يالهوووووووي.. هانموت منفجريييين

عارفة ومن غير ما تقولوا .. ان قناة فتافيت الاخبارية وحشتكم جدا
ده شيء بديهي يعني مش محتاج اي ذكاء

فتفوتة اللولبية في القلب مدارية

بجملة عاميل الاخ فقراير معايا.. يعني

فتفوتة مراسلة قناة فتافيت.. قالت ان عندها خبر جديد.. محلي والمرة ديه مش من بعيد

سمعت الخبر يا ولاد.. وجالي بوادر تخلف مغولي.. على جنون بقري
مع علامات انفلونزا طيوري

قال ايه يا سادة يا كرام.. يا مدونين يا غالين

الشرقية (مسقط رأسي ومكان سكني)

مستهدفة وعليها حراسة مشددة

قال ايه يا اوختشي.. سيدة مغربية خلتها مهددة.. لما دخلت الشرقية مفخخة

وقال ايه.. معاها يا اوخويا متفجرات موجهة
علشان تخلي الشرقية مأساة انسانية.. عبارة عن مكس ملوخية بمهلبية وعلى الوش اشلاء بشرية
ما تصوتي يا ولية انتي وهيه.

فتفوتة قالت.. حاولت يا فتافيت اعرف ايه السبب .. فان عرف السبب بطل العجب!!

فيها ايه الشرقية.. يستعدي عملية ارهابية تفجيرية؟؟

قالوا دهيه.. محتاجة معجزة الاهية .. علشان تبقى محافظة لها فائدة قومية.

طيب يا ناس ليه مستهدفة .. اذا كانت بين المحافظات متدينة!!
وفيها الاف الطلاب من اسيا وافريقيا .. بيدرسوا دين واصول شرعية!!

مش برضو علمونا ان الارهاب دقن ونقاب.. طيب ليه بقى الشرقية مستهدفة؟؟

ولا هي دقن ونقاب على السوياح.. علشان يلاقوا حد تبقى له التهمة ملفقة؟؟

قولت لفتفوتة خاسئتي يا ملحوسة يا مغفلة.. الشرقية مهددة علشان فتافيت فيها مظأططة

امال هي فتافيت شوية.. ولا اقل منها .. ولا هم اللي بيستهدفوا لهم قيمة عنها

عندها قناة اخبارية.. لولبية جهنمية مافيهاش اتفاقات مستخبية
مش ده كفاية سبب لعملية ارهابية تفجيرية؟؟

طيب يا جماعة.. اللي سبق له وخدم في منطقة مستهدفة,
ايه الاحتياطات الوقائية من المتفجرات اللي بيها الشرقية مهددة؟؟

يعني نعمل مظاهرات نطالب مع كل ازازة زيت وباكوين سكر في المعونات الحكومية
يصرفوا لينا قمصين ضد الانفجارات الفجائية!!

ولا نطالب بقانون مرور جديد لازم لكل مشاه خوذة وقائية
ده طبعا حفاظا على الامخاخ المصرية العبقرية!!

ولا نعمل بوابات مرور على الطريقة الاسرائيلية في كل الشوارع المصرية
ولازم التفتيش من الامن قبل المرور واظهار الهوية الرسمية!!

ولا نزل الباليه مادة اساسية في المناهج المصرية المدرسية
علشان نمشي بخفة في الشوارع لانتكعبل فقنبلة مدارية؟؟

ولا بدل الموبايلات نشتري اساور بدائرة الكترونية
علشان بعد الانفجار نعرف نوصل للاشلاء المفقودة والمستخبية؟؟

ولا ننزل ارشادات بمنع التجمعات العائلية تحت اي ظروف استثنائية
ده حفاظا على العائلة من الانقراض لو صادف التجمع عملية انتحارية!!

طيب المواصلات نتصرف معاها ازاي في الازمة ديا؟؟
اه نقضيها برشوطات وناخد كرسات في الصاعقة والجوية!!

طيب المدارس والاشغال والالتزامات الوظيفية؟؟
اقولكم نطالب ببيات شتوي واجازة رسمية!!

قلبي وجعني .. وخايفة امشي في اي مكان لوحدي او حتى مع بشرية
لفجأة تظهر ليا المغربية ومعاها متفجراتها المعنية

طيب يا حكومتنا الجليلة الصاحية وعلى سلامتنا خايفة ومحافظة
كنت فين يا حبيبتي لما المغربية دخلت عندنا المحافظة؟؟

والمتفجرات دخلت ازاي للبلد مع الست المغربية؟؟
ولا هربتها زي الموبيلات على الطريقة المصرية للتهرب من الرسوم الجمركية؟؟

اه نسيت اقولكم يا ولاد معلومة اضافية


المعلومات دية سرية عند قواتنا الامنية
بس داخل المحافظة بقت زي لبانة.. في بوق كل ولية على المصطبة ساعة مغربية.

وماتجبوش بقى سيرة فتفوتة اللولبية.. لتاخد في الحملة اللي جاية.

لو غبت عليكم اكتر من يومين غيبة مش عادية
يبقى كنت انا ضحية من ضحايا الولية المغربية.

دمتم سالمين يا مشاهدين .. قناة فتافيت الاخبارية.

مافيش فايدة

ياجماعة سامحوني .. والله مشغولة ومش عارفة ازوركم

وكمان مش عارفة ارد على الكومنتس

بس هارد بكره ان شاء الله

** ** ** **

وديه معرفش بقى يتقال عليها خاطرة .. يتقال عليها اغنية

معرفش اهو الوحي نزل وخلاص .. وفتفتها

بجد تعبت منك .. خلاص مافيش فايدة .. لو قولت تاني أحبك .. ابقى لحياتي بايعة

سنين طويلة معاك في حيرة أنا عشتها .. ذل وغيرة وقسوة ومرارة منك شربتها

وجاي دلوقتي ترجع وتقوللي بتتألم .. كان زمان حبك ياللي بتتكلم

بجد تعبت منك .. خلاص مافيش فايدة .. لو قولت تاني أحبك .. ابقى لحياتي بايعة

حبيبي اسمعها مني وده طلبي الوحيد .. ووعد لو نفذته هاحول من جديد

احلم بنجمة فالسما وتبقى ملك ليك .. واصحى من نومك ياحبيبي والنجمة بين ايديك
وهاتها وتعالى ليا ساعتها هارجع ليك

عارفة مستحيل .. عارفة مافيش فايدة .. مهو لو قولت تاني أحبك .. ابقى لحياتي بايعة

ياه معقول بعد الغيبه ديا؟؟

يااااه معقولة بجد أصدق أنا عينيا؟؟
مش أنت برضو اللي في يوم كنت ليا؟؟
بعيد واقف وسط الناس وشايفني وأنا جايه
ياه ياقلبي بعد السنين اشوفه وهو مش ليا
ابتسمت وجيت تمد بخطوتك وعينيك بتضحك ليا
استنى يا قلبي مهو يمكن مش قاصدني بالضحكة ديا
لاقيتك جيت هنا قصادي وبتمد ايديك تسلم عليا
قلبي أتنفض ده بجد كان قاصدني وهيسلم عليا
مهي سنين فراق طويلة عدت وانت بعيد عن عينيا
نسيت انا فيهم بسمتك وحبك وطعم لمستك لايديا
سلمت عليك وانا بداري لهفة قلبي ودمعة عينيا
لمست ايديك بس ياخسارة باردة ومش حاسه بيا
ايديك في ايدي بس ليه باصص لناحية تانيه؟؟
لاقيتك بتشاور له يجي جنبنا هنا ويتعرف عليا
شاب غني وابن ناس لاقيتك بتقول كده ليا!!
استغربت انا كلامك مالي انا بالقصة ديا؟؟
واتاريه كان بيسأل عن عروسة بس اخلاقها عاليه
شوفتني انا قصادك قولت اهي اولى بالصفقة ديا
غني ياقلبي وارقص حبيب زمان جايب عريس ليا

بالجوز بالفرد.. فاكرينك يا منتظر

يا خسارة البطولة.. وياخسارة القيم.. لما أبطال العرب (بعد الشر يعني لو عندنا أبطال) يبقوا مجرد خبر على السريع كده في الجرايد.

ومجرد كلمتين في شات بار الحظيرة وكلمة وربع على شات بار العبرية!!

لما يتحول رجل العام.. (أهم شخصية في 2008).. لمجرد أيقونة على قناة البغدادية كل يوم العدد اللي تحتها يزيد رقم
والله عيب علينا.

لما الــ(CNN).. تقول انه اهم شخصية في 2008 على الاطلاق .
وتفوق حتى على اوباما في الشعبية والكارزمة

واحنا حتى مش فاكرينه بدعاء.. مش هاقول دعم او تضامن
لا ده حتى الدعاء له بقى خلاص فينيتو.

شاب زي الورد ماكملش 30 سنة.. وعمل اللي كنا كلنا (سواء موافقين على اللي عمله أو رافضين) نفسنا ومنى عنيننا نعمله.
وضرب تيت العالم الاول بوش بالجزمة
يبقى خلاص كده في طي النسيان؟؟!!!


الراجل مرمي في السجن.. وخلاص على كده بقى راح منتظر الزيدي في الوبا مع هنادي.
بس هنادي لاقت أمنة تسأل عليها وتاخد بتارها من الباشمهدنز.

لكن الزيدي خلاص بخ كده ولا حد فاكره أصلاً.

كان محاكمته يوم 19 اللي فات ده.. وقال ايه كل اللي اتكتب عنه انه راح المحكمة وطلع من المحكمة والقضية اتأجلت.
يا حلاوة يا ولاد.. وكان الله بالسر عليم.

فين اللقاءات؟؟.. فين الصور؟؟.. فين الأخبار؟؟.
فين الراجل يا عرب فين اللي رفع راسكم بجزمته.
وياخبتي لما خلاص بقى كل اللي في ايدينا مجرد جزمة نعبر بها عن رفضنا.!!.
وحتى الجزمة مش لاقية اللي يفتكرها.

بس أهو عبر وقال وعمل اللي في نفسه.. الدور والباقي على الناس المأنتخة اللي بقى عندها بلادة ونطاعة وخلاص.. حتى الراجل بعد ما كان على كل لسان.
معدش حد فاكره ولا حتى فيه عنه خبر يفهم الناس ماله ولا جرى له ايه؟؟

بقى هو ده خلاص مصير الرجالة في الدنيا.. الناس تهلل وتصقف وقت العملة.
وبعدها خلاص في داهية بقى يشيل هو الطين؟؟

وقال ايه.. في تكريت (مدينة عراقية).. الناس حبت تخلد الراجل تقول له والنبي فاكرينك.
وعملت له نصب تذكاري من البرونز على شكل جزمة كبيرة..
ويا حسرة قلبي اللي دفع تمنها ملجأ ايتام.
واتكتب عليها ايه:

صياماً يا منتظر حتى يفطر السيف بالدم .. وصمتاً حتى يصدح الحق يا فمي

الحكومة معجبهاش ولايونكن تفضل الجزمة دية ابدا.. تقريبا خافوا ليفتكر الشعب عملت المنتظر ويبدأ ينفذها.
قالوا بعد ما صدقنا ان الراجل خلاص اتنسى وماعدش حد فاكره.
نقوم نعمله نصب يفكر الناس بيه.. شيل شيل يا عم.
وملعون ابو فلوس الايتام اللي ادفعت فيه .. لابو الايتام نفسهم بلا وجع دماغ.
عمااااااار يا عراق.

