23 سبتمبر 2010

ومضات فلاشية.. في نوبة اكتئابية


الساعة 2 بليل
مش عارفة أنام ولا عارفة أصحى
نفسي أغمض عيني وألاقي اللي أنا فيه ده خلص
كل ما أصلي أسلم.. مهو مش هاضحك على نفسيأنا مش مركزة.. ولا فيه أي خشوع
يارب.. أنا تعبت بجد

ساعة آذان الفجر
البيت بيكون هادي.. كلهم بينزلوا يصلواوبفضل أنا وماما.. دخلت البلكونة
بحب أوى السما وقتها.. بحس بربنا أوي
ورددت ورا المؤذن.. وبعدين بدأت أدعي من جوه قلبي

"اللهم إني تركت ما أريد حتى أرضيك..
ورضيت بما أكره حبًا لك.. وأبغضت ما أحب ابتغاء رضاك.. وأحببت ما أبغض حتى لا أعصيك.. فأعني يا مولي على هوى نفسي.. وطوعها لطاعتك.. وحب ما تحب وكره ما تكره.. فأنت المقتدر الرحيم"
طلعت ماما.. أدعي جوه مش لازم الناس تتفرج
سكت ودخلت.. حاولت أصلي كتير بختمصليت قبل الشروق بدقايق

بعد الشروق
لأقيت فلاش باك.. كلام.. ناس
أحداث.. من سنين.. ومن أيام
جبت ورقة وقلم.. وكتبت

أنا.. باللون ده
باللون ده الناس..


- أنا بحبك بجد
- فعلاً، طيب بتحبني ليه؟؟
- عشان اخترتكِ فيكِ كل حاجة بتمناها!
- اخترتكِ..؟؟.. الحب مفهوش اختيار على فكرة!

- غبية واللهي، ديه فرصة عمرك!
- ومين قال لكِ إني عايزة كفن غالي؟؟!

- أنتِ إنسانة متخلفة، ده اسمه ذكاء إجتماعي!
- أنتوا اللي كدابين ده اسمه نفاق جماعي!

- يا بنتي فوقي.. مشكلتك إنك فاكرة
إن الجواز حب وبــس!

- لا.. المصيبة إن الحب عندي جواز وبــس!!

- أنتِ إنسانة قمة في التطرف بجد
يا حنينة أوي.. يا قاسية جداً!!

- مش يمكن ده لأنك قمة في الغباء؟!

- وطي سقف أحلامك شوية بقى!
- أحلامي من غير سقف!


- الكل هنا تحت جزمة المصلحة..!
- عندي أنا ومصلحتك ديه تبقى حافية
- هاتفشل .. فاشلة..!
- ملعون أبو النجاح اللي يطلع من تحت الجزم.

- حرام عليكِ بقى.. خايفة القطار يفوتك!
- مهو لو سمعت كلامك.. هايدوسني!!

- مش خايف إن مراتك تخونك.. زيك؟!
- لا هي بنت ناس.. ما تعملش كده!
- ده على أساس إنك بتخونها مع ولاد كلب؟؟

- نفذي الأول وبعدين نتناقش!!
- وإيه لازمته بقى النقاش؟
- عشان ما يبقاش فيه حاجة في نفسك!!!
- دماغك ديه؟؟ فعلا الصين ما سابتش حاجة!

- أنتِ ليه مش فاهمة.. أنا راجل جميل!!
- شششش بس ما تقولش راجل!

- ما أتعودتش عليكِ تملي الأمل!!
- الأمل هو اللي مل مني!

- شخصيتك القوية ديه تخلي أي راجل يحبك
بس بجد يخاف يتجوزك...!

- يمكن لأني ما قبلتش راجل بجد؟؟!

- أنتِ فاكرة نفسك مين؟؟؟
أنا اللي زيّ ما يترفضش أبداً..!

- فعلاً.. بس اللي زيّ ما تقبلكش!!

- ............. أ ء ء..... ما علينا..!
- كده خلصت خلاص!!

مش لازم يكون كلامي مفهوم.. أو حتى له لازمة
بس بجد أنا في أصعب فترة عدت عليا في حياتيمــش قـــــادرة بــجد خــــلاص...
يارب ثبتني وصبرني

هناك 37 تعليقًا:

  1. شخصيتك القوية ديه تخلي أي راجل يحبك
    بس بجد يخاف يتجوزك...!
    - يمكن لأني ما قبلتش راجل بجد؟؟!

