18 أبريل 2010

حد ضايع منه كوبري؟؟؟

الساعة 4 الفجر.. الواد جاتله سخنية شديدة.. أمه قلبها أنفطر على أبنها
شالته على كتفها جري.. وخدت أبنها التاني في أيدها.. ونزلت بسرعة
على أقرب مستشفى..
جوزها فران على قد حاله
عنده ورديته للفجر في اليوم ده.. نزلت لوحدها
راحت تركب عربية توصلها لمستشفى إمبابة.. فالسواق قالها أسهلك تنزلي تحت الكوبري
وتمشي لحد المستشفى.. خدت ديلها في سنانها.. وعيل على كتفها قايد نار بيموت
وعيل في أيدها عنده عشر سنين.. عشان تلحق الطفل الرضيع من الموت..

وعلى الكوبري .. قام الواد اللي في أيدها واقع من حفرة في الكوبري
وقع من أيدها.. وقع في حفرة 40سم*80سم..
وقع الواد .. ومات لأن الحفرة العمود اللي فوقيها مش منور
وقع الواد.. ومات غرقان قصاد أمه

طبعا قمة الإهمال.. لما الواد يقع من أيد أمه.. المفروض كانت تربطه بسلسلة وكلبشات!
طبعا قمة الإهمال.. لما الواد يقع من تحت عمود مطفي.. مالبسش الكوتشي اللي بينور ليه؟؟؟
طبعا قمة الأهمال.. لما الواد يقع من حفرة 40*80.. المفروض كان نقى الحفرة المخصصة للاطفال!!.. هي فوضى ولا إيه.. ديه حفرة مقاس راجل كبير!
طبعا قمة الإهمال.. لما الواد يقع عشان أمه نزلة الفجر.. وديه قلة تربية برضو.. لو كانت ربت أبنها كويس كان سخن الصبح والدنيا نور.. وكان شاف الحفرة اللي هايقع فيها.. ونقى المخصصة للاطفال!
طبعا قمة الإهمال.. لما الواد يقع في الحفرة ديه.. يعني دولقتي لو واحد كبير عليه الدور يقع.. يعمل ايه بقى؟؟.. يروح حفرة الأطفال ويتزنق فيها قبل ما يقع.. ولا نديله وش صابون.. لزوم الزحلقة؟؟

الواد ده.. المفروض.. نعدمه على الإهمال والتسيب ده كله!!!!
واد مش متربي صحيح..
واد يستاهل يموت غرقان
آآآآآآآآآه يا قلب أمك يا ضنايا.. :(

المسؤولين.. قالوا أن الحفرة ديه..
تسمح بسقوط أي شخص بدون أحداث إصابات فيه أثناء السقوط!!
ويا حناااااااااااان الأم.. سسسسسسسسس..
أحفـــــــــــــــــــر
قلب خصاية يا ناس.. الدمعة هاتفر من عيني؟؟؟ حفرة كونفرتااااااااابل

حفرة.. تقع منها من غير ما تحس.. يعني
مادمت هاتقع إن بابلك.. ووز أويت فيلنج
يبقى سوووووووو واااااااااات..
ليه تقع متعور.. لما ممكن تقع وانت سليم!

الكوبري.. أبو فتحة 40*80 سم..
طلــــع أبن حــــرام
هيئة كباري القاهرة.. تنكر نسبه لها..
وهيئة كباري الجيزة تنكر النسب أيضا
يعني الكوبري ده.. طلع شياطني؟؟

أم الكباري في المولد بتاع سيدنا أبو الكباري الكبير..
ووقع منها الكوبري وهو صغير وتاه وماحستش بيه؟؟

ولا كان فيه شوية حديد وأسمنت ..
طلعين شيطاني.. قوم الدنيا مطرت ونبت الكوبري؟؟
حاسة أن الكوبري ده ساقط قيد.. والنبي ممكن؟؟

ولا الكوبري ده لاقيط؟؟..
يمكن أم الكباري غلطت مع كوبري ولما فضحتها بانت..
حطت الكوبري ده على شط النيل؟؟؟

