10 فبراير 2009

اعتذار حار .. لعبد العال




طبعا انهارده اول يوم في الربع قرن بتاعي.. واول يوم في السنة الجديدة عليا.. واللي كلنا عرفنا انها بادية بزرقااااااان غريب.. عجيب .. شنيع .. مريع


خدوا بقى عندكم.. قومت الصبح من النوم.. لاقيت الدنيا ضالمة جدا.. انا اتعميت يا جدعان
يامامااااااااااااا انا اتعميت يا ماما.. انا كنت حاسة انها سنة زرقة من اولها.
دخلت ماما جري على صوت صويتي.. وقالت:
الهي يهبلك اكتر مانتي هبلة.. النور مقطوع يا هبلة هانم يارب الناس كلهم يقولوا البكري البكري وانا بكريتي هبلة اللهم لا اعتراض.

فرحت وانشحكت اني لسه بكامل نظري وانها مسئلة عامة وليست خاصة.
ويا حلولي انا لسه بشوف.
قومت احسس السرير ومنه على الحمام وتأقلمت مع الضلمة وفتحت الشبايك.. وبدأت الحيرة..
هو انا لو لبست والشباك مفتوح الناس هاتشوفني؟؟..طيب ولو لبست في الضلمة هاعرف الف الطرحة؟؟
وفضلت على كده حوالي 10 دقايق.
والموقف اتحسم لما لاقيت الدنيا فجأة بقت الوااان.
النور جه هييييييييييييييييييه

لبست ونزلت الشغل.. ولاقيت الجو زعابيب هوا بتراب اجاركم الله.. ايه اليوم ده.. ده بجد فقراير بقى (ومشوها فقراير علشان مزعلش منكم) ضربت نضارة الشمس علشان التراب.. ووقفت اخد تاكسي.. روحت الشغل.

وزميل جايب ليا بن عجب مستورد بقى وحاجة لوز.. وقولت هاضرب فنجان (الاستمورننج) القهوة الصباحي.. عملت القهوة وبعد ما غليت تماموز.. لاني ما بحبش الوش.
قامت الكنكة والله العظيم مقلوبة من غير ما حد يكلمها كلمة.. وادلقت على المكتب والاوراق وكيسة الكمبيوتر.. وكانت ايه هيصة بقى...
اقول لكم حاجة انا مش متفائلة :S


كبرت دماغي وقولت اكيد كل اللي بيحصل ده صدفة غير مقصودة.. وانا اللي مركزة اوي مع الايام.
كبري يا فتافيت يا عثل انتي دماغك.. وما تمسكيش على كل فتفوتة بقى.

فتحت المدونة وكنت لسه هارد على الناس.. وصعب عليا اوي اللي مش زعيم تامر دياب في محاولاته المستميتة في انه يكتب كومنت على فتوفتة امبارح.. وحسيت ان بركات السنة ما وقفتش عليا وامتدت للمدونات المجاورة .
ربنا يسامحني بقى.. بس هو انا ايه ذنبي بس؟؟

وبصيت لاقيت في بوست التدوينة السودا.. ومااقلكوش بقى تدوينة سودا من زرقان السنة اللي هاجم عليا.. احساس رائع محدش يقدر يحسه زي
اللهي ما يكتبه على حدا ابدتشن ابدتشن :(((

لاقيت في كومنت من اسامة عبد العال.. وحاطت لينك مهم عن التدوينة السودا.. قولت يا فرج الله يمكن قلبت بيضا ويبقى فيه امل.
دخلت اللينك والسنة الزرقة بتبان من قبلها بيومين.. وهي زرقة زرقة وكتاب الله مهو تمثيل وبحق وحقيقي.

دخلت لاقيته بيقول اني اتجلبت.. الفكرة اتلطشت مني من شخص مريض ونزلها على منتدى.. وطبعا وصلت تهزيق في المريض اللي لطش منه الفكرة.. حد زكي يقوللي طيب وانت ماالك اصلا؟
وده سؤال احي الاخ اللي سأله
لانه مهم فعلا وحيوي جدا في الفتفوتة
هارد بقى عليه..