    كم شقى أصحاب العقول والقلوب بأنفسهم؟!!

    ردحذف
  2. الصبر ...عند المصيبة .. يسمى ايماناً
    الصبر.. عند الاكل .. يسمى قناعة
    الصبر .. عند حفظ السر .. يسمى كتماناً
    الصبر .. من اجل الصداقة .. يسمى وفاء
    الحوار اللى بينكم جميل اوى بس الناس مبيسمعوش اساسا بتمنالك ان اللى الحزن اللى فيكى يتغير ويكون وردة طرحه بين ايديكى

    ردحذف
  3. السلام عليكم
    تمر
    علينا الايام بمواقف
    صعبه جدأ
    تشعرنا
    اننا كبرنا مائه عام
    لحكمه يعلمها الله
    لصبر نتعلمه
    لقرب منه بعد انا كنا
    بعدنا0الله اعلم
    ولكن الصبر الصبر
    قيل في الاثر ولا اعرف المصدر
    الا من الدكتور عبد الحليم محمود
    ان لله مع كل نفس مائه الف فرج قريب
    فالفرج أت ولا يوضع العبد في امر الا وهو أهل له فلايكلف نفسا الا ما تسع
    اختي
    دعائك رائع واظبي عليه
    اسف للإطاله
    فرج الله كربك

    ردحذف
  4. البوست ده تحفه على فكرة بجد والله وراه معنى معزى ممكن يكون شكلو غريب بس عجبنى اوى اسلوب الفعل وردت الفعل اللى ف الكلام يعنى يقول حاجه وهى ترد عليه او العكس ردود افعلا طبيعيه جدا وفيها كتير ردود لطيفة اوى ربنا يوفقك اكيد دى هتبقى مش الزيارة الاخيرة وهفضل ديما متابعه كتاباتك بشغف....منه

    ردحذف
  5. يااااااااااااه أزاى اجى متاخر كدة ع البوست دة

    شوفى يا فتافيت

    على فكرة انت افكارك زى افكارى بالظبط علشان كدة

    الناس لما بتكلم احيانا كتير بيفهمونى غلط

    يعنى فى مرة نزلت بوست عندى و قلت فيه انى ممكن اكون ضيعت الحب من ايدى و بغبائى و تسرعى

    و ردت عليا لأول و اخر مرة اللى انا بأكتب علشانها

    و قالت ليا انت مضيعتنيش علشان ممتلكتنيش

    طبعا انا رديت عليها انى عمرى ما فكرت انى اكون امتلكتك او افكر

    لو ان الأمتلاك باتفكير دة

    يا بنتي فوقي.. مشكلتك إنك فاكرة
    إن الجواز حب وبــس!
    - لا.. المصيبة إن الحب عندي جواز وبــس!!

    دى فكرتى عن الحب

    ممكن اخوض التجربة و ما يحصلش نصيب بس فى تفكيرى الأساسى ان الحب اخرة الجواز

    ربنا معاكى يا فتافيت

    و معلش لو كان البوست عندى ضايقك و لا حاجة

    انا اسف جدا فعلا

    ربنا معاكى

    ردحذف
  6. ارمى بكلام الناس عرض الحائط
    ايه يا بنتى انتى محسسانى انك عندك 100 سنه وقطر الزواج فات

    الصبر مع الصلاه ربنا حيعوضك خير
    صلى وادعى من قلبك وانا كمان ح ادعيلك ربنا يفرح قلبك ويلهمك الصبر واحتمال الاقاويل اللى ولا تودى ولا تجيب

    ردحذف
  7. أزال أحد مشرفي المدونة هذا التعليق.

    ردحذف
  8. السلام عليكم
    قولي الي نفسك بيه
    متخليش حد يزعزع ثقتك
    دي الصفة الحلوة فيكي انك قوية
    ومتاخذيش بكلام الناس
    ربنا يفك ضيقك ويصبرك
    ويبعد عنك الحزن
    امين يارب.
    سلامي

    ردحذف
  9. أنا مبسوط جداً من الفترة دي :) علشان الفترات دي هي فترات النضج الانساني والدليل أننا عندما نضع اللحم على النار ينضج ... بجد اسلوبك اختلف كتير بسبب ثقل التجربة وده مشاهد

    واستعينوا بالصبر والصلاة

    تحياتي :)

    ردحذف
  10. أنا فاهمة على فكرة .. أصل كلامك بالنسبة لى واضح جدا وكأنى بعيد قراءة ما كتبته زمان

