15 أبريل 2010

مرحلة.. انتقالية.. لتاريخ مصر..!!


فكرت كتير أقول إيه في البوست ده نظرا لوجود أحداث كتيرة على الساحة
يعني مثلا
.. ياترى أتكلم عن إلغاء نظام الإنتساب في الجامعات المصرية؟
!
ليه بقى؟؟.. قال إيه لأن الجامعات بتاعة الحكومة فيها دلوقتي مليون و 600 ألف طالب
!!
والجامعات الخاصة فيها 85 ألف بس؟؟.. يعني مافيش تكافؤ في السرعات
!!
فبقى الحل أن ولاد الناس الفقرة ماتتعلمش تعليم عالي أصلا..
مادام مجموعها ماجبش كلية إنتظام
وطبعا أصلا مش هايجيبوا مجموع عالي
...
لأن مافيش فلوس ياخدوا دروس في الثانوية العامة
وليه بقى مافيش فلوس؟؟
..

ده كان الموضوع التاني اللي كنت عايزة أتكلم فيه اللي هو
إن ما شاء الله
.. اللهم لا حاسد متوسط الدخل الشهري للفرد المصري بقى 94
جنيه
زمان لما أبو جريشة عمل أغنية
145 جنيه.. كلنا أتريقنا ..أهم بقوا 94
جنيه وبس
طيب بالزمة
.. 94
جنيه في الشهر ممكن يعملوا إيه للفرد المصري؟؟
وقال إيه اللي دخله
165 جنيه ..
يبقى تحت خط الفقر زي ما اليونيسكو بتقول
معنى كده إننا في مصر
..
عملنا خط جديد إيكسكلوسف للمصريين في موضوع الفقر
وزي ما شاء الله ما خالد أبو النجا دخل جينيس بعد ما سجل
أكبر عدد أعلام مرفوعة في وقت واحد
إحنا كمصريين من حقنا ندخل جينيس

بأن الفرد عندنا حفر خندق للفقر..
خلاص بقى كبرنا
على موضوع حد الفقر ده
..
إحنا عندنا خندق الفقر عايشين جواه
إحنا مش تحت حد
.. ودلوقتي بس فهمت ليه

كل اللي مسافرين بره بيقولوا
إحنا نازلين مصر أجازة
..
صح؟؟

ولا أتكلم على الأزمة الفظيعة اللي في مصرنا الحبيبة دلوقتي..
وهي إختفاء عنصر من أهم عناصر التكيف مع البيئة المصرية

والمساعد الأول على التعايش مع وضعنا
وهو الحشيش
.. فيه أزمة حشيش..
يا جدعااااااااااان
سمعت أن القرش بقى ب
400 جنيه..
ده لو موجود أصلا
طيب بالزمة مش حرام
.. يبقى متوسط الدخل 94 جنيه.. والقرش ب400
جنيه
طيب لما كان ب
50 :80 جنيه..
كان معقول بالنسبة للدخل
قرش حشيش لكل مواطن

يساعده على التكيف والمعايشة للواقع
لكن دلوقتي
..
خلاص مافيش لا تكيف ولا معايشة
ومافيش حشيش يا سعااااااااد

ولا أتكلم عن فرض رسوم على الدخول لوسط البلد وقت الزروة
(هي ذروة ولا زروة؟؟؟)..
ما علينا بقى
لما سمعت الخبر ده
..
خوفت بعد كده نركب عدادات على قفانا
يسحب مشينا كام كيلو
..
ونتحاسب على عدد الكليوهات اللي مشيناها
وكل يوم خميس نصفر العدادات
..
في مركز التصفير القومي
والمواطن يفضل واقف يستنى دوره
.. وطبعا
يروح بيته مهدود
بعد كده
.. نبقى عملنا مصدر جديد للدخل القومي

وفي نفس ذات الوقت
نبقى قدمنا حل جذري
.. لتنظيم الأسرة
.. :)

بس بعد تفكير طويل في كل اللي فات

لاقيت إن في موضوع أهم من ده كله
حدث سجله التاريخ لمصر النهاردة
..
حدث حلم بيه كل مصري
حلم غاب عننا
103 سنة..
بس عشان إحنا رجالة ووقفنا وقفت رجالة
حققنا
.. وأنتصرنا على كل الظروف..
النهاردة والحمد لله
صوباع إخناتون
.. وصل مصر من سويسرا بعد غياب 103
سنة
النهاردة بس حققنا حلم بقاله 103
سنة
خلاص أنسوا كل اللي فات من البوست