انا هتشل بجد.. والله هاموت من القهر.. ليه كده ليه؟؟

ليه حتى ماحدش فاكره ليه ماحدش بيسأل عليه خالص كده؟؟
ليه بقى مجرد ايقونة وخبر عابر كده وبس؟؟

ده كده الناس تخاف تعمل اي حاجة.. لايضيعوا وحتى مايلاقوش اللي يترحم عليهم.

ليه مافيش حد يقف ورا الرجالة.. ويقوللهم احنا معاكم.
وما تخفوش مش هاتروحوا هدر؟؟

ايه القرف ده.. يعني لا بنعمل حاجة.. ولا حتى نقف جنب اللي عمل.. وعايزين يبقى لنا قيمة
ابقوا تييييييت على قبري لو حصل.

كنت كتبت مدونة بعد ما منتظر نش بوش بالجزمة في وش امه بيوم واحد
بس ماكنتش فتافيت لسه اتولدت.
قولت بما ان ماحدش فاكره.. اعيد نشر جزء من المدونة .

تنشرها فتافيت يمكن الناس تفتكر منتظر الزيدي..
صاحب نظرية ::

الراجل مش بس بكلمته الراجل بضربه لبوش بجزمته


وكانت بعنوان بالجوز بالفرد.. نفديك يا منتظر..
بس العنوان الاصلح دلوقتي.
بالجوز بالفرد.. فاكرينك يا منتظر.

والآن وعلى طريقة أصالة (يسمحولي الكل).. فليسمح لي الجميع كشابة عربية
أن أكتب السطور الآتية النابعة من نبض الشارع :

(أعلنت كلا من جماعتي "نايك وأديدس" عدم مسؤوليتهما عن أحداث 14 ديسمبر.. بينما أعلنت جماعة "كعب الصحراء" مسؤوليتها عن الحادث حيث قام الجناح الحذائي بالجماعة بقذف قذيفتين من طراز "إف 44" ضد وجه "جورج دبليو شوز" وقد نجا "شوز" من العملية الحذائية.. بينما أصيب العلم الأمريكي إصابة بالغة من جراء القذف.

وقد أجرى "شوز" اتصالاته بعد القذف مباشرة ليطمئن ذويه وأخص الكوندا ليزا رايس باتصال أعرب فيه عن مدى تأثره بعدم وجودها معه حيث قال: "كوتشي فين وأنا بنضرب؟؟".. ولكنها أجابته بحزمها المعتاد قائلة: "لا حذاء للديمقراطية".

وقد تم إعلان يوم 14 ديسمبر يوم الحذاء العالمي.. وجدير بالذكر أنه تم القبض على كل بائعي الأحذية بالعالم الإسلامي بتهمة "الاتجار بالأحذية دون ترخيص".. وتم وضع قانون يجرم بيع الأحذية لمن دون 18 عام.

وعن رد فعل الشارع العربي الفني.. قامت الفنانة هيفاء وهبي بغناء أغنية "بوش الواوا" تضامنا مع الموقف الراهن.. بينما أعربت الفنانة نانسي عجرم على مدى إعجابها بما حدث بغناء أغنية "جزمة ونص".. وقامت الفنانة إليسا بتغير اسم أغنيتها الأخيرة "بتمون إلي بشوز" تضامنا مع الزيدي.

وقام ورثة الفنانة الراحلة زينات صدقي بطلب تغير القول المأثور للفنانة الراحلة (كتاكيتو بني) إلي "جزمتو بني".. أعرابا عن مدى سعادتهم "بجزمة الزيدي" البنية اللون.
وطالب "شوز الأب" بتكريم الفنانة المصرية ميرفت آمين وجعلها سفيرة للنوايا الحسنة في العالم العربي عن فيلم "حافية على جسر من ذهب".

وعن ردة فعل الجماعة الإسلامية المتطرفة.. أصدرت إحدى الجماعات المتطرفة بيانا بشجب فعلة "منتظر الزيدي" حيث أنه قام بقذف الفردة اليسرى قبل اليمنى.. مما يخالف الشريعة.. مستندين على أن الفردة اليمنى قد أصابت العلم الأمريكي في مقتل بينما راحت الفردة اليسرى هباء.)

بالجوز بالفرد.. فاكرينك يا منتظر

ولو حتى نسيوك .. فاكراااك

يا راجل في زمن .. نامت فيه الرجالة

وتغندروا الاشباه

:((

اللهو الخفي.. يخليك لامك يارب

طلعت امبارح من الشغل.. وروحت ارجع بيجامة جبتها.. وطلعت وحشة عليا في البيت لما قستها بمزاج.
كنت عاملة زي يهود الهولوكوست .. او الحمار الوحشي.. قصدي الحمارة الوحشية.علشان الته المربوطة بعزها موت.

روحت المحل وبدلت البيجامة.. وطلعت اخد تاكسي تاني علشان اروح.
والله مرتبي كله طالع مواصلات يالا
خلي السواقين يكلوا عيش.

شاروت لتاكسي..

وقالي اتفضلي قبل حتى ما اقول راحة فين
( يا حلولي ده ايه الحظ ده طول عمري بفضل اتحايل عليهم)
لان بيتنا في منطقة بعيدة عن وسط البلد.
بس السواق شكله ابن حلال قال حرام اقف في البرد ده كده والساعه 10 بليل.ناس ذوق ذوق صراحة.

في ثانية الا ثانية كنت راكبة التاكسي قبل ما يغير رأيه وارجع انشف من الصقيع ده.

في الطريق شاورت واحدة .. وسألها راحة فين ( طبعا الناس مقامات هي تتسأل وانا لا) المهم نزلت ركبتها هي جوه لاني هانزل قبلها .. وقال لها الاجرة 4 جنيه.
وده كتير جدا في الزقازيق.. قولت اه يبقى هايهف 4 جنيه مني.يلا مش مهم المهم اروح.

الست اتشالت واتحط واربع عفاريت لما يبقوا ينططوك نزلني هنا.. وقومت نازلة علشان الست تنزل.
ووقتها بصيت على رقم التاكسي.. لاني هوايتي حفظ ارقام التاكسيات.واهي رياضة بقى .. انزل واركب.. اركب وانزل

نزلت هي .. وركبت انا.. ودقيقة موبايل السواق ادى ميسد.. ودخل في شارع جانبي.. هو طريق مختصر لبيتنا.
وواحد شاور له من على اول الناصية.. وركب معانا وكان رايح قرية تبعد عن بيتنا تلت ساعة.
بس طريقها نفس طريقنا بس عكس الطريق..

فعملت فيها فلحوسة وقولت له انا قولت لك راحة فين.. لازم تنزلني مكاني مش هاعدي طرق انا.
هانزل في الشارع اللي قولت عليه.
شخصية شخصية يعني.

قاللي من عنيه يا ابله ده انتي تأمر أمر
( يا حلولي تاني التاكسي بيسمع الكلام وماقلش لا هاتنزلي الناحية التانية)

جينا بقى عند الطريق اللي بيفصل بين طريق القرية وطريق بيتنا .. بيتنا شمال وطريق القرية على طول .

بفتح الشنطة وبطلع 4 جنيه وعيني فيهم اصلا لانهم كتير اوي .. وبرفع عيني من الشطنة .

ايييييييييييه ده؟؟ ايييييييييييه ده؟؟

لاقيته مشي على طول ومادخلش شمال .. وده معناه انه طلع
الصحراااااااااااوي.

قلبي وقع في رجلي .. الساعة 10 بليل وموبايلي فاصل شحن .. وجوز تيران معايا في التاكسي.

انا.. انت يا عم انت رايح فين.؟؟ انت عبيط ولا ايه؟؟

السواق.. ليه بس كده يا ابله هاوصل الراجل بدل ما تعدي الطريق هانزلك مطرح مانتي عايزة.

انا.. عايزة ايه انا ايه اللي يطلعني الصحراوي دلوقتي انا؟؟

الراكب.. يعني الحق علينا يا ابله اننا عايزين نريحك؟؟.. احنا عايزين راحتك.!!

ويلهوووووووووي ويا مصبتي السودة .. تريحوني؟؟.. وعايزين راحتي؟؟..

ده جمع مش مفرد.. يعني مع بعض هما .
يعني انا مخطوفة!!!!!!!!

اعمل ايه ياربي دلوقتي ؟؟ اعمل ايه؟؟

لو فضلت في التاكسي.. اكيد بكره هابقى عنوان في الجرايد تورين يخطفوا فتافيت وغرغروا بيها.

ولو نزلت في الطريق ده لو عرفت افلت منهم..
هايبقى بكره برضو عنوان في الجرايد بس بدل تورينهاتبقى امه لا اله الا الله غرغرت بيا.

يا وقعة هباب يعني في الحالتين هايتغرغر بيا..يلهوي وقال انا بقول عليه سواق ابن حلالده ابن صرمة قديمة ده ابن تييييييييييت.

فضلت حوالي دقيقة مش عارفة اعمل ايه.. وكل شوية حاجة تنط قصادي

مرة المدونة..
ياااااااااه خلاص كده فتافيت ربع قرن راحت ومافيش فتافيت لولبية تاني؟؟

مرة الجواز..
يلهوي مش هاتجوز وادخل دنيا؟؟ .. ايه ده ماتفقناش على كده اني ادخل الدنيا على ايد تورين زي دول..
اااااااه هو ذنب تامر دياب وعمرو تشي .. لما نزلت لهم سيسي احبطهم .. اهو ربنا رزقني بتورين علشان اعرف
ان لسه فيك تيران يا مصر.

ومرة ماما..
وهي بتدعي ليا بالستر.. شكلها كده باب السما كان مقفول ولا ما كنتش بتدعي بنية صافية.

