09 مايو 2012

تخاريف،، ملخبطة ومشخبطة (1)

مج نسكافيه،،!



واحد كان عنده مـج،، ما بيعرفش يشرب في غيره نسكافيه،، الفكرة مش في شكل المج ولا خامته،، ولا حتى في كونه غالي أو رخيص،، الفكرة في علاقته بالمج ده،، بقي مرتبط بكل حالة مرت عليه وشرب فيها نسكافيه،، لحظات تركيز،، لحظات حزن،، لحظات سعادة،، وكتير لحظات روقان،، حتى إن النسكافيه جواه بقى له طعم وريحة مميزة أحلى بكتير من العادي بتاعه،، وما لاقهاش في أي مج أو فنجان تاني،، جرب يشرب فيه نسكافيه،،!

مرة وهو متنرفز،، رزع المج ده على مكتبه فتشــرخ،، زعل أوي عليه ومسكه بحزن بس لاقى الشرخ ده مش بالعمق اللي يمنعه من استخدامه،، فبقى بيحافظ عليه أوي من أي خبطة أو شرخ تاني ممكن يكسره،، لكن مع الوقت وكتر الاستخدام،، ولأن المج فضل متمسك بقوته وصلابته،، صاحبنا ده نسي إنه مشروخ بسببه،، وفي مرة وفي وسط عصبيته،، رزع المج على المكتب بتاعه،، وأتفاجئ إنه لاقاه بيتكسر قصاد عينه،،،!


وقتها بس فاق وأفتكر إنه نسي الشرخ القديم،، كان النسكافيه غرق المكان وملى الدنيا بريحته المميزة اللي اكتسبها من المج،، واللي ضاعت هي كمان معاه للأبد،،
!



هناك 7 تعليقات:

  1. أزال المؤلف هذا التعليق.

    ردحذف
  2. و يظل الشرخ القديم باقي رغم الايام و السنين التي لا تعالج انما تزيد الشرخ عمقا
    بوست جميل و عميق

    ردحذف
  3. مصطفى سيف الدين

    بحس إن مش بس الكسر هو اللي بيفسد الحاجة
    فيه شروخ أصلا بتكون أبقى من الكسر بكتير،، ومؤلمة أكتر
    لأن الكسر ممكن تلزقه،، لكن الشرخ مالوش حل

    نورتني يا دكترة :)
    وبعض ما عندكم يعني بقى وكده ^_^

    ردحذف
  4. لبنى أحمد نور

    اهو أنتي على فكرة ^_^

    ردحذف
  5. خليتيني اتاثر اوى على فكرة كان المج دا انسان بيتكسر قدام عينيا !

    تسلم ايديكي

    ردحذف
  6. EMA EMA

    مهو كلنا جوانا مج،،،
    وأكيد فــ يوم كسرنا مج

    نورتي :)

    ردحذف

خلل براحتك من غير انتظار .. فتافيت أصلاً بتحب الخيار