09 فبراير 2009

واتاري اليوم بمبي.. مش ازرق


امبارح كان يوم غريب.. زهق + ملل + قرف.. واضربوا في الخلاط.. طلعوا امبارح .. كل ما حد يقوللي مالك؟؟ اصرخ في وشه يعني ايه مالي؟؟ بشد في شعري؟؟ ولا باكل صوبعي؟؟ ولا بمشي على راسي؟؟.. يعني ايه مالي.؟؟.. وانا فعلا مش فاهمة مالي.. واليوم الارزق بيان من اوله.


في الشغل مش طايقة اشوف حد ولا اسمع حد.. وكل اللي نصيبه رماه تحت ايدي امبارح كفرت كل سيئاته.. وبجد مشفقة جدا على المراهقين اللي جاوبت عليهم امبارح.. تهزيق تلاقي وتوبيخ تلاقي احباط تلاقي.. والنبي صعبانين عليا.. بس اهو نصيبهم بقى.

عندي في المكتب كياس كابتشينو.. بنكهات كتير.. لوز بندق فانليا.. من كل نوع كيس.. شغلت البويلر وغليت الماية.. وفتحت اول كيس ادلق كله على الارض.. يلا فدايا مش مهم.. جبت التاني وفتحته براحه علشان ما يشوفش ذل اخوه وهو بيتكنس مع التراب وبدل ما يتحط باحترام في مج مالي مركزه.. يتحط في الجاروف ويترمي في باسكت الزبالة.. جبت المقص.. واخدت الكيس براحة وانا بسمي عليه وناقص اديله مخدر.. وحطيته على المكتب.. واستأذنت سيادته في اني اشعلقه براحه.. حرصا على محتواياته الكريمة من الانزلاق على المكتب ومنها على الارض.. ثم الحدف في الباسكت.. وبحرص شديد قصيت طرفه من فوق.. وجبت المج براحة وهدوء.. وفضيت فيه الكيس وانا بدعي ربنا انه ويوفقني في المهمة بدون خساير.. والحمد لله تم التفريغ بنجاح.

جبت البويلر وبراحة حطيت الماية اللي بتغلي في المج.. ولا اتهزيت من صراخ فتافيت الكابتشينو من سخونة الماية.. وبمنتهى القسوة جبت المعلقة وهاتك يا ضرب في الماية.. علشان انهي المهمة بسرعة.. وبعد ما خلصت التقليب.. بشيل المعلقة بحنكة شديدة مهو انا استاذة تقليب.. ومع خروج اخر مليمتر من طرف المعلقة قام الموبايل رانن.
اتخضيت وبدل ما اشيل المعلقة قلبت المج. :((
وادلق بعد ما كنت اهبت نفسي اني خلاص هاشرب الكابتشينو.

بصيت للمج وهو مرمي على الارض بينزف الكابتشينو منه.. وانا عينيا كلها حزن واسى.. على مصير الكيس التاني.. وانه بدل ما يتكنس بالمقشة زي اللي قبله.. اتمسح بالمساحة.. وتعدد الاسباب والنهاية واحدة.. رمي الكابتشينو.

وفجأة بارقة امل ولعت قصادي لما عيني وقعت على الكيس التالت اللي باقي.. واخدته وهو عمال يتوسل ليا بلاش والنبي.. بلاش انهارده.. بلاش هو انتي ماعنكيش اخوات كياس صغنين.. وانا ببص له وعاملة نفسي مش سامعة.. وبصاتي كلها سادية ولا انسانية.
وعقلي الباطن بيقوللي لازم تشرب.

وقررت اني اسكت الكيس للابد وجبت المقص وقصيت لسانه قصدي طرفه.. وفتحت الكيس بسرعة قبل ما جمعيات حقوق الكياس تسمع بالخبر.. وفضيت الكيس بسرعة البرق في مج تاني وفي ثانية واحدة كنت صابة الماية عليه.. ومقلباه .. واخيرا المج فيه كابتشبنو .
الله اكبر .. والنصر لنا.




