21 مارس 2011

أم البـــــطل!!

,



كل سنة وأنتِ طيبة يا أمي،، ربنا يخليكِ ليا
النهاردة عيد الأم،، وكلنا فرحانين بأمهاتنا،، لكن
عندنا أكتر من 600 أم فقدت أبنها أو بنتها،،
عشان حريتنا كلنا
حقهم علينا،، نقولهم كل سنة وأنتم طيبين،،
يا أمهات الأبطال
دي أرقام،، لبعض أمهات الشهداء،،
ياريت نتصل بيهم النهاردة
نقوللهم،، أوعوا تزعلوا،، كلنا النهاردة ولادكم
أنتم سر حريتنا،، لما ربيتوا ولادكم وطلعتوهم رجالة
الأرقام،، من جروب كلنا خالد سعيد

الشهيد أحمد بسيوني
0164455070
الشهيد أحمد عبد الرحيم السيد
0101101898
الشهيد أحمد إهاب محمد فؤاد عباس
0222741042
الشهيد إبراهيم رضا محمد
0161164719
الشهيد إبراهيم سمير أحمد محمد سعدون
0122995120
الشهيد مصطفى العقاد
0101974108
الشهيد مصطفى الصاوى
0199616141
الشهيد إبراهيم علي صالح
0146331935
الشهيد أحمد سالم عيسي محمد
0179750765
رفح منزل
086- 3300218
الشهيد أحمد سمير السيد
المنزل القاهرة
23200620
0127365625
الشهيد أحمد صابر مصطفي
0195594174
الشهيد أحمد عبد الرحيم السيد
0101101898
الشهيد أحمد عبد العاطي سيد
0119967385
0194966039
الشهيدة أميره سمير السيد دويدار
0124942836
ربنا يصبرهم يا رب
ولادهم،، هم أصحاب الفضل في حريتنا
ولادهم،، هم
الشمع اللي نور مستقبل مصر

17 مارس 2011

إكرام الدستور،،، دفــنه!!





هو ليه لازم نعيش ضمن القطيع؟؟
ليه الكنيسة تجيش أصوات بتقول لا

تحت لواء المسيحية؟؟
وليه الجمعية الشرعية بتجيش أصوات بتقول نعم

تحت لواء الإسلام؟؟
ليه محدش عايز يفهم،، إننا خلاص بتروا لنا الأربع رجلين
وبطلنا نمأمأ،، وطلع لينا جوز رجلين
ومبقيناش ضمن القطيــــــع؟؟

(( لا )) ،، بصوت عالي لكل حد ماشي ضمن قطيع!!


أنا ضد إن أي شخص يقول صوته،، بالعند في صوت تاني!
يعني ضد إني أقول لا،،
مجرد عند في إن الوطني بيقول نعم
وضد إني أقول نعم،،
مجرد عند في البرادعي وموسى بيقولوا لا

ولأول مرة بقول،،، خلي الإخوان والحزب الوطني قدوة ليكم
الإخوان والوطني،، بيقولوا نعم أهو ومابيعاندوش في بعض
وسبحانه لما يجمع الشتتيتين
بعد ما ظنوا إنه لا مصلحة مشتركة
قد تأتي في يوم من الأيام،،،
إيييييييييه ثورة

(( لا ))،، بصوت عالي لأي صوت بالعند في صوت حد!


لما الجمعية الشرعية تقول إن التصويت بنعم واجب شرعي
فأنا مضطرة إن أصوم كام يوم كفارة
لأني هاصوت (( لا ))
،، بخط تخين
بس هو أنا كده بقيت من الخوارج؟؟

(( لا ))،، بصوت عالي لأي حد بيستهبلني!


أنا كرهت أنصاف الحلول
أنا كرهت فتات الخبز
أنا كرهت خلينا نخلص بقى
أنا كرهت الخوف من أي حاجة جاية


(( لا ))،، للرجوع لعصر ما قبل الثورة




أنا عندي عشتاشر سبب إني أقول (( لا ))
وقولتهم في الفيسبوك والمصري اليوم، ومش هاعيده هنا
لكن كل اللي بيقول نعم، عشان البلد تستقر
أنت عارف بنعم دي،،، هاننزل كام مرة من البيت؟؟

مرة الاستفتاء دي

مرة مجلس الشعب

مرة مجلس الشورى

مرة الرئاسة

مرة الاستفتاء تاني

مرة مجلس الشعب تاني

مرة مجلس الشورى تاني


ونعم الإستقرار بصراحة،، أصل مصر ناقصة كل ده
في الفترة دي،، طبعا أصل إحنا بنصدر الأمن والأمان!!


(( لا ))،، لإستقرار زائف مش هايحصل!


