07 فبراير 2009

فتوفتة استثنائية.. عن غزة الأبية


كنت على مدونة سوتايتة .. امبارح ولاقتها عاملة اعلان ان انهارده.. يوم التودينة السوداء.. واصلا انا مدونتي لوحدها سوده ومضلمة.. من غير لا يوم تدوينة سوداء ولا حاجة.. هي سودة كدا خلقة ربنا.
وطبعا كان لازم اشارك في يوم التدوينة السوداء وبغض النظر عن ان اصلا السواد واخد حده في مدونتي وحياتي وعيشتي .. كمسلمة عربية مصرية.. ولا حول ولا قوة الا بالله .
يعني هايجي منين اصلا لون تاني غير الاسود .



وانا كنت كدا كدا هاكتب بوست احكي فيه اللي حصل في غزة لما اول فريق لنا دخل القطاع.. وشاف هناك اللي القنوات الاخبارية استحت (حياء العذراء يوم دخلتها) انها تعرضه.. وكأن اللي بس مسموح انه يتعرض هو كام شهيد وكما جثة وكام بيت اتهد.. ودمار يا غزة دمار.. وخلونا نحس ان غزة خلاص كدا بتحتضر.. لكن الحقيقي ان غزة تمرض ولا تموت وبالعند في كل اليهود.

المقاومة عدد افرادها يزيد عن 10000 فرد.. وده طبعا قبل المحرقة لان بعد المحرقة بقت غزة كلها مقاومة.. وده اول نصر لغزة.. قبل الحرب كانت المقاومة 10000 فرد بعدها بقت مليون ونص فرد.
اللي دخل الحرب ونزلوا فعلا ارض القتال.. 300 فرد من المجاهدين.. استشهد منهم 54.. وخلي خيالكم كدا يسبح ويغطس ويشتغل معلش يعني واقروا الكلمتين دول..

(.. القوات التي لا تقهر (قال لا تقهر قال عاااااااا) اللي دخلت الحرب في غزة.. مات منها 210 خنزير.. ومالناش دعوة باحصائيات لا الحظيرة ولا العبرية.. هتقولوا 210 عرفتي منين.. لا فتحت المندل ولا ضربت الودع ولا قريت فنجان.. ده اللي نشرته هآرتس اهم الصحف العبرية الاسرائيلية على الاطلاق.. وقالت ازاي يا بت يا ليفني تقوللي اللي ماتوا 10 بس.. وفيه يا موكوسة 210 اسرة منكوبة بموت خنزير منها في المحرقة في ارض القتال ورافعين قضايا على الحكومة.)

خيالكم اشتغل.. لما يدخل بس 300 مجاهد ارض القتال ويستشهد منهم بس 54.. ويموت من الخنازير 210 خنزير غير اللي اتنيلوا على عين اللي جابوهم واتجرحوا.. لا وايه قوات لا تقهر.. امل لو كان نزل ارض القتال العشر الاف مجاهد.. كان ايه اللي حصل.. احنا بعون الله وبــ 300 مجاهد بس.. خرجنا الخنازير من غزة.. وهم عندهم 210 خنزير مفقود.. وقال ايه يقولك غزة انهزمت.. لا يا حدق اللي انهزم ده عقلك ودماغك .. وشيل شوية الصدى اللي على مخ واستعمله.. حرام عليك بقى ربنا مادكش المخ علشان يتحط كدا عيرة ويصدي منك.

اوعوا اسمع حد يقوللي 1300 شهيد مدني.. لان خلال 23 يوم بتوع المحرقة صحيح استشهد 1300 مواطن.. بس اتولد بعون الله 4000 مواطن.. يعني ربنا بياخد من هنا ويعوض من هنا.. امال انتم فاكريين ايه.. ده الست الغزاوية بتجاهد برضو.. وبتخلف مجاهدين صغيرين.. وقصاد كل شهيد الست الغزاوية ولدت 4 مجاهدين جداد.. امنت بك يارب.

وبعدين الستات اللي هناك.. مش ستات زينا كدا.. هنا الست من دول ابنها يدخل الجيش (وجيش مش جهادية يعني) تحزن وتولول وتقول يا عين امك يا ابني داخل الجيش يا صغير.. هناك بقى.. مافيش كدا.. هناك الست بتجاهد بولادها.. اوعدنا يارب.

هناك خنساء فلسطين (الست ام نضال).. عايشة في غزة.. الست دية اسطورة بجد.. طلعت جوزها و3 شباب زي الورد من ولادها للجهاد.. وايه مش في المحرقة.. لا ديه يجي ابنها و تلبسه الحزم الناسف بايديها.. وتزفه للشهادة.. ولما سألنها بيجيلك قلب.. قالت وادعوا لهم ما استطعتم من قوة.. والقوة اللي اعدتها للجهاد هم ولادي.. ولسه عندها ولدين وناوية تزفهم برضو للشهادة.. شوفتوا الستات يا رجالة.. شوفتوا الست اللي بالف راجل.. مش بعيد عنكم كدا انصاف رجال ورجاله عندها يادوب اشتباه في رجولة.