واخدت المج على بقي عدل وانا بضحك ضحكات شريرة لاني خلصت على عيلة الكابتشينو نهائيا من المكتب.. ومع اول شفطة
.. يع يع يع يع يع يع ..
ده كابتشينو ولا مرقة دجاج..يمكن مرقة دجاج وعاملة نفسها كابتشينو؟؟
ايه طعمه ده يا ساتر اظاهر الكيس عمل عملية انتحارية وفجر نفسه في المج.. وجبت جثة الكيس اللي فارق الحياة.. وقولت اقرا المكونات لايكون مرقة دجاج بجد..
ولاقيته اكسبيرد من اسبوعين..
ده حظ ايه الهباب والله مانا شاربة حاجة.. وقومت دلقته في حوض الحمام.. مهو يوم ازرق اصلا.

وطلعت من المكتب وانا كلي ملل وزهق واحباط.. حتى الكابتشينو واقف قصاد انهارده.. طلعت اخد تاكسي .. علشان اروح.. وكل ما اوقف تاكسي ما يرضاش يقف.. الله ديه مؤمرة بقى.. 18 تاكسي رافعين يفطة لا لركوب فتافيتو ذابحت كياس الكابتشينو.. وفضلت ساعة الا ربع.. لحد ما تاكسي صعبت عليه.. وحس بيا وواقف اني اركب بس بضعف الاجرة.. مهو احتمال يترطد من نقابة ساقي التاكسي بعدها.. لانه نقض معاهدة لا لركوب فتافيت.. وطلع مستغل واخد ضعف الاجرة.. يلا مش مهو المهم اروح بقى واخلص.. من اليوم الازرق ده.

روحت البيت ودخلت المطبخ جعانة.. ماما واقفة في المطبخ.. وسألتها عملتي اكل ايه؟؟ قالت محشي كرنب.. ويا حلولي يا حلولي هاكل محشي بالعند في الكابتشينو.. صحيح ربنا بيعوض الصابرين خير.. وانا صبرت كتير انهارده.

وبدأت رحلت البحث عن المحشي.. يلهووووووي مافيش ولا حتى صابع تايه في اي حلة.. طيب في طبق.. مافيش ....
:((((
قولت يمكن عندنا نقص في الحلل والطباق.. اكيد ماما شايلة المحشي في الكوبيات عادي بقى.. الجيش بيقولك اتصرف.. مسكت كوبيات البيت كوبية كوبية.. محدش شاف صابع محشي كرنب تايه يا ولاد الكوبيات والمجات؟؟.. ولا كوبية حتى شمت رحته في المطبخ انهارده..

طلعت زي المجنونة لماما فييييييييييييييين المحشي يا ماما؟؟.. قالت في التلاجة ياروحي..
تلاجة!!!!! S:
تلاجة يعععع بارد.. مش مهم والله لو في الفريزر هاكله يعني هاكله..
دخلت لاقيت حلة مالية مركزها وواخدة نص رف لوحدها..
عينيا لمعت ورقي جري .. ورفعت غطى الحلة.. وانا في قمة اشتياقي للمحشي والله له وحشة وقلبي بيرقص من الفرحة.. وفجأة!!!!! O:
قلبي انقبض وعينيا دمعت وريقي نشف.. المحشي ني ومش مستوي.. انن ااااااااان تششششششششششش


يا مامااااااااا .. فين المحشي المستوي ..
مستوي ايه ياابت هو انا قولت اني سويت محشي انا قولت عملت محشي..
لا والنبي على اساس فيه فرق بين عملتي وسوتي؟؟..
ماما وصرخات احتجاج وعلامات الغضب بتنط من وشها...
هو انا بمية ايد احشي واسوي في يوم واحد.. ولا ماكنش الفليبينية اللي جايلكو هدية في اكتوبر.. اتنيلي كلي ساندوتش جبنة وخيارة..
يعني مافيش محشي انهاردة..؟؟ ودموع الحسرة في عيوني والالم يمزق قلبيني

لا مافيش خليكي من جيل المستقبل وخلي عندك امل في بكره.. بكره المحشي والنهاردة جبنة..
يلا اهو اي حاجة وخلاص..

واستسلمت للامر الواقع واخدت الاكل وقعدت وفتحت التليفويون على روتانا موسيقى علشان اتفرج على برايم برنامج المانجير.. ولاقيت ابراهيم بتع مصر خسر بفارق 0.2.. يالهوووووي على الفقر يعني فاتحة على النتيجة الهباب دية؟؟ ايه الفقر ده.. مش بقولكوا يوم ازرق من اوله.اووووووووووف..

