11 مايو 2009

فين جمعيات حقوق الانسااااان؟؟



غبت غيبة طويلة.. والله وحشتوني كلكم كلكم..
وميرسي اوي للي سأل عليا.. سواء هنا
أو على الميل أو في التليفون
ميرسي للي وحشته وما سألش عليا

وخدة بالك يا سوتايته ويا دودو :((

وحشتوني وحشتوني وحشتوني .. من هنا للسنة الجاية
وهارد على الكومنتس كلها .. انهارده وبكره إن شاء الله


الأول.. ده لينك مسابقة للقصة
وفاضل 4 ايام وتخلص
للي يحب يشارك فيها .. يضغط على

مسابقة القصص القصيرة

بعد ما نزلت البوست الأخير.. ومع زن ماما
اللي مالوش مثيل
وافقت إني اقعد مع العريس المنتظر
واتكلم معاه بعقل ومنطق
واحاول افهمه.. وماطلعش في القطط على رأي مامتشي
كانت فيه مقابله يوم 5 ابريل.. قبل يوم الغضب بيوم واحد

وسألته سؤال عادي جدا.. ايه رأيك في يوم الغضب؟؟
قاللي : ابو الغضب ده شخصية شريرة!!
مين ابو الغضب ده يا عم مازينجر .. قصدي يوم الغضب بتاع حركة 6 ابريل
قاللي: يا شيخة سيبك من الغضب وأهله.. كبري دماغك.
وبعدين الغضب بتاعك ده هايفشل.


وبعد ما كلامه اثبت كفاءة .. قولت يا سلام
يمكن ماما عندها حق
والواد اهو طلع بيفهم .. وفعلا قعدت
معاه قاعدة بعد البوست بيوم
القاعدة كانت الساعة 6 المغرب..
ومشي وانا على كلمة واحدة
ماخدوش يا بابا ماخدوش يا ماما


وماما وبابا لا حياة لمن تنادي
انت كبرتي ولازم تتنيلي وتجوزي
وطبعا الكلام اللوز بتاع الاهل بقى
نفسي افرح بيك قبل ما اموت
نفسي اشيل عيالك واطمن عليك قبل ما اموت
هو انت مستخسرة الفرحة فينا


وهم في رحلة الاقناع ديه.. اتصلت خالتي
وقالت ابن خال ماما
شاب في ريعان شبابه .. 30 سنة
مااااااااااااااااات

يالهوي .. لا حول الله
يا ماما يا بابا .. الواد ده بومة .. وفقر



ماما وبابا ما اقتنعوش .. وقالوا كده حرام
الواد مناسب.. وعنده وشغال....
وعدت ايام العزاء .. وفي اليوم التالت اجبرت اني استقبله
في البيت .. علشان يعزي ماما وبابا
قعد نص ساعة .. وفي الدقيقة 40 من وصوله

خالتي اتصلت؟؟؟؟!!!وقالت...
اخت مرات خالي .. ست في ريعان
شبابها40 سنة وزي الفل
ماااااااااااااااااااااااتت


قومت قايمة .. جري على اوطتي استخبيت
لا بركاته توصلني واموت وانا قاعدة
:S

ده ايه العريس الدمار الشامل ده؟؟!
دخل عمل ابادة جماعية للعيلة خلال 72 ساعة
اتنين راحوا كده .. في تلت ايام
يالهوووي.. امال لو طول شوية


يعني ده اتجوزه .. ويوم الصباحية الناس
تقرا عليا الفاتحة؟؟

وطبعا بعد ما ماما وبابا كانوا بيقولوا حرام اقول فقر

قالوا .. ده الحرام إنه يزورنا تاني اصلا :))

الزيارتين .. بركاته طالت القرايب من الدرجة التالتة
يعني بعد الخطوبة الضحايا.. هاتبقى الدرجة التانية
وبعد كتب الكتاب طبعا هايبقوا الدرجة الاولى
وفي الصباحية اكيد انا الضحية.
:((


فين حقوق الانسان يا بشر؟؟؟؟؟
فين امريكا تيجي .. مش ده برضو
يصنف عريس محرم دوليا؟؟!


يعني اتنين تلاتة منه.. يزورا اسرائيل
ونخلص منها خلال اسبوع.

الواد ده اكيد.. جرثومي او نووي
يمكن يطلع فسفوري كمان.