اخدكم بقى جولة في حي الزيتونة.. هناك فيه عيلة كانت موجودة اسمها عيلة السموني.. العيلة دية ابيدت بدم بارد (أي والله بارد تلج يا ناس) الخنازير لموا كل العيلة ديه وهم اكتر من 50 فرد في اوضة في بيت اسرة منهم.. وضربوا عليهم النار تلت ساعة من كل الاتجاهات وبكل انواع القذائف.. وليه وعلشان ايه وبتاع ايه واشمعنا السموني بذات؟؟.. ماحدش عارف.

الاوضة بقت بركة دم.. واللي استشهد استشهد وارتاح واللي اتجرح فضل ينزف 4 ايام بلياليهم لحد ما لحق اللي قبله على الجنة.. طفلين وشاب استخبوا في دولاب في الاوضة (وربك كريم ولسه لهم عمر يعيشوا) نجيوا من الموت الالزامي ده.. بس دول طفلين عمرهم سنتين و3 سنين عاشوا ازاي 4 ايام من غير لا اكل ولا شرب وسط بركة الدم.

اللي حصل بقى ايه..الشاب اللي كان معاهم وعمره 16 سنة.. خلاهم في الدولاب علشان ما يشفوش بركة الدم دية.. وربك كريم كان فيه كياس مكرونة في الاوضة (مكرونة ناية ناشفة من اللي بنشتريها ونسلوقها ونحط عليها صلصة علشان تنفع تتاكل) وكان من الضرب المواسير بتاعة المية انفجرت وبقت بتنقط.. الشاب يطلع ايده يلم شوية مكرونة ناشة ويفضل معلق ايده تحت نقط المية.. لحد ما المكرونة تطرى شوية ويأكل العيال.. واااااااااااه يا وجع قلبي.. واحنا هنا بنتنك على المكرونة بصلصة بيضا ولا حمرا (والنبى حمرا بجد)

نطلع بقى على الشمال.. هناك كان قبل القذف بيوم فيه لمة وقاعدة في بيت اسرة هناك.. الاسرة دية عبارة عن 9 ولاد وبنوتة عندها سنة و3شهور.. اسمها شهد وهي شهد مكرر والله.. وكانت العيلة هناك متجمعة.. ويوم القذف نزلت قنبلة على البيت.. وشوف الجباروت بقى.. البيت يولع والناس تولع والبيت من بره ولا تلاقي فيه خدش.. تكنولوجيا القتل بقى.. قتل للقتل وبس (شوفتوا الانسانية بضربوا قنابل تموت الناس وتسيب البيوت هيكل)

المهم العيلة ولعت واتحرقت ومات لدرجة ان الاب من شدة الانفجار (اللي ما سبش اثر على جدران البيت) مخه طلع من الجمجمة ولزق في الحيطة.. ونجي منها شاب عمره ما يوصلش 18 سنة.. قام جايب عربية نص نقل ولم عليها الجثث وحط امه اللي محروقة وبين الحياة والموت.. وخدهم وطلع على الطريق.. قاموا ضاربين عليه نار.. والعربية ولعت.. خد امه ونزل جاب عربية كارو.. وحط الجثث وامه فوقيهم وطلع تاني على الطريق.. قاموا موقفينه ويا تبسهم هنا يا تموت معاهم.. ياناس طيب اخد امي المحروقة.. ودول لا بيحسوا ولا بيسمعوا ولا حياة لمن تنادي.

المهم ان الخنازير دول بيخافوا من الضلمة.. الدنيا ضلمة شوية قاموا بيتك بيتك على الدبابات.. قام الشاب ده خد امه في غفلة من الخنازير.. وشالها على ضهره اكتر من 7 ك مشي على رجله.. علشان يوصل للمستشفى.. وبعد وقف اطلاق النار قدر يدخل يجيب الجثث.. ولاقى شهد البنوتة الجميلة.. الكلاب وكلة نصها التحتاني.. وفاضل نصها الفوقاني وعضم النص اللي تحت.. ولاني بخاف عليكم.. مارضتش انزل صورها في البيت وهي بترقص وبتلعب وصورها وهي متاكل نصها.. واشوف كل الكلاب الضالة بتنهش فيكم يا ولاد (التييييييييييييييت) .. ياللي واقفين بتتفرجوا ولسه محلك سر.

امه بقى اسمها صباح.. عندها حروق من نوع غريب.. الحروق ما بتلمش وبتزيد كل يوم.. تركيا ربنا يكرمها قالت هاتخدها تعالجها في اكبر مستشفيات تركيا للحروق.. قوم ايه بقى صباح تتمنع من الخروج من غزة والعبور من أي معبر.. ليه وعلشان ايه وبتاع ايه وفي شرع مين ده؟؟.. ولا حد يعرف.. ويمهل ولا يهمل.