ماشي حسابك معايا بعدين يا ماما
بس انا وراي خطف دلوقيت

وفجأة نط قصادي جوز حمام في التلاجة

ماما سلقاه ومستني بس احمره واكله.. ااااااه يا جزم يا اخوتي يارب اللي يكلوا غيري يزور
ياترى هايكلوا ولا هايحترموا غبتيويقولوا بلاش كان عينها فيهم قبل الخطف؟؟

ركبي بتخبط في بعض .. ريقي مش عارفة ابلعه .. الموبايل مافهوش شحن ولا رصيد .
الطريق كل شوية يبقى ضلمة اكتر .. ومقطوع اكتر.. والله مرعوووووووبة جدا والخوف بيزيد.

وده كله حصل في خلال اقل من دقيقة.

فجأة وربنا كبير بقى .. لان فتافيت طيبة وبنت حلال .. جت في دماغي فكرة.

ويا صابت يا جوز تيران بقى.

طلعت الموبايل اللي فاصل شحن .. وفي لمح البصر سمعوا صوتي وانا بقول..

انا.. ايوة رقم التاكسي اللي ركباه (00 00)..(كده انا امان بقى رقم التاكسي مع اللهو الخفي اللي بكلمه.. اكيد هاينقذني)

السواق.. فيه ايه يا ابله بتدي مين رقم التاكسي؟؟..(ولا كأني سمعاه)

انا.. ايوة على الطريق الصحراوي بعد المرور.
(علشان اللهو الخفي يعرف مكاني ومايتوهش)

الراكب.. ايه يا ابله فيه ايه بس؟؟

كده تمام اللهوي الخفي عرف رقم التاكسي ومكاني.. اكيد زمانه جاي.
بطمن نفسي وبستعد لباقي الفكرة بقى

بصيت للسواق واللي معاه .. ولبست وش الاجرام .
ولا ابو موته في زمانه والله .
وانا اصلا ركبي بترقص من الخوف وقولت للراكب

انا.. انت مال امك اصلا بتتدخل في الكلام ليه هو بروح اهلك معاه..
وقولت لو خدت بوكس في وشي يبقى راجل محترم ومش ناوي خطف.
لكن لو طلع سيس بعد البوق ده.. يبقى انا رهينة بجد.

الراكب.. وليه بس الغلط ده الراجل ماحبش يخليكي تعدي الطريق.
(يا وقعة هباب ده خطف بجد)

انا.. برضو وانت مال امك بالموضوع انا قلت رقم التاكسي ماقولتش مقاس جزمة اهلك.

السواق.. وليه بس رقم التاكسي والطريق هو احنا هانخطفك يعني؟؟ ..
(يا وقعة طين تاني نون الجمع.. هو حمل تور واحد لما يبقوا تورين)

انا.. مش مريحني بقى نون الجمع ديه.. هو انتم مع بعض ولا ايه؟؟. وبعدين خطف مين يا سيس انت وهو؟ هو انت.....

السواق قاطعني.. مين بس جيب سيرة خطف الموضوع كله 10 دقايق تأخير.

انا.. خطف مين يا اوسطى.. ده خيالك العلمي.. انت ماتقدرش تخطفني لانهم (اللهوي الخفي طبعا) معاهم الرقم والطريق
وخلال ربع ساعة لو ماكنتش في البيت.. اعفن عسكري مرور فيكي يا شرقية هيجبكم من افاقكم.

الراكب.. الله الله يجيبنا ليه بس وانا مالي بالموضوع انا راكب بس.نزلني هنا ياعم كان يوم اسود يوم ما سمعت كلامك.
انا.. شوفت .. اهو سمعت كلامك.. والله ده خطف بجد بقى؟؟

السواق.. تيييييت امك واللي جابوا امك ناقصة تيييت امك دلوقتي..
والله يا ابله راكب ومش موصله كمان.. انزل هنا يا ابن التيييييييييييت (بس تيت قوية جدا)

الراجل نزل في مكان هوس هوس وضلمة كيك.. ومافيهوش صريخ ابن يومين.

انا.. مش ملاحظ ان الربع ساعة قربت تخلص وكده هايقلقوا (اصل اللهو الخفي بيعزني اووووي)
وانت الجاني على نفسك يا حلاوة.

السواق.. والله يا ابلة ماشي بسرعة اهو والله قبل الربع ساعة هاتكوني في البيت ولا يقلقوا ولا حاجة.
(ايه ده هو يعرف اللهو الخفي ولا ايه؟؟)

انا.. طيب اخلص بس.. واهو حتى اشم هوا نضيف من بتاع الغيطان.

السواق مشي بسرعة جدا.. وخلال 7 دقايق كنت قصاد الشارع بتعنا واللي ما ينفعش عربية تمشي فيه لانه مكسر.

اصل عقبال املاتكم ركبنا الغاز الطبيعي من سنة.. فالحكومة الله يعمر بيتها مش فاضية بقى تدخل غاز السنة اللي فاتت وترصف السنة دية.
( الله يخلي الحكومة ويخليها لامها)

انا.. ايه ده انا بيتي مش هنا؟؟ .. البيت اخر الشارع.؟

السواق.. بس الشارع يا ابلة ماينفعش ادخل فيه؟

انا.. انت حر الربع ساعة فاضل فيها 3 دقايق وعيش بقى انا مالي.
(اصل اللهو الخفي دقيق جدا في مواعيده صراحة يعني)

السواق.. حاضر يا ابله تحت امرك والله.. انا عايز اريحك .
وقتها ضحكت جدا لان اريحك ديه غير اريحك التانية خالص

وصلت تحت البيت .. وطبعا التاكسي هايعوز عفشة جديدة ..
طلعت جنيه وربع من الشنطة واديتهم للسواق.وده قليل جدا في الشرقية..

السواق مسكهم في ايده وبص فيهم وبصلي..

انا.. ايه شوية ولا ايه؟؟

السواق.. لا يا ابله ده حتى كتير..وبيمد ايديه بالربع جنيه.

انا.. لا لا يا شيخ مش هاخده والله ده حتى البنزين غلي اوي.

ودخلت العمارة بتاعتنا.. وانا بتشاهد وبحمد ربنا وبابوس ايدي شعر ودقن

معرفش لو ماكنتش الست دية نزلت وشوفت رقم التاكسي.
كان ايه اللي حصل؟؟

لو ما فكرتش في الموبايل .. واتكلمت بثقة واني مش خايفة.
كان ايه اللي حصل؟؟

لو اللهو الخفي روح قلبي.. ماكنش رد عليا.
:))
كان ايه اللي حصل؟؟

ربنا يخلي اللهو الخفي .. ويخليه لامه.

امييييييييين

:)

تامر مبروك .. اعلن التضامن معك

يعني احنا طرمخنا في حاجات كتير .. وبنقول مش مهم بكره تتعدل .. يا سيدي امشي جنب الحيط احسن وكل عيش .. وانت مالك بس..
يعني انت اللي هاتعدل المايلة؟؟..
معظمنا ان ماكنش كلنا بيقول كده .. واللي هايقول لا .. هاقوله ماشي .. بس في اقرب مرايه كده واقف .. وقول لا وشوف ساعتها المراية هاتقولك ايه .. مش هاقولك انا

تامر مبروك ..
مصري نظيف محترم.. ماقلش وانا مالي .. ولا حط الطرحة على وشه واستحى وسكت

تامر مبروك..
البورسعيدي .. بورسعيد المقاومة .. فاكرنها ايام ما كان لسة فيك رجالة يا مصر .. اهو تامر قال لا فيه راجل ونص كمان.

تامر مبروك ..
رفض انه ياخد حقه تالت ومتلت ويبيع العمال بتوع تراست.. تامر راجل يستاهل كلنا نقف جنبه.

مش هاقعد احكي في تفاصيل بقى .. وقول عمل وسوى .. لا
انا بس هاقول .. لكل راجل بجد .. لكل مواطن شريف .. لكل انسان لسه فاضل عنده انسانية

تامر مبروك محتاااااااااااااااجك بجد

محتاج انك تنشر قضيته لكل الناس .. ولكل واحد محترم او حتى مش محترم

لازم الناس تعرف وتقرا وتشوف .. اللي بيحصل في تراست بورسعيد

مش هارغي كتير زي كل فتفوتة .. بس هاقول الكلمتين دول وخلاص علشان الكل يفهم عايزة اقول ايه؟؟

نعلن تضامننا مع تامر مبروك .. المصري النظيف .. المطالب بحق عمال تراست ببورسعيد


والذي تم الحكم عليه بعدما كشف المستور بالادلة والبراهين عن حقائق مهمة

تعني تلوث المدينة واهدار حق العمالة المصرية بشركة تراست

بتعويض 42.5 الف جنيه مصري تعويض لشركة تراست
في وقت انه ممنوع من العمل
منذ عام كامل ولم يدخل جيبه جنيه واحد من عام بسبب تراست

التفاصيل في

مدونة الحقيقة المصرية

مدعمة بالصور والمستندات والتسجيلات التي تثبت حق تامر .. وتثبت ايضا مدى الظلم الذي وقع عليه

يا سااااادة مصر بلد التمانين مليون مواطن .. تستورد عمالة هندية
وحسبي الله ونعم الوكيل

نتضامن مع تامر مبروك

وأملنا في القضاء المصري كبير
ان ينصف تامر في الاستئناااف .. ويحكم بالعدل
اه تامر مبروك .. مكتشف الحصبة الالماني

في مصرعلى فكرة

64 حصان.. بلا وكسة ده سيسي يا اخويااااااا

ام ميسي ولدت يلا نروحلها .. ناخد موز وبندق.. ونروح نباركلها
ام ميسي ودلت .. صلي صلي.

وصوتي ياللي مانتيش غرمااااااااااانة.. يالهووووووتيني.. ويا خراشي.. وياخربي
وعلى رأي معالي زايد..
تييييييييييييييييييييييييييييييت عليا

ميسي رضيعة.. وماله لما ترضع هي عجبة يعني.. اتولدت في ايستبورن الانجليزية.. برضو ايه المشكلة يعني هي ايستبورن منعت الولادة.. المشكلة مش في ميسي.. نوووووو ابسلوتلي.
المشكلة في اللي خلفوا ميسي واللي جابوها اصلا.

وامها شانتيل ستيدمان النبي حارسها وصاينها عمرها 15 عاااااام.
وماله يا بت يا فتافيت علشان انت عندك يعني 25 سنة وماجبتيش حتى صورصارمن غير شنب .. اخص عليكي يا وحشة يا حقودة.

والنبي ابدااااا .. نيفير ابسلوتلي اطلاقا .. والنبي ما اعتراضت على امها اهي برضو 15 سنة ومزة وطول بعرض.. تجيب عيال ومالو يعني والنبي ما اعترض.. ولا علشان انا لا عندي صورصار ولا حتى سحلية.
ده الصراصير والسحالي .. حاجة بتاعة ربنا ملناش فيها دخل امااااااااااال
اللهم لا اعتراض

بس اللي تتطس في نواضرها وتتشك في دراديرها شانتيل جبت البت ميسي.. من زينة دكورة انجلترا وسيد رجالتها ألفي باتين.. والمحروس سيد الرجالة عمره 12 عاااام.
اي وكتاب الله المجيد عمره 12 سنة.
وقال ايه طوله كله متر وربع 120 سم.
اي والنبي على بعضه كده لكشة واحدة.

