06 يوليو 2011

صــرخــة،، شهيــــد!!!

..........


من وسط طاقة فـ السما
على مصــر،، طــل الشهيـــد
كان بين ملايكة بيحكيلهم،، عن دمه
اللي صنع لبلاده،، النصـر المجيــد
عن شعب الأحرار،، عن شعبــه
اللي ما يتسجن،، بس بسلاسل الفقــر
سلسلوه،، في سجــن العبيـــد

لكن فجــأة،، وشه اتخطف
ومن اللي شافه،، قلبه اتحسـر
لما شاف على أرضها،، غصن الزيتون
أســود،، نشف،، قســي،،
أتحــول حجــــر!!

بص بسرعة على ثـــورته
اللي فداهــا،، ضحى بعمــره
بــروحه،، بكل دنيتــــه

لاقاهــا،، على قبــره
بتوب أسود،، تصرخ،، تــنوح
بقت خلاص من بعـــده
لا ضهــر،، لا سنــد،، ولا حــد
على صــدره،، تبكي،، تبـــوح
كان فاكر إن مليــون من بعده
هايبقوا،، حماهــا،، وسندهــا
لكن في النــاس خـاب ظنه
والكل فــ جراحــها،، فاتهــا
لطريــق،، المتــــاهة،،
والمــذلة،، تــروح!!


بــكى ودموعه الطــاهرة
نــورت فوق روس النجــوم،، تيجــان
زعــق بصــوت ملياه الحســرة
إيه اللي حصل؟؟،، إيه اللي جرى؟؟
أهوه ده اللي ما كان أبداً،، فــ الحسبــان
بعد ما كان دمي،، مســك وعنبـر
مبخريــن الميدان،، يبعــوه وياخدوا التمن
ويتحول في لحظة،، مجرد دخـــان؟!

وشعب مصـــر،، الحـــرة
يــرجع بسرعة،، لورا ويبقى وسط
شلالات الفســاد،، غرقـــان!!
فين الديمقراطية،، فين الجماعة
فين الحزب،، فين الإئتلافــات
فين البــلد،، فين الوحـــدة؟؟
طيب فين راح صوت الجــرس
اللي كــان ويــا الآذان؟

فين مصر اللي حلمت بيها
توب،، يستر كل من نــام
ضهــره مكشــوف،، عريــــان؟
فين الحريــة اللي موت عشانها
عشان تبقى اليــــوم مرسى
لكل تايــه فــ البحور حيـــران؟
فين حلم،، المجد والفخر والعـــزة
فين السياط الي بأيدينــا،، جلدت
كل ظـــالــم جبــــان؟؟!!

طب لمين أتباعت الثــورة؟
اللي كانت دفا،، فـ قلب كل فقير بردان؟
ليــه يا مصر،، فوتيهم سرقوا الفرحــة
وســرقوا من دنيتـــك كل الألوان؟
ليـه سبتيهم يبدلوهالــك طــرحة
والأسود كسى عــ القلوب بمر الهوان؟!


فين الشداد اللي اسقطوا الباطل؟
فين الولاد اللي عدلوا جواكي المايل؟
طيب فين راح حــق القتيــل؟؟
ولا خلاص يا مصـر،، برأتي القاتل؟؟!

يعني خلاص دمي بقى،، كومة رمــاد؟
تطيــر بنفخة نفس،، مع الطير الحزين؟!!
يعني ما فيــش فايــدة فــ الفســـاد؟
ده حتى الميدان قسموه بالسلاح،، زنازين!!
آه يا خســرتك يا دمي،،
آه يا خســرتك يا بلد!!
فبكــت الملايكة حواليه،،
من مر الآنين!

قالوله،، كل مشكلة خلقها ربك
سخرلها آلاف الحلــول،،!
بس أنت صلي على النبي،،
ركــز،، كده وفكــر!
رد عليهم بدون تفكيــر،،
من بكــره أنا نــازل للميــدان
برسالة الحــرية،، رســـول!!

وهاجول في كل الشــوارع
الحواري،، البيـــوت
أصحي فــ شعب،، نسي حقه
نسي نفســه،، نسي مين اللي هانه
ومين اللي بــاع فــ يوم دمــه
وأدق من تاني للثورة،، طبــول!!

وأصرخ بعـــلو صــــوتي
أصحي يا مصر،، أصحى يلا بسرعة
أصحي،، قبل ما تفوقي متأخــرة
وتلاقي نفسك،، مملكــــة
وحاكمها الفلــــول!!


6-7-2011

هناك 6 تعليقات:

  1. أخي الشهيد .. أنت أيضاً ..
    بإمكانك أن تبدأ المعركة من جديد
    و لكن هذه المرة ضع نصب عينيك أن تنتصر
    و لا تستسلم لهزائم التافهين من حولك ..
    اجعل الأمل بالنصر العظيم هدفا لك ..
    ولا تصدق وعود المتخاذلين والمنبوذين والذين سرقوا أحلام أطفالك
    حتى لو حملوا الراية .. حتى لو تغنوا بالشهداء !
    ف معظمهم أنصاف أعداء ..
    ادفع بألمك و إحباطك و قلقك و حزنك و جروحك بعيداً عن مخيلة رأسك
    فحياتك كنز ثمين لا تستحق أن تضيعها بين أوهام الأغاني والنصر المزيف !!

    ردحذف
  2. أن شاء الله

    فى الميدان

    من بدرى

    ردحذف
  3. الشهيد بيقول دمي في رقبتك يا مصري
    سيب الخناق و الصراع وامشي دوغري
    انا باضيع ودمي على الارض هدر بيجري
    ومستنيك
    عارف التلاكيك
    عارف هتلاقي في الصبح صعاب
    وعارف الليل مازالش والشمس متاخدة غياب
    لكن لسه فيك امل لسه الوقت مانتهاش
    والفجر هيأدن فوق مآدن بنيتها بدمي متنسهاش
    قوم يا مصري الغفلة لو هتاخرك متخليهاش
    وفوق
    وتعالي معايا فوق
    وخلي مصر بهية زي حلمي
    لو انت صاحي اكيد بكره هيروق
    ------------------------------------
    نفسي بكرة يكون احلى ونفسي ثمار دم شهدائنا نحس بيه علشان دمهم ميروحش هدر
    ونفسي ناخد بتارهم بقى
    نفسي حاجات كتير بس مليون حاجة موقفانا ومتعطلين فيها

    ردحذف
  4. من بكرة فى الميدان ان شاء الله ...
    جميـــلة جدا !!!

    ردحذف
  5. بسم الله الرحمن الرحيم

    الاجابة هي

    التحرير

    ردحذف
  6. ربنا يكمل ثورتنا على خير

    ردحذف

خلل براحتك من غير انتظار .. فتافيت أصلاً بتحب الخيار