01 يناير 2011

أحمد ومينا.. ولاد فاطمة وجاكلين..!

.


أحمد ابن فاطمة..
ومينا ابن جاكلين..
صحاب من سنين وسنين..
جيران ودايما مع بعض..
واكلين شاربين..
ساعات زعلانين..
بس أكتر فرحانين!
بيذاكروا سوا...
ويروحوا المدرسة سوا..
ويامه إتخانقوا..
بس بسرعة..
يرجعوا يلعبوا مع بعض
تاني مشتاقين..!
........
بتمر الأيام بسرعة..
كبر أحمد ومينا..
كبروا بقوا رجالة...
وقلب جاكلين وفاطمة..
فرحان سعيد.. بنفس الحالة!
........
قالوا النهاردة الجمعة..
هنودع 2010..!
وزي ما أتعودوا..زي ما أتربوا
يستقبلوا السنة الجديدة ..
وهم لله بيصلوا..!
أحمد يصلي في المسجد
ومينا يحضر القداس..

وبعدها يرجعوا ع البيت
وسوا يحتفلوا..!
........
وفي البيت جاكلين وفاطمة..
في إنتظار الغالين
وبفرحة وضحكة صافية..
مستنين الـ11 تزين الألفين..!
الكنيسة قصاد المسجد..
والاتنين جنب البيت..
دخل أحمد ومينا.. الكل لدينه حافظ
وهي دقيقة واحـدة..
وسمعوا إنفجار جامد..!
........
صرخت جاكلين...
باسم الرب..باسم الصليب..!!
وفاطمة ترد..
سلام قول..من رب رحيم..!!
فين الولاد...؟؟؟

فين ضي العين؟!!





مات أحمد..
مات مينا..
مات فـ المسجد..
مات فـ القداس..!
إصل الإنفجار.. مالوش دين
مافرقش بين الناس؟!!
........
مات مينا..
وقلب جاكلين إتحسر..
وبموت أحمد..
قلب فاطمة إنكسر..!
........
في شرع مين..
تموت الشباب؟؟!!
في ملة مين..
نتحرم من الأحباب؟!!
لا شرع ولا ملة..
ولا حتى عرف..

يقول إن خلاص البشر..
بقى من فطرتهم العنف..!!!
........
دم ولادهم سال..
وأملهم فيهم مات..!
والناس تقول..
مسلم قتل مسيحي
لا مسيحي قتل مسلم...

ونسيوا اننا جوا مصر..
كلنـا أقبـاط..!!.
........
:

:

من أقوال أشرف الخلق سيدنا محمد
صلى الله عليه وسلم:


(من آذى ذِمِّياً فأنا خصمه..
ومن كنت خصمه خصمته يوم القيامة
)..
صدق رسول الله..
عليه الصلاة والسلام
........
أنا حزينة.. وقلبي وجعني

:(

هناك 38 تعليقًا:

  1. لا حول ولا قوة الا بالله
    حقيقى مفيش كلام ممكن يتقال

    وكما يقال الارهاب لادين له

    ردحذف
  2. من أقوال أشرف الخلق سيدنا محمد
    صلى الله عليه وسلم:

    (من آذى ذِمِّياً فقد آذاني)
    وبرواية أخرى..
    (من آذى ذِمِّياً فأنا خصمه..
    ومن كنت خصمه خصمته يوم القيامة)..
    صدق رسول الله..
    عليه الصلاة والسلام



    بعد الكلام ده مفيش كلام يتقال تانى
    اللى عمل كده مش مننا و لا نعرفه

    ردحذف
  3. يمكن التعليق دة مش مناسب دلوقتي بس كان لزم أوضح إن الحديث إلي إنت ذكرتيه مش حديث

    معنى الحديث جميل وفي كلام الرسول أحاديث كتير عن حقوق النصارى بس الحديث د بالذات مش حديث

    - من آذى ذميا فقد آذاني
    الراوي: - المحدث: ابن تيمية - المصدر: مجموع الفتاوى - الصفحة أو الرقم: 28/653
    خلاصة حكم المحدث: كذب على رسول الله صلى الله عليه وسلم
    
    2 - من آذى ذميا فقد آذاني
    الراوي: - المحدث: ابن القيم - المصدر: المنار المنيف - الصفحة أو الرقم: 98
    خلاصة حكم المحدث: باطل
    