ديه صورة عوائلية .. للمحروسة شانتيل, وزينة رجال انجلترا إلفي, وثمرة حبهم ميسي.
وصلوا على النبي .. علشان الواد ما يتحسدش
وتحصله كبوه ولا حاجة بعد كده .

ويروح بعدها يدور على فيجارا في السوق
والفياجرا ممنوعة اصلا للي تحت الاربعين .. مش الاشبال اللي بيلعبوا فوق العشر سنين
ده طبعا طبيا شوور واقعيا نييييفر.. يعني مجرد توضيح
وخمسة وخميسة في عين اللي يشوفك
ولا يصليش على النبي

يارافع راس العياااااال .. ومجنن الستااااااات
وقاهر الرجاااااااال
اهو لا بالطول ولا بالعرض .. متر وربع وهد الارض
نيهههههههههههااااااااااااي

بس ايه اسد وراجل راجل يعني .. ولا يبان عليه ايوتها حاجة .. لا شنب ولا دقن .. ده انا لو شوفتها في الشارع ممكن اوطي ابوسه والله..
واقول له انجغة يا بيضة .. انجغة يا قطة
النبي حارسك لامك يا بطة.

وطبعا معذورة اصلهم علمونا ان الراجل له دقن تشوك وشنب منبت .. ويكون حاجة كده تملى العين
متر في مترين
اي والله .. هو الراجل يبقى راجل الا لو
كان العرض عرضين.

بس اسم الله عليك يا سيد امك .. العرض عرض واحد
متر وربع .. وكنز كمان يعني الواحدة تخاف
تغسلك بمية سخنة لتكش منها في الغسلة

واللي يجلها ويحط على اللي جابوها شانتيل .. شافت فيه ايه ؟؟
.. بس كلمة حق..
البت قصدي المودام تستاهل تبقى زي نيوتن وتتكتب في التاريخ وتدرس في الكتب كمان
امال زي ما هو اكتشف الجازبية الارضية .. هي النبي حارسها وصاينها
اكتشفت الرجولة المستخبية.

طيب وده الواحدة تتعامل معاه ازاي بقى؟؟.
وهو لسه في مرحلة البث التجريبي اصلا.. يعني الارسال مستمر ولو بيقطع؟؟
وياترى جودة الصورة.. الريزلويشن بتاعها عامل ازاي؟؟

طيب مواعيد عرض البرامج .. 24 ساعة ولا بث نهاري فقط .. مهو لازم ينام بدري لانه لسه في طور النمو!!
وطبعا النوم بيساعد على النمو....
وطيب واخبار النمو عنده ايه؟؟

تفتكروا النوع ده هايغزو الاسواق العالمية؟؟
ويثبت جدارة في الاداء؟؟
ولا زي العدد الصيني مع تاني استعمال بتهنج وتفصل شحن؟؟

شوفتوا يقطعني نسيت اقولكم ...
ان إلفي و شانتيل تييييييت مرة واحدة
ايووووة جاست اونس .. اونلي مرة واحدة.

بس طبعا شووور امااااااال .. إلفي ابن قوة عظمى في العالم .. امال هي انجلترا بتلعب ولا ايه؟!!
عظمى عظمى يعني .. بحق وحقيقي

يعني اقول لكل الفتافيت .. استنوا ما دوروش على المنتج الجديد .. وتقلوبها بطر على اللي معاكم
المنتج لسه جديد ولم يستخدم سوى اوووونلي مرة

وطبعا الضمان ضد عيوب الصناعة .. مش سوء الاستخدام
ولا يمكن المنتج ده .. هاينزل للاستخدام مرة واحدة
زي ابر الحقن والسرنجة

وقال خالد صالح اعترض في محامي خلع
ان الراجل 64 حصاااان
وقال ليه 64 حصان كتير.. حصان واحد كفايا جدا
واهو طلع حتى الحصان كتير
وسيسي واحد كفاية
عاااااااااا

الملحمة التياتوية.. اي والله

من قناة فتافيت الاخبارية.. اللي ارسلها يمتد من المحيط للخليج.. ست فتفوتة هانم مراسلتنا.. جابت اخبار حصرية.
لان مع فتافيت كل الاخبار المستخبية .

بس خبر ايه.. جامد جامد.. وحصريا لنا وقبل الجميع .. وبعد كده هاعمل اشترك ليكم.. بفلووووووووس استغلال بقى.. امال اصرف على المراسلين منين انا.. ولا اشحت عليهم يعني.. محدش يا عيني بيقدم ليا الدعم المادي زي الحظيرة والعبرية :(

لا بقول الكلام اللي محفاظاه ليا مامي امريكا.. ولا عندي قاعدة جوية بتدعمني.. ده انا غلبااااااااااانة خالص مالص.. وهانفتح باب التبرعات قريب كمان.؟ :)

ومحدش يجيب سيرة لبابا اني هديت الحيطة خالص.. لا يقفل ليا مدونتي وتبقى فتافيت الاخبارية مشفرة.. اوعوا حد يجيب له سيرة.

دلوقتي تنضم لنا شبكة مراسلينا.. واللي اصلا كلها مراسلة واحدة ست فتفوتة اللولبية من امام معبر رفح..

قال ايه يا سادة يا كرام.. ولا يحلى الكلام الا بذكر النبي.. عليه الصلاة والسلام.. مجموعتنا التانية خللت على المعبر هناك.. بقالها اسبوع بتحاول الدخول.. والدخول ممنوع.
حرصا على ايه لست ادري بس هو اكيد حرصا على حاجة.. امال هيبقى ممنوع كده وخلاص.

وهناك اسر فلسطينية عايزة تدخل غزة.. بس برضو نيييفر ايفيييير دخول.. والناس هناك قاعدة على امل ان حد يدخلهم.

الصبح بقى انهاردة.. جت اسرة فلسطينية وصممت على الدخول.. وطبعا معلوم ان المعبر ما بيتهددش .. وصممي براحتك ياروحي.
انا معبر ديمقراطي.. من حقك تصممي.. ومن حقي اقول نووووو واي.

قامت ست من الاسرة دية قاعدة ومربعة.. قصاد بوابة المعبر.. وكشفت رسها وهاتك يا دعا .. وتدعي بحرقة ووجع قلب.. دعت بشكل يخوف حتى الامن.. حسوا ان ممكن من دعاها ده.. الارض تتشق وتبلعهم.. يموتوا منفجريين وهم واقفين.

قالوا مافيش غير سيفر الناس دية يحل الازمة.. وجه سيادة السفير للمعبر.. وفور وصوله بقى....

الاسر الفلسطينية اتلمت على العربية بتاعته.. مش علشان يقولوا عايزين ايه.. ابسلوتلي.. بس بهدلوا العربية ضرب وتخبيط وتكسير.. والسفير في موقف صعب.. اذا كان ده حاله وهو جوا العربية .
امال لو نزل ممكن يجرى ايه؟؟


قامت العربية رجعة لورا ورجعت من حيث اتت.. بس وهي ماشية بقى.. السفير سمع من المنقي يا خيار. ويا اتة ويا كوسة.. ويا سوق العبور كله
يا تيت يا ابن التيت .. يا تيت وتيت وتيت.. تيت تيت.. تيت تيت تيت .. تييييييييييييت.
ولو فضلت اتيت من هنا للصبح مش هاقدر اوصف لكم ملحة التيت والسنفونية التياتوية اللي حصلت هناك.. وكانت على شرف سيادة السفير.

شوية وجت العربية اللي بمائات الاف الجنيهات.. واللي بكل مليم فيها خدت خبطة او نطحة بالاضافة لتيتة من الاسر الفلسطينية .. بس المرة دية السفير مش لوحده.. كان معاه حد مهم جدا من الامن المصري.
ومصادرنا لم تستطيع الكشف عن هويته بس هو مسئول من العيار التقيل..

خد الاسر الفلسطينية واتكلم معاهم.. واحنا المصريين اساتذة كلام ودكتوراة في حلاوة الحديث.
باختصار الشعب المصري من اصغر عيل فيه لاكبر راس فيه بياع كلام محترف.

وفضل يهدي في الناس.. وقال استنوني هنا.. انا هاحاول اعمل حاجة واساعدكم.. واختفي في ظروف غامضة داخل مبنى هناك.
وهناك انباء مؤكدة ان المعبر لايونكن يتفتح لمجموعتنا :S
بس فيه بصيص امل ان الاسر الفلسطينية ترجع.
بس لم يتم التوصل لوقت الرجوع.. غير ان المسئول لسه مخرجش من المبنى لوقتنا هذا..

كانت معكم مراسلة قناة فتافيت الاخبارية الجهنمية.. فتفوتة اللولبية.. في تغطية الحدث
الوصلة التيتاوية التي شنت على سيادة السفير
من امام معبر رفح.

شكرا لشبكة مراسلينا ..فتفوتة
والتغطية مستمرة انتظرونا بعد الفااااااصل

والله كان نفسي يبقى موجود

طبعا كل حاجة هاتقلب احمر انهارده.. الدباديب الورد الشنط الهدايا.. حتى الناس هاتلبس احمر.. وده طبعا مش علشان انهارده اليوم العالمي للحصبة.. لا لا لا لا .. بس علشان انهارده الفلانتين داي

قولت انزل تدوينة حمرا بقى.. على غرار التدوينة السودا.. واتضامن مع العشاق انهارده

ومايمنعش ان كان نفسي انه يبقى موجود حبيب ليا انهارده.. بس يلا اهي ازمة وتعدي بقى.. ومش كل سنة يبقى في فلانتين داي عندي.. السنة ديه اخدت اجازة .. والبركة فيكم.

Happy valantine's day

** ** ** ** ** **

أحبك يامن أنقذتني من بين براثن الهموم .. لتعيد مولدي من جديد وتزيح بكفيك الغيوم .. لأرى نور الشمس حقاً وأفهم معنى الحب والخلود.

مَلَكتَنِي بين ليلة وضحاها .... مَلْكْتَنِي الدنيا بسماءها.

أحببتك فارس مغوار .. جاء لقلبي يبكي و ينهار .. ويقول عن يقين .. حقاً الحب يذوب فيه الأختيار.

دمعه لؤلؤ منثور على الشواطئ والبحور .. فيه أجد غايتي .. فيه أجد مرادي .. فيه حقاً فارس بلا غرور.

عشقت الإبحار بين جفونك .. عرفت معنى الحب بجنونك .. مجنوناً بحبي و أنا قد جننت وأصبحت في العشق مفتونك.