وهاقول له.. مهو انا المريض ده.. قصدي المريضة اصل بعتز اوي بأنوثتي
نيهههههههههههههاااااي


انا دخلت في يوم من الايام على مدونة ستيتة لاقتها حاطة بوست بتعلن فيه عن التدوينة السودا .. واخدت الصورة وظبطها انا بشكل احلى.. وعملت بها موضوع على منتدى تابع للمؤسسة العربية للصحة النفسية.. وماحولتش اركز في مين صاحب الفكرة.. او اهدفها تحديدا.
انا اخدت الصورة ظبطها وعملت توبيك ابن حلال على المنتدى وكتبت فيه نفس مضمون كلام ستيتة بس باسلوبي انا.. في عاجة ديه؟؟؟

اللي حصل اني غيرت بشكل غير مقصود والله مضمون الفكرة (والغباء لما بينقح عندي مالوش حل ابدتشن ابدتشن)
ولاني محظوظة طول عمري والحظ بيجري ورايا جري.. وطبعا واخدين بالكم انتم من الحظ من غير ما اتكلم.. ده البوستات بتحكي لوحدها.. وقع التوبيك في ايد اسامة.
ويا دهية دقي بقى.. والتار ولا العار.. التار يا ولدي التار يا حبيصي

قام عامل هو كمان بوست هزق فيه المريض اللي نشل منه الفكرة وبوظها كده.
وانا مظلوم يا بيه .. يا بيه مظلوم :(

دخلت لاسامة.. واعتذرت.. وحكيت التفاصيل وهو ربنا يكرمه.. قلبه فشر بخيره الظاااااااازة.. وسامحني وقال حصل خير.. بس طبعا حقه اني اعتذر له على الملاء وعلى مدونتي شخصيا.
وايه السنة العجب اللي اول يوم فيها بوست اعتذار.. تفتكروا فيه امل في السنة دية؟
ده سؤال يطرح نفسه بشدة وبقوة وبعنف؟؟

::جناب السيد .. اسامة عبد العال::

اسفة جدا وحقك على راسي ويعلم ربنا ماقصدتش لا سرقة الفكرة ولا تحريفها.. بس اللي حصل كان بحسن نية تامة.
ده انا ياما اتعرض عليا سرقة الافكار .. وانا لايونكن ابدتشن نيفر ايفر جااااااااااااميه


سامحني والله ما كانش قصدي والنبي.. ويلا بقى اهي التدوينة السودا كانت سبب في معرفة بيضا ان شاء الله.
اكرر اسفي الشديد العميق .. لجناب سيادتك
وما تخدش في بالك من كلامي اللي فوق .. علشان لو زعلك مش فرحة بقى بوستات اعتذارات
وكل شوية بوست اعتذار لعبد العال..
خلاص يا معلم
صافي يا لبن .. حليب يا قشطة
وسودا يا تدوينة
عااااااااااا
؛)

هناك 38 تعليقًا:

  1. انا مش مطمنه للسنه دي

    في ايه يافتافيت

    بقالك يومين فيها وكل يوم بمصيبه

    وتوقعي نسكافيه
    وقهوه

    وكهربا

    اوعي الكهربا

    حرام عليكي شبابك ياضنايا
    ههههههههههههههههههه


    اسفيا يا اسامه
    امسحها فينا
    هههههههههههههههههههههه

    ردحذف
  2. اسفيا اللي فوق دي يعني اسفه يا

    بس هي جت كده

    ههههههههههههههههههههههههه


    كنت اول تعليق
    لوووووووولي

    ردحذف
  3. فتفوته هانمتش اللي سنتها فله ياروحي

    طبعا انتي عمرك ما شفتيني دخلت في حد شمال

    بس علشان اكمل ليكي البيرثداي المعتبر ها تستحمليني لأني متغاظة وانا لما اتغاظ قطيعة تقطعني بصبح قليلة الأدبيتشي

    هو انتي لما اخدتي الفكرة نزلتي عليها صورة لوسي ملط وقلتي كلام ايمبوليت؟

    من غير ما اشوف انتي عملتي ايه مؤكد قلتي كلام زي الفل وعملتي صورة تحفه؟

    شوفي ياماما : لو واحد منزل لينا الصورة لمجد شخصي لسعادته فده مش محتاج اعتذار منه ده محتاج اعتذار من اللي نفوخها ديرتي" انا" ونزلت البوست