قبل الثورة كانت الفزاعة الإخوان
أوعوا الإخوان تعضكم،، وبعد الثورة بقى
أوعوا الوطني يرجع،، حاسب من الوطني يا جدع
ما نفعش طبعا،، لأن الوطني والإخوان بيقولوا نعم
فدلوقتي الفزاعة الجديدة،، أوعوا الكنيسة يا جدعااااااااان


(( لا ))،، بصوت عالى لأي فزاعة للشعب


وفي النهاية،، هاصوت بــ (( لا ))
إن شاء الله،، وأسبابي كتير موجودة على الفيسبوك
هاقول (( لا )) ،، عشان أنتم فاكرين إن الجيش مسكك
بشرعية ثورية،، وده ماحصلش

الجيش مسك بناء على المادة 84 من الدستور
دستور 71 اللي كان إسقاطه من ضمن أهم مطالبنا،، !!


فيديو يستحق المشاهدة فعلا


إكرام الدستور،،، دفــنه!!


08 مارس 2011

ملفات أمن دولة، تسريب أم تخريب؟!

مثلي مثل باقي المصريين فرحة للغاية بتجميد أمن دولة و إعادة هيكلته، فدائماً كنا نتسأل أين الأمن وأين الدولة؟! وكم غمرني الكثير من الفخر وأنا أقرأ تسريبات الوثائق هنا وهناك، من كان يصدق أن مثل هذا يحدث في مصر؟!ولكن بعد أن ذهبت (السكرة وجائت الفكرة)، شعرت بشيء ما داخلي يصرخ ويقول: كم أنتِ بلهـاء!

دعونا نحكم عقلنا قليلا فيما يحدث الآن:
- عند اقتحام أمن دولة من قبل المتظاهرون، وجدوا الكثير من الوثائق والملفات (السرية للغاية)..! فإذا كانت فعلا من فئة السرية للغاية فلمَّ لم يتم إحراقها أو فرمها للتخلص منها؟؟ ألم يكن من الأولى فرم الوثائق السرية للغاية أولا؟!.. أم كلمة سرية للغاية للإستهلاك المحلي فقط؟!

- كل الوثائق التي ظهرت تخص الفاسدين ولكن أي فاسدين؟؟॥ فقط من تم القبض عليهم! ألا يوجد وثيقة واحدة تخص الفاسدين الذين لم تمسسهم قرارات النائب العام بعد؟!

- تظهر الوثيقة تلو الآخرى بشأن إعلاميين شرفاء، أو هكذا يحسبهم الشعب المصري! ولم تظهر قط وثيقة تُدين أي إعلامي من القائمة السوداء الخاصة بثورة يناير؟! وكأن لسان حال الوثائق يقول، منافقين عملاء ولكن شرفاء!

- بأي منطق يمكنني أن أصدق إنه لا يوجد وثيقة واحدة تدين أي فرد بأمن دولة؟؟!.. ومن المعروف أن الجهاز كان يتجسس حتى على نفسه وأفراده، ألهذا الحد هم شرفاء!

- كلنا يعلم كل العلم أن ملفات وتقارير أمن دولة يشوبها الكثير والكثير من الظلم والإفتراء؛ فلم الآن نصدق أن كل الوثائق التي تخص الشرفاء صحيحة؟؟!.. رغم إنها جزء من التقارير!!

- وجدنا وثائق تدين عمرو الليثي، ومجدي الجلاد، ولكن الغريب أنه لا يوجد ولا وثيقة (تعبيرية) واحدة؟!، أمن المنطقي أن التليفزيون المصري والجرائد القومية، كلها تحت شعار شرفاء بلا حدود؟!

- شرائط الفيديو التي وجدت، كلها (أو ما أشير إليها) لرجال أعمال بصحبة شخصيات من بلاد عربية شقيقة ذو مستوى رفيع؛ مسجلة بغرف فنادق خارج مصر، إين إذن ما سجل بفنادق داخل مصر؟!

- الثورة بدأت منذ يوم 25 يناير، ويوم التنحي كان 11 فبراير، ومنذ يومين فقط تم إقتحام مقرات أمن دولة؛ أيعقل أن الجهاز بكل هذا الغباء بأن يتخلص من الملفات الآن فقط؟! لمَّ لمْ يتخلص منها منذ شهر على الأقل؟، وهل الجهاز ساذج بالقدر الكافي بعد أن تم كسر حاجز الخوف بين الشعب والأمن، أن يحرق الملفات ويتصاعد الدخان على الملأ؟.. أشعر بشيء ما غريب، أو مُدبر... ولربما صدفة ولكن هناك (حلقة مفقودة) حتى نفسر هذا كله!