ضاعت من عمري أعوام طويلة .. وأنا أبحث عنك هنا وهناك في حيرة .. ولم تعد في يدي أي حلية أو وسيلة.

لتأتي أنت رجل من زمن جميل .. كنت أظن الوصول له مستحيل .. تحملني وتبحر بسفينتك .. لأدخل معك لعالمك .. عالم الجنون والحنان .. عالم الحب والأمان .. عالم لا يعرف معنى للحرمان .. عالم فيه أنا إمرأة وأنت كل الرجال.

فلا أرى الكون إلا بعيناك .. أتنفس أنفاسك .. أنعم بإحساسك .. وأتعلم ألحان العشق بين أحضانك.

رغم كل ما بيننا من مسافات وحدود .. رغم هذا العالم الغريب العنيد الحقود .. أصبحنا معاً ملوك هذا الكون والوجود.

يا رجل تتجمع كل العصور بعقله .. وتركع كل النسور لعزه .. ويرخص كل غالي من أجله .. وتتلاشى كل العيوب في خصاله.

فأصبح القرب منك الحياة لقلبي ووجداني .. والبعد عنك وفاتي ونهاية أماني.

.. أعشقك حتى نهاية عمري ومماتي ..

بلالا .. وأعداء النجاح

ياه على الحقد الدفين في قلب الناس.. يا ساتر يارب ما يصدقوا يلاقوا حد ناجح في مكانه.. يقوموا شيلنوه من مكانه.
اللهم لا أعتراض:(

بعد ما بلالا حقق نجاح ساحق.. بعد ما بقى فرد في كل عيلة.. زميل في كل مكتب.. طالب في كل كلية.. بعد ما بقينا كلنا بلالا.

مين فينا ما شافش بلالا..؟؟ مين فينا ماحسش ببلالا..؟؟ مين فينا ما مسكش صورة بلالا في ايده حتى على سبيل الفرجة ولو لمرة واحدة؟؟

بلالا اعداء نجاحه دمهم فار وعلقهم طار لما شافوا بلالا بنجاحه فشر كريمة مختار.. الراجل بقت صورته في كل بيوت مصر.. والكل بيتكلم عن بلالا بين مؤيد لبلالا ومعارض لبلالا.. بلالا بقى حديث الساعة في مصر.

فانات على الفيس بوك تلاقي.. جروبات على الفيس بوك موجود.. اليوتيوب بلالا مكتسح فيه.. بلالا بقى خلاص رجل الألفية الجديدة.. أوعو حد فيكم ما يعرفش مين بلالا والله أزعل.
ده كان يومين بس وصورته تنزل على الجنيه ويتحط تمثال له في رمسيس.. بس تقولوا ايه على اعداء النجاح

حمدي بلالا.. بعد ما رشحنا انه يبقى وزير الصحة لانه اهل للوزارة بجد.. راجل مجتهد فضل عريان على علب السجاير علشان مصر.. ولا اتهز من برد ولا حتى مطرة.. وهو رافع شعار.
.عريان عشان شعبك يا مصر.

وبعد ما الراجل الله يكرمه قال رأيه بمنتهى الديمقراطية.. ومش معنى انه شغال صورة على العلبة ان رأيه يتصادر بقى.. ده راجل محترم وله كلمته .. ده بلالا بقى حلم كل فتاة مدخنة في مصر.. طيب بزمتكم مين فيكم مايعرفش شكله.. قال ايه اول ما اقال رأيه المخالف لرأي اللي مشغله قاموا رفدوه عدل.
ربنا على الظالم والمفتري.

ويااااااعين امك يا بلالا.. هو كده دايما اللي يقول رأيه في البلد ديه يتقطع رزقه.. ليه بلالا تتشال صورته من على علب السجاير؟؟.. اجرم يعني لما حب يطمن الناس عليه؟؟.. اجرم لما حب يطمن كل فتاة معجبة بيه انه لسه عايش وتمام .


وشغاااااااااااااال يونيفيرسال؟؟


ده حتى حرام.. لما راجل كبير طول بعرض كده يترفد من شغله.. وتمسكوا مكانه عيل.. مافيش مانع اننا ندي فرصة للشباب بس برضو يا ناس حرام.. يتقطع عيش الراجل كده من غير سبب
بعد ما اتعرى عشانك يامصر.

وتجيبوا حتة عيل يمسك مكانه.. والله شكلها متكوسة والواد عنده واسطة.. وعلشان بلالا معندوش واسطة يعني؟؟
يقوم ده اللي يشتغل مكانه.. والنبي حرام

وزاتنا الجميلة بتاعة الصحة.. قالت هاتمشي الاول على مبدأ (ياروح ما بعدك روح).. وحطت صورة حمدي بلالا وهو تعبان يا ولداه وفي العنية المركزة وبيشم اكسوجين.. واهو تغير بدل الكولا برضو.

ولكن بلالا حقق نجاح كبير جدا مع المدخنين.. وبقى صديق كل مدخن.. حتى دلوقتي المدخنين عاملين مظاهرات لانهم مش قادرين يشوفوا علبة السجاير من غير صورة بلالا صديق كل مدخن.. ومحدش راضي ابدا ان نهاية بلالا تبقى على ايد عيل من دول احفاد بلالا.

اعداء النجاح عرفوا ان بلالا مرشح قوي لوزارة الصحة.. وانه حقق عدد مؤيدين فاق عدد المؤيدين من فئة (اختارناك).. جن جنونهم وابدتشن ابدتشن بلالا يبقى وزير.. وما طار بلالا وارتفع الا كما طار وقع.
وماكنش يومك يا بلالا يا اخويا. :((

قامت الوزارة بقى غيرت المبدأ ومشيوا على مبدأ (مافيش اغلى من الضنا).. وجابوا عيل صغير خد منصب بلالا.. وده مش تفضيل ولا تشريف.. ده تكليف من اجل شباب مصر.. لازم يعكننوا على ابوهم.. وبعد ما الكل صاحب بلالا.. وبعد ما كان بلالا في جيوب الشباب وشنط البنات.. بقى كل واحد ماشي وشايل عيل صغير في جيبه.

وانا من موقعي هذا ومن منبر فتافيت.. اقولها واضحة صريحة.. لن ينجحوا في مخططهم ولن يفقد بلالا شعبيته.. لان بلالا ده رمز وعلم من اعلام مصر.
وبسقوط بلالا هاتبقى الاهانة والاستهانة
بل هي المهانة .. وايييييييييييييييه

ومن هنا اقول لكل من وقف في طريق بلالا ونجاحه وخلى الوزارة تضيع منه.. العيل ده مش هايجيب نتيجة نييييفر .. وحتى لو غيرتم المبدأ تاني من (مافيش اغلى من الضنا) لمبدأ (اعز من الولد ولد الولد).
وحاطيتم رضيع حفيد لكل مدخن.. برضو بلالا هو المكتسح

مش عايزين مش عايزين .. يا بلالا يا مش شاربين
يا بلالا نام وارتاااح .. واحنا نرجع اللي راااح

ويا بلالا يا بلاش .. واحد غيره ماينفعنااااش

تعاطفك لوحده موش كفايا.. اتبرع ولو بتعليق

ساعات كده الوحي بينزل عليا .. وبقعد اكتب نكش فراخ.. ودية نكشة وفتوفتة منهم كتبتها من فترة كده.
واحب اعرف رأيكم فيها بجد.. اه صحيح الفتفوتة دية من وحي الخيال.. وملهاش على الواقع مكاااااان

** ** ** **

مرت ليالي طوال على جرح قلبي الغائر ... ولم يبقى لي سوى أشعار وذكرى لزمن غادر ... تذكرتك حبيبي ... تذكرت ليالي عشقنا ... تذكرت شدة شوقنا.

فآخذتني الذكرى وذهبت لمكان كان ملتقانا ... وصدمتني الدهشة وذهلت ... أهكذا كان هوانا؟؟؟

وجدتك هناك جالساً ... ويديك بلهفة تحتضن يداها ... وبعينيك نظرة أعرفها ... فلأعوام عينايا أحتضناها.
فكنت ترسم لي دوماً هنا عشاً فوق شجرة نراها ... وأنتما الآن تبتسما وتديرا عينيكما نحواها.

فآآآآآآآآآآه على عشي أصبح لها ... وصارت أحلامي ملكاً لها ... ونزفت دمعة على خدي بمرارة وحدي أزلتها.

وقتها تذكرت ... يوماً لي أتيت ... وكان يوم الوداع ... يومها أمامي بكيت ... وبدموعك شكيت ... احساسك بالضياع.

أقسمت يومها بشدة ... وبدموعك أكدت بعفة ... أن قلبك من بعدي محكم الغلق ... ومن تستطيع أن ترتقي لمكانتي عندك من بين الخلق ؟؟؟.

صدقتك أنا وحزنت ... على حباً لي أهديت ... واليوم ضاع مني ... رغم كل ما بذلت.

وأكملت دورك ببراعة ... وأنت محتمي بقناع الوداعة ... وأتهمت الزمن بالبشاعة ... فهو من فرق بيننا ... وهو من أهلك عشنا ... وهو من قتل حبنا.

يومها نزفت دمعة حارقة ... وكان جفني يتألم من علقم مزاقها ... واليوم يحترق من دمعة مثلها ... فالأمس دمعة حزن ووداع ... واليوم دمعة جرح وخداع.

وسمعت شخصاً بجواري ... يتحدث ... بعدما شاهد إنهياري ... يتجسد.

تلك سعيدة بسحر كلماته ... والأخرى شهيدة جراء طعناته ... وترى من الجديدة ... فهكذا هي حياته.!!!

ضحاياه كثيرات ... غير معدودات ... فهو دنس الأخلاق ... يبيح المحذورات ... يرسم لهذه عش ... ويخدع تلك ويغش ... وفي عرض الثالثة ينبش ... وهي نهاية واحدة ... نهاية باقي الأخريات.

فنظرت له في ذهول أهكذا هو يكون؟؟ لم يجيبني ورحل ... وذهبت أنا في سكون ... أبكي بجنون ... من جرح بقلبي بآلاف الجروح.

خيانة وخداع ... سذاجة وضياع ... كانوا لعمري حصيلة ... ولكنه عمر وقد ضاع.

اعتذار حار .. لعبد العال

طبعا انهارده اول يوم في الربع قرن بتاعي.. واول يوم في السنة الجديدة عليا.. واللي كلنا عرفنا انها بادية بزرقااااااان غريب.. عجيب .. شنيع .. مريع

خدوا بقى عندكم.. قومت الصبح من النوم.. لاقيت الدنيا ضالمة جدا.. انا اتعميت يا جدعان
يامامااااااااااااا انا اتعميت يا ماما.. انا كنت حاسة انها سنة زرقة من اولها.
دخلت ماما جري على صوت صويتي.. وقالت:
الهي يهبلك اكتر مانتي هبلة.. النور مقطوع يا هبلة هانم يارب الناس كلهم يقولوا البكري البكري وانا بكريتي هبلة اللهم لا اعتراض.