انا بعتذر لحركة 6 ابريل
العيب مش فيكم صدقوني.. العيب فيه
هو عرف يوم الغضب مني
واول ضحية لبركاته.. كانت يوم الغضب

يلا الحمد لله اني.. خلصت منه
قبل ما يخلص على العيلة.
D:

هناك 67 تعليقًا:

  1. فتافيت حمد لله على سلامتك
    و البقاء لله ربنا يرحم الفقداء
    ويغفر لهم ويصبر اهلهم

    كويس انك نجيتى من الابداة دى
    ياساتر يارب يا بنتى اية

    كويس ان بابا وماما اقتنعوا
    اخيرا وربنا رحمك
    :)
    بس ذنب 6 ابريل فى رقابتك كدا
    وخلى بالك لحسن بركاته تطلع عليك
    ويبقى فى يوم غضب عليك
    انتى لسة فى دائرة الخطر

    ربنا يحفظك
    تقبلى مرورى

    ردحذف
  2. ياعيني يابني D:

    البقاء لله ...

    خلى بالك من نفسك بقي...

    اول مرة اعرف ان ممكن واحد يبقي فقر او شؤم كدة على الناس

    ربنا يحفظنا

    مش تغيبي تانى كتير كدة
    البشر قلقت عليكي

    ردحذف
  3. حمد الله ع السلامة يافتفوته

    ايه الغيبه الطويله دي بس وحشتينا موووت ياقمرر

    والبقاء والدوام لله

    وأحمدي ربنا أنه أنزاااااااح من طريقك ههههه

    وباباكي ومامتك اقتنعوا قبل ما عدد الضحايا يتوسع أكتر من كده

    وخلي بالك منك ياقمره كده فين ناس عاوزينك هنا

    أو تكوني قولتيله عندك تدوينه ربنا يستر :)

    ردحذف
  4. طيب انت يرضيك كده ... هايروح يتجوز واحده تانية ويقضي على عائلة سعيدة لا تعلم مصيرها المحتوم .... المفروض كنت تحطيله مسدس في الشوربة أو تعمليله ساندوتش رصاص علشان تخلصي البشرية منه ... أو تتجوزيه وتحتسبي الأجر والثواب من عند ربنا :)

    تحياتي وحمدالله على السلامة من الجوازة اللي كانت هاتطلع من عمر مكرم دي :)

    ردحذف
  5. مش عارفه ازغرطلك ولا ايه

    دانتي يابنتي الحمدلله انك جربتيه قبل ماتخديه :D

    وربنا ستر وبعد عنك الحمدلله

    بس ياعيني تلاقيه اكتئب نفسيا وعرف انه فقر وقرر فقره يأثر ع نفسه ويموت مكتئب :D:D

    المهم انتي ماتزعليش نفسك ونصيبك هيجيلك لحد عندك

    المهم تبقي راضيه ومقتنعه

    ربنا يرحم قرايبك الاتنين ويجعل مثواهم الجنه يااارب

    و ع فكره كلنا سألنا عليكي عند عاشقه وغلبانه

    مووووواه

    ردحذف
  6. حمد الله على سلامتتتتتتك يا قمرايا
    اولا البقاء لله وربنا يرحم قرايبك
    ثانيا
    جبتيه منين العريس الجامد ده :D
    الحمد الله انك استخبيتى على اخر لحظه
    بس حلوه الفكره اللى قولتيها حاولى تدورى على واحد والا اتنين منه كمان ونبعتهم اسرائيل
    واهو يبقى قضاء وقدر واحنا مالناش اى ذنب :D

    ردحذف
  7. الفين حمدلله على سلامتك يافتفوتة
    الالف الاولانية لرجوعك للتدوين
    والالف التانية انتى عارفة بقى:)

    ردحذف
  8. ان ما وريتك
    يعني انا من يومين اقول البنت دي وتامر دياب اطمن عليهم بس ازاي يارب

    وكنت ناوية انزل بوست اللي يجيبهم الأتنين اديله الف جنيه حسبوللي ستيتي

    طلعتي حضرتك قاعدة في النووي واحنا في بوست عاشقة وغلبانة من تلات ايام بندور عليكي

    وطبعا الميل اللي انتي مدياهوني مش بتفتحيه خالص

    حاااااااااااااااااااااضر

    وبعدين يا هانم لا عدوى ولا طيرة

    عيوبات الكلام ده

    الستات هم اللي اقدام مش الرجالة
    يعني الدار والزوجة والدابة اقدام على الراجل مش العكس يا متمردة زي ستيتة وجميع عضوات الجمعية