خلاص الصوباع رجع مصر
مش مهم مافيش نظام إنتساب
..
مش مهم مافيش فلوس
والدخل بقى
94 جنيه..
مش مهم حتى الحشيش اللي مش موجود
لأننا كسبنا صوباع إخناتون
..
وسبحان الله..
كالعادة
التاريخ بيحب يعيد نفسه
وده فكرني بيوم ما اخدنا الصوباع التاني.. كان قرار صعب
بس برضو خدناه كلنا


وأعتقد إن الرسوم اللي هاتتحصل مقابل دخول وسط البلد
الصوباع ده السبب فيها

لأن أكيد هايعملوا ميدان صوباع إخناتون

ومش بعيد يبقى فيه أجازة رسمية قومية
ويبقى عيد التصبيع القومي المصري
وكمان تنزل علاوة سنوية فيه
صوباع لكل مواطن

إحنا دخلنا مرحلة جديدة.. في تاريخ مصر المعاصر
مرحلة إنتقالية.. فذة لولبية
مرحلة التصبيع الإخناتونية

وبجد وبدون تحيز.. مش عشان أنا مصرية يعني
بس إحنا نستحق وبجدارة وريادة.. لقب
شعب الصوباع الأعظم



شكر خاص لدكتور أشرف حمدي
على الكاركاتير اللي نزله النهاردة
وعرفني موضوع الصوباع


هناك 26 تعليقًا:

  1. اوجه سؤال هام جدا ...قبل ما أنام
    اذا كان الصباع أخذ 104 سنة عشان يرجع ...امال مسلة , ممكن تاخد قد ايه ؟

    ويللا تصبعوا على ألف خير

    ردحذف
  2. ههههههههههه

    هذه الرسالة ذكرتني بالمثل القائل " هم يبكي وهم يضحك "

    و بالنسبة للانتساب و الانتظام ايضا المفروض يتم الغائهم ويعمل بالنظام المتبع حاليا في كل اماكن خدمات الدولة و هو نظام " الاغتصاب الموجه "

    نعم الاغتصاب لأنه يغتصب الدخل الاجمالي للفرد " 94جنيه " وايضا اللي بيستلفه فوقهم و موجه لأنه موجه ضد الغلابة فقط

    اه الصباع و ما ادراك ما الصباع

    لأن احنا فراعنة ولازم نسترد كل ما هو فرعوني و نمجد كل ما هو فرعوني لأن دي كرامتنا و كرامة اجدادنا " انسي خالص ان عمرو بن العاص واصحابه هم اجدادنا الحقيقيون و انسي ان المسلم بيتبرأ من اهله لو كانوا كفار كما تبرأ جدنا ابراهيم عليه السلام من ابيه لما تبين له انه عدو لله "

    اما الازهر اللي الفرنسيين دنسوه بالخيول مش مشكلة و مش لازم يعتذروا و اسرائيل اللي اغتصبت ارضنا وكل يوم بيقتلوا اخوانا مش مشكلة برده و يعتذروا ليه و الشباب اللي بيموت في البحر في ستين الف داهية خللي الكثافة السكانية تقل

    انما فرعون و الفراعنة فوق الجميع و لازم يبقي فيه عيد قومي للصوبع ده و تقدري تستفتي شيخ الازهر وانا واثق انه مش حايمنع بل و حايحرف نص قصدي حيجد دليل شرعي على انه حلال

    نعم والله فوق الجميع " في جهنم ان شاء الله "
    "إِلَى فِرْعَوْنَ وَمَلَئِهِ فَاتَّبَعُوا أَمْرَ فِرْعَوْنَ وَمَا أَمْرُ فِرْعَوْنَ بِرَشِيدٍ (97)يَقْدُمُ قَوْمَهُ يَوْمَ الْقِيَامَةِ فَأَوْرَدَهُمُ النَّارَ وَبِئْسَ الْوِرْدُ الْمَوْرُودُ (98)"سورة هود

