خبرين.. اعتذار.. تاج

اولا.. خبرين حلوين أوي
أنتصار تامر مبروك على شركة تراست الحمد لله

افتاح مجلة رؤية.. هي صحيح لسه صغننه بس بكره ان شاء الله هاتكبر
انا مشاركة فيها بخبرين عن الفنانين (ابقوا شوفهم بقى)

ثانيا.. عارفة اني مقصرة في حقكم كلكم واحد واحد

بس والله غصب عني, بقالي فترة طويلة مشغولة ويارب تخلص بقى

بس أنا صلحت النت تاني في البيت.. وهادخل لكم من البيت في الليل واخره
محدش يزعل مني علشان زياراتي قلت
ولا حد يزعل عشلان بتأخر في الرد على التعليقات
انا بحبكم كلكم.. وان كان عليا عايزة الزق في مدونتكم ليل نهار

ثالثا.. عم أحمد أبو العلا دبسني في تااااااج
وانا اول مرة ادبس في تاج.. طبعا ميرسي يا احمد

ويارب اكون ضيفة خفيفة على اللي مرر التاج لاحمد

واظن انها الجميلة كفاية طيبة

اسمك؟
رحاب.. يلا انشالله ماحد حوش

المشهور بيه وسط اصحابك؟
اصحابي او زمايلي اللي في الشغل..
RoRaZ
اصحابي اللي بره الشغل..
Reeka


سنك؟
فتافيت ربع قرن.. هايبقى قد ايه ..
ربع قرن والعوض على الله s:

مجال دارستك؟
الإعلام.. إذاعة وتليفزيون
الست المذيعة يعني

اسم مدونتك؟
فتافيت ربع قرن,, ليه بقى علشان الاسم عجبني
اكمان انا حاسة ان الدنيا فتافيت كتير اوي اتجمعت مع بعض عملت الدنيا
زي كده وصف المدونة بتاعتي ماهو بيقول
هي الحياة ايه غير شوية فتافيت فوق بعض؟!

بس كده ده كل الموضوع

صورتك الرمزية فى المدونة بتعبر عن ايه؟
انا بعشق العيون.. وبحب اوي صور البنات الملثمة
بحس فيها بغموض وسحر وجمال

هل فكرت فى اغلاق المدونة ؟ والسبب؟
لا لسه ما وصلتش لكده.. انا بقالي بس شهرين في التدوين
الله اعلم بكره فيه ايه.. بس انا بحبها وماقدرش استغنى عنها بجد

ايه رد فعلك لو حد قل ادبه فى تعليق ؟
هههههههههههه.. لو الكلام فيه وقح واباحي هاحذفه
لكن لو الكلام مجرد قلة ذوق وقلة ادب في الاسلوب
هارد عليه.. وممكن كمان اضحك الناس عليه
بس من غير ما اقل ادبي

اسوأ مدونه؟
المدونات كلها اللي ضد الحجاب والنقاب
ومدونات التنصير والمرتدين
كمان مدونة واحدة مش هاكتب اسمها.. ربنا يهديها بقى

هيحصل ايه للايميل بعد ماتموت؟
ها يتيتم يا قلب امه.. :"(

اديت الباسوورد لحد قبل كدة؟
اها مرة عملتها.. بس غيرت بعد كده الباس ورد
بس الايميل عندي.. مش حاجة مهمة اوي يعني
مافيهوش اسرار اصلا

السفر بالنسبالك ايه؟
انطلاق وحرية.. بموت فيه

الموود بتاعك ايه ؟
انا ماليش مود ثابت.. مودية ومتقلبة
بس التفاؤل والضحك هو اللي غالب عليا

بتعمل ايه فى وقت فراغك ؟
بقرا بكتب.. بلعب مع قطتي


الأكلة المفضلة ؟
القلقاس الأخضر.. الحمام المحمر..
ومحشي ورق العنب.. الكرشة والمومبار..
الاكل الاسياوي.. البيتزا

الصفات التى اخذتها من والدك؟
العصبية.. والنقد الاذع وفيه مقولة كده
بتقول من حق الكبير يدلع
انا اتعلمت من بابا كده برضو :)

الصفات التى اخذتها من والدتك؟
العصبية.. الحاسة السادسة.. وخفة الدم
(ده لو دمي خفيف زي ما بيقولوا)
والرضا باللي ربنا قسمه ليا