    مش عارفة اقولك ايه لانى عارفة مرارة وصعوبة الاحساس اللى انتى حساه دلؤتى

    بس ممكن اصبرك بأنه كل شئ هيعدى
    اطمنى
    اهم حاجة انك ماتخسريش نفسك مهما حصل

    ردحذف
  11. يا فتفوتة استعيني بالله وقربي من بابه حتلاقي نفسك أحلى و أجمل و مش حتحزني من أي بني آدم علشان الصلة بينك وبين ربنا حتخليكي ترددي : ما بيني وبين الله عمار ........دمتي في محبة وسلام

    ردحذف
  12. ستيتة حسب الله الحمش

    هانعمل إيه يعني.. نصيبنا بقى
    سبحان الله وكأن الانسان المفروض يستعمل حاجة واحدة بس يا قلبه يا عقله
    وكأن أبوشن الاتنين سوا ماتخلقناش بيه!!
    حاجة تجيب اكتئاب اكتر مانا مكتئبة اصلا :)

    نورتي يا قلبي
    مووووة

    ردحذف
  13. الــحــــنـــــــــــــــــــين

    نورت فتافيت على فكرة مدونتك حلوة اوي
    ومتشكرة اوي على تعليقك على البوستات اللي تحت

    كلامك صح جدا طبعا
    ربنا يثبتنا على الصبر

    وماليش دعوة.. هاستناك كل بوست :)

    ردحذف
  14. محمود(باحث عن حب)

    ونعم بالله يا محمود
    انا ثقتي في ربنا كبيرة.. مؤمنة بيه ومتأكدة إن كل حاجة بتحصلي فيها حكمة.. حتى لو عقلبي البشري بادراكه المحدود مش قادر يعرفها

    وميرسي اوي على دعوتك ليا
    ربنا يبارك فيك

    ردحذف
  15. mena

    اهلا يا قمر.. البلوج نور
    مبسوطة إن مدونتي عجبتك.. زي بالظبط ما مدونتك عجبتني :)

    تعرفي ان افضل طريقة لتعلم اي درس
    هي النقاش.. الفعل ورد الفعل
    هايفضل الكلام وقتها منقوش جواك إلى ما شاء الله

    وطبعا شرف ليا متابعتك يا جميل
    هستناكي كل بوست :)

    ردحذف
  16. Ramy

    تعرف ان ده نصيب المختلفين
    دايما ما بيلاقوش اللي يفهمهم بجد
    وفي الاخر يتهمومهم بانهم.. ناس اطوارها غريبة
    عااااااااااااا بقى

    البوست بتاعك جميل
    وجماله انه جه في وقته معايا
    سامحني لو كان تعليقي ضايقك :)

    يارب دايما منور فتافيت

    ردحذف
  17. mrmr

    لا والله ابدا عمري ما حسيت اني كبيرة
    ده ديه في حد ذاتها مصيبة.. من يوم ما كان عندي 16 سنة
    وانا جوايا ماكبرش.. ولا بحس بعمري
    يمكن بكبر بالايام.. لكن جوايا لسه صغيرة
    ويمكن من غير مبالغة طفلة

    المشكلة في الناس اللي حواليا.. اوووووف
    شيء ممل ومتعب جدا.. يارب صبرني

    ربنا يخليك ليا
    وما يحرمنيش منك ابدا :)

    ردحذف
  18. الغير معرف

    ياريت يكون فيه احترام للبوست اللي انت دخلته
    ما يبقاش انا بتكلم عن مشاعر جوايا.. وطوفان حزن

    وداخل انت تعمل اعلان عن مقال
    طيب والله مانا قرايه.. حتى لو كان مفيد

    اوعى تفتكر انك مش هاتحترم كلماتي اللي مكتوبة
    وانا هاحترم دعوتك والبيها

    عامل الناس كما تحب ان تـُعامل

    ردحذف
  19. رشا

    ربنا يخليكِ يارب..
    يارافعة معنوياتي :))

    منورة البوست
    والمدونة كلها بتعليقك

    واتمنى زيارتك تتكرر
    تحياتي

    ردحذف
  20. تامر علي

    يا ساتر يا ساتر.. يا ساتر لدع :)
    طيب واسيني.. قولي ما تزعليش.. روقي
    اي كلمتين كده يا عمونا
    مش في وشي مبسوط بالفترة ديه ههههههههههههههههههههههههههههه

