06 مارس 2011

جمعة رد الجميل.. لأمن دولة

أنا فضلت التواصل من أول الثورة على الفيسبوك
المعلومات هناك أسرع وأسهل في التداول وتحري الصحة
لكن النهاردة... ما كنش ينفع أبداً
ما أسجلش موقفي على المدونة بتاعتي



أول مرة أحزن كده..
وتكون صدمتي في الشعب المصري للدرجة دي!
معقول وصلنا للدرجة دي من عدم الضمير.. معقول وصلنا للدرجة دي من الجحود ونكران الجميل؟؟
أزاي أي مصري محترم أصيل.. يوافق إن أمن دولة يتجمد؟؟
يتجمد وفي البرد ده كمان؟؟ طيب حتى يستنوا للصيف عشان ما يجيش لأمن دولة نزلة شعبية!


أمن دولة، أول حد دخل خدمة كهربني شكراً
وكان في منتهى الكرم يديك كهربا على قد ما يديك ومن غير عداد ولا وصل ولا مصاريف نضافة!


أمن دولة، أخترع خدمة أنفخني شكراً
عشان خاطر الشعب المصري يحافظ على مظهره، لأن كنا داخلين على مجاعة وكانت الجزيرة الوحشة
هاتصورنا وإحنا رفعيين خالص زي النجير فأمن دولة قال ينفخ الشعب عشان يبقى حلو ومكلبظ!


أمن دولة، نمى مهارات ال
شعب في أصول التخيل والإبتكار
لما يرسم لك سلم على الحيط ويقولك أطلع، يعني بعد ما يعلمك المشي على الحيط، تعمل معاه كده؟.. يااااااه مش مصدقة!


أمن دولة، كان بيحافظ على شباب مصر من المعصية
بعد ما المغريات بقت كتير في الشارع المصري، خاف على الشباب من الإنحراف، فبقى بيعتقلهم في العشرينات
ويخرجهم في الإربعينات عشان يبقوا نضجوا وما ينجرفوش إلى الرزلية، شوفتوا التقوى!


يعني لو أبوك عمل معاك كل ده، هاتردله الجميل بإنك تجمد؟؟
يعني أمن دولة عاش معانا وعيشنا معاه سنين
وفي الأخر ده يكون جزاءه؟
مش مصدقة بجد.. يعني المعتقلين بعد ما قعدوا في زنازين أمن دولة
متكهربين، منفوخين، واكلين نايمين مايتين، ويعملوا كده؟!
قلة أصل صحيح!

يا جماعة أنتم مش حاسيين بالكارثة أصلا
دلوقتي بعد تجميد أمن دولة، هاتحصل أزمة كبيرة جدا، السد العالي مش هايكفينا كهربا
يعني دلوقتي إحنا هانور بكهربا السد العالي، ولا هانتكهرب بيها؟؟؟.. هاتبقى فيه أزمة كهربا حقيقية
وبعدين من دلوقتي سعر النفخ في البنزينات زاد الضعف، هايعمل إيه بقى المواطن العادي؟؟ عشان يوفر لعائلته مستوى نفخ محترم؟؟؟ ولا هاتوصل بينا الحالة إننا نتنفخ عند العجلاتية بقى؟؟ أتقوا الله هانتنفخ فين بعد أمن دولة؟ مافيش إي إحساس بالمسئولية خاااااااااااالص؟ الشعب هايمشي يهر
ش ويشد في شعره.. عشان مش لاقي نفخ وكهربا بعد ما كانوا متوفرين له مجانا في أمن دولة!


أنا بناشد كل معتقل أصيل،
وكل مصري يقدر العشرة
ننزل يوم الجمعة الجاية نرد الجميل لأمن دولة
الشعب وأمن دولة إيد واحدة
بعد المجزرة اللي حصلت في الإسكندرية لأمن دولة..
أنتوا متخيلين يعني إيه متظاهرين
يهاجموا رصاص أمن دولة بصدورهم؟!
إيه مافيش إنسانية، مش رصاص حي ده، مش حرام!
والرصاصة يا عيني تطلع تلاقي صدر قصادها
ويا تدخل صدره وتطلع من الناحية التانية ميته على
ويا صدر المتظاهر يبلعها!
فين حقوق الرصاص تيجي تشوف اللي بيحصل.
مافيش عندكم رصاصات صغيرين تخافوا عليهم؟!


إحنا لازم ننزل في كل ميادين مصر
ونكون متكهربين ومنفوخين، وناشد كل واحد ربنا فاتحة عليه
ليك أخوات مش هاتقدر تدفع تمن الكهربا بعد
ما فقلوا منفذها المجاني الوحيد
هات معاك صاعق كهربي ومنفاخ محمول.
وكهرب أخواتك وأنفخهم في الميدان
لأزم كلنا نكون إيد واحدة لحد الأزمة دي ما تعدي
وكل متكهرب يكهرب أخوه اللي مش متكهرب
ونغمي عيونا ، وتربط إيدينا ورجلينا، عشان
نعرف أمن دولة إن تعليمه ما رحش هدر
وبقينا بنعرف نمشي في الضلمة، ونط نطة الأرنب كمان!

