07 سبتمبر 2010

حصاد رمضان.. لهذا العام



كل سنة وأنتم وإحنا وهم طيبين
عيد مبارك على الجميع إن شاء الله
ويارب ينعاد علينا.. بالخير والبركة


رمضان السنة دي كان غير كل رمضان عدى عليا
حسيت إنه جه فجأة ومشي فجأة.. وكان فيه مليون مفاجأة
ولأن بكره إن شاء الله إحتمال كبير
يبقى أخر رمضان
قولت أحلق بقى أنزل لكم
حصاد رمضان.. بتاع السنة دي


في رمضان السنة دي..
أول أسبوع فيه يطلع لنا ساركوزي بفتوى مضحكة
فتوى الكرواسون والقهوة
اللي لا يبطلوا صيام مسلمي فرنسا.. لأنها عادة
وربنا ما يقطلعوكم عادة بقى
وأخر أسبوع فيه يطلع الشيخ القرضاوي بفتوى صادمة
فتوى تبيح غناء النساء
بس بشرط تكون على غرار ست الحبايب مثلا
وهكذا بقت فايزة أحمد.. قدوة ومثل يقتضى به
ربنا يخرجنا منها على خير


في رمضان السنة دي..
كل يومين تختفي بنت مسيحية
المسيحيين يعملوا مظاهرة
وبعدين يقولوا أسلمت
المسلمين يعملوا مظاهرة
إيه الفراغ والفضا اللي بقينا فيه ده؟؟؟
يعني مش فاهمة بجد.. ولو حد فاهم يفهمني
يعني الإسلام مستني الأخوات عشان ياخد قيمته؟؟!
ولا المسيحية هاتضيع قيمتها لو سابوها؟؟!
ماتعقلوا بقى.. ده كلنا في الهم سوا



في رمضان السنة دي..
عرفت قد إيه احنا ناس أصيلة أووي أوي
لما نبيع .. نبيع برخيص لكن نشتري غالي.. أوي
بعنا الغاز لاولاد عمنا.. ورجعنا نشتري
بسبع أضعاف السعر
والنبي ناس أصيلة أصلنة
متأصلة بأصالة



في رمضان السنة دي..
نسينا إننا في شهر رمضان الكريم
شهر الطهر والنقاء
وهات يا صور للبرادعي ومراته وبنته
وهتكنا خصوصيتهم
مرة ومراته قصادها خمر.. ومرة بينته بمايوه
وقموا الدنيا.. ولسه مش لاقية كرسي تقعد عليه
عشان بنته ملحدة.. واتعموا تماما عن نسبة الالحاد
اللي عمالة تزيد في مصر.. وكأنهم مش حاسين
كام ألف ملحد في البلد
شايل اسم مسلم أو مسيحي



في رمضان السنة دي..
عرفت إننا شعب طيب وغلبان بس له قضية
ساب كل حاجة بتحصل في البلد.. من أزمة كهربا
وأزمة غاز وماية وعيش.. والجوع اللي بينهش فينا
وعملوا حاملة لإنقاذ ميصلحي.. !!



ده هو أصلا عايز الإعدام.. عشان اللي هببه
إحنا شعب مستهلك.. نتخرع ليه بقى؟؟
أوعى حد يشتري كاكالوب ديه
وإيكش تولع يا مصيلحي يا رب



في رمضان السنة دي..
الكل ثاير وناره قايدة.. عشان حلقة نبيلة الهبيلة
اللي اتذاعت في مسلسل كويتي
وتسيء للمرأة المصرية
وغضوا الطرف كلهم عن مسلسل
زهرة وخرفانها الخمسة
اللي مش بس بتسيء للمرأة المصرية
ديه حطت راسها في الطين
ومش بس كده.. بمنتهى السفالة والوقاحة
بيتشدقوا بلقب الحاجة زهرة
وقال زعلانين أوووووي
عشان نبيلة الهبيلة.. جتكم خيبة
شوفوا مسلسل زهرة بيبع كام إعلان..!
نضفوا اللي جوا الأول
اللي برا هاينضـــف بعده



في رمضان السنة دي..
يطلع لنا خبر غريب أوي يبقول
عايزين كنيسة في السعودية!
طيب عن نفسي أنا موافقة . بس بشرط واحد
عايزين مسجد في الفاتيكان
وسعت مني صح؟؟!...
ومحدش يقوللي أصل
الفاتيكان مافيش فيها مسلمين
عشان هارد.. وأقوله
إن السعودية أراضي إسلامية مقدسة.


في رمضان السنة دي..
تطلع لنا الحكومة وتقول.. إن
الأزمة بتاعة الكهربا والماء والغلاء
تضاعف من أجر الصائم.. وهنيالك يا شعب مصر
ونسيوا إن الله يضاعف الأجر لمن يشاء
والفتااااااااين كتير.. عاااااا
طيب يارب يفتكروا إنهم باللي بيعملوا فينا
ممكن يقطع عنهم الأجر أصلا
يارب...... أنت عارف بقى



في رمضان السنة دي..
زراير ساعاتنا باظت.. وعايزين بدل زراير بقى
الساعة البيلوجية بتاعة الشعب اشتكت خلاص
وبقت ماشية بصاجات وبتقول..
أصل أنا عندي ساعة
شهر تروح.. وشهر تيجي
هااااااا