الكوبري مش تبع القاهرة.. ولا تبع الجيزة..
يمكن تبع بني سويف؟؟

ولا الكوبري ده .. جمهورية مستقلة بنفسها...؟؟
الكوبري ده.. وقع من مين يا ناس؟؟؟
حد ضاااايع منه كوبري
:@ :@

هناك 19 تعليقًا:

  1. أم الكباري فكرتني بأم المعارك
    حسبنا الله ونعم الوكيل
    وربنا يصبر قلب أمه اللي اتقسم علشان كوبري لقيط

    ردحذف
  2. مساء الفل
    فتفوتة يا بنتي خلي عنك المسؤولين و اتكلمي على قدك لا يجي لك الامن القومي و يبيتك في الحجز لتهمة المساس بالامن القومي للكوبري
    الصبي مش اول و لا اخر واحد حيموت بسبب الاهمال و امنا لا اقول اهمال المسؤولين بل اهمالنا احنا اللي خليناهم يتحكموا فينا و في مصائرنا
    و ايه يعني لو مات الولد يبقى ينقص من الكثافة السكانية الغير النشيطة لمصر
    ربنا يرحمه

    ردحذف
  3. حسبي الله ونعم الوكيل

    حسبي الله ونعم الوكيل

    الواحد بجد يعمل ايه في الناس اللي مش بتحس ومعندهاش رحمة ولا دم

    يارب رحمااااااااااااك

    حسبي الله ونعم الوكيل

    ردحذف
  4. الكوبرى دة بتاعى
    لو سمحتى ابعتيه
    دة كوبرى قليل أدب خرج من البيت من اسبوع قالى رايح اسبوع شباب الجامعات فى القاهرة وماعرفش انه رايح يتلطع على الكورنيش ويصيد عيال صغيرين
    هو لو كوبرى محترم كان صاد بنات مزز
    لكن باين عليه طلع كوبرى منحرف

    ابعتيه وانا هفكه وابيعه خردة ادباً له

    أللهم لا نسئلك رد القضاء ولكن نسئلك اللطف فيه

    ردحذف
  5. ربى انى لا اسألك رد القضاء و لكن اسألك اللطف فيه

    ردحذف
  6. مش عارفه اقولك ايه
    انتى قولتى كل الكلام

    ربنا يصبر امه و يصبرنا على ما بلانا

    ردحذف
  7. "انا لله وانا اليه راجعون"

    نسيتي تقوللي اللي انقح كمان

    ان الام المكلوبة على ابنها الميت الام التي فقدت فلذة كبدها هذه الام اتعمل لها محضر اهمال " يعني ممكن يحبسوها كمان "

    و كمان سيادة المحافظ بيقول انه لازم يعرف ان فيه حفرة في الكوبري و نسي او اكيد ميعرفش ان سيدنا الفاروق عمر رضي الله عنه وارضاه الذي حكم مشارق الارض ومغاربها قال " لو تعثرت دابة في الطريق لسؤل عنها عمر "

    دابة يا بشر يعني لو حمارة وقعت حيتسأل عنها امام الله فما بالكم بالبشر

    نسوا او تناسوا انهم عنا مسئولون

    " كلكم راع فمسؤول عن رعيته ، فالأمير الذي على الناس راع وهو مسؤول عنهم " صحيح البخاري


    مش عارف ابكي على حال ام الطفل و ابيه ام افرح لهذا الطفل الذي ارتاح من هذه الدنيا و غمها و الذي ضمن مقعده في الجنة لأنه لم يبلغ الحلم ولم يجر عليه القلم


    ربنا افرغ علينا صبرا و توفنا مسلمين

    ردحذف
  8. أولا الله يسمحك على التوبك اللي يقطع القلب ده
    ثانيا : صلة الله على محمد لما اتكلم عن اماطت الأذى عن الطريق
    ثالثا : انا لا ابرر خطأ المسؤلين ( لأنهم بيقبضوا مهايا هشان يراعوا مصالح البلاد و العباد فهم مسؤلين من الشعب ، و أمام الله في الأولى و الآخرة ) لكن
    أبن الناس كان مفروض حد بضع تحذير أو تنبيه أو يحاول يسدها ب(حتة خضبة )
    و لكن حسينا الله و نعم الوكيل البقاء لله في البلد كلها

    ردحذف
  9. الكوبري لم يرث من أمه حنانها ولم يرث من أبيه تحمله للمسئولية
    عشان كده اتبروا منه وقاله لا كوبرينا ولا نعرفه ولو حد سألنا
    طنش واعمل اطرش
    هو يعني اللي وقع كان من بقية كوبريهاتنا؟؟؟
    ولا كان اسمه فريدة !!