قومت اخدت المدعو ساندوتش الجبنة وانيست وحدته الخيارة و فتحت الكمبيوتر.. ولسه بدخل باص ورد المدونة.. شميت ريحة شياط.
يلهوووووووي المدونة ولعت.. يا ماما الحقي المدونة ولعت وريحة الشياط جايبة من اول لوحة التحكم بتاعتها..
ماما ونظرة استهزاء شريرة ..
اقولك ريحة الشياط جاية منين وما تزعليش؟؟..

بصيت لماما وعينيا بدق شرار.. وانيابي طلعت فشر دراكولا.. وحاجب نازل البادروم وحاجب متشعلق فوق السطوح.. وريحة الشياط بتزيد اكتر واكتر.. وماما مش عارفة تبلع ريقها ونظرات الاستهزاء اتقلبت خوف.. وفجأة لاقتها بترفع ايديها وبتزلها بسرعة عند قفايا..
(قولت بس هاتلب قفا عجب دلوقتي)..
وقامة شادة فيشة الكمبيوتر بسرعة.!!!
واتاري اللي ولع الكمبيوتر..
وماما بتصرخ فيا ..
الفيشة ولعت يا موكوسة وانتي ولا حاسة قومي افصلي الكهربا بسرعة..

قومت جري افصل الكهربا.. لاقيت الموبيل بيرن وفيه رسالة.. طنشت الموبايل طبعا يعني الرسالة ولا الشقة اللي هتولع وهانموت منفجريين فيها.

وروحت اشيل الفيشة وانا بطلع على كرسي الانتريه وبشد كهربة البيت.. ونازلة من على الكرسي قومت..
مقلوبة على ضهري.. ووقع مني ساندوتش الجبنة والخيارة طارت تحت الكرسي..
ده ايه الفقر ده .. ده يوم غريب بجد.. كل حاجة واقفة قصادي..
ده ايه اليوم الازرق ده!!!!!!!


كابتشينو يدلق ويتبعتر ويطلع اكسبيرد .. ومافيش تاكسي ولما ربنا يكرمني يبقى بعد ساعة وكمان بضعف الاجرة.. مافيش اكل وقال المحشي بكره وحتى الجبنة والخيارة راحوا في الوباااااااا مع هنادي..ابراهيم خسر في البرنامج.. الكمبيوتر ولع كمااااان.. لا انهارده اكيد يوم مشؤم بجد.. ازرق ازرق يعني مش تهريج.

وانا عمالة اتذكر احداث اليوم المؤسفة.. لاقيت صوت عالي وخير اللهم اجعله خير.. حاجة بتنور وتطفي في ظل الظلام الدامس اللي خيم على بيتنا.. واتاري الموبايل بيرن برسالة تانية..

حاولت اتفقد اثار الضوء المنبعث من الموبايل علشان اوصله.. والحمد لله وصلت من غير خساير جديدة.. فتحت الموبايل ولاقيت الرسالة دية..
(كان يوم اسود يوم ماجيت ماما وبابا ولعوا في البيت.. كل سنة وانتي طيبة وعقبال ربع قرن جديد.)





وقال ايه عيد ميلادي انهارده.. ورديت على الرسالة وقولت.. وانتي الصادقة
( كان يوم ازرق يوم ما جيت الكمبيوتر ولع في البيت. )

رسمي نظمي فهمي تميت ربع قرن خلاص وبالاوراق الرسمية.. وبقى عندي 25 سنة تنحط سنة.. على فكرة انا مواليد شهر ديسمبر بس هم ثبتوني في فبراير.