فرحت وانشحكت اني لسه بكامل نظري وانها مسئلة عامة وليست خاصة.
ويا حلولي انا لسه بشوف.
قومت احسس السرير ومنه على الحمام وتأقلمت مع الضلمة وفتحت الشبايك.. وبدأت الحيرة..
هو انا لو لبست والشباك مفتوح الناس هاتشوفني؟؟..طيب ولو لبست في الضلمة هاعرف الف الطرحة؟؟
وفضلت على كده حوالي 10 دقايق.
والموقف اتحسم لما لاقيت الدنيا فجأة بقت الوااان.
النور جه هييييييييييييييييييه

لبست ونزلت الشغل.. ولاقيت الجو زعابيب هوا بتراب اجاركم الله.. ايه اليوم ده.. ده بجد فقراير بقى (ومشوها فقراير علشان مزعلش منكم) ضربت نضارة الشمس علشان التراب.. ووقفت اخد تاكسي.. روحت الشغل.

وزميل جايب ليا بن عجب مستورد بقى وحاجة لوز.. وقولت هاضرب فنجان (الاستمورننج) القهوة الصباحي.. عملت القهوة وبعد ما غليت تماموز.. لاني ما بحبش الوش.
قامت الكنكة والله العظيم مقلوبة من غير ما حد يكلمها كلمة.. وادلقت على المكتب والاوراق وكيسة الكمبيوتر.. وكانت ايه هيصة بقى...
اقول لكم حاجة انا مش متفائلة :S

كبرت دماغي وقولت اكيد كل اللي بيحصل ده صدفة غير مقصودة.. وانا اللي مركزة اوي مع الايام.
كبري يا فتافيت يا عثل انتي دماغك.. وما تمسكيش على كل فتفوتة بقى.

فتحت المدونة وكنت لسه هارد على الناس.. وصعب عليا اوي اللي مش زعيم تامر دياب في محاولاته المستميتة في انه يكتب كومنت على فتوفتة امبارح.. وحسيت ان بركات السنة ما وقفتش عليا وامتدت للمدونات المجاورة .
ربنا يسامحني بقى.. بس هو انا ايه ذنبي بس؟؟

وبصيت لاقيت في بوست التدوينة السودا.. ومااقلكوش بقى تدوينة سودا من زرقان السنة اللي هاجم عليا.. احساس رائع محدش يقدر يحسه زي
اللهي ما يكتبه على حدا ابدتشن ابدتشن :(((

لاقيت في كومنت من اسامة عبد العال.. وحاطت لينك مهم عن التدوينة السودا.. قولت يا فرج الله يمكن قلبت بيضا ويبقى فيه امل.
دخلت اللينك والسنة الزرقة بتبان من قبلها بيومين.. وهي زرقة زرقة وكتاب الله مهو تمثيل وبحق وحقيقي.

دخلت لاقيته بيقول اني اتجلبت.. الفكرة اتلطشت مني من شخص مريض ونزلها على منتدى.. وطبعا وصلت تهزيق في المريض اللي لطش منه الفكرة.. حد زكي يقوللي طيب وانت ماالك اصلا؟
وده سؤال احي الاخ اللي سأله
لانه مهم فعلا وحيوي جدا في الفتفوتة
هارد بقى عليه..
وهاقول له.. مهو انا المريض ده.. قصدي المريضة اصل بعتز اوي بأنوثتي
نيهههههههههههههاااااي

انا دخلت في يوم من الايام على مدونة ستيتة لاقتها حاطة بوست بتعلن فيه عن التدوينة السودا .. واخدت الصورة وظبطها انا بشكل احلى.. وعملت بها موضوع على منتدى تابع للمؤسسة العربية للصحة النفسية.. وماحولتش اركز في مين صاحب الفكرة.. او اهدفها تحديدا.
انا اخدت الصورة ظبطها وعملت توبيك ابن حلال على المنتدى وكتبت فيه نفس مضمون كلام ستيتة بس باسلوبي انا.. في عاجة ديه؟؟؟

اللي حصل اني غيرت بشكل غير مقصود والله مضمون الفكرة (والغباء لما بينقح عندي مالوش حل ابدتشن ابدتشن)
ولاني محظوظة طول عمري والحظ بيجري ورايا جري.. وطبعا واخدين بالكم انتم من الحظ من غير ما اتكلم.. ده البوستات بتحكي لوحدها.. وقع التوبيك في ايد اسامة.
ويا دهية دقي بقى.. والتار ولا العار.. التار يا ولدي التار يا حبيصي

قام عامل هو كمان بوست هزق فيه المريض اللي نشل منه الفكرة وبوظها كده.
وانا مظلوم يا بيه .. يا بيه مظلوم :(

دخلت لاسامة.. واعتذرت.. وحكيت التفاصيل وهو ربنا يكرمه.. قلبه فشر بخيره الظاااااااازة.. وسامحني وقال حصل خير.. بس طبعا حقه اني اعتذر له على الملاء وعلى مدونتي شخصيا.
وايه السنة العجب اللي اول يوم فيها بوست اعتذار.. تفتكروا فيه امل في السنة دية؟
ده سؤال يطرح نفسه بشدة وبقوة وبعنف؟؟

::جناب السيد .. اسامة عبد العال::

اسفة جدا وحقك على راسي ويعلم ربنا ماقصدتش لا سرقة الفكرة ولا تحريفها.. بس اللي حصل كان بحسن نية تامة.
ده انا ياما اتعرض عليا سرقة الافكار .. وانا لايونكن ابدتشن نيفر ايفر جااااااااااااميه

سامحني والله ما كانش قصدي والنبي.. ويلا بقى اهي التدوينة السودا كانت سبب في معرفة بيضا ان شاء الله.
اكرر اسفي الشديد العميق .. لجناب سيادتك

وما تخدش في بالك من كلامي اللي فوق .. علشان لو زعلك مش فرحة بقى بوستات اعتذارات

وكل شوية بوست اعتذار لعبد العال..
خلاص يا معلم

صافي يا لبن .. حليب يا قشطة
وسودا يا تدوينة
عااااااااااا
؛)

واتاري اليوم بمبي.. مش ازرق

امبارح كان يوم غريب.. زهق + ملل + قرف.. واضربوا في الخلاط.. طلعوا امبارح .. كل ما حد يقوللي مالك؟؟ اصرخ في وشه يعني ايه مالي؟؟ بشد في شعري؟؟ ولا باكل صوبعي؟؟ ولا بمشي على راسي؟؟.. يعني ايه مالي.؟؟.. وانا فعلا مش فاهمة مالي.. واليوم الارزق بيان من اوله.


في الشغل مش طايقة اشوف حد ولا اسمع حد.. وكل اللي نصيبه رماه تحت ايدي امبارح كفرت كل سيئاته.. وبجد مشفقة جدا على المراهقين اللي جاوبت عليهم امبارح.. تهزيق تلاقي وتوبيخ تلاقي احباط تلاقي.. والنبي صعبانين عليا.. بس اهو نصيبهم بقى.

عندي في المكتب كياس كابتشينو.. بنكهات كتير.. لوز بندق فانليا.. من كل نوع كيس.. شغلت البويلر وغليت الماية.. وفتحت اول كيس ادلق كله على الارض.. يلا فدايا مش مهم.. جبت التاني وفتحته براحه علشان ما يشوفش ذل اخوه وهو بيتكنس مع التراب وبدل ما يتحط باحترام في مج مالي مركزه.. يتحط في الجاروف ويترمي في باسكت الزبالة.. جبت المقص.. واخدت الكيس براحة وانا بسمي عليه وناقص اديله مخدر.. وحطيته على المكتب.. واستأذنت سيادته في اني اشعلقه براحه.. حرصا على محتواياته الكريمة من الانزلاق على المكتب ومنها على الارض.. ثم الحدف في الباسكت.. وبحرص شديد قصيت طرفه من فوق.. وجبت المج براحة وهدوء.. وفضيت فيه الكيس وانا بدعي ربنا انه ويوفقني في المهمة بدون خساير.. والحمد لله تم التفريغ بنجاح.

جبت البويلر وبراحة حطيت الماية اللي بتغلي في المج.. ولا اتهزيت من صراخ فتافيت الكابتشينو من سخونة الماية.. وبمنتهى القسوة جبت المعلقة وهاتك يا ضرب في الماية.. علشان انهي المهمة بسرعة.. وبعد ما خلصت التقليب.. بشيل المعلقة بحنكة شديدة مهو انا استاذة تقليب.. ومع خروج اخر مليمتر من طرف المعلقة قام الموبايل رانن.
اتخضيت وبدل ما اشيل المعلقة قلبت المج. :((
وادلق بعد ما كنت اهبت نفسي اني خلاص هاشرب الكابتشينو.

بصيت للمج وهو مرمي على الارض بينزف الكابتشينو منه.. وانا عينيا كلها حزن واسى.. على مصير الكيس التاني.. وانه بدل ما يتكنس بالمقشة زي اللي قبله.. اتمسح بالمساحة.. وتعدد الاسباب والنهاية واحدة.. رمي الكابتشينو.

وفجأة بارقة امل ولعت قصادي لما عيني وقعت على الكيس التالت اللي باقي.. واخدته وهو عمال يتوسل ليا بلاش والنبي.. بلاش انهارده.. بلاش هو انتي ماعنكيش اخوات كياس صغنين.. وانا ببص له وعاملة نفسي مش سامعة.. وبصاتي كلها سادية ولا انسانية.
وعقلي الباطن بيقوللي لازم تشرب.

وقررت اني اسكت الكيس للابد وجبت المقص وقصيت لسانه قصدي طرفه.. وفتحت الكيس بسرعة قبل ما جمعيات حقوق الكياس تسمع بالخبر.. وفضيت الكيس بسرعة البرق في مج تاني وفي ثانية واحدة كنت صابة الماية عليه.. ومقلباه .. واخيرا المج فيه كابتشبنو .
الله اكبر .. والنصر لنا.




واخدت المج على بقي عدل وانا بضحك ضحكات شريرة لاني خلصت على عيلة الكابتشينو نهائيا من المكتب.. ومع اول شفطة
.. يع يع يع يع يع يع ..
ده كابتشينو ولا مرقة دجاج..يمكن مرقة دجاج وعاملة نفسها كابتشينو؟؟
ايه طعمه ده يا ساتر اظاهر الكيس عمل عملية انتحارية وفجر نفسه في المج.. وجبت جثة الكيس اللي فارق الحياة.. وقولت اقرا المكونات لايكون مرقة دجاج بجد..
ولاقيته اكسبيرد من اسبوعين..
ده حظ ايه الهباب والله مانا شاربة حاجة.. وقومت دلقته في حوض الحمام.. مهو يوم ازرق اصلا.