    معلش يا ابني
    كل حد له في الكوبري طوبة مسئول عنك
    وكل حد مر على الكوبري وقال وأنا مالي شايل من ذنبك
    معلش يا ابني
    ربنا رحمك

    ردحذف
  10. حسبنا الله ونعم الوكيل

    ربنا يصبر أهله
    وياخد أي مسئول معندوش ضمير

    ردحذف
  11. الكوبري ده هيطلع المسئول عنه في الآخر البرادعي وهيمنعوا رجوعه من أمريكا بسبب الكوبري ... أو مخبر في الداخلية يشيل القضية ... أو يشنقوا الأم عقاباً على إهمالها وعلشان يريحوها من عذاب الثكل وبعدين يصرفوا للعائلة معاش 15 جنية سنوياً

    طالما محدش بيتكلم من حقهم يختاروا أي حل من دول

    الله يحرقك ياللي في بالي :)

    ردحذف
  12. ويا حناااااااااااان الأم.. سسسسسسسسس..
    أحفـــــــــــــــــــر
    هههههههههههههههههههه
    ياقلبك الحنين يا فتافيت
    انتى بتتكلمى على انهى كوبرى فى مصر ؟؟
    ابن مين الكوبرى ده ؟
    خاله مين ؟

    ردحذف
  13. الكـابوس المصــري20 أبريل 2010 في 3:37 م

    الله يرحمه ويصبر أسرته ...

    المقال ممتع , ولكن الحدث مفجع..

    فاعتذر عن عدم التعليق

    ردحذف
  14. ربنا يرحمه يارب ويصبر اهله فعلا حاجه صعبه جدا ومنقدرش نقول غير حسبنا الله ونعم الوكيل

    ردحذف
  15. و الله يا بنتي كنت لسه باقول ان الحكومه عايزة شعب احول مش اعمي

    عشان الاحول بيشوف عكس الحقيقة

    و الحفرة مش ممكن تموت لانها مصممه انها ماتموتش
    يبقي العيب في مين

    يرد الشعب الاحول

    العيب في اللي مات لان اجله جه في لحظة سقوطه

    احول


    تحياتي

    ردحذف
  16. كنت قريت القصة قبل كده فى الاخبار

    بس بصراحة

    اول مرة اشوف تعقيب المسئولين
    يمتلكون من البجاحة للرد على اى شىء

    والصراحة هما كانوا مخصصين الحفرة لوقوع الطوال بس من غير ما يحسوا
    مش عاملين حسابهم ان فيه قصيرين ممكن يقعوا

    ردحذف
  17. فتافيت
    ياااااااااااااااه
    والله وحشانى جدااااااااا

    والله مش مخاصماكى ده الريدر ربنا ياخده مهييس معايا خالص ومش بعرف اتابعك


    معلش يا قمر مش تزعلى ابدا ابدا

    بس بجد كنتى فين وايه الغيبه دى كلها

    انا منتظره اجابتك ع التاج يا قمر عشان نتعرف عليكى

    ردحذف
  18. انا وقع منى كوبرى من شهرين محدش شافه
    ممكت يكون هو بس كان واقع منى هنا فى المنصورة راح القاهرة ازى ؟؟؟

    ردحذف
  19. معلش يا حبايب قلب فتافيت
    نزلت البوست الجديد.. قبل ما ارد عليكم
    في المساء والسهرة.. هارد عليكم نفر نفر ان شاء الله

    ردحذف

خلل براحتك من غير انتظار .. فتافيت أصلاً بتحب الخيار