وامنت انه فقراير مش فبراير .. اكيد العيب في فبراير مش في عيد ميلادي.. صح ولا حد عنده رأي تاني.
يلا قولولي كل سنة .. وانتي طيبة .. وعيد ميلاد سعيد.
واتري اليوم كان بمبي بمبي وانا اللي كان عندي عمى الوان وظلمته وفكراه ازرق
نيهههههههااااااااي.
:)))))

هناك 35 تعليقًا:

  1. ههههههههههههههههههههههه

    والله أنا برده سبحان الله يعني تقريبا المهازل الفقرية المشتركة في التاريخ مع اختلاف الأحداث

    مش عارف هي لعنة ونازلة علينا ولا ايه


    بس طبعا العيب مش في حضرتك ولا في يوم ميلادك.. مقصدش كدة والله

    كل عام وأنت إلي الله أقرب

    وعقبال قرن إن شاء الله



    علي فكرة انا أول تعليق.. بس مرضيتش بقي اروح أحجز وأقرا.. عارف أنه محجوز لي :)


    تحياتي

    ردحذف
  2. تماااااام الحمد لله محدش خد مكاني عقبال ما روحت أعلق وأرجع.. كنت هعمل مشكلة كبيرة.. مهي أعراف المدونين بقي ولازم تحترم

    تحياتي مرة تانية

    ردحذف
  3. هيييييييييييييييييييييه
    كل سنه وانتي طيبه يافتافيت ياجميله


    اليوم فعلا امبارح كان فوتوجينيك خالص
    انا كان قلبي مقبوض من غير سبب واضح وبخانق دبان وشي
    هههههههههههههههههههههههه


    العيب فيا انا ماتقلقيش

    ردحذف
  4. القلم السكندري

    ايه ده يعني انت كمان عندك مغامرات في عيد ميلادك؟؟
    ولا اقولك .. اصلا الفقر مش محتاج والله عيد ميلاد.. هو مرطرط لووووحده :)))))))

    مبسوووووووووووطة جدا انك اول تعليق.. ده شرف يا فندم والله :)

    وكل سنة وانت بخير وسعادة .. ويارب جميعا اقرب لربنا ولطاعته

    نورت البوست الازرق ده والله.. يوه قصدي البمبي ده
    ميرسي جدااااااا

    الف تحية لقلم ابن اسكندرية

    ردحذف
  5. عاشقه وغلبانه

    يا خبر يا خبر .. بركات اليوم وصلت لحد عندك
    ده يوم سره باااااااااااتع

    ماكنتش متخيله انه كده.. قولت يا دوب خساير اقليمية .. اتريها تشعبت

    يلا حقك عليا يا جميلة.. ربنا يستر ده كله في ربع قرن.. امل لما يبقى نص ولا قرن كامل هايحصل ايه؟؟

    تفتكري ممكن تبقى الخساير دولية نيههههههههههااااااااي

    تسلمي على الزيارة ياسكر
    والعيب مش فيكي
    انا متأنكدة
    عاااااااا

    ردحذف
  6. عاشقه وغلبانه

    يووووووه نسيت اقولك
    وانتي طيبة وبخير وسعادة

    ردحذف
  7. ههههههههههههه
    والله انا كمان كنت مضايق امبارح من غير سبب خالص برده

    المهم ممكن تعملى زيى انا لما المولضيع تسود فى وشى
    بروح انام على طول واسيب الدنيا تنقلب براحتها
    واقوم فايق ممكن اعمل اى حاجه

    المهم كل سنه وانتى طيبه وعقبال ميت قرن
    وانا كمان مواليد ديسمبر
    بس انتى باه بتحتفلى بيه مرتين
    حظوظ

    ردحذف
  8. كل سنه وانت طيبه ومفتفته يافتافيت

    بس ايه اليوم العجيب ده؟
    تفتكري ده عشان عيد ميلادك؟ أمال يوم جوازك مثلا ايه اللي هيحصل؟

    لا لا لا
    احنا لازم نشدد الحصار عليكي عشان الخطر مينتشرش

    بس موضوع الضحكه الشريره ده كان جامد موت
    ضحكه شريره وصدى صوت ونور بولع ويطفي (هو ده المشهد اللي تخيلته)
    ههههههههههههههه

    كل سنه وانت طيبه

    ردحذف
  9. لا خير خير

    المهم الصحة

    كل سنو وانتي طيبة

    ردحذف
  10. كل عام وأنتي إلى الله أقرب
    وكل عام وانتي بصحة وعافية

    "وعسى أن تكرهوا شيئاً وهو خير لكم"


    لا تنسوا اخوانكم في غزة من دعائكم

    ||..بحــر الدموع..||

    ردحذف
  11. هابي بيرثداي تو يو
    هابي بيرثداي تو يو
    هابي بيرثداي تو فوتيتة
    هابي بيرثداي تو يو
    سنه حلوة يا داميل
    مليانه حب وفرح وشخاليل
    سنة حلوة يا فتفوتة سنه حلوة يا جميل