    مش عارف اقول ايه غير حسبنا الله ونعم الوكيل

    و شكرا لك و ياريت تكتبي بنفس خفة الظل دي حاجة عن اعلانات " وقفة المصرية" اعتقد انه حتبقة وقفة عيد الاصبع

    و السلام عليكم ورحمة الله وبركاته

    ردحذف
  3. هع هع هع
    مبقاش للأسف عندنه هم يضحك
    كله بقى بيبكي
    ولولا إننا فني وناس بناخد أي شيء في الهجايص
    كان زمان كلنا مع الكبد والكلى والضغط جالنا أمراض يعجز الطب العالمي عن تشخيصها

    صباحك فل يا احلى فتفوتة

    ردحذف
  4. ههههههههه عرق قله الأدب ناقح عليا قوى دلوقت وعايزة اقولك الصوابع دى كلها المواطن خدها فين

    حلوة قووووى خندق الفقر اللى دخلنا جواة دة

    يخرب عقل خفه دمك

    أة قصدك ان دى مأسى وكدة والمفروض نبقى على قدر المسؤليه ومانتريقش ونناقش ونعالج والكلام دة

    ماعلش مش مستغنيه عن مرارتى افضل اصوت على اللى مش هيتغير وانا غلبانه وابويا مش معاة يودينى المانيا اعالج مرارتى هناك

    بتتأخرى كتير يا قمر

    ردحذف
  5. السلام عليكمـ

    صحيح " ابن الحرام ما خلى لابن الحلال حاجة "

    كيف ينصرنا الله ونحن فينا الظالم .؟
    كيف ينصرنا الله ونحن فينا الفاسق .؟
    كيف ينصرنا الله ونحن فينا المرتشي .؟
    كيف ينصرنا الله ونحن فينا المنافق .؟


    حسبنا الله ونعم الوكيل ..
    الغرب الكافر يعيش بكفره لكنه يحترم حقوق بعضه البعض ، ونحن يا لله فينا ..؟

    ردحذف
  6. على فكرة احنا اثناء فترة غياب صباع اخناتون كان في ناس برضة بتصبر الشعب ومش سايباه كده من غير صباع .... ابراهيم حسن مثلاً .... والحكومة مثلاً ... والمسئولين .... كل دول مخلوش المواطن حاسس بأي نقص من ناحية الصباع :)))

    ردحذف
  7. والله ضحكتينى جدا يا فتافيت على البوست الجامد ده
    بس احب اوضحلك نقطه صغيره بس بمناسبه الصباع ... مش قرش الحشيش اللى ب 400 جنيه ، ده صباع الحشيش :)

    ردحذف
  8. أزال المؤلف هذا التعليق.

    ردحذف
  9. بانوراما استعراضيه لاحوال المواطن المصري

    لن اعلق عليها و لكنني سوف اسال كيف يعيش هؤلاء ؟؟؟
    تحت خط الفقر و المبالغ الموضوعه لا تكفي لعيش حاف لفرد ما بالك للاسرة
    اطالب بوضع هؤلاء القوم في موسوعة جنيس في الاقتصاد
    بياكل و يشرب و يحشش و يدخل اولاده مدارس و كله 94 جنيه

    عجبي

    تحياتي

    ردحذف
  10. كيفك فتافيت..؟؟
    يارب تمام



    على كده انا من اثرياء القوم
    لانى بقبض 230 جنيه

    عموما البلد بتاعتنا فيها العجب
    واللى يعيش ياما يشوف

    ردحذف
  11. يا جماعة ..كلامكوا كلكو زي الفل..
    بس انا عايز اعلق علي موضوع تاني...
    هو سؤال..
    ليه مدونة ضد التنصر و الالحاد...يعني هو لو عملنا مدونات لنشر الاسلام يبقي صح ..ولو اتعملت مدونات تبشر بأ فكر اخر تكون غلط؟

    ردحذف
  12. هههههه

    انا فعلا عايزك انت اللي تكتبي باسلوبك الساخر الجميل

    انا كتبت بتشاؤم وجديه شوية

    و اسعدني تعقيبك على مدونتي و فرصة لو عايزة تجمعي جهاز كمبيوتر جديد xD

    لكن ايه هي كلمة التأكيد دي " ياريت تشيل كلمة التأكيد.. بضايق جدا ع فكرة"

