جمعة رد الجميل.. لأمن دولة

أنا فضلت التواصل من أول الثورة على الفيسبوك
المعلومات هناك أسرع وأسهل في التداول وتحري الصحة
لكن النهاردة... ما كنش ينفع أبداً
ما أسجلش موقفي على المدونة بتاعتي



أول مرة أحزن كده..
وتكون صدمتي في الشعب المصري للدرجة دي!
معقول وصلنا للدرجة دي من عدم الضمير.. معقول وصلنا للدرجة دي من الجحود ونكران الجميل؟؟
أزاي أي مصري محترم أصيل.. يوافق إن أمن دولة يتجمد؟؟
يتجمد وفي البرد ده كمان؟؟ طيب حتى يستنوا للصيف عشان ما يجيش لأمن دولة نزلة شعبية!


أمن دولة، أول حد دخل خدمة كهربني شكراً
وكان في منتهى الكرم يديك كهربا على قد ما يديك ومن غير عداد ولا وصل ولا مصاريف نضافة!


أمن دولة، أخترع خدمة أنفخني شكراً
عشان خاطر الشعب المصري يحافظ على مظهره، لأن كنا داخلين على مجاعة وكانت الجزيرة الوحشة
هاتصورنا وإحنا رفعيين خالص زي النجير فأمن دولة قال ينفخ الشعب عشان يبقى حلو ومكلبظ!


أمن دولة، نمى مهارات الشعب في أصول التخيل والإبتكار
لما يرسم لك سلم على الحيط ويقولك أطلع، يعني بعد ما يعلمك المشي على الحيط، تعمل معاه كده؟.. يااااااه مش مصدقة!


أمن دولة، كان بيحافظ على شباب مصر من المعصية
بعد ما المغريات بقت كتير في الشارع المصري، خاف على الشباب من الإنحراف، فبقى بيعتقلهم في العشرينات
ويخرجهم في الإربعينات عشان يبقوا نضجوا وما ينجرفوش إلى الرزلية، شوفتوا التقوى!


يعني لو أبوك عمل معاك كل ده، هاتردله الجميل بإنك تجمد؟؟
يعني أمن دولة عاش معانا وعيشنا معاه سنين
وفي الأخر ده يكون جزاءه؟
مش مصدقة بجد.. يعني المعتقلين بعد ما قعدوا في زنازين أمن دولة
متكهربين، منفوخين، واكلين نايمين مايتين، ويعملوا كده؟!
قلة أصل صحيح!

يا جماعة أنتم مش حاسيين بالكارثة أصلا
دلوقتي بعد تجميد أمن دولة، هاتحصل أزمة كبيرة جدا، السد العالي مش هايكفينا كهربا
يعني دلوقتي إحنا هانور بكهربا السد العالي، ولا هانتكهرب بيها؟؟؟.. هاتبقى فيه أزمة كهربا حقيقية
وبعدين من دلوقتي سعر النفخ في البنزينات زاد الضعف، هايعمل إيه بقى المواطن العادي؟؟ عشان يوفر لعائلته مستوى نفخ محترم؟؟؟ ولا هاتوصل بينا الحالة إننا نتنفخ عند العجلاتية بقى؟؟ أتقوا الله هانتنفخ فين بعد أمن دولة؟ مافيش إي إحساس بالمسئولية خاااااااااااالص؟ الشعب هايمشي يهرش ويشد في شعره.. عشان مش لاقي نفخ وكهربا بعد ما كانوا متوفرين له مجانا في أمن دولة!


أنا بناشد كل معتقل أصيل، وكل مصري يقدر العشرة
ننزل يوم الجمعة الجاية نرد الجميل لأمن دولة
الشعب وأمن دولة إيد واحدة
بعد المجزرة اللي حصلت في الإسكندرية لأمن دولة..
أنتوا متخيلين يعني إيه متظاهرين
يهاجموا رصاص أمن دولة بصدورهم؟!
إيه مافيش إنسانية، مش رصاص حي ده، مش حرام!
والرصاصة يا عيني تطلع تلاقي صدر قصادها
ويا تدخل صدره وتطلع من الناحية التانية ميته على
ويا صدر المتظاهر يبلعها!
فين حقوق الرصاص تيجي تشوف اللي بيحصل.
مافيش عندكم رصاصات صغيرين تخافوا عليهم؟!


إحنا لازم ننزل في كل ميادين مصر
ونكون متكهربين ومنفوخين، وناشد كل واحد ربنا فاتحة عليه
ليك أخوات مش هاتقدر تدفع تمن الكهربا بعد
ما فقلوا منفذها المجاني الوحيد
هات معاك صاعق كهربي ومنفاخ محمول.
وكهرب أخواتك وأنفخهم في الميدان
لأزم كلنا نكون إيد واحدة لحد الأزمة دي ما تعدي
وكل متكهرب يكهرب أخوه اللي مش متكهرب
ونغمي عيونا ، وتربط إيدينا ورجلينا، عشان
نعرف أمن دولة إن تعليمه ما رحش هدر
وبقينا بنعرف نمشي في الضلمة، ونط نطة الأرنب كمان!

وأنا أوعدكم.. إن أول ما نضغط على الجيش
يرجع أمن دولة ولما يرجع....
ها يدخل خدمة كهربني شكرا وأنفخني شكرا
في كل بيت في مصر
مش لازم تتعب نفسك وتروح لحد أمن دولة
أنت أتصل ويصلك مندوبنا أينما كنت.. وبدون مصريف شحن
وبرضو أنا متأكدة إن أمن دولة، هايصرفلنا شهرين تعذيب
ونفاخة بالكهربا مع كل بطاقة تموين، وقفنا جنبه
لازم كلنا نتكاتف يا جماعة عشان أمن دولة يرجع!.
ولو حد نسي كفاية
إن يحط لامبة على أي حتة في جسمه.
ولما تنور هايفتكر أمن دولة

يعني الحزب الوطني راح ومعاه الخمسين جنيه والكنتاكي
والفريق شفيق راح ومعاه البلوفر والبونبوني
ودلوقتي أمن دولة يروح ومعاه النفخ والكهربا؟؟



أوعي تنسي أمن دولة يا مصر
أوعي تنسي أمن دولة يا مصر