اه نسيت اقولكم حاجة القنبلة اللي وقعت على البيت دية.. لسه ليومنا هذا وانا بكتب البوست ده.. قابلة للاشتعال.. ومع اقل احتكاك جنبها بتولع تاني.. واشوفكم مولعين يا ولاد (التييييييييييت) ياللي هاين عليكم اللي بيحصل هناك ده.. وواقفين ساكتين.. اللهي اشوفكم ساكتين ساكتة الموت وارتاح منكم بقى.

معلش عارفة ان البوست طول.. بس لازم احكي كل حاجة.. تعالوا بقى نتكلم عن الشخصية الفلسطينية واللي يزور ويشوف بعينه .. غير اللي يسمع طبعا.. ناس قمة في الذوق والادب والايمان والتماسك والكرم ( تخيلوا ايوة كرم) ناس عايشة في خيم.. ولما تدخل عندهم يفضل بوقك يلعب من شرب واكل وتمر وشاي وقهوة.. طول مانت قاعد.. ولما الجلسة تخلص.. يقوم راجل واخدك على افخر مطعم في غزة (اه لسه فيها مطاعم وفاخرة كمان مش بقولكم تمرض ولا تموت افهم بقى واحفظ).. ويعزمك على الغدى او العشى.. ولما يخلص الاكل يقولك سامحني على التقصير.. وياترى ايه التقصير؟؟.. قال ايه انه عزمك بره بيته في المطعم الفاخر ده!!..

فتفوتة (معلومة) صغيرة... انبوبة الغاز هناك تمنها 120 شيكل .. تخيل تمن بقى وجبة غدى تكفي 8 اشخاص في مطعم فاخر تكلف الشخص كام لما الغاز بس تكلفته 120 شيكل.. ويقولك تقصير... وشي منكم في الارض يا اهل غزة ياللي علمتونا العزة والكرامة.

اخر حاجة وفتفوتة مقارنة صغيرة كدا بس.. على معبر رفح في مصر اتسرقت نضارة واحدة من فريقنا بمجرد خلعها لها وحطها جنبها علشان تمسح عنيها.. في غزة بقى سيب شانطة ملاينة فلوس ودهب والماظ وياقوت ومرجان.. اقولك (سيب مغارة علي بابا كلها في مكان).. انشالله شهر وتعالى هتلاقيها مكانها بحطة ايديك. اي والله وبحق وحقيق ومهو تمثيل

على معبر مصر رسوم الخروج من المعبر لغزة للفرد 91 جنيه (على اساس انك رايح كوكي بارك).. روسوم الدخول من غزة لمصر 41 جنيه (على اساس انك داخل الجنة يا خي).

على معبر مصر تلف حوالين نفسك علشان تعرف تدخل وتمضي ورقك.. على معبر فلسطين قاعد ملك زمانك والكل بيخدمك ويمضي لك ورقك وانت قاعد بتشرب قهوة (اللي كل ما تخلص تتجدد تاني توماتيكو توماتيكو) وفي الاخر علم فلسطين وكوفية فلسطين ودبوس على شكل علم فلسطين هدية لك علشان داخل او خارج من فلسطين.

والف مبروك عليكم الشهادة يا شهداء غزة.. ومبروك عليكم الكرامة والنصر يا اهل غزة.. ومبروك عليكم جنود ربنا اللي كانت معاكم في ارض المعركة.. ومن على لسان مجاهد قابله فريقنا هناك.. انه لما ضرب قنبلة.. في دبابة يهودية وكانت المفرض تفرتكه معاهم.. اتنطر بعيد عن مكان الانفجار والحجر اللي اتنطر معاه .. سامعه بوادنه بيسبح وبيقول يارب سلم.
سلم يارب .. يارب سلم.. وارحمنا من انصاف الرجال اللي عايشة معانا ومعيشانا في شرنقة الذل والاهانة والمهانة.
يارب رجع لنا صلاح الدين .. واحنا معاه مجاهدين.. يارب ده احنا ليه مشتاقين.
يارب اميييييييين.

هناك 51 تعليقًا:

  1. تسلم ايدك علي احلي بوست غزاوي في الدنيا بجد
    انا مبسوط جدا انك فاهمة اوي القضية كده ومخك مش ابن ستين تييييييييييت زي ناس

    ردحذف
  2. مينفعش مكنش انا اول تعليق علي بوست زي ده ولأول مره في اي مدونةاكن انا اول تعليق :)

    ردحذف
  3. تامر باشاااااااا

    نورت البوست والله .. وميرسي على كلامك بجد اسعدني (حلوة اسعدني يسعد سعد).. ربنا يكرمك
    ويرحمنا من ولاد الستين تيييييييييت اللي جايبنا ورا دول

    نورت يا زعيم المدونة ومش البوست .. وهاطخلك عيارين كمان
    طخخخخخخخخخ طخخخخخخخخ .. تحية لتامر باشا

    سلاااااااام

    ردحذف
  4. بدون مجاملات ...هذا البوست من أنجح ما قرأت عن القضية وينقل القارىء بصدق في رحلة إلى أرض العزة... تمانياتي بأن يجعل الله ذلك العمل في ميزان الحسنات ... ويصلحنا لنكون مستعدين للجهاد مثلهم
    شكراً على هذا العمل الرائع