وطلعت من المكتب وانا كلي ملل وزهق واحباط.. حتى الكابتشينو واقف قصاد انهارده.. طلعت اخد تاكسي .. علشان اروح.. وكل ما اوقف تاكسي ما يرضاش يقف.. الله ديه مؤمرة بقى.. 18 تاكسي رافعين يفطة لا لركوب فتافيتو ذابحت كياس الكابتشينو.. وفضلت ساعة الا ربع.. لحد ما تاكسي صعبت عليه.. وحس بيا وواقف اني اركب بس بضعف الاجرة.. مهو احتمال يترطد من نقابة ساقي التاكسي بعدها.. لانه نقض معاهدة لا لركوب فتافيت.. وطلع مستغل واخد ضعف الاجرة.. يلا مش مهو المهم اروح بقى واخلص.. من اليوم الازرق ده.

روحت البيت ودخلت المطبخ جعانة.. ماما واقفة في المطبخ.. وسألتها عملتي اكل ايه؟؟ قالت محشي كرنب.. ويا حلولي يا حلولي هاكل محشي بالعند في الكابتشينو.. صحيح ربنا بيعوض الصابرين خير.. وانا صبرت كتير انهارده.

وبدأت رحلت البحث عن المحشي.. يلهووووووي مافيش ولا حتى صابع تايه في اي حلة.. طيب في طبق.. مافيش ....
:((((
قولت يمكن عندنا نقص في الحلل والطباق.. اكيد ماما شايلة المحشي في الكوبيات عادي بقى.. الجيش بيقولك اتصرف.. مسكت كوبيات البيت كوبية كوبية.. محدش شاف صابع محشي كرنب تايه يا ولاد الكوبيات والمجات؟؟.. ولا كوبية حتى شمت رحته في المطبخ انهارده..

طلعت زي المجنونة لماما فييييييييييييييين المحشي يا ماما؟؟.. قالت في التلاجة ياروحي..
تلاجة!!!!! S:
تلاجة يعععع بارد.. مش مهم والله لو في الفريزر هاكله يعني هاكله..
دخلت لاقيت حلة مالية مركزها وواخدة نص رف لوحدها..
عينيا لمعت ورقي جري .. ورفعت غطى الحلة.. وانا في قمة اشتياقي للمحشي والله له وحشة وقلبي بيرقص من الفرحة.. وفجأة!!!!! O:
قلبي انقبض وعينيا دمعت وريقي نشف.. المحشي ني ومش مستوي.. انن ااااااااان تششششششششششش


يا مامااااااااا .. فين المحشي المستوي ..
مستوي ايه ياابت هو انا قولت اني سويت محشي انا قولت عملت محشي..
لا والنبي على اساس فيه فرق بين عملتي وسوتي؟؟..
ماما وصرخات احتجاج وعلامات الغضب بتنط من وشها...
هو انا بمية ايد احشي واسوي في يوم واحد.. ولا ماكنش الفليبينية اللي جايلكو هدية في اكتوبر.. اتنيلي كلي ساندوتش جبنة وخيارة..
يعني مافيش محشي انهاردة..؟؟ ودموع الحسرة في عيوني والالم يمزق قلبيني
لا مافيش خليكي من جيل المستقبل وخلي عندك امل في بكره.. بكره المحشي والنهاردة جبنة..
يلا اهو اي حاجة وخلاص..

واستسلمت للامر الواقع واخدت الاكل وقعدت وفتحت التليفويون على روتانا موسيقى علشان اتفرج على برايم برنامج المانجير.. ولاقيت ابراهيم بتع مصر خسر بفارق 0.2.. يالهوووووي على الفقر يعني فاتحة على النتيجة الهباب دية؟؟ ايه الفقر ده.. مش بقولكوا يوم ازرق من اوله.اووووووووووف..

قومت اخدت المدعو ساندوتش الجبنة وانيست وحدته الخيارة و فتحت الكمبيوتر.. ولسه بدخل باص ورد المدونة.. شميت ريحة شياط.
يلهوووووووي المدونة ولعت.. يا ماما الحقي المدونة ولعت وريحة الشياط جايبة من اول لوحة التحكم بتاعتها..
ماما ونظرة استهزاء شريرة .. اقولك ريحة الشياط جاية منين وما تزعليش؟؟..

بصيت لماما وعينيا بدق شرار.. وانيابي طلعت فشر دراكولا.. وحاجب نازل البادروم وحاجب متشعلق فوق السطوح.. وريحة الشياط بتزيد اكتر واكتر.. وماما مش عارفة تبلع ريقها ونظرات الاستهزاء اتقلبت خوف.. وفجأة لاقتها بترفع ايديها وبتزلها بسرعة عند قفايا..
(قولت بس هاتلب قفا عجب دلوقتي)..
وقامة شادة فيشة الكمبيوتر بسرعة.!!!
واتاري اللي ولع الكمبيوتر..
وماما بتصرخ فيا ..
الفيشة ولعت يا موكوسة وانتي ولا حاسة قومي افصلي الكهربا بسرعة..
قومت جري افصل الكهربا.. لاقيت الموبيل بيرن وفيه رسالة.. طنشت الموبايل طبعا يعني الرسالة ولا الشقة اللي هتولع وهانموت منفجريين فيها.

وروحت اشيل الفيشة وانا بطلع على كرسي الانتريه وبشد كهربة البيت.. ونازلة من على الكرسي قومت..
مقلوبة على ضهري.. ووقع مني ساندوتش الجبنة والخيارة طارت تحت الكرسي..
ده ايه الفقر ده .. ده يوم غريب بجد.. كل حاجة واقفة قصادي.. ده ايه اليوم الازرق ده!!!!!!!


كابتشينو يدلق ويتبعتر ويطلع اكسبيرد .. ومافيش تاكسي ولما ربنا يكرمني يبقى بعد ساعة وكمان بضعف الاجرة.. مافيش اكل وقال المحشي بكره وحتى الجبنة والخيارة راحوا في الوباااااااا مع هنادي..ابراهيم خسر في البرنامج.. الكمبيوتر ولع كمااااان.. لا انهارده اكيد يوم مشؤم بجد.. ازرق ازرق يعني مش تهريج.

وانا عمالة اتذكر احداث اليوم المؤسفة.. لاقيت صوت عالي وخير اللهم اجعله خير.. حاجة بتنور وتطفي في ظل الظلام الدامس اللي خيم على بيتنا.. واتاري الموبايل بيرن برسالة تانية..

حاولت اتفقد اثار الضوء المنبعث من الموبايل علشان اوصله.. والحمد لله وصلت من غير خساير جديدة.. فتحت الموبايل ولاقيت الرسالة دية..
(كان يوم اسود يوم ماجيت ماما وبابا ولعوا في البيت.. كل سنة وانتي طيبة وعقبال ربع قرن جديد.)




وقال ايه عيد ميلادي انهارده.. ورديت على الرسالة وقولت.. وانتي الصادقة
( كان يوم ازرق يوم ما جيت الكمبيوتر ولع في البيت. )

رسمي نظمي فهمي تميت ربع قرن خلاص وبالاوراق الرسمية.. وبقى عندي 25 سنة تنحط سنة.. على فكرة انا مواليد شهر ديسمبر بس هم ثبتوني في فبراير.

وامنت انه فقراير مش فبراير .. اكيد العيب في فبراير مش في عيد ميلادي.. صح ولا حد عنده رأي تاني.
يلا قولولي كل سنة .. وانتي طيبة .. وعيد ميلاد سعيد.
واتري اليوم كان بمبي بمبي وانا اللي كان عندي عمى الوان وظلمته وفكراه ازرق
نيهههههههااااااااي.
:)))))

فتوفتة استثنائية.. عن غزة الأبية

كنت على مدونة سوتايتة .. امبارح ولاقتها عاملة اعلان ان انهارده.. يوم التودينة السوداء.. واصلا انا مدونتي لوحدها سوده ومضلمة.. من غير لا يوم تدوينة سوداء ولا حاجة.. هي سودة كدا خلقة ربنا.
وطبعا كان لازم اشارك في يوم التدوينة السوداء وبغض النظر عن ان اصلا السواد واخد حده في مدونتي وحياتي وعيشتي .. كمسلمة عربية مصرية.. ولا حول ولا قوة الا بالله .
يعني هايجي منين اصلا لون تاني غير الاسود .

وانا كنت كدا كدا هاكتب بوست احكي فيه اللي حصل في غزة لما اول فريق لنا دخل القطاع.. وشاف هناك اللي القنوات الاخبارية استحت (حياء العذراء يوم دخلتها) انها تعرضه.. وكأن اللي بس مسموح انه يتعرض هو كام شهيد وكما جثة وكام بيت اتهد.. ودمار يا غزة دمار.. وخلونا نحس ان غزة خلاص كدا بتحتضر.. لكن الحقيقي ان غزة تمرض ولا تموت وبالعند في كل اليهود.

المقاومة عدد افرادها يزيد عن 10000 فرد.. وده طبعا قبل المحرقة لان بعد المحرقة بقت غزة كلها مقاومة.. وده اول نصر لغزة.. قبل الحرب كانت المقاومة 10000 فرد بعدها بقت مليون ونص فرد.
اللي دخل الحرب ونزلوا فعلا ارض القتال.. 300 فرد من المجاهدين.. استشهد منهم 54.. وخلي خيالكم كدا يسبح ويغطس ويشتغل معلش يعني واقروا الكلمتين دول..

(.. القوات التي لا تقهر (قال لا تقهر قال عاااااااا) اللي دخلت الحرب في غزة.. مات منها 210 خنزير.. ومالناش دعوة باحصائيات لا الحظيرة ولا العبرية.. هتقولوا 210 عرفتي منين.. لا فتحت المندل ولا ضربت الودع ولا قريت فنجان.. ده اللي نشرته هآرتس اهم الصحف العبرية الاسرائيلية على الاطلاق.. وقالت ازاي يا بت يا ليفني تقوللي اللي ماتوا 10 بس.. وفيه يا موكوسة 210 اسرة منكوبة بموت خنزير منها في المحرقة في ارض القتال ورافعين قضايا على الحكومة.)