    عارفة والله يا تامر ان اللي انا فيه هايفدني
    وفعلا انا اتعلمت كتير.. واكيد لسه هاتعلم
    ويمكن ديه حكمة ربنا سبحانه وتعالى

    بس لو تعرف حد.. يوطي النار شوية
    اصل كده مش نضج.. ده شوي واحتمال اشيط :))

    يارب دايما منور مدونتي

    ردحذف
  21. موناليزا

    حبيبة قلبي :)
    والله عارفة انه هايعدي يا موني
    ده مش ثقة فيا.. بس ثقة في رحمة ربنا

    انا كل اللي انا فيه ده
    عشان مش عايزة اخسر نفسي.. ولا ازعل ربنا مني

    منوراني يا جميلة

    ردحذف
  22. كلمات من نور

    ربنا يريح قلبك.. ويسعدك يارب
    كلامك بجد ريحني كتير.. يارب يفضل دايما
    بيني وبين ربنا عز وجل عمار

    بحبك في الله.. اووووي

    ردحذف
  23. بين سطورك وجع كبير انا حساه
    ومعظم كلامك مفهوم
    ربنا يعينك ويفك كربك


    انتى جميله قوى حتى فى حزنك يافتافيت
    بحبك بجد

    ردحذف
  24. عاشقه الرومانسيه

    دودو حبيبي.. والله أنا اللي بحبك موت

    هو فيه وجع يمكن.. الله المستعان
    وجميل إنك فهماني.. وأكيد
    ده عشان انتِ حساسة بجد

    أنتِ الأجمل والله
    مووووة

    ردحذف
  25. الله
    و فسريها زي ما انتي عايزة

    ردحذف
  26. معلش نسيت
    انا بشبه على المطربة اللي بتغني دي مين دي بتفكرني بانسانة عزيزة عليا ووحشاني جدا
    الله يسمحك يا فتافيت البوستات بتعتك بجد تحفة و حتى اختيارك لاغاني

    ردحذف
  27. " لا.. المصيبة إن الحب عندي جواز وبــس!!"

    احييكِ على منطقك المحترم وثقتك بنفسك

    بجد ردودك رائعه جدا

    ان شاء الله ربنا هيوفقك

    على فكره انا مأخدتش بالي من التاج
    بس خلاص ان شاء الله هجاوبه البوست الجي

    تقبلي مروري وتحيتي

    ردحذف
  28. عجبني أوي الدعاء اللي في أول البوست
    لمسني جدا جدا
    الحمد لله إنك شايفة انتي فين وبتعملي ايه
    والهم والكرب إن شاء الله إلى زوال
    ربنا يفرج همك عاجلا غير آجل
    مش عارفة أقول لك حاجة غير كده

    ردحذف
  29. ربنا يهون عليكى
    ومتقلقيش كل شئ بوقته
    وسيبك من كلام الناس

    ردحذف
  30. سحساوي

    يا سحس يا جامد .. ^_^
    ديه مطربة سمراء اسمها Jordin Sparks
    الاغنية ديه اغنيتها الوحيدة اللي علقت معايا
    كلها أمل في بكره وتفاااؤل
    ومعرفش بقى هي تشبه مين بالظبط
    بس لو فهمت صح عاقولك حرام عليه ده التانية
    قمر قمر قمـــــــر ^_*

    ردحذف
  31. قلم رصاص

    منور والله البوست
    وانا منتظرة اجابة التاج يا عمنا :)

    ومتشكرة جدت على تلبيه الدعوة

    ردحذف
  32. يــوم جــديد

    يااه من زمان ما شوفتش لك تعليق هنا
    والله مبوطة اوي انك زرتيني :)

    وربنا يكرمك على الدعاء ليا
    تسلمي يا رب :)

    ردحذف
  33. محمود(باحث عن حب)

    والله ما اعرف يا محمود ممكن تعمل ايه
    بس كتير الريدير بيعلق معانا
    يارب تكون لاقيت حل للمشكلة

    ردحذف
  34. عمرو يسرى

    عندك حق.. وعلى فكرة
    كلام الناس عندي مالوش اي قيمة
    مادمت بعمل اللي يرضي ربنا اولا واخيرا
    واكون راضية عليه جدا

    نورت البوست

    ردحذف
  35. لا
    بجد حوار راقي
    وقناعة عالية بالصح ربنا يثبتك
    ويعينك على الصبر

    ردحذف

خلل براحتك من غير انتظار .. فتافيت أصلاً بتحب الخيار