    3 - من آذى ذميا فقد آذاني
    الراوي: - المحدث: القاوقجي - المصدر: اللؤلؤ المرصوع - الصفحة أو الرقم: 173
    خلاصة حكم المحدث: موضوع
    
    4 - من آذى ذميا فقد آذاني و من آذاني فقد آذى الله
    الراوي: - المحدث: الألباني - المصدر: غاية المرام - الصفحة أو الرقم: 469
    خلاصة حكم المحدث: لا أصل له بهذا اللفظ

    لو تعرفي سند الحديث قولي لنا عليه يمكن أكون غلطان

    مكين

    ردحذف
  4. ان الله مع الصابرين
    الله يرحم كل من مات
    ويصبر اهل القتلى
    عظم الله اجر كل مصري

    ردحذف
  5. انا بكتب التعليق
    وعينى مش عارف افتحه من الدموع
    انا خسرت اعز اصحابى
    عشرت عمرى
    دراسه وجران
    من الاعدادى للكليه
    خسرته فى لحظه

    منهم لله
    منهم لله

    مش عارف اعلق سامحينى
    حسبى الله ونعم الوكيل

    ردحذف
  6. معنديش كلام اقوله حسبنا الله ونعم الوكيل

    ردحذف
  7. كلنا متشاركين في نفس الوجع والحزن

    كلامك عبر عن اللي حصل بدقة يا فتافيت

    ربنا يرحم الشهداء المسلمين والمسيحيين

    ردحذف
  8. قلتى انا حزينه وقلبى وجعنى
    وهيا دى المعنى عندنا كلنا
    كلنا قلبنا وجعنا اتقهرنا حرام الناس البريئه حرام كل شىء بجد احنا شعب يقدر يتحمل كل حاجه احنا لازم نكون اقوى طول عمرنا ما بنتهزش ولا هنتهز كفايه دموع اى حد فينا وهو بيشوف فيديو من بتوع الحادثه على الاقل بلدنا تستحق الامان وطول عمرها امن لكل الناس واسألوا اى حد بييجى يزورها
    خلونا مع بعض نقول حسبى الله ونعم الوكيل مع بعض
    يارب اجعل بلدنا امنه كما كانت وستظل ان شاء الله

    ردحذف
  9. يارب يصبر أهل اللي راحوا
    الصراحة مصر تايهه ومش عارفين راحية بينا على فين
    ربنا يستر

    ردحذف
  10. وقانا الله شر الفتن ما ظهر منها وما بطن

    ردحذف
  11. حسبنا الله ونعم الوكيل

    ردحذف
  12. خالص عزائنا لاخوتنا المسيحيين ولمصر كلها

    ان شاء الله ابدا ستبقى مصر نسيج واحد
    رغم كيد الحاقدين

    دا مخطط خارجي بلاشك ، لأنه مستحيل مصري يعمل كدا
    الا اذا كان غير جلده

    ان شاء الله الجي احسن

    واشكرك على كلماتك المعبره
    جزاكم الله خيرا

    ردحذف
  13. كلنا اتوجعنا
    منهم لله

    ردحذف
  14. فتافيت

    أزيك يا فتافيت معلش بقى جت متأخرة

    انا مكنتش بعلق بس متابع على فكرة بدأت أعلق عند الناس من انبارح

    كل سنة و كُلنا طيبين (:

    ردحذف
  15. فتافيت

    مش هأشكرك على التعليق اللى عندى (:

    ردحذف
  16. السلام عليكم

    جميلة جدا الكلمات أختي رحاب...

    والفكرة معبرة جدا عن الحدث...

    تحياتي أختي الكريمة.