    ردحذف
  5. ازيك يا فتافيت .. الحمد لله رب العالمين على شهامة وغزه وشجاعة اهل غزه .. فى معبر رفح .. يدفع 41 جنيه عشان هو رايح حته وحشه .. مش قادر اتبحبح واقول هو رايح فين .. لكن اللى خارج من مصر يا بخته يا سعده ويا هناه يدفع ما يدفعش ليه .. هو فيه حد عايز يدخل عندنا لكن اللى عندنا كتييييير عايزين يخرجوا وياريت يخرجوا من البلد دى
    تحياتى

    ردحذف
  6. أجمل بوست أقرأه فعلا عن هذا اليوم
    بس بذمتك مش كنتي كبرتي الخط وحطتيه على ثلاث اجزاء مثلا مراعاة للي زي نظره على قده

    بس ربنا قدرني اقرأه كله ورقبتي اللي كانت قد السمسمة طولت قوي علشان الناس دي مسلمين

    ان شاء الله وعن قريب نكون زيهم لأننا في ارض الرباط برضه شائت الحكومة ام ابت

    اللهم اصلح حالنا وولي من يصلح

    ردحذف
  7. بوست جمييييييييل اوي
    تسلم ايديك
    وفعلا ارض الواقع غير اللي بيتنشر خااااالص

    ردحذف
  8. الله عليكم ربنا يبارك فيكم ويابختكم انكم شفتم مجاهدين ومسلمين بحق فى زمننا هذا ، تفتكرو ربنا نصرهم ليه ماهو بسبب ايمانهم العظيم ، وتفتكرو الخنازير حطاهم فى دماغها ليه لأنهم البقيه المباركه من الدم المحمدى يارب نكون شىء منهم وينصرهم ويكون فى عونهم ، فتافيت العزيزه أدعوكى للدخول على مدونة كلنا مقاومه تجديها من مدوناتى المفضله لتقرأى ماذا يقول المسلمين عن فلسطين فى آخر تدوينه لهم وتردى عليهم بمشاهدتكم الحيه ولعل المدونه تعلن عن مدونتك لأن بها مقاومه لأجل فلسطين الحره الحيه ، جزاكى الله خيرا كثيرا .

    ردحذف
  9. العزيزه فتافيت صاحبة المدونه السوداء رجاء منى ان يكبر الخط قليلا عن طريق حجم الخط فى التخطيط وتكون الكتابه ملونه حتى تكون القراءه أسهل أنا نفسى المدونين كلهم يقرولك يا جميل ، يارب ماكنش بتقل عليكى تحياتى .

    ردحذف
  10. علي فكرة
    أنا رأيي تغيري أسم مدونتك بعد البوست ده وخليه
    بهاريز ربع قرن :)

    ردحذف
  11. بسم الله الرحمن الرحيم
    السلام عليكم ورحمة الله وبركاته
    أختى فتافيت هانم
    أحلى تحية واحلى تقدير على البوست الرائع ده
    بجد بجد بوست هايل تسلم ايديكى
    وفعلا اهل غزة دول اهل النصر والعزة وربنا مش هيخذلهم ابدا زى ولاد ال تيييييييييييييت اللى كلتا عارفينهم
    انا على قد ماانا فخور بيهم وانا بقرأ كلامك ووصفك ليهم
    على قد ماقلبى بتقطع على الاطفال والستات والشيوخ اللى بيموتو بالطريقه البشعه دى
    حسبنا الله ونعم الوكيل حسبنا الله ونعم الوكيل
    بس على فكرة المفروض ان الخنازير دى تحمد ربنا لان ال300مجاهد اللى قاتلوهم دول شكلهم كده مكنش معاهم سلاح آلى وحديث والا كانو قطعو خبر 3000على الاقل منهم
    الا هو انتى روحتى ولا هما اللى قالولك ؟؟
    اه ومش كل حاجه تدورى ضرب النار عمال على بطال كده وكل واحد تطخيله عيارين
    الطلقات غليت اليومين دول ومش لاقيين ذخيرة امسكى ايدك شوية محدش ضامن الظروف
    تحياتى
    ودمتى بكل خير وود
    والسلام عليكم ورحمة الله وبركاته

    ردحذف
  12. تحليل جميل جدا لقضيه الفلسطينيه

    واهنيكى على توسع ذاكرتك لمثل هذه المحاور التى ذكرتيها فى بوستك اهنيكى

    مع اجمل تحياتى

    ردحذف
  13. مرحب بيكى فتافيت
    انا بايد ان المدونه تتغير لبهاريز زى تامر مبيقول
    ربنا يبارك فيكى وفى كلامك