    وبعدين يعني اجيب انا راجل يرضي نوفوخك منين؟

    ولو غبتي تاني ها ابندجك ولازم تديني ميل شغال ورقم موبيل
    ولو تعرفي نطمن ازاي على المختفي تامر دياب يسترك برضه طمنيني

    بحبك وها أجوزك لهرقل غصم وأتدار
    ثبت علميا ان عضوات الجمعية ما ينفعهومش غير راجل في قوة هرقل وصبر سقراط على مراته

    ردحذف
  9. بلا جواز بلا وجع قلب
    سيبك انتي
    المهم اخبارك ايه
    كنت لسه بسأل عليكي
    http://ashaweghalbana.blogspot.com/2009/05/blog-post_08.html

    ابقي سيبيلي ايميلك
    عموما ده ايميلي ضيفيه وسيبيلي رقم موبايلك ابقي اطمن عليك
    ashaweghalbana@yahoo.com
    وحشاني موووووووووووت

    ردحذف
  10. ألف حمد الله علي السلامة
    بلوجر كان ناقصه كثير والله

    ربنا يجعلها أخر الغيابات

    ردحذف
  11. حمدلله علي سلامتك بعد الغيبه الطويله دي

    نورتي المدونه

    والبقاء لله

    والحمد لله انها عدت علي خير ولسه بصحتك ههههههه

    متغبيش تاني علينا

    دمتي بكل خير

    ردحذف
  12. فتفوته يا عسل
    ايوه كده نورينا وحشتينا اوى،اتاريكى ياعينى مش عارفه تخلصى من اللى يجعل كلامنا خفيف عليه،طيب وده يتقراله المعوذتين يعنى ولا فليت يمشى معاه وينهى الموضوع عادى؟؟؟
    متغيبيش تانى علينا كده

    ردحذف
  13. واحنا نقول الغيبة دى كلهاليه
    اتاريكى بتفصصى العريس
    وبعدين غضب ايه وبتاع ايه
    دا عريس تقوليه غضب

    ردحذف
  14. فتافييييييييييييييييييييييت
    فتافيييييييييييييييييييييت
    فتفوووووووووووووووووووووووووووته
    ياألف حمدلله على السلامه
    والله مفتقدينك ومفتقدين كلامك الجميل ده جدا جدا جدا

    انا بصراحه مش قادر امسك نفسي
    عريس محرم دوليا؟ واتنين في يومين؟ وانتي يوم الصباحيه؟
    لا ياستي ربنا يستر علينا احنا والمدونات المحيطه

    بصي بس كده وافهميني
    الضغط ده بيكون في كل البيوت المصريه من سن 22 سنه عند البنت
    بيكون بشتى الطرق
    ومسؤليتك بأه انك تاخدي القرار الصح لأنك انتي بس اللي هتندمي

    امتى تقلولي اه وامتى تقولي لأ

    ربنا يكتبلك السعاده ان شاء الله في كل قراراتك

    ملحوظه
    مش مسموح الغياب بالشكل ده تحت أي مسمى. انا بعد كده هعدي على المدونات واخد الغياب, واللي مش هلاقيه في المدونه بتاعته, هخده مخالفه ويمكن اجيبله قرار ازالة مدونات

    حمدلله على السلامه

    ردحذف
  15. فتفووووووووووووووووته اهلين ومراحب
    كده الجماهير الغفيرة دى كانت خلاص بتشد فى شعرها
    ع العموم سماح النوبة
    معلش اختى فى ناس فعلا يعنى ربنا يسامحنى يعنى بيبقى محضرهم غم دى حقيقة
    واحسن حاجة عملتيها انك استخبيتى فى اوضتك احسن الاشعاع يطولك
    حمدا لله على سلامتك

    ردحذف
  16. يادى التشرد ياناس
    اعمل فيك إيه
    فتفوته صحيح
    ربنايسترها ويعديها على خير
    يابنت بلاش شغب وشقاوه
    محدش بيكون سبب موت حد
    هتغفضلى عفريته لأمتى؟
    يارب تتجوزى ونخلص منك