هذا ما يحضرني الآن من علامات إستفهامية كثيرة تتراقص أمامي...
وبداخلي بعضاً من التفسيرات:

الأول: أن تلك الملفات والوثائق هي ما يريد أمن دولة أن يصل للشعب، حيث أن الآن وقت ضرب كل الرموز وتحطيم ثقة الشعب بكل شرفاء الدولة، وأن الأوراق والملفات المهمة قد تخلص منها الجهاز بمجرد أن سقطت رأس النظام وقت المظاهرات المليونية، والإنشغال بميدان التحرير؛ كي لا تظهر الحقيقة لنا، ويصبح الشك والتخوين سمة الفترة القادمة، ويكون الجميع عملاء (ومافيش حد أحسن من حد)!

الثاني: أن هناك وثائق حقيقية وملفات سرية فعلا لم يتسع الوقت للجهاز أن يتخلص منها، لهذا تم العمل على تلفيق وتزوير وثائق تظهر للشعب الآن عبر النت والصحف والهدف منها هدفين من وجهة نظري:

- تحطيم رموز الشرف بالدولة، وتلويث سمعتهم للأنتقام والتخلص منهم، هذا أن صدق الشعب الوثائق.
- وإن لم يصدقها، فستفقد باقي الوثائق مصداقيتها رغم إنها حقيقية، ويشك الجميع بإنها ملفقة هي الآخرى. وفي الحالتين الجهاز هو المستفيد، تلويث الشرفاء، أو إنقاذ العملاء.. وحلوهم مر بالنسبة للشعب!

الثالث: أن يكون الجهاز أصابته السذاجة والبلاهة بأخر أيامه، كالإنسان عندما يشيخ ويفقد الكثير من إتزانه ورشده؛ فقد يكون حدث له حدث جلل في الفترة الأخيرة، جعله يهدم المعبد على رأسه، ويحرق الملفات بسرعة وغباء ويتصاعد الدخان من كل مكان فتعرف المارة أن هناك ملفات تحترق، ولسوء تقدير الجهاز لم يتوقع مهاجمة الشعب للمقرات أو لغروره الزائد..!

أستبعد التفسير الثالث رغم يقيني بأن هناك حدث جلل بالفعل أصاب أمن دولة منذ ثلاث أيام فقط!، والتفسير الأقرب للحقيقة من وجهة نظري الشخصية هو الثاني، وأكد إحساسي بالفعل معلومات شبه مؤكدة أن الجيش قد أعتقل خمسة أشخاص بتهمة تزوير وثائق وإلصاقها بأمن دولة، ويشاع أن هذا بتحريض رجل أعمال معروف وعضو بالحزب الوطني بمدينة السويس.

وقد يكون كل هذا هراء ومجرد إفراز بداخلي؛ لحلقات المفتش كرومبو ويوميات إحسان ونفسية، أو قد أصابني داء المؤامرة بعد أن شاهدت حلقتين متتاليتين من برنامج مصر النهاردة، كان الله في عون عقلي وهذه بالنسبة لي جرعة مميتة وليست فقط زائدة!

المقال على المصري اليوم



06 مارس 2011

جمعة رد الجميل.. لأمن دولة

أنا فضلت التواصل من أول الثورة على الفيسبوك
المعلومات هناك أسرع وأسهل في التداول وتحري الصحة
لكن النهاردة... ما كنش ينفع أبداً
ما أسجلش موقفي على المدونة بتاعتي



أول مرة أحزن كده..
وتكون صدمتي في الشعب المصري للدرجة دي!
معقول وصلنا للدرجة دي من عدم الضمير.. معقول وصلنا للدرجة دي من الجحود ونكران الجميل؟؟
أزاي أي مصري محترم أصيل.. يوافق إن أمن دولة يتجمد؟؟
يتجمد وفي البرد ده كمان؟؟ طيب حتى يستنوا للصيف عشان ما يجيش لأمن دولة نزلة شعبية!


أمن دولة، أول حد دخل خدمة كهربني شكراً
وكان في منتهى الكرم يديك كهربا على قد ما يديك ومن غير عداد ولا وصل ولا مصاريف نضافة!


أمن دولة، أخترع خدمة أنفخني شكراً
عشان خاطر الشعب المصري يحافظ على مظهره، لأن كنا داخلين على مجاعة وكانت الجزيرة الوحشة
هاتصورنا وإحنا رفعيين خالص زي النجير فأمن دولة قال ينفخ الشعب عشان يبقى حلو ومكلبظ!


أمن دولة، نمى مهارات ال
شعب في أصول التخيل والإبتكار
لما يرسم لك سلم على الحيط ويقولك أطلع، يعني بعد ما يعلمك المشي على الحيط، تعمل معاه كده؟.. يااااااه مش مصدقة!