    يالا حالا بالا بالا حيوا أم الفصاد
    هايكون عيد ميلادها الليلة أجمل الأعياد
    وبرغم أنف الكابتشينو والتكسيات

    ردحذف
  12. كل عاك وانتى بخير

    مع تصريحى الى هيكون غريب ده

    الى حصلك كان مصلحه اه مصلحه بجد

    عرفه ليه عشان تفتكرى يوم عيد ميلادك كويس

    اى يوم بيحصل فيه حدث مهم الانسان بيفضل يتذكرو طول

    عمرو تحياتى لكى وكل عام وانتى بخير

    ردحذف
  13. كل عام وانتم بخير

    وعقبال 25 سنة اخرى مضروبين في 3 او 4 في طاعة الله

    دمتم بخير

    ردحذف
  14. يا شيخة حرام عليكي جوعتينا و عطشتينا كل ده عشان نقولك كل سنة و انت طيبة ، طب يا ستي كل سنة وانت طيبة .
    على فكرة الحزن في القلب مش في المدونة ، ممكن تغيري اللون الأسود ده عشان و الله عنيها باظت ، بمناسبة عيد ميلادك خليه لون فوحلوئي كركدنزي أي لون غير الاسود انت بتعقبينا و لا ايه ، و يا ريت تعملي استفتاء عليه لاحسن تقولي اني مضطهد الاسود سلاموززززززز

    ردحذف
  15. والله وبدون اي مبالغة عقبال مكتبت التعليق كان هيجيلي سعال ديكي
    النت فصل بعد ما كتبته وبعدها جه رحت دااااايس علي كتابة التعليق
    راح قايلي ارر في الصفحة وطار التعليق
    رحت عامل باك وكاتب تاني تعليق
    ودخدته كوبي بقي عشان مش كل مره اعيده
    ودوست علي ايه
    شاطرة كتابة تعليق
    قعد تلت سنين يحمل وفي الآآآخر
    وأنا واخد التعليق كوبي طبعا الحمد لله
    الجهاز رستر لوحده
    أنتي بركتنا يا حاجة والله
    بس ابقي احرمينا من بوستاتك شوية مش طالبة حرق هاردات

    ردحذف
  16. ومعلش والله نسيت اقول

    (سل كنة) وانتي طيب

    25 سنة
    هايل والله
    وبتقدسي الحياة الزوجية كمان
    ممتاز
    وعندك شقة
    ده ايه الهنا ده
    لا وفي شبكة يبقي كتير اوي اوي يعني
    عموما هنفكر بس لو كان عندك عربية كانت تبقي الامور مظبوطة لكن كده كافة الميزان مش اوي p:

    ردحذف
  17. الأخت الفاضلة
    شرفتينى بالزيارةوآسف لتأخيرى نظرا لظروف خارجة عن إرادتى فتقبلى عذرى
    وكل سنة وأنت طيبة وعقبال 100سنة وتكونى بأحسن صحة وأحسن حالا
    تحياتى

    ردحذف
  18. احنا لازم نقتنع اقتناع جذرى ان سعاد حسنى كانت شايفه العالم من منظور اخر لما قالت الحياه بقى لونها بمبى وانا جنبك وانت جنبى .. بس هيا الست سعاد الله يرحمها بقه كانت محقه الى حد ما ...
    ليه بقه ؟؟
    ده سؤال مهم جدا
    يعنى واحده جنبها حسين فهمى بذاته .. بطوله بعرضه
    بشعره الاصفرانى بعيونه الدوبلى دول
    وتشوف الدنيا لون تانى الا بمبى

    نهايته طولت عليكى انا عارفه .. بس بصى
    اصحى بصى لليوم على انه بمبى . حتى لو انتى شايفاه
    اسود على اساس ان اليوم الاسود بيبان من الصبح