وأنا أوعدكم.. إن أول ما نضغط على الجيش
يرجع أمن دولة ولما يرجع....
ها يدخل خدمة كهربني شكرا وأنفخني شكرا
في كل بيت في مصر
مش لازم تتعب نفسك وتروح لحد أمن دولة
أنت أتصل ويصلك مندوبنا أينما كنت.. وبدون مصريف شحن
وبرضو أنا متأكدة إن أمن دولة، هايصرفلنا شهرين تعذيب
ونفاخة بالكهربا مع كل بطاقة تموين، وقفنا جنبه
لازم كلنا نتكاتف يا جماعة عشان أمن دولة يرجع!.
ولو حد نسي كفاية
إن يحط لامبة على أي حتة في جسمه.
ولما تنور هايفتكر أمن دولة

يعني الحزب الوطني راح ومعاه الخمسين جنيه والكنتاكي
والفريق شفيق راح ومعاه البلوفر والبونبوني
ودلوقتي أمن دولة يروح ومعاه النفخ والكهربا؟؟



أوعي تنسي أمن دولة يا مصر
أوعي تنسي أمن دولة يا مصر

هناك 22 تعليقًا:

  1. ضحكتيني عليهم

    وهمه هربوا زي الفراخ من امن الدولة بمدينة نصر وسابوا عربيتهم جوه في الجراج

    ردحذف
  2. اخطر حاجة ممكن تحصل بعد امن الدولة ماتجمد الدولة مبقاش فيها امن وهنعاني من فراغ دستوري جامد كده الجابون ممكن تحتلنا يااااااه احنا مرعوبين جدا هنعمل ايه من غير امن دولة هنجيب مين يكهربنا ويكربجنا (يضربنا بالكرباج)
    احلى حاجة حاليا ان الشعب جاب الوثائق بنفسه مستناش ويكليكس بقينا ويكليكس متنقلة :)
    انا مش قادر اصدق ان اليوم ده جه وامن الدولة اتبهدل وشفنا فيه يوم
    لو حد قالي من شهرين ان مبارك هيتنحى والعادلي هيتسجن و امن الدولة هيتجمد كنت هاقول عليه بيشتغلني
    تحياتي

    ردحذف
  3. فعلا لازم نرد الجميل واللى اتعمل معاه حاجة لازم ييجى ويرد بأحسن منها للى عمل معاه كده

    لكل ظالم يوم
    ربنا كبير

    ردحذف
  4. هههههههه
    والله انتى طيبة
    فيه فرق بين :
    1- حل امن الدولة بقرار منظم يتم فيه التحفظ على المستندات لكى تتم المحاسبة بشكل جيد .
    2- لفظ مطاطى من نوعية ( تجميد ) امن الدولة ... يعنى ايه تجميد ... ما هو اى حاجة بتتجمد ممكن تفك بعد ما تخرجيها م الفريزر .
    3- اللى حصل النهاردة ... هتجنن واعرف حصل ازاى ... اللى هوه ... اختراق وتدمير وحرق مبانى امن الدولة على مستوى الجمهورية ... مين اعطى القرار ... ووصل لمنفذينه ازاى ... وليه ؟ ... وايه دور الجيش ... وفين المخابرات العامة ... وفين المخابرات العسكرية ... وليه ... وليه ... وليه !

    واظن حضرتك عارفة كويس اوى ان الموضوع ده هيجننى .

    سؤال نحيف شوية : بالنسبة للعباسية والسرايا الصفرا شغالين ولا فيهم مشاكل حالياً ؟

    ردحذف
  5. يا خرااااااااااااااااااشى عليكى يا فتافيت

    ضحكتينى لما عنيا دمعت يا بت

    ربنا يسعد قلبك

    :)

    ردحذف
  6. حلوة قوى الصورة يا فتافيت
    بتاعة البنوتة

    ممكن اخدها ف الشريط الجانبى عندى ؟!!

    اتفضلى يا فاتيما
    صورك ومطرحك

    موشكرين يا فتفت

    العفو

    :)

    ردحذف
  7. انا عندى سؤال واحد بس يا رحاب
    ايه نطة الارنب دى عشان انا لسه متعلمتهاش :)

    ردحذف
  8. السلام عليكم

    أنا علقت طبعا في الفيس توك.. لكن كان لازم آجي أساعد في شيل التراب من على المدونة اللي ما اتفتحتش من فترة...