    لأني لما انزل بوست زي ده ميهمنيش مين اللي ابتدى الفكرة "رغم اني كتبت اسمه" لكن يهمني النية

    والنية عند الجميع كانت واضحة ومحدش ها ياخد بونط انه نزل بوست والناس استجابت

    مش قلت ليكي قلة ادبيتشي

    ومش موافقة على اعتذار على شيء جيد وممتاز وسعادتك مسرقتيش رسالة ماجستير تضيع المستقبل ونشرتيها باسمك

    ده كله كان علشان فلسطين وصدق احوال الهوى لما قال فكك ياسوتيتة من الهطل ده وانا مسمعتش كلامه

    بس مش مصدقة ان اي مجهود في اتجاه النصرة حد يلوم عليه ويقول انتي سرقتي فكرتي واااااااااااء اديني تعويض

    كفاية كده لحسن هاأئبح

    ردحذف
  4. عاشقه وغلبانه

    والنبي ما عارفة يا اخوتي شكلي كده محسوووووودة
    يلا خير بقى .. ويارب اسامة مايزعلش

    نورتي يا قطة البوست
    وشرف يا جميلة لما تبقى انتى اول تعليق

    سلاااااااامة يا قمر

    ردحذف
  5. ستيته حسب الله الحمش ...

    ستيتة يا حبيبة قلبي .. اميييييييه يا ستو وافهميني بس

    انا لما اخدت الفكرة من عندك كانت انتي عاملة تنويه في البوست انك زعلانة علشان الفلوس اللي اتاخدت من ايمن طه
    فانا تخيلت ان ده هدف التدوينة بعد الحداد

    وعلى كده اخدت الموضوع من عندك وعملته في المنتدى ونوهت زي مانتى عملتي على ان الفلوس اتصادرت من ايمن
    وطبعا بدل ما تروح للاعمار راحت لعباااااس

    وده اللي قولته.. في وقت ان ا. اسامة ماكنش قاصد كدا

    كان بس قاصد ان التدوينة تكون حداد بدون التطرق لاي نعراعت او حركات معينة في فلسطين

    وتخيل اني بالتوبيك قاصدة انى اقول ان مصر واقفه مع فتح على حساب حماس.. وبغض النظر عن كون ده صح ولا غلط .. هو مش عايز اي اشارة لاي حركة جهادية فيهم

    عايز بس حداد بدون اي انحياز لاي حركة على حساب التانية

    فهو زعل علشان كدا .. انه عايز تدوينة سودا حداد على الارواح اللي ضاعت من غير ما ندخل في اي خلاف فلسطيني

    بس كده يا جميل .. المهم
    انا حسيت اني زعلته.. رغم انه مش مقصود غلطي
    بس المهم.. انا اتعلمت لما اعمل حاجة غلط
    حتى لو من غير قصد .. اقول اني غلطانة

    خلاص يا كبييرة ماتعصبيش نفسك
    صحتك بالدنياااااااااا

    ردحذف
  6. لأ لأ لأ يافتفوته
    الموضوع كده ميطمنش
    ايه حكاية السنه ديه معاكي؟

    بدأت بيوم عجيب والموضوع متواصل

    صدفه؟
    ههههه
    طيب هنمشيها صدفه
    ربنا يستر

    بس دايما طمنينا عليكي بأه لحد مالأيام ديه تعدي على خير ان شاء الله

    ردحذف
  7. ومعانا تليفون نقول الوووو
    سمعنا مع بعض يا جماعة فتاتفيت وهي بتعتزر بشدة لاسامة واحنا من هنا بنقوله:
    يا اسامة متزعلش من فتافيت
    هو طبع فيها من زمان وبنحاول نبطلهولها بس تقول يموت الفتفوتي .. وواكل قوتي
    بس معلش برضه يا اخي انت عندك اكيد اخوات (بلاستيك )ومترضاش تبقي فضيحتهم بجلاجل كده :)
    وبنقول لفتفوتنا
    كفاية لحد كده معدناش استعداد نجيب من الأقسام بتاعة المدونات تاني
    وبعدين احنا غلابة يعني لو وقعتي مع مدون واصل مش هنعرف نرجك منها واصل
    انا بهدي النفوس وربنا يكرمني طبعاً