    بس تجاهلى انتى كده وخليه بمبى .. ديه نصيحه مجربه

    اختك فى الاحباط : مريم

    ردحذف
  19. دمك بجد خفيف قوي قوي قوي مش مجاملة ولا تريقة ولا هزار يعني هو كان يوم أزرق بس انتي مبسوطة النهارده مش كده ربنا يبسطك علطول وكل سنة وانتي طيبة..شهيتيني للكابتشينوا تقريبا حسدتك راح ادلق وكمان المحشي اديتك عين طلع مش مستوي ايه ده كله
    عقبال ما تكملي القرن كامل يا أخف دم فتافيت في عالم التدوين ده كله
    ربنا يكرمك ويوفقك
    مودتي وخالص تحياتي

    ردحذف
  20. د/عرفه

    ايوة ايوة الايام الزرقة اخرتها نوووووووم
    بس معقول يعني بركات اليوم وصلت لحد عندك.. يلهوووووووي سر اليوم باتع

    وانت طيب وبخير وسعادة.. وشهر ديسمبر وخاص برج القوس فيها كلهم دمااااااااااااااغ

    نورت البوست يا دكترة

    ردحذف
  21. Eng. Ahmed Abo El-Ella

    هههههههههههههه تشدد الحصار.. يلهووووووي اوعى كمان تجيب قوات حفظ امن عندي هنا في المدونة

    الضحكات الشريرة اللي هي هوهوهاهاهائهائهائ.. عارفة ديه هههههههههههه

    نورت يا هندسة واردهالك يوم ميلادك
    بس امانة عليك ابعد عن الازرق

    سلااااااااموز

    ردحذف
  22. حسام غانم

    ده خير بالزوفة حضرتك

    وانت بخير وسعادة وامان
    ميرسي على الكومنت
    ونورت البوست
    ويارب تكرر الزيارة دايما

    سلاااااااام

    ردحذف
  23. بحـــر الدموع

    اخي الفاضل الغزاوي الاصيل
    كل سنة وانت بخير وسعادة
    واكن غزة في قلوبنا وليل ونهار بندعي لها ولاهلها
    ربنا معاكم وينصركم ويخفف عليكم ويحميكم

    سلاااااااااام

    ردحذف
  24. ستيته حسب الله الحمش

    سوتايتة حبيبتي
    نورتي يا قمر .. وميرسي على الدي جي اللي جبتيه معاكي :))))))


    كل سنة وانت بخير وفي طاعة الرحمن
    وانا هاقاطع كل الكابتشينو بعد اللي حصل

    نورتي البوست والمدونة والدنيا كلها

    ردحذف
  25. ادم المصرى

    نورت البوست .. والظاهر كده اني هافتكر كل يوم في السنة دية
    والظاهر ان المصالح نازلة ترف على دماغي

    كل سنة وانت طيب وبخير

    ميرسي يا ادم
    نورت المدونة
    سلام

    ردحذف
  26. أحمد سعيد بسيوني

    ربنا يعزك يارب
    ومدونتك رائعة جدا جدا جدا وخاصة اخر بوست فيها

    ربنا يبارك لك
    ودينا ويديك طولة العمر يارب في طاعته

    متشكرة جدا

    سلام

    ردحذف
  27. سحساوي

    سحس اهلا يا معلم نورت والله
    وانت طيب بس مش قصدي اعذبك.. انا بس كنت بشاركم يومي
    بالنوسبة للاسود اللي مش عاجب حضرتك
    مش دليل الحزن والله.. انا الحمد لله مش حزينة .. ده انا لسه تامة ربع قرن.. فيه انشكاح اكتر من كده

    بس انا لو غير اللون والله ماهعرف اتعامل معاه.. واي بروفيل ليا في اي موقع تلاقيه غامق جد.. لاني بحب الباك جاروند غامة والكتابة فاتحة

    وهنا كل الالوان الغامة مش لايقة مع البانر بتاعي .. طيب اعمل ايه بس

    غير قدسية الاسود عندي.. بمووووووووووووت فيه جدا جدا جدا

    انا كبرت الخط علشان ارفع شوية من المعانه ماتزعلش بقى.. خليك كووووووووووووووووووول

    سلام يا معلم

    ردحذف
  28. Tamer Diab

    يعني لازم تسيح كده يا مش زعيم تامر
    ربنا يسامحك كسرت قلبيني وخاطريني ونزلت الدمعة من جوات عينيني