    ردحذف
  17. ألف حمدالله علي السلامة والبقاء لله . علي فكرة أنا أول مرة أدخل علي المدونه بتاعتك النهارده الصبح ولقيت الناس كلها عماله تسأل عنك وخصوصاً عاشقه وغلبانه . المهم المدونه جميلة جداً وعجباني قوي وطبعاً هكون زائر دائم إذا سمحتي.. مش هتصدقي لو قولتلك إني ماضحكتش كده من قلبي من زمان زي ما ضحكت وأنا بقرا البوست ده وكمان اللي فات وأحداث العريس فكرتني بمسلسل كان بيجي زمان أسمه شرارة يمكن ماتكونيش شوفتيه أصل أنا قديم شويه وكان تقريباً البطل (محمد عوض) ما يتخيرش عن عريسك لكن طبعاً ده هزار وطبعاً دي أعمار مكتوبه عند رب العباد فلكل أجل كتاب بس هي صدفه مشيها صدفه وإن شاء الله ربنا يرزقك بالعريس اللي تتمنيه معلش علي الرغي ده كله لوك لوك لوك لوك ..سلام

    ردحذف
  18. كويس انك لسه عايشه الحمد لله على كده.تعالى جمبى نقعد ونبص للسقف مش عاوزه اقولك بيعمل احلى دمااااااغ

    وافكار رايحه وافكار جايه وان شاء الله نصيبك هيصيبك

    ردحذف
  19. اتنين نتيجة الحرب الشعواء دى
    ربنايرحمهم يارب
    والحمد لله انها جت على قد كدة
    ومجتش فى بتوع 6 ابريل كلهم شباب وفى ريعان شبابهم
    مدونى جميلة بجد

    تحياتى

    ردحذف
  20. عودا حميدا يا فتافيت

    ايه الغيبة دي


    يا بنتي هو انت كل عريس تطلعي فيه حاجة كده

    انجزي عايزين نفرح بيكي

    ردحذف
  21. الله يجازيكي
    وحشتينا بجد
    وحمد الله على السلامه
    كويس اوي انك قعدتي معاه واديتيله فرصه
    بس ايه ده بجد
    مفروض مايطلعشي من بيتهم خالص
    هههههههههههههههههههههههههه
    اتمنى لكي كل الخير

    ردحذف
  22. الف حمدله على السلامه والبقاء لله وحده

    وربنا ان شاء الله يجعلك نصيبك وقدر فى خير خلقه وصبرى ان الله حاسب أمرك

    ردحذف
  23. هههههههههه
    يعنى مثلا مقولتيش عريس يابوى عريس يابوى؟؟
    طخه بس متعوروش يا بوى
    العرسان اليومين دول عملة نادرة
    ولو كان العريس ده فى اى عيب غير العيب ده انا كنت قلتلك اتمسكى بيه.
    ههههههههه
    لا لا انت تهربى بجلدك.
    ههههههههههههههههههههههههههه
    سلامى

    ردحذف
  24. الف حمدالله على السلامة ياقمر والله وحشتينا مووووووووت وكل يوم باجى ابص على مدونتك كده اشوف فى حاجة ولا لا نبسطت جدااااااااا لما شفت البوست الجديد على الريدر
    امال بالنسبة للعريس ربنا ان شاء الله هيكرمك باللى يقدرك ويصونك قولى لماما بلاش استعجال كل شئ نصيب
    حمدالله على السلامة مرة تانية

    ردحذف
  25. انا عارفه انى مقصره فى حقك وحق ناس تانيه كتيييير
    بس لو دخلتى مدونتى وشوفتى فيها بوستين منزلاهم قريب جدا هتفهمى
    واحد باسم سامحونى
    والتانى شكر واجب
    ومش معنى كده انى نسياكى
    لكن كل واحد عنده ضغط فى حياته
    واحنا اخوات وبنلتمس لبعض الاعذار
    صح ولا ايه؟
    خلاص بقى صافى يالبن؟
    قولى انك مش زعلانه بقى؟
    بالله عليكى
    هاستنى رد منك على مدونتى علشان اعرف انك مش زعلانه
    (:
    اما عن العريس اللقطه ده
    فانا بالرغم من ان الموقف فيه حالتين وفاه فهو مش مستدعى ضحك الا انى ضحكت كتيييير جدا
    الحمد لله انه نجاكى
    يعنى هتدخلى دنيا علشان تخرجى منها؟