    ردحذف
  8. انا مش فاهم حاجة و رحمت خالي حسن اللي عمري ما شفته ، على العموم، ربنا يصبر والدتك ، يا اجمل فتوتة في الدنيا ( مش معاكسة ) ماشي عشان ما نتلككش

    ردحذف
  9. Eng. Ahmed Abo El-Ella

    ههههههههههههههه انا برضو بقول كدا

    بص يا هندسة لو اختفيت اكتر من يومين .. لازم تبلغ البوليس

    اكيد تبقى السنة عملت الدنيئة معايا

    تصدق انا خوفت.. سنان بتخبط في بعض وركب بترقص وشعر سبيكي واقف

    وصيتك فتافيت يا هندسة

    ردحذف
  10. فتفوتة اللي نوفوخها بميت راجل
    نو مش مفوتها اي نعم نفسي "اميه" بس اصل انا كبرت في نوفوخي

    لأ والف لأ ها نقول الفلوس اتصادرت وملعون ابو اللي يقول مش عاوز اقف ميقفش طظ احنا بقى نقف ونرفع الراس ونقول عيب لما ابو ريالة عباس يتحول ليه فلوس مش ها توصل لأيد اللي مبعوته ليهم

    انتي مش غلط ومليش دعوة

    الناس في مصر والبلاد العربية مش لاقية تاكل
    لما تبعت فلوس للي اتشردوا وتتصادر علشان تروح لأبو قرون ده شيء منعتذرش عنه

    هو منزل بوست اسود مشكلته احنا شفناه بوجهة نظرنا ولا الصورة يعني كانت معبرة قوي؟ ايه شوية شموع انا حتى اتكسفت احطها تاني يوم وقررت احط صورة الرجالة اللي بجد اللي بيدعوا ادعية نبوية

    معلش نصيبك في ستيتة نفوخها جزمة قديمة ربنا معاكي ويارب ابوكي ميقفلش المدونة على صباعي علشان
    مبحبش السياسة
    مبحبش الحشيش
    اللي مهييس
    يروح بيتهم ميجيش
    واييييييييييييييييه
    وبعدين البوست بتاعك يوم المدونة التيكني كلور كان بميت صورة من عينة اللي حططها

    متحوشنيش اوعي بس .. اتاخري انا

    ردحذف
  11. Tamer Diab

    اللهم لا حسد.. التعلق اتكتب اهو من اول مرة.. وايه شامم نفسك عليا وداخل تهدي النفووووووس

    طيب نقول الوووو
    معنا اتصال من الشرقية مين معايا .. فتافيت

    انا بهدي احلى سلام وتحية جاية لحنقة شبرا.. تامر ازيا.. وبهدية اغنية حنقة ونص ..

    تصدق بالله.. كنت متأنكدة انك هاتتريق عليا
    ومسيري اجيب حقن البلد كلها في مدونتك

    نورت يا مش زعيم تامر
    سلاموووووووز

    ردحذف
  12. سحساوي

    الله هو انت كمان عندك خالك حسن؟؟ شكلنا هانطلع قرايب نيهههههههههاااااااي

    اقولك مش مهم تفهم.. المهم انك جيت ونورت

    وعلى فكرة كل الناس بتقول لماما ربنا يصبرك.. بس انا نفسي افهم يصبرها على ايه؟؟؟؟؟؟

    وعارفة اني احلى واجمل فتفوتة فيك يا دنيا P:
    P: :))))

    وهامشيها مش معاكسة.. لان عندي تلت اخوات يكلوا المدونات بمدونينها عاااااااااااا

    ردحذف
  13. لازم اتريق طبعا
    متريقش ازاي وانتي كاتبه حقنة مرتين وورا بعض
    ( حنقة ) صلي ع النبي بقي انتي قولتيها بنفسك
    شبرا بنتريق اكتر ما بستحمي اصلا :)

    ردحذف
  14. ستيته حسب الله الحمش

    يخربيت اللي زعلك تاني.. يلا ياض انت هو من وشها السعادي
    اقعدي بس واستهدي بالله.. تااااامر حجر معسل القص للمعلمة سوتايتة تهدي بيه نفساويتها

