29 يناير 2009

فتافيت مش مسئولة عن ضحايا قطار الطلقة



كانت عندي جولة حول العالم من ربع ساعة كدا.. أخدت الطيارة الخصوصي بتاعتي.. اللي أسرع من الضوء.. وشوية في أمريكا على حبه في فرنسا.. وبعدين قولت أعدي على روسيا اسلم على بوتين معرفش عنه حاجة من زمان.. وهناك لاقيت الصين زعلانة أوي إني ماعدتش عليها يجي من 4 ايام كدا.. وأنا في الصين قولت عيب أبقى هناك وما أعديش على اليابان.. أهي ثقافة برضو لما أعرف معلومة من هنا على معلومة من هناك.. علشان لما أجي أفتفت تبقى فتفتة ذات قيمة (معلش الفصحى بتنقح ساعات)..
طبعا كل واحد فيكم بيقول شكلك كدا فشارة وعمالة تسرحي بينا.. والله يا جماعة ما فشارة ولا بسرح بيكم (هو انتم عربية فول هاسرح بيها).. أن فعلا خدت الطيارة بتاعتي وكلكم عندكم طيارة زيها.. أي والله كل واحد بيقرا البوست ده عنده زيها.. أستنى يا عم بتبص فوق السطوح ليه؟؟ .. هو أنا قولت راكنها فوق السطوح.. الطيارة ديه هي جوجل العظيم.
المهم وأنا في الجولة اليابانية الجوجلية وقعت تحت إيدي حتة فتوفتة عجب والله.. وهي الأخ المحروس (قطار الطلقة)..


هتقولوا قديمة بقى وشكلك وحش وكلنا عارفين الأستاذ الماصون بتاع الطلقة.
ولو تستنوا عليا ويصبر القاتل على المقتول كان والله إتأندل مات لوحده ولا كان بقى مقتول ولا القاتل أتنش إعدام وضاع مستقبله وولاده بقوا شحاتين وزادت اولاد الشوارع بودلا الاخ قاتل ده.. يلهوي نسيت كنت عايزة أقول إيه.... أيوة قطارة... قطارة ايه يا منيلة قطار الطلقة ده بقى أتسمى قطار الطلقة ليه؟؟ .. قال إيه علشان يقدر يتحرك من العاصمة طوكيو ويوصل للعاصمة القديمة كيوتو بسرعة طلقة الرصاص.. ومش عايزة أي حد يبص له بعين صفرة ولا مدورة.. ليولع زي قطار الصعيد بتاعنا اللي بيوصل بسروعة السلحفاة اللي عندها شلل أطفال وداخلة سباق تسلق الجبال.
حد يقوللي ما يمكن المسافة صغيرة.. وبيشتغلوا نفسهم إنه سريع.. هاقوله والنبي تسكوت بقى قال المسافة صغيرة قال.. انت عارف المسافة بينهم كام.. بص للخريطة كدا


اهي الاستاذة كيوتو في مكان النقطة الفوشية الامورة ديه تقريبا يعني.. ولو جبت سيادتك خريطة لمصر بنفس مقايس الخريطة ديه.. هتلاقي المسافة بين طوكيو وكيوتو تزيد عن المسافة بين القاهرة والمنيا.. والنبي المنيا.. أيوة المينا عروس الصعيد..ومش عايزة اسمع لا شهقة ولا خبط على الصدر.. خلينا شعب راقي ومتحضر عيب كدا ومالو يعني لما يوصل من القاهرة للمنيا بسرعة الطلقة فيها حاجة دية؟؟.. وجتنا نيلة في حظنا الهباب.
المهم مش ده برضه اللي فتفوتي تتبلور (عارف تتبلور يعني ايه؟ اصلي بسمعها من زمان) حوله.. الفتفوتة بقى إن وأنا واخدة طيارتي الجوجلية وطايرة فوق اليابان وقع تحت إيدي مقال بتاع محمد السلماوي.. وبيحكي بقى عن حاجة فظيعة.
تحذير قبل قراءة باقي الفتفوتة:

اللي عنده ضغط يقوم يروح .. واللي عنده السكر ياخد حقنة انسولين فورا .. واللي وحيد أمه وأبوه يمشي لأني أخاف عليه من الشلل.. فتافيت لا تتحمل مسؤولية إي أصابة بسبب باقي الفتفوتة.. إنتهى التحذير