خيالكم اشتغل.. لما يدخل بس 300 مجاهد ارض القتال ويستشهد منهم بس 54.. ويموت من الخنازير 210 خنزير غير اللي اتنيلوا على عين اللي جابوهم واتجرحوا.. لا وايه قوات لا تقهر.. امل لو كان نزل ارض القتال العشر الاف مجاهد.. كان ايه اللي حصل.. احنا بعون الله وبــ 300 مجاهد بس.. خرجنا الخنازير من غزة.. وهم عندهم 210 خنزير مفقود.. وقال ايه يقولك غزة انهزمت.. لا يا حدق اللي انهزم ده عقلك ودماغك .. وشيل شوية الصدى اللي على مخ واستعمله.. حرام عليك بقى ربنا مادكش المخ علشان يتحط كدا عيرة ويصدي منك.

اوعوا اسمع حد يقوللي 1300 شهيد مدني.. لان خلال 23 يوم بتوع المحرقة صحيح استشهد 1300 مواطن.. بس اتولد بعون الله 4000 مواطن.. يعني ربنا بياخد من هنا ويعوض من هنا.. امال انتم فاكريين ايه.. ده الست الغزاوية بتجاهد برضو.. وبتخلف مجاهدين صغيرين.. وقصاد كل شهيد الست الغزاوية ولدت 4 مجاهدين جداد.. امنت بك يارب.

وبعدين الستات اللي هناك.. مش ستات زينا كدا.. هنا الست من دول ابنها يدخل الجيش (وجيش مش جهادية يعني) تحزن وتولول وتقول يا عين امك يا ابني داخل الجيش يا صغير.. هناك بقى.. مافيش كدا.. هناك الست بتجاهد بولادها.. اوعدنا يارب.

هناك خنساء فلسطين (الست ام نضال).. عايشة في غزة.. الست دية اسطورة بجد.. طلعت جوزها و3 شباب زي الورد من ولادها للجهاد.. وايه مش في المحرقة.. لا ديه يجي ابنها و تلبسه الحزم الناسف بايديها.. وتزفه للشهادة.. ولما سألنها بيجيلك قلب.. قالت وادعوا لهم ما استطعتم من قوة.. والقوة اللي اعدتها للجهاد هم ولادي.. ولسه عندها ولدين وناوية تزفهم برضو للشهادة.. شوفتوا الستات يا رجالة.. شوفتوا الست اللي بالف راجل.. مش بعيد عنكم كدا انصاف رجال ورجاله عندها يادوب اشتباه في رجولة.

اخدكم بقى جولة في حي الزيتونة.. هناك فيه عيلة كانت موجودة اسمها عيلة السموني.. العيلة دية ابيدت بدم بارد (أي والله بارد تلج يا ناس) الخنازير لموا كل العيلة ديه وهم اكتر من 50 فرد في اوضة في بيت اسرة منهم.. وضربوا عليهم النار تلت ساعة من كل الاتجاهات وبكل انواع القذائف.. وليه وعلشان ايه وبتاع ايه واشمعنا السموني بذات؟؟.. ماحدش عارف.

الاوضة بقت بركة دم.. واللي استشهد استشهد وارتاح واللي اتجرح فضل ينزف 4 ايام بلياليهم لحد ما لحق اللي قبله على الجنة.. طفلين وشاب استخبوا في دولاب في الاوضة (وربك كريم ولسه لهم عمر يعيشوا) نجيوا من الموت الالزامي ده.. بس دول طفلين عمرهم سنتين و3 سنين عاشوا ازاي 4 ايام من غير لا اكل ولا شرب وسط بركة الدم.

اللي حصل بقى ايه..الشاب اللي كان معاهم وعمره 16 سنة.. خلاهم في الدولاب علشان ما يشفوش بركة الدم دية.. وربك كريم كان فيه كياس مكرونة في الاوضة (مكرونة ناية ناشفة من اللي بنشتريها ونسلوقها ونحط عليها صلصة علشان تنفع تتاكل) وكان من الضرب المواسير بتاعة المية انفجرت وبقت بتنقط.. الشاب يطلع ايده يلم شوية مكرونة ناشة ويفضل معلق ايده تحت نقط المية.. لحد ما المكرونة تطرى شوية ويأكل العيال.. واااااااااااه يا وجع قلبي.. واحنا هنا بنتنك على المكرونة بصلصة بيضا ولا حمرا (والنبى حمرا بجد)

نطلع بقى على الشمال.. هناك كان قبل القذف بيوم فيه لمة وقاعدة في بيت اسرة هناك.. الاسرة دية عبارة عن 9 ولاد وبنوتة عندها سنة و3شهور.. اسمها شهد وهي شهد مكرر والله.. وكانت العيلة هناك متجمعة.. ويوم القذف نزلت قنبلة على البيت.. وشوف الجباروت بقى.. البيت يولع والناس تولع والبيت من بره ولا تلاقي فيه خدش.. تكنولوجيا القتل بقى.. قتل للقتل وبس (شوفتوا الانسانية بضربوا قنابل تموت الناس وتسيب البيوت هيكل)

المهم العيلة ولعت واتحرقت ومات لدرجة ان الاب من شدة الانفجار (اللي ما سبش اثر على جدران البيت) مخه طلع من الجمجمة ولزق في الحيطة.. ونجي منها شاب عمره ما يوصلش 18 سنة.. قام جايب عربية نص نقل ولم عليها الجثث وحط امه اللي محروقة وبين الحياة والموت.. وخدهم وطلع على الطريق.. قاموا ضاربين عليه نار.. والعربية ولعت.. خد امه ونزل جاب عربية كارو.. وحط الجثث وامه فوقيهم وطلع تاني على الطريق.. قاموا موقفينه ويا تبسهم هنا يا تموت معاهم.. ياناس طيب اخد امي المحروقة.. ودول لا بيحسوا ولا بيسمعوا ولا حياة لمن تنادي.

المهم ان الخنازير دول بيخافوا من الضلمة.. الدنيا ضلمة شوية قاموا بيتك بيتك على الدبابات.. قام الشاب ده خد امه في غفلة من الخنازير.. وشالها على ضهره اكتر من 7 ك مشي على رجله.. علشان يوصل للمستشفى.. وبعد وقف اطلاق النار قدر يدخل يجيب الجثث.. ولاقى شهد البنوتة الجميلة.. الكلاب وكلة نصها التحتاني.. وفاضل نصها الفوقاني وعضم النص اللي تحت.. ولاني بخاف عليكم.. مارضتش انزل صورها في البيت وهي بترقص وبتلعب وصورها وهي متاكل نصها.. واشوف كل الكلاب الضالة بتنهش فيكم يا ولاد (التييييييييييييييت) .. ياللي واقفين بتتفرجوا ولسه محلك سر.

امه بقى اسمها صباح.. عندها حروق من نوع غريب.. الحروق ما بتلمش وبتزيد كل يوم.. تركيا ربنا يكرمها قالت هاتخدها تعالجها في اكبر مستشفيات تركيا للحروق.. قوم ايه بقى صباح تتمنع من الخروج من غزة والعبور من أي معبر.. ليه وعلشان ايه وبتاع ايه وفي شرع مين ده؟؟.. ولا حد يعرف.. ويمهل ولا يهمل.

اه نسيت اقولكم حاجة القنبلة اللي وقعت على البيت دية.. لسه ليومنا هذا وانا بكتب البوست ده.. قابلة للاشتعال.. ومع اقل احتكاك جنبها بتولع تاني.. واشوفكم مولعين يا ولاد (التييييييييييت) ياللي هاين عليكم اللي بيحصل هناك ده.. وواقفين ساكتين.. اللهي اشوفكم ساكتين ساكتة الموت وارتاح منكم بقى.

معلش عارفة ان البوست طول.. بس لازم احكي كل حاجة.. تعالوا بقى نتكلم عن الشخصية الفلسطينية واللي يزور ويشوف بعينه .. غير اللي يسمع طبعا.. ناس قمة في الذوق والادب والايمان والتماسك والكرم ( تخيلوا ايوة كرم) ناس عايشة في خيم.. ولما تدخل عندهم يفضل بوقك يلعب من شرب واكل وتمر وشاي وقهوة.. طول مانت قاعد.. ولما الجلسة تخلص.. يقوم راجل واخدك على افخر مطعم في غزة (اه لسه فيها مطاعم وفاخرة كمان مش بقولكم تمرض ولا تموت افهم بقى واحفظ).. ويعزمك على الغدى او العشى.. ولما يخلص الاكل يقولك سامحني على التقصير.. وياترى ايه التقصير؟؟.. قال ايه انه عزمك بره بيته في المطعم الفاخر ده!!..

فتفوتة (معلومة) صغيرة... انبوبة الغاز هناك تمنها 120 شيكل .. تخيل تمن بقى وجبة غدى تكفي 8 اشخاص في مطعم فاخر تكلف الشخص كام لما الغاز بس تكلفته 120 شيكل.. ويقولك تقصير... وشي منكم في الارض يا اهل غزة ياللي علمتونا العزة والكرامة.

اخر حاجة وفتفوتة مقارنة صغيرة كدا بس.. على معبر رفح في مصر اتسرقت نضارة واحدة من فريقنا بمجرد خلعها لها وحطها جنبها علشان تمسح عنيها.. في غزة بقى سيب شانطة ملاينة فلوس ودهب والماظ وياقوت ومرجان.. اقولك (سيب مغارة علي بابا كلها في مكان).. انشالله شهر وتعالى هتلاقيها مكانها بحطة ايديك. اي والله وبحق وحقيق ومهو تمثيل

على معبر مصر رسوم الخروج من المعبر لغزة للفرد 91 جنيه (على اساس انك رايح كوكي بارك).. روسوم الدخول من غزة لمصر 41 جنيه (على اساس انك داخل الجنة يا خي).

على معبر مصر تلف حوالين نفسك علشان تعرف تدخل وتمضي ورقك.. على معبر فلسطين قاعد ملك زمانك والكل بيخدمك ويمضي لك ورقك وانت قاعد بتشرب قهوة (اللي كل ما تخلص تتجدد تاني توماتيكو توماتيكو) وفي الاخر علم فلسطين وكوفية فلسطين ودبوس على شكل علم فلسطين هدية لك علشان داخل او خارج من فلسطين.

والف مبروك عليكم الشهادة يا شهداء غزة.. ومبروك عليكم الكرامة والنصر يا اهل غزة.. ومبروك عليكم جنود ربنا اللي كانت معاكم في ارض المعركة.. ومن على لسان مجاهد قابله فريقنا هناك.. انه لما ضرب قنبلة.. في دبابة يهودية وكانت المفرض تفرتكه معاهم.. اتنطر بعيد عن مكان الانفجار والحجر اللي اتنطر معاه .. سامعه بوادنه بيسبح وبيقول يارب سلم.
سلم يارب .. يارب سلم.. وارحمنا من انصاف الرجال اللي عايشة معانا ومعيشانا في شرنقة الذل والاهانة والمهانة.
يارب رجع لنا صلاح الدين .. واحنا معاه مجاهدين.. يارب ده احنا ليه مشتاقين.
يارب اميييييييين.