    وكلام مامتك وباباكى ده واضح انه اسطوانه كل الاباء والامهات محفظينها لبعض
    ياااااااااااه
    ياما سمعته

    بحبك جدااااا يافتفوته
    وحشتينى وفرحت لما لقيت لك بوست فى الريدر عندى

    اموووووووووووووووه

    ردحذف
  26. فتفوتة العمر
    السلام عليكم
    حمداً لله على سلامتك
    والحمدلله إن ربنا نجاكى من لإشعاعات النووية
    وحشتينا جدا ووحشنا خفة ظلك
    البوست ضحكنى كثيرا
    خسارة يا فتفوتة كنت إستعملتيه كمبيد للصراصير
    ولكن كان لى رأى أن تضعيه فى صندوق خشبى وتوجهيه على أى حد يزعلك
    خسارة يا ميت خسارة كان كنز
    هههههههههههه

    ردحذف
  27. ههههههههههههه مش ممكن ده فعلا مش دمار شامل ده قنبله نوويه لا كويس انك نفذتي بجلدك يا بنتي حمد الله على السلامه وماتغبيش كتير تاني بقى

    ردحذف
  28. ياريت تحطى اسمى انا كمان فى قائمه الوحشين عشان مسألتش
    بس الحمد لله ربنا طمنا عليكى و بناقص عريس يا حبيبتى دول اكتر من الهم على القلب و كويس انك اشتريتى عمرك

    ردحذف
  29. السلام عليكم و رحمة الله و بركاته

    ألف حمدلله ع السلامة يا فتفوتة
    نورتى بيتك و مطرحك يا اوختشى

    و ربنا يغفر لمواتانا جميعا و يرحمهم

    بس يا قمر لكل اجل كتاب
    و مفيش تشاؤم فى ديننا يا جميل

    انما هى أسباب
    و الحمد لله انه ماكنش من نصيبك
    لان اكيد ماكنش فيه الخير ليكى

    ان شاء الله ربنا يكرمك باللى يستحقك و يقدرك يا جميل

    و عود حميد
    و ماتغبيش تانى


    خالص ودى يا قمر

    ردحذف
  30. السلام عليكم
    حمدلله على سلامتك يا فتوته
    ويارب تكونى بخير
    ربنا يرحم قرايبك
    وكويس اوى انك خلصتى نفسك منه :D

    ردحذف
  31. ياه الحمد لله على السلامه

    ربنا يرحم قرايبك

    وكويس ان مامتك وباباكي اقتنعو ان العريس ده بااااااااطل باااااااطل

    ردحذف
  32. هههههههههههه
    مش اوى كده فتافيت
    بلاش الاعتقادات الوحشة دى

    المهم
    حمد الله على السلامة

    اعتقد انها عين بس وصابت العيلة

    ردحذف
  33. دة عريس لقطة.. بس على اساس انه للتصدير لاسرائيل فقط
    ههههههههههههههههههههه
    كويس يا بنتى انك نفدتى بجدلك وحمدلله على السلامة

    ردحذف
  34. ههههههههه كل دا حصل

    الله يكون فى عونك بجد

    ربنا يرزقك بالزوج الصالح ان اشء الله

    ردحذف
  35. الف الف حمدالله على السلامة وحشتينا ياشيخة دى عاشقة عملت بوست عندك انا متباع مدونتك من زمان بس دى اول مرة اعلق عندك تقبلى مرورى

    ردحذف
  36. الف حمد الله على سلامتك والبقاء لله في المفقودين ودمك زي العسل وفكرتيني بعريس جالي زمان لما كنت صغنونة واول ما دخل من الباب نجفه انطفت واول ما خرج النجفة ولعت وماما اتشاءمت منه على طول وانا كمان معجبنيش شخصيته والحمدلله ان ده حصل لان بعد كده عرفت حبيبي وعقلي قلبي وابو الشباب كلهم واتجوزته ومن ساعتها وانا متبته فيه علشان ميعرفش يفلفص عقبالك لما تلاقي زوج مناسب وتمسكي فيه برضه