المقال بقى بيقول إيه قال خير الله ما يجعلوه خير.. وياليل بحسبك نهار.. سنة 1999 كان محمد السلماوي في اليابان وكان واقف في محطة القطار.. بتاع الطلقة ده ومعاه واحد صحبه ياباني وعنيه ضيقة (مهي لازم تكون ضيقة امال ياباني إزاي).. وبعدين الأخ أبو عنين ضيقة قاله إننا هانركب في العربية الخضرة.. أصل عقبال أملاتكم في القطار ده مافيش درجة أولى وتانية وسيبنسة.. لا فيه عربية حضرة وحمرة وصفرة .. وقام قايله لازم نقف في مكان اللي بتقف فيه العربية الخضرة(ويا عيني علينا في مصر القطارمن دول يجري ونجري وراه علشان نلحق باب العربية اللي هانتشعبط فيها وبعد الجري والشعبطة والذي منه القطار يولع بينا).. المهم راحوا عند مكان العربية الخضرة والقطار جه ووقف في المكان (وسبحان الله قادر على كل شيء)..
وكان محمد السلماوي واقف بعيد عن باب العربية بحوالي 5سم.. فقال لصاحبه ابو عنين ضيقة و(بيهرج والنبي ماقصده حاجة).. إزاي القطار يقف بعيد عني كدا وبيضحك.. قوم إيه بقى صاحبه أبو عنين ضيقة وشه احمر واخضر واصفر بألوان القطار.. وفضل يعتذر لمحمد السلماوي.. قال إيه علشان القطار وقف وباب العربية كان بعيد عنه ب5سم.. وعلى مدار 3 ساعات كل مسئولين المحطة جم يعتذروا له (إي والله مسئولين واعتذروا يابان بقى عقبال املاتكم) ويأكدوا إن الغلطة ديه.. لا يمكن تحصل تاني ابدا وحقك عليا ماتزعلش.. إيوه أه.
محمد السلماوي بعد ما فاق من الصدمة واللي حصل وركب القطار اللي جه ووقف قصاده فعلا بالتنتوفة.. قال لصاحبه انا كنت بهرج.. ده شيء ممكن يحصل في كل الدنيا.. قام صحبه ابو عنين ضيقة قاله ايه بقى.. ولكنه لا يحدث في اليابان (أنن أان تششششششششش).
وبلا وكسة علينا منقوعة في ويبة.. لان الكلام ده من 10 سنين فاتوا.. واحنا لسه بنجري ورا القطار.. ونتشعلق في السيبنسة.. والقطورات تولع بينا.. وقطورات تطلع بره القضبان وتمشي مع الناس.. ولما ربنا كرمانا ولاقينا حل لحوادث القطار .. (كان التكتوك هو الحل)... وعجبي
وحسبي الله ونعم الوكيل فيك يا ابو عنين ضيقة ياللي ضيقت الدنيا في وشي وعرفت بسببك انه مافيش فايدة .. مافيش فايدة مافيش فااااااااااااااااااايدة.. (وكلامك درر يا سعد يا خويا والنبي)

فتافيت تطلب إحصائية بعدد ضحايا الفتوفته ديه (الوحشين اللي ما سمعوش الكلام وعملوا بالتحذير).. كام واحد جاله شلل وكام واحد جاله ضغط وكام واحد جاله سكر.. ولو فيه وفيات.. ياريت الورثة يقولولنا.. علشان ناخد تعويض من الواد ابو عنين ضيقة اللي كان مع محمد السلماوي.

هناك 13 تعليقًا:

  1. عارفة ياست انتي لو كان البوست ده اول امبارح كانت جت لي أعراض البوست من شلل وسكر وضغط
    بس لطف ربك اني لسه متحصنة امبارح لما نشرة السي بي اس جابت المزغود في حبابي عنيه رئيس الشركة اليابانية للطيران
    الراجل الموكوس اللي لو كان هنا كنا زمنا مودينه السرايا الشيك اللي في العباسيةبيقول " اذا حدث لك شيء يزعجك اثناء الرحلة لا تلوم طاقم الطائرة وانما لوم رأس المؤسسة؟؟؟؟؟؟؟؟؟؟؟؟؟؟؟؟
    ورأسني ياجدع على رشوة ونص