    يا ستي.. خلاص.. هو قال انه زعل وانا قولت ما تزعلش

    وكفى الله المؤمنين شر القتاااااااال

    صح يا جميل يا عسل انت .. والنبي قمر
    هاتي بقى نفس من الحجر اللي قربتي تجيبي اجله ده

    مساااااااااااااااااء الخييييييييييييير

    ردحذف
  15. Tamer Diab

    يا ساتر يا ساااااااااتر

    هو انت قاعدلي على الحرف .. حقنة حقنة .. المعنى في بطن الشاعر وكل لبيب بالاشارة يفهم

    ااتريق اتريق .. ليك يوم وهالم فيه مدونات مصر كلها .. تدخل بص تتريق وتطلع

    خليك فاكرهاااااااااااااا
    نظرات غضب وانياب بارزة .. وبرق في السماء وعيون حمراااااااء .. عووووووووووو

    ردحذف
  16. اللى يلعن ابو شخص مايعهرفوش مايستهلش ان حد يرد عليه لان دي سفاله وانحطاط
    بالنسبه للمحترمه صاحبه المدونه انتى بالغتى فى اعتذارك لدرجه خلت اصحابك افتكروا انى طلبتوا منك وده محصلش
    اللى مكنتش عاجباه الفكره ولا حتى البانر مكنش لازم يشارك فيها ولا هوا شارك وهوا بيلعن ابو اللى عملها

    احترا حقوق الغير الفكريه من الذوق والادب اذا كان موجود

    اسف لان دي اول مداخله عندك لكن لو اسلوب الحوار هنا كده اعتبريها الاخيره

    فى امان الله

    ردحذف
  17. ومين فاضي للمخمطة بتاعتك دي( تلمي المدونين عليا) !
    عامة أنا كنت بهدي النفوس ومش قصدي طبعا اسخن اسامة عليكي
    ولا اقصد اني اخليه يحط اسمك بلاك ليست مدونات ولا كنت اقصد انك واخده علي كده انتي فهمتي غلط خالث.

    أقتباس :(تدخل بص تتريق وتطلع) وبعدين بقي في الكي بورد اللدغة بتاعتك دي
    ليا حق ولا لأ ( ايه يا واد يا تاتو القافية دي)

    ردحذف
  18. يااااا دي الخيبة

    مش قولتلكم هي سنة زرقة .. والسنة الزرقة بتبان من اولها

    صلوا على النبي بقى يا جماعة
    واضح اني جيت احكلها عمتها خاااااااااالص

    يا جماعة اسامة ماطلبش مني اعتذار .. ولا كان يعرف اني انا صاحبة التوبيك اللي في المنتدى ده اصلا

    بس هو كان حقه عليا اعتذر له .. وحقي كمان اني اوضح قصاد الكل اني عملت كده بناء على ايه

    وحقكم علياااااا كلكم

    بس تامر لا علشان بيتريق عليا

    ردحذف
  19. عن اذنك يا فتافيت
    التعليق ده لأسامة عبد العال
    بص يا استاذ
    الموضوع انت أخدته بمحمل سيء اوي كده ليه
    أحنا يا سيدي محترمين رايك ومقلناش حاجة
    ومحدش غلط فيك
    ولغة الحوار اظن ان مفيش فيها حاجة مشينة او خارجة ولو مفيهاش وانت رأيك كده تبقي بتعيب في صاحبة المدونة انها فاتحاها ع البحري بقي لكل حد عايز يغلط
    وعامة الأختلاف في الراي لا يفسد للود قضية
    بالعكس الأختلاف ده ظاهرة صحية جدا بالأخص لو أمور سياسية
    آمن بالحجر ولكن لا تقذفني به
    ولو دكتورة ستيتة قالت ملعون ابو اي شخص يقول اننا ندي فلوسنا لعباس يصادرها في وقت الدول العربية فيه كلها جعانة هي مش تقصد طبعا سيادتك هي تقصد صاحب فكرة ان عباس ياخد فلوس يصادرها ومعتقدش ان دي فكرة حضرتك او انك مكنتش تعرف ان عباس بيعمل ده
    أما لو كنت تعرف فدي تبقي مصيبة
    يعني الكلام مش ليك الكلام للي عايز يدي عباس فلوس التبرعات وهو عارف عباس ده ايه بالظبط وده مش أنت

