة ودمها تقيل

    متعرفيش العيل دة وخد قرشين ولا محطوطة صورتة من غير علمة

    ربنا يكرمك

    تحياتى

    ردحذف
  36. الأول طلعوا إشاعه إن الراجل ده خف خلاص وقعدوا يقولوا "بشرى لكل المدخنين ... خلاص الراجل عدى مرحلة الخطر ممكن تدخنوا وانتم مطمئنين " وبعد شويه عملوا جراب لعلب السجاير في محاولة مغرضه لحجب بلالا عن معجبيه ومحبيه ...لكن على مين ....ودلوقتي جايبين عيل ابن امبارح ياخد مكانه؟؟؟ مفيش عدل في البلد دي .

    ردحذف
  37. خير ان شاء الله يااخوتشي

    اسيبكم يومين ارجع الاقي طالعه في مظاهرات يافتافيت........؟؟
    احنا بناتنا يعملوا كده..........؟؟

    وبعدين الاطفال احباب الله
    ايه يعني لما يمسك الوزاره عيل
    جت يعني علي وزاره الصحه
    ماكل الوزارات كده....؟

    ردحذف
  38. Tamer Nabil

    اهلا وسهلا على فكرة مدونتك بس اللي بالعربي دماغ بجد .. عاجباني اوي تمورة وفوفة والحوارات دية

    ماتاخد الواد اللي على علبة السجاير عندك في المدونة اهو منها يستنشق هواء نقيب ونرجع بلالا حبيب الملاين لمكانه

    نورت البوووست

    ردحذف
  39. تامر علي

    ده حاجة تحرق الدم .. واحنا نعيش من غير بلالا ازاي دلوقتي بقى

    بلالا ده نسمة .. ربنا على الظالم والمفتري .. واكيد الحق هيرجع لبلالا

    نورت البوست ومش عارفة ايه كمية تامر اللي في المدونة دية

    اوعوا تكونوا جماعة جديدة وداخلين تغتالوني علشان بلالا

    تقبل تحيااااااتي

    ردحذف
  40. عاشقه وغلبانه

    بس ده بلالا مش اي اي ولا زي زي

    بلالا لازم يرجع .. حتى لو عملنا اضراب عن شرب السجاير اللي من غير بلالا.. وساعتها البلد ما تلومش اللي نفسها بقى

    يلهوي حد يجيله نفس يحرق صدره من غير ما يكون بلالا معاه
    نههههههههاااااااي

    نورتي يا جومر والله

    ردحذف
  41. هههههههههههههه

    تصدقي اني كنت ناوي فعلا اعمل موضوع عن الحوار ده
    بس منه لله السفاح اللي خلاني قدحت زناد فكري وشكري وفخري عشان اعمل الموضوع ده بدل الموضوع بتاع بلالا

    بس على فكره .. اسلوبك حلو قوي .. واكيد البوست بتاعك ده كان هيبقى احلى من لو انا عملته

    ربنا يسعدك ياشيخه على شوية الضحك اللي الواحد ضحكهم




    سلاموووووووووووز

    ردحذف
  42. Soooo

    اهلا يا معلم نورت البوست وهاطخ لك عيارين على الزيارة دية

    طخخخخخخخخ طخخخخخخخخخخخ

    ام بالنوسبة للسفاح طبعا يشغلك علشان المزز لكن بلالا يا حبية عيني بشنب يعني مالوش لازمة :p
    نيههههههههههههههاااي

    بس اقولك بلالا هو اللي باقيلك المزز بتنروح وتيجي يا ابني

    ام بقى انك تكتب البوست احسن منى تييييييفر ايييييييفرررررررررر

    عااااااااااااااااااا .. ده احنا جامدين اوي

    بجد نورت البوست .. وكنت انت ضحكت هنا فانا موت من الضحك عندك

    بس اهم حاجة تقوللي المظاهرة امته.. ممكن نعمل اتفاقيتة تظاهر مشتركة

    وبلالا والسفاح في يوم واحد

    ونتلم بعون الليه في بوكس واحد كلنا

    سلاموووووووووووووووز

    ردحذف
  43. قصدي بعون الله

    معلش اصل الكي بورد بتاعتي يتسنن

    ردحذف

خلل براحتك من غير انتظار .. فتافيت أصلاً بتحب الخيار