    الانتصار اللى اتحقق مش شرط كام واحد مات وكام واحد عاش

    لا ده انتصار مبدأ وانتصار روح وانتصار مقاومه
    وربنا يخلصنا من ولاد التيت

    ردحذف
  14. السلام عليكم
    أحييكى على المجهود الرائع
    وطبعا هما المنتصرين في الدنيا وفي الاخرة كفاية ان ربنا هو القائل"ان كنتم تظالمون فانهم يألمون كما تألمون وترجون من الله ما لا يرجون"
    ربنا ينصرهم ويثبت أقدامهم
    وبمناسبة بقى السواد وباعترافك بنفسك ياريت تغيري لون المدونةطبعا لو سمحتى يعنى
    تحياتى ليكى

    ردحذف
  15. تامر علي

    ربنا يكرم حضرتك بجد .. رفعت معنوياتي
    ميرسي على المرور والكومنت اللي شرف البوست وصاحبة البوست

    ردحذف
  16. fashkool

    اهلا بصاحب اجمد مدونة دخلتها .. المفشكة زي كل حاجة في حياتنا
    والله عندي استعداد ادفع عمري واهلي يرضوا اني اسافر مع اي مجموعة لنا
    واللي قاهر نفسيوتي اني كان المفروض اسافر الاسبوع دع .. بس بابا فشكل ليا كل حاجة

    يلا خير .. نورت البوست مستر فشكول

    ردحذف
  17. ستيته حسب الله الحمش

    ده انت تأمر يا جميل انت يا جميل

    انا كبرت الخط اهو .. وبقى زي البغل .. اكتر من كده بصراحة هاقرف ابص في شكل المدونة
    اصل انا مابحبش الخط الكبير .. بحب اي حاجة نونة صغنن .. بس طبعا احلام سيادتك اوامر وشلوط سيادتك دفعة للامام

    والحمد لله اني كبرت السمسمة وبقت نقول فولة دلوقتي .. اصل الوضع بصراحة مايسمحش باكتر من الفولة

    نورت يا زعيم البوست
    بمووووت فيكي والله

    ردحذف
  18. عاشقه وغلبانه

    نورت يا قمر .. والناجح يرفع ايه عاااااااااا
    الف مبروك النجاح والاهلي .. ويارب من فرحة لفرحة
    وتسلمي يا قمراية على الكومنت

    وهاضرب عيارين تحية للنجاح

    طخخخخخخخخ طخخخخخخخخ

    مبروووووووووووك

    ردحذف
  19. حياتى نغم

    الله يكرم اصلك يا اصيلة على كلامك الاصيل ده .. شوفتي كمية الاصالة والله تستهليها

    للاسف انا شوفت تسجيلات واتكلمت تليفونيا مع الناس .. مع ان اسمي كان مكتوب في المجموعة اللي سفرت .. وكل مجموعة بتسافر اسمي بيتكب فيها على امل اني اعرف اسافر
    السفر مشكلته في اهلي اللي رافضين تماما السفر لغزة.. بيقولوا اني لو روحت هتجوز واحد حماساوي ومش هايشوفوا وشي تاني
    وبيتكلم بجد ورافضين تماما السفر
    بس والله انا فخورة باسمي اللي بيدخل غزة كل اسبوع .. ويرجع وانا في موقعي هذا

    ادعي ليا بابا يرضى يسفرني بكره او يوم الحد اللي جاي
    امنه تدعي ليا

    وهازور المدونة .. ان شاء الله
    سلام عليكم

    ردحذف
  20. حياتى نغم

    طيب بناء على فتافيت الزائرين انا كبرت الخط والله .. وبقى كبير اوي ومش طايقة شكله بس المهم انكم تقروا بسهولة
    وبالنسبة للالوان اقترحي وانا هانفذ والله .. بس على ما اظن ان لما الخط كلبظ كده بقى كويس ..
    امر يا قمر امرك ماشي .. لو حتى عيني ما ترداشي

    نورتي يا احلى حياة واحلى نغم فييكي يا دنيااااا
    :x

    ردحذف
  21. المعتصم

    يا عمدة نورت والله .. نقول تاني انا شوفت تسجيلات من مجموعتنا الاولى وكلمت الناس تلفونيا
    للاسف سفري واقف بقرار جمهوري .. بس جمهوري في بيتنا طبعا
    رئيس جمهورية بتنا بابا العزيز رافض السفر لغزة .. وبيقوللي جاهدي من هنا وكفايا التجهيزات وكدا .. وقال ايه خايف اني اروح هناك واتجوز واحد حمساوي ومايشفش وشي تاني في مصرنا المحروسة عاااااااااااا .. وكل اسبوع اسمي يتكتب مع الناس اللي مسافرة واخد التصريح على امل اني اعرف اقنع بابا .. واللي بيحصل ان اسمي بس اللي بيدخل القطااااع

    وده طبعا نتيجة ترسوبات عند بابا لاني كنت هاموت كده موت واتجوز واحد من اتنين الشيخ احمد يس .. او اسامة بن لادن .. نيههههههههااااااااااي
    وهاطخ عيارين لحضرتك ولمرورك
    طخخخخخخخخ طخخخخخخخخ
    ومعلومة ده مسدس صوت بس ياراجل .. ده انا مرة مسكت مسدس حقيقي كان هايغمن عليا والنبي