بمناسبة رمضان بقى..
التعليقات عندي في صدقة جارية مختفية
محدش عنده حل.. وهنيالك يا فاعل الخير
وحسنة قليلة .. تمنع بلاوي كتيرة

*¨*•.¸¸كل سنة وأنتم طيبين¸¸.•*¨*



هناك 14 تعليقًا:

  1. الأول كده

    كل سنه و انت طيبة

    و يا له من شهر زاخر (:

    بالنسبه لحل المشكله مش عارف

    بس افهم من كده ان تعليقى مظهرش انا علقت على اول تدوينه

    وياااه تعليقاااه

    و يعيد علينا الأيااام بخير (:

    ردحذف
  2. والله كلامك يغم بس ايه الغباء ده ما كل حاجه بتغم فى بلدنا دى مش عارف لما قريت البوست غمقتيها فى عينى اكتر مهى غامقه
    المهم كل سنه وانتى طيبه

    ردحذف
  3. كل سنه وانتى طيبه
    عيد سعيد

    ردحذف
  4. صباحك معطر بالورود..
    المرة دي الفتافيت جمعت كل حاجة في رمضان..

    "وإيكش تولع يا مصيلحي يا رب"
    بجد ضحكتني قووووي الجملة دي حاسسني شايفك والشرر يتطاير من عينك وبتقوليها من قلبك في ليلة القدر (';' )

    بالنسبة لموضوع المسلسلات والهبل اللي فيها فا الحمد لله على نعمة الانشغال التام وعدم وجود وقت (اضيعه) فيها :)

    وبالنسبة لموضوع الساعة فا دي غلطتك انت.
    المفروض كل مواطن يبقى عنده 3 ساعات..
    واحدة صيفي.. وواحدة شتوي.. وواحدة كده وكده :)

    كل سنة وايامك كلها اعياد :)

    ردحذف
  5. اولا حمد الله بالسلامه
    وثانيا كل سنه وانتِ بالف صحه وسعاده
    ثالثا رمضان السنه دى فعلا مختلف كتير عن اى سنه تانيه

    على جنب كده
    فين الكحك وحلويات العيد والعيديه منتظراها تجى لغايه عندى
    ربنا يجعل ايامنا كلها اعياد

    ردحذف
  6. دا انا كنت فاكر ان رمضان السنه دي حلو

    رغم ان كل اللي انتي قولتيه النهاردة انا عارفه وعاصرته خبر خبر بس مكنتش حاسس بيه زي دلوقتي
    لأنك جمعتيهم كلهم وخبطتيهم مره واحده هههههه

    عجبني اوي النقطه دي:
    "كام ألف ملحد في البلد
    شايل اسم مسلم أو مسيحي"

    فعلاانتي لخصتي بالجمله دي كل حاجة

    كل سنه وانتي طيبه وعيد سعيد عليك وعلى الأسره وكل المسلمين

    ردحذف
  7. كل عام وانت بالف خير تقبل الله منا ومنكم

    ردحذف
  8. كل سنه وانتى طيبه
    خايف عليكى من الضغط والسكر

    الدنيا حلوة والله
    بس
    كبرى دماغك ويه
    مش معناه نكون امعه نحسن اذا احسن الناس

    حافظى على نفسك
    انا تعبت من كتر القرايه فى جرايد المعارضه
    وبرامج التوك شو
    علشان كده انا عندى
    تشبع
    تعب
    علشان
    مش قادر اغير صح
    امشى ورا
    المايو
    ولا
    ورا اكياس الدم الملوثه اللى طلع صاحبها براه


    كل سنه وانتى طيبه

    ردحذف
  9. يالهووووووووووووي

    انتي فاض بيكي الكيل

    ومعاكي حق انا مرارتي اتفقعت اصلا


    بس سؤال عشان مش متابعه مين مصيلحى:)

    كل سنةوانتي طيبة ياقمررر

    ردحذف
  10. كل سنة وانتي طيبة عيد فطر سعيد
    تحياتي

    ردحذف
  11. عجبنى الرصد ده
    ولسه يا ما هنشوف

    كل سنة وانتى طيبة

    ردحذف
  12. كل عام وانتى بخير

    والله يتقبل منك طاعتك وعبادتك

    ردحذف
  13. كل سنه وانتى طيبه ياروح قلبى

    عيد سعيد عليكى وعلى كل احبابك يارب

    بخصوص الفتافيت فبجد هم يضحك وهم يضحك بردو

    كفاااااااايه اكتؤاب

    مفيييييييش فايده ههههههههههههه

    ردحذف
  14. في رمضان السنة دي..
    يطلع لنا خبر غريب أوي يبقول
    عايزين كنيسة في السعودية!
    طيب عن نفسي أنا موافقة . بس بشرط واحد
    عايزين مسجد في الفاتيكان
    وسعت مني صح؟؟!...
    ومحدش يقوللي أصل
    الفاتيكان مافيش فيها مسلمين
    عشان هارد.. وأقوله
    إن السعودية أراضي إسلامية مقدسة.
    ===============================

    سبحان الله يا فتفوته يا شقيه أخدتيها من على طرف لساني والله .......عيد سعيد يا فتاتي

    ردحذف

خلل براحتك من غير انتظار .. فتافيت أصلاً بتحب الخيار