17 مارس 2011

إكرام الدستور،،، دفــنه!!





هو ليه لازم نعيش ضمن القطيع؟؟
ليه الكنيسة تجيش أصوات بتقول لا

تحت لواء المسيحية؟؟
وليه الجمعية الشرعية بتجيش أصوات بتقول نعم

تحت لواء الإسلام؟؟
ليه محدش عايز يفهم،، إننا خلاص بتروا لنا الأربع رجلين
وبطلنا نمأمأ،، وطلع لينا جوز رجلين
ومبقيناش ضمن القطيــــــع؟؟

(( لا )) ،، بصوت عالي لكل حد ماشي ضمن قطيع!!


أنا ضد إن أي شخص يقول صوته،، بالعند في صوت تاني!
يعني ضد إني أقول لا،،
مجرد عند في إن الوطني بيقول نعم
وضد إني أقول نعم،،
مجرد عند في البرادعي وموسى بيقولوا لا

ولأول مرة بقول،،، خلي الإخوان والحزب الوطني قدوة ليكم
الإخوان والوطني،، بيقولوا نعم أهو ومابيعاندوش في بعض
وسبحانه لما يجمع الشتتيتين
بعد ما ظنوا إنه لا مصلحة مشتركة
قد تأتي في يوم من الأيام،،،
إيييييييييه ثورة

(( لا ))،، بصوت عالي لأي صوت بالعند في صوت حد!


لما الجمعية الشرعية تقول إن التصويت بنعم واجب شرعي
فأنا مضطرة إن أصوم كام يوم كفارة
لأني هاصوت (( لا ))
،، بخط تخين
بس هو أنا كده بقيت من الخوارج؟؟

(( لا ))،، بصوت عالي لأي حد بيستهبلني!


أنا كرهت أنصاف الحلول
أنا كرهت فتات الخبز
أنا كرهت خلينا نخلص بقى
أنا كرهت الخوف من أي حاجة جاية


(( لا ))،، للرجوع لعصر ما قبل الثورة




أنا عندي عشتاشر سبب إني أقول (( لا ))
وقولتهم في الفيسبوك والمصري اليوم، ومش هاعيده هنا
لكن كل اللي بيقول نعم، عشان البلد تستقر
أنت عارف بنعم دي،،، هاننزل كام مرة من البيت؟؟

مرة الاستفتاء دي

مرة مجلس الشعب

مرة مجلس الشورى

مرة الرئاسة

مرة الاستفتاء تاني

مرة مجلس الشعب تاني

مرة مجلس الشورى تاني


ونعم الإستقرار بصراحة،، أصل مصر ناقصة كل ده
في الفترة دي،، طبعا أصل إحنا بنصدر الأمن والأمان!!


(( لا ))،، لإستقرار زائف مش هايحصل!


قبل الثورة كانت الفزاعة الإخوان
أوعوا الإخوان تعضكم،، وبعد الثورة بقى
أوعوا الوطني يرجع،، حاسب من الوطني يا جدع
ما نفعش طبعا،، لأن الوطني والإخوان بيقولوا نعم
فدلوقتي الفزاعة الجديدة،، أوعوا الكنيسة يا جدعااااااااان


(( لا ))،، بصوت عالى لأي فزاعة للشعب


وفي النهاية،، هاصوت بــ (( لا ))
إن شاء الله،، وأسبابي كتير موجودة على الفيسبوك
هاقول (( لا )) ،، عشان أنتم فاكرين إن الجيش مسكك
بشرعية ثورية،، وده ماحصلش

الجيش مسك بناء على المادة 84 من الدستور
دستور 71 اللي كان إسقاطه من ضمن أهم مطالبنا،، !!


فيديو يستحق المشاهدة فعلا


إكرام الدستور،،، دفــنه!!


هناك 9 تعليقات:

  1. طبعا اللي بيحصل ده عامة هو مناخ صحي جدا ومرحلة كنا مفتقدينها جدا خلال ستين سنة فكرة اننا بنفكر ونتناقش ونتدوال الافكار حتي ولو كانت في ناس بتحاول تفرض سيطرتها ووصايتها علي الاخرين الامر حاليا اصبح في منتهي البساطة اللي مقتنع بنعن هايقول واللي مقتنع بلا هايقول واللي مش عارف هايسال ويقرا ويفكر
    القصة في منتهي البساطة انما احنا لسه مش قادرين ننسي ستين سنة قهر وفرض راي ولسه في ناس عندها نفس الفكرة والمبدا ولكن الاغلبية من الشعب طلع بره عباءة الوصاية وهايقول كلمته بغض النظر عن نع او لا
    تحياتي لفكرك

    ردحذف
  2. عارفة العيب فين
    العيب في الاعلام اللي جاب الناس اللي بتقول لا وبتقول نعم وموضحش ايه السيناريوهات اللي هتتم لو كانت النتيجة بنعم او لا
    ماقالوش هنلاقي ايه هيحصل بكرة لو لا او نعم مع ان دي اهم حاجة
    اللي اكتشفته مثلا لو كانت النتيجة نعم او لا هيتم عمل اعلان دستوري لحد انتخابات الرئاسة وهييجي الريس ويتم عمل لجنة دستورية ويتم عمل دستور جديد
    يعني اصلا لا ونعم مش فارقة اساسا
    لا الجيش مفهمنا هيحصل ايه ولا الناس بتشرح هيتم ايه
    بس عصبية نعم ولا كل واحد بيحاول يفرض اللي عايزه على الطرف التاني ببيانات ويافطات واعلانات
    نفسي يكون في فهم للديمقراطية وهي عرض رايك بدون تخوين الطرف التاني
    تحياتي واتمنى النتيجة اللي تحصل يكون فيها صالح مصر