    نورت يا عمدة العمد
    سلاااااام

    ردحذف
  22. ادم المصرى

    والله يا فندم بعد ما كتبت اكتشفت اني نسيت حاجات كتير .. بس يلا خير والخيرة فيما اختاره الله

    وان شاء الله .. لما المجموعة التانية ترجع وعرفت اقابلهم هاجيب منهم حاجات تانية

    بس ادعي ليا ان بابا يوافق على سفري وانا هابث مباشر والله من هناك .. كل حاجة

    شرفت فتافيت والله
    سلاااااام

    ردحذف
  23. Tamer Diab

    الزعيم تامر .. والله يا فندم انت لو جبت بهاريز اي حاجه .. هتلاقيها برضه عبارة عن فتافيت واتجمعت وعملت بهاريز

    يعني بعون الله فتافيت هي بهاريز البهاريز عاااااااااا

    ومعلش رديت على كومنت بعدك قبلك وكان خطأ غير مقصوووود

    مرور سيادتك بينعش البوست ؛)

    ردحذف
  24. د/عرفه

    اهلا بيك يا دكتور في مدونتي المتواضعة
    وزي ما قولت للزعيم .. ان البهاريز برضه عبارة عن فتافيت فوق بعض .. فكلمة فتافيت تعني بهاريز بهاريز البهاريز :))

    وبجد النصر لغزة .. وغصب عن اي تيييييييت في الدنيا

    وامييييييين ربنا يخلصنا منهم قريب

    شرفت البوست بجودك فيه
    سلااااااااام

    ردحذف
  25. بنوتة

    اهلا يا بنوتة يا بسكوتة

    وطبعا كلام زي الفل .. واميين عليه وابصم بصوابعيين العشرين .. ايد ورجل يعني

    وبالنسبة للاسود .. والله حاولت حسيت انهي مش حاسة انها بتعتي .. لان السود عندي حاجة مقدسة جدااا

    بس انا كبرت الخط وبقى كلبوووووووووظ
    يارب كده تكون المشكلة اتحلت
    وسامحيني والله في الاسود .. لانه عشرة واصلا من الاساسيات في حياتي

    نورت يا جميل ؛)

    ردحذف
  26. فتافيت العزيزه أعزك الله جزاك الله خيراً على ما فعلت معلش العتب على النظر ما انا دخلت على الربع قرن ، وبالنسبه لسفرك كفايه نشرك للحاصل طالما السفر ليس بيدك وان شاء الله تأخذى الأجر بالنيه وصلى ركعتين حاجه وادعى ربنا وحاولى تطمنى بابا انك راجعه بالسلامه وبدون ارتباط بأحد (: وان شاء الله ادعيلك .

    ردحذف
  27. زعيم ايه بس يا فتافيت
    انتي عايزة تخلصي مني :)
    مش كفاية اخويا وبعدين انا لا زعيم ولا امير ولا المواضيع دي
    انا ممكن اكون الزعيم بتاع الكشري الي في عبود

    ردحذف
  28. ما شاء الله اختي الفاضلة فتافيت
    لقد سطرتي بقلمك كل ما حدث في أرض العزة غزة
    والله العظيم أسأل أن يجزيكي بكل حرف آلاف الحسنات وان يجعلها في ميزان حسناتك
    والحمد لله الذي كتب النصر لعباده المؤمنين المرابطين
    ووالله لقد سمعنا من آيات الله العجاب في نصر عباده المجاهدين..والحمد لله رب العالمين

    بارك الله فيكي وجزاكي الجنة لما كتبتي وما دونتي

    لا تنسوا اخوانكم في غزة من دعائكم

    ||..بحــر الدموع..||

    ردحذف
  29. حياتى نغم

    انتي داخلة على الربع قرن .. انا اسبح فيه الان .. ربنا يديكي ويدينا طولة العمر في طاعته امييين

    مهو لو انا اقدر اوعده باني ارجع من اغير اي ارتباط كانت اتحلت .. بس يا ناس حد يقوللي ممكن واحدة طول عمرها بدور على راجل واحد بس تتجوزه .. وتلاقي هناك فيه وفرة في الرجولة ساعتها بقى معرفش ده انا ممكن اعمل اعلان هناك اني عايزة اتجوز منهم

    مش بقولك مافيييييييييش امل .. ماااااااافيش امل

    تسلمي يا حبيبتي على متابعتك
    والبوست منور بيكي

    ردحذف
  30. Tamer Diab

    خلاص خلاص .. اللي مش زعيم تامر نيههههههااااااااااااي

    كده حلو .. انت تأمر يا مش زعيم والله

    وبلاش الكشري لاني مابحبهوووووووووش خالص مالص بالص

    ردحذف
  31. بحـــر الدموع

    الفاضل بحر الدموع .. والله وشنا منكم في الارض
    على تقصيرنا وبس والله ما باليد حيلة .. ربنا يبارك فيكم ويعزكم ويحميكم ويحفظكم وينصركم نصر مبين ان شاء الله