اكتر ست حاجات بتكرههم ؟
الكدب
الخيانة
التشاؤم
الحزن
الحزن
الحزن


اكتر ست حاجات بتحبهم ؟
أسرتي
التفاؤل
الأطفال
السفر
الأكل اللذيذ
قطتي

شخصيتك نوعها ايه ؟
توشيبا العربي عاااااااااا
انا عندي تأكيد الذات عالي اوي
مرحة ومتفائلة وفضولية
واقعية وخيالية مع بعض
عقلانية ورومانسية برضو مع بعض
يعنى مجنوووووووووووونة
بضمير مرتاح... :)

لماذا دخلت عالم التدوين من الاساس؟
علشان انا بحب الكتابة جدا.. بالعامية
وده ممنوع في شغلي.. كمان كنت عايزة مكان اقول فيه اللي عايزاه
مش اللي عايزه صاحب الشغل.. او اللي عايزه الناس
انا اقول اللي شيفاه وبس.. ابقى رئيسة جمهورية نفسي
لا حد يقوللي فلان يزعل.. ولا علانة تتضايق


احلى جملة قيلت فى وصف مدونتك؟
أي تعليق بجد بفرح بيه جدا وبيقى غالي جدا
بس طبعا اول تعليق له مذاقه الخاص
كان من مصطفى.. صاحب مدونة تكوين


اهمية التعليقات بالنسبالك؟
ايه فايدة اغنية حلوة.. لو ملاقتش اللي يسمعها
التعلقات هي الفيد باك بتاعي .. اللي بحس بيها اني عملت حاجة
كلمة الله لما بتتقال ليا.. بفرح بيها اوي
وكمان لما بيكون فيه نقد بناء.. بيسعدني جدا

احلى بوست كتبته؟ ضع اللينك ثم اذكر لماذا؟
فتفوتة استثنائية عن غزة الأبية
كان بيقول الحقايق في وقت ناس كتير مش فاهمة حاجة
كمان علشان تامر دياب كان اول مرة في حياته يبقى
اول تعليق وكان فرحان بكده عااااااااااا


افضل مدونة قرأتها؟

كتير جدا طبعا.. بس انا عندي زهيمر
هاقول كمان الاسماء بتاعة المدونين مش المدونة
بس محدش يزعل مني بجد.. والله هاعصر مخي على قد مقدر

تامر دياب
ستيته حسب الله الحمش
احمد ابو العلا
تامر علي
همس اليل
د. عرفة

عاشقة وغلبانة
عاشقة الرومانسية
مسدس صغير
كاتب مصري
ادم المصري
احساس لسه حي

حسام غانم
ايوشة
صفاء
المعتصم
نبض الحياة
حياتي نغم
اسافوووو
بحر الدموع
شباك موارب
بنوتة
غروبتي
بندقة
حاسوبايته
زوجة عنيدة
الفقيرة لله ام البنات
لورانس العرب
che
lady E
elsha3er
Soul.o0o.Whisper
mosfa
MǿиY El-Shreef
سحساوي
كفاية طيبة
كيارا
ريمان
ايمان
محمد غالية
البنت المشميشية
محمد ابراهيم
م/ علي دوريش
لوجين ابو الدهب
سوووووو
تامر نبيل
صمت المشاعر
القدر وأنا
امبارح كان عمري عشرين
فشكول
أبو العريف

يامرك يا فتافيت.. مش فاكرة الباقي :(

اللي ما قولتش اسمه حقه على راسي
والله عماله اعصر في دماغي
بس انا بحبكم كلكم والله

افضل بوست قرأته؟
العبر والدروس في أصول البحث عن العريس والعروس
للمبدع الجميل تامر علي.. بتاع الجلاش
الضحك اللي ضحكته في البوست ده.. عمري ما ضحكته في حياتي
بجد مووووت من الضحك وعزة جلال الله..
كمان بيناقش بجد قضية فظيعة
الطلبات العجيبة اللي بقيت عند الرجالة
(مجازا) في زوجات المستقبل...