    ردحذف
  13. طيب الواحد يعلق بعدك يقول إيه؟؟؟؟


    لا تعليق



    أسرة منتدى زبد البحر يتمنى منكم التواجد معنا في منتدى عالم المدونيين والمدونات

    http://mhg1962.ba7r.org/forum.htm

    ردحذف
  14. TareQ
    مسلة ايه بس يا طارق
    احنا كفاية علينا الصوباع.. والله حاجة تجن
    نورت البلوج كله يا كاااابو :)

    ردحذف
  15. Prof9090

    اولا اهلا بيك في فتافيت اعتقد انها اول رمة تزورني.. وان شاء الله ما تبقاش الاخيرة

    ثانيا يعني تعليق دسم جدا.. وخلينا فرحانين بالفراعنة.. يعني هو احنا لاقينا حاجة تانية نتكلم فيها ونتفشخر ومااتفشخرناش

    والبلوج بتاعك عجبني :)

    ردحذف
  16. ستيتة حسب الله الحمش

    سوتايتة عمتي وعمة البلوجسبوت كله
    مساء فل يا حبي

    وخلينا سوووو فني كده.. وناخد
    نورتي البلوج والبوستات القديمة والحديثة
    موووووووووووووووة

    ردحذف
  17. صفــــــاء

    هههههههههههههههههههههههه ماشي استر عليا يا وديع :))))))

    يا ستي.. مرارة ايه اللي تعالجيها
    احنا مررتنا تتفقع وبس
    العالج للسادة .. التعبااااااااااااانين اوي

    منورة يا جميلة .. واهو بوست تاني في نفس الاسبوع
    ده بس عشاااااااااان صافي :)

    ردحذف
  18. بحر الإبداع

    والله ما عارفة اقول ايه
    بس ربنا كبير .. قادر يصحي امة المليار .. وتعمل حاجة.. بدل ماحنا مقضينها فرجة كده

    نورت البوست

    ردحذف
  19. تامر علي

    هههههههههههههههههههههههههههههههه
    ماشي يا عم تامر.. هاقول ايه بس
    ههههههههههههههههههه.. مش قادرة ابطل ضحك كل ما اقرا الكومنت بتاعك.. بس نسيت ابراهيم سعيد ع فكرة.. :))))

    ردحذف
  20. Che

    هههههههههههههههه عموووور والله عرفت الموضوع ده مؤخرا
    وماحبتش اغير من قرش لصباع.. عشان صوباع اخناتون ياخد حقة في البروباجندة.. نورت يا رفيق :)

    ردحذف
  21. أحــوال الهـوي

    بابتي احوال الهوى
    والله ماعرف خالص.. بس اللي مقطع قلبي هايحششوا ازاي بعد كده؟؟؟؟.. حرااااام

    لنا الله يا بابا والله لنا الله

    ردحذف
  22. محمد عرفة

    د/ عرفة
    ده انت كده من علية القوم .. هههههههههههههههههههههههههههههه ماشية معاك لوز

    والله حاجة توجع القلب لما طبيب الامتياز في لبنان ياخد ما يعادل 4000 جنيه وفي السعودية ما يعادل 14 الف جنيه.. وانتم هنا 230 لحلوح
    حسبي الله ونعم الوكيييييييييييييييل

    ردحذف
  23. غير معرف

    والله هي قناعات حضرتك
    ماقدرش اتخيل ان كلامي واحد ملح او منصر بيقراه
    تحسبه تعصب.. تطرف.. از يوووو لايك

    وحلو ان الكلام اللي زي الفل عجبك

    ردحذف
  24. قصدي ملحد طبعا.. مش ملح ديه خالص

    ردحذف
  25. Prof9090

    والله انا لسه ماوصلتش لمرحلة الاستفزاز اللي تخليني اكتبلهم بوست.. لكن اوعدك اول ما يحصل هاكتب ع طووووووووول

    بالمسبة لكلمة التاكيد.. انت فعلا شيلتها
    وده شيء كويس جدا.. لانها بتضايق اللي بيبعت كومنت اوي

    ردحذف
  26. كلمات من نور

    مش عارفة والله تقول ايه :))

    منور

    ردحذف

خلل براحتك من غير انتظار .. فتافيت أصلاً بتحب الخيار