20 مايو 2012

ربنـــا مــوجــود!


كنت خلصت من الملحدين وحواراتهم،،
بس وقعوا فـ طريقي تاني،،!
الكلام بيتعاد،، فين ربنا،، ربنا إيه،، ربنا إزاي؟!
ولما بفضل أفهمهم ما بيفهموش،،،
إني بحس وجود ربنا،،
بحــسه بجد مش مجازا،، ولا كناية،،!


بحس ربنا أوي لما وقت السحر،، أبص للسما وأكلمه
أشكي له،، أدعي،، أسبح،، أو أسكت خالص وهو حاسس بيا
بحس بابتسامة السما اللي كتير عمرهم ما شافوها

بحس ربنا أوي لما بكون في عز حزني،،، ونفسي في طبطبة
وألاقي قلبي بيطبطب عليه،، يبطل عياط ويحس بسكينة
حتى صوت نبضه وقتها بيختلف،،، لما ربنا بيطبطب عليا

بحس ربنا أوي وقت الزنقة،، والتوهة
لما أتوه وأتحير،، وألاقي نفسي في متاهة لوحدي
بلاقي أيد ربنا،، واخداني لطريق مفكرتش فيه
ولا عمره خطر على بالي،، ودايما بيكون هو النجاة

بحس ربنا أوي،،، فـ بسمة رضيع نايم
في أمل جوه عيون عاجز،، في نظرة رضا فـ عيون محتاج
بحسه في يقيني بالرحمة،، وسط عالم متوحش ظالم

بحس ربنا أوي،، فـ رسايله ليــا
رسايل بتيجي في وقتها،، تحسم لي أمــور جــلل
رسالة مستحيل تيجي بالشكل ده،، غير من ربنا

حسيت ربنا أوي،، وقت ما شوفت الموت بعيني
وربنا بعدني عنه،،، وبعده عني عشان مش ميعادي
مع إن كل النظريات وقتها،، كانت بتقول إني لازم أموت
مافيش سبب للنجــاة،، ولا فيه أداة للانقـــاذ
محدش شاف حاجة ولا فهم إزاي،، فضلت عايشة؟!
بس أنا فضلت عايشة،، بـس عشــان
ربنـــا موجــود! 

هناك 4 تعليقات:

  1. فتفوته واحشتي

    كيف احوالك
    طبعا ربنا موجود بدليل وجودنا

    ردحذف
  2. أزيك يا فتافيت

    (:

    ربنا موجود

    لو محسهوش بقلبه مهما كلمتي هذا الشخص مش هيفهم

    ردحذف
  3. على فكرة البعض بيقول كلمة موجود غلط
    لأن موجود اسم مفعول و بالتالي لو قلنا موجود فهو يقع عليه فعل الفاعل و يجعل هناك من أوجده
    لذلك موجود ليست من اسماء الله الحسنى
    انا مش باتنطع بس دي معلومة علشان لو دخلتي في جدال تاني معاهم و قالولك كده

    ربنا في قلوبنا بس للاسف كتر الذنوب بتعمل طبقة سودا بتخلينا منشوفش نوره اللي جوانا

    ردحذف

خلل براحتك من غير انتظار .. فتافيت أصلاً بتحب الخيار