    ردحذف
  37. حمدالله على السلامه
    وليكى وحشه والله
    ياريت بقى ماتعمليهاش تانى
    ........
    بقولك ايه
    اخوكى مزنوق فى العريس الفظيع ده
    تقدريش تدينى نمرة تليفونه او عنوانه
    فيه جماعه مضايقينى ومش عارف اتصرف معاهم
    يبقى العريس ده احسن واحد اهاديهم بيه
    خصوصا انهم عندهم قنبلة نوويه برضو(العروسه)
    هههههههههههههههههههه
    حمد الله على سلامتك
    تحياتى ودمتِ بكل خير وود

    ردحذف
  38. حمد الله علي السلامه
    عمك قيس بن الملووووح كان بيسمع من امه مثل بيقول " قعاد الخزانة ولا جواز الندامه"
    عموما لمل ربنا بيكون رايد الامور بتمشي وحدها

    ردحذف
  39. يا شيخه انت فين من زمان

    ممكن تديني عنوانه او تليفونه
    اصل فيه حد مطلع عيني نفسي ابعتهوله

    ردحذف
  40. اولا البقاء و الدوام لله

    ثانيا حمدلله على سلامتك ياقمر

    ثالثا بقى جالك منين العريس ده بس .. وطبعا طبعا ده بردو ليه استخداماته يابنتى ازاى بس تفرطى فيه كده ((:

    انتى مش شايفة بلوجر كله بيقولك العنوان و التليفون ..ده دليل ان كان فى ايدك كنز ^_^

    ردحذف
  41. ولا يهمك يا جميل


    ان شاء الله ربنا يرزقك بالزوج الصالح المناسب يارب


    مش تغيبى عننا بقه

    وحشانى اوى

    ردحذف
  42. فتفوتة الجميلة الرقيقة الغايبة علينا لفترة كبيرة جدا
    ايه يا بنتي ايه الغياب ده
    زواجك يا بت من الواد ده محرم زي ما قلتي دوليا و دينيا و كمان دي مني امازيغيا
    ربنا يوفقك و تكون عودتك ميمونة و يا ريت متطوليش الغياب
    و كمان يا رب تفوزي في المسلبقة لو قدمتي ليها
    مودتي

    ردحذف
  43. فتافيت ...

    اسعد الله قلبك بما تحبي ..

    كان الله في العون ... واهي ايام الله لا يعودها ..

    وان شاء الله تكوني بخير دلوقتي يا قمر ..

    وحشاااااااااااني جدا :)

    صحيح كنت فاكره اقولك حاجه ::

    ايه ياربي

    ايوااا خلاص افتكرت

    أني احبك في الله :)

    سلام يا احلي فتافيت ..

    ردحذف
  44. لا عريس موووز موووز موووز صراحة
    حمد الله ع السلامة وبجد شكرا علي السؤال المستمر

    ردحذف
  45. عزيزتى

    اخيرا ظهرتى بس مش تكحى تعملى اى حركات علشان نعرفوا انك جيتى

    على العموم كويس انك وافقتى على المبدأ انك تقعدى مع العريس وتشوفى دماغه

    ومعلش المره دى طلع دمار شامل ونووى

    المره الجيه يطلع عارف يوم الغضب وابو الغضب برضوا

    وعمار شامل ان شاء الله

    وخلى ماما وبابا يفرحوا

    وانتى كمان اكيد هتفرحى

    متغبيش علينا تانى

    سلاااااام

    ردحذف
  46. فتفوته
    انتى فين؟
    ومش بتردى على التعليقات ليه؟
    هو العريس رجع تانى ولا ايه؟
    اوعى يكون عمل اباده جماعيه للحى كله

    (:
    وحشتينى
    انا باسئل اهو
    انتى اللى مختفيه

    ردحذف
  47. فتفوتة حبيبتى ..

    وحشتينى موت اوى خالص بجد ..

    وححشتينى بوستاتك العسل ..

    الحمد لله رب العالمين انك نجيتى يابنتى ..

    ولحقى نفسك بدرى بدرى D:

    ربنا يكرمك يالزوج الصالح اللى يحبك وتحبيه من كل قلبك ..

    دمتِ بخير ..