    وكمان بمناسبة الأزمة المالية العالمية خفض الأجور بس قال ايه خفض اجره زيه زيهم؟؟؟؟؟؟؟؟؟؟؟؟؟
    فينه الموكوس فينه كنا طلعنا عينه ياقلب امه من زماااااااااااااااان

    قلبتي علي المواجع والبطاطس

    اول تعليق ع البوست نيهااااااااااااااااااااو

    ردحذف
  2. القطر بتاعنا احنا بقي
    زي الموز بتاعنا احنا في مسرحية المتزوجون كده
    القطر بتاعنا وبلا فخر لان مينفعش افخر بيه خالص
    مره من المرات الي كنت مسافر فيها الأقصر
    ركبت القطر وكنت راكب درجة اولي عشان شركتنا الي حاجزة طبعا
    المهم قلت اروح الكافيتريا بتاعة القطر اجيب حاجة تتشرب
    دخلت الكافيتريا من هنا وشميت ريحة شياط منيلة بقول للواد الي واقف فيه ايه
    قالي معلش يا بيه اصل كان فيه حريقة
    بصيت حواليا وافتكرت امي وابويا واخواتي ومكتبي والكمبيوتر ومدونتي وشغلي وزمايلي وقهوة التكعيبة ومكنش باقي غير اني اعيط خلاص
    يا نهاااااااااااااار يعني خلاص مش هشوف كل ده تاني
    وهموت والع في قطر مقلوب
    بس الحمد لله الواد قالي انهم طفوها
    فسئلته كانت من ايه
    قالي عيل ابن تييييييييييييييييييييييييت معانا هنا نسي السوجارة بتاعته علي الرف بتاع السندوتشات ومسكت في الورق بتاعة السندوتشات بس الحمد لله ربنا ستر يا بيه
    حرام عليكي هتشلليني

    ردحذف
  3. والله يارورو ياقمر انا عندي طلقه بردو التوكتوك ماله مش طالقه وبيوصلك بسرعه
    بصي مصر بخييييييييييير مادام فيها تكاتك وبتوصلك بسرعه
    وبعدين لما تحبي تروحي مكان اجريلك توكتوك بجنيه هيلففك العالم كله ولا الحوجه للطايره بتاعتك ياقمر
    اما القطر بقى انا بترعب من شكله اصلا تحسي انك داخله القبر والله رخمممممممم وشكله وحش وصوته بيرعبني
    وعشان كده شباب مصر الواعي افتكس التوكتوك عشان نستغني عن وسائل المواصلات وحوادثها
    لاتقوليلي قطر ولع ولا قطر اتقلب ولاقطر مجاش ولا قطر طلقه حتى
    هما عندهم قطر طلقه واحنا عندنا توكتوك بطه

    ردحذف
  4. ستيته حسب الله الحمش

    نورتي البوست والله .. والمدونة .. وشكلي هادفعك فاتورة الكهربا بتاعة الشهر ده

    تصدقي بالله اني خلاصت تعبت من كدا.. كل يوم اتأكد اننا في مصر غير معترف بادميتنا
    وشكلنا هايتعمل ليا منظمة الرفق بالمصريين

    يلاه اهي عيشة والسلام بقى.. ومالو التوكتوك قال عنى يعني

    بس ياترى الموكوس ده برضه عينه ضيقة :P

    وياستي ما تقلقيش المدونة لسه نونو ففي اي وقت هاتدخلي هاتبقى اول كومنت.. مدونتك يا زعيمة هي اللي نحجز فيها .. وماسكة الخشب اهو :)))

    ردحذف
  5. Tamer Diab

    تامر باشا يا كومناتك الجامدة
    وفعلا علاقة قطر اليابان بقطر مصر علاقة الموز بالفجل .. اااااااه يا عيني غلينا والنبي احنا صعبنين عليا اوي :((

    والموقف بتاعك انا لو فيه كان ممكن انط من القطر اصلا قبل ما أسأل ريحية شياط في قطر.. يا نهار بتنجان.. بس انت شجاع كان فيك اعصاب تسأل ريحة الشياط ديه منين.

