28 أكتوبر 2011

وطريقك منفوخ منفوخ يا مصــري!!



عليه العوض ومنه العوض
حسبي الله ونعم الوكيل



أنا عصام علي عطا علي أنا اتحبس عشان أهلي فقرة
بس ربنا مش هيسبني،، ربنا كبير أقوي هو أحن عليا من البشر
(بوست على الفايس بوك: 7 أكتوبر 2011)


سبب وفاة عصام علي عطا حسب
التقرير الطبي في البلاغ 5537 إداري قسم مصر القديمة:
قئ دموي حاد أدي لهبوط حاد في الدوره الدموية
وتوقف عضلة القلب نتيجة تسمم غير معروف!
بس السبب معروف في طرة،، النفخ بخراطيم المايه
(بوست على الفايس بوك: 28 أكتوبر 2011)

عصام أتحبس عشان كان في مكان فيه خناقة في المقطم
ومامته بتقسم إن مالوش أي علاقة بالخناقة،،
ومع ذلك أتحاكم عسكريا،، وأخد سنتين سجن،،
وبعدين هرب شريحة موبايل عشان يكلم أهله بيها
كان جزاءه التعذيب حتى الموت،، نفخا بالمــــــاء!!

وطبعا التصريح الجديد لسيادة اللواء عيســوي:
نفــــخ بالمـــاء؟؟،،
ده الماية مقطوعة في الداخلية!!

عصام أتمسك عشان شكله بسيط،، أبن ناس فقرة
الفقره دول اللي ضحكنا عليهم،، قولنا لهم فيه ثورة في البلد
ومن حقكم تحلموا أن يبقى لكم حقوق فيها،،
ومن حقكم الناس تحترم آداميتكم،،
مش عشان فقرة تبقوا يا سرسجية يا بلطجية يا شمامين!!!

عصام حتى لو بلطجي،، يموت منفوخ ليه؟؟
طيب ما تنفخوا ولاد ميتين الكلب اللي نفخونا تلاتين سنة!!
عصام يموت ليه اصلا ،، وهو محكوم عليه بسنتين بس؟
عشان هرب شريحة موبايل جوه السجن؟؟؟
طيب ما تموت ولاد ميتين الكلب،، اللي هربوا فلوسنا بره!

لحد أمته الفقر والذل هايكلوا فينا
ونداس بالجزم،، ونموت تحت شعار،،
الشرطة في خدمة أم الشعب!!

الثورة قامت في تونس،،،
ومنعوا الفلول من دخول الانتخابات
المجلس التشريعي جه،، وكل التوانسة صوتوا برا وجوا!

الثورة قامت في ليبيا،،،
وأتحررت وجرعت نص فلوسها وأعادت هيكلة الشرطة
وقتلوا القذافي،،، وحطوا خطة البناء!

الثورة قامت في مصر،،،
عشان يبقى عندنا مُسمى وظيفي جديد اسمه،، ناشط سياسي
والناشط ده بقدرة قادر،، يطلع من شقة في مساكن شعبية
يشتري عربية BMW وشقة في مصر الجديدة
ويطلع يأوء لنا على الشاشة!!

الثورة قامت في مصر،،،
عشان نفضل نتسحل جوا وبرا عادي
نروح نعتمر يطلع عين اللي جابونا ونتذل ذل الكلاب
نروح نشتغل ،، يقولوا مواطنين ملهمش صوت في الانتخابات
تفضل في البلد،، نموت مدهوسين مسحولين منفوخين!!

الثورة قامت في مصر،،،
عشان كل فِل ينبت 100 فِل غيره كل دقيقة
الفلول بتستحدث من عـدم في مصــر
والبركة في الجوع والفقر!

الثورة قامت في مصر،،،
بس مصر لسه ماقامتش فيها ثورة!!


:




هناك 10 تعليقات:

  1. والله يا رحاب مابقيتش عارف البلد ماشية ازاي..
    ولا هي اصلا ماشية ولا بترجع لورا بسرعة كبيرة..!!
    انا عندي حالة اكتأب وترقب وخوف من اللي جاي..
    والتفكير بياخدني لطريق واحد مش عاوز اوصل له في النهاية..!!

    ردحذف
  2. ما اتعسها حياة عندما يتقدم الكلاب الصفوف و يتوارى الليث و عندما يضرب الامثال بجسارة البغبغان و يعيش الصقر حياة الهوان عندما تؤخذ الحكمة من افواه الغربان بينما يقف هدهد سليمان خلف القضبان
    هذا جزء من بوستى الاخير مذكرات رجل على شفا الانتحار
    و لا تعليق

    تحياتى

    ردحذف
  3. و لازال القرف فى بلدنا مستمر


    أحنا محتاجين 100 ثورة

    ردحذف
  4. الله يرحمه

    و يرحمنا

    ردحذف
  5. لا حولة و لا قوة الا بالله . . اللهم اهلك الظالمين بالظالمين و اخرجنا من بينهم سالمين و رفئ بنا و في بلادنا ولا تأخذنا بما فعل السفهاء منا !!

    ردحذف
  6. كل واحد زى عصام بيتنفخ كدة وبعدين يتلف ويعود من مكان ماجيه
    ان لله وان اليه راجعون ربنا يرحمه ويصبر اهله بجد

    معرفش هى مصر اصلا قام فيها ثورة ولا دى كانت خروجه من كل المصريين والخروجه فشلت :(

    لكى الله يامصرنا :(

    ردحذف
  7. ربنا يرحمه يارب ويجعل مثواه الفردوس الاعلى من الجنة .. اكيد بكرة راح ياخد حقه من اللي قتلوه في محكمة الله وسوف ينتقم ممن عذبوه ..

    قلوبنا موجوعة على مصر الحبيبة ..

    ربنا يصلح الحال يارب .

    ردحذف
  8. مفيش حاجة حصلت كانه لم تقم ثورة شالو الدو وجابو شاهين

    ردحذف
  9. الله يرحمه يا رب ..
    أنا حسيت أنى هعيط و حسيت أنى بيتهيألى أن حصلت ثورة أصلا ..
    حسبى الله و نعم الوكيل

    ردحذف

خلل براحتك من غير انتظار .. فتافيت أصلاً بتحب الخيار