الشغل بالنسبالك ايه؟
شغل.. واحيانا مضيعة للوقت
وكتير يعععععععععع :(


الانترنت بالنسبالك ايه ؟
حيااااااااتي.. انا باكل وبشرب
وبقعد على النت


تمرر التاج ده لمين ؟
احمد مرر لناس كنت هامرر لهم التاج
فانا هامرره لاول 5 اشخاص
هايعلقوا على البوست ده..
بس بشرط ما يكونش اتمرر لهم قبل كده
يعني ممكن يا حلو تبقى التعليق رقم 50 وتكون
ضمن اللي هايدبسوا قصدي هايجابوا التاج
وكل واحد يقول جاوبه ولا لا..
واحساس لسه حي .. ده اجباري هايجاوب
والله لو اتمرر له 100 مرة قبل

كده.. ليه بقى مزاجي

:))

حبـــك يا مــــامـــــا.....

حاولت كتير أكتب حاجة.. ملاقتش كلام أقوله بجد

صعب جدا حد يوصف حبه لأمه بسهولة.. بس حاولت

مـــــــامــــــا....

مش عارف اوصف احساسي مهما فضلت اقول واعيد

اصل حبـــــك مش حب عادي ده كل يوم جوايـــا بيزيد
حبــــــك يا أمي زلزل كيــاني رغم انه قوي وشــديــــد
حبــــــك اسر قلبي وحيـــاتي مع ان قلبي صعب وعنيد

مـــــــامــــــا....

عارفة بحبـــك قد ايه يــا اغلى من عمري انــا؟؟

حبـــــــك في حياتي تـــلاقيه ســر فرحي والهنــــا

حـــب فتحت عيني عليه وعلمني معنى الرضـــــا
و يوم مـا جرحي يناديه يبقى جنبي حضــــن ودوا

مـــــــامــــــا....

يا أول كلمة نطقها لساني قبل ما يعرف معنى الكلام

يا نعمــــة ربي ادهالي تملى عمري حــب وســــــلام

يا شمعة على نورها انا ماشية تمحي بدروبي الظلام

يا ملاك مهما شاف مني عمره ما عاتب بكلمة مــلام

مـــــــامــــــا....

ربي يخليـــــكِ ليـــا ... يا وصية مســـك الختــــام

ليلة في عشق الفراولة

أمبارح بليل اتعشيت (غدى x عشا).. ودخلت
نت أشوف الماسنجر

الياهو كالعادة ضارب.. فتحت الهوت لاقيت
صديقي الصدووووووووق
(هاني عبد المجيد)

كنت وقتها بحلي بفراولة مقطعة.. مع موز
وخوخ في عصير برتقال

فحكى ليا حكاية حصلت معه.. من ساعة بسبب الفراولة
ونقلتها لكم هنا.. بنفس الكلام اللي قاله
لا زودت حرف.. ولا نقصت حرف

** ** ** ** ** **


كنت عائدا من النادي بعد أن بذلت مجهودا
فوق العادة في التمرين!!
توقفت أمام محل الفاكهة و في خاطري أن أتناول
فاكهتي المفضلة الفراولة
أنا اعشق الفراولة جدا و انتقي دوما
أطيبها منظرا و أغلاها ثمنا!!

وعادة اخذ علبة واحدة كعشاء خفيف يسكت جوعي بعد تمريني الشاق.
وقع بصري علي فراولة من النوع الفاخر
منسقة في صناديق بلاستيكية أنيقة
لم استطع أن أقاوم اشتريت علبتين!!

وهرعت إلى سيارتي ممنيا نفسي بالجائزة الموعودة.
تنبهت بعد أن فتحت العلبة الأولي أن
عداد البنزين أشار إلى النهاية!

فدخلت إلى محطة البنزين القريبة..آتاني
عامل المحطة هندي
بسيط.. يعلو وجهه كآبة!!
طلبت منه بلهجة آلية أن يعبأ خزان البنزين.
فامتثل فورا!!

ونسيته من فوري.. فالفراولة لا تقاوم!!!
وهل هناك من يمكن أن يقاوم ذلك الطعم السحري؟!!..

غرقت في أحلامي, و حبات الفراولة تتراقص
في فمي واحدة تلو الأخرى!!
حتى انتهي الصندوق الأول....
لم استطع أن أقاوم هذا الإغراء!!

فامتدت يدي إلى الصندوق الثاني...تناولته بيدي اليسرى..
بينما كانت أصابع يدي اليمنى تداعب بحبة الفراولة
الأخيرة من الصندوق الأول شفتاي
الحالمتان بذلك الطعم السحري!!