    ردحذف
  17. عبرتي بطريقة لطيفة معبرة

    ربنا يرحم الموتي

    وحسبي الله ونعم الوكيل

    ردحذف
  18. ازيك يا قمر

    ربنا موجود ويصبر مصر كلها فى ضحاياها
    قادر ربنا يزيل كل حزن قلب

    سلامى لشخصك

    ردحذف
  19. فتافيت يا حلوه
    السلام عليكم
    تحياتى
    المشكله يا فتافيت مش فى احمد ومينا ولا توجد مشكله حياتيه بين المسلمين والاقباط.
    المشكله فى من يزكى هذه الفتنه .. وانا اشك فــ ...
    المشكله فى معالجات النظام والهرتله والكلام الاهبل بتاع التليفزيونات .. اللى قابضين عليه فلوس
    مافيش مشكله بين المسلمين والاقباط
    مافيش مشكله بين الاقباط والمسلمين
    عايشين مع بعض من زمان .. وبيحبوا بعض
    المشكله فى المعالجات الهبله بتاعة النظام
    تحياتى

    ردحذف
  20. موناليزا

    فعلا الارهاب مالوش دين

    ربنا يستر على مصر

    ردحذف
  21. صيدلانيه طالعه نازله

    عندك حق.. لا منا ولا نعرفه
    لكن هو يعرفنا كويس

    ردحذف
  22. غير معرف

    جزاك الله خيرا على التنبيه
    انا اتأكدت من الحديث التاني وسنده
    ام عن الحديث اللي انت اشرت له
    انا سمعته كتير من اكتر من شيخ... فعشان كده ما بحثتش عن السند بتاعه

    عامة نكتفي بالحديث التاني
    مادام هو صحيح

    خالص تحياتي

    ردحذف
  23. خواطري مع الحياة

    ربنا يصبرنا جميعا
    ويساعدنا في الفترة اللي جاية

    ردحذف
  24. محمد التركى..

    البقاء الله
    ربنا يصبرك ويصبر اهله
    مصر كلها لها الله

    ردحذف
  25. سندباد

    كفاية جدا
    حسبي الله ونعم الوكيل

    ردحذف
  26. Lady E

    ربنا يرحم اهل مصر
    من اللي جاي ... ربنا وحده الاعلم بيه

    ردحذف
  27. MaNoO

    مهي المصيبة مصيبتنا كلنا
    مش مصيبة دين ولا اهل ملة معينة
    ربنا كبير ... وان شاء الله هاتفضل مصر
    بلد السلام

    ردحذف
  28. Hu-man

    ربنا يستر بقى علينا
    ونخلص من التوهة دي بقى

    ردحذف
  29. محمود(باحث عن حب)

    في كل حد بيحاول يشعل فتيل الفتنة

    ردحذف
  30. قلم رصاص

    مهو اكيد مخطط خارجي
    بس اموت واعرف ازاي اتنفذ... ازاي مصري يطاوع كلاب ويسمع كلامهم في التخريب ده؟؟؟؟

    ربنا يستر علينا

    ردحذف
  31. sony2000

    مصر كلها اتوجعت ونزفت
    ربنا كبير

    ردحذف
  32. Ramy

    رامي اخيرا رجعت ترد تاني
    منور يا كبير

    :)

    ردحذف
  33. Ramy

    ايه ده؟؟؟
    لا ماليش دعوة لازم تشكرني بقى
    هههههههههههههههه

    طيب حتى هات ربع جنيه :)))

    ردحذف
  34. ماجد القاضي

    عليكم السلام
    متشكرة جدا أخي ماجد
    وبصراحة الشووو بتاعك كان رائع جدا
    دمت مبدع

    ردحذف
  35. شمس النهار

    ربنا يرحهم ويرحمنا احنا كمان
    محدش عارقف بكره مخبي ايه لمصر؟!

    نورتي المدونة

    ردحذف
  36. mrmr

    ازيك انتي :)
    ربنا كبير واكيد مافيش روح ربنا هايضيع دمها هدر
    بس ربنا يستر بجد من اللي جاي
    كلنا واحد... بس فيه اللي مش عاجبه كده
    وبيتمنى يشوفنا العراق او لبنان او السودان

    ربنا يستر ... ويحمي مصر

    ردحذف
  37. فشكول

    عمي وعم المدونين أ.فشكول
    والله حضرتك عندك حق في موضوع المعالجة
    لكن كمان في احتقان بين الطرفين
    مش هانقول كلهم... بس المتطرفين في الطرفين
    ربنا يستر على مصر لان مافهاش حكومة عدلة تقدر تحل الازمة بش معتدل

    ردحذف

خلل براحتك من غير انتظار .. فتافيت أصلاً بتحب الخيار