    وقال ابن (تييييت) اللي ساب السوجارة جتب ورق الساندوتشات .. ده ابن ستين (تييييت) اللي لسه بيسمح بالتدخين جوا الموصلات

    ومبروك الشلل يا معلم .. عادي بقى مهو كدا كدا كان هايجي
    نورت البوست

    عندنا ضحية واحدة .. عندنا ضحية واحدة

    ردحذف
  6. الله يبارك فيكي عقبال عندك يا ام فاروق
    فرحانة فيا علي اساس انك ساكنة في اليابان وانا بقي الشحات ابن التيييييت الي ساكن في مصر
    كتنا ستين نيلة في حظنا الهباب
    لو اكن مصريا لوددت ان اكون اي حاجة تانية

    ردحذف
  7. تامر

    بلا يابان بلا يختفي.. الحمد لله على كل شيء
    اللهم لا اعتراض على حكمك.. مصر مصر اهي برضو احسن من غيرها.. وطبعا غيرها ديه لا تنطبق الا على كينيا وزمبابوي .. وبلاش اقول السودان يبقى شكلي وحش بعد الجنيه السوداني ما بقى بالشيء الفلاني
    ورفضك يا زماني يا مكاني يا اواني انا عايز اعيش في كوكب تاني

    ردحذف
  8. يارب يا ساتر
    احم احم
    مبروك المدونه يا فندم
    وبالنسبه لليابان ماعرفش ليه الناس خيالها واسع وبتقارننا باليابان احنا اكبر من اننا نتقارن باليابان احنا نتقارن بجزر القمر
    جيبوتي
    جمهورية شومبونجو
    كده
    اومال ايه
    ثم ايه شغل الكارتون ده قطار طلقه انا حاسس اني بتفرج علي مازنجر
    وعموما بالنسبه للاحصائيه , انا ضهري وجعني بس
    وعيني مضلمه من الاسود ده

    ردحذف
  9. طلب صغير
    ياري تشيلي
    كلمة التاكيد
    word verification
    عشان بتجيبلي شلل

    ردحذف
  10. بصراحه زيكا والله عنده
    يعني هو انا لما احب اعلق عليكي رخامة مش اكتر يعني مش عشان عايز اعلق مجرد رخامة
    هكسل لما الاقي كلمة تأكيد
    بالعكس هحطك في دماغي وان شالله تعملي باس وورد محدش غيرك عارفه
    بصراحه رزيلة اوي

    ردحذف
  11. هموووووس

    أنا كنت بحب القطر جداً.. لغيت ما حصلت حاجة خلتني اكرهه موت

    عاجبتني أوي قطرة طلقة وتوكتوك بطة

    نورتي يا قطة

    ردحذف
  12. Zika
    يلهوووي نقارن مصر باليابان ليه بس حد قالك اننا اتهطلنا؟؟
    بس لما اتكلم عن حاجة هناك من 10 سنين يبقى من حقي ادور على بوادر لها هنا ولو خطوة لقدام.. بس الظاهر خلاص مافيش امل

    موضوع قطار الطلقة والله هو اسمه كدا بجد
    Bullet train
    مش كارتون ولا حاجة.. بس علشان هنا عندنا قطار النقطة بعيد عنك حسيت ان قطار الطلقة افلام كارتون

    ضهرك وجعك ليه بعد الشر؟؟ ده من الفتوفته؟؟
    وسلامة عينيك بس انا بحب اللون الاسود جدا.. وعلشان بحب اكتب بالابيض موت

    ام عن word verification
    ماكنتش واخدة بالي انها موجودة اصلا.. ويعني اتشليت منها وماتشلتش من ابو عنين ضيقة؟؟
    تصدق انا اللي اتشليت كدا

    بس انا شلتها خلاص يا باشا ما تزعلش نفسك

    ردحذف
  13. تامر باشا

    صلي على النبي بس انت لسه طالع من شلل صحتك لايقلب رعاش

    انا ماكنتش واخدة بالي منها اصلا وخلاص شلتها.. انا تهمني راحتكم

    خلاص يا معلم .. ولا كانت لرخامة ولا غيره اصلا لسه مدونوتي نونو.. علشان اخاف عليها من الرخامة

    ردحذف

خلل براحتك من غير انتظار .. فتافيت أصلاً بتحب الخيار