أمن دولة، كان بيحافظ على شباب مصر من المعصية
بعد ما المغريات بقت كتير في الشارع المصري، خاف على الشباب من الإنحراف، فبقى بيعتقلهم في العشرينات
ويخرجهم في الإربعينات عشان يبقوا نضجوا وما ينجرفوش إلى الرزلية، شوفتوا التقوى!


يعني لو أبوك عمل معاك كل ده، هاتردله الجميل بإنك تجمد؟؟
يعني أمن دولة عاش معانا وعيشنا معاه سنين
وفي الأخر ده يكون جزاءه؟
مش مصدقة بجد.. يعني المعتقلين بعد ما قعدوا في زنازين أمن دولة
متكهربين، منفوخين، واكلين نايمين مايتين، ويعملوا كده؟!
قلة أصل صحيح!

يا جماعة أنتم مش حاسيين بالكارثة أصلا
دلوقتي بعد تجميد أمن دولة، هاتحصل أزمة كبيرة جدا، السد العالي مش هايكفينا كهربا
يعني دلوقتي إحنا هانور بكهربا السد العالي، ولا هانتكهرب بيها؟؟؟.. هاتبقى فيه أزمة كهربا حقيقية
وبعدين من دلوقتي سعر النفخ في البنزينات زاد الضعف، هايعمل إيه بقى المواطن العادي؟؟ عشان يوفر لعائلته مستوى نفخ محترم؟؟؟ ولا هاتوصل بينا الحالة إننا نتنفخ عند العجلاتية بقى؟؟ أتقوا الله هانتنفخ فين بعد أمن دولة؟ مافيش إي إحساس بالمسئولية خاااااااااااالص؟ الشعب هايمشي يهر
ش ويشد في شعره.. عشان مش لاقي نفخ وكهربا بعد ما كانوا متوفرين له مجانا في أمن دولة!


أنا بناشد كل معتقل أصيل،
وكل مصري يقدر العشرة
ننزل يوم الجمعة الجاية نرد الجميل لأمن دولة
الشعب وأمن دولة إيد واحدة
بعد المجزرة اللي حصلت في الإسكندرية لأمن دولة..
أنتوا متخيلين يعني إيه متظاهرين
يهاجموا رصاص أمن دولة بصدورهم؟!
إيه مافيش إنسانية، مش رصاص حي ده، مش حرام!
والرصاصة يا عيني تطلع تلاقي صدر قصادها
ويا تدخل صدره وتطلع من الناحية التانية ميته على
ويا صدر المتظاهر يبلعها!
فين حقوق الرصاص تيجي تشوف اللي بيحصل.
مافيش عندكم رصاصات صغيرين تخافوا عليهم؟!


إحنا لازم ننزل في كل ميادين مصر
ونكون متكهربين ومنفوخين، وناشد كل واحد ربنا فاتحة عليه
ليك أخوات مش هاتقدر تدفع تمن الكهربا بعد
ما فقلوا منفذها المجاني الوحيد
هات معاك صاعق كهربي ومنفاخ محمول.
وكهرب أخواتك وأنفخهم في الميدان
لأزم كلنا نكون إيد واحدة لحد الأزمة دي ما تعدي
وكل متكهرب يكهرب أخوه اللي مش متكهرب
ونغمي عيونا ، وتربط إيدينا ورجلينا، عشان
نعرف أمن دولة إن تعليمه ما رحش هدر
وبقينا بنعرف نمشي في الضلمة، ونط نطة الأرنب كمان!

وأنا أوعدكم.. إن أول ما نضغط على الجيش
يرجع أمن دولة ولما يرجع....
ها يدخل خدمة كهربني شكرا وأنفخني شكرا
في كل بيت في مصر
مش لازم تتعب نفسك وتروح لحد أمن دولة
أنت أتصل ويصلك مندوبنا أينما كنت.. وبدون مصريف شحن
وبرضو أنا متأكدة إن أمن دولة، هايصرفلنا شهرين تعذيب
ونفاخة بالكهربا مع كل بطاقة تموين، وقفنا جنبه
لازم كلنا نتكاتف يا جماعة عشان أمن دولة يرجع!.
ولو حد نسي كفاية
إن يحط لامبة على أي حتة في جسمه.
ولما تنور هايفتكر أمن دولة

يعني الحزب الوطني راح ومعاه الخمسين جنيه والكنتاكي
والفريق شفيق راح ومعاه البلوفر والبونبوني
ودلوقتي أمن دولة يروح ومعاه النفخ والكهربا؟؟



أوعي تنسي أمن دولة يا مصر
أوعي تنسي أمن دولة يا مصر