    ردحذف
  3. :)))))
    اخف بوست قريته في الليله دي

    بجد ضحتيني

    الدستور مات بيستفتوا عليه ليه
    هو في ميت بيصحي

    مصر عايزة تلبس جديد

    ردحذف
  4. اسلوبك في الحوار ممتاز ما شاء الله
    وكلامك منطقي جدا

    عن نفسي سأقول نعم عن اقتناع وليس عنادا مع شخص أو طائفة

    خالص التقدير لفكرك وقلمك
    تقبلي مروري

    Casper

    ردحذف
  5. لا يعنى نوووووووووووو

    باذنك يارب يكون الجاى خير

    عشمانه قوى

    تحياتى

    ردحذف
  6. فتفوتي الحلوة

    دكتور من أولادي عالفيس بوك كتب تعليق حلو قوي

    قال لو عندك ابنك لابس بامبرز وعملها فيه حتغيرله البامبرز كله والا حتمسح القرف اللي في البامبرز وتلبسهوله؟؟؟؟؟؟؟؟؟؟؟؟؟ اع بس ضحكني قوي

    حاقول لاع لا لا توؤ نو

    ردحذف
  7. يا جماعة ممكن تفهموا
    الغرض من قول "نعم" هو لأن فى مادة هتتضاف وهى تنص على إجبارية على مجلسى الشعب والشوري فى أول اجتماع يحدث على تكوين لجنة تأسيس الدستور وإلغاء دستور 71
    نفسي بس نحلل الموضوع قبل ما نتخذ أى قرار وأنا أتفق مع أخى "مصطفي سيف " إن الإعلام عندنا إعلام فاااااااااااااااااااااااااااااااااااسد
    بمعنى الكلمة لأنه بيجيب ناس تقول لا وخلاص وميفهمش اية فعلا اية اللى هيحصل لو قلنا نعم أو اية اللى هيحصل لو قولنا لا ! ! !

    وبعدين أختى الكاتبة حضرتك كتبتى النص دة
    _______________________
    أنا عندي عشتاشر سبب إني أقول (( لا ))
    وقولتهم في الفيسبوك والمصري اليوم، ومش هاعيده هنا
    لكن كل اللي بيقول نعم، عشان البلد تستقر
    أنت عارف بنعم دي،،، هاننزل كام مرة من البيت؟؟

    مرة الاستفتاء دي
    مرة مجلس الشعب
    مرة مجلس الشورى
    مرة الرئاسة
    مرة الاستفتاء تاني
    مرة مجلس الشعب تاني
    مرة مجلس الشورى تاني
    _________________________
    يعنى احنى بنادى وبنقول حرية رأى وعدالة اجتماعية وحياة أفضل ولما تجيلك الفرصة علشان تبرزى رأيك تقولى وانا هنزل كل شوية؟؟؟ طيب عاوزاهم يعنى يجولك ويقولوا لك اية رأي سيادتك فى كذا ؟؟!
    لا طبعا انتى لازم تنزلى وتحللى المواضيع من جميع الجهات ومتخليش حد ياكل بعقلك حلاوة زى الإعلام ما بيعمل وآسف ع الفظ بس كان بيحصل لينا كلنا كتير
    وعلى فكرة أنا سنى 15 سنة بس .
    بس منخرط ومختلط بعدة جهات وحللت شوية وفهمت الناس بتقول اية هنا وهناك
    وفى النهاية كلنا عاوزين دستور جديد وزى ما قلنا نعم فيها المادة الجديدة بإنشاء دستور جديد

    وأنا أتفق معاكى فى أشياء كتيرة جدا هنا
    وأرجوا انى مكنتش أزعجتكم وشكرا :)

    ردحذف
  8. والله غلبت أفهم الناس

    وكل اما واحد يقتنع تماما

    يرجع يتقلب تاني علشان الشيخ فلان قال والشيخ فلان عاد

    مع احترامي لكل المشايخ المحترمين

    إني أقول لأ مش حرام

    واللي بيقول حرام ده يجيبلي دليل شرعي

    هو انت لما متعرفش تقنعني تقولي حرام

    المشكله إن البسطاء تم ليهم شبه تجنيد باسم الدين وبالتغرير برضه بإن لأ هي الفوضى الللي هتبوظ البلد

    أنا قلت لأ عن اقتناع تام والحمد لله ومبصتش أبدا لأن مين بيقول آه ومين بيقول لأ لأني ببساطه مش تابع لأي حد أنا ليا عقلي وتفكيري وقناعاتي

    ولما كنت بالاقي واحد مقتنع بآه وهيقول لأ عشان الوطني هيقول آه كنت باقنعه يقول اللي مقتنع بيه رغم خلافي ليه في الراي

    كان نفسي التجربه الديموقراطيه دي تنجح أكتر من كده ، وكان نفسي الناس يتشرحلها كل جوانب " نعم" و " لا " وهما يقرروا

    يلا

    اللي حصل حصل


    ربنا يعمل اللي فيه الخير

    ردحذف
  9. ماهى المشكلة ان مكانش فى شرح واضح لنتائج اه ونتائج لا

    ردحذف

خلل براحتك من غير انتظار .. فتافيت أصلاً بتحب الخيار