صحوت من أحلامي علي عامل المحطة..
فالخزان قد امتلاء وتقدم نحوي .. بوجهه الكئيب!
فناولته المبلغ المطلوب بلا مبالاة, و دون أن انطق كلمة!!

تذكرت فجأة ..!!!!!!!
أنني تناولت حبة فراولة أمامه عندما ناولته النقود!!
ولا اعرف لماذا و كيف شعرت بتفاهة تصرفي؟؟!!!

امتدت يدي إلى حبيبتي الأثيرة..
تناولت العلبة الأخرى..وبدون أي كلام ناولته إياها!!

وهنا لمعت عيناه, و أشرق وجهه فجأة
بأجمل ابتسامة رايتها في حياتي!!!
ابتسامة نابعة من أعماق قلبه!!!!!!

لم اقل له شيئا.. بادلته الابتسامة بأخرى.
تحركت بسيارتي دون أن انبس بكلمة..

وشعرت حقا.. أن ذاك الصندوق هو
أشهى صندوق فراولة تناولته علي الإطلاق!!!

** ** ** ** ** **

عجبتني أوي وهو بيحكي تخيلت العامل البسيط
اللي فرح بعلبة فراولة من قلبه بجد
ووالله العظيم .. عنيا دمعت

هي حاجات بسيطة.. ممكن نعملها وتكون سبب

في سعادة ناس أبسط من الحاجة اللي عملناها

انهاردة أي كومنت مش هايبقى ليا
لا هايبقى لهاني .. يعني وجهوا الرد

له هو مش ليا أنا.. انا نقلت

بس معملتش حاجة

أكتر من كده

عدت سنة.. يادي الهنا

يا عمر ويارتني ما عشته .. يا وهم وزمان صدقته

كل اللي بيكتبوا قصص.. جبتلكم كااااااااشاااااااااااات

يااااااااه.. وربنا وحشتوووووووني موت
مدون مدون.. ومدونة مدونة

أولا
كل سنة وأنتم طيبين.. متأخرة عارفة بس ظروف بقى

كل واحد ياخد له .. حتة حلاوة من اللي بيحبها


بس حتة واحدة.. بلاش طفاسة علشان تكفي P:

ثانيا
والله مشغولة موت اليومين دول
في الشغل والرواية بتاعتي
أصل عقبال أمالتكم.. بكتب أول رواية ليا.. وأحتمال الأخيرة
ده بتاع ربنا بقى.. ده حسب الوحي يعني

أهم ما في الموضوع بقى

أني شوفت هنا مدونين كتير موهوبين بجد
في القصص (بكل أنواعها).. والروايات زي

تامر باشا علي
بنوتة السكرة
كاتب مصري
عمرو تشي
وطبعا غيرهم كتير.. بس دول اللي فكراهم

أنا بقى لاقيت خبر جامد .. ومفأجأة D:
أماااااااااال .. يعني أجي بعد الغيبة دي

بأيدي فاضية .. ده حتى عيب

فيه موقع سعودي.. معمول له دعاية ضخمة جدا
على النت وفي الصحف والمجلات
هو أول موقع عربي.. متخصص في القصص والروايات
عامل عرض جامد جدا

انه هايسوق وينشر القصص الحلوة
ويبعها إلكترونينا.. جزء من الربح للموقع وجزء للكاتب

قولت أقولكم عليه.. يمكن ربنا ينفخها في وش
اللي مانشرش حاجة قبل كده .. ويتنشر له.. والكاشات تجري في ايده

ده الميل بتاع الموقع
info@nus-sa.com

بس نصيحة مني لكم

الموقع أصلا بقاله شهر بس .. وده في حد ذاته ميزة
لأنه هايبقى محتاج مادة.. قيمة وكبيرة
يبدأ بها عملية النشر

وهو عايز يبقى له نجوموا .. اللي هو أكتشفهم .. فماتضيعوش الفرصة

لأننا مش هانخسر منها
بكل الأحوال إن شاء الله

كمان الموقع له.. منتدى نونو .. سجلوا عليه
علشان الأدارة تعرفكم
ويبقى لكم تواجد بأستمرار في الموقع
ده هايدعم فرصتكم أكتر

ده لينك المنتدى
http://www.nus-sa.com/forum/index.php

يارب أكون قدمت خبر حلو .. لكل كتابنا

ويكون فتحة خير على الجميع
إن شاء الله

بحبكم كلكم والله

:))