    شرفني مرورك .. مرور غزاوي اصيل
    نورت اخي الفاضل

    ردحذف
  32. اوووووووووووووووووووول زيارة
    بصراحه انتى اضفتيلى معلومات كتيرة عن غزة مكنتش اعرفها
    بس فيه سؤال
    منين مش لاقيين ياكلوا زى ما القنوات بتعرض وانتى بتقولى ان عندهم مطاعم فاخرة كمان؟؟؟

    ردحذف
  33. blue-wave

    اهلا د. عمرو نورت البوست
    الناس اللي مش لاقية تاكل ديه الناس اللي في الشمال .. والمناطق المنكوبة
    ودية اللي بيلعب عليها اعلامنا الموكوس علشان يبين قد ايه المقاومة ضربت البلد هناك .. ومعلومة كل القنوات معادية للمقاومة كسياسة رغم ظهورها بصور الحمل الوديع المحب والداعم

    فيه بقى مناطق لم تمس.. او بمعنى تاني الخساير فيها طفيفة جدا جدا جدا

    غزة مشكلتها مش ضربها والمحرقة .. رغم بشاعتها
    غزة مشكلتها في الحصااااااااااااااار .. والحصار ده ذل بجد

    نورت البوست يا دكتور

    ردحذف
  34. موضوعك حلو أوى

    ربنا دايما ناصر رايته و رافعها و مش هيتخلى عن عياده المؤمنين أبدا :)

    تحياتى:)

    و ميرسى أوى على زيارتك الجميلة للبلوج

    ردحذف
  35. dr_samarmar

    الله يحلي ايامك يا د. سمرمر

    ومودنك بجد جميلة تستاهل الزيارة

    ويارب تكرري زيارتك :)

    ردحذف
  36. اقرأ نص اتفاقية منع تهريب السلاح لغزة
    وادعوا الله ان يثبت مصر في عدم التوقيع عليها

    ردحذف
  37. م/ الحسيني لزومي

    قريتها والله .. ونشرتها كمان في اماكن كتير وربنا يستر ولا نوقع على هذه الاتفاقيه .. ويفضل الموقف المصرى زي ماكان طول عمره تجاه القضية الفلسطينية

    ربنا يستر

    ردحذف
  38. تحياتي علي التدوينة الجميلة
    وعلي المدونة الاجمل

    دمتي بود

    ردحذف
  39. بارك الله فيكى يا اختى ...وكم نحن نغبطك على دخولك غزه ارض العزه والرباط....
    البوست معبر جدا ....
    نسأل الله ان يجعله فى ميزان حسناتك....
    وجزاكم الله خيرا

    ردحذف
  40. كل دي فتفوتة استثنائية ، كل ده شيلاه في قلبك
    عشان خطري يا تغيري لون الصفحة ، يا تكبري الكلام ، يا تكبري دماغك و بلاش تكتبي كتير خير الكلام ما قل و دل .

    ردحذف
  41. Abd-Alrahman

    ميرسي على زيارتك للمدونة
    وثناءك على البوست والمدونة
    تحيااااااااااتي

    ردحذف
  42. نور الاسلام

    متشكرة جدا على الزياردة وعلى الثناء على البوست
    وجزانا الله واياكم خيرا

    تحيااااتي

    ردحذف
  43. سحساوي

    اهلا يا معلم نورت البوست
    مهي علشان استثنائية كبرت مني
    وبعدين لون المدونة نيفر ايفر اغيره .. الاسود ده مقدس عندي
    والخط انا كبرته 5 مرات اكتر من الاول
    مش عارفة بقى العيب في الخط ولا في النضارة :P
    نورت البوست يا باشااا

    ردحذف
  44. رجاء مراجعه هذا اللينك بخصوص هذا البوست
    http://osamalife.blogspot.com/2009/02/blog-post_08.html

    ردحذف
  45. اسامه عبدالعال

    عاااااااااااااااااااااا
    حصل يا فندم

    ان الله حليم ستار بقى

    ردحذف
  46. عزيزتى

    معاكى حق بوست جميل مليان معلومات جامدة

    انا هروح لواحد اهدهوله يتعلم ويفهم

    تحياتى

    سلام

    ردحذف
  47. اولا ازيك
    ثانيا احساس لسه حي فوق كان يقصدني انا لانه بعتلي لينك البوست
    برغم ان المناقشه انتهت معاه ورغم كده لسه بيتكلم عليا
    سبحان الله
    المهم بقي نيجي للمهم

    انا لما اتكلمت عن هزيمة غزه
    لازم الناس كانت تعرف اني بقول كده مش هجوم عليها ومش شماته ومش فرحا وتهليلا ان اسرائيل كسبت
    انا مصري ومسلم يا بشر

    لكن لما حكمت عقلي عقلي قاللي انه ده ماينفعش يكون انتصار

    الكلام اللي انتي قولتيه ده كلام جميل اوي ويعلم ربنا فرحني قد ايه وسعادتي لا توصف ان معنوياتهم مرتفعه
    لكن احب اقولك ان الحروب بتعمل كده
    مبروك عليكي زيارة غزه
    وكلامك عنهم واقعي
    هم فعلا كرما اوي وجامدين اوي بجد ولا كانهم طلعان عينيهم ولا حاجه