    ردحذف
  20. أعمل فيكي ايه يا فتافيت بس
    السنة الزرقا جت علي دماغ كل الي دخلوا عندك كده
    زي لعنة الفراعنة!
    :) انا بهرج طبعا لحسن تزعلي ولا حاجة
    السنة الزرقا مجتش علي حد خالص والناس زي الفل اهو وناقص يجيبوا الحكومة تيجي تلمنا من مدونتك :p

    ردحذف
  21. Tamer Diab

    هههههههههههههههههههه من غير ما تقول يا ابني انا عارفة
    مش محتاجة اقوله هي اصلا واضحة والاعمى يشوفها
    طيب انتحر انا ولا اعمل ايه؟؟

    هو فقراير بغبوته

    نيهههههاااااااااااااي

    ردحذف
  22. كتبتى بوست و خليتى الناس علقت عندك و عملتى انشقاق و ناس بتهاجم و ناس بتشجب و عمتى ستيته بتلعن و ناس بترد على ناس .. يا ترى السنه هى اللى وحشه عليكى ولا انتى الوحشه عى السنه
    ماتخديش تعليقى بجد لانى كنت بهزر بالاضافه لحاله الاكتئاب العامه اللى ماشيه فى البلد اليومين دول بدل الانفلوانزا

    ردحذف
  23. Che

    ياااااااااه عمرو.. يعني تغيب تعيب وتيجي على الخناقة

    انا عملت انشقاق ناقص تقوللي اني سببت قتنة طائفية كمان

    والله انا ابتديت اشك ان السنة اللي زرقة.. تفتكر ممكن يكون اللي في بالي صح :((((

    سيبك انت والله لك وحشة
    كنت فين ده كله؟؟
    يارب تكون بخير
    نورت تشي
    بجد والله

    ردحذف
  24. لاء اله الا الله
    يعنى البوست دو كلو والكلام اللى فوق والدنيا الضلمة والقهوة عشان تقولى فى الاخر اعتذار لاسامة ياستى انا اللى غلطانة والى سرقت فكرة البوست منو
    ولا تزعلى

    ردحذف
  25. والله انا كنت داخله اهنيكى على السنه الجديده
    بس لقيت عاركه جامده
    خفت اتعور
    الحق اقولك كل سنه وانتى طيبه واجرى
    اه نسيت اقولك
    تفائلى خير
    على فكره انا مش مقتنعه بالكلمه دى( تفائلى خير)
    لان السنه باينه
    بس حاولى تتفائلى برضه
    انا هاجرى بقى بدل ما اتعور

    ردحذف
  26. يا سلااااام
    اما حكايه ليها العجب صحيح
    ياااه
    يا سلااااام
    اما حاجه غريبه
    يااا سبحان الله
    صحيح حكاية كلها عبر ومواعظ
    ههههههههه
    ايه يا بنتي الصدفه دي
    علي فكره انا سالت السؤال ده وانا بقرا البوست
    يعني معني كده اني زكي صح صح صح
    معلش بقي جت سليمه والراجل طلع متفهم
    سلام
    لا مش سلام استني
    طيب ماشي سيبي المدونه سودا زي ما هي لكن سودا وتكتبي بالاصفر كمان
    لا حرام
    ماهو عشان كده بتحصلك بلاوي
    اللي ييجي علي زيكا مابيكسبش هع هع هععععع
    سلام بقي

    ردحذف
  27. ياسلام انا أروح راس سدر وارجع الاقى البت فتفوته الجميله الهاديه الناديه اللى لا تعرف ترغى ولا بتعمل دوشه
    بتحتفل بالسنه الزرقا
    انا بموت فى اللون الازرق
    وكمان ستوته حبيبتى جايه تحتفل معاها وبتضرب كرسى فى الكلوب وماسك ساطور
    ستيته..ليه العنف يا جميله...انبوبة اختبار فيها ..صودا كاويه وشوية ملح وحبة شطه
    وارميها على ارضية اى مدونه تجيبها ارض
    وخليك فى تخصصك
    بحبك وانت عصبى ومتشدد...تليفون لبتوع أمن الدوله