    تحياتي أختي رحاب على الأسلوب المميز في العرض كالمعتاد..

    ردحذف
  9. هاهاهاهاها

    رائع البوست ده

    صحيح شر البلية ما يضحك

    حسبنا الله و نعم الوكيل

    تحياتي

    ردحذف
  10. لا لا فظيعه
    وأصيله أصل
    أصل المصريين
    افتكرت الخطاب التانى للمخلوع والناس بتعيط حوليا
    لا بس عندك حق لازم نشوف حل للموضوع ده
    احنا مش بيتمر فينا اى حاجه

    ردحذف
  11. اقول هنا كمان؟ أضحك الله سنك يا فتاتي الحلوة يا مفتفته

    ردحذف
  12. شمس النهار

    ربنا يضحك عليهم خلقه كلهم
    ويورينا فيهم يوم اسود... على عمايلهم السودة

    نورتيني يا قمر

    ردحذف
  13. مصطفى سيف

    والله يا دكتور انا قولت كده
    قولت لو حد كان قالي ان ده كله هايحصل
    كنت قولت عليه بيضرب حشيش من بتاع القذافي :))

    نورت البلوج :)
    تحياتي

    ردحذف
  14. موناليزا

    طبعا لازم نرد الجميل بزمة
    القفا باتنين.. والفولت بعشرة
    والنفخ بقى.. على قد ربنا ما يقدرنا

    دولة الظلم ساعة يا موني
    نورتيني يا قلبي

    ردحذف
  15. ENG./ELSAYED,PMP

    ههههههههههههههههههههه
    العباسية كانت هاتتهد وهايسرحوا منها المجانين
    المغربي الله يخربيت اهله.. كان عايز يعمل كده
    ومش عارفة ده على اساس ان اللي جوه عقلوا
    ومش خطر علينا خلاص؟!
    ولا احنا بقينا مجانين .. ومش فارقة كتير
    بره من جوه بقى ؟!

    اتفق معاك في كلامك لكن
    ماتنساش ان الهجوم على مقار امن دولة غير متزامن
    بمعنى انه بدأ في الاسكندرية .. وبعدين الشرقية
    وبعدين الكل اخد حبوب شجاعة وهجم

    لكن اللي ممكن يكون ممنهج فعلا
    هو فرم وحرق الملفات في كل المقار

    نورتني يا هندسة :)

    ردحذف
  16. فاتيما

    نقول تاني.. ربنا يضحك عليهم خلقوا
    ويكونوا عبرة وفرجة لكل الناس يارب
    :))

    وبالنوسبة للصورة
    اتفضلي يا اوختشي.. طبعا
    الصورة.. والبوست .. والمدونة
    ومش مهم انا بقى.. اقفل واروح :P

    نورتيني يا جميلة
    والصورة ما تغلاش عليكي يا قمر ^_^

    ردحذف
  17. Che

    ههههههههههههههأ
    افهم من كده انك جربت كل اللي فات
    من كهربا والذي منه
    ووقفت معاك على نطة الارنب يا عمرو :))
    اقعد قرفصاء.. ونط نطة كبيرة... وانت برضو قرفصاء :)))).... اعملها 3 مرات قبل الاكل وبعده
    وهاتبقى فشر باني باني بعد كده
    هع هع هع هع :D
    نورت يا رفيق

    ردحذف
  18. ماجد القاضي

    أ. ماجد.. والله فيك الخير :)
    اردهالك يارب في الافراح

    يارب دايما منورني
    هنا.. وعـ الفيس
    تحياتي

    ردحذف
  19. الشاعر الفنان أحمد فتحى فؤاد

    هو فيه شر.. اكتر من امن دولة
    نفسي اعرف.. فين الامن.. وفين الدولة؟؟؟

    نورت البوست
    تحياتي :)

    ردحذف
  20. بــــ الخطاب ــن

    اه فعلا تصدق
    لا طمر فينا مبارك بتاع اول طالعة جوية في اكتوبر
    ولا حتى شفيق اللي قتل واتقتل في اكتوبر برضو
    وكأن أكتوبر دي زلة ممسوكة ع الشعب
    جتهم اليع عليهم كلهم


    نورتني .. ونورت البلوج
    تحياتي

    ردحذف
  21. كلمات من نور

    خالتو حبيبتي :)
    ههههههههههههههههههههههه
    كل ما افتكر رسالتك.. اموت من الضحك
    ربنا يسعدك يارب.. دنيا واخرة

    تسلميلي يا غالية :)

    ردحذف
  22. صلي على النبي ..



    .


    .
    .
    .
    .
    ..
    .
    .
    .
    .
    .
    .
    .

    .
    .
    ..
    والنبي انتى عثل

    ردحذف

خلل براحتك من غير انتظار .. فتافيت أصلاً بتحب الخيار