    وايه يعني لما تتعب علشان ترد على بوستي.. هو بزمتك عندك اعز مني تتعب له نيهههههههااااااااي

    ماتزعلش بقى.. وباركة ان الهارد لسه سليم
    وان البركة ما وصلتش له

    وكل سنة وانت طيب
    بس مواصفات مين اللي كاتبها ديه؟؟ بعد الشر يعني؟؟

    ده احنا بنام 12 على سرير واحد هع هع هع هع.. جبت الشقة دية منين؟؟


    وشبكة وعربية.. احمدك يااااااااااااارب

    اقولك لو لاقيت انت واحدة زي ديه احجزلي اخوها

    سلاااااااام يا مش زعيم
    ياجامد اوي

    عااااا

    ردحذف
  29. انا زعلان معبرتنيش و لا بكلمة و حتى حتة جاتوه أو شوريك القرافة و و انت طيب ماشي مش هاكتب تعليق تاني و انت هتندمي ، و هتقعدي تتحيلي علي عشان مدونتك مش لاقيه حد يعلق عليها و انا بقلي الحنين اكتب تاني
    سلاموز

    ردحذف
  30. اللؤلؤة

    وانتي طيبة وبخير وسعادة
    وشرفتيني بزيارتك يا جميل

    نورتي البوست
    سلاااااام

    ردحذف
  31. crazyrama


    بلا سعاد حسني بلا حسين فهمي
    سيبك انتي ده انتي طلعتي دمااااااااااااغ
    والبوست اللي قريته عندك عثثثثثثثثثثل .. وكل سنة وانتى بخير يا قمر

    وبعد الشر عننا من الاحباط الكوخ

    سلااااااام يا جميل

    ردحذف
  32. كاتب مصري

    يلهوي يلهوي.. انا قولت انا محسودة واخير عرفت العين جاية منين

    ماتبوسليش بعين راضية.. والله ماما تعبت فيا

    ربنا يخليك ويكرمك وكل سنة وانت طيب وبخير وسعادة.. ويبعد عنك بركات الحاج فقراير ده .. قول امين

    بجد ميرسي موت على كلامك.. رفعت معنوياتي اللي كانت احبطت
    وطبعا مبسووووطة مش كلت المحشي.. وكان ايه على شوقة نيهههههااااااااي

    نورت البوست والله
    مايحرمنيش من كومنتاتك
    سلاااااااااام

    ردحذف
  33. سحساوي

    يا مرك يا فتافيت.. زعلت سحس

    زعلان ليه بس.. حقك عليا ما تزعلشي .. مالك زعلت ليه

    جاتوه ايه اللي انت جي تقول عليه

    هو انا عارفة اشرب قهوة حتى علشان اجيب جاتوه

    وبعدين انت ماجبتش هدية كان بديهي انى ما جبش جاتوه

    هع هع هع هع هع هع
    سحسااااااااوي يا جامد ما تزعلش

    طيب اطخلك عاشقة وغلبانة وانت تتبسط..
    ههههههههههههههه

    سلام يا معلم

    ردحذف
  34. فتافيت / السلام عليكم فتفوته جميله ولذيذه مع انك ما دقتيش منها حاجه ، وعموما كل عام وأنتى إلى الله أقرب وعلى طاعته أدوم ومن الجنة أقرب وعن النار أبعد :) ولكن إيه التوتر اللى كنتى فيه ده .
    وعلى فكره أنا قريت ردك ليا المره السابقه وأقولك عندك ألف حق وانسى إنك تسافرى ويارب يوعدك بالراجل اللى يملا عينك ودماغك وقلبك وجيبك :)

    ردحذف
  35. حياتى نغم

    وعليكم السلام ورحمة الله وبركاته
    اهلا يا جميل نورتي.. واللهم امين ولك بالمثل ان شاء الله
    وبزمتك كل معمل حاجة تبوظ وتقوللي ايه التوتر ده.. الحاجة هي اللي كانت موتوترة اوي مش انا والنبي

    نورتي الوبست.. ويارب يرزق كل بنات المسلمين برجالة بحق وحقيق ويبعد عننا اشباه الرجال ومن يعانوا من الاشتباه في الرجولة

    سلام يا سكرة

    ردحذف

خلل براحتك من غير انتظار .. فتافيت أصلاً بتحب الخيار