    انا لما روحت غزه روحت لتوصيل مساعدات من فتره مش قريبه من سنه ونص تقريبا
    وشوفت بعيني الاحباط و الزهق والملل واللعنات اللي علي الحرب وسنين الحرب

    مش معني ان حد اختلف معاكم وقال ان غزه اتهزمت ويعلم ربنا انا كان قصدي ايه
    مش معني كده انه يستحق منك الكلمتين اللي انتي قولتيهم ورا بعض دول
    ""
    وقال ايه يقولك غزة انهزمت.. لا يا حدق اللي انهزم ده عقلك ودماغك .. وشيل شوية الصدى اللي على مخ واستعمله.. حرام عليك بقى ربنا مادكش المخ علشان يتحط كدا عيرة ويصدي منك.
    ""

    ده تقدري تعتبريه عتاب لاني ماشوفتش منك حاجه وحشه الحمد لله
    لكن بعد اذنك مش معني اني قولت رايي ورايي ده ماكانش يعني صحيت من النوم وطلبت معايا اقوله لأ ده كان مبني علي واقع وخبرات ناس كانت عايشه بارضه وقت الحرب زي الامثله اللي انتي ضربتيها
    مش معني ده اني مخي مصدي
    او بتكلم عن عقلي وقلبي مغمي عليهم
    او او او
    ياللا
    مبروك زيارة غزه
    وبوست جميل
    شكرا
    سلام

    ردحذف
  48. مساء الخير .. من أروع ما قرات حول حرب غزه .. لقد أبدعت حضرتك في تصوير المشاهد الحسيه والفعليه وكأنها بث مباشر .. سلمت ايديك وسلم البيت اللي رباك .. وسلم هذا الشرف الذي تتحلين به .. والله كأنك فرقة مقاتله وانت تكتبين كلاما وحروفا تشبه
    الصفعات لأولئك المدعين من قومنا .. اللي كلامهم زي كلامنا .. وأسماءهم زينا .. وسحنهم النكده شرق اوسطيه .. لكنهم مقرفين لدرجة ان أسمائهم م تنكتبش
    على مدونتك اللي تشرف اللي خلفوهم .. اهنئك على هذه الروح الوثابة .. والرؤيا الواضحه لما يدور في العلن وفي الخفاء .. بالعربي أنت فاهمه كل حاجه ..
    ويا رب .. ما تشوفك الفضائيات .. احسن يجيبولك جيش من " الفنانين والفنانات " عشان يعلموك الكرامه والشرف زي يسرا والهام شاهين
    ومنه شلبي .. والمقروده هيفا .. والله الدنيا آخر زمن .. هذا الزمن الذي يخون فيه الأمين ويصدق فيه الخائن .. مش عايز أطول .. وأذا قدر الله سنلتقي ..
    لكن ليا طلب لو سمحت .. : هذا الموضوع عن غزه .. استأذنك في سحب كوبي عنه الى المنتدى كي يضطلع الأعضاء والزوار عليه .. او تسمحي بأن ننقل من مدونتك ما ينفع المنتدى عندنا .. وشكرا

    أخوك : أبو خضرة

    ردحذف
  49. أ. ابو خضرة
    اسفة جدا على تأخير الرد.. بس والله لسه شيفاهه حالا
    وكلامك كبير وكتير اوي عليا والله
    والمدونة كلها تحت امر حضرتك.. خدها كلها لو تحبه.. وميرسي جدا على كلامك بجد

    ردحذف
  50. شكرا لك .. أنا أقدر أنشغالك , وأريد أن أؤكد لك
    أنني بعد قليل سأنشيء منتدى خاص يحمل اسم مدونتك ونرفع منها المواضيع الأكثر فاعلية والتي تهم القراء
    في منتدانا , فقد قامت احدى الأخوات بنقل موضوع "
    فتفوته استثنائيه عن غزه الأبيه وقدمتها بشكر خاص لك وهي موجوده على صفحاتنا في منتدى غزه في المواجهة
    العالمية ..تشكرك جدا جدا والله من صميم قلوبنا على
    مشاعرك واحساسك بمعاناة أهلنا في غزة .. لقد أبدعت فعلا .. وهذه تحية من منتدى ابو خضرة - سلام لكل الناس اقدمها لك باسمي وبالنيابة عن أعضاء المنتدى
    شاكرين نلطفك بالسماح لنا باستضافة مدونتك الرائعة .. وشكرا

    ردحذف
  51. انت رائعه جدا,, بارك الله في مصر اللي فيها بنات زيك,, كنا دايما معك بثورتكم والحمدلله ان ربنا نصركم والان اجى دور تحرير فلسطين,,
    فلسطيني وافتخر

    ردحذف

خلل براحتك من غير انتظار .. فتافيت أصلاً بتحب الخيار