    فتفوته
    نتكلم جد
    انت صح..وانا معاك اذا حد زعل منا وفهمنا غلط نعتذر له...علشان قدام ربنا عملنا إللى علينا
    أوعى تقولى لستوته انى قلت لك كده
    اصلى شخصية ضعيفه وبخاف من بتوع العلوم والمختبرات والاختبارات والاستخبارات واى حاجه فيها خبر

    الحقيقه انا عرفت مامتك قالت الكلام اللى قالته فوق ليه
    بس الغريبه اول مرة اشوف دكتورة عثل عثل يا ناس
    ممكن بليس عثير مليش فى الدخان علشان عندى ربو

    ستيته لمى السواطير وهاتى مقشه ولمى القزاز اللى اتكسر من الكلوب اللى جه فيه الكرسى


    فتفوته
    عاوزة 35 صاغ تمن ما قرأت البوست بتاع غزة من على الموبايل وانا فى راس سدر
    خلتينى افكر الم العيال وابوهم ونتجه شمال سينا بدل من الجنوب ونفيش الهوامش

    فتفوته
    مسج سريع لام فتفوته
    هذه البنوته حافظى عليها علشان هتبقى حكاية جامده قوى ان شاء الله

    ردحذف
  28. تعليق جديد بس مافيهوش جديد....السنة جميلة وأيامك أجمل
    بكرة تبقي ذكري لذيذة وحلوة
    ونفتكرها ودموع عينينا تنزل شوية والضحك صوتة هالي شوية ....
    بس المهم هتبقي ذكري ...
    ذكري سعيدة هتكون هيا
    والخوف من الأيام اللي جاية مش هيدوم لأنها مستخبية
    والعلم عند الله
    ولا حول وقوة إلا بالله

    ردحذف
  29. يلا يابا انت وهو كله واحد يروح علي مدونته مش عايزين لمة هنا... اعملوا معروف هتقطعوا عيش المعلمة صاحبة المدونة
    يلا ياض يا حنبكشة لم الكراسي دي ورش نشاره خشب وهاتلي شاي فريسكا ورص ع الشييييييشة
    وشوف المعلمة تشرب ايه
    يلا يا ستيتة ع المعمل بتاعك وبطلي قلق بقي عشان الحكومة مفتحة اليومين دول
    وانت يا عم تشي متهدي يا عم النفوس ولا انت بقالك سنة مبتجيش هنا ويوم متيجي تعملنا مشكلة انت وأقاريبك
    حاجة مشمشية ... يا حااااجة
    البت فتفوتة دي لو عملت مشاكل تاني علي عليها ايجار المدونة يا اما تمشيها من الموقع كله يا حاجة
    يا باشمهندز احمد ...يا باشمهندز
    يلا يا عم اتكل علي الله... صدفة ايه بس انت هتعملي فيها عايدة الايوبي
    العالم بتولع في بعضها هنا شوفلك حل انت المتعلم الي في القهوة
    ست عاشقة خدي سحساوي في ايدك وفهميه فيه ايه عشان مكنش فاهم والعركة شغاله وكل حي يروح لحالة يا جدعان هتخربوا بيتونا

    ردحذف
  30. انت تسال والكمبيوتر يجيب

    يادي النور والهنا.. وانت طيب يا استاذ كمبيوتر
    دخلت المدونة ومش فاهمة حاجة معلش بس نفسي حد يفهمني

    بس دخلت الموقع ولاقيت حبيبة قلبي بثاينة كامل.. فشكل الموضوع كبير

    حد يفهمني بقى.. اعمل ايه علشان ابقى معاااااااكم؟؟؟؟؟؟

    ردحذف
  31. البت المشمشية حلوة بس شقية

    طيب ما تقولي كده من الصبح

    امسك حراااااااااااااامي

    شوفت يا اسامة اني كنت مظلومة والمشمشية هي السبب

    عليهاااااا يا ولاد بقى

    البنت المشميشية wanted
    نيهههههههااااااي

    نورتي يا عثثثثثل وبموت في المشمش انااا
    خافي بقى على نفسك

    لا تتاكلي في مدونتي
    عااااااااا

    ردحذف
  32. عاشقه الرومانسيه

    اجري يا بنتي من هنا
    المدونة خطر اليومين دول .. اسمعي مني بس
    خدي ديلك في سنانك وقولي يا فكيك ده لمصلحتك

