مرحلة.. انتقالية.. لتاريخ مصر..!!

فكرت كتير أقول إيه في البوست ده نظرا لوجود أحداث كتيرة على الساحة
يعني مثلا.. ياترى أتكلم عن إلغاء نظام الإنتساب في الجامعات المصرية؟!
ليه بقى؟؟.. قال إيه لأن الجامعات بتاعة الحكومة فيها دلوقتي مليون و 600 ألف طالب!!
والجامعات الخاصة فيها 85 ألف بس؟؟.. يعني مافيش تكافؤ في السرعات!!
فبقى الحل أن ولاد الناس الفقرة ماتتعلمش تعليم عالي أصلا.. مادام مجموعها ماجبش كلية إنتظام
وطبعا أصلا مش هايجيبوا مجموع عالي... لأن مافيش فلوس ياخدوا دروس في الثانوية العامة
وليه بقى مافيش فلوس؟؟..

ده كان الموضوع التاني اللي كنت عايزة أتكلم فيه اللي هو
إن ما شاء الله.. اللهم لا حاسد متوسط الدخل الشهري للفرد المصري بقى 94 جنيه
زمان لما أبو جريشة عمل أغنية 145 جنيه.. كلنا أتريقنا ..أهم بقوا 94 جنيه وبس
طيب بالزمة.. 94 جنيه في الشهر ممكن يعملوا إيه للفرد المصري؟؟
وقال إيه اللي دخله 165 جنيه .. يبقى تحت خط الفقر زي ما اليونيسكو بتقول
معنى كده إننا في مصر.. عملنا خط جديد إيكسكلوسف للمصريين في موضوع الفقر
وزي ما شاء الله ما خالد أبو النجا دخل جينيس بعد ما سجل
أكبر عدد أعلام مرفوعة في وقت واحد
إحنا كمصريين من حقنا ندخل جينيس
بأن الفرد عندنا حفر خندق للفقر.. خلاص بقى كبرنا
على موضوع حد الفقر ده.. إحنا عندنا خندق الفقر عايشين جواه
إحنا مش تحت حد.. ودلوقتي بس فهمت ليه
كل اللي مسافرين بره بيقولوا
إحنا نازلين مصر أجازة .. صح؟؟

ولا أتكلم على الأزمة الفظيعة اللي في مصرنا الحبيبة دلوقتي..
وهي إختفاء عنصر من أهم عناصر التكيف مع البيئة المصرية
والمساعد الأول على التعايش مع وضعنا
وهو الحشيش.. فيه أزمة حشيش.. يا جدعااااااااااان
سمعت أن القرش بقى ب400 جنيه.. ده لو موجود أصلا
طيب بالزمة مش حرام.. يبقى متوسط الدخل 94 جنيه.. والقرش ب400 جنيه
طيب لما كان ب50 :80 جنيه.. كان معقول بالنسبة للدخل
قرش حشيش لكل مواطن
يساعده على التكيف والمعايشة للواقع
لكن دلوقتي.. خلاص مافيش لا تكيف ولا معايشة
ومافيش حشيش يا سعااااااااد

ولا أتكلم عن فرض رسوم على الدخول لوسط البلد وقت الزروة
(هي ذروة ولا زروة؟؟؟).. ما علينا بقى
لما سمعت الخبر ده.. خوفت بعد كده نركب عدادات على قفانا
يسحب مشينا كام كيلو.. ونتحاسب على عدد الكليوهات اللي مشيناها
وكل يوم خميس نصفر العدادات.. في مركز التصفير القومي
والمواطن يفضل واقف يستنى دوره.. وطبعا يروح بيته مهدود
بعد كده.. نبقى عملنا مصدر جديد للدخل القومي
وفي نفس ذات الوقت
نبقى قدمنا حل جذري.. لتنظيم الأسرة.. :)

بس بعد تفكير طويل في كل اللي فات
لاقيت إن في موضوع أهم من ده كله
حدث سجله التاريخ لمصر النهاردة.. حدث حلم بيه كل مصري
حلم غاب عننا 103 سنة.. بس عشان إحنا رجالة ووقفنا وقفت رجالة
حققنا.. وأنتصرنا على كل الظروف.. النهاردة والحمد لله
صوباع إخناتون.. وصل مصر من سويسرا بعد غياب 103 سنة
النهاردة بس حققنا حلم بقاله 103 سنة
خلاص أنسوا كل اللي فات من البوست
خلاص الصوباع رجع مصر
مش مهم مافيش نظام إنتساب.. مش مهم مافيش فلوس
والدخل بقى 94 جنيه.. مش مهم حتى الحشيش اللي مش موجود
لأننا كسبنا صوباع إخناتون.. وسبحان الله..
كالعادة التاريخ بيحب يعيد نفسه
وده فكرني بيوم ما اخدنا الصوباع التاني.. كان قرار صعب
بس برضو خدناه كلنا

وأعتقد إن الرسوم اللي هاتتحصل مقابل دخول وسط البلد
الصوباع ده السبب فيها
لأن أكيد هايعملوا ميدان صوباع إخناتون

ومش بعيد يبقى فيه أجازة رسمية قومية
ويبقى عيد التصبيع القومي المصري
وكمان تنزل علاوة سنوية فيه
صوباع لكل مواطن

إحنا دخلنا مرحلة جديدة.. في تاريخ مصر المعاصر
مرحلة إنتقالية.. فذة لولبية
مرحلة التصبيع الإخناتونية

وبجد وبدون تحيز.. مش عشان أنا مصرية يعني
بس إحنا نستحق وبجدارة وريادة.. لقب
شعب الصوباع الأعظم

شكر خاص لدكتور أشرف حمدي
على الكاركاتير اللي نزله النهاردة
وعرفني موضوع الصوباع