    ردحذف
  48. عزيزتى

    اختفيتى تانى

    مينفعش كده انتى فى حالة حرب

    ولازم نطمن عليكى ببيان على الاقل


    سلاااااااااام

    ردحذف
  49. وحياتك انت اللى فعلا بتطلعى فيهم القطط الفاطسه وشكلك كدة معاديه للرجاله زى بتوع معاداة الساميه
    وبعدين دة ذرى ودة جرثومى ودة دمار شامل
    ماهما كل الرجاله كدة يا اختى
    انت بس تسدى مناخيرك وتمصى ليمونه وتشدى حيلك وتختارى واحد بقى
    وهييييه سبحان من له الدوااام

    ردحذف
  50. احمممممممممممممممممممممممممم

    دستوووووووووووووووووووور

    هى المدونه دى صحبتها فين

    ردحذف
  51. انت بتنزل بوست وتختفى فين ياعم الحاج بس

    ردحذف
  52. فتافيت بقت عروسه بعد ما غبت كام شهر

    ده العمر بيجري بس الاستاذ شرارة خد الشر و راح ربنا يرزقك بابن الحلال اللي يصونك و بلاش تسالي عن يوم الغضب اسالي عن يوم الورد الفرح اي حتجه فاتحه

    و ربنا هيكرمك

    تحياتي

    ردحذف
  53. انتى فين يا فتفوته غبتى ليه تانى يارب خير ان شاء الله

    ردحذف
  54. فيه حد ميعرفش ابا الغضب وسنفور غضبان؟؟؟؟ههههههههههههه داه من الاول كان لازم يتشجب ..معلش يا فتافيت هو محتاج يعرف حاجات كتير

    أما بالنسبة للموت فهو بيد الرحمن طبعا و إنتي عارفه كده

    كلامك بيرسم ابتسامه دايما على وجهي .جزاك الله كل خير

    ردحذف
  55. السلام عليكم و رحمة الله و بركاته

    فتفوتة يا فتفوتة؟؟؟

    انتى فين يا فتفوتة؟؟؟



    طمنينى عليكى

    ردحذف
  56. هو العريس دا عمل فيكي ايه يا فتافيت
    دا سره باتع بجد
    حتى المدونة ما عتقهاش
    طمنينا عليكي

    ردحذف
  57. هههههههههه ايه يابنتي العريس ده
    ده فقر بجد هههههههه والله ضحكتيني


    سوري بجد

    بجد البقاء لله ياقمر

    والمهم ان بركاته لسه محلتش عليكي
    واديكي حيه بترزقي اهو

    واهم حاجه متسمعيش للي حواليكي هما عايزين يجوزوكي وخلاص اصبري واختاري صح

    مش هنتجوز كل يوم يعني

    طب تعرفي النهارده عيد ميلادي
    واحده بتقولي كملتي كام بقولها 21 سنه
    قالتلي ولسه قاعده ف بيت ابوكي

    والله حسستني اني عامله جريمه هههههههه

    ياللا خير
    هما العظماء دايما كده

    ردحذف
  58. ههههههه


    بوست هايل

    ننتظر المزيد

    ردحذف
  59. واضح ان غيابك كثير ..لملذا نحن نفتقدك
    لا تحرمونا من الزيارة

    ردحذف
  60. looooooooooool

    بس انتي شكلك حتعنسي!

    ردحذف
  61. فتفوته بقالك كتير غايبة ليه
    خير يارب
    بقول يمكن اتخطبت واتجوزت وسافرت بره مصر كمان
    ههههههههههههه
    وايه المانع بتحصل
    ماهو الجواز زى القضا يا اختى واهى ماما ترتاح بقى منك ههههههههههههه ربنا معاكى يارب

    ردحذف
  62. فتافييييييييييييييت

    فينك من زمان

    ايه الغيبه الطويله دي

    ردحذف
  63. تسلم ايدك مدونة رائعة
    برجاء زيارتي
    www.qenawy.blogspot.com

    ردحذف
  64. ازايك يا خالتي رووز


    على فكرة انا متربص مع المتربصين


    مجنون نص كوم

    ردحذف
  65. انتي مختفيه فين ياست فتافيت...؟؟

    ردحذف
  66. وحشتينى بجد
    سايبه اثر كبير بغيابك
    يابنت يا عسوله
    طمنى طنطك أم البنات اللى قلبها اتفتفت عليك
    بجد انت فين يا غاليه وحشتينى قوى

    ردحذف

خلل براحتك من غير انتظار .. فتافيت أصلاً بتحب الخيار