    وانت بخير وسعادة وهنا
    نورتي البوست والنبي
    والنور اصفر مع السنة الزرق
    بقت خضرة اهو على ايديكي
    نورتي يا جمييل

    سلااااموز

    ردحذف
  33. Zika

    شوفت الدنيا .. عبر يا ابني بس اللي يتعلم بقى
    المهم انك تكون اتعلمت من الدرس

    انك لما تسرق حاجة .. نفيررررررر تعترف ابدتشن

    وكمان بتقوللي استاهل اللي بيحصل
    حاضر هاكتبلك بعد كده البوستات بالصفر الفاااااااااااقع .. نيههههههههههههاي شريرة انا

    يلا يا ابني من هنا للبركة تحل عليك
    انا خايفة عليك
    وانت لسه صخنن بلدو .. نورت يا كبير
    سلااااااااااموز

    ردحذف
  34. الفقيرة إلى الله أم البنات

    شوفي ازاي.. يعني انا هاعمل بوست بروعات علشان الخساير اللي حصلت .. وانت جاية تقوللي 35 صاااغ

    طيب بصي خدي نكلة دلوقتي.. والباقي بعد ما اعيد اعمار المدونة

    قشطة كدا.. وستيتة هادفعها تمن الازاز اللي اتكسر

    وتامر هو اللي هايلم الازار علشان ازازاة تدخل في ايده وتعوره وانا اتريق عليه .. مهو لازم اتريق عليه بقى

    نورتي البوست والدنيا يا ست الكل
    وتعليقك بيفرحني جداااااااا

    ربنا ما يحرمني منك ابدا
    بس مافيش حتى شوية ماية ملحة من راس سدر
    طيب قوقعة حتى .. يلاااااا المرة الجاية بقى
    عايز ام الخلول .. ماشي

    سلاااااااموز

    ردحذف
  35. مهندس / على درويش

    يعني شوف مش هاقدر ارد على اللي قولت غير ياااااااارب
    بس اقولك حاجة مش متافئلة
    ديه سنة كلها حوادث من اول دقيقة

    نورت البوست .. وربنا يكرمك

    ومدونتك عجباني جدا
    خاصة خاطرة الواد اللي بيعيط

    جااااااااامدة

    نورت حقيقي
    سلاااااام

    ردحذف
  36. Tamer Diab

    عارف انا بفكر اروح ابلغ عنك وارتاح نيهههههاااااااي

    ليك نفس تطلب شاي وترص كمان حجر

    قوم معايا نلم الازاز اللي ادغدغ من الخناقة ده
    ونعيد اعمار المدونة تاني

    وكمان بتطفش الزباين
    اعمل فيك ايه قوللي اعمل فيك ايه؟؟؟؟؟؟

    تامر يا دياااااااب

    انت سكر والله .. ربنا يفرح قلبك

    حته فصحى بقى
    اضحك الله سنك اخي الكريم

    ربنا يخليك لفتافيت ربع قرن .. اللي اتفتت انهارده

    ربنا يخلي بور فاملي ويخليه لامه

    ردحذف
  37. فتافيت السلام عليكم / الموضوع صعب عليه شويه بس أقدر أقولك إنك تصرفتى بحكمه ومر الموضوع بسلام وربنا يحفظك من أى شىء سىء وأحب أهنيكى على أسلوبك وموهبتك الكوميديه وفى نفس الوقت مفيده وجميله إلى حد ما جديد .

    ردحذف
  38. حياتى نغم

    عليكم السلام يا جميل.. اتفضلي الشاي على النار

    ياروحي عدى بسلام ايه بس.. انتي اصلك جيتي بعد ما انا وتامر نضفنا المدونة ده كان ازاز مكسر وناس ماسكة في بعض.. وكنت خايفة نتلم كلنا في بوكس بجريمة اثارة الشعب في المدونات

    وميرسي ياجميل على كلامك عن اسلوبي اخجلتم تواضعنا والله

    ربنا يعزك ويكرمك
    سلام يا احلى نغم

    ردحذف

خلل براحتك من غير انتظار .. فتافيت أصلاً بتحب الخيار